Paulo wakalemba ayi: “Ceebo kwiinda mumulawo ndakafwa kumulawo kwaamba ayi mbe muumi kuli Lesa.”​—Gala. 2:19, NWT.

Makani Paulo ngaakalemba akalinga kucatene aciteente cinene ncaakalinga kulwiita Beneklistu bamumabungano aku Galatiya. Beneklistu bamwi kumusena uku bakalinga kukonkela shakalinga kwiisha bafundishi bakubeca. Basankwa abo bakalinga kwiisha ayi kwaamba ayi muntu akapuluke alyeelete kukonkela Mulawo wakwe Mose, bunene bunene mulawo wakupalulwa. Nacibi boobo, Paulo wakalinga kucishi kwaamba ayi Lesa wakaukushaawo mulawo wakupalulwa. Wakabasansulwita kabotu munshila icafwa kunyumfwisha alimwi akubacafwa kubona patuba kwaamba ayi njiisho ya kukonkela mulawo wakupalulwa yakalinga yakubeca, alimwi ici cakayumya lushomo lwa bamakwesu pamakani acilubula cakwe Yesu Klistu.​—Gala. 2:4; 5:2.

Baibo ilaamba cakuteenda mweela ayi na muntu wafwa, taakuwo ncanyumfwa na kushiba. (Shiku. 9:5) Aboobo Paulo ndyaakaamba ayi: “Ndakafwa kumulawo,” wakalinga kusansulula ayi Mulawo wakwe Mose tawakalinga kucitewo nkusu pali nguwe. Sombi wakalinga kushomete cakutatoonsha kwaamba ayi kwiinda mukushoma mucilubula ‘wakaba muumi kuli Lesa.’

Mulawo ngowakapa kwaamba ayi bukaalo bwakwe Paulo bwaaluke. Munshila nshi? Bweenka mbwakasansulula ayi “tulishi kwaamba ayi muntu inga taalulami pameenso akwe Lesa kwiinda mukukonkela Milawo, sombi kwiinda mukushoma muli Yesu Klistu.” (Gala. 2:16) Nacibi boobo, ncakwiila kwaamba ayi Mulawo wakakumanisha cintu cimwi ciyandika. Paulo wakalwiita bene Galatiya ayi: “Lesa wakabika Milawo kwaamba ayi bantu beshibe shibiibi shabo kushikila luseke ulo lwa mulunyungu lwakwe Abulaamu lwakaambwa mucipangano ndilwakesa.” (Gala. 3:19) Ncakwiila, kwiinda mu Mulawo cakabonekela patuba kwaamba ayi bantu batamaninite inga tabacikoonshi kutolelela kuukonkela kabotu mulawo, aboobo bakalinga kuyandika mulambu umaninite. Aboobo Mulawo wakacafwa bantu kushiba kwaamba ayi Yesu ngowakalinga “luseke lwa mulunyungu lwakwe Abulaamu.” Muntu wakalinga kwaambwa ayi uliluleme na kaacita shintu shitondesha ayi alicite lushomo muli Yesu Klistu. (Gala. 3:24) Paulo wakesa mukunyumfwisha cancine ici mukwiinga mulawo ngowakamucafwa kusumina alimwi akushoma muli Yesu. Aboobo ici cakapa Paulo ‘kufwa kumulawo’ akuba “muumi kuli Lesa.” Mulawo teshi ngowakalinga kumweendelesha ano, sombi wakatalika kweendeleshekwa a Lesa.

Aya ngomakani antu womwi Paulo ngakaamba munkalata njaakalembela bene Loma ayi. “Aboobo nobamakwesu, amwebo mwakafwa kulansha ku Mulawo kwiinda mumubili wakwe Klistu . . . Twakaangululwa ku Mulawo, mukwiinga twakafwa kuceeco cakalinga kutwaangite.” (Loma. 7:4, 6) Palilembo ili alimwi a Bene Galatiya 2:19, palatondesha ayi Paulo taakalinga kwaamba pa kufwa ceebo cakoomboloshekwa mbuli mubiibi kweelana a Mulawo. Wakalinga kwaamba pamakani akwaangululwa. Paulo alimwi abantu bamwi tabakalinga kweendeleshekwa a Mulawo. Bakaangululwa kukweendeleshekwa a Mulawo ceebo cakushoma mucilubula cakwe Klistu.