1. Ino Yehova wakacita buyani kuli ndiswe soonse?

 YEHOVA ngowakatusenya pafwiifwi anguwe soonse. (Joni 6:44) Amuyeeyebo cancine ici mbocisansulula. Yehova ndyaakalinga kulangilisha cakubikila maano pabantu boonse bali mucishi capanshi, wakabona cimwi cilibetele muli ndimwe​—nkokwaamba ayi moyo ushomeka alimwi weenga waba alusuno pali nguwe. (1 Maka. 28:9) Yehova alimushi, alamunyumfwishisha, alimwi alimusuni. Cancine ciyuminisha abuumbi!

2. Ino Yesu wakaamba nshi citucafwa kunyumfwishisha Yehova mbwabikila maano ku mbelele Shakwe?

² Yehova alamubikila maano abuumbi alimwi alabikila maano akubamakwesu abenankashi boonse. Kwaamba ayi atucaafwe kunyumfwishisha cancine ici, Yesu wakeelanya Yehova kumweembeshi. Ino mweembeshi inga wacita buyani na mbelele yomwi pa mbelele shili 100 yasoweka? Alashiya “shili 99 mutulundu akuya mukuyandoola yeeyo yasoweka.” Na waicana mbelele iyo taikalalili paceebo cakwaamba ayi yalinga yasoweka. Sombi alasangalala. Ino nciinshi ncetutokwiiyawo? Mbelele yomwi ayomwi ilayandika abuumbi kuli Yehova. Yesu wakaamba ayi: ‘Ishiwanu uli kwiculu taasuni kwaamba ayi womwi wa baaba baana baniini alobe.’​—Mate. 18:12-14.

3. Ino nshiinshi nsheshi twiiye mumutwi uyu?

³ Ncakutatoonsha kwaamba ayi taakuwo weenga wasuna kucita ceenga calengesha bamakwesu abenankashi kulefuka. Ino inga twacita buyani kwaamba ayi tuleye kucita sheenga shakalasha bamwi? Alimwi ino inga twacita buyani na umwi watukalasha? Tutocana shikumbulo kumiipusho iyi mumutwi uyu. Ano cakutaanguna, amuleke twiiye shiinji pa maswi akwaamba ayi “baana baniini aba” ngotucana mulilembo lyakwe Mateyo capita 18.

4. Ino maswi akwaamba ayi “baana baniini aba” alasansulula baani?

⁴ Maswi akwaamba ayi “baana baniini” alasansulula bashikwiiya bakwe Yesu boonse. Inga caba ayi bamwi mbamanene alimwi bamwi mbacanike, sombi boonse bali mbuli “baana baniini” munshila yakwaamba ayi balasumina kwiishikwa a Yesu. (Mate. 18:3) Nabi kwaamba ayi balicite nkulilo, mibo alimwi balabona shintu munshila shipusenepusene, boonse balacita shintu shitondesha ayi balashoma muli Klistu. Aboobo Klistu alibasuni abuumbi.​—Mate. 18:6; Joni 1:12.

5. Ino Yehova alalinyumfwa buyani na umwi wakalasha musebenshi Wakwe?

⁵ “Baana baniini aba” boonse balayandika abuumbi kuli Yehova. Kwaamba ayi tunyumfwishishe Yehova mbwaalinyumfwa, amuyeeye mbotulinyumfwa pabaana. Baana balayandika abuumbi. Aboobo tulabashitilisha mukwiinga tabaciteewo nkusu, tabacishi shiinji, alimwi tabacite busongo bucite bamanene. Alimwi ncancine kwaamba ayi tatunyumfwiwo kabotu na muntu umwi kaalengesha bamwi kupenga, nacibi boobo, tulalinyumfwa cibiibi abuumbi na umwi kaapensha mwaana. Ubu bweenka Yehova alakwe mbwaasuni kutushitilisha alimwi alakalashikwa na umwi wakalasha musebenshi Wakwe!​—Isa. 63:9.

6. Kweelana a 1 Bene Kolinto 1:26-29, ino bantu bamucishi balababona buyani bashikwiiya bakwe Yesu?

⁶ Ino bashikwiiya bakwe Yesu bali anga ‘mbaana baniini’ munshila nshi imwi? Kweelana abantu bamucishi, ino muntu uyandika ngumuntu uli buyani? Mubile, upukite, alimwi ucite nkusu. Ano bashikwiiya bakwe Yesu baanji teshi mbobabete ubo. Aboobo bantu bamucishi balababona ayi ‘mbaana baniini’ batayandiki alimwi bataaku mbobabete. (Amubelenge 1 Bene Kolinto 1:26-29.) Nacibi boobo, Yehova teshi mbwababona.

7. Ino Yehova alisuni ayi tunobabona buyani bamakwesu abenankashi?

⁷ Yehova alibasuni basebenshi bakwe boonse, inga caba ayi bekala mucancine kwa myaaka iinji na mpashi bakeeya cancine coonono. Bamakwesu abenankashi boonse balayandika kuli Yehova, aboobo aswebo mbotweelete kubabona. Mukwiinga “twakacatanishikwa pantu pomwi bweenka mbuli shipansha sha mubili womwi,” tulisuni kutondesha lusuno kubamakwesu boonse, kuteshibo kubamwi. (Loma. 12:5) Tulyeelete kutondesha ayi tulibasuni alimwi akuleya kubakalasha. Alimwi na twashiba ayi kuli umwi ngotwakalasha, tatweelete kulubaakobo anga taakuwo cacitika. Ino nshiinshi sheenga shapa kwaamba ayi bamwi bakalashikwe? Bamakwesu bamwi mpashi ceebo ca nkulilo balalisukama ceebo cakuyeeya bamwi mbobababona. Bamwi bakeeya cancine coonono aboobo ndyebatokwiiya kwaamba ayi balyeelete kulekelela bamwi babakalasha. Muli moonse mweenga cabeta, tulyeelete kucita nsheenga twacikonsha kwaamba ayi tutolelele kuba muluumuno abamwi. Nacibi boobo, muntu uyo ukalashikwa lyoonse kubamwi alyeelete kushiba kwaamba ayi uyu teshi mubo ubotu, aboobo alyeelete kusebenselawo. Lyalo ndyeenga waba alusangalalo alimwi abushicibusa bubotu abamakwesu abenankashi.

8. Ino nshiinshi bantu nshobakalinga kubona kuyandika Yesu ndyaakalinga pacishi capanshi, isho shakakuma bashikwiiya bakwe?

⁸ Ino nciinshi cakapa kwaamba ayi Yesu aambe pamakani a “baana baniini aba”? Bashikwiiya bakwe bakamwiipusha mwiipusho ayi: “Ino ngani munene mu Bwaami bwakwiculu?” (Mate. 18:1) Ba Juda baanji paciindi cilya bakalinga kubikila maano abuumbi kumakani akuba uyandika kwiinda bamwi. Musankwa umwi wakeeya abuumbi wakaamba ayi: “Kulemekwa abamwi alimwi akupuka shakalinga shintu shiyandika abuumbi mubuumi bwabo.”

9. Ino bashikwiiya bakwe Yesu bakalinga kweelete kucita nshi?

 ⁹ Yesu wakalinga kucishi kwaamba ayi ba Juda baanji bakalinga kuyeeya ayi kulibona kuyandika kwiinda bamwi kwakalinga cintu ciyandika, aboobo bashikwiiya bakwe bakalinga kweelete kusebensa cankusu kwaamba ayi baalule mbobakalinga kubona shintu. Wakabalwiita ayi: “Munene pali ndimwe ulyeelete kuba mbuli mwanike alakwe mweendeleshi [utootanjilila, NWT] ulyeelete kuba musebenshi wanu noonse.” (Luka 22:26) Inga twatondesha ayi tuli ‘banike’ na katubona bamwi ayi balitwiinditeewo. (Filip. 2:3) Kulibona munshila iyi inga kwatucafwa kuleya kukalasha bamwi.

10. Ino ngamakani nshi Paulo ngakaamba ngotweelete kubikilaako maano?

¹⁰ Bamakwesu abenankashi boonse kuli nshila shimwi mbobatwiinditeewo. Ncuubu kunyumfwishisha cancine ici na katubikila maano kumibo yabo ibotu. Tulyeelete kubikila maano kumakani akululika Paulo ngaakalwita bene Kolinto ayi: “Anu ngani wakakupa bunene pabamwi? Sa te nguLesa wakakupa shoonse nshoocite? Ino ono inga walisumpula buyani pashintu shakupekwabo?” (1 Koli. 4:7) Aboobo tulyeelete kuleya kupa bamwi kunootubona ayi tulayandika abuumbi na swebo sobeene kunoolibona ayi tulayandika kwiinda bamwi. Kucakubonenaako bamakwesu bacishi kabotu kwaamba makani na benankashi bacite shiiyo sha Baibo shiinji, balyeelete kulumbaisha Yehova lyoonse pasheesho nshobacikonsha kucita.

11. Ino Yesu wakalinga kwiisha nshi ndyaakaamba cikoshanyo ca mwaami amusebenshi wakwe?

¹¹ Pesule lyakucenjesha bashikwiiya bakwe pamakani akukalasha bamwi, Yesu wakaamba cikoshanyo ca mwaami amusebenshi wakwe. Mwaami wakalekelela musebenshi wakwe ndyaakaalilwa kuboosha nkongole inene njaakalinga kucite. Lyalo lakwe wakaalilwa kulekelela musebenshinyina wakalinga kucite nkongole ya maali aniinibo. Aboobo mwaami wakacata musebenshi utacite nkumbu uyo akumubika mujeele. Ino nshiinshi nshetutokwiiyaawo? Yesu wakaamba ayi: “Abalo baTa bali kwiculu mbweshi bakacite kumuntu womwi awomwi wa mulikoto lyanu, utalekeleli mukwabo amoyo woonse.”​—Mate. 18:21-35.

12. Ino nshiinshi shicitika na twakaka kulekelela bamwi?

¹² Nshaakacita musebenshi tashikwe kumuletelabo mapensho lakwe eenka sombi akubamwi. Cakutaanguna, taakwe kunyumfwila nkumbu alimwi aluse musebenshinyina, “wakamwaangisha kushikila akalipile nkongole.” Cabili, wakakalasha basebenshinyina abo bakabonaako nshaakacita. “Ono basebenshinyina bamwi ndyebakabona cakacitika, bakalala abuumbi.” Aswebo nshetucita shilakuma bamwi. Ino nciinshi ceenga cacitika na twakaka kulekelela muntu umwi watukalasha? Cakutaanguna, nkokwaamba ayi twamukalasha mukwiinga twakakaka kumulekelela, alimwi mpashi twamusuula akwaalilwa kumutondesha lusuno. Cabili, tulapa bamwi mulibungano kutalinyumfwa kabotu na babona kwaamba ayi tatutoonyumfwana amuntu uyo.

13. Ino nshiinshi nshomweeya ku shakacitikila painiya umwi?

¹³ Kulekelela bamakwesu abenankashi kulatucafwa kulinyumfwa kabotu alimwi kulapa bamwi kulinyumfwa kabotu. Ishi nsheshakacitikila nankashi waliina lya Crystal. * Nankashi umwi mulibungano wakamukalasha. Crystal wakaamba ayi: “Wakalinga kwaamba maswi akalasha abuumbi akalinga kunjasa kumoyo anga ni naifi. Nshindakalinga kusuniiwo akusebensaakwe pomwi muncito yakushimikila. Ndakacileka kusebensa cankusu alimwi calusangalalo muncito yakushimikila.” Nabi kwaamba ayi Crystal wakakalala, taakwe kubikila nankashi uyo mfundilishi na kutolelela kuyeeya mbwakalinga kulinyumfwa. Wakaliceesha akukonkela kululika kwamu Malembo nkotucana mu Njashi Yamulindilishi ya October 15, 1999 pamutwi waamba ayi “Amulekelele  Kuswa Panshi lya Moyo.” Aboobo wakamulekelela nankashi uyo. Crystal wakaamba ayi: “Ndakanyumfwishisha kwaamba ayi soonse tutokweelesha cankusu kwaalula buumi bwesu alimwi bushiku abushiku Yehova alaba kalibambite kutulekelela. Aboobo ntolinyumfwa anga ndatula cintu cilemu abuumbi ncendalinga kuyumwite. Ndakatalika kusangalala alimwi.”

14. (a) Kweelana a Mateyo 18:21, 22, ino citoboneka mutumwi Pita wakalinga kucite lipenshi nshi? (b) Ino nshiinshi nsheenga twaciita kwaamba ayi tunoolekelela bamwi?

¹⁴ Tulicishi kwaamba ayi tulyeelete kulekelela bamwi mukwiinga ncecintu ciluleme. Nacibi boobo, mpashi tulaalilwa kucita boobo. Mpashi mutumwi Pita alakwe mbwaakalinga kulinyumfwa cimwi ciindi. (Amubelenge Mateyo 18:21, 22.) Ino inga twacita buyani? Cakutaanguna, amukutumane akuyeeya Yehova mbwaakamulekelela. (Mate. 18:32, 33) Alatulekelela camoyo woonse nabi kwaamba ayi tatweeleli kulekelelwa. (Kulu. 103:8-10) Alimwi tulicite amukuli wakwaamba ayi “aswebo tulyeelete kusunana.” Aboobo kulekelela bamwi ngu mulawo ngotweelete kukonkela. Tulyeelete kulekelela bamakwesu abenankashi. (1 Joni 4:11) Cabili, amukutumane akuyeeya shicitika na twalekelela bamwi. Kulekelela kulacafwa wooyo wakatukalasha, kulayumya lucatano mulibungano, kulashitilisha bushicibusa bwesu a Yehova, alimwi akutupa kulinyumfwa kuubilwa. (2 Koli. 2:7; Kolo. 3:14) Cakweelaako, amupaile kuli Yehova uyo utulwiita kwaamba ayi tulyeelete kulekelela bamwi. Mutalekeli Satana kwaamba ayi anyonyoole bushicibusa bubotu mbomucite abashominyinaanu. (Efe. 4:26, 27) Tulayandika lucafwo lwakwe Yehova kwaamba ayi tucikoonshe kuleya kucatwa mukoose kakwe Satana.

15. Kweelana a Bene Kolose 3:13, ino inga twacita buyani na mukwesu nabi nankashi wacita cimwi ceenga catupa kulinyumfwa cibiibi?

¹⁵ Ano ino inga mwacita buyani na mukwesu nabi nankashi wacita cimwi ceenga camupa kulinyumfwa cibiibi? Amucite nsheenga  mwacikonsha kwaamba ayi mutolelele kuba muluumuno. Amupaile akulwiita Yehova mbomutoolinyumfwa. Amupaile kwaamba ayi Yehova acafwe muntu uyo wamukalasha alimwi akucafwa ndimwe kwaamba ayi munobikila maano kumibo ibotu icite mukwesu uyo, Yehova njaasuni kumuntu uyo. (Luka 6:28) Na inga tamucikoonshi kulubaako kusheesho muntu uyo nshaakacita, amuyeeye mbweenga mwabandikaakwe. Cilacafwa abuumbi lyoonse kunokwiibaluka kwaamba ayi cilyeelete mpashi mukwesu uyo taakwe kutukalasha mukashanga. (Mate. 5:23, 24; 1 Koli. 13:7) Ndyemutoobandikaakwe mutayeeyi pashibiibi. Ino mbuyani na taasuniiwo kwaamba ayi mutalike kunyumfwana alimwi? Amutolelele kumukalikila moyo bweenka Baibo mboituyuminisha ayi “amutolelele kulekelelana.” (Amubelenge Bene Kolose 3:13.) Alimwi ciyandika abuumbi, mutamubikili mfundilishi mukwiinga kucita boobo inga kwanyonyoola bushicibusa bwanu a Yehova. Mutalekeli cili coonse kumupa kwaamba ayi mukalashikwe. Na kamucita boobo, nkokwaamba ayi ncakwiila taakuwo cintu cimwi ncemusuni bunene kwiinda Yehova.​—Kulu. 119:165.

16. Ino womwi awomwi wandiswe alyeelete kucita nshi?

¹⁶ Tulalumba abuumbi kwaamba ayi tulicite coolwe cakusebensela pomwi abamakwesu abenankashi muli “litanga lyomwi” litotanjililwa a “mweembeshi womwi”! (Joni 10:16) Libuku lya Bakamantene Mukucita Kuyanda kwa Jehova, pa peeji 165, lilaamba ayi: “Mukwiinga mulafubilaamo mulucatano ulu, amwebo mulyeelete kucita lubasu lwanu kwaamba ayi lucatano lutolelele.” Aboobo “tulyeelete kwiiya kubona bamakwesu abenankashi bweenka mbuli Yehova mbwababona. Kuli Yehova soonse tuli “baana baniini” bayandika abuumbi. Sa amwebo mbomubabona bamakwesu abenankashi? Yehova alabona alimwi alalumba pasheesho shoonse nshemucita kwaamba ayi mubacaafwe akubabikila maano.​—Mate. 10:42.

17. Ino nshiinshi nshotushinishite kucita?

¹⁷ Tulibasuni bamakwesu abenankashi. Aboobo tulishinishite kutacita cili coonse ceenga cabakalasha. Tulabona ayi bamakwesu abenankashi balitwiinditeewo, alimwi tulisuni kubalekelela kuswa panshi lya moyo. Atweeleshe kutakalashikwa kubamwi. Atusale ‘kucita shintu shileta luumuno alimwi akucafwa Beneklistu kuyuma mulushomo.’​—Loma. 14:19.