1. Ino mutumwi Pita wakalwiita bantu kucita buyani?

 Likoto linene lya basankwa abanakashi bakaya ku Jelusalemu. Bakaswa mushishi shipusenepusene alimwi bakalinga kwaamba mishobo ipusenepusene. Bushiku bulya kwakacitika cintu cimwi cikankamika. Pabushiku bweenka ubu, ba Juda bamwi bakatalika kwaamba mishobo ipusenepusene yakalinga kwaamba bantu bakaswa mushishi shipusenepusene. Ishi shakabakankamika abuumbi bantu. Nacibi boobo, makani ba Juda ngobakalinga kwaamba alimwi ashakaamba mutumwi Pita shakeendawo kubakankamika. Bakesa mukushiba kwaamba ayi inga bapuluka na kabatondesha lushomo muli Yesu Klistu. Bantu boonse bakacatwa kumoyo amakani aya. Aboobo bakeepusha ayi: “Ino tucite buyani?” Lyalo Pita wakabalwiita ayi: “Amusanduke kuswa kushibiibi shanu, mubombekwe.”​—Milimo 2:37, 38.

2. Ino tutokwiiya nshi mumutwi uyu? (Amubone cikope cili papeeji yakutaanguna.)

² Shakacitika kuswawaawo shakalinga shikankamika abuumbi. Bantu bashika ku 3,000 bakabombekwa pabushiku bulya akuba bashikwiiya bakwe Klistu. Aya ngwaakalinga matalikilo ancito inene yakucafwa bantu kuba bashikwiiya, Yesu njaakapa bashikwiiya bakwe. Amunshiku shino bashikwiiya bakwe batolelela kusebensa ncito iyi. Munshiku shino inga tatwiishi muntu kwa mawoola aniinibo lyalo akweelela kubombekwa. Inga catola myeenshi na myaaka nabi kwiindaawo kwaamba ayi shikwiiya Baibo eelele kubombekwa. Na mulicite ciiyo ca Baibo inga mwasumina kwaamba ayi kucafwa muntu kuba shikwiiya wakwe Yesu kulayandika kusebensa cankusu. Mumutwi tutokwiiya nsheenga twaciita kwaamba ayi tucafwe shikwiiya Baibo kuya panembo akubombekwa.

3. Kweelana a Mateyo 28:19, 20, ino shikwiiya Baibo alyeelete kucita nshi kwaamba ayi aye panembo akubombekwa?

³ Shikwiiya Baibo kaatana kubombekwa, alyeelete kukonkela nshatokwiiya kuswa mu Baibo. (Amubelenge Mateyo 28:19, 20.) Na shikwiiya Baibo kaakonkela nshatokwiiya, ulaba bweenka mbuli “muntu ucite maano” Yesu ngwakaambawo mucikoshanyo, wakayakila ŋanda yakwe palibwe. (Mate. 7:24, 25; Luka 6:47, 48) Ino inga twacita buyani kwaamba ayi tucafwe shikwiiya Baibo kukonkela nshatokwiiya? Amuleke tubandike shintu shotatwe nsheenga twaciita.

4. Ino inga twaciita buyani kwaamba ayi tucafwe shikwiiya Baibo kutolelela kukonkela nshatokwiiya kwaamba ayi eelele kubombekwa? (Amubone kabokosi kacite mutwi utokwaamba ayi “ Amucafwe Shikwiiya Baibo Kuba Ansheenga Wacita Akushiba Mbweenga Washikumanisha.”)

⁴ Amucafwe shikwiiya Baibo kuba ansheenga wacita. Ino nceebonshi mulyeelete kucita boobo? Amuyeeye pacakubonenaako ici: Na mutoya pa mushinso ulaamfu, mpashi inga mwasuna kwiimikanaako akubonaako misena imwi ibotu mbuli milonga atulundu. Kucita boobo inga kwamucafwa kutabikila maano ku kulaampa kwa mushinso. Na shikwiiya Baibo walibikila shakucita nsheenga wakumanisha paciindi ciniini, cilaakumucafwa kubona ayi inga wacikonsha kuya panembo akubombekwa. Kwaamba ayi mucafwe shikwiiya Baibo kuya panembo, amusebenseshe lubasu lwa “Nsheenga Mwaciita” mulibuku lya Amusangalale Abuumi Kwamuyayaya! Na mwamanisha kwiiya ciiyo comwi acomwi, amubandike mbweenga kukonkela shili palubasu lwa “Nsheenga Mwaciita” kwacafwa shikwiiya Baibo kukonkela nshaaswa mukwiiya. Na kuli shimwi nshemutoyeeya ayi shikwiiya Baibo alyeelete kusebenselawo inga mwashilemba palubasu lwa “Shimwi.” Ciindi aciindi amubandike anguwe akubona nsheenga wakumanisha paciindi ciniini asheesho nsheenga wacikonsha mukuya kwaciindi.

5. Kweelana a Maako 10:17-22, ino nshiinshi Yesu nshaakalwiita musankwa mubile kucita, alimwi ino nceebonshi?

 ⁵ Amucafwe shikwiiya Baibo wanu kwaalula shimwi mubuumi bwakwe. (Amubelenge Maako 10:17-22.) Yesu wakalinga kucishi kwaamba ayi cakalinga ciyumu kumusankwa mubile kuulisha shintu shakwe shoonse. (Maako 10:23) Nabi kwaamba ayi tacakalinga cuubu, Yesu wakalwiita musankwa uyu kukonkela nshaakamulwiita. Ino nceebonshi? Nceebo cakwaamba ayi Yesu wakalinga kumusuni. Cimwi ciindi inga twaalilwa kuyuminisha shikwiiya kukonkela nshatokwiiya ceebo cakuyeeya ayi taalibambite kwaalula shimwi shiyandika. Inga catola ciindi kwaamba ayi bantu baalule buumi bwabo akufwala buntu bupya. (Kolo. 3:9, 10) Ano na mwafwambaana kucafwa shikwiiya Baibo kubona nshaeelete kusebenselawo inga camucafwa kucita boobo. Kucita boobo kulatondesha ayi mulamubikila maano.​—Kulu. 141:5; Tus. 27:17.

6. Ino nceebonshi tulyeelete kwiipusha shikwiiya Baibo kwaamba mbwaatoyeeya?

⁶ Cilayandika abuumbi kwiipusha shikwiiya Baibo kwaamba mbwaatoyeeya pamakani ngomutobandikaawo. Ici cilaakumucafwa kushiba shikwiiya Baibo mbwaatoolinyumfwa alimwi anshashoma. Kucita boobo ciindi aciindi, kulaakupa kwaamba ayi cibe cuubu kubandikaakwe makani eenga amubeta ayumu kushoma. Libuku lya Amusangalale Abuumi Kwamuyayaya! lilicite miipusho iinji yeenga yamucafwa kushiba shikwiiya Baibo nshatoyeeya. Kucakubonenaako ciiyo 04 muli mwiipusho wakwaamba ayi: “Mutobona buyani, ino Yehova alanyumfwa buyani na kamumwiita liina lyakwe?” Muciiyo 09 muli mwiipusho wakwaamba ayi: “Ino ngamakani nshi ngeenga mwasuna kupaililaawo?” Pakutaanguna mpashi inga caba ciyumu shikwiiya Baibo kukumbula miipusho iyi. Inga mwamucafwa kwiinda mukumwiisha kuyeeya pa malembo alimwi ashikope shili mulibuku.

7. Ino inga twaciita buyani kwaamba ayi shakubonenaako shabamwi shicafwe shikwiiya?

⁷ Na shikwiiya Baibo wanyumfwishisha nshaeelete kucita, amwaambe shakubonenaako sheenga shamucafwa kucita boobo. Kucakubonenaako, na shikwiiya Baibo alaalilwa kucanika kumabungano, inga mwamutondesha vidyo icite mutwi utokwaamba ayi Yehova Wakandama Kabotu icanika muciiyo 14, palubasu lwa “Amulangweetewo Ashimwi.” Inga mwacana mavidyo aya palubasu lwa “Amulangweetewo Ashimwi” a “Amwiiyilewo Ashimwi” mulibuku lya Amusangalale Abuumi Kwamuyayaya! * Muteelanyi shikwiiya Baibo wanu ku umwi kwiinda mukwaamba ayi, “Na mbomweebela muvidyo bakacikonsha, amwebo inga mwacikonsha.” Amuleke shikwiiya Baibo aliyeeyele mwiine. Amwaambe shintu shakacafwa muntu ngomweebela muvidyo kukonkela njiisho shamu Baibo. Mpashi inga mwaamba palilembo na cintu cimwi cakamucafwa. Na kacikonsheka amumuyuminshe kubona Yehova mbwakacafwa muntu ngomweebela muvidyo.

8. Ino inga twacita buyani kwaamba ayi tucafwe shikwiiya Baibo kusuna Yehova?

⁸ Amucafwe shikwiiya Baibo wanu kusuna Yehova. Ino nshiinshi nsheenga mwaciita? Ndyemutokwiisha shikwiiya Baibo wanu, amuyuminishe bunene pamibo yakwe Yehova. Amucafwe shikwiiya Baibo kushiba kwaamba ayi Yehova ngu Lesa usangalete ucafwa baabo bamusuni. (1 Timo. 1:11; Ebu. 11:6) Amucafwe shikwiiya kushiba kwaamba ayi kukonkela nshatokwiiya kulaakumucafwa, alimwi ici cilatondesha ayi Yehova alitusuni. (Isa. 48:17, 18) Kusuna Yehova abuumbi kulaakucafwa shikwiiya Baibo kwaalula shimwi mubuumi.​—1 Joni 5:3.

9. Kweelana a Maako 10:29, 30, ino nshiinshi sheenga shacafwa shikwiiya Baibo kucileka shintu shimwi kwaamba ayi aye panembo akubombekwa?

⁹ Shikwiiya Baibo kwaamba ayi aye panembo akubombekwa, alyeelete kwaalula shiinji mubuumi. Bweenka mbuli musankwa mubile ngotwaambawo, beshikwiiya Baibo bamwi balayandika kucileka kusunisha shintu shakumubili. Na incito njobasebensa tayeendelani anjiisho shamu Baibo, inga bayandika kulangoola ncito imwi. Alimwi bamwi inga bayandika kucileka kuba abushicibusa abantu batasuni Yehova. Bamwi inga bakakwa kubeshikamukowa bapatite Bakamboni Bakwe Yehova. Yesu wakaamba ayi inga caba ciyumu kubantu bamwi kushiya shintu shoonse ishi. Nacibi boobo, wakashomesha ayi abo bamukonkela teshi bakalenshekwe nsoni. Yehova alaakubapa shoolwe shiinji kwiinda mukubapa mukwashi wakumushimu. (Amubelenge Maako 10:29, 30.) Ino inga mwacita buyani kwaamba ayi mucafwe shikwiiya Baibo wanu kufubilaamo mu cipo cibotu ici?

10. Ino mweeya nshi kuswa kushakaamba ba Manuel?

¹⁰ Amube abushicibusa ashikwiiya Baibo. Cilayandika abuumbi kutondesha shikwiiya ayi mulamubikilaako maano. Ino nceebonshi? Amunyumfwe shakaamba ba Manuel bekala ku Mexico. Kwaamba paciindi ndyebakalinga kwiiya Baibo, bakaamba ayi: “Lyoonse katutana kutalika kwiiya, bakalinga kunjiisha Baibo bakalinga kunjipusha shintu mboshakalinga kweenda mubuumi. Bakalinga kuncafwa kulinyumfwa kwaanguluka alimwi ndakalinga kubalwiita makani ali woonse. Ici cakalinga kumpa kulinyumfwa ayi balambikilaako maano.”

11. Ino shikwiiya Baibo inga wafubilaamo buyani na katucana ciindi cakubaakwe pomwi?

¹¹ Amucane ciindi cakuba pomwi ashikwiiya wanu, bweenka Yesu mbwaakalinga kucana ciindi cakuba pomwi abashikwiiya bakwe. (Joni 3:22) Na shikwiiya Baibo watolelela kuya panembo, inga mwamwiitako kuŋanda yanu kwaamba ayi mulite pomwi cakulya na kweebela pulogilamu ya JW Bulodikasiti ya mweenshi amweenshi. Shikwiiya Baibo inga wanyumfwa kabotu abuumbi  na mwamwiitako kuŋanda bunene bunene ndyekuli shakusekelela shakucishi, ciindi mpashi ndyeenga walinyumfwa kumuuninwa. Ba Kazibwe bekala ku Uganda bakaamba ayi: “Ndabona ayi ndakeeya shiinji pali Yehova ceebo cakuba pomwi abaabo bakalinga kunjiisha Baibo bweenka mbocakalinga kuba na tutokwiiya. Ndakabona Yehova mbwaabikila maano bantu bakwe alimwi alusangalalo ndobacite. Ishi nshendakalinga kusuni mubuumi bwangu.”

12. Ino nceebonshi tulyeelete kuya abeshikushimikila bapusenepusene kuciiyo ca Baibo?

¹² Amuye abeshikushimikila bapusenepusene kuciiyo canu ca Baibo. Cimwi ciindi inga twalinyumfwa ayi palibo kabotu kuya sweenka kuciiyo ca Baibo na kuya ashikushimikila womwi womwi lyoonse. Nabi kwaamba kucita boobo kulibo kabotu, inga cacafwa shikwiiya na ciindi aciindi katuya abeshikushimikila bapusenepusene. Ba Dmitrii bekala ku Moldova bakaamba ayi: “Shikushimikila womwi awomwi wakalinga kusa abaabo bakalinga kunjiisha wakalinga kusansulula makani munshila ilibetele, aboobo ici cakancafwa kunyumfwishisha makani munshila shipusenepusene. Ndyendakaya kumabungano ciindi cakutaanguna, nshikwe kunyumfwa nsoni abuumbi mukwiinga bamakwesu abenankashi baanji ndakababonawo.”

13. Ino nceebonshi tulyeelete kucafwa shikwiiya Baibo kunoocanika kumabungano?

¹³ Amucafwe shikwiiya Baibo kunoocanika kumabungano. Ino nceebonshi? Nceebo cakwaamba ayi Yehova wakapa bantu bakwe mulawo wakwaamba ayi balyeelete kunobungana pomwi alimwi kubungana ndubasu lwakulambila Yehova. (Ebu. 10:24, 25) Kwiilikaawo, bamakwesu abenankashi ngomukwashi wesu wakumushimu. Ndyetuli abo pomwi kumabungano cilibo anga tutoolya shakulya shibotu pomwi ambabo. Na mwacafwa shikwiiya Baibo kunoocanika kumabungano, nkokwaamba ayi mutomucafwa kucita cintu ciyandika abuumbi ceenga camucafwa kubombekwa. Nacibi boobo, inga caba ciyumu kwaamba ayi atalike kusa kumabungano. Ino libuku lya Amusangalale Abuumi Kwamuyayaya! inga lyamucafwa buyani shikwiiya Baibo kukoma mapensho eenga amulengesha kwaalilwa kusa kumabungano?

14. Ino inga twacita buyani kwaamba ayi tuyuminishe shikwiiya Baibo kutalika kunoosa kumabungano?

¹⁴ Amubandike ciiyo 10 ashikwiiya Baibo mulibuku lya Amusangalale Abuumi Kwamuyayaya! kwaamba ayi mumuyuminishe kunoocanika kumabungano. Libuku ili kalitana kumana, beshikushimikila bamwi bakapekwa coolwe cakubandika ciiyo ici ashiiyo shabo sha Baibo. Bakaamba ayi ciiyo ici cakacafwa shiiyo shabo sha Baibo kutalika kusa kumabungano. Kwalo tamweelete kulindila ayi mukashike muciiyo 10 kwaamba ayi mukeete shikwiiya Baibo kusa kumabungano. Amumuyuminishe kunoosa kumabungano lyoonse. Shikwiiya Baibo womwi awomwi aleenda mumapensho apusenepusene. Aboobo amubikile maano kushitoyandika shikwiiya akubona mbweenga mwamucafwa. Mutalinyumfwi cibiibi na watola ciindi kwaamba ayi atalike kusa kumabungano. Amukalike moyo akutolelela kunomuyuminisha.

15. Ino nshiinshi sheenga shapa shikwiiya Baibo kuloonda?

¹⁵ Sa amwebo mwakaloondaawo kuba Kamboni Wakwe Yehova? Mpashi mwakalinyumfwa ayi inga tamucikoonshi kushimikila kuŋanda aŋanda. Na mpashi mwakaloonda kupikishikwa kubeshikamukowa abeshicibusa. Na amwebo mwakaloondaawo, inga mwanyumfwisha shikwiiya Baibo mbwaalinyumfwa. Yesu wakaamba ayi bantu bamwi inga baba aboowa. Nacibi boobo, wakayuminisha bashikwiiya bakwe kutolelela kusebensela Yehova nabi ndyebacite boowa. (Mate. 10:16, 17, 27, 28) Ino Yesu wakacita buyani kwaamba ayi acafwe bashikwiiya bakwe kuba bataloondi? Alimwi ino cakubonenaako cakwe inga mwacikonkela buyani?

16. Ino inga twacita buyani kwaamba ayi tucafwe shikwiiya Baibo kulwiitaako bamwi nshatokwiiya?

 ¹⁶ Amutolelele kucafwa shikwiiya Baibo kulwiitako bamwi nshatokwiiya. Bashikwiiya bakwe Yesu mpashi bakanyumfwa boowa ndyaakabatuma kuya mukushimikila. Nacibi boobo, Yesu wakabacafwa kwiinda mukubalwiita nkobakalinga kweelete kuya mukushimikila amakani ngobakalinga kweelete kushimikila. (Mate. 10:5-7) Ino cakubonenaako cakwe Yesu inga mwacikonkela buyani? Amucafwe shikwiiya Baibo wanu kushiba bantu mbweenga washimikila. Kucakubonenaako, inga mwamwiipusha na alishiiko muntu umwi weenga wasuna kwiiya makani amu Baibo. Lyalo inga mwamucafwa kulibambila nsheenga waamba kwaamba ayi akashimikile bamwi cancine camu Baibo munshila yuubu. Na kaceelela inga mwacitaakwe citondesho ca nsheenga waamba kwiinda mukusebensesha lubasu lwa “Bantu Bamwi Balaamba Ayi,” lucanika mulibuku lya Amusangalale Abuumi Kwamuyayaya! Ndyemutoocita boobo, amubikile maano kukwiisha shikwiiya mbweenga wasebensesha Baibo kukumbula miipusho munshila yuubu alimwi yabulemu.

17. Ino lilembo lya Mateyo 10:19, 20, 29-31, inga twalisebensesha buyani kucafwa shikwiiya kunoocinka manungo muli Yehova?

¹⁷ Amucafwe shikwiiya Baibo wanu kushoma muli Yehova. Yesu wakalwiita bashikwiiya bakwe ayi Yehova alaakunoobacafwa mukwiinga alibasuni. (Amubelenge Mateyo 10:19, 20, 29-31.) Amucafwe shikwiiya Baibo kwiibaluka kwaamba ayi Yehova alaakunoomucafwa alakwe. Inga mwamucafwa kucinka manungo muli Yehova kwiinda mukupaila anguwe pashakucita nshaakasala. Ba Franciszek bekala ku Poland bakaamba ayi: “Bakalinga kunjiisha Baibo liinji na batopaila, bakalinga kwaamba pashakucita nshendakasala. Ndyendakabona Yehova mbwaakalinga kukumbula mipailo yabo, anebo ndakatalika kupaila. Ndakabona Yehova mbwaakalinga kuncafwa na ndasenga kuncito kwaamba ayi bansuminishe kuya kumabungano alimwi akukubungana kunene.”

18. Ino Yehova alalinyumfwa buyani pancito Beneklistu njobasebensa?

¹⁸ Yehova alababikilaako maano abuumbi beshikwiiya Baibo besu. Alimwi alicishi Beneklistu mbobasebensa cankusu kucafwa bantu kusena pafwiifwi anguwe alimwi alibasuni. (Isa. 52:7) Na pacecino ciindi tamucitewo ciiyo ca Baibo, inga mwatolelela kucafwa shiiyo sha Baibo kuya panembo akubombekwa kwiinda mukuya abeshikushimikila bamwi kushiiyo shabo.