1. Ino nceebonshi basebenshi bakwe Yehova inga balinyumfwa kuumuninwa cimwi ciindi?

 CIMWI ciindi soonse tulalinyumfwa kuumuninwa. Nacibi boobo, bamwi balalinyumfwa boobo kwaciindi ciniinibo, sombi bamwi cilatola ciindi. Inga twalinyumfwa kuumuninwa nabi ndyetuli abantu baanji. Bamwi balalinyumfwa kuumuninwa ceebo cakwaalilwa kucana beshicibusa mulibungano lipya. Bamwi balalinyumfwa kuumuninwa na balongela kumusena kumwi kulaale akushiya mukwashi wabo. Bamwi balalinyumfwa kuumuninwa ceebo cakufwitwa muntu ngobasuni. Beneklistu bamwi, bunene bunene abo bakeeya cancine conoono, balalinyumfwa kuumuninwa ceebo cakukakwa na kupikishikwa kubeshikamukowa na kubeshicibusa bateshi Bakamboni.

2. Ino njimiipusho nshi njeshi tubandike?

² Yehova alitushi kabotu aboobo na twalinyumfwa kuumuninwa, alashiba alimwi alisuni kutucafwa kucileka kulinyumfwa boobo. Ino Yehova alatucafwa buyani? Ino nshiinshi nsheenga twaciita kwaamba ayi tutanoolinyumfwa kuumuninwa? Alimwi ino nshiinshi nsheenga twaciita kwaamba ayi tucafwe bamwi mulibungano balinyumfwa kuumuninwa? Amuleke tubandike shikumbulo kumiipusho iyi.

3. Ino Yehova wakatondesha buyani ayi wakalinga kumubikila maano Elija?

³ Yehova alisuni ayi basebenshi bakwe boonse banooba basangalete. Yehova ali pafwiifwi awomwi awomwi wandiswe alimwi alashiba na twalinyumfwa kuumuninwa. (Kulu. 145:18, 19) Amuyeeye Yehova mbwaakabikila maano kumushinshimi wakwe Elija alimwi ambwakamucafwa. Musankwa ushomeka uyu, wakekalaako  paciindi shintu ndyeshakalinga shiyumu muciindi ca bene Isilaeli. Bantu bakalinga kupukite mu Isilaeli batakalinga kusuni Yehova bakalinga kupensha basebenshi bakwe alimwi bakalinga kusuni bunene kucaya Elija. (1 Baam. 19:1, 2) Alimwi mpashi cimwi cakapa Elija kulinyumfwa kuumuninwa, nkuyeeya ayi ngo mushinshimi eenkabo wakacaala wakalinga kusebensela Yehova. (1 Baam. 19:10) Aboobo cakufwambaana Yehova wakacitaawo comwi kwaamba ayi acafwe Elija. Yehova wakatuma munjelo kuya mukucafwa mushinshimi wakwe kushiba ayi taakalinga eenka. Munjelo wakalwiita Elija ayi kwakalinga bamwi baanji bakalinga kusebensela Yehova cakushomeka!​—1 Baam. 19:5, 18.

4. Ino lilembo lya Maako 10:29, 30, lilatondesha buyani Yehova mbwaabikila maano kubasebenshi bakwe bashiya beshikamukowa abeshicibusa baabo?

⁴ Yehova alicishi kwaamba ayi na twasala kumusebensela tulashiya shiinji mubuumi. Cintu comwi nceenga twashiiya nducafwo kuswa kubeshikamukowa abeshicibusa besu batalambili Yehova. Mpashi ceebo cakulisukama mutumwi Pita wakeepushawo Yesu ayi: “Twashiiya shoonse akumukonkela; ino tulaakupekwa nshi?” (Mate. 19:27) Calusuno Yesu wakalwiita bashikwiiya bakwe ayi balaakucana mukwashi unene wakumushimu. (Amubelenge Maako 10:29, 30.) Alimwi Yehova Ishiwesu wakwiculu, wakashomesha ayi alaakucafwa baabo basalawo kumusebensela. (Kulu. 9:10) Amuleke tubandike nsheenga mwaciita kwaamba ayi Yehova amucaafwe kutanoolinyumfwa kuumuninwa.

5. Ino mbubotu nshi mbweenga mwacana na kamuyeeya Yehova mbwaatomucafwa?

⁵ Amuyeeye Yehova mbwaatomucafwa. (Kulu. 55:22) Kucita boobo kulaakumucafwa kushiba kwaamba ayi tamubete nweenka. Nankashi uteebetwe waliina lya Carol, * utacite beshikamukowa babete mucancine wakaamba ayi: “Na ndakutumana kuyeeya Yehova mbwancafwa mumapensho ngondeendaamo, ndalinyumfwa ayi nshibete neenka. Ici cilampa kushoma cakutatoonsha kwaamba ayi ananooncafwa lyoonse.”

6. Ino lilembo lya 1 Pita 5:9, 10, inga lyabayuminisha buyani abo balinyumfwa kuba beenka?

⁶ Amuyeeye Yehova mbwaatocafwa bashominyinaanu balinyumfwa kuba beenka. (Amubelenge 1 Pita 5:9, 10.) Mukwesu waliina lya  Hiroshi uyo wakalingaabo eenka Kamboni mumukwashi wakwe kwa myaaka iinji wakaamba ayi: “Mulibungano ncuubu kuboona ayi bamakwesu abenankashi boonse batokwiinda mumapensho. Kushiba kwaamba ayi soonse tutoocita nsheenga twacikonsha kusebensela Yehova, inga kwayuminisha baabo batacite beshikamukowa mucancine.”

7. Ino kupaila kulamucafwa buyani?

⁷ Amutolelele kucita shintu shakumushimu. Kucita boobo kuleelikawo kulwiita Yehova mbomutolinyumfwa kuswa panshi lya moyo. (1 Pit. 5:7) Nankashi wacanike waliina lya Massiel wakaamba ayi: “Cintu comwi ciyandika abuumbi cakancafwa kukoma lipenshi lya kuumuninwa, nkupaila kuli Yehova kuswa panshi lya moyo.” Nankashi uyu ndyaakasalaawo kusebensela Yehova, wakalinyumfwa kuba eenka mukwiinga mukwashi wakwe tabakalinga kusebensela Yehova. Wakatolelela akwaamba ayi: “Yehova wakalinga anga mbata kuli ndime alimwi bushiku abushiku ndakalinga kupaila kuli nguwe mankanda aanji akumulwiita mbondakalinga kulinyumfwa.”

8. Ino kubelenga Maswi akwe Lesa alimwi akukutumana kuyeeyawo kulamucafwa buyani?

⁸ Amubelenge Maswi akwe Lesa lyoonse akukutumana kuyeeya pamakani atondesha Yehova mbwaamusuni. Nankashi Bianca ulinyumfwa kulefuka ceebo cakwaambilwa maswi atabete kabotu kubeshikamukowa wakaamba ayi: “Cincafwa bunene kuliyumya, nkubelenga alimwi akukutumana kuyeeya pamakani amu Baibo, alimwi amakani aamba pashakacitika mubuumi bwa basebenshi bakwe Yehova bakale kale, abo bakeenda mubukaalo bweenka mbuli mbontokwiindaamo.” Beneklistu bamwi balebaluka malembo amwi ayuminisha mbuli Kulumbaisha 27:10 alimwi a Isaya 41:10. Bamwi balakutika kumakani akalekodwa ndyebatolibambila mabungano na kubelenga Baibo. Balaamba ayi kucita boobo kulabacafwa kutalinyumfwa bunene kuba beenka.

9. Ino kucanika kumabungano kulamucafwa buyani?

⁹ Amweeleshe kunoocanika kumabungano lyoonse. Mulaakuyuminishikwa ansheshi mukeeye alimwi mulaakubashiba kabotu bamakwesu abenankashi. (Ebu. 10:24, 25) Nankashi Massiel ngotwalinga twaambawo wakaamba ayi: “Nabi kwaamba ayi ndakalinga wansoni, ndakalinga kushinishite kunoocanika kumabungano lyoonse alimwi akukumbulawo. Kucita boobo kwakancafwa kulinyumfwa kuba pafwiifwi abamakwesu abenankashi.”

10. Ino nceebonshi kuba bushicibusa a Beneklistu bashomeka kulayandika?

¹⁰ Amube bushicibusa a Beneklistu bashomeka. Amube bushicibusa abamwi mulibungano beenga bamucafwa. Inga caba ayi mbanene na mbanike pali ndimwe nabi na balicite nkulilo ipuseneeko ayaanu. Baibo ilaamba ayi ‘busongo bulacanika kubantu bacembele.’ (Jobo 12:12) Bacinene abalo inga beeya shiinji kuswa  kubacanike bashomeka. Defedi wakalinga mwanike abuumbi kuli Jonasani, sombi ici tacikwe kupa kwaamba ayi batabi beshicibusa. (1 Samwe. 18:1) Defedi a Jonasani bakalinga kucafwana kusebensela Yehova nabi ndyebakalinga kwiinda mubukaalo buyumu. (1 Samwe. 23:16-18) Nankashi waliina lya Irina ucite mukwashi bateshi Bakamboni wakaamba ayi: “Bamakwesu abenankashi balaba anga mbashali na beshikamukowa besu bakumushimu. Yehova inga wabapa kuba anga ngumukwashi wiine ngotuyandika.”

11. Ino nshiinshi nshomweelete kucita kwaamba ayi mube abeshicibusa?

¹¹ Nciyumu kuba abeshicibusa na ulicite nsoni. Nankashi waliina lya Ratna ucite nsoni uyo wakeeya cancine nabi ndyaakalinga kupikishikwa wakaamba ayi: “Ndakasumina cancine cakwaamba ayi ndakalinga kuyandika lucafwo kuswa kubamakwesu abenankashi mulibungano.” Nabi kwaamba ayi inga caba ciyumu kulwiitako muntu umwi mbotolinyumfwa, kucita boobo inga kwamucafwa kuba abushicibusa buyumu amuntu uyo. Beshicibusa inga basuna kumuyuminisha alimwi akumucafwa, sombi inga mwayandika kubalwiita mbweenga bacita boobo.

12. Ino kwaabanamo lubasu muncito yakushimikila inga kwamucafwa buyani kucana beshicibusa bali kabotu?

¹² Nshila yomwi mbweenga twaba abeshicibusa, nkusebensela pomwi abamwi muncito yakushimikila. Nankashi Carol ngotwalinga twaambawo wakaamba ayi: “Ndacana beshicibusa baanji kwiinda mukusebensela pomwi abenankashi bamwi muncito yakushimikila alimwi amuncito shimwi sha Bwaami. Yehova wancafwa abuumbi kwamyaaka iinji kwiinda mu beshicibusa aba.” Ncakutatoonsha kwaamba ayi kuba bushicibusa a Beneklistu bashomeka kulacafwa abuumbi. Yehova alatucafwa kukoma kutalinyumfwa kabotu mbuli kuumuninwa kwiinda mu beshicibusa besu.​—Tus. 17:17.

13. Ino ngumukuli nshi uli woonse mulibungano ngwaacite?

¹³ Uli woonse mulibungano ulicite mukuli wakuyuminisha luumuno alimwi akutondesha lusuno, kwaamba ayi kutabi uli woonse weenga kaalinyumfwa kuba eenka. (Joni 13:35) Nshetucita alimwi anshetwaamba inga shayuminisha bamwi abuumbi! Nankashi umwi wakaamba ayi: “Ndyendakeeya cancine bamakwesu abenankashi bakaba ngomukwashi wangu. Kwakubula lucafwo lwabo naakwiinga nshikwe kubaawo Kamboni wakwe Yehova.” Ino inga mwacita buyani kwaamba ayi mucafwe baabo batacite beshikamukowa mucancine kulinyumfwa kwaamba ayi bamakwesu abenankashi mulibungano balibasuni?

14. Ino nshiinshi nsheenga mwaciita kwaamba ayi mube abushicibusa abamwi?

¹⁴ Amube bushicibusa abapya. Inga twaba bushicibusa abapya kwiinda mukubatambula camaansa obilo ndyebesa kumabungano. (Loma. 15:7) Nacibi boobo, tatweelete kweelabo pakubatambula. Tulisuni kuba bushicibusa ambabo mukuya kwaciindi. Aboobo amucite shitondesha kwaamba ayi mulababikila maano. Kwakubula kubeepusha miipusho yeenga yabalensha nsoni amweeleshe kunyumfwisha mapensho ngobatokwiindaamo. Inga caba ciyumu kubamwi kumulwiita mbobatolinyumfwa, aboobo mutabakakatishi kubandika. Muciindi cakucita boobo, amubeepushe miipusho yeenga taibakalashi akukutika cakubikila maano ndyebatokumbula. Kucakubonenaako, inga mwabeepusha mbobakeeya cancine.

15. Ino Beneklistu bashimpite lwakumushimu inga bacita buyani kwaamba ayi bacafwe bamwi mulibungano?

¹⁵ Soonse mulibungano inga twaya panembo lwakumushimu na katutondesha ayi tulabikilana maano. Ici inga cakonsheka na bunene bunene bamanene mulibungano alimwi abamwi bashimpite lwakumushimu kabacita boobo.  Nankashi waliina lya Melissa wakeeya cancine kuswa kubashali bakwe banakashi wakaamba ayi: “Ndalumba abuumbi kubamakwesu abo bakalinga anga mbata kuli ndime bakalinga kucana ciindi cakuba pomwi andime akutondesha ayi balambikila maano. Lyoonse na ndisuni wakubandikaakwe, ndicite weenga wankutika.” Mukwesu wacanike waliina lya Mauricio wakalinyumfwa cibiibi akuba eenka shikumwiisha Baibo ndyaakaswa mucancine, wakaamba ayi: “Bamanene bakatondesha ayi balambikila maano alimwi ici cakancafwa abuumbi. Bakalinga kucana ciindi cakubandika andime lyoonse, kusebensela pomwi muncito yakushimikila, kundwiitako nshobakeeya ndyebakalinga kucita ciiyo ca Baibo capalwaabo alimwi akusekana andime.” Nankashi Melissa alimwi amukwesu Mauricio batosebensela Yehova muncito yaciindi coonse.

16-17. Ino nshiinshi nsheenga twaciita kwaamba ayi tucafwe bamwi?

¹⁶ Mbweenga mwacafwa bamwi. (Gala. 6:10) Ba Leo basebensa mbuli mishonali kumusena wakulaale akuli mukwashi wabo bakaamba ayi: “Liinji nkucitabo tuntu tuniini niini paciindi ceelete tutondesha ayi mulicite nkumbu. Ntokwiibaluka bushiku bumwi ndakalinga mu akisidenti. Ciindi ndyendakashika kuŋanda ndakalinga kulemete abuumbi. Lyalo beebene bamwi bakanjitaako kucakulya kuŋanda yabo. Nshintokwiibaluka nshotwakalya, sombi ncentokwiibaluka ncakwaamba ayi bakankutika cakubikila maano. Ici cakampa kunyumfwako kabotu!”

¹⁷ Soonse tulasangalala kuba pomwi a Beneklistunyineesu alimwi akubandika makani ngotweeya kumabungano mbuli, kubungana kwalubasu alimwi akukubungana kunene. Nacibi boobo, ba Carol mbotwalinga twaambawo bakaamba ayi: “Ndalinyumfwa kuumuninwa abuumbi bunene bunene ndyeendi kukubungana kwalubasu na kukubungana kunene.” Ino nceebonshi ncakaambila boobo? Wakatolelela akwaamba ayi: “Nabi kwaamba ayi ndaba pomwi abamakwesu abenankashi baanji, liinji balaba pomwi amikwashi yabo. Aboobo ici cilampa kulinyumfwa kuumuninwa abuumbi.” Bamwi cilabayumina kucanika kukubungana kunene na kubungana kwalubasu pesule lyakufwitwa muntu ngobasuni. Sa kuli mukwesu na nankashi ngomushi utokwiinda mumapensho mbuli aaya? Inga mwamwiitako kwaamba ayi akabe pomwi amukwashi wanu ndyeshi kukabe kubungana kunene na kubungana kwalubasu.

18. Ino shaamba lilembo lya 2 Bene Kolinto 6:11-13 inga twashikonkela buyani?

 ¹⁸ Amucane ciindi cakuba pomwi abamwi. Amweeleshe kucana ciindi cakuba pomwi abamakwesu abenankashi bapusenepusene bunene bunene abo balinyumfwa kuba beenka. Tulisuni ‘kutondesha lusuno [lwesu]’ bunene bunene kubaabo balinyumfwa kuba beenka. (Amubelenge 2 Bene Kolinto 6:11-13.) Nankashi Melissa ngotwalinga twaambawo wakaamba ayi: “Lyoonse twakalinga kusangalala abuumbi na bamakwesu abenankashi batwiitaako kumishaabo.” Sa kuli umwi mulibungano ngweenga mweetaako kuŋanda kumishaanu?

19. Ino ndilili ndyeenga twayandika bunene kucafwa bamakwesu abenankashi?

¹⁹ Inga kwaba shiindi shimwi bamakwesu abenankashi ndyeenga balumba bunene na twacaana ciindi cakuba pomwi ambabo. Inga caba ciyumu kubamwi kuba pomwi abeshikamukowa bateshi Bakamboni ciindi ndyekuli shakusekelela shakucishi. Mpashi bamwi kuli nshiku shimwi ndyebalinyumfwa cibiibi abuumbi, mbuli bushiku shikamukowa na shicibusa ndyaakafwa. Na twacana ciindi cakuba pomwi abamakwesu abenankashi batokwiinda mumapensho mbuli aaya, tulatondesha ayi ncakwiila ‘tulababikila maano.’​—Filip. 2:20.

20. Ino maswi akaamba Yesu palilembo lya Mateyo 12:48-50, inga atucafwa buyani na twalinyumfwa kuba sweenka?

²⁰ Kuli shiinji sheenga shalengesha Beneklistu kulinyumfwa kuba beenka cimwi ciindi. Nacibi boobo, tulyeelete kwiibaluka kwaamba ayi Yehova alishi mbotulinyumfwa alimwi liinji ulatucafwa kwiinda mubamakwesu abenankashi. (Amubelenge Mateyo 12:48-50.) Aboobo aswebo tulatondesha kulumba kuli Yehova kwiinda mukucita nsheenga twacikonsha kwaamba ayi tucafwe bamakwesu abenankashi. Nabi kwaamba ayi cimwi ciindi inga twalinyumfwa kuumuninwa, tutaluubi kwaamba ayi tatubete sweenka, Yehova alaba andiswe lyoonse!