KWAAMBA pamakani akapa kwaamba ayi beeye cancine, ba Lisa * bakaamba ayi: “Kutondesha kubota moyo kwa bamakwesu abenankashi nkokwakapa kwaamba ayi nsumine kwiiya cancine. Ubu mbocakalinga akuli ba Anne, abo bakaamba ayi: “Cintu comwi cakampa kusuna kwiiya nkubona Bakamboni mbobakalinga kutondesha kubota moyo, kuteshi nshobakalinga kwiisha.” Benankashi bobilo aba balanyumfwa kabotu kubelenga Baibo akukutumana kuyeeyawo, sombi cintu comwi cakabayuminisha abuumbi nkubona bamwi mbobatondesha kubota moyo.

Ino inga twacita buyani kwaamba ayi tutondeshe mubo wakubota moyo? Amuleke tubandike nshila shobilo: shintu nshetwaamba alimwi anshetucita. Lyalo tutobandika mbeenga twatondesha kubota moyo.

Mwanakashi musongo waambwa mulibuku lya Tushimpi capita 31 alatondesha kubota moyo mushintu nshaamba. (Tus. 31:26) Maswi ngaamba alimwi ambwaamba shilatondesha ayi ngumubotu moyo. Inga cabota abuumbi na bashali basankwa abalo kabakonkela cakubonenaako ca mwanakashi musongo pamakani ashintu nshobaamba. Bashali baanji balicishi kabotu kwaamba ayi kwaamba cabukali ku mwaana inga kwamupa kutalinyumfwa kabotu alimwi inga wakaka akubanyumfwila. Aboobo na bashali kabaamba munshila itondesha kubota moyo, cilaakuba cuubu bana babo kukutika akubanyumfwila.

Inga caba ayi muli bashali nabi sobwe, ino kubota moyo inga mwakutondesha buyani mushintu nshomwaamba? Tulacana ceenga catucafwa palubasu lwakutaanguna lwa lilembo lya Tushimpi 31:26 paamba ayi: “Lakwe ngumuntu waamba ca busongo.” Ici cileelikaawo kusala cabusongo maswi akusebensesha akwaamba muliswi litondesha kubota moyo. Aboobo inga twaliipusha ayi, ‘Sa nsheshi ŋaambe shitoolengesha bamwi kukalala, na shitoyuminisha luumuno?’ (Tus. 15:1) Ncakwiila ncintu camaano kutaanguna kuyeeyawo katutana kwaamba.

Maswi amwi kuswa mulibuku lya tushimpi alaamba ayi: “Maswi abiibi alayasa kumoyo anga ngumupeeni.” (Tus. 12:18) Na twayeeya bamwi mbweenga balinyumfwa ceebo ca nsheenga twaamba ambweenga twaamba inga catucafwa kusala kabotu shakwaamba. Ncakwiila kubota moyo kulaakutucafwa kuleya kwaamba maswi abiibi na kwaamba cabukali. (Efe. 4:31, 32) Muciindi cakuyeeya akwaamba shitabete kabotu, tulaakunookwaamba maswi ali kabotu alimwi ayuminisha. Yehova wakatondesha cakubonenaako cibotu ndyaakalinga kuyuminisha Elija musebenshi wakwe wakalinga waloonda. Munjelo wakalinga kwiimikaninaako Yehova wakaamba a Elija ‘muliswi liboombu lyakutepeta.’ (1 Baam. 19:12) Nacibi boobo, kubota moyo tacaambibo kwaamba maswi ali kabotu, sombi tulyeelete kunoocita ashintu shitondesha mubo wakubota moyo. Munshila nshi?

Tulakonkela cakubonenaako cakwe Yehova kwiinda mukwaamba akucita shintu munshila itondesha ayi tulabikila maano kubamwi. (Efe. 4:32; 5:1, 2) Ba Lisa mbotwalinga twaambawo bakaamba pa Bakamboni bakwe Yehova ayi:  “Nebo amukwashi wangu ndyetwakalwiitikwa kulonga muŋanda motwakalinga kukala kwakubula kushibishikwa ciindi kaciciliko, beebene bobilo mbotwakalingaabo mulibungano bakasenga kulofwa kuncito kwaamba ayi bese batucaafwe kulongela shintu. Paciindi ici kaantana kutalika akwiiya Baibo!” Ici cakapa kwaamba ayi ba Lisa batalike kuyeeya sha kwiiya cancine.

Ba Anne mbotwaambawo kumatalikilo abalo bakalumba pa kubota moyo Bakamboni nkobakatondesha. Bakaamba ayi: “Nshindakalinga kushomawo bantu bamwi ceebo cakwaamba ayi bantu baanji tabashomekiiwo.” Bakatolelela akwaamba ayi: “Ndyendakakumanya Bakamboni nshina kubashomawo, ndakatalika kuliipusha ayi, ‘Ino nceebonshi batotondesha kumbikila maano?’ Nacibi boobo, bakalinga kunjiisha Baibo bakalinga kumbikila maano aboobo ndakatalika kubashoma.” Ino nshiinshi shakaswaamo? “Mukuya kwaciindi ndakatalika kubikila maano kushintu nshendakalinga kwiiya.”

Kweelana anshetwabandikawo, ba Lisa aba Anne bakayuminishikwa kwiiya cancine ceebo ca shintu shibotu bamulibungano nshobakalinga kubacitila. Ici cakapa kwaamba  ayi batalike kushoma Yehova alimwi abantu bakwe.

Bantu bamwi bakashibila kubandika kabotu alimwi akumweta mweta ceebo ca nkulilo na ceebo ca kumusena nkobakala. Cilayuminisha kwaamba ayi bantu bamwi balatondesha bulemu ceebo ca nkulilo na mibo yabo. Nacibi boobo, ici tacaambi ayi balakonkela cakubonenaako cakwe Lesa.​—Amweelanye a Milimo 28:2.

Kubota moyo kwancinencine ndubasu lwa shisepo sha mushimu usalashi wakwe Lesa. (Gala. 5:22, 23) Aboobo kwaamba ayi tutondeshe mubo uyu, miyeeyo yesu anshetucita shilyeelete kutanjililwa amushimu usalashi wakwe Lesa. Kucita boobo kulaakutucafwa kukonkela cakubonenaako cakwe Yehova alimwi a Yesu. Alimwi mbuli Beneklistu tulabikila maano kubamwi. Aboobo tulacita shibotu ceebo cakwaamba ayi tulisuni Yehova Lesa alimwi abantunyineesu. Ici cilapa kwaamba ayi kubota moyo kwesu kube mubo wankusu uswa panshi lya moyo alimwi usangalasha Yehova.

Cilaba cuubu kutondesha kubota moyo kubaabo mbotushi na abo batucitila shibotu. (2 Samwe. 2:6) Nshila yomwi nkubalumba. (Kolo. 3:15) Ano ino inga twacita buyani na muntu umwi taeeleli kutondeshekwa kubota moyo?

Amuyeeye paceeci: Yehova wakatondesha cakubonenaako cibotu kwiindaawo pamakani akutondesha kubota moyo. Alimwi kwiinda mu Maswi akwe tuleeya ciiyo ciyandika pamakani akutondesha mubo uyu. Maswi akwaamba ayi “kubota moyo” alaambwa mankanda aanji mu Malembo a Bwineklistu aci Giliki. Ino Lesa alautondesha buyani mubo uyu?

Yehova alatondesha kubota moyo kubantu boonse bapacishi capanshi kwiinda mukubapa nshebayandika kwaamba ayi batolelele kuba abuumi. (Mate. 5:45) Alimwi Yehova wakatutondesha kubota moyo katutana kumushiba. (Efe. 2:4, 5, 8) Kucakubonenaako, kwaamba ayi apulushe bantu boonse, Yehova wakaaba Mwanaakwe wakashalwabo eenka. Mutumwi Paulo wakalemba ayi Yehova wakatupa cilubula “ceebo ca nkumbu shakwe shiinji abuumbi.” (Efe. 1:7, NWT) Kwiilikaawo, nabi kwaamba ayi tulabisha akumukalasha, Yehova alatolelela kututanjilila akutwiisha. Butanjilishi bwakwe bulibo anga ni ‘imfula ya tepetepe.’ (Duto. 32:2) Taakuwo nceenga twamupa ceenga ceelana ashintu shibotu nshaatucitila. Alimwi cancine ncakwaamba ayi naakwiinga Yehova taakwe kututondesha kubota moyo kwakwe, naakwiinga tatucitewo kulangila.​—Amweelanye a 1 Pita 1:13.

Ncakutatoonsha kwaamba ayi kubota moyo kwakwe Yehova kulatuyuminisha. Aboobo muciindi cakusala mbeenga twatondesha kubota moyo, tulyeelete kusebensa cankusu kukonkela cakubonenaako cakwe Yehova kwiinda mukutondesha kubota moyo kubamwi bushiku abushiku. (1 Tesa. 5:15) Na twatolelela kutondesha kubota moyo, tulaakucikonsha kuyuminisha bamwi paciindi ndyebatoyandika lucafwo. Tulaakuba bantu bayuminisha kumikwashi yesu, kubashominyineesu, kubaabo mbotusebensaabo, beshicikolonyineesu, alimwi akubaabo mbotubambenaabo.

Amuyeeye ba mumukwashi wanu na bamulibungano beenga bayuminishikwa ceebo cakutondesha kubota moyo kwanu kwiinda mushintu nshemwaamba anshemucita. Mpashi kuli bamwi mulibungano beenga bayandika kubacafwaako ncito shapalubaansa, kulima na kuboolilako shintu. Kwiilikaawo, mpashi inga mwacafwaako abaabo mbweenga mwacana muncito yakushimikila batoyandika lucafwo.

Amuleke tukonkele cakubonenaako cakwe Yehova cakutondesha kubota moyo mushintu nshetwaamba anshetucita.