1. (a) Ino Yehova watushomesha nshi? (b) Ino ‘kulangila muli Yehova’ cilaamba nshi? (Amubone “Kusansulula Maswi.”)

 YEHOVA wakashomesha buumi bubotu kunembo kubaabo boonse bamusuni. Conoonobo alaakukushaawo malwashi, buumba, alimwi alufu. (Ciyu. 21:3, 4) Abo baliceesha alimwi balangila muli nguwe, alaakubacafwa kwaalula cishi capanshi kuba paladaiso. (Kulu. 37:9-11) Alimwi alaakupa kwaamba ayi uli woonse wandiswe abe abushicibusa buyumu anguwe bwiindite pa boobu mbotucite pacecino ciindi. Ici ncoolwe cibotu abuumbi ncetutoolangila! Ano ino nceebonshi inga twashoma ayi shishomesho shakwe Yehova shilaakukumanishikwa? Yehova lyoonse alakumanisha nshaashomesha. Aboobo inga twalangila muli nguwe. * (Kulu. 27:14) Inga twatondesha ayi tulalangila muli nguwe kwiinda mukulindila cakukalika moyo alimwi calusangalalo kwaamba ayi akakumanishe shishomesho shakwe.​—Isa. 55:10, 11.

2. Ino nshiinshi Yehova nshaakacitawo kale?

² Yehova wakacitawo kale shitondesha kwaamba ayi alakumanisha nshaashomesha. Amuyeeye cakubonenaako comwi cilibetele. Mulibuku lya Ciyubululo, Yehova wakashomesha ayi muciindi cino ncetutokalaamo alaakubunganya bantu kuswa mushishi shoonse, mishobo yoonse, mumikowa yoonse alimwi amumilaka yoonse, akubacatanya mukulambila kusalalite. Likoto lilibetele ili liletwa ayi “likoto linene.” (Ciyu. 7:9, 10) Nabi kwaamba ayi mulikoto ili muli basankwa, banakashi, alimwi abaana baswa mushishi  shipusenepusene nsengwe yoonse, balicatene mbuli mukwashi womwi. (Kulu. 133:1; Joni 10:16) Abo bali mulikoto linene balasebensa cankusu muncito yakushimikila. Lyoonse balaba balibambite kulwiitako uli woonse pacishomesho ca buumi bubotu kunembo. (Mate. 28:19, 20; Ciyu. 14:6, 7; 22:17) Na muli womwi waba mulikoto linene, ncakutatoonsha kwaamba ayi cishomesho ca buumi bubotu kunembo cililibetele kulindimwe.

3. Ino Satana alisuni nshi?

³ Satana taasuniiwo kwaamba ayi munoolangila cishomesho cakwe Yehova ca buumi bubotu kunembo. Alisuni kwaamba ayi munooshoma ayi Yehova tamubikiliko maano alimwi teshi akakumanishe nshaakashomesha. Na Satana wacikonsha kutupa kucileka kulangila shishomesho shakwe Lesa, inga twacileka kushoma alimwi akucileka kusebensela Yehova.

4. Ino nshiinshi nsheshi twiiye mumutwi uyu? (Jobo 1:9-12)

⁴ Mumutwi uyu, tutokwiiya nshila Satana nshaakasebensesha ndyaakalinga kweelesha Jobo kwaamba ayi acileke kushomeka kuli Yehova. (Amubelenge Jobo 1:9-12.) Tutobandika ansheenga tweeya kuswa kucakubonenaako cakwe Jobo alimwi ancotweelete kwiibalukila kwaamba ayi Lesa alitusuni alimwi alaakukumanisha shishomesho shakwe.

5-6. Ino nciinshi cakacitikila Jobo paciindi ciniinibo?

⁵ Shintu shoonse shakalinga kweenda kabotu mubuumi bwakwe Jobo. Wakalinga kucite bushicibusa buyumu a Yehova, mukwashi unene ucatene alimwi abuboni buunji. (Jobo 1:1-5) Nacibi boobo, Jobo wakasowekelwa shintu shoonse ishi mubushiku bomwibo. Cakataanguna mbuboni bwakwe. (Jobo 1:13-17) Lyalo bana bakwe boonse mbwakalinga kusuni bakafwa. Ano amuyeeyebo kukomena kwa makatasho aya. Cilabacisa abuumbi bashali na bafwitwa mwaana womwibo. Ano amuyeeyebo Jobo amukaakwe mbobakalinyumfwa buumba akupilinganishikwa ndyebakanyumfwa ayi bana babo boonse bali 10 bafwa. Ncoceeco Jobo ncaakakwamweta shakufwala shakwe kubuumba akuliwaala panshi!​—Jobo 1:18-20.

⁶ Lyalo Satana wakalengesha Jobo kuciswa bulwashi bubiibi abuumbi alimwi bulensha nsoni. (Jobo 2:6-8; 7:5) Paciindi cimwi, Jobo wakalinga muntu ulemekwa abuumbi kumusena nkwakalinga kukala. Bantu bakalinga kuya kuli nguwe mukusenga kubapandaako maano. (Jobo 31:18) Ano paciindi ndyaakaciswa bakatalika kumutalamuka. Bamakwabo, beshicibusa bakwe, kwiilikaawo abasebenshi bakwe boonse bakatalika kumubona anga ngu muswamashi alimwi bakamukaka!​—Jobo 19:13, 14, 16.

7. (a) Ino Jobo wakayeeya ayi mapensho akwe akaswa kuli, sombi ino nciinshi ncaakakaka kucita? (b) Kweelana acikope catondeshekwa, ino ngamapensho nshi ngeenga Mwineklistu weendaamo akoshenye aayo akeendaamo Jobo amukaakwe?

⁷ Satana wakalinga kusuni Jobo kushoma ayi Yehova ngowakaleta mapensho ngaakalinga kwiindaamo ceebo cakwaamba ayi wakacita shimukalasha. Kucakubonenaako, Satana wakasebensesha muuwo unene kuwisha ŋanda mwakalinga bana bakwe Jobo bali 10 ndyebakalinga kusekelela. (Jobo 1:18, 19) Alimwi wakalengesha mulilo kuswa kwiculu uyo wakacaya shifubwa shakwe Jobo abasebenshi bakwe bakalinga kushilama. (Jobo 1:16) Mukwiinga muuwo alimwi amulilo shakaswa kwiculu, Jobo alyeelete wakayeeya ayi shakaswa kuli Yehova. Aboobo wakatalika kushoma ayi cilyeelete Yehova alikalalite ceebo ca nguwe. Nacibi boobo, Jobo wakakaka kushingana Ishi wakwiculu. Jobo wakaamba ayi Yehova ngowakalinga kumupa shintu shibotu kwa myaaka iinji. Aboobo wakayeeya ayi na wakatambula shibotu kuswa kuli Yehova nkokwaamba ayi alyeelete  kusumina akutambula shibiibi. Lyalo wakaamba ayi: ‘Liina lyakwe Yehova alilumbaishikwe.’ (Jobo 1:20, 21; 2:10) Nabi kwaamba ayi Jobo wakasowekelwa maali, baana, alimwi abuumi bubotu, wakatolelela kushomeka kuli Yehova. Sombi Satana wakatolelela kumweelesha.

8. Ino nciinshi cimwi Satana ncaakacita kwaamba ayi eeleshe Jobo?

⁸ Cintu cimwi Satana ncaakacita nkusebensesha basankwa botatwe abo bakapa Jobo kulinyumfwa anga taakuwo mbwaabete. Basankwa aba bakaamba ayi Jobo wakalinga kupenga ceebo cakwaamba ayi wakacita shilubo shiinji. (Jobo 22:5-9) Alimwi bakeelesha kumupa kushoma ayi Lesa taakalinga kubikilako maano kushintu shoonse shibotu nshaakalinga kucita. (Jobo 4:18; 22:2, 3; 25:4) Bakeelesha kupa Jobo kuyeeya ayi Lesa taakalinga kumusuniwo, taakalinga kumubikilako maano alimwi ayi tamuwo mpindu mukumusebensela. Maswi ngobakaamba naakwiinga akapa Jobo kulinyumfwa anga bukaalo bwakwe teshi bukaalukeewo.

9. Ino nciinshi cakacafwa Jobo kuyuma alimwi akuba utaloondi?

⁹ Amuyeeyebo Jobo mbwakalinga kulinyumfwa paciindi ndyaakalinga kushiite kuntantaala kaanyumfwa kucisa kwatakalinga kucileka. (Jobo 2:8) Beshicibusa bakwe abalo bakatolelela kumwaamba ayi ngumuntu utabete kabotu alimwi taakuwo cintu cicite mpindu ncaakacitaawo. Mapensho ngakalinga kwiindaamo akamulemena abuumbi anga ngumuntu uyumwite mabwe alemu. Akwalo kufwa kwa bana bakwe kwakamucisa kumoyo abuumbi akumupa buumba. Pakutaanguna Jobo wakoomunabo beshicibusa bakwe ndyebakalinga kwaamba shitabete kabotu pali nguwe. (Jobo 2:13–3:1) Na basankwa aba bakalinga kuliita ayi mbeshicibusa bakwe bakalinga kuyeeya ayi Jobo woomuna ceebo cakwaamba ayi alisuni kucileka kushomeka kuli Yehova, bakalibeca. Mukwiinga paciindi cimwi mpashi kabalanga akubalanga Jobo wakaamba ayi: “Kushikila nkafwe, teshi nkacileke kushomeka.” (Jobo 27:5) Ino  nciinshi cakacafwa Jobo kuyuma alimwi akuba utaloondi nabi ndyaakalinga kwiinda mumapensho? Nabi ndyaakalinga kulefukite wakatolelela kushoma kwaamba ayi Lesa wakwe shilusuno alaakumucafwa. Wakalinga kucishi kwaamba ayi nabi afwe, Yehova alaakumubusha.​—Jobo 14:13-15.

10. Ino makani aamba pali Jobo alatwiisha nshi?

¹⁰ Makani aamba pali Jobo alatwiisha ayi Satana inga taatukakatishi kucileka kusebensela Yehova alimwi Yehova alishi mapensho oonse ngotwiindaamo. Alimwi makani aamba pali Jobo alatucafwa kushiba kwaamba ayi mapensho ngotwiindaamo taakumibo ndiswe. Amuleke tubandike shimwi nsheenga tweeya kucakubonenaako cakwe Jobo.

11. Ino Malembo alatushomesha ayi nciinshi ceshi cikacitike na twatolelela kucinka manungo muli Yehova? (Jemusi 4:7)

¹¹ Jobo wakacita shitondesha kwaamba ayi na twatolelela kushomeka kuli Yehova, inga twakaka kuyungwa a Satana akucikonsha kuliyumya mumapensho ali woonse. Alimwi Malembo alatushomesha ayi na twacita boobo Satana alaakututalamuka.​—Amubelenge Jemusi 4:7.

12. Ino kushoma ayi kulaakuba kubuka kwa bafu kwakamucafwa buyani Jobo?

¹² Tulyeelete kutolelela kushoma cakutatoonsha kwaamba ayi kulaakuba kubuka kwa bafu. Kweelana anshotwakeeya mumutwi wamana, kuloonda kufwa nkoose Satana nkaasebensesha kwaamba ayi atulengeshe kucileka kushomeka kuli Yehova. Satana wakabekesha Jobo ayi inga wacita cili coonse nabibo kucileka kushomeka kuli Yehova kwaamba ayi apulushe buumi bwakwe. Sombi wakabeca, mukwiinga Jobo wakatolelela kushomeka kuli Yehova nabi ndyaakapenga abuumbi cakwaamba ayi wakatalika kuyeeya ayi atoofwa. Kushoma mu bubotu bwakwe Yehova alimwi akulangila kwaamba ayi shintu shilaakuba kabotu mukuya kwaciindi kwakamucafwa kuliyumya. Jobo wakalinga kushoma kwaamba ayi na Yehova teshi amucaafwe ndyaacili muumi, nkokwaamba ayi alaakumubusha kunembo na wafwa. Jobo wakalinga kushoma kwaamba ayi makani akubuka kwa bafu ngancine. Na aswebo katushoma ayi ncakwiila bafu balaakubushikwa, tulaakutolelela kushomeka nabi ndyebatuloondesha ayi batootucaya.

13. Ino nceebonshi tulyeelete kubikila maano kunshila Satana nshaakasebensesha kweelesha Jobo?

¹³ Tulyeelete kubikila maano kunshila Satana nshaakasebensesha kweelesha Jobo, mukwiinga nshaasebensesha apacecino ciindi. Satana wakaamba makani akubeca ayi: “Muntu [kuteshi Jobo eenkabo] ulakonsha kupa shintu shoonse nshaacite kwiinda kufwa.” (Jobo 2:4, 5) Munshila imwi Satana wakalinga kusansulula ayi tatucitewo lusuno pali Lesa alimwi inga twasalawo kupulusha buumi muciindi cakutolelela kushomeka kuli Nguwe. Alimwi Satana alabeca ayi Lesa taatusuniiwo alimwi taakuwo shibotu nshaabona muli ndiswe. Mukwiinga tulishi luyaando lwakwe Satana, tulaleya kucenjeekwa abubeshi bwakwe.

14. Ino mapensho inga atucafwa kwiiya nshi? Amwaambe cakubonenaako.

¹⁴ Tulyeelete kubona mapensho ngotwiindaamo mbuli coolwe ceenga catucafwa kulishiba kabotu. Mapensho Jobo ngakeendaamo akamucafwa kushiba mbasu shimwi nshaatakalinga kucita kabotu, alimwi akucitawo comwi. Kucakubonenaako, wakesa mukushiba kwaamba ayi wakalinga kweelete kwiiya kuliceesha abuumbi. (Jobo 42:3) Aswebo kwiinda mumapensho inga kwatucafwa kwiiya shiinji. Mukwesu waliina lya Nikolay, * uyo wakalinga wabikwa mujeele nabi ndyaakalinga mulwashi, wakaamba ayi: “Kuba mujeele kwakancafwa kushiba mibo njondakalinga kuyandika kwiiya.” Na twashiba mbasu nshetutaciti kabotu, inga twasebenselaawo.

15. Ino ngani ngotweelete kunyumfwila, alimwi ino nceebonshi?

 ¹⁵ Tulyeelete kukutika kuli Yehova kuteshi kubalwani besu. Jobo wakakutika cakubikila maano Yehova ndyaakalinga kubandika anguwe. Lesa wakabandika a Jobo, munshila imwi inga twaamba ayi wakalinga kulwiita Jobo ayi: ‘Sa waboona nkusu nsheencite kwiinda mushintu nshondakalenga? Ndashibona shintu shoonse nshoweendaamo. Sa inga ndaalilwa kukulama?’ Jobo wakakumbula cakuliceesha akulumba abuumbi pa bubotu bwakwe Yehova. Wakaamba ayi: ‘Ndakalinga kunyumfwabo shapali ndimwe, sombi sunu ndamubona ameenso angu nemwiine.’ (Jobo 42:5) Cilyeelete kwaamba ayi Jobo wakaamba maswi aya kaacishiite kuntantaala, kaacite shilonda mubili woonse, alimwi kaacilila bana bakwe bakafwa. Nacibi boobo, Yehova wakacafwa Jobo kushiba kwaamba ayi alimusuni alimwi alikondetwe pali nguwe.​—Jobo 42:7, 8.

16. Kweelana a Isaya 49:15, 16, ino nshiinshi nshotweelete kwiibaluka ndyetutokwiinda mumapensho?

¹⁶ Amunshiku shino, bantu inga baamba shibiibi pali ndiswe alimwi akutubona anga taakuwo mbotubete. Inga beelesha kubisha mpuwo yesu nabi mpuwo ya libunga ‘akutubekesha shikani shibiibi.’ (Mate. 5:11) Makani aamba pali Jobo, alatwiisha ayi Yehova alashoma ayi tulaakutolelela kushomeka kuli nguwe na tukeende mumeelesho. Yehova alitusuni alimwi teshi akabalekeleshewo abo balangila muli nguwe. (Amubelenge Isaya 49:15, 16.) Mutanobikila maano kumakani ali woonse akubeca aamba balwani bakwe Lesa! Mukwesu waliina lya James, waku Turkey uyo wakeenda mumapensho aanji amukwashi wakwe, wakaamba ayi: “Twakesa  mukushiba ayi kukutika kumakani akubeca aambwa pabantu bakwe Lesa inga kwatulefula. Aboobo twakabikila maano ku kulangila nkotucite akutolelela kusebensela Yehova. Ici cakatupa kutolelela kuba alusangalalo.” Aswebo tulakutika kuli Yehova bweenka mbuli Jobo mbwaakacita! Makani akubeca aamba balwani besu taatupi kucileka kulangila.

17. Ino nciinshi ncomweeya kucakubonenaako ca basankwa abanakashi baambwa mulibuku lya Bene Ebulu capita 11?

¹⁷ Jobo ngumusebenshi wakwe Yehova womwi pabasebenshi baanji bakatolelela kuyuma akutaloonda nabi ndyebakalinga kwiinda mumapensho aanji. Kuli abamwi mutumwi Paulo mbwakaamba ayi “bakamboni baanji” munkalata njaakalembela Bene Ebulu. (Ebu. 12:1) Abalo bakeenda mumapensho aanji abuumbi; sombi bakatolelela kushomeka kuli Yehova mubuumi bwabo boonse. (Ebu. 11:36-40) Sa kusebensa cankusu kwabo akuliyumya shakayabo mumaanshi? Sobwe napaceyi! Nabi kwaamba ayi taakuwo cishomesho nabi comwi ncobakabona kukumanishikwa paciindi ndyebakalinga boomi, bakatolelela kulangila muli Yehova. Alimwi mukwiinga bakalinga kushomete kwaamba ayi bakacita shisangalasha Yehova, tabakwe kutoonsha kwaamba ayi shishomesho shakwe Lesa shilaakukumanishikwa. (Ebu. 11:4, 5) Cakubonenaako cabo inga catucafwa kuba bashinishite kutolelela kulangila muli Yehova.

18. Ino nciinshi ncomushinishite kucita? (Bene Ebulu 11:6)

¹⁸ Tutokala muciindi shintu mucishi ndyeshitooya bubicilaakobo. (2 Timo. 3:13) Satana watolelela kweelesha bantu bakwe Lesa. Aboobo, atube bashinishite kusebensa cankusu muncito yakwe Yehova nabi tukacane mapensho ali buyani kunembo, akushoma cakutatoonsha kwaamba ayi “kulangila kwesu kuli muli Lesa muumi.” (1 Timo. 4:10) Mutaluubi kwaamba ayi shibotu Lesa nshaakapa Jobo, shakatondesha patuba kwaamba ayi ‘Yehova ngushinkumbu abuumbi alimwi aluse.’ (Jemu. 5:11) Amuleke aswebo tutolelele kushomeka kuli Yehova, akushoma cakutatoonsha kwaamba ayi alaakupa cilambu kubaabo ‘bamuyandoola camoyo woonse.’​—Amubelenge Bene Ebulu 11:6.