1. Ino nshiinshi shipa bantu baanji kuloonda?

 AMUYEEYE bukaalo butokonkelaawo bwakeendamo Bakamboni Bakwe Yehova bamwi. Ba Nestor aba María mbeebene bakalinga kusuni kuya mukusebensela kumusena ubulishite. * Nacibi boobo, kwaamba ayi bacikonshe kucita boobo bakalinga kuyandika kucileka kusebensesha maali aanji. Ano bakalinga kuloonda kucita boobo mukwiinga bakalinga kuyeeya ayi teshi kukabapewo kuba alusangalalo. Ba Biniam ndyebakaba Kamboni Wakwe Yehova mucishi incito yesu moyakakashikwa, bakalinga kucishi kwaamba ayi balaakupenshekwa mbuli musebenshi wakwe Lesa. Aboobo ici cakabapa kuloonda. Kwiilikaawo, cimwi cakabapa kuloonda abuumbi nkuyeeya bamumukwashi wabo mbweshi bakacite na bakanyumfwe ayi ba Biniam baba Bakamboni. Ba Valérie bakabacana abulwashi bwa kansa ibiibi abuumbi, alimwi cakalinga ciyumu kwaamba ayi bacane dokota weenga wabacita opaleshoni munshila yeendelana anshobakeeya mu Baibo pamakani abulowa. Aboobo bakaloonda kwaamba ayi mpashi batoofwa.

2. Ino nciinshi ceenga cacitika na twaalilwa kukoma kuloonda?

² Sa amwebo mwakaloondaawo kale ceebo ca shintu mbuli sheeshi? Buunji bwandiswe twakaloondawo. Na twaalilwa kukoma kuloonda kwa mushobo uyu inga twaciita shintu sheenga shanyonyoola bushicibusa bwesu a Yehova. Ici ncecintu Satana ncaasuni. Alimwi ceebo ca shintu nshetuloonda, Satana aleelesha kutulengesha ayi twaalilwe kukonkela milawo yakwe Yehova, iyo ilikaawo amulawo wakushimikila makani abotu. (Ciyu. 12:17) Nabi kwaamba ayi Satana alicite nkusu, ngumubiibi alimwi ngushilunkutwe,  inga twalishitilisha kuli nguwe. Munshila nshi?

3. Ino nciinshi ceshi cikatucaafwe kukoma kuloonda nkweenga katucite?

³ Satana teshi akatulengeshewo kuloonda na katushoma cakutatoonsha kwaamba ayi Yehova ali kulubasu lwesu alimwi alitusuni. (Kulu. 118:6) Kucakubonenaako, shikulumbaisha wakalemba Kulumbaisha 118 wakeenda mubukaalo buyumu. Bantu baanji bakalinga kumulwana kwiilikaawo abaabo bapukite (vesi 9 a 10). Cimwi ciindi shintu shakalinga kumuyumina abuumbi (vesi 13). Alimwi Yehova wakamululika cankusu (vesi 18). Nacibi boobo, shikulumbaisha uyu wakayuminishikwa akwiimba ayi: “Teshi nkaloondeewo.” Ino nciinshi cakamupa kulinyumfwa boobu? Wakalinga kucishi ayi Yehova Ishi wakwiculu alimusuni abuumbi nabi kwaamba ayi wakamululika. Shikulumbaisha wakalinga kushomete cakutatoonsha kwaamba ayi lyoonse Lesa shilusuno alilibambite kumucafwa nabi eende mubukaalo buli buyani.​—Kulu. 118:29.

4. Ino kushoma kwaamba ayi Lesa alitusuni kulaakutucafwa kucita nshi?

⁴ Tulyeelete kushoma cakutatoonsha kwaamba ayi Yehova alitusuni. Kucita boobo kulaakutucafwa kukoma kuloonda shintu shotatwe, (1) kuloonda ayi tulakwaalilwa kucana shiyandika sha mukwashi wesu, (2) kuloonda bantu, alimwi (3) kuloonda kufwa. Bamakwesu abenankashi mbotwaambawo mupalagilafu yakutaanguna, bakacikonsha kukoma kuloonda nkobakalinga kucite ceebo cakushoma cakutatoonsha kwaamba ayi Lesa alibasuni.

5. Ino nshiinshi sheenga shapa mutwi wa mukwashi kulisukama abuumbi? (Amubone cikope cili papeeji yakutaanguna.)

⁵ Mwineklistu ubete mutwi wa mukwashi alabikila maano abuumbi kumukuli ngwaacite wakulama mukwashi wakwe lwakumubili. (1 Timo. 5:8) Mbuli mutwi wamukwashi, mpashi mwakalinga kubona ayi incito yanu itoomana ciindi bulwashi bwa COVID-19 ndyebwakatalika. Mpashi mwakalisukama pamakani akulangweta mukwashi shakulya ashintu shimwi shiyandika. Alimwi mpashi mwakaloonda ayi na incito imane cilaakuba ciyumu kucana imwi. Na mpashi bweenka mbuli ba Nestor aba María mbotwaambawo, mwakaalilwa kwaalulako shimwi mubuumi ceebo cakuloonda ayi teshi mukabe alusangalalo. Satana wacikonsha kulengesha bantu baanji kucileka kusebensela Yehova ceebo ca shintu nshobaloonda.

6. Ino Satana aleelesha kutupa kushoma nshi?

⁶ Satana aleelesha kutupa kushoma ayi Yehova tatubikiliko maano alimwi ayi inga taatucafwiiwo kulama mukwashi wesu. Aboobo ici inga catupa kuyeeya ayi tulyeelete kucita shoonse nsheenga twacikonsha kwaamba ayi incito itamaani, nabi kwaamba ayi kucita boobo kutokwilikaawo kutakonkela njiisho shamu Malembo.

7. Ino Yesu alatushomesha nshi?

⁷ Yesu, uyo ubeshi kabotu baIshi kwiinda muntu umwi uli woonse, alatushomesha ayi Lesa wesu ‘alishi nshetuyandika nabi katutana kumusenga.’ (Mate. 6:8) Alimwi Yesu alicishi kwaamba ayi Yehova alilibambite kutupa nshetuyandika. Mbuli Beneklistu, tuli mumukwashi wakwe. Yehova ngo Mutwi wa mukwashi wesu, aboobo inga twashoma ayi alakwe alaakucita nshaakalwiita mitwi ya mikwashi kucita palilembo lya 1 Timoti 5:8.

8. (a) Ino nciinshi ceenga catucafwa kuleya kuloonda ayi tulakwaalilwa kucana shiyandika sha mukwashi wesu? (Mateyo 6:31-33) (b) Kweelana acikope catondeshekwa, ino cakubonenaako ca beebene baletela nankashi shakulya inga twacikonkela buyani?

⁸ Na katushoma cakutatoonsha kwaamba ayi Yehova alitusuni amikwashi yesu, teshi tukatoonshe na alaakutucafwa kucana shintu nshetuyandika. (Amubelenge Mateyo 6:31-33.) Yehova alisuni kutupa nshetuyandika,  mukwiinga ngu shikwaaba ucite lusuno! Ndyaakalenga cishi capanshi taakwe kubikaamobo shintu nshetuyandika kwaamba ayi tutolelele kuba abuumi. Sombi wakabikaamo ashintu shiinji shibotu abuumbi kwaamba ayi shinootupa kuba alusangalalo. (Mata. 2:9) Nabi kwaamba ayi mpashi cimwi ciindi tulababo ashintu nshetuyandika, tulyeelete kwiibaluka kwaamba ayi Yehova ngowatupa sheenka isho nshetucite. (Mate. 6:11) Lyoonse tulyeelete kwiibaluka kwaamba ayi Yehova alatupa shiinji shiindite pashintu shili shoonse nsheenga twashiiya pacecino ciindi. Alimwi kunembo, alaakutupa buumi butamaani. Ishi nshebakeebaluka ba Nestor aba María.​—Isa. 65:21, 22.

9. Ino mweeya nshi kucakubonenaako caba Nestor aba María?

⁹ Ba Nestor aba María bakalinga kucite ŋanda ibotu alimwi bakalinga kusebensa ncito shibotu ku Colombia. Bakaamba ayi: “Twakalinga kuyeeya sha kuceeshako shintu shimwi kwaamba ayi tunoocita shiinji muncito yakwe Yehova, sombi twakalinga kuloonda ayi mpashi teshi tukabe alusangalalo.” Ino nciinshi cakabacafwa kukoma kuloonda nkobakalinga kucite? Bakayeeya Yehova mbwakabatondesha lusuno munshila shiinji. Aboobo bakashoma ayi Yehova alaakunoobalama lyoonse, lyalo bakacileka ncito sha maali aanji nshobakalinga kusebensa. Bakoolisha ŋanda yabo akulongela kumusena kwakalinga kuyandika beshikushimikila baanji. Ino balalinyumfwa buyani pakusala kwabo? Ba Nestor bakaamba ayi: “Twaboona ayi shaamba Mateyo 6:33 nshancine. Taakuwo cintu nabi comwi cakumubili ncotwakabulishawo. Alimwi pacecino ciindi tulisangalete abuumbi mubuumi.”

10. Ino nceebonshi inga tatukankamani kwaamba ayi bantu balaloonda bantunyinaabo?

¹⁰ Kuswabo ciindi Adamu a Efa ndyebakapondokela Yehova, bantu balacitilana shintu shibiibi. (Shiku. 8:9) Kucakubonenaako, bantu bamwi balacitila bamwi shintu shibiibi ceebo ca nkusu nshebakapekwa, bakapondo balooma akucaya bantu, kucikolo bamwi balapensha, kutukana alimwi akukoonga beshicikolonyinaabo. Alimwi bamwi balicite lunkutwe kubamumukwashi wabo. Aboobo inga tatukankamani kwaamba ayi bantu balaloonda bantunyinaabo! Ino Satana alasebensesha buyani boowa bwakuloonda bantu?

11-12. Ino Satana alasebensesha buyani boowa bwakuloonda bantu?

¹¹ Satana aleelesha kutupa kuloonda bantu kwaamba ayi tucileeke kushimikila na kucita  shintu shimwi Yehova nshaatulwiita. Ceebo cakuyungwa a Satana, mfulumeende shimwi shilatupensha akukasha ncito yesu. (Luka 21:12; Ciyu. 2:10) Mucishi cakwe Satana, bantu baanji balaya caambilisha makani akubeca pa Bakamboni Bakwe Yehova. Aboobo bantu bashoma makani akubeca aya inga baamba shibiibi pali ndiswe nabi kutulwana. (Mate. 10:36) Sa bucenjeshi bwakwe Satana bulatukankamika? Sobwe napaceyi. Nje nshila njaakalinga kusebensesha amuciindi ca Beneklistu bakutaanguna.​—Milimo 5:27, 28, 40.

¹² Satana taasebenseshibo boowa bwakuloonda kupikishikwa kuswa ku mfulumeende. Bamwi balaloonda abuumbi na bayeeya mukwashi wabo nsheshi ukacite na bakabe Bakamboni. Ici balaciloonda abuumbi kwiinda mbobaloonda kuumwa. Balibasuni abuumbi beshikamukowa babo alimwi balisuni kwaamba ayi abalo beeye pali Yehova akumusuna. Tabanyumfwi kabotu na beshikamukowa babo kabaamba shibiibi pali Lesa wancine alimwi abasebenshi bakwe. Nacibi boobo, cimwi ciindi beshikamukowa beshikupikisha balesa mukwiiya cancine. Ano ino inga twacita buyani na beshikamukowa besu batukaka ceebo ca shintu nshetushoma?

13. Ino kushoma cakutatoonsha kwaamba ayi Yehova alitusuni kulaakutucafwa buyani na beshikamukowa besu batukaka? (Kulumbaisha 27:10)

¹³ Kuyeeya pamakani ngotucana palilembo lya Kulumbaisha 27:10 inga kwatuyuminisha. (Amubelenge.) Kwiibaluka Yehova mbwaatusuni kulatucafwa kutaloonda sheenga shatucitikila nabi beshikamukowa besu batukaka. Alimwi tulishomete cakutatoonsha kwaamba ayi alaakutupa cilambu ceebo cakuliyumya kwesu. Yehova alaakutupa shoonse nshetuyandika kwaamba ayi tutolelele kuba boomi, kutucafwa kukalika moyo, kuba basangalete alimwi akuba abushicibusa buyumu anguwe! Ishi nshebakeendaamo ba Biniam mbotwaambawo.

14. Ino nshiinshi nsheenga mweeya kuswa kushakacitikila ba Biniam?

¹⁴ Ba Biniam bakaba womwi wa Bakamboni Bakwe Yehova nabi kwaamba ayi bakalinga kucishi ayi mucishi mobakala mfulumeende yakalinga kupensha Bakamboni abuumbi. Amuyeeye kushiba kwaamba ayi Yehova alibasuni mbokwakabacafwa kukoma boowa bwakuloonda bantu. Bakaamba ayi: “Nabi kwaamba ayi kwakalinga kupenshekwa kutaambiki, ncondakalinga kuloonda bunene nkupikishikwa kuswa kumukwashi wangu kwiinda kupenshekwa ku mfulumeende. Ndakalinga kuloonda kwaamba ayi  bata abo batakalinga Bakamboni batolinyumfwa cibiibi abuumbi na banyumfwe ayi ndasalawo kuba Kamboni. Alimwi taakuwo eshi anoompa bulemu mumukwashi wesu.” Nacibi boobo, ba Biniam bakalinga kushomete kwaamba ayi Yehova lyoonse alalama baabo mbwaasuni. Ba Biniam bakatolelela akwaamba ayi: “Ndakayeeya Yehova mbwakacafwa bamwi kuliyumya mumapensho akubula maali, kusalululwa, alimwi akulwanwa. Ndakalinga kucishi kwaamba ayi na ntolelele kushomeka kuli Yehova, alaakumpa shoolwe. Ndyendakacatwa mankanda aanji alimwi akuumwa, ndakabona nemwiine kwaamba ayi Yehova lyoonse alatucafwa na twatolelela kushomeka kuli nguwe.” Yehova wakaba anga ngu mushali musankwa kuli ba Biniam, alimwi bantu bakwe abalo bakatondesha kwaamba ayi ngu mukwashi wancinencine kuli mbabo.

15. Ino nceebonshi tulaloonda kufwa?

¹⁵ Baibo ilaamba ayi lufu ngumulwani. (1 Koli. 15:25, 26) Kuyeeya pamakani alufu inga kwatupa kulisukama, bunene bunene na twaciswa abuumbi nabi na tulicite shicibusa na shikamukowa mulwashi abuumbi. Ino nceebonshi tulaloonda kufwa? Nceebo cakwaamba ayi Yehova wakatulenga alusuno lwa kusangalala abuumi kwamuyayaya. (Shiku. 3:11) Kuloonda kufwa kweelete inga kwatucafwa kulishitilisha. Kucakubonenaako, inga kwatupa kusala kabotu pamakani ashakulya, kucita shiyumya mubili lyoonse, kuya kucipatela, kunwa musamu na kaciyandika alimwi akuleya kucita shintu sheenga shabika buumi bwesu mumapensho.

16. Ino Satana aleelesha kutulengesha kucita buyani?

¹⁶ Satana alishi kwaamba ayi tulabikila maano abuumbi kubuumi. Alimwi alaamba ayi inga twasumina kucita ceenga canyonyoola bushicibusa bwesu a Yehova kwaamba ayi tupulushe buumi bwesu. (Jobo 2:4, 5) Sombi uku nkubeca! Alimwi mukwiinga ngoocite “nkusu shakuleta lufu,” Satana aleelesha kutulengesha kukaka Yehova ceebo cakuloonda kufwa. (Ebu. 2:14, 15) Cimwi ciindi bantu bayungwa a Satana, balaloondesha basebenshi bakwe Yehova ayi batoobacaya na batolelele kuba Bakamboni. Cimwi ciindi Satana alabweselawo coolwe ca kutulengesha kutashomeka na wabona ayi buumi bwesu butoyandika lucafwo lwakucipatela cakufwambaana. Bamadokota abeshikamukowa bateshi Bakamboni inga batukakatisha kwaamba ayi tusumine kubikwa bulowa, cintu ncotushi ayi nkupwaya mulawo wakwe Lesa. Mpashi bamwi inga batuyuminisha kusumina kushilikwa munshila imwi iteendelani a Malembo.

17. Kweelana a Bene Loma 8:37-39, ino nceebonshi tatweelete kuloonda kufwa?

¹⁷ Nabi kwaamba ayi tatusuniiwo kufwa, tulishi kwaamba ayi Yehova alaakutolelela kutusuna nabi twafwa. (Amubelenge Bene Loma 8:37-39.) Yehova alatolelela kwiibaluka beshicibusa bakwe na bafwa alimwi alababonabo anga mboomi. (Luka 20:37, 38) Atolangila ciindi ndyeshi akababushe. (Jobo 14:15) Yehova wakaaba buumi bwa Mwanaakwe kwaamba ayi ‘tukabe abuumi butamaani.’ (Joni 3:16) Tulishi kwaamba ayi Yehova alitusuni abuumbi alimwi alatubikila maano. Aboobo muciindi cakulangoola lucafwo kumwi paciindi ndyetwaciswa na kuloondeshekwa, tulasenga Yehova kwaamba ayi atuyuminishe, kutupa busongo alimwi ankusu. Ishi nshobakacita ba Valérie abeebaabo.​—Kulu. 41:3.

18. Ino nciinshi nceenga tweeya kucakubonenaako caba Valérie?

¹⁸ Ba Valérie ndyebakalinga kucite myaaka 35 bakabacana akansa itashibikitwe kabotu alimwi ibiibi abuumbi. Ano amubone lusuno mbolwakabacafwa kutaloonda kufwa. Bakaamba ayi: “Nebo abeebangu twakakankamana abuumbi ndyetwakashiba kwaamba ayi ndicite kansa. Ndakalinga kuyandika kucitwa opaleshoni inene kwaamba ayi mpuluke. Ndakaya kuba madokota baanji bacita ma opaleshoni, sombi boonse bakakaka  kwaamba ayi inga tabacikoonshi kucita opaleshoni kwakubula kumbika bulowa. Ndakaloonda, nacibi boobo, ndakakaka kubikwa bulowa ceebo cakukonkela mulawo wakwe Lesa! Mubuumi bwangu boonse, Yehova wantondesha ayi alinsuni abuumbi. Anebo ici ncocakalinga coolwe cangu cakwaamba ayi ntondeshe ayi ndimusuni. Lyoonse na ndanyumfwa makani atabete kabotu, ndakalinga kuba ushinishite kucita shisangalasha Yehova akutapa coolwe Satana. Mukuya kwaciindi, opaleshoni yakubula kubikwa bulowa yakakonsheka. Nabi kwaamba ayi mapensho angu akuciswa ciswa atolelela, Yehova lyoonse alatupa nshetuyandika. Kucakubonenaako, bushiku bumwi ndyetwakalinga kumabungano kabatana kuncata a kansa, twakeeya mutwi wakalinga kwaamba ayi ‘Kulwana Mapensho Amunshiku Shino Cakutaloonda.’ * Makani aya akatuyuminisha abuumbi. Twakaabelenga mankanda aanji. Makani mbuli aya alimwi akutolelela kucita shintu mbuli kushimikila alimwi akucanika kumabungano, shatucafwa kutolelela kuba bakalikene mumoyo akusala kabotu.”

19. Ino nciinshi ceshi cikacitike conoono?

¹⁹ Kwiinda mulucafwo lwakwe Yehova, Beneklistu baanji nsengwe yoonse balacikonsha kukoma mapensho apusenepusene alimwi akukaka kukonkela Satana nshaasuni. (1 Pit. 5:8, 9) Amwebo inga mwacikonsha. Conoonobo, Yehova alaakupa Yesu alimwi abaabo mbweshi akanookweendeleshaabo nkusu sha ‘kunyonyoola ncito sha Mubiibi shoonse.’ (1 Joni 3:8) Pesule lya sheeshi, bantu bakwe Lesa pacishi capanshi ‘teshi bakaloondewo cintu cili coonse.’ (Isa. 54:14; Mika 4:4) Kushikila ciindi ico cikashiike, tulyeelete kutolelela kusebensa cankusu kukoma kuloonda nkweenga katucite.

20. Ino nciinshi ceshi cikatucaafwe kukoma kuloonda nkweenga katucite?

²⁰ Tulyeelete kutolelela kushoma ayi Yehova alitusuni alimwi alashitilisha bantu bakwe. Kukutumana kuyeeya akubandika Yehova mbwakashitilishaawo kale bantu bakwe muciindi cakale kale inga kwatucafwa. Alimwi inga tweebaluka ambwakatucafwawo mubuumi bwesu ndyetwakalinga mubukaalo buyumu. Kwiinda mulucafwo lwakwe Yehova, inga twacikonsha kukoma kuloonda nkweenga katucite!​—Kulu. 34:4.