1. Kweelana a Shikushimikila 7:20, ino ngamakani nshi ancine Solomoni ngakaamba?

 MWAAMI Solomoni wakalemba ayi: “Taaku muntu ululeme pacishi capanshi uyo ucita shintu shiluleme, kutabishaawo napaceyi.” (Shiku. 7:20) Maswi aya ngancine mukwiinga soonse tulabisha! (1 Joni 1:8) Aboobo soonse tulayandika kulekelelwa kuswa kuli Lesa akubantu bamwi.

2. Ino inga twalinyumfwa buyani na shicibusa wesu watulekelela?

² Sa kuli ciindi cimwi ncemutokwiibaluka ndyemwakabishisha shicibusa wanu? Ncakutatoonsha mulyeelete mwakalinga kusuni kwaamba ayi bushicibusa bwanu butolelele, aboobo mwakasenga kulekelelwa kuswa panshi lyamoyo. Ino mwakalinyumfwa buyani shicibusa wanu ndyaakamulekelela? Mulyeelete mwakalinyumfwa kabotu alimwi akukondwa!

3. Ino nshiinshi nsheshi twiiye mumutwi uyu?

³ Tulisuni kwaamba ayi Yehova abe Shicibusa wesu ngotusuni abuumbi, nacibi boobo, cimwi ciindi inga twaamba na kucita shintu shimwi sheenga shamukalasha. Ano ino nceebonshi inga twashoma ayi Yehova alisunishi kutulekelela? Ino kulekelela kwakwe Yehova kulipusene buyani akulekelela kwesu? Alimwi mukweelaako, ino muntu alyeelete kucita buyani kwaamba ayi Lesa amulekelele?

4. Ino nceebonshi inga twashoma ayi Yehova alilibambite kulekelela?

⁴ Maswi akwe Lesa alatulwiita ayi Yehova alilibambite kulekelela.  Ndyaakalisansulula kuli Mose pa Kalundu ka Sinayi, kwiinda mumunjelo wakaamba ayi: ‘Yehova, Yehova, Lesa uswite nkuumbu alimwi ulekelela, utafwambaani kukalala, uswite lusuno lutamaani alimwi ushomeka, utondesha lusuno lutamaani ku shuulu ashuulu sha bantu, alimwi ulekelela bantu pa bubi a shibiibi shabo.’ (Kulo. 34:6, 7) Yehova ngu Lesa shinkumbu ulibambite kulekelela bamucita shibiibi baana.​—Neye. 9:17; Kulu. 86:15.

5. Kweelana a Kulumbaisha 103:13, 14, ino Yehova alacita buyani ceebo cakwaamba ayi alitwishi kabotu?

⁵ Mukwiinga Yehova ngo Mulengi wesu, alishi shoonse pali ndiswe. Ano amuyeyebo! Yehova alishi makani oonse pamuntu uli woonse uli pacishi capanshi. (Kulu. 139:15-17) Aboobo alishi kabotu shintu shoonse nshetwaalilwa kucita kabotu ceebo cakuba batamaninite. Kwiilikaawo, alishi shoonse shakacitika mubuumi bwesu isho shakatupa kuba mbotubete. Ceebo cakwaamba ayi Yehova alitwishi kabotu, alatunyumfwila nkumbu.​—Kulu. 78:39; amubelenge Kulumbaisha 103:13, 14.

6. Ino Yehova wakatondesha buyani ayi alilibambite kulekelela?

⁶ Yehova wakatondesha patuba kwaamba ayi alilibambite kulekelela. Alishi kwaamba ayi soonse twakapyana bubi alimwi tulaakufwa mukuya kwaciindi ceebo cakubisha kwakwe Adamu. (Loma. 5:12) Taakuwo nceenga twaciita kwaamba ayi tutanoobisha akufwa. (Kulu. 49:7-9) Nacibi boobo, Lesa wesu shilusuno wakatunyumfwila nkumbu akucitawo comwi. Ino nciinshi ncaakacita? Lilembo lya Joni 3:16 lilaamba ayi, Yehova wakatuma Mwanaakwe wakashalwabo eenka kusa mukufwa ceebo ca ndiswe. (Mate. 20:28; Loma. 5:19) Yesu wakafwa kwaamba ayi aangulule uli woonse weenga watondesha lushomo muli nguwe. (Ebu. 2:9) Cakamucisa abuumbi Yehova kubona Mwanaakwe ngwaasuni abuumbi kufwa lufu lucisa alimwi lulensha nsoni! Naakwiinga Yehova taakalinga kusuni kutulekelela, naakwiinga taakwe kusuminisha Mwanaakwe kufwa.

7. Ino mbaani baambwa mu Baibo Yehova mbwaakalekelela cakumaninina?

⁷ Baibo ilaamba pashakubonenaako shiinji sha baabo Yehova mbwaakalekelela  cakumaninina. (Efe. 4:32) Ino ngani ngomutookwiibaluka? Mpashi inga mweebaluka Mwaami Manase. Musankwa mubiibi uyu wakacita shilubo shinene abuumbi kuli Yehova. Wakalinga kulambila balesa bakubeca akuyuminisha bamwi kucita boobo. Wakacaya bana bakwe, akubabenga mbuli milambu kubalesa bakubeca. Wakashika apakubika cibumbwabumbwa cakwe lesa wakubeca mu tempele isalalite yakwe Yehova. Baibo ilaamba pali nguwe ayi: ‘Wakabisha abuumbi kuli Yehova akusonkomona bukali bwakwe.’ (2 Maka. 33:2-7) Sombi ndyaakaana cancinencine, Yehova wakamulekelela cakumaninina. Alimwi Lesa wakamuboosha apa cuuna cakwe ca bwaami. (2 Maka. 33:12, 13) Mpashi inga mweebaluka a Mwaami Defedi, uyo wakacita shilubo shinene abuumbi kuli Yehova, isho shakeelikaawo kucita bulale akucaisha muntu. Nacibi boobo, Defedi ndyaakasumina kwaamba ayi wabisha lyalo akwaana cancinencine, Yehova wakamulekelela. (2 Samwe. 12:9, 10, 13, 14) Ncakwiila inga twashoma cakutatonsha kwaamba ayi Yehova alilibambite kulekelela. Alimwi kweelana ambweshi twiiye, kulekelela kwakwe Yehova kulipusene akulekelela kwa bantu.

8. Ino kuba Moomboloshi wiinditewo kwakwe Yehova kulakuma buyani mbwalekelela?

⁸ Yehova ngu “Moomboloshi wacishi coonse.” (Mata. 18:25) Moomboloshi uli kabotu alyeelete kwiishiba kabotu abuumbi milawo. Yehova ngo Moomboloshi wesu, alimwi aliishi kabotu milawo mukwiinga Ngooshikutupa milawo. (Isa. 33:22) Yehova eenkabo ngooshi kabotu abuumbi ciluleme acitaluleme. Ino nciinshi cimwi moomboloshi uli kabotu ncayandika? Alyeelete kwashiba kabotu makani oonse kaatana koombolosha mulandu. Aboobo Yehova ngu moomboloshi wiinditewo mukwiinga lyoonse alashiba makani oonse.

9. Ino ngamakani nshi Yehova ngeeshi kale ndyaatosalawo kulekelela muntu na sobwe?

⁹ Mubupusano abantu beshikoombolosha, Yehova lyoonse alashiba kabotu makani oonse amulandu uli woonse ngwatoyandika koombolosha. (Mata. 18:20, 21; Kulu. 90:8) Taabikilibo maano kusheesho bantu nshobabona na kunyumfwa. Alicishi kabotu abuumbi kashalilo, nkulilo, musena muntu nkwakala, mbwalinyumfwa ambwayeeya, mboshikuma nshaacita. Alimwi Yehova alashiba ashili mumoyo wa muntu. Alicishi kabotu cipa muntu kucita cintu cimwi. Shoonse shilibo patuba kuli nguwe. (Ebu. 4:13) Aboobo Yehova alalekelela muntu ceebo cakwaamba ayi alishi makani oonse.

10. Ino nceebonshi nceenga twaambila ayi Yehova lyoonse aloombolosha munshila ya bululami? (Dutolonomi 32:4)

¹⁰ Yehova lyoonse aloombolosha munshila ya bululami. Taacitewo kasalulushi napaceyi. Yehova taalekeleli muntu ceebo ca kuboneka kabotu, bubile mbwaacite, mpuwo njaacite, na lushibo ndwaacite. (1 Samwe. 16:7; Jemu. 2:1-4) Taakuwo weenga wakakatisha Yehova kucita cintu na kumupa makulo. (2 Maka. 19:7) Taaciti shintu ceebo cakwaamba ayi wakalala na ceebo ca mfundilishi. (Kulo. 34:7) Aboobo ncakutatoonsha kwaamba ayi Yehova ngu Moomboloshi wiinditewo mukwiinga alishi makani oonse pali ndiswe alimwi abukaalo bwesu.​—Amubelenge Dutolonomi 32:4.

11. Ino kulekelela kwakwe Yehova kulipusene buyani akulekelela kwa muntu?

¹¹ Bakalemba Malembo amuci Ebulu bakalinga kucishi kwaamba ayi kulekelela kwakwe Yehova kulilibetele. Mumbasu shimwi, bakasebensesha  liswi lyamuci Ebulu ilyo mulibuku limwi lyakaambwa ayi “lilasebenseshekwabo kusansulula Lesa mbwalekelela bamucita shibiibi. Liswi ilyo talisansululi muntu mbwalekelela muntunyina.” Yehova eenkabo ngoocite nkusu shakulekelela cakumaninina muntu waana cancinencine. Ino nciinshi cicitika na Yehova watulekelela?

12-13. (a) Ino muntu alalinyumfwa buyani na Yehova wamulekelela? (b) Ino Yehova alacita buyani na walekelela muntu?

¹² Na twasumina cancine cakwaamba ayi Yehova watulekelela, tulalinyumfwa kuubilwa, kukalikana mumiyeeyo alimwi njeelacaamba taitupenshiiwo. Kulekelela kwakwe Yehova kweenkabo nkweenga kwatupa kulinyumfwa boobo. (Milimo 3:19) Na Yehova watulekelela alaboosha bushicibusa bwesu anguwe. Alimwi cilababo anga tatuna kumubishishawo.

¹³ Na Yehova watulekelela, nkokwaamba ayi teshi akatupewo mulandu na kutwaanisha alimwi pacilubo ico. (Isa. 43:25; Jele. 31:34) Yehova alatalamusha shibiibi shesu “bweenka mbuli kumbo akwicwe mbokutalamukene.” * (Kulu. 103:12) Kuyeeya Yehova mbwatulekelela abuumbi kulatukankamika akutupa kulumba. (Kulu. 130:4) Ano ino muntu alyeelete kucita buyani kwaamba ayi Yehova amulekelele?

14. Ino nshiinshi nshotweeya shipa Yehova kusalawo kulekelela muntu?

¹⁴ Kweelana ambotweeya, teshi kukomena kwa cilubo muntu ncaacita kupa kwaamba ayi Yehova asaleewo kumulekelela. Alimwi tweeya kwaamba ayi Yehova alalekelela ceebo calushibo ndwaacite mbuli Mulengi wesu, Shikutupa milawo, alimwi Moomboloshi. Ino nshiinshi Yehova nshalangaawo kaatana kusalawo kulekelela muntu?

15. Kweelana a Luka 12:47, 48, ino nciinshi comwi Yehova ncalangaawo kaatana kusalawo kulekelela muntu?

¹⁵ Cintu comwi Yehova ncalangaawo, nkubona na muntu uyo wakabisha kashanga. Aya ngomakani Yesu ngakaamba palilembo lyakwe Luka 12:47, 48. (Amubelenge.) Na muntu mukashanga wacita cintu cimwi ncaacishi kabotu ayi cilakalasha Yehova, nkokwaamba  ayi wacita cilubo cinene. Alimwi Yehova inga wasalawo kutamulekelela. (Maako 3:29; Joni 9:41) Nacibi boobo, cimwi ciindi tulashiba kwaamba ayi ncetwakacita ncibiibi. Ano sa Lesa inga watulekelela? Ee! Mukwiinga kuli acimwi Yehova ncalangaawo kaatana kusalawo kutulekelela.

16. Ino kwaana cilaamba nshi, alimwi ino nceebonshi kulayandika kwaamba ayi Yehova atulekelele?

¹⁶ Cimwi Yehova ncalangaawo nkubona na muntu uyo wacita cilubo waana cancinencine. Ino kwaana cilaamba nshi? Cilaamba “kwaalula miyeeyo ambotubona shintu.” Alimwi kuleelikawo akulinyumfwa cibiibi pacintu cibiibi muntu ncaakacita na kwaalilwa kucita ciluleme ncaakalinga kweelete kucita. Alimwi muntu waana talinyumfwibo cibiibi ceebo ca shintu shibiibi nshaakacita sombi aceebo cakutabikila maano kubushicibusa bwakwe a Yehova, ico cakalengesha kwaamba ayi acite shintu isho shibiibi. Na mutokwiibaluka, Mwaami Manase a Mwaami Defedi boonse bakacita shilubo shinene. Nacibi boobo, Yehova wakabalekelela mukwiinga bakaana cancinencine. (1 Baam. 14:8) Aboobo Yehova inga watulekelelabo na wabona ayi twaana cancinencine. Sombi kuli ashimwi nshotweelete kucita kuteshi kweelabo pakulinyumfwa cibiibi pacilubo ncetwakacita. Tulyeelete kuba balibambite kucitawo comwi. * Ici ncintu acimwi Yehova ncalangaawo kaatana kulekelela muntu.

17. Ino kupiluluka cilaamba nshi, alimwi ino nceebonshi kulayandika kwaamba ayi tuleye kubooshawo shilubo shakale kale? (Isaya 55:7)

¹⁷ Cintu cimwi ciyandika Yehova ncalangaawo nkupiluluka. Kupiluluka cilaamba kucileka kucita shintu shibiibi akutalika kucita shintu kweelana akuyanda kwakwe Yehova. (Amubelenge Isaya 55:7.) Muntu alyeelete kwaalula mbwayeeya akutalika kubona shintu bweenka mbuli Yehova mbwashibona. (Loma. 12:2; Efe. 4:23) Alyeelete kuba ushinishite kucileka kuyeeya akucita shintu shibiibi. (Kolo. 3:7-10) Nacibi boobo, kushoma mumulambu wakwe Klistu nkokupa kwaamba ayi Yehova atulekelele akutusalasha kuswa kushibiibi shesu. Yehova alaakutulekelela ceebo ca  mulambu uyu na wabona ayi tutoosebensa cankusu kwaamba ayi twaalule buumi bwesu.​—1 Joni 1:7.

18. Ino nshiinshi nshotweeya pamakani akulekelela kwakwe Yehova?

¹⁸ Amuleke twiinduluke mu shiteente shinene nshotweeya. Yehova ngu Shikulekelela wiinditewo mububumbo boonse. Ino nceebonshi nceenga twaambila boobo? Cakutaanguna, Yehova lyoonse alilibambite kulekelela. Cabili, alishi makani oonse pali ndiswe. Alitwishi kabotu alimwi ngooshiba kabotu na twaana cancinencine. Alimwi catatu, Yehova alatulekelela cakumaninina alimwi kuli nguwe cilababo anga tatuna kumubishishawo. Ici cilatupa kuba anjeelacaamba isalalite, lyalo akumusangalasha.

19. Ino nceebonshi inga twaba basangalete nabi kwaamba ayi tatumaninite alimwi tulabisha?

¹⁹ Mukwiinga tatumaninite, tulaakutolelela kubisha. Nacibi boobo, inga twayuminishikwa amaswi ngotucana mulibuku lyamu Cisungu lya Insight on the Scriptures, Volume 2, peeji 771, aamba ayi: “Yehova alicite nkumbu alimwi alishi kwaamba ayi basebenshi bakwe balacita shilubo. Aboobo tabeelete kunolinyumfwa cibiibi lyoonse ceebo cakwaamba ayi tabamaninite alimwi balabisha. (Kulu. 103:8-14; 130:3) Inga basangalala na kabacita shoonse nsheenga bacikonsha kwaamba ayi bakonkele kuyanda kwakwe Lesa. (Filip. 4:4-6; 1 Joni 3:19-22).” Aya ngamaswi ayuminisha abuumbi!

20. Ino nshiinshi nsheshi tukeeye mumutwi utokonkelaawo?

²⁰ Tulalumba kwaamba ayi Yehova alilibambite kutulekelela na twaana cancinencine pashilubo nshetwakacita. Ano ino cakubonenaako cakwe Yehova cakulekelela inga twacikonkela buyani? Ino kulekelela kwesu kulikoshenye buyani akulekelela kwakwe Yehova, alimwi ino kulipusene buyani? Ino nceebonshi kushiba bupusano ubu kulayandika? Tulaakucana shikumbulo kumiipusho iyi mumutwi utokonkelaawo.