KUBENE Ebulu abo bakalinga kukala Mucishi Cakashomeshekwa, mwaaka wakalinga kutalika aciindi ca kulima akushanga ico cakalinga kubako mumweenshi wa September nabi October pacecino ciindi.

Bantu bakalinga kushiba mweenshi ndyewakalinga kutalika akumana kwiinda mukulangilisha kubulungana kwa mweenshi. Alimwi mweenshi womwi wakalinga kuba anshiiku 29 na 30. Lyalo bakalinga kushiba bulaamfu bwa mwaaka kwiinda mukusebensesha lisuba. Nacibi boobo, mwaaka ngobakalinga kubelenga kwiinda mukulangilisha kubulungana kwa mweenshi wakalinga kuba anshiiku shiniini kwiinda ngobakalinga kubelenga kwiinda mukusebensesha lisuba. Aboobo bakalinga kweelete kucana nshila mbweenga nshila ishi shobilo shakubelenga ciindi sheendelana. Bakalinga kucita boobo mpashi kwiinda mukwiilikaawo nshiku ashimwi na kwiilikaawo mweenshi womwi mwaaka utokonkelaawo kautana kutalika. Kucita boobo kwakalinga kupa kwaamba ayi kalenda inookweendelana aciindi ca kushanga akutebula.

Nacibi boobo, muciindi cakwe Mose Lesa wakalwiita bantu bakwe ayi mwaaka wakalinga kweelete kutalika amweenshi wa Abibu na Nisani, ciindi cibako mu mweenshi wa March na April pacecino ciindi. (Kulo. 12:2; 13:4) Kusekelela kwakalinga kubaako mumweenshi uyu kwakalinga kwiilikaawo akutebula bale.​—Kulo. 23:15, 16.

Muntu umwi wakeeya abuumbi wakaamba ayi cakalinga cuubu kushiba ndyeenga mweelikaawo mweenshi aumwi pa kalenda. Alimwi wakaamba ayi: “Kusekelela kwa Pasika kwakalinga kubaako mu mweenshi wa Nisani (Nisani 14) ciindi mweenshi ndyewakalinga kubulungana alimwi lyoonse kwakalinga kubako pesule lyakweelana kwa bulaamfu bwa malumwi amashiku . . . Aboobo na kumamanino amwaaka bashiba ayi kusekelela kwa Pasika kulaakubaako ciindi ca kweelana kwa bulaamfu bwa malumwi amashiku kacitana kwiinda, ba Juda bakalinga kwiilikaawo mweenshi womwi, mweenshi wa Nisani kautana kutalika.”

Bakamboni Bakwe Yehova balasebensesha nshila iyi ndyebasuni kushiba bushiku ndyekweelete kuba Mulalilo wa Mwaami, uyo ubako mu March na April pabushiku bweendelana a Nisani 14 pakalenda ya bene Ebulu. Mabungano a Bakamboni Bakwe Yehova nsengwe yoonse alashibishikwa bushiku ubu ciindi kaciciliiko.

Ano ino bene Ebulu bakalinga kushiba buyani mweenshi umwi ndyewakalinga kumana amweenshi upya ndyewakalinga kutalika? Munshiku shino tulalangabo pakalenda yakapulintwa na ili pafooni, patabuleti nabi pakompyuta. Nacibi boobo, ubu teshi mbocakalinga muciindi camu Baibo.

Muciindi ca Muyoba Unene, myeenshi yakalinga kuba anshiiku shili 30. (Mata. 7:11, 24; 8:3, 4) Lyalo mukuya kwa ciindi, pakalenda ya bene Ebulu myeenshi tayakalinga kubabo anshiiku shili 30. Kubene Ebulu, mweenshi wakalinga kutalika pabushiku ndyeenga babonabo kubala kwa mweenshi. Ishi shakalinga kucitika pesule lya nshiiku 29 na 30 kuswa ciindi mweenshi wamana ndyewakatalika.

Paciindi cimwi, Defedi a Jonasani bakaamba pakutalika kwa mweenshi upya, ndyebakaamba ayi: ‘Ciilo mweenshi ulakubala.’ (1 Samwe. 20:5, 18) Citoboneka ayi kusa mukushika paciindi ici, bakalinga kushibila limwi ciindi myeenshi ndyeyakalinga kutalika akumana. Ano ino bene Isilaeli bakalinga kushiba buyani mweenshi upya ndyewakalinga kutalika? Mulibuku liitwa ayi Mishnah umo mucanika milawo atushiyashiya twaba Juda, muli makani eenga atucafwa kushiba mbocakalinga kuba. Makani aliimo alatondesha ayi ba Juda ndyebakaswa mubusha ku Babiloni, bamukooti inene yaba Juda ya Sanihedilini mbobakalinga kucite mukuli wakushiba mweenshi wakalinga kukonkelaawo ndyoweelete kutalika. Mumyeenshi 7 ndyekwakalinga kuba kusekelela, bamukooti bakalinga kubungana pabushiku bwa namba 30 bwa mweenshi. Ano ino bakalinga kushiba buyani?

Basankwa bakalinga kulindilila mumisena ya peculu lya ndabala ya Jelusalemu bakalinga kulangilisha mwiculu mashiku kwaamba ayi bauboone mweenshi na ubalebo. Lyalo na baubona bakalinga kufwambaana kushibisha bamukooti ya Sanihedilini. Na bamukooti iyi batambula bumboni bukwene bwakwaamba ayi mweenshi wabala, bakalinga kwaambilisha kutalika kwa mweenshi upya. Ano ino cakalinga kuba buyani na beshikulindilila baalilwa  kubona mweenshi ndyewabalabo ceebo cakwaamba ayi mwiculu muli makumbi na kuli shikuunku? Na caba boobo, bakalinga kwaambilisha kutalika kwa mweenshi upya lyalo mweenshi ngobabeteemo wakalinga kuba anshiiku shili 30.

Kwaamba ayi baambilishe kutalika kwa mweenshi upya, bakalinga kukunka mulilo peculu lya Kalundu ka Maolifi, pafwiifwi a Jelusalemu. Alimwi bakalinga kwaambilisha makani aya kwiinda mukukunka mulilo amumisena imwi yapeculu mucishi ca Isilaeli coonse. Mukuya kwaciindi, bakalinga kutuma beshinkombe. Aboobo ba Juda bakalinga mu Jelusalemu amumisena imwi bakalinga kushibishikwa ayi mweenshi upya watalika. Lyalo boonse bakalinga kuba akusekelela paciindi comwi.

Caati itokweendelana amakani aya inga yamucafwa kunyumfwishisha myeenshi, kusekelela kwakalinga kubaako, ashiindi shipusenepusene shakalinga kubaako muciindi ca bene Isilaeli.