1-2. Kweelana a Kulumbaisha 25:14, ino nciinshi ncotweelete kucita na tulisuni kuba abushicibusa buyumu a Yehova?

 INO MUTOYEEYA ayi njimibo nshi iyandika yeenga yamucafwa kutolelela kuba abushicibusa buyumu amuntu umwi? Mpashi inga mwakumbula ayi beshicibusa bali kabotu balyeelete kusunana akunoocafwana. Alimwi mpashi inga tamuyeeyiwo ayi kuloonda ngu mubo uyandika kwaamba ayi bantu batolelele kuba abushicibusa buli kabotu. Nacibi boobo, kweelana alilembo paswa mutwi uyu mbolyaamba, abo basuni kuba abushicibusa buyumu a Yehova balyeelete ‘kumuloonda.’​—Amubelenge Kulumbaisha 25:14, NWT.

² Nabi kwaamba ayi twasebensela Yehova kwaciindi cilaamfu buyani, soonse tulayandika kutolelela kumulemeka abuumbi. Ano ino kuloonda Lesa cilaamba nshi? Ino nshiinshi nsheenga twaciita kwaamba ayi twiiye kuloonda Yehova? Alimwi ino nshiinshi nsheenga tweeya kuswa kuli Obadiya, Mupailishi Munene Jeoiyada, alimwi a Mwaami Joashi pamakani akuloonda Lesa?

3. Ino kuloonda inga kwatucafwa buyani? Amusansulule.

³ Mpashi inga twaloonda na twashiiba ayi cintu cimwi inga cabika buumi bwesu mumapensho. Kuloonda kwa mushobo uyu kuli kabotu mukwiinga inga kwatucafwa kusalawo kucita cintu cili kabotu. Kuloonda kukulukila kulatucafwa kuleya kweendela pafwiifwi acilindi cilaamfu. Kuloonda kulicisa inga kwatucafwa kuleya bukaalo butabete kabotu. Kuloonda kunyonyoola bushicibusa mbotucite amuntu ngotusuni inga kwatucafwa kuleya kwaamba na kucita cintu ceenga camukalasha.

4. Ino Satana alisuni kwaamba ayi bantu banoomuloonda buyani Yehova?

⁴ Satana alisuni kwaamba ayi bantu banoloonda Yehova munshila itabete kabotu. Satana alisuni ayi tunooshoma ayi Yehova lyoonse alababo kaakalalite, alisuni kutwaanisha alimwi ayi inga tatumusangalashiiwo. (Jobo 4:18, 19) Kwiilikaawo, alisuni kwaamba  ayi tunoloonda Yehova cakufwa cakwaamba ayi twacileka akumusebensela. Kwaamba ayi tuleye kuloonda Yehova munshila iyo, tulyeelete kwiiya kumulemeka akuleya kucita shintu shimukalasha.

5. Ino kuloonda Lesa cilaamba nshi?

⁵ Muntu uloonda Lesa munshila yeelete, alisuni Yehova alimwi taasuni kucita cili coonse ceenga canyonyoola bushicibusa bwakwe anguwe. Yesu alakwe wakalinga “kuloonda Lesa” munshila yeelete. (Ebu. 5:7, NWT) Taakalinga kuloonda Yehova cakufwa. (Isa. 11:2, 3) Sombi wakalinga kusuni Yehova abuumbi alimwi wakalinga kunoomunyumfwila. (Joni 14:21, 31) Bweenka mbuli Yesu, tulamulemeka abuumbi Yehova akumuloonda mukwiinga ngu Lesa ucite lusuno, busongo, bululami ankusu. Alimwi tulicishi kwaamba ayi Yehova alitusuni abuumbi alimwi alabikila maano kushintu nshotucita na watwiisha. Nshotucita inga shakalasha Yehova na kupa kwaamba ayi asangalale.​—Kulu. 78:41; Tus. 27:11.

6. Ino ninshila nshi yomwi mbweenga tweeya kuloonda Lesa? (Kulumbaisha 34:11)

⁶ Taakuwo muntu ushalwa kaali muntu uloonda Yehova; aboobo soonse tulyeelete kwiiya kumuloonda. (Amubelenge Kulumbaisha 34:11.) Nshila yomwi mbweenga twacita boobo, nkwiinda mukweebela shilengwa. Na twaboona shintu Lesa “nshaakalenga” mboshitondesha ayi alicite busongo, nkusu, alimwi ayi alitusuni, tulamulemeka abuumbi akumusuna. (Loma. 1:20) Nankashi wa liina lya Adrienne wakaamba ayi, “Na ndalangilisha shintu Lesa nshaakalenga, cilankankamika akuncafwa kushiba ayi alicishi kabotu nsheenjandika.” Mukwiinga lyoonse wakalinga kuyeeya pamakani aya, wakaamba ayi, “Nshisuniwo kucita cili coonse ceenga canyonyoola bushicibusa bwangu a Yehova uyo wakampa buumi.” Amukacane ciindi nsondo ino cakukutumana kuyeeya pacintu cimwi Yehova ncaakalenga. Kucita boobo kulaakumucafwa kulemeka akusuna Yehova abuumbi.​—Kulu. 111:2, 3.

7. Ino kupaila inga kwatucafwa buyani kwiiya kunoloonda Yehova munshila yeelete?

⁷ Nshila aimwi mbweenga tweeya kuloonda Lesa, nkwiinda mukupaila kuli nguwe lyoonse. Tulamushiba kabotu Yehova na lyoonse katupaila kuli nguwe. Lyoonse na twasenga Yehova kwaamba ayi atupe nkusu shakuliyumya ndyetutokwiinda mumapensho, tulebaluka ayi alicite nkusu. Na twamulumba pakutupa Mwanaakwe, tulebaluka ayi alitusuni. Alimwi na twasenga Yehova kuswa panshi lya moyo kwaamba ayi atucaafwe palipenshi ndyetutokwiindaamo, tulebaluka ayi alicite busongo abuumbi. Mipailo ya mushobo uyu ilatucafwa kunomulemeka abuumbi Yehova. Alimwi ilatucafwa kuba bashinishite kuleya cili coonse ceenga canyonyoola bushicibusa bwesu anguwe.

8. Ino nshiinshi nsheenga twaciita kwaamba ayi tutolelele kuloonda Lesa?

⁸ Inga twatolelela kuloonda Yehova na katwiiya Baibo aluyaando lwakwiiya kuswa kushakubonenaako shibotu ashakubonenaako shitabete kabotu. Amuleke tubandike pashakubonenaako sha basebenshi bakwe Yehova bobilo abo bakalinga kushomeka. Cakubonenaako cakwe Obadiya uyo wakalinga munene muŋanda ya bwaami yakwe Aabu alimwi aca Mupailishi Munene Jeoiyada. Alimwi tutobandika ansheenga tweeya kuswa kuli Joashi uyo wakalinga mwaami wa baJuda. Pakutaanguna wakalinga kusebensela Yehova, sombi mukuya kwaciindi wakacileka.

9. Ino kuloonda Yehova kwakamucafwa buyani Obadiya? (1 Baami 18:3, 12)

⁹ Ciindi cakutaanguna Baibo ndyeyaamba pali Obadiya, b ilaamba ayi: “Obadiya wakalinga kuloonda Yehova abuumbi.” (Amubelenge 1 Baami 18:3, 12, NWT.) Ino kuloonda Yehova munshila yeelete kwakamucafwa buyani Obadiya? Cakutaanguna, kucita boobo kwakamucafwa kuba muntu  ushomeka alimwi bamwi ngweenga bashoma; ici ncocakapa kwaamba ayi mwaami amusaale kuba munene muŋanda ya bwaami. (Amweelanye a Neyemiya 7:2.) Alimwi kuloonda Lesa kwakamucafwa kutondesha kutaloonda munshila ilibetele. Uyu ngu mubo ngwaakalinga kuyandika kubaawo. Wakekalaako paciindi mwaami mubiibi Aabu ndyaakalinga kweendelesha uyo ‘wakabisha pameenso akwe Yehova kwiinda mbobakabisha boonse bakataanguna kuba baami.’ (1 Baam. 16:30) Alimwi Jesebelo mukaakwe Aabu uyo wakalinga kulambila Baali, wakalinga kupatite Yehova abuumbi cakwaamba ayi wakalinga kusuni kumana kulambila kwancine mu bwaami bwa mikowa ili 10 ya bene Isilaeli. Kwiilikaawo, wakacaya bashinshimi bakwe Lesa baanji. (1 Baam. 18:4) Ncakutatoonsha kwaamba ayi Obadiya wakalinga kulambila Yehova paciindi shintu ndyeshakalinga shiyumu.

10. Ino Obadiya wakatondesha buyani kutaloonda munshila ilibetele?

¹⁰ Ino Obadiya wakatondesha buyani kutaloonda munshila ilibetele? Jesebelo ndyaakalinga kulangoola bashinshimi bakwe Lesa kwaamba ayi abacaaye, Obadiya wakashisa bashinshimi bali 100 ‘mushimfwengo, mumakoto obilo, nkokwaamba ayi mucimfwengo comwi acomwi kamuli bantu bali 50. Alimwi wakatolelela kubapa shakulya amaanshi.’ (1 Baam. 18:13, 14) Naakwiinga Jesebelo wakashiba Obadiya nshaakacita, naakwiinga Obadiya wakacaikwa kuli Jesebelo. Obadiya alyeelete wakaloonda alimwi taakalinga kusuniiwo kufwa. Sombi Obadiya wakalinga kusuni Yehova alimwi abaabo bakalinga kumusebensela kwiinda mbwaakalinga kusuni buumi bwakwe.

11. Ino basebenshi bakwe Yehova ba munshiku shino balacikonkela buyani cakubonenaako cakwe Obadiya? (Amubone acikope.)

¹¹ Munshiku shino, basebenshi bakwe Yehova baanji balekala mushishi incito yesu moyakakashikwa. Bweenka mbuli Obadiya, bamakwesu abenankashi aba balakaka kucileka kusebensela Yehova nabi kwaamba ayi balatolelela kutondesha bulemu kubeendeleshi! (Mate. 22:21) Balatondesha ayi balaloonda Lesa kwiinda mukumunyumfwila kuteshi kunyumfwila bantu. (Milimo 5:29) Balacita boobo kwiinda mukutolelela kushimikilako bamwi makani abotu alimwi akubungana pomwi mubushishi. (Mate. 10:16, 28) Balacita nsheenga bacikonsha kwaamba ayi bashominyinaabo babe ashintu nshebayandika kwaamba ayi batolelele kuba abushicibusa buyumu a Yehova. Amuyeeye pacakubonenaako caba Henri, abo bekala mucishi cimwi mu Africa umo ncito yesu moyakalinga yakashikwa kwakaciindi. Paciindi incito yesu  ndyeyakakashikwa, ba Henri bakalyaaba kunotolela bashominyinaabo mabuku aamba shamu Baibo. Bakalemba ayi: “Ndi muntu wa nsoni. Aboobo ndakashoma cakutatoonsha ayi kulemeka Yehova abuumbi nkokwakancafwa kuba muntu utaloondi.” Sa amwebo inga mwakonkela cakubonenaako caba Henri cakutondesha kutaloonda? Inga mwacikonsha kucita boobo na mweeya kuloonda Lesa munshila yeelete.

12. Ino Mupailishi Munene Jeoiyada alimwi amukaakwe bakatondesha buyani ayi bakalinga kushomeka abuumbi kuli Yehova?

¹² Mupailishi Munene Jeoiyada wakalinga kuloonda Yehova, alimwi kucita boobo kwakamucafwa kuba muntu ushomeka akuyuminisha kulambila kwancine. Ici cakabonekela patuba paciindi Ataliya mwanaakwe Jesebelo ndyaakalibika pa bwaami mucishi ca Juda. Bantu bakalinga kuloonda Ataliya mukwiinga wakalinga shilunkutwe abuumbi alimwi wakalinga kusunishishi kuba pa bwaami cakwaamba ayi wakeelesha kucaya beshikulu bakwe basankwa boonse! (2 Maka. 22:10, 11) Joashi uyo wakalinga womwi pa beshikulu bakwe, wakapuluka ceebo cakwaamba ayi Jeosheba mukaakwe Jeoiyada, wakamupulusha. Jeosheba a ibaye bakashisa Joashi akunoomulama. Kucita boobo kwakapa kwaamba ayi bashitilishe lunyungu lwa bamaami bamumukowa wakwe Defedi. Jeoiyada wakalinga kushomeka kuli Yehova alimwi taakwe kuloonda Ataliya.​—Tus. 29:25.

13. Ino Jeoiyada wakatondesha buyani kushomeka kuli Yehova paciindi Joashi ndyaakalinga kucite myaaka 7?

¹³ Joashi ndyaakalinga kucite myaaka 7, Jeoiyada alimwi wakatondesha ayi wakalinga kushomeka kuli Yehova kwiinda mukusalawo kucita cintu cimwi. Naakwiinga nshaakasalawo kucita shakaswitilila, naakwiinga Joashi wakaba mwaami weelela pa bamulunyungu lwakwe Defedi. Sombi naakwiinga nshaakasalawo kucita tashikwe kuswitilila, mpashi naakwiinga Jeoiyada wakacaikwa. Kwiinda mulucafwo lwakwe Yehova, nshaakasalawo kucita shakaswitilila. Kwiinda mukucafwikwa abacinenenene bamwi alimwi abene Lefi, Jeoiyada wakabika Joashi pa bwaami akupa kwaamba ayi Ataliya acaikwe. (2 Maka. 23:1-5, 11, 12, 15; 24:1) Lyalo Jeoiyada wakalengesha ayi ‘Mwaami Joashi abantu boonse bapange cipangano a Yehova kwaamba ayi babe bakwe Yehova.’ (2 Baam. 11:17) Alimwi Jeoiyada ‘wakabika abeshikulindilila mumalishi kuminjililo ya ŋanda yakwe Yehova ayi banookasha bantu batasalalite kweelana aMilawo kwinjila.’​—2 Maka. 23:19.

14. Ino Jeoiyada wakalemekwa buyani ceebo cakwaamba ayi wakalinga kulemeka Yehova?

¹⁴ Muciindi cakwisule, Yehova wakaamba ayi: “Nebo ndapa bulemu abo bampa bulemu.” Ncakwiila Yehova wakapa shoolwe Jeoiyada. (1 Samwe. 2:30) Kucakubonenaako, mu Baibo wakeelikaamo makani aamba pali Jeoiyada kwaamba ayi twiiyeeko. (Loma. 15:4) Alimwi Jeoiyada ndyaakafwa, wakalemekwa munshila ilibetele kwiinda mukubikwa “kushuumbwe sha bamaami mundabala yakwe Defedi ceebo ca shintu shibotu nshaakacitila bene Isilaeli, Lesa a ŋanda yakwe.”​—2 Maka. 24:15, 16.

15. Ino nshiinshi nsheenga tweeya kuswa ku makani aamba pali Jeoiyada? (Amubone acikope.)

¹⁵ Makani aamba pali Jeoiyada inga atucafwa soonse kwiiya kuloonda Yehova. Bamanene inga bakonkela cakubonenaako cakwe Jeoiyada kwiinda mukunoocana nshila sha mbweenga bashitilisha bamakwesu abenankashi mulibungano. (Milimo 20:28) Cakubonenaako cakwe Jeoiyada inga cacafwa bacinene kushiba ayi na kabaloonda Yehova akutolelela kushomeka kuli nguwe inga wabasebensesha kukumanisha kuyanda kwakwe. Alabona ayi kuli nsheenga bacikonsha kucita. Bacanike inga bakonkela cakubonenaako cakwe Yehova mbuli mbwaakatondesha bulemu kuli Jeoiyada, kwiinda mukutondesha bulemu ku bamakwesu abenankashi bacinene, bunene bunene abo basebensela Yehova cakushomeka kwamyaaka iinji. (Tus. 16:31) Mukweelaako, soonse kuli nsheenga tweeya kuswa ku bacinenenene alimwi abene Lefi abo bakacafwa  Jeoiyada. Aswebo atutolelele kucafwa ‘baabo batotutanjilila’ kwiinda mukunoobanyumfwila.​—Ebu. 13:17.

16. Ino nshiinshi shitondesha ayi Joashi taakalinga kuloonda Yehova?

¹⁶ Jeoiyada wakacafwa Mwaami Joashi kuba muntu uli kabotu. (2 Baam. 12:2) Aboobo Mwaami Joashi ndyaakalinga mwanike, wakalinga kusuni kusangalasha Yehova. Sombi Jeoiyada ndyaakafwa, Joashi wakatalika kukutika ku bacinenenene abo batakalinga kukonkela milawo yakwe Lesa. Aboobo ino nshiinshi shakaswaamo? Lakwe abantu mbaakalinga kweendelesha bakatalika “kulambila shibumbwabumbwa ashikoshanyo.” (2 Maka. 24:4, 17, 18) Nabi kwaamba ayi nshobakacita shakakalasha Yehova abuumbi “wakatolelela kutuma bashinshimi kwaamba ayi bacenjeshe bantu abo ayi baboolele kuli nguwe, sombi bantu abo tabakwe kubanyumfwila.” Tabakwe kunyumfwila nabibo kuli Sekaliya mwanaakwe Jeoiyada, uyo wakalinga mushinshimi wakwe Yehova, mupailishi alimwi mupyala wakwe Joashi. Alimwi Mwaami Joashi wakapa kwaamba ayi Sekaliya acaikwe, nabi kwaamba ayi bamumukwashi wakwe Sekaliya bakapulusha Joashi.​—2 Maka. 22:11; 24:19-22.

17. Ino nshiinshi shakacitikila Joashi?

¹⁷ Joashi taakwe kutolelela kuloonda Yehova munshila yeelete alimwi shakaswaamo shakabica abuumbi. Yehova wakaamba ayi: ‘Ndanyaansha baabo bansebaanya.’ (1 Samwe. 2:30) Mukuya kwaciindi, bashilumamba baniini bene Silya bakakoma “bashilumamba baanji” bakwe Joashi alimwi ‘bakamucisa abuumbi.’ Pesule lyakwaamba  ayi bene Silya baya, Joashi wakacaikwa ku basebenshi bakwe ceebo cakucaya Sekaliya. Bantu bakalinga kumubona ayi wakalinga mwaami mubiibi abuumbi cakwaamba ayi tabakwe kumubika “mushuumbwe sha bamaami.”​—2 Maka. 24:23-25. c

18. Kweelana a Jelemiya 17:7, 8, ino nshiinshi nsheenga twaciita kwaamba ayi tuleye kuba mbuli Joashi?

¹⁸ Ino nshiinshi nsheenga tweeya kuswa kucakubonenaako cakwe Joashi? Wakalinga mwaami uyo wakalinga kucinkitebo manungo mulucafwo lwakwe Jeoiyada. Aboobo Jeoiyada uyo wakalinga kumucafwa ndyaakafwa, Joashi wakatalika kukutika kubaabo batakalinga kukonkela milawo yakwe Yehova alimwi mukuya kwaciindi wakacileka kushomeka kuli Yehova. Shakacitikila Joashi shilatondesha ayi tatweelete kunyumfwilabo Lesa ceebo cakwaamba ayi bamumukwashi wesu abamwi mulibungano balanyumfwila Yehova. Kwaamba ayi tutolelele kuba abushicibusa buyumu a Yehova, tulyeelete kwiiya kumusuna akunoomulemeka abuumbi kwiinda mukunookwiiya lyoonse, kukutumana kuyeeyawo alimwi akupaila.​—Amubelenge Jelemiya 17:7, 8; Kolo. 2:6, 7.

19. Ino nciinshi Yehova ncaatulangila kucita?

¹⁹ Yehova taatulangili kucita nsheenga tatucikonshi. Nshatulangila kucita shililembetwe palilembo lya Shikushimikila 12:13, apo paamba ayi: ‘Koloonda Lesa wancine akukonkela milawo yakwe yoonse mukwiinga uyu ngomulimo woonse wakapekwa muntu.’ Aswebo na katuloonda Yehova bweenka mbuli Obadiya a Jeoiyada, tulaakutolelela kushomeka kuli nguwe nabi tukeende mubukaalo buli buyani kunembo. Taakuwo ceshi cikanyonyoole bushicibusa bwesu a Yehova.