1-2. Ino mbukaalo nshi mbotubeteemo bukoshenye abukaalo Loti mbwaakalingaamo?

 NA TWABOONA shintu shibiibi bantu nshebatoocita munshiku shino, tulalinyumfwa bweenka mbwaakalinyumfwa Loti. “Wakalinga kupenshekwa abuumbi ceebo ca buumi butaluleme” bwa bantu bakalingaako paciindi cilya, mukwiinga wakalinga kucishi ayi Ishiwesu wakwiculu alipatite shintu shibiibi. (2 Pit. 2:7, 8) Kuloonda alimwi akusuna Lesa kwakacafwa Loti kupata shintu shibiibi bantu nshobakalinga kucita paciindi cilya. Aswebo tulekala abantu batalemeki na batakonkeli njiisho shakwe Yehova shaamba pamakani akulilemeka. Nacibi boobo, inga twatolelela kuba amibo ibotu na twatolelela kusuna Lesa akwiiya kunoomulemeka abuumbi.​—Tus. 14:2.

² Kwaamba ayi Yehova atucaafwe kucita boobo, alatulwiita makani ayuminisha ngotucana mulibuku lya Tushimpi. Kwiiya makani abusongo acanika mulibuku ili inga kwacafwa Beneklistu boonse, inga caba ayi mbasankwa, mbanakashi, mbacanike na mbacinene.

3. Kweelana a Tushimpi 17:3, ino nceebonshi comwi ceelete kutupa kushitilisha moyo wesu? (Amubone acikope.)

³ Ceebo cinene ceelete kutupa kushitilisha moyo wesu wacikoshanyo, ncakwaamba ayi Yehova alalanga langa moyo wesu. Ici cilaamba ayi Yehova Lesa alabona mbotubete mukati ka moyo kuteshibo mbotuboneka pansengwe. (Amubelenge Tushimpi 17:3, NWT.) Alaakutusuna na katukutumana kuyeeya pabusongo bwakwe bweenga bwatucafwa kwikala kwamuyayaya. (Joni 4:14) Kucita boobo kulaakutushitilisha ku mibo ibiibi abubeshi bwakwe Satana abantu babiibi ba mucishi cakwe. (1 Joni 5:18, 19) Na twayumya bushicibusa bwesu a Yehova, tulamusuna akunoomulemeka abuumbi. Ceebo cakwaamba ayi tatusuni kukalasha Ishiwesu, tulaakupata nabibo kuyeeya pacintu ceenga catupa kubisha. Na tweeleshekwa kucita cintu cibiibi, tulaakuliipusha ayi, ‘Ino nceebonshi inga ndacita kashanga kukalasha Yehova uyo wakantondesha lusuno abuumbi?’​—1 Joni 4:9, 10.

4. Ino kuloonda Yehova kwakamushitilisha buyani nankashi umwi kwaamba ayi ataciti cintu citabete kabotu?

 ⁴ Nankashi waliina lya Marta ukala ku Croatia, uyo wakeeleshekwa kucita bufuule wakaamba ayi: “Cakanjumina kuyeeya kabotu akukoma lusuno lwakusuna kucita cintu citabete kabotu. Nacibi boobo, kuloonda Yehova kwakanshitilisha.” b Ino kuloonda Yehova kwakamushitilisha buyani? Ba Marta bakaamba ayi bakakutumana kuyeeya pashibiibi sheenga shaswaamo na bacita bufuule. Aswebo inga twakutumana kuyeeya pashibiibi sheenga shaswaamo. Cintu cibiibi abuumbi ceenga caswaamo ncakwaamba ayi inga twakalasha Yehova alimwi inga tatubiiwo acoolwe cakumulambila kwamuyayaya.​—Mata. 6:5, 6.

5. Ino nshiinshi nsheenga mweeya kuswa kushakacitikila ba Leo?

⁵ Na katuloonda Yehova, tulaleya kuba bushicibusa abantu bacita shibiibi. Ici ncobakesa mukushiba ba Leo abo bekala ku Congo. Ndipakeenda myaaka 4 kuswa ciindi ndyebakabombekwa, bakaba bushicibusa abantu bakalinga kucita shintu shibiibi. Bakalinga kuyeeya ayi kucita boobo kulibo kabotu mukwiinga balo tabakalinga kucitaako shintu shibiibi. Sombi ndipakeendabo ciindi ciniini beshicibusa babo batabete kabotu bakapa kwaamba ayi batalike kunwa bwalwa cakwiindilisha akucita bufuule. Lyalo bakatalika kuyeeya panshobakeeya kuswa kubashali babo Bakamboni alusangalalo ndobakalinga kucite ndyebakalinga kusebensela Yehova. Ino nshiinshi shakaswaamo? Bakacileka kucita shintu shitabete kabotu. Kwiinda mukucafwikwa abamanene, bakaboolela kuli Yehova. Pacecino ciindi balisangalete kusebensa mbuli painiya ulibetele alimwi mbuli munene mulibungano.

6. Ino mbanakashi nshi bobilo bacikoshanyo mbweshi tubandikeewo?

⁶ Amuleke tubandike pamakani ngotucana mulilembo lya Tushimpi capita 9, ayo aamba pabanakashi bobilo bacikoshanyo; mwanakashi musongo alimwi amwanakashi muluya. (Amweelanye a Bene Loma 5:14; Bene Galatiya 4:24.)  Ndyetutokwiiya pamakani aya, munokwiibaluka kwaamba ayi bantu bamucishi cakwe Satana balisunishishi kucita bufuule akweebela shintu shileta miyeeyo yakoonana. (Efe. 4:19) Aboobo cilayandika kutolelela kwiiya kuloonda Lesa akupata kucita shintu shibiibi. (Tus. 16:6) Makani ngotucana mu capita iyi inga atucafwa soonse inga caba ayi tuli basankwa nabi banakashi. Banakashi boonse bobilo baambwa mu capita iyi baleeta baabo batacite maano. Cilababo anga womwi awomwi atokwaamba ayi, ‘Kamwisa muŋanda yangu, mulye shakulya shangu.’ (Tus. 9:1, 5, 6, 13, 16, 17) Nacibi boobo, shicitikila baabo basumina bwiite kuswa ku mwanakashi womwi awomwi shilipusene abuumbi.

7. Kweelana a Tushimpi 9:13-18, ino nshiinshi shicitika kubaabo basumina bwiite kuswa ku mwanakashi muluya? (Amubone acikope.)

⁷ Amubelenge bwiite kuswa ku “mwanakashi muluya.” (Amubelenge Tushimpi 9:13-18.) Cakutaloonda aleeta baabo boonse batacite maano ayi benjile muŋanda yakwe akusekelela pomwi anguwe. Ino nshiinshi shiswaamo? “Boonse bakenjilawo kale muŋanda yakwe, bali panshi mumusena wa bafu.” Mpashi inga mweebaluka maswi amwi acikoshanyo ngotucana kumatalikilo alibuku lya Tushimpi. Tulacenjeshekwa pa “mwanakashi utabete kabotu” alimwi “mufuule.” Baibo ilatulwiita ayi: “Ŋanda yakwe ilatola kulufu.” (Tus. 2:11-19) Lilembo lya Tushimpi 5:3-10 lilatucenjesha pa mwanakashi aumwi ‘utabete kabotu’ uyo ucite ‘myeendo itola kumusena wa bafu.’

8. Ino ngamakani nshi ngotuyandika kusalawo shakucita?

⁸ Abo banyumfwa “mwanakashi muluya” kaiita, balyeelete kusalawo kusumina bwiite bwakwe na kukaka. Aswebo cimwi ciindi inga twayandika kusalawo shakucita pamakani aya. Ino nciinshi nceshi tukacite na muntu umwi akatweeleshe kucita bufuule nabi na cakutengashila tukabone shikope shileta miyeeyo yakoonana?

9-10. Ino nsheebo nshi shimwi sheelete kutupa kuleya kucita bufuule?

⁹ Kuli sheebo shibotu abuumbi sheelete kutupa kuleya kucita bufuule. “Mwanakashi muluya” alaamba ayi: “Maanshi akwiipa ngamise.” Ino “maanshi akwiipa” aleemikaaniko nshi? Baibo ilakoshanisha koonana kwa musankwa amwanakashi beebene kumaanshi. (Tus. 5:15-18) Musankwa amwanakashi beebene kweelana amulawo, balyaangulukite koonana. Ano ubo teshi mbocibete ku “maanshi akwiipa.” “Maanshi akwiipa” mpashi inga emikaninaako koonana kwa bantu bateebene kweelana amulawo. Bantu bacita bufuule liinji baleelesha kucita boobo mubushishi bweenka mwiipi mbwaacita ndyaatokwiipa shintu. “Maanshi akwiipa” inga anyumfwika anga alicite mise bunene bunene na abo batoocita bufuule batoyeeya ayi taakuwo weshi akashibe. Kuyeeya boobo nkulibeca  mukwiinga Yehova alabona shoonse! Kucileka kutambula shoolwe kuswa kuli Yehova, ncintu cibiibi abuumbi ceenga catucitikila alimwi teshi cintu ca “mise” na cisangalasha. (1 Koli. 6:9, 10) Sombi kuli ashimwi sheenga shaswaamo mukucita bufuule.

¹⁰ Kucita bufuule inga kwapa muntu kulinyumfwa cibiibi, kulinyumfwa ayi taakuwo mbwaabete, kupumpa lifumo na kupa kwaamba ayi cikwati cimane. Ncakutatoonsha kwaamba ayi ncintu cabusongo kuleya kunjila ‘muŋanda’ ya mwanakashi muluya akutalya shakulya shakwe. Kwiilika pakunyonyoola bushicibusa bwabo a Yehova, bantu baanji bacita bufuule balayambula malwashi eenga apa kwaamba ayi bafwe. (Tus. 7:23, 26) Tushimpi capita 9:18 ilaamba ayi: “Boonse bakenjilawo kale muŋanda yakwe, bali panshi mumusena wa bafu.” Ano ino nceebonshi bantu baanji balasumina bwiite bwakwe nabi kwaamba ayi kucita boobo kulabanjisha mumapensho?​—Tus. 9:13-18.

11. Ino nceebonshi kweebela shintu shileta miyeeyo yakoonana nkubiibi abuumbi?

¹¹ Cintu cimwi cipukite ncotweelete kuleya, nkweebela shintu shileta miyeeyo yakoonana. Bantu bamwi balayeeya ayi kweebela shintu shileta miyeeyo yakoonana kulibo kabotu. Sombi kweebela shintu shileta miyeeyo yakoonana takubete kabotu, kulapa muntu kulinyumfwa ayi taakuwo mbwaabete, bamwi balacileka kumulemeka alimwi inga camuyumina abuumbi kwaamba ayi acileeke kweebela shintu isho. Na muntu wabona shikope shileta miyeeyo yakoonana, nciyumu abuumbi kushilubaako. Alimwi kweebela shintu shileta miyeeyo yakoonana takucafwi muntu kucaya lunkumbwa lutabete kabotu, sombi kulapa kwaamba ayi lunkumbwa ulo lukomeneneeko. (Kolo. 3:5; Jemu. 1:14, 15) Ncakwiila, bantu baanji beebela shintu shileta miyeeyo yakoonana, mukuya kwaciindi balacita bufuule.

12. Ino inga twacita buyani kwaamba ayi tutondeshe ayi tutokweelesha kuleya kweebela shintu sheenga shatupa kuba alunkumbwa lwakoonana?

¹² Ino nciinshi ncotweelete kucita na cakuteengashila twabona cikope cileta miyeeyo yakoonana pafooni yesu na cisebensesho cimwi? Mutalangiiwo, alimwi amucikusheewo cakufwambaana. Cilaakutubeta cuubu kucita boobo na katwiibaluka ayi cintu ciyandika abuumbi kuli ndiswe, mbushicibusa mbotucite a Yehova. Alimwi nabibo shikope shimwi shiboneka anga inga tashileti miyeeyo yakoonana, inga shapa kwaamba ayi muntu abe alunkumbwa lwakoonana. Ino nceebonshi tulyeelete kuleya kweebela shikope isho? Nceebo cakwaamba ayi tatusuniiwo nabibo kuyeeya kucita bufuule mumoyo wesu. (Mate. 5:28, 29) Munene mulibungano waliina lya David ukala ku Thailand wakaamba ayi: “Ndaliipusha ayi: ‘Nabi kwaamba ayi shikope ishi inga tashileti miyeeyo yakoonana, sa Yehova inga wasangalala na ntolelele kushilangilisha?’ Kuyeeya boobo kulancafwa kusala kabotu shakucita.”

13. Ino nciinshi ceenga catucafwa kusala kabotu shakucita?

¹³ Kuloonda kucita cintu ceenga cakalasha Yehova, kulaakutucafwa kusala kabotu shakucita. “Kuloonda Lesa ngomatalikilo a busongo.” (Tus. 9:10) Tulashiba ayi makani aya ngancine na twabelenga maswi ali mumavesi akutaanguna ngotucana mulilembo lya Tushimpi capita 9, ayo akoshanisha “busongo bwancine” ku mwanakashi umwi.

14. Ino mbwiite nshi bupuseneeko mbotubelenga pa Tushimpi 9:1-6?

¹⁴ Amubelenge Tushimpi 9:1-6. Palilembo ili tulabelenga pa bwiite kuswa kuli Yehova Mulengi wesu, alimwi Kantupu ka busongo boonse bwancine. (Tus. 2:6; Loma. 16:27) Palilembo ili tulabelenga paŋanda inene icite macinko ali 7. Ici cilatondesha ayi Yehova ngushikwaaba alimwi alatambula baabo boonse basuni kwiiya kuli nguwe kwaamba ayi babe basongo.

15. Ino Lesa alisuni ayi tusumine bwiite bwa baani?

¹⁵ Cikoshanyo ca mwanakashi wiimikaninako busongo bwancine, cilatwiisha ayi Yehova ngu Lesa ushikwaaba alimwi alatupa shintu shiinji shibotu. Lilembo ili lilatondesha ayi mwanakashi uyu wacikoshanyo wakabamba kabotu nyama,  kusenkanya waini, alimwi akubamba kabotu patebulu muŋanda yakwe. (Tus. 9:2) Alimwi kweelana a vesi 4 a 5, mwanakashi uyu wacikoshanyo wiimikaninako busongo bwancine alaamba ayi: “Kamwisa noonse nomutacite maano. Kamwisa mulye shakulya shangu.” Ino nceebonshi tulyeelete kusumina bwiite bwakwe akulya shakulya shakwe? Yehova alisuni kwaamba ayi bana bakwe babe basongo akushitilishikwa. Taasuniiwo kwaamba ayi tunoocita shilubo sheenga shatupa kunolinyumfwa cibiibi mubuumi bwesu. Ncoceeco “baluleme ulabalamina busongo bucafwa.” (Tus. 2:7, NWT) Na katuloonda Yehova munshila yeelete, tulaakusuna kunoomusangalasha. Tulanyumfwa kululika kwakwe kwa busongo alimwi tulasangalala kukonkela kululika uko.​—Jemu. 1:25.

16. Ino kuloonda Lesa kwakabacafwa buyani ba Alain kusalawo kabotu shakucita, alimwi ino nshiinshi shakaswaamo?

¹⁶ Amunyumfwe ba Alain mbobakasalawo kabotu shakucita ceebo ca kuloonda Lesa. Ba Alain mbanene mulibungano alimwi mbatiica pacikolo cimwi. Bakaamba ayi, “Buunji bwa baabo mbondakalinga kusebensaabo bakalinga kubona ayi mafilimu atondesha shintu shileta miyeeyo yakoonana alabacafwa kwiiya shimwi pamakani akoonana.” Sombi ba Alain bakalinga kucishi ayi makani aya teshi ancine. Bakaamba ayi, “Ceebo cakusuna Yehova akumuloonda, ndakakaka cakushinisha kweebela mafilimu ayo. Alimwi ndakabasansulwiita ncondakakakila kweebela mafilimu ayo.” Bakalinga kukonkela kululika kwa “busongo bwancine” kwiinda mukweendela “munshila ya maano akunyumfwisha shintu.” (Tus. 9:6) Bamatica bamwi bakasangalala pa nshobakasalawo kucita ba Alain cakwaamba ayi pacecino ciindi batokwiiya Baibo alimwi balacanikaako akumabungano.

17-18. Ino nshoolwe nshi nshobacana bantu basumina bwiite kuswa ku “busongo bwancine,” alimwi ino nshiinshi nsheenga balangila kunembo? (Amubone acikope.)

¹⁷ Yehova wasebensesha shakubonenaako sha banakashi bobilo bacikoshanyo aba kwaamba ayi atucaafwe kushiba mbweenga twacaana shoolwe kunembo. Abo basumina bwiite kuswa ku “mwanakashi muluya” baleelesha kucana lusangalalo mukucita bufuule. Sombi tabacishiiwo kwaamba ayi nshobatoocita pacecino ciindi, shilaakukuma sheshi shikabacitikile kunembo. Nshobatoocita shilaakubatola “panshi mumusena wa bafu.”​—Tus. 9:13, 17, 18.

¹⁸ Sombi abo basumina bwiite kuswa ku mwanakashi wacikoshanyo wiimikaninako “busongo bwancine,” balicite kulangila kubotu! Alimwi balisangalete mukwiinga balicite shintu shoonse nshebayandika kwaamba ayi batolelele kuba abushicibusa buyumu a Yehova. (Isa. 65:13) Kwiinda mu mushinshimi Isaya, Yehova wakaamba ayi: “Amukutike, ee, amukutike kuli ndime mulye shibotu. Ncakwiila amukutike mulisangalashe ashakulya shibotu.” (Isa. 55:1, 2) Pacecino ciindi  tutokwiiya kusuna Yehova nshaasuni akupata nshaapatite. (Kulu. 97:10) Alimwi tulisangalete mukwiinga tutokwiitako bamwi kwaamba ayi abalo bacafwikwe kuswa ku “busongo bwancine.” Tuli anga mbasebenshi abo bali ‘peculu lya musena wiindaawo kulaampa mundabala inene, akwiita bantu ayi: ‘Kamwisa noonse nomutacite maano.’’ Shoolwe nshotucana pomwi abaabo basumina bwiite ubu teshibo sha pakaciindi kaniini. Shoolwe ishi nshamuyayaya alimwi shilaakupa kwaamba ayi tukekale kwamuyayaya ndyetutotolelela kweendela “munshila ya maano akunyumfwisha shintu.”​—Tus. 9:3, 4, 6.

19. Kweelana a Shikushimikila 12:13, 14, ino nciinshi ncotweelete kuba bashinishite kucita? (Amubone akabokosi kacite mutwi utokwaamba ayi “ Kuloonda Lesa Kulatucafwa.”)

¹⁹ Amubelenge Shikushimikila 12:13, 14. Kuloonda Yehova abuumbi kulaakutushitilisha, kutucafwa kutolelela kuba amibo ibotu, akutolelela kuba abushicibusa buyumu a Yehova munshiku shino shibiibi shakweelaako. Tulaakutolelela kwiita bantu kwaamba ayi balangoole “busongo bwancine” akwiiya kuswa kuli mbubo ceebo cakwaamba ayi tulisuni Yehova alimwi tulamulemeka amyoyo yesu yoonse.