1. Kweelana a 1 Pita 5:2, ino ngu mukuli nshi bamanene ngobacite mulibungano?

 BAMANENE mulibungano bakapekwa mukuli wakulama mbelele shakwe Yehova shiyandika. Basankwa aba balyaaba, balalumba pa mukuli Yehova ngwakabapa wakusebensela bamakwesu abenankashi alimwi balasebensa cankusu kwaamba ayi babe “beembeshi” balama kabotu mbelele. (Jele. 23:4; amubelenge 1 Pita 5:2.) Tulalumba abuumbi pakuba abamanene mulibungano!

2. Ino ngamapensho nshi bamanene bamwi ngobeendaamo?

² Bamanene baleenda mumapensho aanji ndyebatosebensa mikuli yabo. Cancine ncakwaamba ayi bamanene balayandika kusebensa cankusu kwaamba ayi balame libungano. Ba Tony abo bekala ku United States alimwi basebensa mbuli munene mulibungano, bakesa mukushiba ayi bakalinga kuyandika kwiiya kunolibombya abuumbi pamakani akufula kwa mikuli njeenga bapekwa. Bakaamba ayi: “Bulwashi bwa COVID-19 ndyebwakatalika, ndakalinga kweelesha kucita shiinji kwaamba ayi mbambe bubaambo bwa kubungana akuya muncito yakushimikila. Nabi kwaamba ayi ndakalinga kweelesha kucita shiinji, lyoonse kwakalinga kuba shakucita shiinji. Ndakaba ashakucita shiinji cakwaamba ayi nshindakalinga kubaawo aciindi cikwene ca kubelenga Baibo, kucita ciiyo capalwaangu alimwi akupaila.” Ba Ilir bekala ku Kosovo alimwi basebensa mbuli munene mulibungano, bakeenda mulipenshi limwi. Ndyebakalinga kumusena kwakalinga nkoondo, cakalinga kubayumina kukonkela butanjilishi bwakalinga kuswa ku libunga. Bakaamba ayi: “Kutaloonda kwangu kwakeeleshekwa bamakwesu baku musampi ndyebakampa ncito yakuya mukucafwa bamakwesu abenankashi abo bakalinga kwikala kumusena kwakalinga nkoondo abuumbi. Ndakaloonda alimwi butanjilishi bwakalinga kuboneka anga inga tabusebensiiwo.” Ba Tim abo basebensa mbuli mishonali ku Asia, bakesa mukushiba ayi cakalinga kubayumina kutolelela kucita shintu nshobakalinga kuyandika kucita bushiku abushiku. Bakaamba ayi: “Cimwi ciindi ndakalinga kulinyumfwa kulema abuumbi ceebo cakucafwa bamakwesu abenankashi.” Ino nciinshi ceenga cacafwa bamanene batokwiinda mumapensho mbuli aya?

3. Ino nshiinshi nsheenga tweeya kuswa kucakubonenaako ca Moomboloshi Gidyoni?

 ³ Kuli nsheenga bamanene beeya kuswa kucakubonenaako ca Moomboloshi Gidyoni. (Ebu. 6:12; 11:32) Wakalinga kushitilisha akutanjilila bantu bakwe Lesa. (Boombo. 2:16; 1 Maka. 17:6) Bweenka mbuli Gidyoni, bamanene bakasalwa kulama bantu bakwe Lesa paciindi shintu ndyeshibete shiyumu abuumbi. (Milimo 20:28; 2 Timo. 3:1) Kuli nsheenga tweeya kuswa kucakubonenaako cakwe Gidyoni pamakani akutondesha mibo mbuli kulibombya, kuliceesha alimwi akunyumfwila. Kuliyumya kwakwe Gidyoni kwakeeleshekwa ndyaakalinga kusebensa ncito njaakapekwa. Inga caba ayi tutoosebensa mbuli munene nabi sobwe, soonse inga tweeya kunoolumba abuumbi pakuba abamanene mulibungano. Inga twacafwa bamakwesu aba basebensa cankusu kulama libungano.​—Ebu. 13:17.

4. Ino Gidyoni wakatondesha buyani kulibombya akuliceesha?

⁴ Gidyoni wakalinga musankwa ulibombya alimwi uliceesha. b Munjelo wakwe Yehova ndyaakalwiita Gidyoni ayi wasalwa kupulusha bene Isilaeli kuswa mumaansa abene Midyani abo bakalinga kucite nkusu, musankwa uyu uliceesha wakaamba ayi: ‘Cipani cangu ncecitacite nkusu pashipani sha mumukowa wakwe Manase. Alimwi nebo ndime ntalemekwi pa bamuŋanda ya bata.’ (Boombo. 6:15) Wakalinga kulinyumfwa ayi inga taacikoonshi kusebensa ncito njaakapekwa. Sombi Yehova wakalinga kucishi kwaamba ayi inga wacikonsha. Kwiinda mulucafwo lwakwe Yehova, Gidyoni wakacikonsha kukumanisha ncito njaakapekwa.

5. Ino ndilili ndyeenga caba ciyumu kumunene kutondesha mubo wakulibombya akuliceesha?

⁵ Bamanene balacita nsheenga bacikonsha kutondesha mubo wakulibombya akuliceesha mushintu shoonse. (Mika 6:8; Milimo 20:18, 19) Tabalisumpuli pashintu nshebakacikonsha kucita na nsheenga bacikonsha kucita. Alimwi tabalibooni ayi taaku mbobabete ceebo cakwaamba ayi kuli shilubo shimwi nshebakacita. Nacibi boobo, cimwi ciindi bamanene inga cabayumina kutondesha mubo wakulibombya akuliceesha. Kucakubonenaako, munene inga wasumina kutambula mikuli iinji, lyalo kaalilwa kwiikumanisha kabotu yoonse. Na mpashi bamwi inga bamutongooka na kumulumbaisha ceebo ca mbwaacita shintu. Ino nshiinshi nsheenga bamanene beeya kuswa kucakubonenaako cakwe Gidyoni na balicana mubukaalo ubu?

6. Ino nshiinshi nsheenga bamanene beeya pamakani akutondesha kulibombya kuswa kucakubonenaako cakwe Gidyoni? (Amubone acikope.)

⁶ Amusenge lucafwo. Muntu ulibombya alicishi kwaamba ayi kuli shintu shimwi nsheenga tacikoonshi  kucita. Gidyoni wakatondesha kulibombya mukwiinga wakasenga lucafwo ku bamwi. (Boombo. 6:27, 35; 7:24) Bamanene basongo abalo mbobacita. Ba Tony abo mbotwalinga twaambawo bakaamba ayi: “Ceebo ca mbondakakomena, ndakalinga kusumina kutambula ncito shiinji kwiinda nsheenga ndacikonsha kusebensa. Aboobo ndakasalawo ayi pakulambila kwa mukwashi tunobandikaako apakutondesha mubo wakulibombya, lyalo akusenga bakaangu kwaamba ayi banoondwiita na ntokweelesha kutondesha mubo uyu. Alimwi ndakeebela vidyo icanika pa jw.org icite mutwi waamba ayi Amubayiisye, Amubasyome, Alimwi Akubapa Nguzu Bamwi, Mbubwenya Mbwacita Jesu.” Ba Tony bakatalika kusenga bamwi kwaamba ayi banoobacafwako incito shimwi. Ino nshiinshi shakaswaamo? Ba Tony bakaamba ayi: “Kuli bamakwesu batoosebensa ncito njendakalinga kusebensa mulibungano alimwi ndaba aciindi cinene cakuyumya bushicibusa bwangu a Yehova.”

7. Ino bamanene inga bacikonkela buyani cakubonenaako cakwe Gidyoni bamwi ndyebatobatoongooka? (Jemusi 3:13)

⁷ Amukumbule cakulibombya bamwi ndyebatoomutongooka. Cintu cimwi ceenga capa kwaamba ayi cibe ciyumu ku bamanene kutondesha mubo wakulibombya akuliceesha, nciindi bamwi ndyebatobatoongooka. Cakubonenaako cakwe Gidyoni inga cabacafwa na balicana mubukaalo ubu. Wakalinga kucishi ayi taamaninite, aboobo wakakumbula cakulibombya bene Efuleemu ndyebakamutongooka. (Boombo. 8:1-3) Gidyoni taakwe kubakumbula cabukali. Wakatondesha kuliceesha kwiinda mukubakutika ndyebakalinga kumutongooka akwiinda mukubakumbula cakulibombya. Ici cakapa kwaamba ayi batolelele kunyumfwana. Bamanene basongo balakonkela cakubonenaako cakwe Gidyoni kwiinda mukukutika cakubikila maano alimwi akukumbula cakulibombya bamwi ndyebatobatoongooka. (Amubelenge Jemusi 3:13.) Aboobo balapa kwaamba ayi mulibungano mutolelele kuba luumuno.

8. Ino bamanene balyeelete kucita buyani na bamwi babalumbaisha? Amwaambe cakubonenaako.

⁸ Amulumbaishe Yehova na bamwi bamulumbaisha pashintu nshemucikonsha kucita. Gidyoni ndyebakamulumbaisha pesule lyakukoma bene Midyani, wakalumbaisha Yehova. (Boombo. 8:22, 23) Ino bamanene inga bacikonkela buyani cakubonenaako cakwe Gidyoni? Balyeelete kulumbaisha Yehova pashintu shoonse nshobacikonsha kucita. (1 Koli. 4:6, 7) Kucakubonenaako, na munene bamulumba ceebo cakwaamba ayi alicishi kabotu kwiisha, inga waamba ayi nshaamba shaswa mu Maswi akwe Lesa alimwi soonse tutokwiiya kuswa ku libunga lyakwe Yehova. Cimwi ciindi bamanene balyeelete kuyeeyawo na balaiisha munshila yeenga yapa kwaamba ayi Yehova alumbaishikwe nabi na balasuna bamwi ayi babalumbaishe. Amuyeeye pacakubonenaako ca munene waliina lya Timothy. Ndyaakasalwabo kusebensa mbuli munene, wakalinga kunyumfwa kabotu kwaamba makani a Baibo. Wakaamba ayi: “Ndakalinga kufusha maswi apakutalikila akusebensesha shikoshanyo shilaamfu alimwi shisangalasha. Liinji kucita boobo kwakalinga kupa kwaamba ayi bamwi banoondumbaisha. Aboobo ici cakapa kwaamba ayi bantu batalike kulumbaisha ndime muciindi ca kulumbaisha Yehova na kubona makani amu Baibo mbweenga abacafwa.” Mukuya kwaciindi, ba Timothy bakesa mukushiba ayi bakalinga kuyandika kwaalulako mbobakalinga kwiisha kwaamba ayi batanoobalumbaisha. (Tus. 27:21) Ino nshiinshi shakaswaamo? Bakaamba ayi: “Ano pacecino ciindi bamakwesu abenankashi balandwiita ayi likani limwi ndyendakaamba lyakabacafwa kukoma lipensho limwi, kuliyumya ndyebakalinga kweeleshekwa na kuba abushicibusa buyumu a Yehova. Ndasangalala abuumbi na bandwiita boobo kwiinda mbondakalinga kusangalala na bandumbaisha.”

9. Ino nshiinshi shakapa kwaamba ayi cibe ciyumu kuli Gidyoni kunyumfwila Yehova alimwi akutondesha kutaloonda? (Amubone cikope cili papeeji yakutaanguna.)

⁹ Gidyoni ndyaakapekwa ncito yakutanjilila bene Isilaeli, wakalinga kuyandika kunyumfwila akutondesha kutaloonda. Wakapekwa ncito iyumu yakunyonyoola cipaililo baishi ncebakalinga kubengelawo milambu kuli Baali. (Boombo. 6:25, 26) Pesule lya kubunganya bashilumamba, mankanda obilo Yehova wakalwiita Gidyoni kwaamba ayi aceesheko likoto lya bashilumamba bakwe. (Boombo. 7:2-7) Mukweelaako, wakalwiitikwa kuya mukulwana balwani babo pakati ka mashiku.​—Boombo. 7:9-11.

10. Ino ndilili ndyeenga caba ciyumu kumunene kukonkela butanjilishi?

 ¹⁰ Bamanene balyeelete kuba ‘balibambite kunyumfwila.’ (Jemu. 3:17) Munene unyumfwila ulaba ulibambite kukonkela Malembo nshaamba alimwi akukonkela butanjilishi buswa kulibunga lyakwe Lesa. Aboobo alatondesha cakubonenaako cibotu kubamwi. Nacibi boobo, cimwi ciindi inga camubeta ciyumu kunyumfwila. Kucakubonenaako, cimwi ciindi inga watambula butanjilishi buunji, na mpashi inga kabwaaluka cakufwambaana alimwi inga kacimuyumina kubukonkela. Lyalo cimwi ciindi inga watalika kutoonsha na butanjilishi bumwi inga bwasebensa. Na mpashi inga walwiitikwa kusebensa ncito yeenga yapa kwaamba ayi aangwe. Ino bamanene inga bacikonkela buyani cakubonenaako cakwe Gidyoni ca kunyumfwila na balicana mubukaalo ubu?

11. Ino nciinshi ceenga cacafwa bamanene kunookonkela butanjilishi?

¹¹ Amubelenge cakubikila maano butanjilishi mbomutambula akubukonkela. Lesa wakalwiita Gidyoni bwakunyonyoola cipaililo ca baishi, nkwakalinga kweelete kuyaka cipaililo cipya cakwe Yehova alimwi acinyama ncaakalinga kweelete kubenga mulambu. Gidyoni taakwe kutoonsha butanjilishi mbwaakapekwa. Sombi wakacita kweelana a Yehova mbwaakamulwiita. Munshiku shino, bamanene balatambula butanjilishi kuswa kulibunga lyakwe Yehova kwiinda mumakalata, shakoolobesha alimwi ashakucita shimwi shitucafwa kutolelela kuba abuumi buli kabotu akuba abushicibusa buyumu a Yehova. Tulibasuni bamanene mukwiinga cakushomeka balakonkela butanjilishi mbobatambula kuswa kulibunga. Bamulibungano boonse balafubilaamo.​—Kulu. 119:112.

12. Ino bamanene inga baikonkela buyani njiisho njetucana pa Bene Ebulu 13:17 na libunga lyakwe Yehova lyabalwiita kucita shintu munshila ipuseneeko ambobakalinga kucita kale kale?

¹² Amube balibambite kwaaluka. Na mutokwiibaluka, Yehova wakalwiita Gidyoni ayi alwiite bashilumamba bakwe baanji ayi babooleleemo kumishaabo. (Boombo. 7:8) Mpashi wakaliipusha ayi: ‘Sa ncakwiila ndyeelete kuceesha namba ya bashilumamba? Sa tulaakucikonsha kubakoma balwani besu?’ Nacibi boobo, Gidyoni wakakonkela butanjilishi mbwaakapekwa. Munshiku shino, bamanene balakonkela cakubonenaako cakwe Gidyoni kwiinda mukukonkela butanjilishi na libunga lyabalwiita kucita cintu cimwi munshila ipuseneeko ambobakalinga kucita kale kale. (Amubelenge Bene Ebulu 13:17.) Kucakubonenaako, mu 2014 bamu Likoto Litanjilila bakaalula nshila mbotupa maali asebenseshekwa pakuyaka Maanda a Bwaami a Misena Motucitila Kubungana Kunene. (2 Koli. 8:12-14) Kale kale, mabungano akalinga kukongola maali kuswa kulibunga kwaamba ayi bayake Maanda a Bwaami, lyalo mukuya kwaciindi mabungano akalinga kuboosha maali ayo. Ano pacecino ciindi, libunga lilasebensesha maali apekwa mukuliyandila kuswa mumabungano oonse nsengwe yoonse kwaamba ayi bayake Maanda a Bwaami a Misena Motucitila Kubungana Kunene kuli koonse nkwatoyandika nabi kwaamba ayi libungano inga lyapabo maali aniini. Ba José ndyebakanyumfwa sha bubaambo ubu bakatoonsha na bulakusebensa. Bakayeeya ayi: ‘Taakuwo Ŋanda ya Bwaami nabi yomwi yeshi ikayakwe. Taakuwo bubaambo bwa mushobo uyu nkobwakasebensawo pano pacishi.’ Ino nciinshi cakacafwa ba José kukonkela butanjilishi? Bakaamba ayi: “Maswi acanika pa Tushimpi 3:5, 6 akanjiibalusha kucinka manungo muli Yehova. Alimwi shaswaamo nshibotu abuumbi! Tutoyaka Maanda a Bwaami aanji  alimwi tutoopa maali ngeenga twacikonsha kwaamba ayi kube kweelanina.”

13. (a) Ino nciinshi Gidyoni ncaakalinga kushomete cakutatoonsha? (b) Ino bamanene inga bacikonkela buyani cakubonenaako cakwe Gidyoni? (Amubone acikope.)

¹³ Amucite kuyanda kwakwe Yehova cakutaloonda. Gidyoni wakanyumfwila Yehova nabi kwaamba ayi wakalinga waloonda alimwi incito njaakapekwa yakalinga kusa mukubika buumi bwakwe mumapensho. (Boombo. 9:17) Yehova ndyaakashomesha Gidyoni ayi alaakuswitilila muncito njaakamupa, wakashoma cakutatoonsha ayi Lesa alaakumucafwa kushitilisha bantu Bakwe. Bamanene bekala mumisena incito yesu moyakakashikwa, balakonkela cakubonenaako cakwe Gidyoni. Cakutaloonda balatanjilila mabungano akwaabanamo lubasu muncito yakushimikila nabi kwaamba ayi balaloondeshekwa ayi batobaanga, kwiipushikwa miipusho kubakapokola, incito kumana na kuumwa. c Muciindi ca mapensho anene, bamanene balaakuyandika kutaloonda kukonkela butanjilishi buli boonse mbweshi bakatambule nabi kwaamba ayi kucita boobo inga kwabika buumi bwabo mumapensho. Kucakubonenaako, mpashi tulaakutambula butanjilishi bweshi bukanokwaamba pa bwakushimikila makani eshi akanooli anga ngamabwe amfula alimwi ansheshi tukayandike kucita kwaamba ayi tukapuluke na Gogi waku Magogi akatulwaane.​—Esek. 38:18; Ciyu. 16:21.

14. Ino nceebonshi cakalinga ciyumu kuli Gidyoni kuliyumya?

¹⁴ Gidyoni ndyaakalinga kusebensa mbuli Moomboloshi wakalinga kuyandika kusebensa cankusu. Bene Midyani ndyebakacica nkoondo iyo yakalingaako mashiku, Gidyoni wakabatandaanya kuswa kucinyika ca Jesiliilu kuya mukushika kumulongo wa Joodani uyo mpashi wakalinga kushingulukitwe ashisamu alimwi kwakalinga kushinkite. (Boombo. 7:22) Sa Gidyoni wakaboolelaamo ndyaakashika pamulonga wa Joodani? Sobwe! Nabi kwaamba ayi lakwe abasankwa bakwe bali 300 bakalinga kulemete, bakasubuka mulonga wa Joodani akutolelela kutandaanya balwani babo. Mukweelaako, bakacana bene Midyani akubakoma.​—Boombo. 8:4-12.

15. Ino nceebonshi cimwi ciindi munene inga camubeta ciyumu kuliyumya?

¹⁵ Cimwi ciindi munene inga walinyumfwa kulema abuumbi ceebo cakulama libungano alimwi amukwashi wakwe. Ino bamanene inga bacikonkela buyani cakubonenaako cakwe Gidyoni na balicana mubukaalo ubu?

16-17. Ino nciinshi cakacafwa Gidyoni kuliyumya, alimwi ino nciinshi bamanene nceenga bashoma? (Isaya 40:28-31) (Amubone acikope.)

 ¹⁶ Amushome kwaamba ayi Yehova alaakumupa nkusu. Gidyoni wakalinga kushomete ayi Yehova alaakumupa nkusu. Alimwi ncakwiila Yehova wakamupa nkusu. (Boombo. 6:14, 34) Paciindi cimwi, Gidyoni abasankwa bakwe bakalinga kutandaanya bamaami bobilo ba bene Midyani abo mpashi bakalinga kutantite pa ngamela. (Boombo. 8:12, 21) Sombi Lesa wakacafwa Gidyoni abasankwa bakwe kucana bamaami ba bene Midyani akubacaya. Bamanene abalo inga bacinka manungo muli Yehova mukwiinga “taaleemi nabi kukopoka.” Alaakubapa nkusu na balinyumfwa kulema.​—Amubelenge Isaya 40:28-31.

¹⁷ Amuyeeye pacakubonenaako ca Mukwesu Matthew, uyo usebensa Mukomiti Ilanga Pamakani Ashakucipatela. Ino nciinshi cimucafwa kuliyumya? Mukwesu Matthew wakaamba ayi: “Ndalinyumfwa ayi Yehova alampa nkusu kweelana alilembo lya Bene Filipi 4:13 mbolyaamba. Liinji na ndalema abuumbi cakwaamba ayi inga nshicikoonshi kutolelela kusebensa, ndapaila abuumbi kuli Yehova kumusenga kwaamba ayi ampe nkusu shakucikonsha kucafwa bamakwesu. Pashiindi isho, mushimu wakwe Yehova ulaampa nkusu kwaamba ayi ntolelele kuliyumya.” Bweenka mbuli Gidyoni, bamanene balasebensa cankusu kwaamba ayi balame bantu bakwe Yehova nabi kwaamba ayi teshi lyoonse ndyeciba cuubu. Kwalo, balyeelete kulibombya akwiibaluka ayi teshi lyoonse ndyeenga bacikonsha kucita shintu shoonse nsheenga kabasuni kucita. Nacibi boobo, Yehova alaakunyumfwa mipailo yabo yakumusenga lucafwo alimwi alaakubapa nkusu shakuliyumya.​—Kulu. 116:1; Filip. 2:13.

18. Kweelana anshotweeya, ino bamanene inga bacikonkela buyani cakubonenaako cakwe Gidyoni?

¹⁸ Kuli shiinji nsheenga bamanene beeya kuswa kucakubonenaako cakwe Gidyoni. Bamanene balyeelete kutondesha kulibombya akuliceesha pamakani akufula kwa ncito nsheenga batambula, alimwi abamwi na babatoongooka nabi kubalumbaisha. Bamanene balyeelete kutondesha kutaloonda akunyumfwila, bunene bunene mamanino acishi cino ndyaatoya cisena pafwiifwi. Alimwi balyeelete kushoma ayi Lesa alaakubapa nkusu nabi beende mumapensho ali buyani. Ncakutatoonsha kwaamba ayi tulalumba abuumbi pakuba abeembeshi aba basebensa cankusu alimwi tulyeelete kutolelela kunoobalemeka.​—Filip. 2:29.