Ndyekwakalinga Nkoondo Yapacishi Coonse Yabili, bashali bangu bakalonga kuswa ku Estonia akuya ku Germany uko nkondakashalilwa. Pesule lya kwaamba ayi ndashalwa, bakatalika kulibambila kulongela ku Canada. Ŋanda yesu yakutaanguna yakalinga kufwiifwi aku Ottawa, mu Canada. Alimwi muŋanda iyo iniini, kulubasu kumwi bakalinga kulaminako nkuku. Twakalinga bakandu abuumbi. Sombi lyoonse macuunsa twakalinga kulya mayi.

Bumwi bushiku Bakamboni Bakwe Yehova bakabelengela bama lilembo lya Ciyubululo 21:3, 4. Ndyebakanyumfwa maswi ali palilembo ili bakasangalala abuumbi cakwaamba ayi bakatalika kulila. Bama abata bakatolelela kwiiya Baibo, lyalo ndyepakeendabo ciindi ciniini bakabombekwa.

Nabi kwaamba ayi bashali bangu tabakalinga kucishi kabotu kwaamba Cisungu, bakalinga kusebensa cankusu muncito yakwe Yehova. Liinji Pacibelu, bata bakalinga kuya andime pomwi a Sylvia mwanike wangu muncito yakushimikila, nabi kwaamba ayi baswa mukusebensa cankusu mashiku oonse ku fakitoli nkobakalinga kusungulula nickel ku Sudbury, mu Ontario. Alimwi nsondo ansondo twakalinga kwiiya Njashi Yamulindilishi mbuli mukwashi. Bama a bata bakanjiisha kusuna Lesa. Ici cakapa kwaamba ayi ndyaabe kuli Yehova ndyendakalinga kucite myaaka 10 mu 1956. Na ndayeeya mbobakalinga kusuni Yehova abuumbi, cilanjuminisha kutolelela kumusebensela.

Ndyendakamanisha cikolo nshindakalinga kubikila bunene maano kukusebensela Yehova. Ndakalinga kuyeeya ayi na nkatalike bupainiya, teshi nkacikoonshe kuba amaali aanji kwaamba ayi nkacikoonshe kutanta ndeke kuya mushishi shimwi kweelana ambondakalinga kusuni ndyendakalinga mwanike. Ndakatalika kusebensa ncito yakulisha nyimbo shakalekodwa ku sitesheni imwi ya paledyo. Alimwi iyi ni ncito njendakalinga kusuni abuumbi. Sombi ndakalinga kusebensa macolesha. Aboobo liinji nshindakalinga kucanikaako kumabungano alimwi ndakatalika kucanika abantu batakalinga kusuni Lesa. Mukweelaako, njeelacaamba yangu yakaiishikwa anjiisho shamu Baibo yakancafwa kwaalula nshondakalinga kucita.

Ndakalongela ku Oshawa, mu Ontario. Mu tauni iyi, ndakashibana aba Ray Norman, ba Lesli banike babo banakashi alimwi abapainiya bamwi. Boonse bakalinga kumbikilako maano. Ndyendakabona mbobakalinga kusangalete, ndakatalika kuyeeya pa nshondakalinga kusuni kucita mubuumi. Bakanjuminisha kutalika bupainiya. Lyalo mu September 1966 ndakatalika kusebensa mbuli painiya. Ndakalinga kusangalete alimwi shintu shakalinga kweenda kabotu mubuumi. Nacibi boobo, kuli shintu shimwi shakalinga kusa mukucitika cakuteengashila shakapa kwaamba ayi buumi bwangu bwaaluke.

Kanciiya ku sekondali, ndakalemba foomu ya kusebensela pa Bethel ku Toronto, mu Canada. Lyalo ndyendakalinga kusebensa bupainiya bakanjita kuya mukusebensela pa Bethel kwamyaaka 4. Sombi ceebo cakwaamba ayi ndakalinga  kubasuni abuumbi ba Lesli, ndakalinga kuloonda ayi na nsumine kuya mukusebensela pa Bethel, teshi tukabonaneewo alimwi. Pesule lya kupaililaawo mankanda aanji alimwi kuswa panshi lya moyo, ndakasalawo kuya mukusebensela pa Bethel nabi kwaamba ayi ndakalinyumfwa cibiibi kulasha ba Lesli.

Ndakasebensako nkobacapila shakufwala pa Bethel lyalo mukuya kwaciindi ndakatalika kusebensa mbuli mulembi. Paciindi ici, ba Lesli bakatalika kusebensa mbuli painiya ulibetele ku Gatineau, mu Quebec. Lyoonse ndakalinga kusuna kushiba nshobakalinga kucita alimwi akushiba na ncondakasalawo kucita cakalingabo kabotu. Lyalo kwakacitika cintu cimwi cakansangalasha abuumbi. Ba Ray, banene babo ba Lesli bakabeeta kutalika kusebensela pa Bethel. Twakatalika kukala soonse mucipinda! Ici cakapa kwaamba ayi cikonsheke kutalika kubandika aba Lesli alimwi. Lyalo pa 27 February, 1971, twakeebana pesule lyakwaamba ayi ndasebensela pa Bethel kwamyaaka 4.

Nebo aba Lesli bakatutuma kuya mukusebensela kulibungano lyakalinga kusebensesha mushobo waci French mu Quebec. Ndyepakeendabo myaaka iniini, ndakakankamana ndyebakandwiita ayi ntalike kusebensa mbuli mutanjilili walubasu. Paciindi ico kaancitebo myaaka 28. Ndakalinga kulinyumfwa ayi ncili mwanike alimwi nshicishi shiinji. Sombi maswi acanika pa Jelemiya 1:7, 8 akanjuminisha. Nacibi boobo, ba Lesli bakalingaawo mu akisidenti mankanda obilo alimwi cakalinga kubayumina koona. Twakayeeya ayi cilaakutuyumina abuumbi kusebensa ncito yakufwakashila mabungano. Nacibi boobo, ba Lesli bakaamba ayi, “Na Yehova watulwiita kucita cintu cimwi, tulyeelete kweelesha kucicita.” Twakasumina ncito njotwakapekwa alimwi twakasangalala kusebensa ncito iyi kwamyaaka 17.

Ndakalinga kucite shakucita shiinji ndyendakalinga kusebensa mbuli mutanjilili walubasu, alimwi nshindakalinga kubaawo aciindi cikwene cakuba pomwi aba Lesli. Kuli cimwi ncondakalinga kweelete kwiiya. Bushiku bumwi Pamaande macuunsa, ndakanyumfwabo kukonkonsha pamulyango. Lyalo ndyendakaswa, pansengwe tapakalingaawo muntu, sombi ndakacanabo basiketi kamuli kasani ka patebulu, cisepo, ciizi, buledi, libotolo lya waini, matambula alimwi akapepa pakalinga kulembetwe ayi, “Amuye mukookesheko abakaanu kumusena kumwi akulyako shakulya.” Pabushiku ubu kwakaca kabotu alimwi lumwi lwakabala. Sombi ndakalwiita ba Lesli ayi ndyeelete kulibambila makani a Baibo amwi, aboobo inga nshicikoonshi kuya. Ba Lesli bakanyumfwishisha ayi ndicite shakucita shiinji, sombi bakalinyumfwako cibiibi. Ndyendakekala kwaamba ayi ntalike kulibambila, njeelacaamba yakatalika kumpensha. Lyalo ndakayeeya palilembo lya Bene Efeso 5:25, 28. Ndakayeeya ayi maswi acanika palilembo ili ninshila Yehova mbwaakalinga kunjibalusha ayi ndyeelete kubikila maano kumukaangu mbwaalinyumfwa. Pesule lyakupaila, ndakalwiita ba Lesli ayi, “Katiya,” alimwi bakasangalala. Twakaya amotoka kumusena umwi ubotu wakalinga mweela lya mulonga. Lyalo ndyetwakashika twakayala kasani ka patebulu alimwi twakasangalala abuumbi kuba pomwi pabushiku ubo. Alimwi pesule ndakacikonsha kulibambila makani a Baibo.

Twakalinga kusangalala kufwakashila mabungano apusenepusene ku British Columbia kushika aku Newfoundland. Aboobo ndakalinga kuya mumisena ipusenepusene bweenka mbondakalinga kusuni kucita ndyendakalinga mwanike. Ndakalinga kusuni kucanika ku Cikolo ca Gilyadi, sombi nshindakalinga kusuniiwo kuya mukusebensela kucishi cimwi mbuli mishonali. Ndakalinga kuyeeya ayi basebensa bumishonali mbantu balibetele alimwi nebo nshindakalinga kweelelaawo. Kwiilikaawo, ndakalinga kuloonda  ayi inga batutuma kucishi cimwi camu Africa umo mwakalinga bulwashi bumwi alimwi mwakalinga nkoondo. Ndakalinga kusangalete kusebensela mu Canada.

Mu 1992 Bakamboni Bakwe Yehova ndyebakatalika kushimikila kubantu baanji mushishi shimwi shakalinga lubasu lwa Soviet Union, bakatusenga na inga twalyaaba kuya ku Estonia akutalika kusebensa mbuli bamishonali. Twakakankamana abuumbi, sombi twakapaililaawo pamakani aya. Alimwi twakayeeya ayi, ‘Na Yehova watulwiita kucita cintu cimwi, tulyeelete kweelesha kucicita.’ Twakasumina ncito njotwakapekwa alimwi twakanyumfwa kabotu kwaamba ayi tabana kututuma kuya mukusebensela ku Africa.

Penkaapo twakatalika kwiiya mushobo bantu baku Estonia ngobaamba. Ndyepakeendabo myeenshi yobilo kuswa ndyetwakashika mucishi ici, bakatulwiita ayi tutalike kusebensa ncito yakufwakashila mabungano. Twakalinga kweelete kunoofwakashila mabungano ali 46 alimwi amakoto amwi ayo akalinga mu Estonia, Latvia, Lithuania kwiilikaawo aayo akalinga ku Kaliningrad, mu Russia. Ici cakalinga kusansulula ayi twakalinga kweelete kwiiyako mushobo ngobaamba bantu baku Latvia, ku Lithuania, aba ku Russia. Nabi kwaamba ayi cakalinga ciyumu kwiiya mishobo, bamakwesu abenankashi bakalinga kusangalala ceebo cakwaamba ayi twakalinga kweelesha kwiiya mushobo wabo alimwi bakatucafwa. Lyalo mu 1999, mucishi ca Estonia mwakaba ofesi ya musampi alimwi ndakasalwa kusebensa mu komiti ya musampi pomwi a Mukwesu Toomas Edur, Lembit Reile, alimwi a Mukwesu Tommi Kauko.

Twakesa mukushiba Bakamboni baanji abo bakatolwa ku Siberia. Nabi kwaamba ayi bakalinga kupenshekwa abuumbi mujeele alimwi bakapansaanishikwa kumikwashi yabo, tabakwe kukalalaawo nabi kubikila mfundilishi abo bakalinga kubapensha. Bakatolelela kuba alusangalalo akusebensa cankusu muncito ya kushimikila. Cakubonenaako cabo cakatucafwa kushiba ayi inga twacikonsha kuliyumya akutolelela kuba alusangalalo, nabi ndyetutokwiinda mubukaalo buyumu.

Twakalinga kusebensa cankusu kwamyaaka iinji alimwi tetwakalinga kucana ciindi cikwene cakookesha. Aboobo ba Lesli bakatalika kulinyumfwa kulema abuumbi. Tetwakalinga kucishiiwo cakalinga kubapa kulinyumfwa kulema abuumbi. Lyalo mukuya kwaciindi twakesa mukushiba ayi bakalinga kuciswa bulwashi bwiitwa ayi fibromyalgia ubo bupa muntu kulinyumfwa kulema abuumbi. Aboobo twakayeeyawo cakubikila maano pamakani akuboolela ku Canada. Ndyebakatwiita kucanika ku Cikolo ca Bamu Komiti ya Musampi Abamakaabo ku Patterson, New York, ku U.S.A., ndakayeeya ayi inga tatucikoonshiiwo kucanika kucikolo ici. Nacibi boobo, pesule lyakupaililaawo abuumbi pamakani aya, twakasumina kuya mukucanika ku cikolo ici. Alimwi Yehova wakatupa shoolwe pakusala kwesu. Ndyetwakalinga ku cikolo ici, ba Lesli bakashilikwa bulwashi mbobakalinga kuciswa. Aboobo twakatalika alimwi kusebensa mbuli mbotwakalinga kusebensa kale kale.

Bushiku bumwi macolesha mumwaaka wa 2008 katuli mu Estonia, ndakatambula fooni kuswa ku maofesi anene yakutusenga na inga twalyaaba kuya mukusebensela ku Congo. Ndakakankamana bunene bunene ceebo cakwaamba ayi ndakalinga kweelete kubakumbula bushiku bwakalinga kukonkelaawo. Pakutaanguna, nshikwe kubalwiitaawo ba Lesli mukwiinga ndakalinga kucishi ayi na mbalwiite teshi booneewo mashiku. Nacibi boobo, ndime ntana koona ceebo cakwaamba ayi ndakalinga kupaila kuli Yehova kumulwiita shakalinga kunsukamika pamakani akuya ku Africa.

 Bushiku bwakakonkelawo ndyendakabalwiita ba Lesli, twakaamba ayi: “Yehova alisuni ayi tuye ku Africa. Kwaamba ayi tushibe na inga twacikonsha kusebensela mu Africa, alimwi inga twasangalala tulyeelete kweelesha kuya mukusebenselaako.” Aboobo pesule lyakusebensela ku Estonia kwamyaaka 16, twakatanta ndeke kuya ku Kinshasa, mucishi ca Congo. Pa ofesi ya musampi pakalinga kuboneka kabotu alimwi pakalinga kuumwite. Cintu cakutaanguna ba Lesli ncobakacita mucipinda cesu, nkubika ka kaadi nkobakalama kuswabo ndyetwakaswa ku Canada. Pa ka kaadi ako pakalinga kulembetwe ayi, “Munoosangalala kuli koonse nkomubete.” Pesule lya kushibana abamakwesu abenankashi, kutanjilila shiiyo sha Baibo, akubona ncito ya bumishonali mboyakalinga kutusangalasha, twakatalika kusangalala abuumbi. Mukuya kwaciindi, twakaba acoolwe cakufwakashila misampi ili 13 mushishi shimwi shamu Africa. Aboobo twakaba acoolwe cakushibana abantu baanji bapusenepusene alimwi basangalasha. Kulisukama nkondakalinga kucite pakutaanguna kwakamana, alimwi twakalumba Yehova kwaamba ayi wakatutuma kuya mukusebensela mu Africa.

Ndyetwakalinga ku Congo, bakalinga kutupa shakulya shipusenepusene kwiilikaawo atulongolo, uto ntotwakalinga kuyeeya ayi inga tatutulyiiwo. Ndyetwakabona bamakwesu mbobakalinga kusangalala kulya shakulya isho, aswebo twakeeleshako alimwi twakatalika kushisuna.

Twakalinga kuya kulubasu lwa kwicwe lwa cishi ca Congo mukuyuminisha bamakwesu abenankashi akubapako shintu nshobakalinga kuyandika. Kumisena nkotwakalinga kuya kwakalinga makoto abantu bakalinga kulwana bantu bakalinga kukala mumishi alimwi akupensha banakashi abaana. Bamakwesu baanji tabakalinga kuciteewo shintu shiinji lwakumubili. Nacibi boobo, twakayuminishikwa abuumbi kubona lushomo luyumu ndobakalinga kucite mukubushikwa kwa bafu, mbobakalinga kusuni Yehova alimwi ambobakalinga kushomeka kulibunga lyakwe. Cakubonenaako cabo cakatucafwa kuyeeya pacitupa kusebensela Yehova akuyumya lushomo lwesu muli nguwe. Bamakwesu bamwi bakanyonyookelwa maanda, alimwi a shishango. Ici cakanjibalusha ayi inga twasowekelwa shintu shakumubili muciindi ciniinibo alimwi ayi bushicibusa bwesu a Yehova, ncocintu ciyandika abuumbi. Nabi kwaamba ayi bamakwesu bakalinga kwiinda mumapensho ayumu abuumbi, tabakalinga kutongooka bunene. Cakubonenaako cabo ca mbobakalinga kubona shintu, cakatucafwa kuba bataloondi ndyetwakalinga kwiinda mumapensho apusenepusene kwiilikaawo a lipenshi lya kuciswa ciswa.

Kuli acimwi cakacitika cakatupa kukankamana. Bakatulwiita ayi tuye mukusebensela ku musampi uli mu tauni ya Hong Kong. Tetwakalinga kuyeeyawo ayi tulaakukalawo ku  Asia! Sombi pesule lyakubona Yehova mbwakatucafwa muncito shipusenepusene nshotwakasebensaawo, twakasumina kuya mukusebensela ku Hong Kong. Lyalo mu 2013, twakalila ndyetwakalinga kulasha bamakwesu mbotwakalinga kusuni alimwi akushiya shintu shibotu shamu Africa. Alimwi tetwakalinga kucishiiwo shintu mboshakalinga kusa mukuba kumusena nkotwakalinga kuya.

Kwakalinga nkwaaluka kunene abuumbi kukala mu Hong Kong, mukwiinga yakalinga tauni umo mwakalinga bantu baanji abuumbi abo bakaswa mumisena ipusenepusene nsengwe yoonse. Cakalinga ciyumu kwiiya mushobo wa ciCantonese. Nacibi boobo, bamakwesu bakatutambula kabotu abuumbi alimwi twakalinga kunyumfwa kabotu kulya shakulya shaku Hong Kong. Incito yakalinga kuya panembo pa ofesi ya musampi. Nacibi boobo, kuula misena amaanda kwakatalika kudula abuumbi. Aboobo bamu Likoto Litanjilila bakasalawo ayi boolishe maanda aanji akalinga kusebenseshekwa a ofesi ya musampi. Lyalo mu 2015, bakatutola ku South Korea, uko nkotwakaya mukutolelela kusebensa. Twakatalika kwiiya mushobo aumwi uyumu kwaamba. Alimwi nabi kwaamba ayi tatucishi kabotu kwaamba ciKorean, bamakwesu abenankashi balatuyuminisha na batulwiita ayi mutooya ciiya kwaamba mushobo uyu.

Teshi lyoonse ndyeciba cuubu kuba abeshicibusa bapya. Sombi twesa mukushiba kwaamba ayi inga twafwambaana kushibana abantu na twabeeta kusa mukutufwakashila. Twakesa mukushiba ayi bamakwesu balacita shintu shiinji munshila ikoshenye alimwi nshiniini nshobacita munshila ipuseneeko. Alimwi twakashiba ayi Yehova wakatulenga munshila yakwaamba ayi tunoocikonsha kunotondesha lusuno ku bamakwesu abenankashi bapusenepusene.​—2 Koli. 6:11.

Twakesa mukwiiya kuyandika kwakubona bantu bweenka Yehova mbwaababona alimwi akubona bumboni butondesha ayi alitusuni alimwi alatutanjilila. Lyoonse na twatalika kulinyumfwa kulefuka nabi kutoonsha na bamakwesu balitusuni, twakalinga kubelenga makaadi ayuminisha na makalata ngotwakatambula kuswa ku beshicibusa. Twakabona Yehova mbwaakakumbula mipailo yesu, kutucafwa kushiba ayi alitusuni alimwi ambwaatupa nkusu shakutolelela kumusebensela.

Kwamyaaka iinji, nebo aba Lesli tweeya kuyandika kwa kucana ciindi cakuba pomwi, nabi katucite shakucita shiinji buyani. Alimwi twakesa mukwiiya kuyandika kwa kuliseka na twaciita shilubo, bunene bunene ndyetutokwiiya kwaamba mushobo upya. Alimwi lyoonse mashiku tuleelesha kuyeeya pacintu catusangalasha, lyalo akulumba Yehova.

Kwaambabo lushinisho, nshindakalinga kuyeeyawo ayi inga ndasebensa mbuli mishonali na kukala mushishi shimwi. Nacibi boobo, ndisangalete mukwiinga ndesa mukushiba kwaamba ayi shintu shoonse shilakonsheka kwiinda mulucafwo lwakwe Yehova. Ndebaluka maswi mushinshimi Jelemiya ngakaamba ayi: ‘No Yehova, mwakancenjeeka.’ (Jele. 20:7) Ncakwiila, watucitila shintu shiinji shikankamika akutupa shoolwe nshotwatakalinga kuyeeyela, kwiilikaawo akukumanisha nshondakalinga kusuni kucita ndyendakalinga mwanike, nkokwaamba ayi kweenda andeke. Twakalinga kutanta ndeke kufwakashila misampi mushishi shipusenepusene, kwiinda ambondakalinga kuyeeya ndyendakalinga mwanike. Alimwi ndabalumba abuumbi ba Lesli pakulyaaba kunooncafwa muncito shipusenepusene nshondakasebensaawo.

Lyoonse tuleelesha kwiibaluka kwaamba ayi shoonse nshotucita, nceebo cakwaamba ayi tulisuni Yehova. Shoolwe nshotucite pacecino ciindi shilatutondesha mbweshi cikabote kukala kwamuyayaya na Yehova ‘akafumbatule lyaansa lyakwe akusanina kabotu shoonse nshaakalenga.’​—Kulu. 145:16.