1. Kweelana a Kulumbaisha 18:​46, ino Defedi wakakoshanisha Yehova ku ciinshi?

 TULEKALA mucishi mweenga twacitikilwa mapensho akuteengashila eenga apa kwaamba ayi shintu shituyumine mubuumi, na kwaalula buumi bwesu cakumaninina. Tulalumba abuumbi kwaamba ayi inga twacinka manungo muli Yehova kwaamba ayi atucaafwe! Mumutwi wamana, twakeeya ayi Yehova ngu Lesa muumi alimwi lyoonse alilibambite kutucafwa. Na twabona Yehova mbwaatucafwa mubukaalo bumwi, tulashoma ayi ‘Yehova ngumuumi!’ (Amubelenge Kulumbaisha 18:46.) Nacibi boobo, pesule lyakwaambabo maswi aya, Defedi wakaamba ayi Yehova ngu “Mwaandami wangu.” Ino nceebonshi wakakoshanisha Yehova Lesa muumi, ku mwaandami, cintu citayooyi?

2. Ino tutokwiiya nshi mumutwi uyu?

² Mumutwi uyu, tutokwiiya Baibo ncoikoshanishila Yehova ku mwaandami alimwi ancotwiiya pali nguwe kuswa ku busansulushi bwa liswi ili. Tutokwiiya ambweenga katucinka manungo mulinguwe mbuli Mwaandami wesu. Mukweelaako, tutobandika mbweega twaba amibo Yehova njaacite.

INO NCEEBONSHI YEHOVA ALEETWA AYI NGU MWAANDAMI?

3. Ino liswi lyakwaamba ayi “mwaandami” liinji lilasebenseshekwa buyani mu Baibo? (Amubone cikope cili papeeji yakutaanguna.)

³ Baibo ilakoshanisha Yehova ku “mwaandami” kwaamba ayi tunyumfwishishe mibo imwi njaacite. Mu Baibo, mankanda aanji basebenshi bakwe Yehova ndyebakalinga kulumbaisha Lesa pamibo yakwe ibotu, bakalinga kumwaamba ayi ngu mwaandami. Ciindi cakutaanguna Baibo ndyeyaamba pali Yehova ayi ngu “Mwaandami,” mpalilembo lya Dutolonomi 32:4. Aana ndyaakalinga kupaila  kuli Yehova, wakaamba ayi “taaku mwaandami uli mbuli Lesa wesu.” (1 Samwe. 2:2) Abakuku wakaamba ayi Yehova ngu “Mwaandami wangu.” (Abaku. 1:​12, NWT) Wakalemba Kulumbaisha 73 wakaamba ayi Lesa “ngu mwaandami wa moyo wangu.” (Kulu. 73:​26, NWT) Alimwi Yehova mwiine alakwe wakalyaamba ayi ngu mwaandami. (Isa. 44:8) Amuleke tubandike pamibo yotatwe Yehova njaacite ipa kwaamba ayi abe mwaandami akwiiya mbweenga katucinka manungo muli nguwe mbuli “Mwaandami wesu.”—Duto. 32:​31, NWT.

4. Ino Yehova ali buyani anga mwakuyuba? (Kulumbaisha 94:22)

⁴ Yehova mwakuyuba. Ndyekuli mfula ya cipuupu cinene, muntu inga wayuba mucimfwengo. Aswebo Yehova alatushitilisha ndyetuli mubukaalo buyumu. (Amubelenge Kulumbaisha 94:22.) Alatucafwa kushitilisha bushicibusa bwesu anguwe akutushomesha ayi taakuwo lipenshi ndyetutokwiindaamo lyeenga lyatunyonyoola kwamuyayaya. Alimwi wakatushomesha ayi kunembo alaakukushaawo cili coonse cipa kwaamba ayi tunoolisukama akupenga.—Esek. 34:​25, 26.

5. Ino inga twacita buyani kwaamba ayi tuyube muli Yehova?

⁵ Nshila yomwi mbweenga twayuba muli Yehova ndyetutokwiinda mumapensho nkwiinda mukupaila kuli nguwe. Na twapaila kuli Yehova alatupa “luumuno lwakwe Lesa” ulo lulama myoyo amiyeeyo yesu. (Filip. 4:​6, 7) Amuyeeye shakacitikila Mukwesu Artem uyo wakaangwa ceebo ca lushomo lwakwe. Ndyaakalinga kwangitwe, musankwa umwi ushikulangoola makani wakamwiipusha miipusho mankanda aanji, kumucitila shintu shitabete kabotu akweelesha kumukonga. Ba Artem bakaamba ayi: “Lyoonse ndakalinga kulisukama na musankwa uyo wanjita akutalika kunjipusha miipusho. . . . Lyoonse ndakalinga kupaila kuli Yehova. Ndakamusenga ayi ancaafwe kuba aluumuno lwa mumoyo abusongo. Nabi kwaamba ayi ndakalinga kupenshekwa, ndakatolelela kukalikana mumoyo. . . . Kwiinda mulucafwo lwakwe Yehova, cakalingabo anga ndiimfwi kwisule lya lubumbu lwa mabwe.”

6. Ino nceebonshi lyoonse Yehova inga twamushoma? (Isaya 26:​3, 4)

⁶ Yehova inga twamushoma. Bweenka mwaandami mbootaseeni, tulicishi ayi lyoonse Yehova alilibambite kutucafwa. Inga twamushoma mukwiinga “ngu Mwaandami utufuna kwalyoonse alyoonse.” (Amubelenge Isaya 26:​3, 4.) Lyoonse Yehova alaakunooli muumi kwaamba ayi akumanishe shishomesho shakwe, kukutika mipailo yesu akutupa lucafwo ndotuyandika. Alimwi inga twacinka manungo muli nguwe mukwiinga alashomeka kubaabo bamusebensela. (2 Samwe. 22:26) Teshi akalubeewo nshotumucitila alimwi lyoonse ananootupa shoolwe.—Ebu. 6:10; 11:6.

7. Ino nshiinshi sheshi shikacitike na katucinka manungo muli Yehova? (Amubone acikope.)

⁷ Yehova alaba Mwaandami wesu na katucinka manungo muli nguwe cakumaninina. Tulashoma ayi tulaakucana shoolwe na katumunyumfwila nabi ndyetuli mubukaalo buyumu. (Isa. 48:​17, 18) Na twabona Yehova mbwaatotucafwa, tulamushoma abuumbi. Tulashoma cakutatoonsha ayi Yehova eenkabo ngweshi akatucaafwe kuliyumya mulipenshi lili lyoonse nabi liyume buyani. Liinji na taakuwo nkweenga twacana lucafwo ndyetuli mubukaalo buyumu, tuleebaluka ayi lyoonse inga twacinka manungo muli Yehova. Ba Vladimir bakaamba ayi: “Ndakalinyumfwa kuba pafwiifwi a Yehova paciindi ndyendakalinga mobalamina baabo batolindila  koomboloshekwa. Ndakeeya kucinka manungo abuumbi muli Yehova mukwiinga lakwe eenkabo ngwaakalinga kucikonsha kuncafwa kuliyumya mubukaalo ubu.”

8. (a) Ino nceebonshi nceenga twaambila ayi Yehova taaluki? (b) Ino kuba a Lesa mbuli Mwaandami wesu kulatucafwa buyani? (Kulumbaisha 62:​6, 7)

⁸ Yehova taaluki. Yehova ali anga ngu mwaandami unene na kalundu, isho shitaseeni na kwaaluka. Mibo njaacite alimwi akuyanda kwakwe tashaalukiiwo. (Mala. 3:6) Adamu a Efa ndyebakamupondokela, Yehova taakwe kwaalula luyaando lwakwe ndwaakalengela bantu. Kweelana amutumwi Paulo mbwaakalemba, Yehova “taakoonshi kulikaka, sobwe.” (2 Timo. 2:13) Ici cilaamba ayi tacicite mulandu ashintu sheenga shacitika nabi bamwi nsheenga bacita, Yehova teshi akaalukeewo, kwaalula kuyanda kwakwe nabi milawo yakwe. Mukwiinga Yehova taaluki, tulicishi kwaamba ayi alaakunootucafwa ndyetuli mubukaalo buyumu alimwi alaakukumanisha nshaakatushomesha.—Amubelenge Kulumbaisha 62:​6, 7.

9. Ino nshiinshi nshomweeya kuswa ku shakacitikila ba Tatyana?

⁹ Na katukutumana kuyeeya pamibo Yehova njaacite apaluyaando lwakwe ndwaakalengela cishi abantu, tunanoocinka manungo muli nguwe alimwi alaba Mwaandami wesu. Kucita boobo kulaakutucafwa kutolelela kukalikana mumoyo akushomeka kuli nguwe ndyetutokwiinda mumapensho. (Kulu. 16:8) Ishi nshoshakacitikila nankashi Tatyana uyo ngobakaanga muŋanda ceebo calushomo lwakwe. Wakaamba ayi: “Ndakalingabo neenka. Pakutaanguna cakalinga ciyumu abuumbi. Liinji ndakalinga kulefuka.” Lyalo wakatalika kuyeeya pali Yehova apaluyaando ndwakalengela bantu alimwi wakashiba ncocakalinga kuyandikila abuumbi kutolelela kuliyumya mulipenshi ili. Wakaamba ayi: “Kunyumfwishisha cakapa kwaamba ayi ishi shinoocitika kwakancafwa kwiibaluka ayi kusuna Yehova nkokwalengesha ayi ndicane mubukaalo ubu. Kucita boobo kwancafwa kutanoyeeya bunene pabukaalo mbombeteemo.”

10. Ino inga twacita buyani kwaamba ayi Yehova abe Mwaandami wesu?

¹⁰ Conoonobo, tulaakwiinda mubukaalo buyumu abuumbi alimwi tulaakuyandika kucinka manungo muli Yehova abuumbi kwiinda ambocibete. Cino ncociindi ndyetweelete kuyumya lushomo lwesu muli Yehova akushoma ayi alaakutucafwa kutolelela kushomeka kuli nguwe mubukaalo buli boonse. Ino inga twacita buyani ubo? Amubelenge makani amu Baibo alimwi ashakacitikila basebenshi bakwe Yehova bamunshiku shino. Amuyeeye Lesa mbwaakacafwa basebenshi bakwe kale kale. Amuyeeyewo cakubikila maano pamakani ayo. Na kamucita boobo Yehova inga waba Mwaandami wanu.

AMUBE AMIBO YEHOVA NJAACITE

11. Ino nceebonshi tulisuni kuba amibo Yehova njaacite? (Amubone akabokosi kacite mutwi utokwaamba ayi “ Nsheenga Bamakwesu Bacanike Basalawo Kucita.”)

¹¹ Twabandika pamibo imwi ipa kwaamba ayi Yehova abe anga ngu mwaandami. Ano atubandike mbweenga twaba amibo iyo. Na tweelesha cankusu kuba amibo Yehova njaacite, tulaakuyumya bamakwesu abenankashi. Kucakubonenaako, Yesu wakatumba Simoni ayi Kefasi (nkokwaamba ayi “Pita”), liina lisansulula ayi “Mwaandami.” (Joni 1:42) Yesu wakalinga kusansulula ayi Pita alaakuyuminisha  bamwi mulibungano akuyumya lushomo lwabo. Bamanene mulibungano balaambwa ayi “ncimfule ca mwaandami unene muliwesa.” Ici cilaamba ayi balashitilisha bali mulibungano. (Isa. 32:2) Sombi soonse inga twayuminishanya na katutondesha mibo Yehova njaacite.—Efe. 5:1.

12. Ino nshiinshi nsheenga twaciita kwaamba ayi tucafwe bamwi ndyebali mubukaalo buyumu?

¹² Amube mwakuyuba. Na bamakwesu abenankashi basowekelwa shintu na kushiya maandaabo ceebo ca mapensho alicitikila na inkondo, inga twayandika kukalaabo mumaanda esu. Shintu ndyeshitooya cibicilaako “munshiku shakweelaako,” tulaakuba ashoolwe shiinji shakucafwana. (2 Timo. 3:1) Alimwi inga twayuminisha bamakwesu abenankashi akubatondesha lusuno. Nshila yomwi mbweenga twacita boobo nkwiinda mukubandikaabo na besa kumabungano akubayuminisha. Tulisuni ayi na besa kumabungano banooyuminishikwa akulinyumfwa ayi tulibasuni. Bantu baanji mucishi balacitila bamwi shintu shibiibi. Ici inga capa kwaamba ayi bamakwesu abenankashi banoolisukama akulinyumfwa ayi taakuwo ubasuni. Aboobo na bamakwesu abenankashi besa kumabungano, tulisuni kucita nsheenga twacikonsha kwaamba ayi tubayuminishe akutondesha ayi tulibasuni.

13. Ino bamanene inga bacita buyani kwaamba ayi bayuminishe bamwi bali mubukaalo buyumu? (Amubone acikope.)

¹³ Bamanene inga bacafwa bamakwesu abenankashi ndyebatokwiinda mumapensho apusenepusene. Ndyekwacitika mapensho akuteengashila nabi kakuyandika lucafwo lwakucipatela cakufwambaana, bamanene balabamba bubaambo bwakucafwa bamakwesu abenankashi. Alimwi balapa butanjilishi akubayuminisha kuswa mu Baibo. Bamakwesu abenankashi inga balinyumfwa kwaanguluka kusenga lucafwo kumunene na kabacishi ayi atobandikaabo munshila ili kabotu, kubakutika akweelesha kunyumfwishisha mbobatolinyumfwa. Kuba amibo iyi kulapa bamwi kulinyumfwa ayi balayandika alimwi cilababeta cuubu kukonkela butanjilishi bwamu Baibo mbweenga munene wabapa.—1 Tesa. 2:​7, 8, 11.

14. Ino inga twatondesha buyani ayi tuli muntu bamwi ngweenga bashoma?

 ¹⁴ Amube muntu bamwi ngweenga bashoma. Tulisuni kwaamba ayi bamwi banoshoma ayi inga twabacafwa bunene bunene ndyebali mubukaalo buyumu. (Tus. 17:17) Ino nshiinshi nsheenga twaciita kwaamba ayi bamwi banootushoma? Bushiku abushiku inga twacita nsheenga twacikonsha kunotondesha mibo Yehova njaacite, mbuli kunookumanisha nshotushomesha akutanoocelwa kucita shintu. (Mate. 5:37) Alimwi inga twacafwako bamwi na batoyandika lucafwo. Kwiilikaawo, tulashinisha kwaamba ayi twakumanisha mikuli njeenga twapeekwa mulibungano kweelana abutanjilishi mbotutambula.

15. Ino bamakwesu abenankashi balafubilaamo buyani na bamanene kabacita sheenga shapa kwaamba ayi bamwi banoobashoma?

¹⁵ Ino bamakwesu abenankashi balafubilaamo buyani na bamanene kabacita sheenga shapa kwaamba ayi bamwi banoobashoma? Na bamakwesu abenankashi bashiba ayi inga batumina bamanene ciindi cili coonse ndyebatoyandika lucafwo, cilabacafwa kutanoolisukama bunene. Alimwi beshikushimikila balalinyumfwa ayi balayandika na bashiba ayi bamanene balilibambite kubacafwa. Na  bamanene kabasebensesha Baibo amabuku esu ndyebatolulika bamwi muciindi cakwaamba nshebatoyeeya pamakani amwi, bamakwesu abenankashi balatalika kubashoma abuumbi. Alimwi bamakwesu abenankashi balashoma bamanene abo batalwiitiko bamwi makani abushishi ngeenga babalwiita, akukumanisha nshobashomesha.

16. Ino swebo abamwi tulafubilaamo buyani na katucita sheesho Yehova nshaamba ayi shililuleme?

¹⁶ Lyoonse munoocita Yehova nshaamba ayi shililuleme. Tulaakutondesha cakubonenaako cibotu kubamwi na katunyumfwila Yehova mushintu shoonse akusala shakucita sheendelana anjiisho shamu Baibo. Na katwiiya Maswi akwe Lesa akuyumya lushomo lwesu muli Yehova, tulaakunoshomeka kuli nguwe akunokonkela milawo yakwe. Tulaakushiba njiisho shakubeca amiyeeyo iteendelani akuyeeya kwakwe Yehova, alimwi teshi tukakonkele njiisho na miyeeyo iyo. (Efe. 4:14; Jemu. 1:​6-8) Lushomo lwesu muli Yehova amushishomesho shakwe, shilatucafwa kukalikana mumoyo na twanyumfwa makani atabete kabotu. (Kulu. 112:​7, 8) Alimwi inga twacikonsha kucafwa baabo batokwiinda mubukaalo buyumu.—1 Tesa. 3:​2, 3.

17. Ino nshiinshi bamanene nshobacita kwaamba ayi bacafwe bamwi kukalikana mumoyo akuba alushomo luyumu muli Yehova?

¹⁷ Bamanene balyeelete kuba bantu bataciti shintu cakwiindilisha, bayeeya kabotu, bacishi kabotu kubamba shintu alimwi baboombu kwaaluka. Basankwa aba balacafwa bamwi kukalikana mumoyo akuba alushomo luyumu muli Yehova alimwi balayumya libungano kwiinda mu “kucata camaansa obilo kumakani ashomeka.” (Taita. 1:9; 1 Timo. 3:​1-3) Kwiinda mukutondesha cakubonenaako cibotu akucita kufwakasha kwa bweembeshi, bamanene balacafwa beshikushimikila kunoocanika kumabungano lyoonse, muncito yakushimikila akucita ciiyo capalwaabo. Na bamakwesu abenankashi batokwiinda mumapensho atobapa kulisukama, bamanene baleebalusha bashominyinaabo kucinka manungo muli Yehova akubikila maano kushishomesho shakwe.

18. Ino nceebonshi tulisuni kulumbaisha Yehova akuyumya bushicibusa bwesu anguwe? (Amubone akabokosi kacite mutwi utokwaamba ayi “ Nshila Yomwi Mbweenga Twayumya Bushicibusa Bwesu a Yehova.”)

¹⁸ Pesule lyakwiiya pamibo ibotu Yehova njaacite, inga twaamba bweenka Mwaami Defedi mbwakaamba ayi: ‘Aalumbaishikwe Yehova Mwaandami wangu.’ (Kulu. 144:1) Lyoonse inga katucinka manungo muli Yehova. Nabi twacembela, tulashoma ayi alaakutolelela kutucafwa kuba abushicibusa buyumu anguwe. Alimwi inga twaamba ayi Yehova “ngu Mwaandami wangu.”—Kulu. 92:​14, 15.