1. Ino nshiinshi shicafwa basebenshi bakwe Yehova kutolelela kumusebensela nabi ndyebatokwiinda mumapensho?

 BAIBO ilaamba ayi tutokala mu ‘shiindi shiyumu abuumbi.’ (2 Timo. 3:1) Bantu bakwe Yehova baleenda mumapensho bantu boonse ngobeendaamo mucishi cino cibiibi cakwe Satana. Sombi tulapenshekwa aceebo cakwamba ayi tulasebensela Yehova. Ino nshiinshi shitucafwa kutolelela kusebensela Yehova nabi ndyetutokwiinda mumapensho aya? Ceebo comwi ciinditeewo ncakwaamba ayi twakabonawo kale Yehova mbwaatucafwa alimwi tulicishi ayi ngu ‘Lesa muumi.’—Jele. 10:10; 2 Timo. 1:12.

2. Ino nshiinshi nshotucishi pali Yehova sheenga shatucafwa kuliyumya?

² Yehova alabona mapensho oonse ngotwiindaamo alimwi lyoonse alisuni kutucafwa. (2 Maka. 16:9; Kulu. 23:4) Kunoobona Yehova ayi ngu Lesa muumi inga kwatucafwa kuliyumya mumapensho ali woonse ngeenga tweendaamo. Amuleke tubandike kucita boobo mbokwakacafwa Mwaami Defedi.

3. Ino Defedi wakalinga kusansulula nshi ndyaakaamba ayi ‘Yehova ngumuumi’?

³ Defedi wakalinga kumwishi Yehova alimwi wakalinga kucinka manungo muli nguwe. Mwaami Saulo alimwi abamwi ndyebakalinga kusuni kumucaya, Defedi wakapaila kuli Yehova kwaamba ayi amucaafwe. (Kulu. 18:6) Pesule lyakwaamba ayi Lesa wakumbula mupailo wakwe akumupulusha, Defedi wakaamba ayi: ‘Yehova ngumuumi!’ (Kulu. 18:46) Ino Defedi wakalinga kusansulula nshi ndyakaamba maswi aya? Libuku limwi lyaamba pamakani amu Baibo lyakaamba ayi Defedi wakalinga kutondesha ayi alashoma muli Yehova “mbuli lesa muumi uyo utolelela kucafwa bantu bakwe.” Defedi wakalinga kucishi ayi Lesa alicishi nshatokwiindaamo alimwi wakalinga kulibambite kumucafwa.  Kushiba makani aya kwakacafwa Defedi kutolelela kusebensela Yehova akumulumbaisha.—Kulu. 18:​28, 29, 49.

4. Ino kunoobona ayi Yehova ngu Lesa muumi kulatucafwa buyani?

⁴ Kushoma cakutatoonsha ayi Yehova ngu Lesa muumi kulaakutucafwa kumusebensela cankusu. Tulaakucikonsha kuliyumya mumapensho ngeshi tukanokwiindaamo akuyuminishikwa kutolelela kusebensa cankusu muncito yakwe. Alimwi tulaakuba bashinishite kutolelela kuba abushicibusa buyumu a Yehova.

LESA MUUMI ALAAKUMUPA NKUSU SHAKULIYUMYA

5. Ino nciinshi ceenga catucafwa kushoma ayi Yehova alaakutucafwa na twacana mapensho? (Bene Filipi 4:13)

⁵ Na katwiibaluka ayi Yehova ngumuumi alimwi lyoonse inga wacikonsha kutucafwa, tulaakucikonsha kuliyumya mulipenshi lili lyoonse inga caba ayi ndinene nabi ndiniini. Inga wacikonsha kutucafwa mulipenshi lili lyoonse mukwiinga taakuwo lipenshi liyumu kuli Lesa wesu. Ngu Lesa Shinkusu shoonse alimwi inga watupa nkusu shakuliyumya. (Amubelenge Bene Filipi 4:​13, NWT.) Aboobo ici cilatucafwa kushoma cakutatonsha ayi Yehova alaakutucafwa na twacana mapensho. Alimwi na twabona Yehova mbwaatucafwa ndyetutokwiinda mumapensho aniini, tulashoma ayi alaakutucafwa andyeshi tukanokwiinda mumapensho ayumu.

6. Ino nshiinshi shakacitikila Defedi ndyaakalinga wacanike isho shakamucafwa kunooshoma muli Yehova abuumbi?

⁶ Amuleke tubandike pashintu shobilo shakacitikila Defedi isho shakamucafwa kunooshoma muli Yehova abuumbi. Defedi ndyaakalinga mweembeshi kaacili wacanike, paciindi cimwi beya ankalamu shakacata mbelele mulitanga lya baishi. Pashiindi ishi, cakutaloonda Defedi wakatandaanya beya ankalamu akupulusha mbelele. Sombi Defedi taakwe kuyeeya ayi wakakoma shinyama ishi munkusu shakwe. Wakalinga kucishi ayi Yehova ngowakamucafwa. (1 Samwe. 17:​34-37) Defedi taakwe kulubaawo shintu ishi shakamucitikila. Kukutumana kuyeeya pa shakamucitikila kwakamucafwa kushoma cakutatoonsha ayi Lesa muumi alaakumupa nkusu shakuliyumya kunembo.

7. Ino nciinshi Defedi ncaakabikilako maano, alimwi ino nceebonshi kucita boobo kwakamucafwa kukoma Golyati?

⁷ Paciindi cimwi mpashi Defedi kaacili cikula bwangu, wakaya mukubona bashilumamba bene Isilaeli kumusumba nkobakalinga. Wakacana ayi bashilumamba bene Isilaeli baloonda abuumbi ceebo cakwe Golyati ndundwa minkulwa mwine Filisiti uyo wakalinga ‘kubateteesha.’ (1 Samwe. 17:​10, 11) Bashilumamba bakaloonda ceebo cakubikila maano kukukomena kwakwe Golyati anshaakalinga kubalwiita. (1 Samwe. 17:​24, 25) Nacibi boobo, Defedi taakwe kubikila maano kukukomena kwakwe Golyati anshaakalinga kwaamba. Wakalinga kucishi ayi Golyati ndyaakalinga kwaamba shibiibi pa bashilumamba bene Isilaeli, wakalinga kucobola “Lesa muumi.” (1 Samwe. 17:26) Defedi wakalinga kuyeeya pali Yehova. Wakalinga kucishi ayi Lesa uyo wakamucafwa ndyaakalinga mweembeshi atoomucafwa amubukaalo ubu. Ceebo cakushoma ayi Lesa atoomucafwa, Defedi wakaya mukulwana Golyati alimwi wakamucaya!—1 Samwe. 17:​45-51.

8. Ino nshiinshi nsheenga twaciita kwaamba ayi tushome ayi Yehova alaakutucafwa ndyetutokwiinda mumapensho? (Amubone acikope.)

⁸ Aswebo inga twaliyumya ndyetutokwiinda mumapensho na katwiibaluka ayi Lesa muumi alilibambite kutucafwa. (Kulu. 118:6) Inga twayumya lushomo lwesu muli Yehova lwakwaamba ayi alaakutucafwa, na katuyeeya nshaakacita kale kale. Amubelenge makani amu Baibo amwiibalusha Yehova mbwaakacafwa basebenshi bakwe. (Isa. 37:​17, 33-37) Alimwi amubelenge nabi kweebela malipooti acanika pa webusaiti yesu ya jw.org ayo atondesha Yehova  mbwaakacafwa bamakwesu abenankashi munshiku shino. Kwiilikaawo, amwiibaluke shiindi Yehova ndyaakamucafwawo. Mpashi mulalinyumfwa ayi Yehova taakwe kumucitilawo kale cintu cikankamika mbuli kumupulusha ku nkalamu nabi beya. Cancine ncakwaamba ayi Yehova wamucitila shintu shiinji mubuumi bwanu! Wakamwiita kwaamba ayi mube shicibusa wakwe. (Joni 6:44) Nabi pacecino ciindi, lucafwo lwakwe Yehova ndolwamucafwa kutolelela kumusebensela. Aboobo amupaile kuli Yehova kwaamba ayi amucaafwe kwiibaluka shiindi ndyaakakumbula mipailo yanu, ndyaakamucafwa paciindi ceelete, nabi ndyaakamulama ndyemwakalinga mubukaalo buyumu. Kukutumana kuyeeya pashintu Yehova nshaakamucitila, kulaakumucafwa kushoma cakutatoonsha ayi alaakutolelela kumucafwa.

9. Ino nshiinshi nshotweelete kunokwiibaluka ndyetutokwiinda mumapensho? (Tushimpi 27:11)

⁹ Kunoobona Yehova mbuli Muntu muumi kulaakutucafwa kunoobona mapensho esu munshila yeelete. Ndyetutokwiinda mumapensho tulyeelete kubikila maano kucintu ciyandika abuumbi. Satana alaamba ayi na twacana mapensho, inga twacileka kusebensela Yehova. Aboobo nshotucita ndyetutokwiinda mumapensho shilakuma Yehova mbwaalinyumfwa. (Jobo 1:​10, 11; amubelenge Tushimpi 27:11.) Na twatolelela kushomeka nabi ndyetutokwiinda mumapensho, tulatondesha ayi tulimusuni Yehova alimwi ayi Satana ngumubeshi. Sa mutopikishikwa kumfulumeende, kwiinda mulipenshi lya maali, bantu kukaka kubashimikila, na lipenshi limwi? Na ubo mbocibete, amwiibaluke ayi bukaalo mbomubeteemo butoomupa coolwe cakusangalasha Yehova. Alimwi munokwiibaluka ayi teshi akamulekele kwiinda mumapensho ngeenga tamucikonshi kuliyumya. (1 Koli. 10:13) Alaakumupa nkusu shakuliyumya.

LESA MUUMI ALAAKUMUPA SHOOLWE

10. Ino nshiinshi Lesa muumi nsheshi akacitile baabo bamulambila?

¹⁰ Yehova alabapa shilambu abo bamulambila. (Ebu. 11:6) Alatupa luumuno akutucafwa kukwana ashintu nshetucite alimwi alaakutupa buumi butamaani kunembo. Tulashoma cakutatoonsha  ayi Yehova alisuni kutupa shilambu alimwi alicite nkusu shakucita boobo. Alimwi kucita boobo kulatucafwa kutolelela kucita nsheenga twacikonsha muncito yakwe bweenka basebenshi bakwe bakale kale mbobakacita. Ishi Timoti nshaakacita.—Ebu. 6:​10-12.

11. Ino nciinshi cakacafwa Timoti kusebensa cankusu mulibungano? (1 Timoti 4:10)

¹¹ Amubelenge 1 Timoti 4:10. Timoti wakalinga kucite lushomo luyumu lwakwaamba ayi Lesa alaakumupa shoolwe. Ici ncocakapa kwaamba ayi asebense cankusu muncito yakwe Yehova akusebensela bamwi. Ino nshiinshi nshaakacita? Mutumwi Paulo wakamuyuminisha kucishiba kabotu bwakwiisha muncito yakushimikila amulibungano. Alimwi Paulo wakamulwiita kuba cakubonenaako cibotu kubashominyina boonse, inga caba ayi mbacanike nabi mbacinene. Alimwi wakapekwa anciito shiyumu, ico cakalinga kwiilikaawo akululika bamwi cankusu sombi munshila yalusuno, na kabayandika kululikwa. (1 Timo. 4:​11-16; 2 Timo. 4:​1-5) Pashiindi shimwi, bamwi tabakalinga kubona ncito Timoti nshaakalinga kusebensa na kumulumba, sombi wakalinga kushomete ayi Yehova alaakumupa shoolwe.—Loma. 2:​6, 7.

12. Ino nceebonshi bamanene balatolelela kusebensa cankusu mulibungano? (Amubone acikope.)

¹² Munshiku shino, bamanene abalo inga bashoma ayi Yehova alabona alimwi alalumba pancito njobasebensa. Kwiilika pakucita bweembeshi, kwiisha alimwi akushimikila, bamanene baanji balacafwilisha muncito sha Bwaami shakuyaka akupa lucafwo na kwacitika mapensho akuteengashila. Bamwi balasebensa mu Makoto Afwakashila Balwashi na mu Komiti Ilanga Pamakani Akupa Lucafwo Lwakucipatela. Bamanene balicishi ayi libungano ndyakwe Yehova, kuteshi muntu uli woonse. Aboobo balasebensa cankusu mulibungano alimwi balishomete cakutatoonsha ayi Lesa alaakubapa shoolwe pashintu nshobacita.—Kolo. 3:​23, 24.

13. Ino Yehova alalinyumfwa buyani pashintu nshomumucitila?

¹³ Teshi boonse beenga baba bamanene. Sombi soonse kuli cintu cimwi nceenga twapa  Yehova. Lesa alasangalala abuumbi na katucita nsheenga twacikonsha ndyetutomusebensela. Alabona maali ngotupa kucafwilisha ncito icitwa nsengwe yoonse, nabi kaali aniini. Alasangalala abuumbi na twatambika lyaansa kwaamba ayi tukumbulewo kumabungano nabi kwaamba ayi tulicite nsoni, alimwi a na twalekelela baabo batukalasha. Nabi kwaamba ayi mutolinyumfwa ayi inga tamucikoonshi kucita shiinji muncito yakwe Yehova kweelana ambweenga kamusuni, amushome ayi alalumba pashintu nshomumucitila. Alimusuni alimwi alaakumupa shoolwe ceebo ca shintu nshomumucitila.—Luka 21:​1-4.

AMUTOLELELE KUBA ABUSHICIBUSA BUYUMU A LESA MUUMI

14. Ino kutolelela kuba abushicibusa buyumu a Yehova kulatucafwa buyani kutolelela kushomeka kuli nguwe? (Amubone acikope.)

¹⁴ Cilaakutubeta cuubu kutolelela kushomeka kuli Yehova, na katucite bushicibusa buyumu anguwe. Ubu mbocakalinga kuli Josefu. Wakakaka cakushinisha kucita bulale. Wakalinga kucishi ayi nshaacita shilakuma Yehova alimwi taakalinga kusuniiwo kumukalasha. (Mata. 39:9) Kwaamba ayi tube abushicibusa buyumu a Yehova, tulyeelete kunoocana ciindi cakupaila akwiiya Maswi akwe. Na twacita boobo, bushicibusa bwesu anguwe bulaakuyuminaako. Na aswebo twaba abushicibusa buyumu a Yehova bweenka mbuli Josefu, teshi tukasune kucita cintu cili coonse ceenga camukalasha.—Jemu. 4:8.

15. Ino nciiyo nshi nceenga tweeya kushakacitikila bene Isilaeli ndyebakalinga muluyanga? (Bene Ebulu 3:12)

¹⁵ Abo bacileka kushoma muli Yehova, inga cababeta cuubu kucileka kushomeka kuli nguwe. Amuyeeye shakacitikila bene Isilaeli ndyebakalinga muluyanga. Bakalinga kucishi ayi Yehova nkwaali, sombi bakalinga kutonsha na inga wabapa nshebayandika. Bakeelikaawo akwiipusha ayi: ‘Sa Yehova ncakwiila uli aswebo nabi tau?’ (Kulo. 17:​2, 7) Aboobo bakamupondokela Lesa. Ncakutatoonsha kwaamba ayi tulisuni kuleya kukonkela cakubonenaako cabo citabete kabotu.—Amubelenge Bene Ebulu 3:12.

16. Ino nciinshi ceenga capa kwaamba ayi lushomo lwesu lweeleshekwe?

 ¹⁶ Bantu bamucishi balapa kwaamba ayi citubete ciyumu kutolelela kuba abushicibusa buyumu a Yehova. Baanji balakaka kushoma ayi Lesa nkwaali. Liinji abo batakonkeli milawo yakwe Lesa, balaboneka anga batokala kabotu. Lushomo lwesu inga lweeleshekwa na twaboona shintu shamushobo uyo kashicitika. Nabi kwaamba ayi inga katushoma ayi Lesa nkwaali, inga twatalika kutoonsha na alaakutucafwa. Wakalemba Kulumbaisha 73 alakwe mbwaakalinyumfwa ubu kwakaciindi. Wakabona bantu bamwi batakalinga kukonkela milawo yakwe Lesa, sombi bakalinga kuswitilila. Aboobo wakatalika kutoonsha na kusebensela Lesa kulicite mpindu.—Kulu. 73:​11-13.

17. Ino nshiinshi sheshi shikatucaafwe kutolelela kuba abushicibusa buyumu a Yehova?

¹⁷ Ino nshiinshi shakacafwa shikulumbaisha kwaalula mbwaakalinga kuyeeya? Wakakutumana kuyeeya sheenga shacitikila baabo bacileka kucinka manungo muli Yehova. (Kulu. 73:​18, 19, 27) Alimwi wakayeeya shibotu shiswaamo mukusebensela Lesa. (Kulu. 73:24) Aswebo inga twayeeya pashoolwe Yehova nshaakatupa. Alimwi munooliipusha ayi, ‘Ino buumi bwangu naakwiinga kabubete buyani naakwiinga kantasebenseli Yehova?’ Kucita boobo inga kwatucafwa kutolelela kushomeka kuli Yehova akwaamba maswi shikulumbaisha ngakaamba ayi: “Nebo ndikondetwe kuba pafwaafwi a Lesa.”—Kulu. 73:28.

18. Ino nceebonshi tatweelete kuloonda sheshi shikacitike kunembo?

¹⁸ Inga twacikonsha kuliyumya mumapensho ngeenga twacaana munshiku shino shakweelaako mukwiinga ‘tulasebensela Lesa wancinencine alimwi muumi.’ (1 Tesa. 1:9) Lesa wesu alatubikilako maano alimwi lyoonse ananootucafwa. Wakatondesha ayi wakalinga abasebenshi bakwe kale kale, alimwi ali andiswe munshiku shino. Conoonobo tulaakwiinda mumapensho anene atana kucitikawo kale pacishi. Sombi teshi tukabe sweenka. Yehova alaakunooli andiswe. (Isa. 41:10) Soonse atube bataloondi akwaamba ayi: ‘Yehova ngomucafwi wangu; teshi nkaloondeewo.’—Ebu. 13:​5, 6.