Miipusho Kuswa Kubeshikubelenga
Ino maswi ngotucana pa Kulumbaisha 12:7 inga twaanyumfwishisha buyani?
Maswi ali mumavesi akutaanguna alatondesha ayi vesi iyi ilaamba pabantu.
Pa Kulumbaisha 12:1-4, palaamba ayi “taaku wacaala ucishomeka pakati ka bantu boonse.” Lyalo pa Kulumbaisha 12:5-7, palaamba ayi:
‘‘Ceebo cakwaamba ayi bapengete balalyatililwa,
Ceebo cakwaamba ayi bakandu batongela,
Ntoonyamuka akubafuna,’ mbwaamba Yehova.
‘Ntobapulusha kubaabo babacobola.’
Maswi akwe Yehova taacite kampenda;
Ali anga ngusilifa wakeenshikwa mumunyumbi mankanda ali 7.
Mulaakubalama, no Yehova;
Mulaakushitilisha womwi awomwi wa mbabo kutalikila kulishalane ili kwamuyayaya.’
Vesi 5 ilaamba pashintu Lesa nsheshi akacitile ‘bapengete.’ Alaakubapulusha.
Vesi 6 ileelikaawo maswi akwaamba ayi ‘maswi akwe Yehova taacite kampenda,’ ali anga ‘ngusilifa wakeenshikwa mumunyumbi.’ Maswi aya alatondesha mbotulinyumfwa pa maswi akwe Yehova.—Kulu. 18:30; 119:140.
Muma Baibo amwi, Kulumbaisha 12:7 yakasansululwa munshila itondesha anga Yehova alaakulama maswi akwe kuteshi bantu.
Alimwi ceebo cakwaamba ayi maswi ali muvesi 7 alakonkana amaswi ali muvesi 6 aamba pa ‘maswi akwe Yehova,’ bamwi balayeeya ayi Lesa ‘alalama’ maswi akwe. Alimwi tulicishi kwaamba ayi Lesa wakashitilisha Baibo nabi kwaamba ayi beshikupikisha baanji bakeelesha kwiikasha akwinyonyoola.—Isa. 40:8; 1 Pit. 1:25.
Nacibi boobo, Yehova alalama abantu baambwa mu vesi 5 alimwi alaakutolelela kucafwa akupulusha ‘bapengete’ ‘abalyatililwa.’—Jobo 36:15; Kulu. 6:4; 31:1, 2; 54:7; 145:20.
Aboobo kweelana amaswi ngotucana mu vesi 7, ino mbaani Yehova mbaalama, sa mbantu na ngamaswi akwe?
Na twabelenga cakubikila maano makani acanika mulilembo ili, alatondesha ayi mbantu mbaalama.
Pa Kulumbaisha 12:1, 2, Defedi wakaamba pa basebenshi bakwe Yehova bashomeka abo bakabekeshekwa kubantu babiibi. Lyalo muvesi 3 muli maswi atondesha ayi Yehova alaakunyonyoola baabo batasebenseshi kabotu mulaka wabo. Makani acanika mulilembo ili alatondesha ayi inga twashooma ayi Lesa alaakucafwa bantu bakwe mukwiinga maswi akwe taacite kampenda.
Aboobo abo Yehova mbweshi akashitilishe baambwa muvesi 7, mbantu bapengete abo bapenshekwa kubantu babiibi.
Ano ino nceebonshi muma Baibo amwi maswi aya akasansululwa munshila itondesha anga Lesa alaakulama maswi akwe kuteshi bantu? Maswi aya alatondesha shakalinga kulembetwe mu Malembo amu ciEbulu ayo akalinga mumabuku ngobakalinga kushoma. Sombi mu Malembo akutaanguna akasansululwa kuswa mu ciEbulu kutola mu ciGiliki, muli maswi akwaamba ayi: “Alaakutulama” alimwi “Alaakutushitilisha.” Aboobo maswi aya aalo alaamba pabantu bashomeka abo bapenshekwa alimwi balyatililwa. Balaakushitilishikwa kuswa ‘kulishalane ili,’ nkokwaamba ayi kubantu abo balumbaisha shibiibi. (Kulu. 12:7, 8) Mubusansulushi bumwi bwa Malembo amu ciEbulu kutola mu ciAlamaiki, vesi 7 yakasansululwa ayi: ‘Mwebo, nobaami baLesa, mulaakushitilisha baluleme, mulaakulama womwi awomwi wa mbabo kuswa kulishalane ili libiibi kwamuyayaya.’ Busansulushi ubu abwalo bulatondesha ayi Kulumbaisha 12:7 tayaambi pa maswi akwe Lesa.
Aboobo vesi iyi ilacafwa ‘bantu bashomeka’ kulangila ayi Lesa alaakubashitilisha.
