1. Ino nceebonshi Yesu wakasenga Yehova ayi ashitilishe bashikwiiya bakwe?

MASHIKU bushiku kaatana kucaikwa, Yesu wakalinga kuyeeya mapensho oonse bashikwiiya bakwe ngobakalinga kusa mukwiindaamo. Mukwiinga wakalinga kubasuni bashikwiiya bakwe, wakasenga baIshi ayi ‘abashitilishe kumubiibi.’ (Joni 17:14, 15) Yesu wakalinga kucishi ayi na akaboolele kwiculu, Satana alaakutolelela kulwana baabo boonse bakasala kusebensela Yehova. Aboobo bantu bakwe Yehova bakalinga kuyandika kushitilishikwa.

2. Ino nciinshi ceenga catupa kushoma cakutatoonsha kwaamba ayi Yehova alaakukumbula mipailo yesu?

² Yehova wakakumbula mupailo wakwe Yesu mukwiinga alimusuni. Na aswebo katweelesha cankusu kucita shintu shisangalasha Yehova, alaakutusuna alimwi alaakukutika kumipailo yesu ya kumusenga ayi atucaafwe akutushitilisha. Yehova ngu Ishiwesu shilusuno, aboobo alaakutolelela kulama bana bakwe. Inga taalilwi kucita boobo mukwiinga ico inga cabisha liina lyakwe!

3. Ino nceebonshi tulayandika kushitilishikwa a Yehova?

³ Kushitilishikwa a Yehova kutoyandika abuumbi pacecino ciindi kwiinda kale kale. Satana bakamuwaala pacishi capanshi kuswa kwiculu, aboobo alicite “bukali butaambiki.” (Ciyu. 12:12) Walengesha bantu bamwi kunooyeeya ayi ‘batoosebensela Lesa’ ndyebatootupensha. (Joni 16:2) Bamwi batashomi muli Lesa balatupensha ceebo cakwaamba ayi tulipusene abantu bamucishi. Tacicite mulandu aceenga capa kwaamba ayi bantu batupenshe, sombi tatuloondiwo. Ino nceebonshi? Nceebo cakwaamba ayi Maswi akwe Lesa alatulwiita ayi: ‘Mwaami alashomeka, aboobo alaakumuyumya akumushitilisha kuswa kumubiibi.’ (2 Tesa. 3:3) Ino Yehova alatushitilisha buyani? Amuleke tubandike nshila shobilo.

4. Kweelana a Bene Efeso 6:13-17, ino Yehova wakatupa nshi kwaamba ayi atushitilishe?

⁴ Yehova wakatupa shilwanisho shoonse sheenga shatucafwa kulwana Satana. (Amubelenge Bene Efeso 6:13-17.) Shilwanisho Lesa nshaakatupa nshiyumu alimwi shilasebensa kabotu! Nacibi boobo, tulyeelete kutolelela kushisebensesha shoonse na tulisuni kwaamba ayi shitushitilishe. Ino cilwanisho comwi acomwi cilemikaninaako nshi? Amuleke tubandike comwi acomwi.

5. Ino laamba wa lushinisho aleemikaninaako nshi, alimwi ino nceebonshi tulyeelete kumufwala?

⁵ Laamba walushinisho aleemikaninako cancine ncetucana mu Maswi akwe Lesa, Baibo. Ino nceebonshi tulyeelete kufwala laamba uyu? Kwaamba ayi tulishitilishe kuli Satana “ishi wa bubeshi.” (Joni 8:44) Watolelela kubeca kwa myaaka iinji abuumbi alimwi ‘akucenjeeka bantu boonse mucishi capanshi’! (Ciyu. 12:9) Nacibi boobo, cancine ncetucana mu Baibo cilatushitilisha kukucenjeekwa. Ino tulafwala buyani laamba walushinisho? Tulacita boobo kwiinda mukwiiya cancine pali Yehova, kumulambila “mumushimu alimwi amulushinisho,” alimwi akuba bantu bashomeka mushintu shoonse.​—Joni 4:24; Efe. 4:25; Ebu. 13:18.

6. Ino cakushitilisha ca pacaamba cabululami cilemikaninaako nshi, alimwi ino nceebonshi tulyeelete kucifwala?

⁶ Cakulishitilisha ca pacaamba cabululami cilemikaninaako njiisho shakwe Yehova shiluleme. Ino nceebonshi tulyeelete kufwala cakulishitilisha ca pacaamba? Bweenka mbuli cakulishitilisha ca ceela ca pacaamba mbocishitilisha moyo wakwe shilumamba kukuyaswa, cakulishitilisha ca pacaamba cabululami cilashitilisha moyo wesu wacikoshanyo, na buntu bwamukati, kushintu shibiibi shamucishi cino. (Tus. 4:23) Yehova alisuni ayi tumusune akumusebensela camoyo woonse. (Mate. 22:36, 37) Aboobo Satana aleelesha kutupa kwaamba ayi tusune shintu shamucishi Yehova nshaapatite, kwaamba ayi tucileeke kusebensela Yehova camoyo woonse. (Jemu. 4:4; 1 Joni 2:15, 16) Alimwi na waalilwa kucita boobo, alatalika kutuloondesha kwaamba ayi tucite sheenga shakalasha Yehova.

7. Ino cakulishitilisha ca pacaamba cabululami tulacifwala buyani?

⁷ Tulafwala cakulishitilisha ca pacaamba cabululami kwiinda mukusumina njiisho shakwe Yehova shaamba pamakani ashiluleme ashitaluleme, alimwi akukonkela njiisho ishi mubuumi bwesu. (Kulu. 97:10) Bamwi balabona anga njiisho shakwe Yehova nshiyumu kukonkela. Ano na twacileka kukonkela njiisho shamu Baibo mubuumi bwesu, inga twaba anga ngu shilumamba wafuula cakulishitilisha ca pacaamba inkondo ndyeli pakati ceebo cakwaamba ayi citoomulemena. Kucita boobo inga kwaba kubula maano abuumbi! Kubaabo basuni Yehova, “milawo yakwe Lesa teshi iyumu,” sombi ilabashitilisha.​—1 Joni 5:3.

8. Ino kufwala nsapato sha makani abotu cilasansulula nshi?

⁸ Paulo wakatuyuminisha ayi kulibambila kwanu kwa kushimikila makani abotu a luumuno kube anga ni nsapato nshemufwala. Nkokwaamba ayi tulyeelete kuba balibambite kushimikila makani abotu a Bwaami. Lushomo lwesu lulayuminaako ndyetutooshimikila bamwi makani amu Baibo. Cilayuminisha abuumbi kubona bantu bakwe Yehova nsengwe yoonse mbobatokweelesha cankusu kushimikila kuli koonse nkweenga baba. Kucakubonenaako balashimikila baabo mbobasebensaabo na mbobeyaabo kucikolo, kushimikila kuŋanda aŋanda na mumisena ya makwebo, ndyebatookula shintu, ndyebatoofwakashila beshikamukowa bateshi Bakamboni, na ndyebatobandika abantu bamwi mbobeshi. Na twacileka kushimikila ceebo cakuloonda, nkokwaamba ayi twaba anga ngushilumamba wafuula nsapato shakwe ndyaali munkondo; inga walicisa kushimpanta. Aboobo inga caba ciyumu kwaamba ayi alishitilishe, alimwi inga waalilwa kukonkela shitokwaamba munene wabashilumamba.

9. Ino nceebonshi tulayandika liyawo linene lya lushomo?

 ⁹ Liyawo linene lya lushomo lileemikaninaako lushomo lwesu muli Yehova. Tulashoma ayi alaakukumanisha shishomesho shakwe shoonse. Lushomo ulu lulaakutucafwa “kushimya mifwi inyaka mulilo iyo iwaala Satana.” Ino nceebonshi tulayandika kunyamuna liyawo linene? Kucita boobo kulaakutucafwa kutacenjeekwa amakani akubeca aamba baabo bakapondoka akuswa mucancine alimwi akutaboolela mwisule na bantu kabaamba shibiibi pamakani ngotushoma. Kwakubula lushomo inga twaalilwa kukaka na bamwi batuyunga ayi tutanyumfwili Yehova. Ano na lyoonse katukaka kucita shintu Yehova nshaapatite ndyetuli kuncito na kucikolo, lushomo lwesu lulayuminaako. (1 Pit. 3:15) Na twakaka kunjila ncito ya maali aanji ceebo cakwaamba ayi inga yapilinganya kulambila kwesu, lushomo lwesu lulashitilishikwa. (Ebu. 13:5, 6) Alimwi lyoonse na twatolelela kusebensela Yehova nabi ndyetutopikishikwa, lushomo lwesu lulatushitilisha.​—1 Tesa. 2:2.

10. Ino cimpompo ca lupulusho nciinshi, alimwi ino nceebonshi tulyeelete kucifwala?

¹⁰ Cimpompo calupulusho cilaamba kulangila Yehova nkwakatupa, nkokwaamba ayi cishomesho cakwaamba ayi alaakutupulusha kulufu akupa cilambu abo boonse bacita kuyanda kwakwe. (1 Tesa. 5:8; 1 Timo. 4:10; Taitasi 1:1, 2) Bweenka  cimpompo mbocishitilisha shilumamba kumutwi, kulangila lupulusho kulashitilisha miyeeyo yesu. Munshila nshi? Kulatucafwa kubikila maano kushishomesho shakwe Lesa akutupa kutalisukama abuumbi mumapensho. Ino cimpompo ca lupulusho tulacifwala buyani? Tulacita boobo kwiinda mukubona shintu kweelana a Lesa mbwashibona. Kucakubonenaako, tulacinka manungo muli Lesa muciindi cakulangila mububile ubo bumana.​—Kulu. 26:2; 104:34; 1 Timo. 6:17.

11. Ino mupeeni wamushimu nciinshi, alimwi ino nceebonshi tulayandika kuusebensesha?

¹¹ Mupeeni wamushimu cilaamba Maswi akwe Lesa, Baibo. Mupeeni uyu ulicite nkusu shakuyubulula bubeshi bwa mushobo uli woonse, akwaangulula bantu kunjiisho shakubeca alimwi akumicito ibiibi. (2 Koli. 10:4, 5; 2 Timo. 3:16, 17; Ebu. 4:12) Tuleeya bwakusebensesha kabotu mupeeni uyu kwiinda mukucita ciiyo capalweesu alimwi akwiinda mukwiishikwa alibunga lyakwe Lesa. (2 Timo. 2:15) Kwiilika pa shilwanisho, kuli aimwi nshila Yehova mbwaatushitilisha. Ino ni nshila nshi?

12. Ino nciinshi cimwi ncetuyandika, alimwi ino nceebonshi?

¹² Shilumamba ucishi kabotu kulwana alicishi kwaamba ayi inga taacikoonshi kulwana bashilumamba baanji akubakoma eenkabo; alayandika kucafwikwa abashilumambanyina. Ubu mbocibete akulindiswe, inga tatucikoonshi kumukoma Satana abaabo bali kulubasu lwakwe kwakubula lucafwo lwabamakwesu abenankashi. Yehova wakatupa mukwashi wabamakwesu abenankashi nsengwe yoonse kwaamba ayi banootucafwa.​—1 Pit. 2:17.

13. Kweelana a Bene Ebulu 10:24, 25, ino mabungano alatucafwa buyani?

¹³ Nshila yomwi mbweenga twatambula lucafwo nkwiinda mukucanika kumabungano. (Amubelenge Bene Ebulu 10:24, 25.) Soonse kulaba ciindi cimwi ndyetulinyumfwa kulefuka. Na twalinyumfwa boobo kucanika kumabungano inga kwatuyuminisha. Shikumbulo sha kuswa panshi lyamoyo shaamba bamakwesu abenankashi shilatuyumya. Makani aswa mu Baibo alimwi ashitondesho shicitwa kumabungano shilatucafwa kutolelela kusebensela Yehova. Alimwi mibandi iyuminisha njetubaayo mabungano kaatana kutalika alimwi andyetwamana kubungana ilatuyuminisha. (1 Tesa. 5:14) Kwiilikaawo, mabungano esu alatupa coolwe cakucafwa bamwi, alimwi kucita boobo kulatupa kuba alusangalalo. (Milimo 20:35; Loma. 1:11, 12) Kuli nshila ashimwi mabungano esu mbwatucafwa. Alatucafwa kushiba kabotu bwakushimikila akwiisha. Kucakubonenaako, tuleeya mbweenga twasebensesha kabotu Shisebensesho Nshetusebensesha Ndyetutokwiisha. Aboobo amulibambile kabotu kamutana kuya kumabungano. Amukutike cakubikila maano ndyemuli kumabungano. Pesule lyakubungana, amweeleshe kukonkela nshomweeya. Kucita boobo kulapa kwaamba ayi mube “shilumamba mubotu wakwe Klistu Yesu.”​—2 Timo. 2:3.

14. Ino mbaani bamwi beenga batucafwa?

¹⁴ Tulicite alucafwo kuswa kubaanjelo baanji abuumbi bacite nkusu. Amuyeeyebo nkusu shicite munjelo womwi! (Isa. 37:36) Ano amuyeeyebo likoto lya baanjelo nceenga lyacita. Taakuwo muntu nabi shikaswa weenga wacikonsha kulwana likoto lyabashilumamba bakwe Yehova. Na Yehova ali amusebenshi wakwe womwi, nkokwaamba ayi musebenshi uyu alicite baanji kulubasu lwakwe kwiinda balwani bakwe. (Boombo. 6:16) Inga twashoma kwaamba ayi ici ncancine! Amutolelele kuyeeya kufula kwa baabo beenga bamucafwa na mwalinyumfwa kulefuka ceebo ca maswi amwi eenga aamba ngomusebensaakwe, shicikolonyinaanu, na shikamukowa uteshi Kamboni. Mutaluubi kwaamba ayi tamubete nweenka munkondo iyi. Mulakonkela butanjilishi bwakwe Yehova.

15. Kweelana a Isaya 54:15, 17, ino nceebonshi taakuwo weenga wakasha bantu bakwe Lesa kucileka kushimikila?

¹⁵ Bantu bamucishi cakwe Satana balicite sheebo shiinji shipa kwaamba ayi batupaate. Tatwaabanimo lubasu mumapolitiki alimwi amunkondo. Tulaambilisha liina lyakwe Lesa, akushimikila kwaamba ayi Bwaami bwakwe Lesa bweenkabo mbweshi bukalete luumuno, alimwi tulanyumfwila njiisho shakwe Yehova shiluleme. Tulacafwa bantu kushiba kwaamba ayi mweendeleshi wacishi ici ngumubiibi, ngushikubeca alimwi ngumucayi. (Joni 8:44) Alimwi tulaambilisha ayi conoonobo cishi cakwe Satana cilaakunyonyoolwa. Nacibi boobo, Satana abaabo bali kulubasu lwakwe teshi bakacikoonshe kukasha ncito yesu yakushimikila. Mukwiinga tulaakutolelela kulumbaisha Yehova, munshila ili yoonse njeenga twacikonsha! Nabi kwaamba ayi Satana alicite nkusu, waalilwa kukasha makani a Bwaami kwaamba ayi atashiki kubantu nsengwe yoonse. Ici cakonsheka ceebo cakwaamba ayi Yehova alatushitilisha.​—Amubelenge Isaya 54:15, 17.

16. Ino Yehova alaakubapulusha buyani bantu bakwe ciindi camapensho anene?

¹⁶ Ino nshiinshi sheshi shikacitike kunembo? Ciindi camapensho anene, Yehova alaakutupulusha munshila shobilo shilibetele. Cakutaanguna, alaakupulusha basebenshi bakwe bashomeka paciindi ndyeshi akalengeshe bamaami ba pacishi capanshi kunyonyoola Babiloni Munene, nkokwaamba ayi bupailishi boonse bwakubeca. (Ciyu. 17:16-18; 18:2, 4) Lyalo alaakupulusha bantu bakwe ndyeshi akanyonyoole lubasu lwakweelaako lwacishi cakwe Satana munkondo ya Amagedoni.​—Ciyu. 7:9, 10; 16:14, 16.

17. Ino kutolelela kuba abushicibusa buyumu a Yehova kulatucafwa buyani?

¹⁷ Na twatolelela kuba abushicibusa buyumu a Yehova, taakuwo cinene Satana nceenga wacita. Lakwe ngweshi akanyonyoolwe kwamuyayaya. (Loma. 16:20) Aboobo amufwale shilwanisho shoonse akutolelela kushisebensesha! Muteeleshi kulwana nweenka munkondo iyi. Amucafwe bashominyinaanu. Alimwi amukonkele butanjilishi bwakwe Yehova. Na mwacita boobo, inga mwashoma cakutatoonsha kwaamba ayi Ishiwanu wakwiculu shilusuno alaakumuyumya akumushitilisha.​—Isa. 41:10.