1. Kweelana a Mateyo 24:9, ino nceebonshi tatukankamani na bantu bamucishi batupata?

YEHOVA wakatulenga munshila yakwaamba ayi tunootondesha lusuno alimwi aswebo kusunwa abamwi. Aboobo na muntu watupata, tulanyumfwa cibiibi alimwi akuloonda. Kucakubonenaako, nankashi Georgina ukala ku Europe wakaamba ayi: “Ndyendakalinga kucite myaaka 14, bama bakampata ceebo cakusebensela Yehova. Ndakalinyumfwa kuba neenka alimwi ndakatalika kutoonsha na ndakalinga muntu uli kabotu.” * Mukwesu waliina lya Danylo wakalemba ayi: “Masoja ndyebakanguma, kuntukana alimwi akunkonga ceebo cakuba Kamboni wakwe Yehova, ndakaba aboowa alimwi ndakalinyumfwa anga taaku mboombete.” Tulanyumfwa cibiibi abuumbi na bantu batupata. Nacibi boobo, ici tacitukankamiki. Ino nceebonshi? Nceebo cakwaamba ayi Yesu wakaamba ayi bantu balaakutupata.​—Amubelenge Mateyo 24:9.

2-3. Ino nceebonshi bantu balitupatite?

² Bantu bamucishi balipatite bashikwiiya bakwe Yesu. Ino nceebonshi? Nceebo cakwaamba ayi ‘tatubete bamucishi’ bweenka Yesu mbwaakaamba. (Joni 15:17-19) Alimwi nabi kwaamba ayi tulalemeka mfulumeende, tulakaka kwaabanamo lubasu mumapolitiki, kulemeka fulagi na kwiimba lwiimbo lwacishi. Tulapaila Yehova eenkabo. Tulashoma ayi Lesa eenkabo ngoocite nkusu shakweendelesha bantu. Nacibi boobo, Satana abaabo bali kulubasu lwakwe balakaka bweendeleshi bwakwe Lesa. (Mata. 3:1-5, 15) Tulashimikila bantu kwaamba ayi Bwaami bwakwe Lesa bweenkabo mbweshi bukamane mapensho oonse bantu ngobatokwiindaamo, alimwi conoonobo bulaakunyonyoola baabo boonse batabete kulubasu lwakwe Lesa.  (Danye. 2:44; Ciyu. 19:19-21) Aya ngamakani abotu kubaabo baliceesha, sombi kuteshi kubamucita shibiibi.​—Kulu. 37:10, 11.

³ Cimwi cilengesha bantu kutupata ncakwaamba ayi tulakonkela milawo yakwe Yehova iluleme. Lesa nshaamba ayi shililuleme ashitaluleme shilipusene abantu bamucishi nshobabona ayi nsheshiluleme ashitaluleme. Kucakubonenaako, bantu baanji balabona ayi kucita bulale bwa mushobo uli woonse ubo bwakapa kwaamba ayi Lesa anyonyoole ndabala ya Sodoma a Gomola kulibo kabotu! (Judi 7) Mukwiinga tulakonkela milawo yamu Baibo iluleme yaamba pamibo, bantu baanji balatuseka akutwaamba ayi tuli bayumu myoyo.​—1 Pit. 4:3, 4.

4. Ino njimibo nshi yeenga yatucafwa kuliyumya na bantu batupata?

⁴ Ino nshiinshi sheenga shatucafwa kuliyumya na bantu batupata nabi kututukana? Tulyeelete kushoma cakutatoonsha kwaamba ayi Yehova alaakutucafwa. Bweenka mbuli liyawo, lushomo inga lwatucafwa ‘kushimya mifwi yoonse ya mulilo iwaala mubiibi.’ (Efe. 6:16) Sombi tatweelete kweelabo pakuba alushomo. Tulyeelete kuba alusuno. Ino nceebonshi? Nceebo cakwaamba ayi lusuno ‘talukalali bwaangu’ alimwi lulasuula akuliyumya mushintu shoonse. (1 Koli. 13:4-7, 13) Amuleke tubandike kusuna Yehova, bamakwesu abenankashi alimwi abalwani besu, mbweenga kwatucafwa kuliyumya na bantu batupata.

5. Ino Yesu wakacita nshi ceebo cakwaamba ayi wakalinga kubasuni abuumbi baIshi?

⁵ Ciindi camashiku, pabushiku balwani bakwe kabatana kumucaya, Yesu wakalwiita bashikwiiya bakwe bashomeka ayi: “Ntoocitabo kweelana ambobakandasha baTa kwaamba ayi bantu ba mucishi beshibe ayi baTa ndibasuni.” (Joni 14:31) Mukwiinga Yesu wakalinga kubasuni abuumbi baIshi, wakacikonsha kuliyumya ndyaakalinga kwiinda mumapensho anene. Aswebo na tulimusuni abuumbi Yehova tulaakucikonsha kuliyumya ndyetutokwiinda mumapensho.

6. Kweelana a Baibo nshoyaamba pa Bene Loma 5:3-5, ino sobasebenshi bakwe Yehova tulalinyumfwa buyani na bantu bamucishi batupata?

⁶ Kusuna Yehova kwakacafwa basebenshi bakwe kutolelela kuliyumya ndyebakalinga kupenshekwa. Kucakubonenaako, kooti inene yaba Juda ndyeyakalwiita batumwi ayi bacileeke kushimikila makani abotu, kusuna Lesa kwakacafwa batumwi kusalawo “kunyumfwila Lesa muciindi cakunyumfwila bantu.” (Mili. 5:29; 1 Joni 5:3) Kusuna Lesa munshila iyi kulacafwa abamakwesu munshiku shino kutolelela kushomeka nabi ndyebatopenshekwa amfulumeende shicite nkusu abuumbi alimwi alunkutwe. Na bantu bamucishi batupata tatubooli mwisule na kulefuka, sombi ici tulacibona mbuli coolwe.​—Milimo 5:41; amubelenge Bene Loma 5:3-5.

7. Ino nshiinshi nshotweelete kucita na beshikamukowa batalika kutupikisha?

⁷ Cilaba ciyumu abuumbi na batotupikisha mbeshikamukowa. Ndyetwatalika kwiiya cancine pali Yehova, mpashi beshikamukowa bamwi inga babona anga nshetutokwiiya inga shatupilinganya. Bamwi inga batalika kuyeeya ayi mpashi twacinkuka. (Amweelanye a Maako 3:21.) Mpashi inga batalika akutupensha. Nacibi boobo, ishi tasheelete kutukankamika. Yesu wakaamba ayi: “Balwani ba muntu balaakuba baabo beenka mbwaakalaabo paŋanda.” (Mate. 10:36) Kwalo tacicite mulandu ambweenga beshikamukowa kabatubona, tatubaboni mbuli balwani besu. Mukwiinga kusuna Yehova kulatupa kusuna abantu. (Mate. 22:37-39) Nacibi boobo, teshi tukacileeke kukonkela milawo yakwe Lesa alimwi anjiisho shamu Baibo kwaamba ayi tusangalashe muntu.

8-9. Ino nshiinshi shakacafwa nankashi Georgina kuliyumya ndyaakalinga kupikishikwa?

⁸ Nankashi Georgina ngotwalinga twaambawo wakatolelela kuliyumya nabi kwaamba ayi banyina bakalinga kumupensha abuumbi. Wakaamba ayi: “Nebo abama twakatalika kwiiya Baibo a Bakamboni bakwe Yehova. Ano ndipakeendabo  myeenshi 6, bama bakaaluka akutalika kunkasha kuya kumabungano. Ndakesa mukushiba ayi bakatalika kubandika abantu bakapondoka akuswa mucancine, alimwi bakalinga kumpikisha kusebensesha makani ngobakalinga kulwiitikwa. Cimwi ciindi bakalinga kuntukana, kuntinta misusu, kunshina panshingo, alimwi akusowa mabuku angu. Ndyendakashika myaaka 15 ndakabombekwa. Mukuyanda kwaamba ayi ncileeke kusebensela Yehova, bama bakantola kuŋanda imwi nkobasungila bacanike batanyumfwi. Muŋanda umo mwakalinga abacanike bamwi basebensesha misamu ikola alimwi abamwi bakacita milandu inene. Cilaba ciyumu abuumbi kuliyumya na bantu beelete kukutondesha lusuno akukulama mbobatookupensha.”

⁹ Ino nciinshi cakacafwa nankashi Georgina kuliyumya? Wakaamba ayi: “Bama ndyebakatalika kumpensha, nceciindi ndyendakamanishabo kubelenga Baibo yoonse. Ndakashoma cakutatoonsha kwaamba ayi ndacana cancine, alimwi ndakalinga kulinyumfwa kuba pafwiifwi abuumbi a Yehova. Ndakalinga kupaila kuli nguwe mankanda aanji, alimwi wakalinga kukumbula mipailo yangu. Ndyendakalinga kukala kuŋanda nkobakalinga bantola, nankashi umwi wakanjita kuŋanda kumishaabo. Lyalo twakabelenga Baibo pomwi akulangoola makani. Paciindi coonse cilya bamakwesu abenankashi bakanjuminisha abuumbi. Bakalinga kumbikilako maano bweenkabo mbuli wamu mukwashi wabo. Ndakesa mukushiba kwaamba ayi Yehova alicite nkusu kwiinda baabo bakalinga kumpikisha.”

10. Ino inga twalangila ayi Yehova lyoonse alaakunoocita buyani?

¹⁰ Mutumwi Paulo wakalemba ayi taaku “ceenga catupansaanya alusuno lwakwe Lesa, ulo ndwaatutondesha kwiinda muli Klistu Yesu Mwaami wesu.” (Loma. 8:38, 39) Nabi kwaamba ayi cimwi ciindi inga twaba amapensho anene, Yehova lyoonse alaakunootuyuminisha akutupa nkusu. Alimwi bweenka mbocakalinga kuli nankashi Georgina, Yehova alatucafwa kwiinda mu bamakwesu abenankashi.

11. Ino lusuno Yesu ndwakaamba pa Joni 15:12, 13 lwakabacafwa buyani bashikwiiya bakwe? Amwaambe cakubonenaako.

¹¹ Ciindi camashiku, pabushiku Yesu ndyaakalinga pafwiifwi akucaikwa, wakalwiita bashikwiiya bakwe ayi balyeelete kusunana. (Amubelenge Joni 15:12, 13.) Wakalinga kucishi kwaamba ayi kusunana kuswa panshi lya moyo kulaakubacafwa kuba bacatene alimwi akucikonsha kuliyumya lupato lwa mucishi. Amuyeeye bukaalo bwakalingaamo bamulibungano lyaku Tesalonika. Kuswabo  ciindi libungano ili ndyelyakatalika, kupenshekwa kwakatalika. Nacibi boobo, bamakwesu abenankashi bakatolelela kushomeka alimwi akusunana. (1 Tesa. 1:3, 6, 7) Paulo wakabayuminisha kusunana, wakaamba ayi: ‘Mwiindilisheewo kusunana.’ (1 Tesa. 4:9, 10) Lusuno lwakalinga kweelete kubapa kuyuminisha baabo bacite buumba akucafwa balefukite. (1 Tesa. 5:14) Bakakonkela Paulo nshaakabalwiita, aboobo munkalata yabili njakabalembela mpashi pesule lya mwaaka womwi, wakabaambila ayi: “Kusunana kwanu kutooya ciindaawo.” (2 Tesa. 1:3-5) Mukwiinga bakalinga kusunene, bakacikonsha kuliyumya mumapensho.

12. Ino bamakwesu abenankashi bakatondesha buyani ayi balisunene kucishi kumwi ndyekwakalinga nkondo?

¹² Amuyeeye shakacitikila mukwesu Danylo ngotwalinga twaambawo amukaakwe. Inkondo ndyeyakatalika kumusena nkobakalinga kukala, bakatolelela kubungana, kushimikila makani abotu kushika peela nkusu shabo, alimwi akwaabana shakulya nshobakalinga kucite abamakwesu abenankashi. Lyalo bushiku bomwi masoja bakalinga kucite mfuti bakapola paŋanda pali Danylo. Ba Danylo bakaamba ayi: “Bakandwiita ayi ncileeke kuba Kamboni wakwe Yehova. Ndyendakakaka, bakanguma akuntondeka mfuti kumutwi kwaamba ayi noonde. Kabatana kuya bakandwiita ayi na bakese alimwi balaakusa mukucata mukaangu. Aboobo bamakwesu cakufwambaana bakatutantika sitima kwaamba ayi tuye kutauni imwi. Teshi nkalubewo bamakwesu aba mbobakatutondesha lusuno. Ndyetwakashika kutauni imwi, bamakwesu bakatupa shakulya alimwi akuncafwa kucana ncito aŋanda! Ici cakapa kwaamba ayi aswebo tunoolama bamakwesu bamwi bakalinga kucica kumisena kwakalinga nkondo.” Ishi shakatondesha patuba kwaamba ayi lusuno ndotucite mbuli Beneklistu inga lwatucafwa kuliyumya bantu ndyebatupata.

13. Ino mushimu usalashi ulatucafwa buyani kutolelela kusebensela Yehova cakuliyumya nabi bamwi ndyebatupata?

¹³ Yesu wakalwiita bashikwiiya bakwe ayi banoosuna balwani babo. (Mate. 5:44, 45) Ano sa kucita boobo ncuubu? Sobwe napaceyi! Nacibi boobo, mushimu usalashi wakwe Lesa inga watucafwa kusuna balwani besu. Shisepo shakumushimu shileelikaawo lusuno, kukalika moyo, kubota moyo, kukomenya moyo, alimwi akulikasha. (Gala. 5:22, 23) Mibo iyi ilatucafwa kuliyumya na bantu batupata. Bantu baanji bakacileka kutupikisha ceebo cakubona mibo iyi mubeebaabo, bakaabo, bana babo, na kubaabo mbobabambenaabo. Alimwi baanji pababo baleeya cancine  akuba bamakwesu abenankashi. Aboobo na citoomuyumina kutondesha lusuno kubaabo bamupatite ceebo cakusebensela Yehova, amusenge mushimu usalashi wakwe Yehova. (Luka 11:13) Alimwi amushome cakutatoonsha kwaamba ayi kunyumfwila Yehova ncecintu cibotu kwiindaawo ncomweelete kucita lyoonse.​—Tus. 3:5-7.

14-15. Ino Bene Loma 12:17-21 yakabacafwa buyani ba Yasmeen kutondesha beebabo lusuno nabi kwaamba ayi bakalinga kubapensha abuumbi?

¹⁴ Amuyeeye shakacitikila nankashi Yasmeen, ukala ku Middle East. Ndyakaba Kamboni beebaye bakalinga kuyeeya ayi wakabecekwa. Aboobo bakatalika kumukasha kusebensela Lesa. Bakalinga kumutukana akwaambila beshikamukowa, shikupailisha, amuŋanga kwaamba ayi babakonge ayi balisuni kupwaya mukwashi. Beebaye nankashi Yasmeen bakaya mukukalokela bamakwesu kumabungano! Liinji nankashi Yasmeen wakalinga kulila ceebo ca kupenshekwa.

¹⁵ Nankashi Yasmeen wakalinga kuyuminishikwa kubamakwesu abenankashi na waya ku Ŋanda ya Bwaami. Bamanene bakamuyuminisha kukonkela maswi ngotucana pa Bene Loma 12:17-21. (Amubelenge.) Nankashi Yasmeen wakaamba ayi: “Tacakalinga cuubu, sombi ndakasenga Yehova kwaamba ayi ancaafwe, alimwi ndakalinga kucita shoonse nsheenga ndacikonsha kwaamba ayi nkonkele Baibo nshoyaamba. Aboobo na beebangu basowa matombe mukicini kwaamba ayi nkalale, ndakalinga kuboteshabo. Na bantukana, ndakalinga kukumbula cakulibombya. Alimwi na baciswa, ndakalinga kubalama kabotu.”

16-17. Ino nshiinshi nshomweeya kucakubonenaako cakwe nankashi Yasmeen?

¹⁶ Yehova wakabapa cilambu ba Yasmeen ceebo cakutondesha beebaabo lusuno. Bakaamba ayi: “Beebangu bakatalika kunshoma abuumbi mukwiinga lyoonse ndakalinga kwaamba lushinisho. Bakatalika kukutika cabulemu na ndatalika kwaamba sha kupaila. Alimwi bakaamba ayi batoocileka kumpensha. Pacecino ciindi balanjuminisha kuya kumabungano. Alimwi tulanyumfwana kabotu abeebangu aboobo tulekala muluumuno paŋanda. Ntolangila kwaamba ayi bushiku bumwi beebangu balaakusumina kwiiya cancine, lyalo tulaakunoosebensela Yehova pomwi.”

¹⁷ Shakacitikila nankashi Yasmeen shilatondesha kwaamba ayi “lusuno lulasuula shibiibi shoonse, . . . lulalangila shintu shoonse, lulaliyumya mushintu shoonse.” (1 Koli. 13:4, 7, NWT) Nabi kwaamba ayi lupato lulicite nkusu, lusuno lulicite nkusu shiinditewo. Na katutondesha lusuno kubantu, mpashi inga bacileka kutukasha kusebensela Yehova. Alimwi kucita boobo kulasangalasha Yehova. Alimwi nabi kwaamba ayi beshikutupikisha batolelela kutupata, inga twacikonsha kutolelela kuba basangalete. Ino nceebonshi?

18. Ino nshiinshi sheenga shatupa kuba alusangalalo na bantu batupata?

¹⁸ Yesu wakaamba ayi: “Mulicite coolwe nomutoopatwa kubantu.” (Luka 6:22) Tatusuniiwo kupatwa. Alimwi tatunyumfwi kabotu kupenshekwa ceebo cakusebensela Yehova. Ano ino nshiinshi sheenga shatupa kuba alusangalalo na bantu batupata? Amubone shintu shotatwe shitupa kuba alusangalalo. Cakutaanguna, na twaliyumya Lesa alatusuna abuumbi. (1 Pit. 4:13, 14) Cabili, lushomo lwesu lulayuminaako. (1 Pit. 1:7) Alimwi catatu, tulaakutambula cilambu cibotu abuumbi, nkokwaamba ayi buumi bwamuyayaya.​—Loma. 2:6, 7.

19. Ino nciinshi cakapa kwaamba ayi batumwi basangalale nabi ndyebakakwipwa?

¹⁹ Ndyepakeendabo ciindi ciniini kuswa ciindi Yesu ndyaakabushikwa, batumwi bakasangalala bweenka mbuli Yesu mbwakaamba. Pesule lyakubakwipa akubalwiita ayi bacileeke kushimikila makani abotu, bakasangalala. Ino nceebonshi? Bakasangalala mukwiinga “bakacanwa ayi baleelela kupenshekwa ceebo ca liina [lyakwe Yesu].” (Milimo 5:40-42, NWT) Bakalinga kumusuni abuumbi Mwaami wabo kwiinda mbobakalinga kuloonda balwani babo bakalinga kubapatite. Alimwi bakatondesha ayi bakalinga kusuni Mwaami wabo kwiinda mukutolelela kushimikila makani abotu “cakutacileka.” Bamakwesu abenankashi baanji munshiku shino abalo balatolelela kusebensela Yehova cakushomeka nabi ndyebatokwiinda mumapensho. Balicishi kwaamba ayi Yehova teshi akalube ncito shabo alimwi alusuno ndobatondesha paliina lyakwe.​—Ebu. 6:10.

20. Ino nshiinshi nsheshi tukeeye mumutwi utokonkelaawo?

²⁰ Bantu bamucishi balaakutolelela kutupata kushikila cishi ici cikamaane. (Joni 15:19) Sombi tatweelete kuloonda. Bweenka mbweshi tukeeye mumutwi utokonkelaawo, Yehova ‘alaakuyumya akushitilisha’ basebenshi bakwe bashomeka. (2 Tesa. 3:3) Aboobo atutolelele kusuna Yehova, bamakwesu abenankashi, kwiilikaawo abalwani besu. Kucita boobo kulaakutucafwa kutolelela kuba bacatene, kuyumya lushomo lwesu, kulemeka Yehova, alimwi akutondesha kwaamba ayi lusuno lulicite nkusu kwiinda lupato.