Bakamboni baanji balabandika abeshikamukowa alimwi abashominyinaabo kwiinda mukusebensesha shakupangapanga sha munshiku shino. Nacibi boobo, Mwineklistu ushimpite lwakumushimu alyeelete kwiibaluka kululika uku: “Muntu ucenjete ulabona mapensho ali kunembo akwaayuba, sombi muluya ulaya mukulinjishamobo akupengelaamo.”​—Tus. 27:12.

Tulishi kwaamba ayi Yehova alisuni kutushitilisha. Aboobo tatusekani abantu batayuminishi lucatano, bakakushikwa mulibungano, na abo bayuminisha miyeeyo itabete kabotu. (Loma. 16:17; 1 Koli. 5:11; 2 Joni 10, 11) Bamwi nabi kwaamba ayi mbamakwesu abenankashi, mpashi tabakonkeli njiisho shamu Baibo. (2 Timo. 2:20, 21) Ici ncintu comwi ncotubikila maano ndyetutosala beshicibusa. Teshi cuubu kusala beshicibusa bali kabotu bunene bunene na tutoosebensesha mapulogilamu akutumina makani.

Kubikila maano ndyetutosala beshicibusa kulayandika abuumbi bunene bunene na tuli mulikoto linene lyakutumishanya makani pamafooni. Beneklistu bamwi bakalicanawo mumapensho ceebo cakuba mulikoto linene lyakutumishanya makani pamafooni. Ano ino mukwesu na nankashi inga wacita buyani na walicana mulikoto lya bantu baanji lyakutumishanya makani? Inga caba ciyumu kushiba kabotu boonse bali mulikoto ilyo alimwi akushiba na mbayumu lwakumushimu. Kulumbaisha 26:4 ilaamba ayi: “Nebo nsheendi abantu batabete kabotu sobwe, nabi kweenda abantu baamba nshebataciti.” Lilembo ili lilatondesha ayi ncintu cabusongo kutumishanyabo makani abantu mbomushi kabotu.

Nabi Mwineklistu ndyaali mukakoto kaniini kakutumishanya makani, alyeelete kubikila maano ciindi ncaatola kutuma makani alimwi abantu mbwaatumina. Tatweelete kulinyumfwa ayi tulyeelete kukumbula makani ali woonse bamwi ngobatuma nabi tumane ciindi cilaamfu buyani. Paulo wakalwiita Timoti ayi alyeelete kucenjela abantu “beshikufuya alimwi abeshikunjila mumakani atabakumite.” (1 Timo. 5:13, NWT) Munshiku shino ncuubu kufuya bantu kwiinda mukutumishanya makani pamafooni.

Mwineklistu ushimpite lwakumushimu inga taakutiki na kwaamba makani atabete kabotu pa bamwi, alimwi inga taambi makani abushishi akumite pa bashominyina. (Kulu. 15:3; Tus. 20:19) Alaleya kwaamba makani eenga akankamika bamwi alimwi atashinishitwe na ngancine. (Efe. 4:25) Tulicite makani amalipooti aanji abotu abuumbi pa webusaiti yesu ya jw.org aamba shamu Baibo ngeenga twashoma alimwi apulogilamu ya JW Broadcasting^® ya mweenshi amweenshi.

Bakamboni bamwi balacita makwebo na kulangoola bantu basuni ncito kwiinda mukutuma makani pamafooni. Aya ngamakani amakwebo aboobo takumite kulambila Yehova kwesu. Beneklistu basuni kuleya “kusuna maali” balaleya kupanga maali kwiinda mukusebensesha bamakwesu abenankashi.​—Ebu. 13:5.

Ino mbuyani abo basebensesha mapulogilamu akutumishanya makani, kusenga maali akucafwilisha bamakwesu abenankashi bacitikilwa mapensho anene? Ncakwiila tulibasuni bamakwesu abenankashi alimwi tulababikila maano, aboobo liinji tulacafwa baabo babulishite alimwi batoyandika kuyuminishikwa. (Jemu. 2:15, 16) Nacibi boobo, kucita boobo kwiinda mukusebensesha tukoto twakutumishanya makani, nkutasebensela pomwi abubaambo bwa ofesi yamusampi na libungano. (1 Timo. 5:3, 4, 9, 10, 16) Alimwi ncakutatoonsha taakuwo nabi womwi wandiswe weenga wasuna kwaamba ayi bantu banoobona anga Lesa wakatupa ncito ilibetele yakulama bamakwesu abenankashi.

Ncetusuni bunene nkucita shintu sheenga shaleta bulemu kuli Lesa. (1 Koli. 10:31) Aboobo ndyemutoosalawo kusebensesha mapulogilamu akutumishanya makani na nshila imwi, mulyeelete kuyeeya pamapensho ngeenga mwacana, lyalo akucenjela.