MUTWI WAKWIIYA 10
Inga Mwacikonsha “Kufuula Buntu Bwakale Kale”
‘Amufuule buntu bwakale kale amicito ya mbubo.’—KOLO. 3:9.
LWIIMBO 29 Kucita Shintu Kweelana Aliina Lyesu
NSHESHI TWIIYE *
1. Ino buumi bwanu bwakalinga buyani kamutana kutalika kwiiya Baibo?
INO buumi bwanu bwakalinga buyani kamutana kutalika kwiiya Baibo a Bakamboni Bakwe Yehova? Buunji bwandiswe tatusuni akuyeeyawo pabuumi bwesu bwakale kale. Cilyeelete mibo yesu ambotwakalinga kubona shintu shakalinga kukumwa abantu bakucishi nshobaamba ayi shili kabotu na tashibete kabotu. Na mbocakalinga ubo, nkokwaamba ayi “mwakalinga kushiitebo mucishi capanshi kwakubula ancemwakalinga kulangila, kamuteshi a Lesa.” (Efe. 2:12) Ano pesule lyakutalika kwiiya Baibo, buumi bwesu bwakaaluka!
2. Ino nshiinshi nshomwakeeya ndyemwakatalika kwiiya Baibo?
2 Pesule lyakutalika kwiiya Baibo, mwakesa mukushiba kwaamba ayi mulicite Ishiwanu wakwiculu umusuni abuumbi. Mwakashiba ayi kwaamba ayi musangalashe Yehova akuba mumukwashi wabasebenshi bakwe, mwakalinga kuyandika kwaalula mibo yanu, mbomubona shintu alimwi ambomuyeeya. Mwakalinga kweelete kwiiya kucita sheesho Yehova nshaamba ayi shililuleme akuleya nshaamba ayi nshibiibi.—Efe. 5:3-5.
3. Kweelana a Bene Kolose 3:9, 10, ino Yehova alisuni ayi tucite buyani, alimwi ino nshiinshi nsheshi twiiye mumutwi uyu?
3 Yehova ngo Mulengi wesu alimwi Ishiwesu wakwiculu, aboobo ngoocite nkusu shakubika milawo yeelete kukonkela bamumukwashi wakwe. Alimwi alisuni kwaamba ayi muntu kaatana kubombekwa, ataangune kusebensa cankusu “kufuula buntu bwakale kale amicito ya mbubo.” * (Amubelenge Bene Kolose 3:9, 10.) Mutwi uyu utoocafwa baabo basuni kubombekwa kukumbula miipusho yotatwe iyi: (1) Ino “buntu bwakale kale” cilaamba nshi? (2) Ino nceebonshi Yehova alisuni kwaamba ayi tubufuule? (3) Ino inga twabufuula buyani? Kuli ndiswe sotwakabombekwa kale, mutwi uyu utootucafwa kutaboolela kumicito na miyeeyo ya buntu bwakale kale.
INO “BUNTU BWAKALE KALE” CILAAMBA NSHI?
4. Ino muntu ukonkela “buntu bwakale kale” alicite mibo ya buyani?
4 Muntu ukonkela “buntu bwakale kale” alayeeya akucita shintu shitabete kabotu. Inga kaacite mibo mbuli kulisuna, kufwambaana kukalala, kutalumba akulisumpula. Inga kaasuni kweebela shintu shileta miyeeyo yakoonana, mafilimu abiibi na atondesha sha nkondo. Ncakwiila inga kaaciteko mibo ibotu, alimwi mpashi alalinyumfwa acibiibi pashintu nshaamba akucita. Sombi alaalilwa kwaalula mbwayeeya alimwi amibo yakwe.—Gala. 5:19-21; 2 Timo. 3:2-5.
Na twafuula “buntu bwakale kale,” tulacileka kweendeleshekwa amiyeeyo alimwi amibo itabete kabotu (Amubone palagilafu 5) *
5. Sa inga cakonsheka kufuula buntu bwakale kale cakumaninina? Amusansulule. (Milimo 3:19)
5 Tuli bantu batamaninite, aboobo taakuwo weenga wacikonsha kuleya cakumaninina kuyeeya akukumbwa shintu shitabete kabotu. Cimwi ciindi, inga twaamba na kucita cimwi citabete kabotu. (Jele. 17:9; Jemu. 3:2) Ano na twafuula buntu bwakale kale, tatukonkeli miyeeyo amibo itabete kabotu. Tulaaluka akuba muntu upuseneeko.—Isa. 55:7; amubelenge Milimo 3:19.
6. Ino nceebonshi Yehova alatulwiita kuleya miyeeyo amibo itabete kabotu ya buntu bwakale kale?
6 Yehova alatulwiita kuleya miyeeyo amibo itabete kabotu mukwiinga alitusuni alimwi alisuni ayi tunoosangalala mubuumi. (Isa. 48:17, 18) Alicishi kwaamba ayi abo bakonkela lunkumbwa lutabete kabotu balacana mapensho akupenshelamo bamwi. Alalinyumfwa cibiibi kutubona katucita shintu shituletela mapensho akupenshelamo bamwi.
7. Kweelana a Bene Loma 12:1, 2, ino nkusala kwa buyani nkotweelete kucita?
7 Beshicibusa abeshikamukowa bamwi inga batuseka ceebo cakwaalula mibo yesu. (1 Pit. 4:3, 4) Inga batulwiita ayi tulicite nkusu shakulisalila sobeene nshetusuni kucita alimwi tatweelete kusuminisha bamwi kutulwiita shakucita. Nacibi boobo, abo bakaka kukonkela njiisho shakwe Yehova tabacaniiwo lwaanguluko lwancinencine. Alimwi balasuminisha cishi cakwe Satana kubeendelesha. (Amubelenge Bene Loma 12:1, 2.) Soonse tulyeelete kusalawo, na nkutolelela kukonkela buntu bwakale kale bweendeleshekwa abubi alimwi acishi cakwe Satana, nabi kusumina kwaamba ayi Yehova atwaalule kuba muntu uli kabotu.—Isa. 64:8.
INO “BUNTU BWAKALE KALE” INGA MWABUFUULA BUYANI?
8. Ino nshiinshi sheenga shatucafwa kuleya miyeeyo amibo itabete kabotu?
8 Yehova alicishi kwaamba ayi cilaakutola ciindi akusebensa cankusu kwaamba ayi tucikoonshe kuleya miyeeyo amibo itabete kabotu. (Kulu. 103:13, 14) Nacibi boobo, kwiinda mu Maswi akwe, mushimu wakwe, alimwi alibunga lyakwe, Yehova alatupa busongo, nkusu, alucafwo ndotuyandika kwaamba ayi twaalule buumi bwesu. Ncakutatoonsha wakatalika kale kumucafwa. Amuleke tubandike shimwi nsheenga mwaciita kwaamba ayi mucikoonshe kuya panembo mukufuula buntu bwakale kale akweelela kubombekwa.
9. Ino Maswi akwe Lesa inga amucafwa kucita buyani?
9 Amulicencente kwiinda mukusebensesha Baibo. Maswi akwe Lesa ali anga ndigilasi; inga amucafwa kulanga langa nshomuyeeya, nshomwaamba anshemucita. (Jemu. 1:22-25) Batomwiisha Baibo a bamakwesu abenankashi bashimpite lwakumushimu inga bamucafwa. Kucakubonenaako, kwiinda mukusebensesha Malembo inga bamucafwa kushiba nshomucita kabotu anshomwaalilwa kucita kabotu. Inga bamucafwa kushiba mbweenga mwacana makani aamba shamu Baibo eenga amucafwa kucileka mibo itabete kabotu. Alimwi Yehova alilibambite kumucafwa. Ngwaacishi kabotu sheenga shamucafwa mukwiinga lakwe alabona shili mumoyo wanu. (Tus. 14:10; 15:11) Aboobo amube abubaambo bwakupaila akwiiya Maswi akwe bushiku abushiku.
10. Ino mweeya nshi kuswa kushakacitikila Elie?
10 Amushome kwaamba ayi njiisho shakwe Yehova inga shamucafwa. Kukonkela shili shoonse Yehova nshaatulwiita kucita inga kwatucafwa. Abo bakonkela njiisho shakwe balaba bantu balemekwa, bacite kulangila alimwi basangalete. (Kulu. 19:7-11) Ano abo batakonkeli njiisho shakwe Yehova baleenda mumapensho esa ceebo cakukonkela shiyanda mubili. Amunyumfwe shakaamba musankwa waliina lya Elie pamakani akutakonkela njiisho shakwe Lesa. Bashali bakwe bakalinga bantu basuni Yehova. Ano ndyaakalinga kukula, Elie wakasalawo kunoosekana abantu batabete kabotu. Wakatalika kusebensesha misamu ikola, kucita bufuule akwiipa. Wakaamba ayi wakaba muntu ufwambaana kukalala alimwi ushinkondo. Wakaamba ayi: “Ndakatalika kucita shintu shoonse nshendakeeya ayi Mwineklistu taeelete kucita.” Nacibi boobo, Elie taakwe kulubililaako nshakeeya ndyaakalinga mwanike. Mukuya kwaciindi, wakatalika kwiiya Baibo alimwi. Wakasebensa cankusu kucileka mibo itabete kabotu, lyalo mumwaaka wa 2000 wakabombekwa. Ino kukonkela njiisho shamu Baibo kwakamucafwa buyani? Elie wakaamba ayi: “Pacecino ciindi ndicite luumuno anjeelacaamba isalalite.” * Kweelana ashakacitikila Elie, abo bakaka kukonkela njiisho shakwe Yehova balaliletela mapensho beene. Nacibi boobo, Yehova alilibambite kubacafwa kwaalula buumi bwabo.
11. Ino nshintu nshi Yehova nshaapatite?
11 Amwiiye kupata shintu Yehova nshaapatite. (Kulu. 97:10) Baibo ilaamba ayi Yehova alipatite “meenso alisumpula, mulaka waamba shakubeca, amaansa atila bulowa bwa bantu batacite mulandu.” (Tus. 6:16, 17) Alimwi “alipatite beshinkondo abeshikucenjeeka.” (Kulu. 5:6, NWT) Yehova alishipatite abuumbi shintu ishi cakwaamba ayi muciindi cakwe Nowa, wakanyonyoola bamucita shibiibi boonse ceebo bakalinga basusha cishi abubi. (Mata. 6:13) Amuyeeye pacakubonenaako acimwi. Kwiinda mumushinshimi Malaki, Yehova wakaamba ayi alipatite baabo beshikuleka bakaabo patapuwo amulandu. Lesa taatambuli kulambila kwabo alimwi alaakuboombolosha pashibiibi shabo.—Mala. 2:13-16; Ebu. 13:4.
Kucita cintu Yehova ncaapatite kulyeelete kutunyumfwisha cibiibi bweenka mbotulinyumfwa na twayeeya pashakulya shibolete (Amubone mapalagilafu 11-12)
12. Ino maswi akwaamba ayi ‘amupate shibiibi’ alasansulula nshi?
12 Yehova alisuni kwaamba ayi ‘tupate shibiibi.’ (Loma. 12:9) Maswi akwaamba ayi ‘amupate shibiibi’ alasansulula kubona cintu cimwi bweenka mbotubona cintu cilensha bunya. Amuyeeyebo mbweenga mwalinyumfwa na bamulwiita kulya shakulya shibolete. Kuyeeyabo pashakulya isho inga kwamufundoosha kumoyo. Ubu mbotweelete kulinyumfwa na twayeeya kucita cintu Yehova ncaapatite.
13. Ino nceebonshi tulyeelete kuleya miyeeyo itabete kabotu?
13 Amushitilishe miyeeyo yanu. Shintu nshetuyeeya shilakuma nshetucita. Nceceeco Yesu ncaakaambila ayi tulyeelete kuleya miyeeyo yeenga yatulengesha kucita cilubo cinene. (Mate. 5:21, 22, 28, 29) Ncakutatoonsha kwaamba ayi tulisuni kucita shisangalasha Ishiwesu wakwiculu. Aboobo tulyeelete kufwambaana kukaka miyeeyo ili yoonse itabete kabotu!
14. Ino shintu nshetwaamba shilatondesha nshi pali ndiswe, alimwi ino njimiipusho nshi njotweelete kuliipusha?
14 Amusale kabotu shakwaamba. Yesu wakaamba ayi: “Shintu shiswa mumulomo wa muntu shilaswa mumoyo.” (Mate. 15:18) Ncakwiila nshetwaamba shilatondesha shintu shili mumoyo wesu. Aboobo amuliipushe ayi: ‘Sa ndaleya kubeca nabi kwaamba ayi kwaamba lushinisho inga kwambika mumapensho? Mbuli muntu uli mucikwati, sa ndaleya kutondesha lusuno lwamucikwati kumuntu ngonteebenaakwe? Sa ndaleya kwaamba pashintu shitabete kabotu? Sa ndakalika moyo na muntu umwi wankalasha?’ Kuyeeya cakubikila maano pamiipusho iyi kulaakumucafwa. Nshemwaamba inga twashikoshanisha kumabatani ali ku cakufwala. Na mwamangulula mabatani cilaba cuubu kufuula cakufwala. Amwebo na kamweelesha cankusu kuleya myaambo ibiibi, kubeca akubandika pashintu shitabete kabotu, cilaakumubeta cuubu kufuula buntu bwakale kale.
15. Ino kupopa buntu bwakale kale pacisamu cilaamba nshi?
15 Amube balibambite kucita cili coonse ceenga cayandika. Mutumwi Paulo wakasebensesha cikoshanyo citucafwa kushiba ayi kwaalula buumi bwesu ncintu ciyandika abuumbi. Wakalemba ayi tulyeelete kupopa ‘buntu bwakale kale pacisamu.’ (Loma. 6:6) Yesu wakalyaaba kupopwa pacisamu kwaamba ayi asangalashe Yehova. Aswebo kwaamba ayi tusangalashe Yehova tulyeelete kuleya miyeeyo itabete kabotu akucileka mibo njaapatite. Ishi nshotweelete kucita kwaamba ayi tube anjeelacaamba isalalite akulangila kuba abuumi butamaani kunembo. (Joni 17:3; 1 Pit. 3:21) Mutaluubi kwaamba ayi Yehova teshi akaalule milawo yakwe kwaamba ayi atusangalashe. Aboobo swebo ndiswe tweelete kwaalula buumi bwesu akutalika kukonkela milawo yakwe.—Isa. 1:16-18; 55:9.
16. Ino nceebonshi mulyeelete kuba bashinishite kutolelela kulwana mibo itabete kabotu?
16 Amutolelele kulwana mibo itabete kabotu. Mulaakuyandika kutolelela kulwana mibo itabete kabotu nabi pesule lyakubombekwa. Amuyeeye shakacitikila musankwa waliina lya Maurício. Ndyaakalinga mwanike, wakatalika koonana abasankwanyina. Lyalo mukuya kwaciindi wakakumanya Bakamboni Bakwe Yehova akutalika kwiiya Baibo. Pesule lyakwaalula buumi bwakwe, wakabombekwa mumwaaka wa 2002. Nabi kwaamba ayi wasebensela Yehova kwamyaaka iinji, Maurício wakaamba ayi: “Ndatolelela kulwana miyeeyo itabete kabotu.” Muciindi cakulinyumfwa kulefuka, wakaamba ayi: “Ndayuminishikwa mukwiinga ndicishi kwaamba ayi na ndasala kutakonkela miyeeyo itabete kabotu Yehova alakondwa.” *
17. Ino shakeendaamo Nabiha shamuyuminisha buyani?
17 Amupaile kwaamba ayi Yehova amucaafwe, alimwi amucinke manungo mumushimu wakwe, kuteshi munkusu shanu. (Gala. 5:22; Filip. 4:6) Tulyeelete kusebensa cankusu na tulisuni kufuula buntu bwakale kale akutabufwala alimwi. Amuyeeye shakacitikila mwanakashi waliina lya Nabiha. Baishi bakamushiya kaacitebo myaaka 6 yakushalwa. Wakaamba ayi: “Ici cakampa kulinyumfwa cibiibi abuumbi.” Ndyaakalinga kukula, Nabiha wakaba muntu ufwambaana kukalala alimwi shilunkutwe. Wakatalika kuulisha misamu ikola lyalo wakacatwa akubikwa mujeele. Bakamboni bakalinga kufwakashila bantu bamujeele bakatalika kumwiisha Baibo. Nabiha wakatalika kwaalula buumi bwakwe. Wakaamba ayi: “Cakalinga cuubu kucileka mibo imwi itabete kabotu, sombi cakanjumina abuumbi nkucileka kufweba.” Nabiha wakacikonsha kucileka kufweba pesule lyakusebensa cankusu kwa mwaaka womwi. Ino nciinshi cakamucafwa? Wakaamba ayi: “Cinene cakancafwa abuumbi nkupaila kuli Yehova lyoonse kwaamba ayi ancaafwe kucileka kufweba.” Aboobo pacecino ciindi alayuminisha bamwi ayi: “Ndishomete cakutatoonsha kwaamba ayi na nebo ndakacikonsha kwaalula buumi bwangu kwaamba ayi nsangalashe Yehova, nkokwaamba ayi uli woonse inga wacikonsha!” *
INGA MWEELELA KUBOMBEKWA!
18. Kweelana a 1 Bene Kolinto 6:9-11, ino nshiinshi basebenshi bakwe Lesa baanji nshebakacikonsha kucita?
18 Muciindi ca batumwi, bantu bamwi Yehova mbwaakasala kuya mukulela pomwi a Klistu bakalinga kucita shintu shibiibi kabatana kuba Beneklistu. Kucakubonenaako, bamwi bakalinga beshibulale, basankwa boonana abasankwanyinaabo na banakashi boonana abanakashinyinaabo, alimwi bamwi bakalinga beepi. Nacibi boobo, kwiinda mulucafwo lwa mushimu usalashi, bakacikonsha kwaalula mibo yabo. (Amubelenge 1 Bene Kolinto 6:9-11.) Ubu mbocibete amunshiku shino, Baibo yacafwa bantu baanji kwaalula buumi bwabo. * Bakacileka mibo itabete kabotu yatakalinga yuubu kucileka. Cakubonenaako cabo cilatondesha kwaamba ayi amwebo inga mwacikonsha kwaalula buumi bwanu akucileka mibo itabete kabotu kwaamba ayi mweelele kubombekwa.
19. Ino tulaakwiiya nshi mumutwi utokonkelaawo?
19 Kwiilika pakufuula buntu bwakale kale, abo basuni kubombekwa balyeelete kusebensa cankusu kwaamba ayi bafwale buntu bupya. Mumutwi utokonkelaawo tulaakwiiya mbweenga twacita boobo ambweenga bamwi batucafwa.
LWIIMBO 41 Amunyumfwe Mupailo Wangu
^ Kwaamba ayi tweelele kubombekwa, tulyeelete kuba balibambite kwaalula mibo yesu. Mumutwi uyu tutokwiiya mibo itondesha buntu bwakale kale, ncotuyandikila kucileka mibo iyo, alimwi ansheenga twaciita kwaamba ayi tucileke mibo iyo. Mumutwi utokonkelaawo tulaakwiiya mbweenga twatolelela kufwala buntu bupya, nabi pesule lyakubombekwa.
^ KUSANSULULA MASWI: “Kufuula buntu bwakale kale” cilaamba kuleya miyeeyo itabete kabotu akucileka mibo itasangalashi Yehova. Tulatalika kucita boobo katutana kubombekwa.—Efe. 4:22.
^ Kwaamba ayi mushibilewo makani aamwi, amubone mutwi utokwaamba ayi “Baibo Ilaalula Buumi bwa Muntu—‘Ndakalinga Kusuni Kuboolela Kuli Yehova,’” mu Njashi Yamulindilishi yamu Chitonga ya April 1, 2012.
^ Kwaamba ayi mushibilewo makani aamwi, amubone mutwi utokwaamba ayi “Baibo Ilaalula Buumi bwa Muntu—‘Bakantondesha Nkumbu Abuumbi,’” mu Njashi Yamulindilishi yamu Chitonga ya May 1, 2012.
^ Kwaamba ayi mushibilewo makani aamwi, amubone mutwi utokwaamba ayi “Baibo Ilaalula Buumi bwa Muntu—‘Ndakalinga Mwanakashi Ufwambaana Kukalala Alimwi Ushilunkutwe,’” mu Njashi Yamulindilishi yamu Cisungu ya October 1, 2012.
^ Amubone kabokosi kacite mutwi utokwaamba ayi “ Baibo Ilaalula Buumi bwa Muntu.”
^ BUSANSULUSHI BWACIKOPE: Kuleya miyeeyo amibo itabete kabotu kuli anga nkufuula cakufwala cakale kale.
