1-2. Ino nciinshi cipa kwaamba ayi Lesa atambule kulambila kwesu?

 INO nciinshi cisa mumiyeeyo na mwanyumfwa liswi lyakwaamba ayi “kulambila”? Mpashi mulayeeya mukwesu wafukama akupaila kuli Yehova kaatana kuya mukoona. Na mpashi mulayeeya mukwashi utoosangalala ndyebatokwiiya Baibo.

² Bukaalo boonse bobilo butotondesha shicitwa pakulambila Yehova. Sa Yehova alaakutambula kulambila kwabo? Inga wakutambula na batoocita kweelana akuyanda kwakwe akutondesha lusuno abulemu. Tulimusuni abuumbi Yehova. Tulicishi kwaamba ayi ngoweelela kulambilwa, alimwi tulisuni kumulambila munshila ibotu kwiindaawo.

3. Ino tutokwiiya nshi mumutwi uyu?

³ Mumutwi uyu tutokwiiya kulambila Yehova nkwaakalinga kutambula muciindi cakale kale, akubona nshila 8 Yehova mbwaasuni ayi tunoomulambila. Ndyetutokwiiya panshila ishi, soonse inga twayeeya nsheenga twacita kwaamba ayi tutole panembo kulambila kwesu. Tutokwiiya acipa kwaamba ayi kulambila Yehova kutupe kuba alusangalalo.

4. Ino abo bakalinga kulambila Yehova paciindi Beneklistu kabatana kubaako bakatondesha buyani bulemu alusuno lwabo pali Yehova?

⁴ Paciindi Beneklistu kabatana kubaako, basankwa bashomeka mbuli Abelo, Nowa, Abulaamu alimwi a Jobo bakatondesha bulemu alusuno lwabo pali Yehova. Munshila nshi? Bakacita boobo kwiinda mukunyumfwila Lesa, kumushoma, alimwi akubenga milambu kuli nguwe. Baibo tayaambiwo makani oonse anshobakalinga kucita. Sombi bakacita nshobakalinga  kucikonsha kwaamba ayi balemeke Yehova, aboobo Yehova wakatambula kulambila kwabo. Lyalo mukuya kwaciindi Yehova wakapa bene Isilaeli Mulawo kwiinda muli Mose. Milawo iyi yakeelikaawo ambwaakalinga kusuni ayi banoomulambila.

5. Ino Yehova wakalinga kusuni ayi bashikwiiya bakwe Yesu banoomupaila buyani?

⁵ Pesule lyakufwa kwakwe Yesu akubushikwa, Yehova taakalinga kulangila bantu kukonkela Mulawo wakwe Mose. (Loma. 10:4) Beneklistu bakalinga kweelete kukonkela mulawo upya, “mulawo wakwe Klistu.” (Gala. 6:2) Tabakalinga kweelete kunyumfwila “mulawo” uyu kwiinda mukuwiibaluka akukonkela mulongo wa nshobakalinga kweelete kucita anshobatakalinga kweelete sobwe. Bakalinga kweelete kunyumfwila mulawo uyu kwiinda mukukonkela cakubonenaako cakwe Yesu anshaakalinga kwiisha. Amunshiku shino Beneklistu abalo baleelesha cankusu kukonkela Klistu kwaamba ayi basangalashe Yehova, lyalo ‘akuyuminishikwa.’—Mate. 11:29.

6. Ino nshiinshi nsheenga twaciita kwaamba ayi nshetutokwiiya mumutwi uyu shitucaafwe?

⁶ Ndyetutoobandika lubasu lomwi alomwi lwakulambila kwesu, amuliipushe ayi, ‘Ino nshiinshi nshendacitaawo palubasu ulu?’ Alimwi mpashi inga mwaliipusha ayi, ‘Sa kuli nsheenga ndayandika kusebenselaawo?’ Mulyeelete kulinyumfwa kabotu ceebo cakuya panembo kwanu, nacibi boobo, mulyeelete kupaila kwaamba ayi Yehova amucaafwe kubona nsheenga mwayandika kusebenselaawo.

7. Ino Yehova alaibona buyani mipailo yesu yakuswa panshi lya moyo?

⁷ Tulalambila Yehova ndyetutoopaila kuli nguwe. Malembo alakoshanisha mipailo kutununkila kabotu twakabambwa kabotu twakalinga kupekwa patente yakulambililaamo, lyalo mukuya kwaciindi pa tempele. (Kulu. 141:2) Tununkila kabotu utu twakalinga kukusha bweema busangalasha kuli Lesa. Ayalo mipailo yesu yakuswa panshi lya moyo ‘ilamusangalasha’ nabi twaambabo maswi aniini. (Tus. 15:8; Duto. 33:10) Inga twashooma kwaamba ayi Yehova alanyumfwa kabotu kukutika ndyetutokwaamba mbotumusuni akumulumba. Alisuni kwaamba ayi tunoomulwiita shitusukamika, nshetutoolangila alimwi ashintu nshetusuni. Katutana kutalika kubandika a Yehova mumupailo, inga cabota kutaanguna kuyeeya cakubikila maano nsheshi twaambe. Kucita boobo kulaakumucafwa kupa Ishiwanu wakwiculu ‘tununkila kabotu’ tubotu kwiindaawo.

8. Ino ncoolwe nshi ncetucite cakulumbaisha Lesa?

⁸ Tulalambila Yehova kwiinda mukumulumbaisha. (Kulu. 34:1) Tulalumbaisha Yehova kwiinda mukulwiitako bamwi mbotumusuni alimwi ambotukumbwa mibo yakwe ibotu abuumbi ashintu nshaacita. Tulaakuba ashiiinji shibotu shakwaamba pali Yehova na katumulumba. Kukutumana kuyeeya pashintu shibotu Yehova nshaatucitila kulaakutucafwa kumulumbaisha. Incito yakushimikila ilatupa coolwe cibotu “cakupa kuli Lesa mulambu wakulumbaisha, nkokwaamba ayi, cisepo ca milomo yesu.” (Ebu. 13:15) Bweenka mbotuyandika kutaanguna kuyeeya cakubikila maano katutana kubandika a Yehova mumupailo, inga cabota kutaanguna kuyeeyawo cakubikila maano katutana kutalika kushimikila muntu. Tulisuni kupa ‘mulambu wakulumbaisha’ ubotu kwiindaawo. Aboobo tulaamba camoyo woonse ndyetutooshimikila bamwi cancine.

9. Ino kucanika kumabungano kulatucafwa buyani bweenka mbuli mbocakalinga ku bene Isilaeli? Amwaambe cakubonenaako mabungano mbwamucafwa.

 ⁹ Tulalambila Yehova ndyetucanika kumabungano. Bene Isilaeli bakale kale bakalwiitikwa ayi: ‘Basankwa boonse balyeelete kwisa kumusena womwi wakulambililaako mukulambila Yehova Lesa, Lesa wanu mankanda otatwe mumwaaka.’ (Duto. 16:16) Bakalinga kweelete kushiya maanda amyuunda yabo kwakubula umwi wakushilindilila. Nacibi boobo, Yehova wakabashomesha ayi: ‘Taaku nabi womwi weshi akeeleshe kukoma cishi canu paciindi cakusekelela.’ (Kulo. 34:24) Mukwiinga bene Isilaeli bakashoma muli Yehova cakumaninina, bakalinga kucikonsha kuya mukusekelela kwa mwaaka amwaaka, alimwi ici cakabacafwa munshila shiinji. Kucakubonenaako bakalinga kwiiya shiinji pa Mulawo wakwe Lesa, kuyeeya pashintu shibotu Yehova nshaakabacitila alimwi bakalinga kusangalala kuba pomwi abashominyinaabo. (Duto. 16:15) Aswebo mbotucafwikwa na twacita nsheenga twacikonsha kwaamba ayi tucanike kumabungano. Alimwi amuyeeyebo Yehova mbwasangalala na twalibambila kwaamba cikumbulo cifwiifwi alimwi cicafwa.

10. Ino nceebonshi kwiimba ndubasu luyandika abuumbi mukulambila kwesu?

¹⁰ Tulalambila Yehova ndyetutokwaabanamo lubasu mukwiimba. (Kulu. 28:7) Bene Isilaeli bakalinga kubona ayi kwiimba ndubasu luyandika abuumbi lwakulambila. Mwaami Defedi wakasala bene Lefi bali 288 kwaamba ayi babe beshikwiimba mutempele. (1 Maka. 25:1, 6-8) Munshiku shino inga twatondesha ayi tulisuni Lesa kwiinda mukwiimba nyimbo shakulumbaisha. Tatuyandiki kuba aliswi libotu kwaamba ayi tucikoonshe kucita boobo. Amuyeeye pacikoshanyo ici: Ndyetutokwaamba, “soonse tulabisha mushintu shiinji,” sombi ico tacitupi kwaamba ayi tucileeke kwaamba mulibungano amuncito yakushimikila. (Jemu. 3:2) Ubu bweenka mbocibete akwiimba, inga twacikonsha kulumbaisha Yehova munyimbo nabi tulalibona anga tatucishiiwo kwiimba kabotu.

11. Kweelana a Kulumbaisha 48:13, ino nceebonshi tulyeelete kuba aciindi cakwiiya Baibo mbuli mukwashi?

¹¹ Tulalambila Yehova kwiinda mukwiiya Maswi akwe alimwi akwiisha bana besu pali nguwe. Pa bushiku bwa Sabata bene Isilaeli tabakalinga kusebensa, aboobo bakalinga kusebensesha bushiku ubu kuyumya bushicibusa bwabo a Yehova. (Kulo. 31:16, 17) Abo bakalinga kushomeka, bakalinga kwiisha bana babo pali Yehova apashintu shibotu nshaakabacitila. Aswebo munshiku shino tulyeelete kuba aciindi cakwiiya Maswi akwe Lesa. Kucita boobo ndubasu lwakulambila Yehova, alimwi kulatucafwa kuyumya bushicibusa bwesu anguwe. (Kulu. 73:28) Alimwi kwiiya pomwi mbuli mukwashi, inga kwacafwa bana besu kuyumya bushicibusa bwabo a Ishiwesu wakwiculu shilusuno.—Amubelenge Kulumbaisha 48:13.

12. Ino nshiinshi nsheenga tweeya kuli Yehova mbwaakalinga kubona ncito yakuyaka shintu shamu tente yakulambililaamo?

¹² Tulalambila Yehova kwiinda mukuyaka akulama kabotu misena motupailila. Baibo ilaamba ayi incito yakuyaka tente yakulambililaamo ashintu shakalinga mukati yakalinga “ncito isalalite.” (Kulo. 36:1, 4) Amunshiku shino, Yehova alabona ncito yakuyaka Maanda a Bwaami amisena imwi njetusebensesha muncito yakwe Lesa mbuli ncito isalalite. Bamakwesu abenankashi bamwi balaabanamo lubasu muncito iyi. Tulalumba abuumbi pakulyaaba kwabo muncito iyi ya Bwaami iyandika abuumbi. Alimwi balaabanamo lubasu  amuncito yakushimikila. Bamwi inga basuna kuba abapainiya. Bamanene mulibungano inga bacafwilisha muncito yakuyaka kwiinda mukutawayawaya kusuminisha bamakwesu abenankashi aba basebensa cankusu kwaamba ayi babe bapainiya na kabeelela. Inga caba ayi tulicite lushibo mumakani akuyaka nabi sobwe, soonse inga twaabanamo lubasu mukubotesha akulama kabotu misena iyi.

13. Ino shabupe nshetupa mukuliyandila shakucafwilisha muncito ya Bwaami tulyeelete kushibona buyani?

¹³ Tulalambila Yehova kwiinda mukupa shabupe shakucafwilisha ncito ya Bwaami. Bene Isilaeli bakalinga kulangilwa kuleta cabupe kuli Yehova ndyebatoosa kukubungana kwa kusekelela. (Duto. 16:16) Bakalinga kweelete kuleta cabupe nceenga bacikonsha kweelana abukaalo bwabo. Kucita boobo kwakalinga kutondesha kulumba kwabo pashintu shoonse Yehova nshaakalinga kubacitila. Ino inga twatondesha buyani ayi tulalumba pashintu shoonse Yehova nshaatucitila? Nshila yomwi nkwiinda mukupa maali mukuliyandila akucafwilisha libungano linemishaanu anciito ya nsengwe yoonse, kweelana abukaalo bwanu. Mutumwi Paulo wakaamba ayi: “Mukwiinga na cakutaanguna muntu kaalibambite, ico ncaapa cilatambulwa na wacipa kweelana anshaacite, kuteshi kweelana anshaatacite.” (2 Koli. 8:4, 12, NWT) Yehova alakondwa abuumbi na twapa kuswa panshi lya moyo kali koonse nakaceyi.—Maako 12:42-44; 2 Koli. 9:7.

14. Kweelana a Tushimpi 19:17, ino Yehova alalubona buyani lucafwo ndotupa Beneklistunyineesu babulishite?

¹⁴ Tulalambila Yehova kwiinda mukucafwilisha Beneklistunyineesu babulishite. Yehova wakashomesha ayi alaakubapa cilambu bene Isilaeli bakalinga kutondesha bwaabi kubakandu. (Duto. 15:7, 10) Aboobo aswebo na twacafwa mushominyineesu ubulishite, Yehova alabona ayi twapa cipo kuli nguwe. (Amubelenge Tushimpi 19:17.) Kucakubonenaako, Beneklistu baku Filipi ndyebakatuma shipo kuli Paulo ndyaakalinga mujeele, Paulo wakaamba ayi shakalinga anga ngu “mulambu uyo utambulwa kuli Lesa alimwi ukondelesha.” (Filip. 4:18) Aboobo amuyeeye pabaabo bali mulibungano akuliipusha ayi, ‘Sa kuli umwi ngweenga ndacaafwa?’ Yehova alasangalala na katusebensesha ciindi, nkusu, lushibo alimwi ashintu shesu kucafwa baabo babulishite. Kucita boobo alakubona ayi ndubasu lwakulambila kwesu.—Jemu. 1:27.

15. Ino nceebonshi kulambila kwancine takubete anga ngumukuli ulemya nabi kwaamba ayi kulayandika ciindi ankusu?

¹⁵ Kulambila kwancine kulayandika ciindi akusebensa cankusu. Sombi takubete anga ngumukuli ulemya. (1 Joni 5:3) Ino nceebonshi? Nceebo cakwaamba ayi tulalambila Yehova ceebo calusuno ndotucite pali nguwe. Amuyeeye ayi mwaana muniini alisuni kupa baishi cintu cimwi. Mpashi inga watola ciindi cilaamfu kulemba cikope ncaasuni kupa baishi mbuli cipo. Mwaana talinyumfwi cibiibi ceebo ca ciindi ncaasebensesha kubamba cipo ico. Alibasuni baishi, aboobo alikondetwe kubapa cipo. Aswebo mukwiinga tulisuni Yehova, tulikondetwe kusebensesha ciindi ankusu shesu mukulambila kwancine.

16. Kweelana a Bene Ebulu 6:10, ino Yehova alalinyumfwa buyani pashintu womwi awomwi nshaacikonsha kucita kwaamba ayi amulengeshe kukondwa?

¹⁶ Bashali basuni bana babo tabalangili kutambula shipo sheelene kuswa ku mwaana womwi awomwi. Balicishi kwaamba ayi baana boonse balipusene mushintu nsheenga bacikonsha.  Ubu mbocibete akuli Ishiwesu wakwiculu, alicishi nsheenga womwi awomwi wacikonsha kucita. Mpashi inga mwacikonsha kucita shiinji kwiinda bamwi mbomushi alimwi mbomusuni. Na mpashi inga tamucikoonshi kucita shiinji kweelana abamwi mbweenga bacikonsha, mpashi ceebo cakukula, kuciswa, na mikuli mumukwashi. Mutalinyumfwi cibiibi. (Gala. 6:4) Yehova teshi akalube ncito yanu. Yehova alakondwa kulilabo na kamusebensa kushika peela nkusu shanu alimwi aluyaando luli kabotu. (Amubelenge Bene Ebulu 6:10.) Yehova alabona moyo wanu nshoosuni. Alisuni kwaamba ayi munoosangalala anshemucikonsha kucita ndyemutoomulambila.

17. (a) Ino inga twacita buyani na kuli mbasu shimwi shakulambila kwesu shituyumina? (b) Ino ndubasu nshi lwakamucafwa lwatondeshekwa mukabokosi kacite mutwi utokwaamba ayi “ Sheenga Shamucafwa Kutolelela Kuba Basangalete,” alimwi ino lwakamucafwa buyani?

¹⁷ Ino inga twacita buyani na cilatubeta ciyumu kucita shintu nshotweeya mbuli kucita ciiyo capalweesu na kushimikila? Na lyoonse katucita shintu ishi tulaakutalika kusangalala akubona mboshicafwa. Kulambila kwesu inga twakukoshanisha kukucita shintu shiyumya mubili na kwiiya kucita cintu cimwi. Na katutaciti shintu isho lyoonse, inga twaalilwa kuya panembo. Ano ino mbuyani na twabika bubaambo bwakunoocita cintu ico bushiku abushiku? Mpashi ndyetutotalikabo inga katutola ciindi ciniinibo, lyalo akunooya cinungaako paniini paniini. Ncakutatoonsha kwaamba ayi na twabona bubotu buliimo inga twatalika kulangila ciindi ndyetucita cintu ico akusangalala ndyetutoocita boobo. Ubu mbocibete amukulambila kwesu.

18. Ino nciinshi ciyandika abuumbi nceenga twaciita, alimwi ino nshiinshi sheshi shikasweemo?

¹⁸ Kulambila Yehova amoyo wesu woonse kulatucafwa kukumanisha luyaando ndwaakatulengela. Aboobo kukumanisha luyaando ulu kulatupa kuba basangalete, kukwana mubuumi akulangila kulambila Yehova kwamuyayaya. (Tus. 10:22) Tulalinyumfwa kuba aluumuno mukwiinga tulishi kwaamba ayi Yehova alatucafwa ndyetutokwiinda mumapensho. (Isa. 41:9, 10) Aboobo tulyeelete kuba basangalete kulambila Ishiwesu shilusuno, uyo weelela kupekwa “bulemu” kuswa ku shilengwa shakwe shoonse!—Ciyu. 4:11.