1. Ino nciinshi cisangalasha cakalinga kusa mukucitika kuba Juda bakalinga mubusha?

 BA JUDA bakasangalala abuumbi. Yehova “wakapa kwaamba ayi Sailasi Mwaami wa bene Pesha” aangulule bene Isilaeli, abo bakalinga mubusha mucishi ca Babiloni kwamyaaka iinji. Mwaami wakaambilisha ayi ba Juda baboolele kucishi cinemishaabo ‘mukuyaka ŋanda yakwe Yehova Lesa wa bene Isilaeli.’ (Esila 1:1, 3) Aya akalinga makani asangalasha abuumbi! Ici cakalinga kusansulula ayi bene Isilaeli balaakucikonsha kulambila Lesa wancine alimwi mucishi Lesa ncaakabapa.

2. Ino nciinshi ba Juda bakalinga mubusha ncobakataanguna kucita ndyebakashikabo ku Jelusalemu?

² Mu mwaaka wa 537 B.C.E., likoto lyakutaanguna lya ba Juda, bakashika ku Jelusalemu ndabala inene yakalinga kulubasu lwakumalenge mu Bwaami bwa ba Juda. Ndyebakashikabo bakatalika kuyaka tempele, aboobo kushika mu mwaaka wa 536 B.C.E., bakamanisha kuyaka lwiimbi!

3. Ino mbaani bakalinga kupikisha ba Juda, alimwi ino bakacita buyani ubo?

³ Pesule lyakutalikabo kuyaka tempele, bantu baanji bakatalika kupikisha ba Juda. Bantu bamushishi shakalinga kubashingulukite ‘bakatalika kulefula ba Juda akubaloondesha ayi batatoleleli kuyaka.’ (Esila 4:4) Ubu bwakalinga bukaalo buyumu kuba Juda alimwi shintu shakabicilaako abuumbi. Mu mwaaka wa 522 B.C.E., Atasakisesi wakaba mwaami mupya wa bene Pesha. * Aboobo abo bakalinga kupikisha ba Juda bakabona ayi ici ncecoolwe cakwaamba ayi bakashe ba Juda kutatolelela anciito yakuyaka. Bakalinga kusuni ‘kubaletela mapensho kwiinda mukusebensesha mulawo.’ (Kulu. 94:20) Bakatuma nkalata ku Mwaami Atasakisesi yakwaamba ayi ba Juda balisuni kumubukila. (Esila 4:11-16) Mwaami wakashoma bubeshi ubu akupa mulawo wakwaamba ayi bacileeke kuyaka. (Esila 4:17-23) Aboobo ba Juda bakacileka ncito yakuyaka.—Esila 4:24.

4. Ino Yehova wakacita buyani beshikupikisha ndyebakakasha ncito yakuyaka tempele? (Isaya 55:11)

 ⁴ Bantu batakalinga kupaila Yehova alimwi abamwi bamumfulumeende ya bene Pesha bakalinga kushinishite kukasha ncito yakuyaka cipya tempele. Nacibi boobo, Yehova wakalinga kusuni ayi ba Juda batolelele kuyaka cipya tempele. Alimwi lyoonse alakumanisha kuyanda kwakwe. (Amubelenge Isaya 55:11.) Wakasala Sekaliya kuba mushinshimi wakwe akumutondesha shili anga nshiloto shisangalasha shili 8. Lyalo Sekaliya wakalinga kweelete kulwiita ba Juda pamakani ashili anga nshiloto isho kwaamba ayi abayuminishe. Shili anga nshiloto isho shakacafwa ba Juda kushiba kwaamba ayi tabakalinga kweelete kuloonda baabo bakalinga kubapikisha. Aboobo wakabayuminisha kutolelela kusebensa ncito Yehova njaakalinga kusuni ayi bakumanishe. Mucili anga nciloto ca namba 5, Sekaliya wakabona cakubikawo malampi alimwi ashisamu sha maolifi shobilo.

5. Ino tutokwiiya nshi mumutwi uyu?

⁵ Soonse cimwi ciindi tulalinyumfwa kulefuka. Aboobo inga twayuminishikwa kwiiya Yehova mbwakayuminisha bene Isilaeli kwiinda mucili anga nciloto ca namba 5 Sekaliya ncaakabona. Kunyumfwishisha cili anga nciloto ici inga kwatucafwa kutolelela kusebensela Yehova cakushomeka nabi ndyetutopikishikwa, bukaalo bwesu ndyebwaaluka alimwi andyetwatambula butanjilishi mbotutatonyumfwishisha.

6. Ino cili anga nciloto cakalinga kutondesha cakubikawo malampi ashisamu sha maolifi shobilo cakaambwa pa Sekaliya 4:1-3 cakacafwa buyani ba Juda kutaloonda? (Amubone cikope cili papeeji yakutaanguna.)

⁶ Amubelenge Sekaliya 4:1-3. Cili anga nciloto cakalinga kutondesha cakubikawo malampi ashisamu sha maolifi shobilo cakacafwa ba Juda kutolelela anciito yabo nabi ndyebakalinga kupikishikwa. Munshila nshi? Sa mwabona kwaamba ayi cakubikawo malampi cakatolelela kunyaka? Mafuta akalinga kuswa kushisamu sha maolifi shobilo akalinga kulokela mucili anga ni mbale ifongomene. Lyalo mafuta ayo akalinga kupa kwaamba ayi malampi ali 7 ayo akalinga pa cakubikawo malampi, atolelele kunyaka kwakubula kushimika. Sekaliya wakeepusha ayi: “Ino shintu ishi shilaamba nshi?” Munjelo wakakumbula kwiinda mukwaamba maswi aya akaswa kuli Yehova: ‘‘Teshi ukakome ceebo ca nkusu sha bashilumamba nabi nkusu shako omwiine, sombi ulaakukoma ceebo ca mushimu wangu,’ mbwaamba Yehova Shinkusu shoonse.’ (Seka. 4:4, 6) Mafuta akalinga kuswa kushisamu akalinga kwiimikaninaako nkusu shitamaani sha mushimu usalashi wakwe Yehova. Mushimu usalashi wakwe Lesa wakalinga kucite nkusu kwiinda bashilumamba ba nkusu ba bene Pesha. Mukwiinga Yehova wakalinga kulubasu lwa baabo bakalinga kuyaka tempele, bakalinga kusa mukumanisha kuyaka nabi ndyebakalinga kupikishikwa. Aya akalinga makani ayuminisha abuumbi! Cinene ba Juda ncobakalinga kweelete kucita nkucinkabo manungo muli Yehova akutalika alimwi kusebensa. Ishi nshobakacita nabi kwaamba ayi incito yakuyaka yakakashikwa.

7. Ino nciinshi cakacitika cakacafwa ba Juda ndyebakalinga kuyaka tempele?

⁷ Ba Juda bakalinga kuyaka tempele bakayuminishikwa shintu ndyeshakaaluka. Ino nshiinshi shakaaluka? Mu mwaaka wa 520 B.C.E., mwaami mupya Dalyasi I, wakatalika kweendelesha bene Pesha. Mu mwaaka wabili wabweendeleshi bwakwe, wakesa mukushiba kwaamba ayi kukashikwa kwa ncito yakuyaka tempele takuna kucitwa kweelana amulawo. Aboobo Dalyasi wakaamba ayi incito ilyeelete kutolelela. (Esila 6:1-3) Bantu boonse bakakankamana ashakaamba mwaami. Nacibi boobo, mwaami taakwe kweelabo pakusuminisha ayi incito yakuyaka itolelele. Sombi wakapa amulawo wakwaamba ayi abo boonse bakalinga kupikisha ba Juda bacileeke. Alimwi wakapa amulawo wakwaamba ayi bakalinga kweelete kupa maali ashintu shoonse shakalinga kuyandika kwaamba ayi incito yakuyaka tempele imane!  (Esila 6:7-12) Ici cakapa kwaamba ayi ba Juda bamanishe ncito yakuyaka tempele mu mwaaka wa 515 B.C.E, pesule lya myaaka iindilila 4.—Esila 6:15.

8. Ino nceebonshi tamweelete kuloonda ndyemutoopikishikwa?

⁸ Munshiku shino, Bakamboni Bakwe Yehova baanji abalo balapikishikwa. Kucakubonenaako, mushishi shimwi mfulumeende shakakasha ncito yesu. Mushishi isho, mpashi bamakwesu inga bacatwa kubakapokola ‘akutolwa kubaleli abamaami’ kwaamba ayi bakape bumboni. (Mate. 10:17, 18) Cimwi ciindi na kwesa mfulumeende ipya bamakwesu abenankashi balaba alwaanguluko lwakulambila. Na mpashi moomboloshi uli kabotu inga woombolosha munshila yeenga yapa kwaamba ayi tube alwaanguluko lwakulambila. Bakamboni bamwi balapikishikwa munshila ipuseneeko. Nabi kwaamba ayi balekala mucishi muli lwaanguluko lwakulambila Yehova, balapikishikwa kuswa kubeshikamukowa batasuniiwo kwaamba ayi banoosebensela Lesa. (Mate. 10:32-36) Liinji na beshikamukowa babona ayi kupikisha kwabo taaku ncekutookumanisha, balacileka kucita boobo. Alimwi cimwi ciindi cicitika ncakwaamba ayi bamwi beshikupikisha abuumbi balesa mukwiiya cancine akuba Bakamboni basebensa cankusu. Aboobo mutabooleli mwisule na kuloonda ndyemutoopikishikwa. Yehova alaakumucafwa kwiinda munkusu shakwe sha mushimu usalashi, aboobo mutaloondi cili coonse!

9. Ino nceebonshi ba Juda bamwi bakalila ndyebakabona lwiimbi lwa tempele ipya?

⁹ Lwiimbi lwa tempele ipya ndyelwakayakwa, ba Juda bamwi bacinene bakalila. (Esila 3:12) Bakalingaako paciindi Solomoni ndyaakayaka tempele ibotu abuumbi, aboobo bakalinyumfwa ayi tempele ipya njobakalinga kuyaka tayakalinga kusa mukuboneka bwakalinga kuboneka yakale kale. (Aga. 2:2, 3) Bakalinyumfwa cibiibi abuumbi mukwiinga bakalinga kweelanisha tempele ipya ku yakale kale. Aboobo cili anga nciloto Sekaliya ncaakabona cakalinga kusa mukubacafwa kuba alusangalalo alimwi. Munshila nshi?

10. Ino maswi akaamba munjelo alembetwe palilembo lya Sekaliya 4:8-10 akabayuminisha buyani ba Juda?

¹⁰ Amubelenge Sekaliya 4:8-10. Ino munjelo wakalinga kusansulula nshi ndyaakaamba ayi ba Juda “balaakukondwa akubona cipimo cakupimina bulaamfu bwa cintu kacili mulyaansa lya [mweendeleshi waba Juda] Selubabelo”? Maswi akwaamba ayi “cipimo cakupimina” alasansulula cakupimisha cisebenseshekwa kwaamba ayi muntu abone na cintu cimwi ciliimfwi kabotu. Aboobo munjelo wakalinga kuyuminisha bantu bakwe Lesa kushiba kwaamba ayi nabi tempele yakalinga  kuboneka iniini payeeyo yakalingaako kale kale, ilaakumana alimwi ilaakuba kweelana a Yehova mbwaasuni. Yehova wakalinga kusa mukukondwa pa tempele iyo, aboobo ba Juda abalo bakalinga kweelete kukondwa. Cakalinga kuyandika abuumbi kuli Yehova nkumulambila kweelana akuyanda kwakwe mu tempele ipya. Cakalinga kweelete kupa ba Juda kuba alusangalalo alimwi, nkubikila maano kukulambila Yehova kweelana akuyanda kwakwe akucita shimusangalasha.

11. Ino nciinshi ciyumina basebenshi bakwe Yehova bamwi munshiku shino?

¹¹ Buunji bwandiswe cilatuyumina na shintu shaaluka mubuumi. Bamwi bakalinga muncito yaciindi coonse ilibetele kwamyaaka iinji, bakapekwa ncito ipya. Bamwi bakacileka kusebensa mikuli imwi njobakalinga kusuni abuumbi ceebo cakukula. Cilibo kabotu kulinyumfwa cibiibi na ca mushobo uyu catucitikila. Pakutaanguna inga caba ciyumu kunyumfwishisha na kusumina. Inga katuyeeya anga shintu shakalinga kabotu bukaalo kabutana kwaaluka. Alimwi ici inga catupa kulinyumfwa kulefuka akutalika kuyeeya ayi inga tatucikoonshi ano kucita shiinji muncito yakwe Yehova. (Tus. 24:10) Ino Sekaliya nshaakabona mucili anga nciloto inga shatucafwa buyani kutolelela kucita nsheenga twacikonsha muncito yakwe Lesa?

12. Ino cili anga nciloto Sekaliya ncaakabona inga catucafwa buyani kutolelela kuba basangalete nabi bukaalo bwesu ndyebwaaluka?

¹² Inga catubeta cuubu kushibila na shintu shaaluka mubuumi bwesu, na katubona bukaalo bwesu bweenka mbuli Yehova mbwaabubona. Atookumanisha shintu shiinji abuumbi munshiku shino, alimwi tulicite coolwe cinene cakusebensa pomwi anguwe. (1 Koli. 3:9) Nabi kwaamba ayi mikuli yesu inga yaaluka, lusuno lwakwe Yehova pali ndiswe talwaalukiiwo. Aboobo na kwaaluka kwa shintu mulibunga kwamukuma, amuleye kuyeeya bunene pacakapa kwaamba ayi kube kwaaluka uko. Muciindi cakunoyeeya buumi bwanu mbobwakalinga ‘munshiku shakale kale,’ amupaile kwaamba ayi Yehova amucaafwe kubonamo bubotu mukwaaluka kwa bukaalo bwanu. (Shiku. 7:10) Muciindi cakuyeeya pashintu nsheenga tamucikoonshi kucita, amuyeeye pasheesho nsheenga mwacikonsha. Cili anga nciloto Sekaliya ncaakabona citootucafwa kwiiya kuyandika kwa kutolelela kubona shintu munshila ili kabotu. Kucita boobo kulaakutucafwa kutolelela kuba basangalete nabi bukaalo bwesu ndyebwaaluka.

13. Ino nceebonshi bene Isilaeli bamwi bakayeeya ayi muyeeyo wakutalika alimwi kuyaka tempele tawakalinga kabotu?

¹³ Nabi kwaamba ayi incito yakuyaka cipya  tempele yakalinga yakashikwa, basankwa bakalinga kutanjilila mbuli Mupailishi Munene Jeshuwa (Joshuwa) alimwi amweendeleshi Selubabelo—“bakatalika kuyaka alimwi ŋanda yakwe Lesa.” (Esila 5:1, 2) Kuba Juda bamwi kucita boobo kwakaboneka anga takwakalinga kusalawo kabotu. Balwani bakalinga kubabona ayi batoyaka tempele. Aboobo bakalinga kucishi kwaamba ayi balaakucita shili shoonse kwaamba ayi babakaashe. Joshuwa a Selubabelo basankwa bakalinga kutanjilila, bakalinga kuyandika kuyuminishikwa kwaamba ayi Yehova atoobacafwa. Alimwi bakayuminishikwa. Munshila nshi?

14. Kweelana a Sekaliya 4:12, 14, ino Joshuwa Mupailishi Munene a Mweendeleshi Selubabelo bakayuminishikwa buyani?

¹⁴ Amubelenge Sekaliya 4:12, 14. Mulubasu ulu lwa cili anga nciloto Sekaliya ncaakabona, munjelo wakayubulwita mushinshimi wakwe Lesa ushomeka ayi shisamu sha maolifi shobilo shakalinga kwiimikaninaako “bananikitwe bobilo,” nkokwaamba ayi Joshuwa a Selubabelo. Munjelo wakaamba ayi cakalinga anga basankwa bobilo aba ‘baliimfwi kulubasu lwa Mwaami wacishi coonse,’ Yehova. Ici cakalinga coolwe cinene abuumbi! Yehova wakalinga kubashoma. Aboobo abalo bene Isilaelinyinaabo bakalinga kweelete kushoma shili shoonse basankwa aba nshobakalinga kubalwiita kucita, mukwiinga Yehova wakalinga kutanjilila bene Isilaeli kwiinda mukusebensesha basankwa bobilo aba.

15. Ino inga twatondesha buyani bulemu kubutanjilishi bwakwe Yehova mbotutambula kuswa mu Maswi akwe?

¹⁵ Munshiku shino, Yehova watolelela kutanjilila bantu bakwe kwiinda mukusebensesha Maswi akwe, Baibo. Kwiinda mulibuku lyakwe ili lisalalite, Yehova alatulwiita mbweenga twamulambila munshila njaasuminisha. Ino inga twatondesha buyani bulemu kubutanjilishi mbotutambula kuswa mu Maswi akwe Lesa? Inga twacita boobo kwiinda mukwaabelenga cakubikila maano akweelesha kwaanyumfwishisha. Amuliipushe ayi: ‘Sa ndyentobelenga Baibo na mabuku aamba shamu Baibo ndakutumana akuyeeyawo? Sa ndeelesha kulangoola makani amwi kwaamba ayi nyumfwishishe kabotu cancine camu Baibo “ciyumu kunyumfwisha”? Na mpashi ndeendulukamobo cakufwambaana?’ (2 Pit. 3:16) Na katweelesha kukutumana kuyeeya pashintu Yehova nshatwiisha, tulaakucikonsha kukonkela butanjilishi bwakwe akukumanisha ncito yakushimikila.—1 Timo. 4:15, 16.

16. Ino nciinshi ceenga catucafwa kukonkela butanjilishi buswa ku ‘musebenshi ushomeka alimwi ucite maano’ nabi ndyetutana kubunyumfwishisha?

¹⁶ Nshila imwi Yehova mbwaatupa butanjilishi nkwiinda mu ‘musebenshi ushomeka alimwi ucite maano.’ (Mate. 24:45) Cimwi ciindi musebenshi  uyu inga watupa butanjilishi mbweenga twaalilwa kunyumfwishisha. Kucakubonenaako, inga twatambula butanjilishi bwakutucafwa kulibambila mapensho alicitikila nabi kwaamba ayi tulekala kumusena nkotubona ayi mapensho ayo inga taacitiki. Na mpashi inga twayeeya ayi musebenshi waciindilisha pamakani akulishitilisha paciindi ndyekuli bulwashi bunene. Ino nshiinshi nshotweelete kucita na twalinyumfwa ayi butanjilishi mbotwapekwa inga tabusebensiiwo? Inga twayeeya bene Isilaeli mbobakacafwikwa ndyebakakonkela butanjilishi mbobakapekwa kuswa kuli Joshuwa a Selubabelo. Inga twayeeya apamakani amwi ngotwakabelenga mu Baibo. Cimwi ciindi bantu bakwe Lesa bakalinga kutambula butanjilishi bwakalinga kuboneka anga inga tabucafwiwo kweelana akuyeeya kwa muntu, sombi mbobutanjilishi bwakapulusha buumi bwabo.—Boombo. 7:7; 8:10.

17. Ino cili anga nciloto cakalinga kutondesha cakubikawo malampi ashisamu sha maolifi shobilo cakabacafwa buyani ba Juda?

¹⁷ Nabi kwaamba ayi cili anga nciloto ca namba 5 Sekaliya ncaakabona cakalinga cifwiifwi, cakacafwa ba Juda kutolelela kusebensa cankusu muncito yabo amukulambila kwabo. Alimwi ndyebakakonkela nshobakeeya kuswa ku cili anga nciloto Sekaliya ncaakabona, bakabona Yehova mbwakabatanjilila akubacafwa mulusuno. Kwiinda munkusu shakwe sha mushimu usalashi, Yehova wakabacafwa kutolelela kusebensa ncito yabo akuba alusangalalo alimwi.—Esila 6:16.

18. Ino cili anga nciloto Sekaliya ncaakabona inga camucafwa buyani?

¹⁸ Cili anga nciloto cakalinga kutondesha cakubikawo malampi ashisamu sha maolifi shobilo Sekaliya ncaakabona inga camucafwa abuumbi mubuumi bwanu. Bweenka mbotweeya, inga camucafwa kuba ankusu shakuyuma ndyemutopikishikwa, kuba alusangalalo ciindi shintu ndyeshaaluka mubuumi bwanu, akumucafwa kushoma akukonkela butanjilishi mbweenga mwapekwa nabi tamuna kubunyumfwishisha. Ino nshiinshi nshomweelete kucita na mutokwiinda mumapensho mubuumi bwanu? Cakutaanguna, amubone Sekaliya ncaakabona, nkokwaamba ayi bumboni bwakwaamba ayi Yehova atoolama bantu bakwe. Lyalo amucite kweelana abumboni mbomutoobona kwiinda mukushoma muli Yehova akutolelela kumulambila amoyo wanu woonse. (Mate. 22:37) Na mwacita boobo, Yehova alaakumucafwa kumusebensela calusangalalo kwamuyayaya.—Kolo. 1:10, 11.