Bamwi bakabelengaawo makani aya kwakubula kwaalanga langa kabotu bakaliipushaawo mwiipusho uyu. Nacibi boobo, mavesi aya alaamba pabasankwa bobilo bakalinga kucite liina lya Mefibosheti, alimwi kuli cimwi nceenga tweeya kwiinda mukwiinduluka mushakacitika.

Saulo Mwaami wa bene Isilaeli wakalinga kucite baana basankwa bali 7 abaana banakashi bobilo. Mwanaakwe musankwa wakwiiya wakalinga Jonasani. Mukuya kwaciindi Saulo wakaba amwaana musankwa waliina lya Mefibosheti, uyo ngwakashalila muli Lispa kasuwa wakwe. Ano Jonasani alakwe wakalinga kucite mwaana musankwa waliina lya Mefibosheti. Aboobo Mwaami Saulo wakalinga kucite mwaana musankwa waliina lya Mefibosheti amwishikulu musankwa waliina lyomwi.

Paciindi cimwi, Mwaami Saulo wakapata bene Gibyoni abo bakalinga kukala pakati ka bene Isilaeli, aboobo wakalinga kusuni kubalobya boonse. Alimwi citoboneka ayi baanji bakacaikwa. Ici cakalinga cintu cibiibi. Ino nceebonshi? Nceebo cakwaamba ayi muciindi cakwe Joshuwa, bacinene ba bene Isilaeli bakapanga cipangano ca luumuno abene Gibyoni.—Joshu. 9:3-27.

Cipangano cilya cakalinga kunoocisebensa muciindi ca Mwaami Saulo. Mubupusano acipangano ncobakapangana, mwaami wakalinga kusuni kulobya bene Gibyoni boonse. Kucita boobo kwakalengesha kwaamba ayi “Saulo alimwi abamuŋanda yakwe bacite mulandu wakutila bulowa.” (2 Samwe. 21:1) Mukweelaako, Defedi wakaba mwaami. Bene Gibyoni bakapuluka bakamulwiita cilubo Saulo ncaakacita. Defedi wakabeepusha nsheenga wacita kwaamba ayi alipile pacilubo cinene Saulo ncaakacita alimwi akwaamba ayi Yehova abape shoolwe alimwi. Muciindi cakwaamba ayi basenge maali, bene Gibyoni bakasenga ayi abape baana bakwe Saulo bali 7 kwaamba ayi baye babacaaye. (Shakube. 35:30, 31) Defedi wakacita kweelana ambobakasenga.—2 Samwe. 21:2-6.

Paciindi ici, Saulo a Jonasani kabali bafwa kale munkondo. Nacibi boobo, Mefibosheti mwanaakwe Jonasani wakalinga kunoocili muumi. Wakalinga mulema ceebo cakwaamba ayi bakamulosha ndyaakalinga muniini, aboobo taakwe kwaabanamo lubasu mukulwana bene Gibyoni kwakacita bankambiyakwe. Defedi wakalinga wapangana cipangano ca bushicibusa a Jonasani, ico cakalinga kusa mukucafwa bamulunyungu lwakwe Jonasani, kwiilikaawo a Mefibosheti mwanaakwe musankwa. (1 Samwe. 18:1; 20:42) Baibo ilaamba ayi: ‘Mwaami Defedi wakatondesha nkuumbu Mefibosheti mwanaakwe Jonasani, mwishikulu wakwe Saulo ceebo ca cipangano ncobakapangana cakulumbila a Jonasani mwanaakwe Saulo, pameenso akwe Yehova.’—2 Samwe. 21:7.

Nacibi boobo, Defedi wakacita kweelana abene Gibyoni mbobakasenga. Wakaaba bana bakwe Saulo basankwa bobilo, womwi pabaabo wakalinga Mefibosheti, alimwi abeshikulu basankwa bakwe Saulo bali 5. (2 Samwe. 21:8, 9) Ncaakacita Defedi cakamana mulandu wabulowa.

Shakacitika ishi tashakalingabo makani akale kale sobwe. Mulawo wakwe Lesa wakaambila limwi patuba ayi: “Baana teshi bakacaikwe ceebo ca shibiibi sha bamashali babo.” (Duto. 24:16) Naakwiinga bana bakwe Saulo basankwa bobilo abeshikulu bakwe basankwa bosanwe tabakwe kwaabanamo lubasu mucilubo cakacita mushali wabo, naakwiinga Yehova taakwe kusuminisha ayi bacaikwe. Alimwi mulawo wakalinga kwaamba ayi: “Muntu womwi awomwi ulaakucaikwa ceebo cakubisha kwakwe mwiine.” Citooboneka kwaamba ayi bamulunyungu lwakwe Saulo bali 7 abo bakacaikwa, abalo bakaabanamo lubasu mucilubo cakacita Saulo cakuyanda kulobya bene Gibyoni boonse. Aboobo basankwa 7 aba bakacaikwa ceebo cakubisha kwabo.

Makani aya alatucafwa kwiiya cancine cakwaamba ayi na muntu wacita cibiibi inga taalekelelwi ceebo cakwaamba ayi wakalinga kukonkelabo nshaakalwiitikwa. Maswi amwi abusongo alaamba ayi: “Kotaanguna kuyeeya munshila mwiinda myeendo yako, lyalo ulaakunokweenda munshila shiluleme.”—Tus. 4:24-27; Efe. 5:15.