1. Ino bashali balasuna kwaamba ayi bana babo bacite nshi?

 NOBASHALI, tulicishi kwaamba ayi mulisuni kucafwa bana banu kushiba Yehova akumusuna. Sombi Lesa inga tatumuboniiwo. Ino inga mwabacafwa buyani bana banu kushiba ayi Lesa ncakwiila nkwaali akwaamba ayi babe abushicibusa anguwe?​—Jemu. 4:8.

2. Ino bashali inga bacita buyani kwaamba ayi baiishe bana babo pamibo Yehova njaacite?

² Nshila iyandika abuumbi mbweenga mwacafwa bana banu kuba abushicibusa a Yehova nkwiinda mukubaiisha Baibo. (2 Timo. 3:14-17) Nacibi boobo, Baibo ilaamba anshila imwi mbweenga bacanike beeya pali Yehova. Mulibuku lya Tushimpi, cilyeelete mushali musankwa wakalinga kwiibalusha mwanaakwe musankwa kubikila maano kumibo yakwe Yehova iyo njetubona mushintu nshaakalenga. (Tus. 3:19-21) Tutobandika nshila shimwi mbweenga bashali basebensesha shilengwa kucafwa bana babo kwiiya pamibo Yehova njaacite.

3. Ino bashali balyeelete kucafwa bana babo kucita nshi?

³ Baibo ilaamba ayi, ‘Kuswabo lyeelyo Lesa ndyaakalenga cishi, bantu balakonsha kwishiba cakutatonsha kwaamba ayi nkusu shakwe tasheeli alimwi ayi ndushinisho ngu Lesa. Bantu balakonsha kwishiba shintu ishi kwiinda musheesho nshaakalenga.’ (Loma. 1:20) Nobashali, ncakutatoonsha kwaamba ayi mulasangalala kuba pomwi abana banu ndyemushiite pansengwe. Amusebenseshe ciindi ici kucafwa bana banu kubona shintu Yehova “nshaakalenga” mboshitondesha mibo ibotu abuumbi njaacite. Aboobo, amuleke tubandike bashali nsheenga beeya kuswa kucakubonenaako cakwe Yesu ca mbwaakalinga kwiisha.

4. Ino Yesu wakasebensesha buyani shilengwa kwiisha bashikwiiya bakwe? (Luka 12:24, 27-30)

 ⁴ Atubandike Yesu mbwaakasebensesha shilengwa kwiisha bantu. Paciindi cimwi, Yesu wakalwiita bashikwiiya bakwe kulangilisha bacikwangala amaluba. (Amubelenge Luka 12:24, 27-30.) Yesu naakwiinga wakasalaawo kwaamba pa cinyama na cishango cimwi cili coonse. Sombi wakasalaawo kwaamba pa bacikwangala amaluba isho bashikwiiya bakwe nshebakalinga kucishi kabotu. Cilyeelete bashikwiiya bakwe bakalinga kubona bacikwangala kabooluka alimwi amaluba kaasapuka muluundu. Yesu ndyaakalinga kwaamba pa bacikwangala amaluba, alyeelete wakalinga kushitondeka. Alimwi ino nshiinshi nshaakacita pesule lyakwaamba pashakubonenaako ishi? Wakeesha bashikwiiya bakwe ciiyo ciyandika pa mushimu wabwaabi alimwi akubota moyo kwa Baishi: Yehova alaakusanina basebenshi bakwe bashomeka alimwi akubafwalika bweenka mbwaacita ku bacikwangala amaluba amuluundu.

5. Ino bashali inga basebensesha buyani shilengwa kwiisha bana babo pali Yehova?

⁵ Nobashali, ino cakubonenaako cakwe Yesu inga mwacikonkela buyani ndyemutookwiisha bana banu? Mpashi inga mwalwiitako bana banu cinyama na cishango ncomusuni. Ndyemutoocita boobo, amubasansulwite nshomutokwiiya pali Yehova kuswa kucilengwa ico. Lyalo mpashi inga mweepusha mwanaanu kwaamba ayi amulwiiteko cinyama na cishango ncaasuni. Na mwaamba pacilengwa bana banu ncobasuni, mpashi balaakukutika cakubikila maano ndyemutokweelesha kubaiisha pali Yehova.

6. Ino nshiinshi nsheenga tweeya kuswa kucakubonenaako ca banyinawabo ba Christopher?

⁶ Sa bashali balyeelete kutola ciindi cilaamfu kulangoola makani pa cinyama na cishango cimwi kabatana kubandika nsheenga beeya pali Yehova kuswa kucilengwa ico? Teshi lyoonse ndyeenga bacita boobo. Yesu taakwe kusansulula makani aanji pa bacikwangala mbobalya na maluba mbwakomena. Cimwi ciindi, mpashi mwanaanu inga wasangalala kubandika makani aanji pacilengwa cimwi, sombi cimwi ciindi kwaambabo maswi aniini pacilengwa ico na kumwiipusha mwiipusho inga kwacafwa mwanaanu kunyumfwisha citeente cinene. Amunyumfwe nshaakaamba mukwesu waliina lya Christopher, nshaiibaluka ndyaakalinga mwanike: “Bama bakalinga kwaambabo maswi aniini kwaamba ayi batucaafwe kwiiya pashilengwa nshotwakalinga kubona. Kucakubonenaako, na tuliimfwi pafwiifwi atulundu, bakalinga kwaamba ayi: ‘Amubone kukomena kwa tulundu tulya alimwi ambotutooboneka kabotu! Sa ici tacitondeshi ayi Yehova ngu mubotu?’ Lyalo na tuli pafwiifwi alweenge, bakalinga kwaamba ayi: ‘Amubone maaba alya mbwaacite nkusu! Sa ici tacitondeshi ayi Lesa alicite nkusu?’” Ba Christopher bakatolelela akwaamba ayi: “Maswi oobu bama ngobakalinga kutulwiita akatucafwa kuyeeya pamibo Yehova njaacite.”

7. Ino inga mwacita buyani kwaamba ayi mwiishe bana banu kuyeeya pashintu Lesa nshaakalenga?

⁷ Bana banu ndyebatooya cikula, amubaiishe kuyeeya pashintu Yehova nshaakalenga akubona mibo njeenga beeya pali nguwe. Inga mwaamba pacintu comwi Lesa ncaakalenga, lyalo akwiipusha mwanaanu ayi, “Ino ici citookwiisha nshi pali Yehova?” Mpashi inga mwakankamana akusangalala kunyumfwa mwanaanu nsheenga waamba.​—Mate. 21:16.

8. Ino bashali bene Isilaeli bakalinga kucite coolwe nshi ndyebakalinga kweenda munshila?

⁸ Bashali bene Isilaeli bakalwiitikwa kwiisha bana babo milawo yakwe Yehova ndyebakalinga kweenda munshila. (Duto. 11:19) Mu Isilaeli mwakalinga nshila shiinji shakalinga kwiinda mumishi. Cilyeelete ndyebakalinga kweenda bakalinga kubona shinyama, tuyuni alimwi amaluba apusenepusene. Aboobo bashali bene Isilaeli bakalinga kucite coolwe cakubandika abana babo  pashintu Yehova nshaakalenga. Mpashi amwebo nobashali mulicite shoolwe ndyeenga mwasebensesha shilengwa kwiisha bana banu pali Yehova. Amunyumfwe bashali bamwi mbobakacita boobo.

9. Ino nshiinshi nsheenga mweeya kuswa kuli ba Punitha aba Katya?

⁹ Mushali mwanakashi waliina lya Punitha ukala mutauni inene ku India wakaamba ayi: “Na twafwakashila beshikamukowa besu bekala kumushi, tulabona ayi ncoolwe cakucafwa bana besu kwiiya pashintu shikankamika Yehova nshaakalenga. Ndabona ayi bana bangu baleeya shiinji pashilengwa ndyebatabete mutauni umo muli bantu baanji amyotoka.” Nobashali, mpashi bana banu teshi bakaalube ciindi ndyeshi mukabe pomwi ambabo kumusena ubotu. Nankashi waliina lya Katya, ukala ku Moldova wakaamba ayi: “Ciindi ncenjiibaluka abuumbi ndyendakalinga mwanike nciindi ndyetwakalinga kuba kumushi pomwi abashali bangu. Ndalumba bashali bangu kwaamba ayi ciindi ndyendakalinga mwanike, bakanjiisha kulangilisha pashintu Yehova nshaakalenga akubona mibo njaacite.”

10. Ino nshiinshi bashali nsheenga bacita na cilabayumina kuya mukufwakasha kumushi? (Amubone kabokosi kacite mutwi utokwaamba ayi “ Lucafwo Kubashali.”)

¹⁰ Ano ino mbuyani na inga tamucikonshi kuya mukufwakasha kumushi? Ba Amol, abalo bekala ku India bakaamba ayi: “Nkonkala bashali balasebensa mawoola aanji, alimwi kwaamba ayi muye mukufwakasha kumushi mulayandika maali aanji. Nacibi boobo, inga mwalangilisha pashintu Yehova nshaakalenga akubandika pamibo njaacite ndyemwafwakashila musena uniini uli mutauni kuli bwiisu, shishango alimwi ashisamu, na paciindi ndyemuli peculu lya ŋanda.” Na mwalangilisha cakubikila maano inga mwaboona shintu shiinji Lesa nshaakalenga shili pafwiifwi aŋanda yanu nsheenga mwatondesha bana banu. (Kulu. 104:24) Mpashi inga mwaboona tuyuni, tulongolo, shishango alimwi ashimwi shiinji. Ba Karina bekala ku Germany bakaamba ayi: “Bama balyaasuni maluba.  Aboobo ndyendakalinga mwanike, liinji bakalinga kuntondesha maluba abotu ndyetutookweenda.” Nobashali, inga mwaiisha bana banu kwiinda amukusebensesha mavidyo amabuku aamba pashilengwa akabambwa alibunga lyakwe Yehova. Ncakwiila tacicite mulandu ankomukala, inga mwacafwa bana banu kulangilisha shintu Lesa nshaakalenga. Ano amuleke tubandike pamibo imwi Yehova njaacite njeenga mwaiisha bana banu.

11. Ino bashali inga bacafwa buyani bana babo kushiba ayi Yehova alitusuni?

¹¹ Kwaamba ayi mucafwe bana banu kushiba ayi Yehova alitusuni, inga mwaamba pashinyama shiinji mboshibikila maano ku twana twanshisho. (Mate. 23:37) Alimwi inga mwaamba pashilengwa shipusenepusene shitupa kusangalala. Ba Karina mbotwalinga twaambawo bakaamba ayi: “Na tutooya ceenda abama, bakalinga kunjuminisha kulangilisha pa liluba lyomwi alyomwi mbolipusene ku limwi alimwi akuboneka kabotu kwa liluba ilyo mbokutondesha ayi Yehova alitusuni. Nabi peenda myaaka iinji, ndatolelela kulangilisha maluba cakubikila maano. Alimwi ndabona liluba lyomwi alyomwi mboliboneka, mbolyakapanga ambolipusene kumaluba amwi. Maluba atolelela kunjibalusha ayi Yehova alitusuni abuumbi.”

12. Ino bashali inga bacafwa buyani bana babo kushiba ayi Lesa ngumusongo? (Kulumbaisha 139:14) (Amubone acikope.)

¹² Amucafwe bana banu kushiba ayi Lesa ngumusongo. Yehova ngumusongo abuumbi kwiinda ndiswe. (Loma. 11:33) Kucakubonenaako, inga mwalwiita bana banu maanshi mbwaaya kwiculu akupanga makumbi alimwi amakumbi ayo mbwaasena kuswa kumusena umwi kuya kumusena umwi. (Jobo 38:36, 37) Alimwi inga mwabalwiita apa mubili wa muntu mbowakapangwa munshila ikankamika. (Amubelenge Kulumbaisha 139:14.) Amunyumfwe mushali musankwa waliina lya Vladimir mbwaakacita boobo. Wakaamba ayi: “Bushiku bumwi mwaneesu musankwa wakawa pancinga akulicisa palinungo. Ndipakeendabo nshiiku shiniini cilonda cakoola. Nebo abakaangu twakamusansulwiita ayi Yehova wakalenga mibili yesu munshila yakwaamba ayi kailibamba iine na twalicisa. Twakamulwiita ayi ubu teshi mbocibete kushintu bantu nshebapanga. Kucakubonenaako, na motoka yanyonyooka tailibambiwo iine. Cakubonenaako ici cakacafwa mwaneesu kushiba kwaamba ayi Yehova ngumusongo.”

13. Ino bashali inga bacafwa buyani bana babo kushiba ayi Lesa alicite nkusu? (Isaya 40:26)

 ¹³ Yehova alatulwiita ayi tunoolangilisha mwiculu akuyeeya pa nkusu shikankamika nshaacite mboshipa kwaamba ayi nyenyeenshi shitolelele kuba mwiculu. (Amubelenge Isaya 40:26.) Inga mwayuminisha bana banu kulangilisha mwiculu akuyeeya pashintu nshebatoobona. Nankashi waliina lya Tingting ukala ku Taiwan, aleebaluka cintu cimwi cakacitika ndyaakalinga mwanike. Wakaamba ayi: “Bushiku bumwi, nebo abama twakaya mukufwakasha kumusena kwatakalinga malaiti. Alimwi mashiku twakacikonsha kubona kabotu nyenyeenshi shiinji shili mwiculu. Paciindi cilya ndakalinga kulisukama na inga ndacikonsha kutolelela kusebensela Yehova cakushomeka, mukwiinga babyaanji bakalinga kunkakatisha kucita shintu shitabete kabotu. Bama bakanjuminisha kuyeeya pa nkusu Yehova nshaakasebensesha kupanga nyenyeenshi shoonse akunjibalusha kwaamba ayi Yehova inga wasebensesha nkusu sheenka isho kuncafwa kukoma bweelesho buli boonse. Pesule lya kulangilisha nyenyeenshi ndyetwakalinga kufwakasha, ndakayuminishikwa kumushiba kabotu Yehova akuba ushinishite kutolelela kumusebensela.”

14. Ino bashali inga basebensesha buyani shilengwa kucafwa bana babo kushiba ayi Yehova ngu Lesa usangalete?

¹⁴ Shintu Yehova nshaakalenga shilatondesha ayi ngu Lesa usangalete. Alimwi alisuni ayi aswebo tunoosangalala. Beshisayansi besa mukushiba kwaamba ayi shinyama shiinji shilasekana kwiilikaawo atuyuni answi. (Jobo 40:20) Sa bana banu bakasekawo kale ndyebakabona cinyama kacisekana? Mpashi bakabonaawo kale tunga bakiti katusekana nabi tubwa katulwana. Bana banu na bakabone cinyama kacisekana lyalo bakaseke, mukabeebalushe ayi tulasebensela Lesa usangalete.​—1 Timo. 1:11.

15. Ino nshiinshi bashali nsheenga bacita kwaamba ayi bashibe bana babo nshebatoyeeya? (Tushimpi 20:5) (Amubone acikope.)

¹⁵ Cimwi ciindi, mpashi bashali inga cabayumina kucafwa bana babo kwaanguluka kubalwiita mapensho ngobatokwiindaamo. Na ubo mbocibete kuli ndimwe, mpashi inga mwayandika kucana nshila kwaamba ayi bana banu bamulwiite mapensho ngobatokwiindaamo. (Amubelenge Tushimpi 20:5.) Ncuubu ku bashali bamwi kucita  boobo ndyebatosangalala kulangilisha shilengwa pomwi abana babo. Ino nceebonshi? Ceebo comwi ncakwaamba ayi takubi shiinji sheenga shapilinganya baana abashali. Mushali musankwa ukala ku Taiwan waliina lya Masahiko, wakaamba ceebo cimwi ndyaakaamba ayi: “Bana besu balaba baangulukite kubandika andiswe ndyetutooya bweenda mutulundu na mweela lya lweenge. Aboobo cilaba cuubu kubeepusha miipusho kwaamba ayi batulwiite mbobatoyeeya.” Ba Katya, mbotwalinga twaambawo bakaamba ayi: “Liinji na ndakotoka kucikolo, bama bakalinga kuntola kumusena ubotu. Na katuli kumusena uko, cakalinga cuubu kuli ndime kubalwita shacitika kucikolo na shintu shalinga shampa kulisukama.”

16. Ino bamumukwashi inga bacita buyani kwaamba ayi babe aciindi cakubandika akusangalala ndyebatolangilisha shintu Yehova nshaakalenga?

¹⁶ Bamumukwashi ndyebatosangalala kulangilisha shintu Yehova nshaakalenga inga baba aciindi cakubandika akusangalala kuba pomwi. Ici cilaakupa kwaamba ayi bamumukwashi basunane abuumbi. Baibo ilaamba ayi “kuli ciindi cakuseka” “aciindi cakushana.” (Shiku. 3:1, 4) Yehova wakalenga misena ibotu pacishi uko nkweenga twaciita shintu nshetusuni. Mikwashi iinji ilasangalala kuya kumisena nkobalamina shintu Lesa nshaakalenga, kuya kumishi, kweebela tulundu, na kunooya ceenda mweela lya lweenge. Banike bamwi balasangalala kusekanina mumisena ibotu, kulangilisha shinyama, nabi kuya mukusamba njabwe mumulonga na mucishiba. Tulicite shoolwe shiinji shakusangalala kulangilisha shintu Yehova nshaakalenga!

17. Ino nceebonshi bashali balyeelete kucafwa bana babo kusangalala kulangilisha shintu Lesa nshaakalenga?

¹⁷ Mucishi cipya, bashali abaana balaakunoosangalala kulangilisha shintu Yehova nshaakalenga kwiinda ambobasangalala pacecino ciindi. Mubupusano ambocibete pacecino ciindi, teshi tukayandike kunoloonda shinyama alimwi ashalo teshi shikanotuloondaawo. (Isa. 11:6-9) Tulaakunosangalala kulangilisha shintu Yehova nshaakalenga, kwamuyayaya. (Kulu. 22:26) Nacibi boobo, nobashali tamuyandiki kulindila kucafwa bana banu kutalika kusangalala kulangilisha shintu Lesa nshaakalenga. Ndyemutosebensesha shilengwa kwiisha bana banu pali Yehova, mpashi abalo balaakulinyumfwa bweenka bwakalinyumfwa Mwaami Defedi uyo wakaamba ayi: “O Yehova taaku milimo ili mbuli yaanu.”​—Kulu. 86:8, NWT.