MUTWI WAKWIIYA 14
“Bantu Boonse Balaakwishiba Ayi Muli Bashikwiiya Bangu”
“Mukwiinga na kamusunene—bantu boonse balaakwishiba ayi muli bashikwiiya bangu.”—JONI 13:35.
LWIIMBO 106 Amube Alusuno
NSHESHI TWIIYE a
Ino nshiinshi bantu baanji bateshi Bakamboni nshobaamba na babona lusuno luli pakati ka bantu bakwe Yehova? (Amubone palagilafu 1)
1. Ino nshiinshi bantu baanji nshobabona na bacanika kumabungano esu kwaciindi cakutaanguna? (Amubone acikope.)
AMUYEEYE beebene bacanika kumabungano kwaciindi cakutaanguna ku Ŋanda ya Bwaami ya Bakamboni Bakwe Yehova. Beebene basangalala abuumbi kubona bamakwesu abenankashi mbobabatambula alimwi ambobatondeshanya lusuno. Lyalo ndyebatoboolela kuŋanda pesule lya mabungano, banakashi balwiita beebaabo ayi, ‘Bantu aba balipusene abantu bamwi mbotwakakumanyaawo alimwi ndanyumfwa kabotu abuumbi kuba pomwi ambabo.’
2. Ino nceebonshi bamwi bakacileka kusebensela Yehova?
2 Lusuno bantu bakwe Yehova ndobatondeshanya lulilibetele. Cancine ncakwaamba ayi Bakamboni Bakwe Yehova tabamaninite. (1 Joni 1:8) Aboobo na twabashiba kabotu bamakwesu abenankashi, tulashiba shintu shimwi nshebataciti kabotu. (Loma. 3:23) Ano cabicaako ncakwaamba ayi bamwi bakacileka kusebensela Yehova ceebo ca shilubo sha bamwi.
3. Ino nciinshi nceenga twashibilako bashikwiiya bakwe Yesu bancine? (Joni 13:34, 35)
3 Amubone lilembo paswa mutwi uyu. (Amubelenge Joni 13:34, 35.) Ino nciinshi nceenga twashibilako Beneklistu bancine? Balatondeshanya lusuno. Alimwi Baibo tayaambi ayi balimaninite. Yesu taakwe kwaamba ayi: ‘Mulaakwishiba ayi muli bashikwiiya bangu.’ Sombi wakaamba ayi: “Bantu boonse balaakwishiba ayi muli bashikwiiya bangu.” Yesu wakatondesha ayi bashikwiiya bakwe abantu bateshi Beneklistu, balaakwishiba Beneklistu bancine ceebo ca lusuno lwancinencine ndobatondeshanya.
4. Ino nshiinshi bantu bamwi nsheenga basuna kushiba pa Beneklistu bancine?
4 Bantu bamwi bateshi Bakamboni Bakwe Yehova mpashi inga baliipusha ayi: ‘Ino lusuno lulatucafwa buyani kushiba bashikwiiya bakwe Yesu bancine? Ino Yesu wakatondesha buyani lusuno ku batumwi bakwe? Alimwi sa cilakonsheka kukonkela cakubonenaako cakwe Yesu munshiku shino?’ Bakamboni Bakwe Yehova inga bacita kabotu kuyeeya pashikumbulo kumiipusho iyi. Kucita boobo inga kwatucafwa kunotondesha lusuno abuumbi bunene bunene na mushominyineesu watukalasha.—Efe. 5:2.
INO NCEEBONSHI LUSUNO INGA LWATUCAFWA KUSHIBA BASHIKWIIYA BAKWE YESU BANCINE?
5. Ino Yesu wakalinga kusansulula nshi ndyaakaamba maswi ngotucana pa Joni 15:12, 13?
5 Yesu wakaamba ayi bashikwiiya bakwe balaakunotondeshanya lusuno munshila ilibetele. (Amubelenge Joni 15:12, 13.) Yesu wakapa bashikwiiya bakwe mulawo wakwaamba ayi: “Amusunane bweenka mboomusuni anebo.” Ino Yesu wakalinga kusansulula nshi? Wakalinga kusansulula ayi bashikwiiya bakwe bakalinga kweelete kusuna bamwi kwiinda mbobalisuni beene nabi kubafwita na kaciyandika.
6. Ino Maswi akwe Lesa alatucafwa buyani kushiba ayi kutondesha lusuno kulayandika?
6 Maswi akwe Lesa alatwiisha ayi kutondesha lusuno kulayandika abuumbi. Kucakubonenaako, bantu baanji balisuni malembo amwi amu Baibo, mbuli aaya atokonkelaawo: “Lesa ndusuno.” (1 Joni 4:8) “Suna mubyo bweenka mboolisuni omwiine.” (Mate. 22:39) ‘Lusuno lulafweka pa shibiibi shiinji.’ (1 Pit. 4:8) ‘Lusuno talumaani.’ (1 Koli. 13:8) Malembo aaya alimwi amalembo amwi alatondesha patuba kwaamba ayi kutondesha lusuno kulayandika abuumbi.
7. Ino nceebonshi Satana inga taacikonshi kupa kwaamba ayi bantu banootondeshanya lusuno lwancinencine akuba bacatene?
7 Bantu baanji baleepusha ayi: ‘Ino bupailishi bwancine inga ndabushiba buyani? Bupailishi boonse bulalyaamba ayi bulaiisha cancine. Sombi boonse bulaiisha bantu shintu shipusenepusene pali Lesa.’ Satana wapa kwaamba ayi kube bupailishi buunji bwakubeca. Aboobo ici capa kwaamba ayi bantu baanji batashibi bupailishi bwancine. Sombi Satana inga taacikonshi kupa kwaamba ayi bantu nsengwe yoonse banootondeshanya lusuno. Yehova eenkabo ngweenga wacikonsha kucita boobo. Tulishi makani aya ceebo cakwaamba ayi Yehova ndusuno. Abo beenkabo batanjililwa amushimu wakwe Yehova alimwi mbwaapa shoolwe mbeenga batondeshanya lusuno lwancinencine. (1 Joni 4:7) Nceceeco Yesu ncaakaambila ayi, bashikwiiya bakwe beenkabo mbeenga batondeshanya lusuno lwancinencine.
8-9. Ino kubona lusuno Bakamboni Bakwe Yehova ndobatondeshanya kulabakuma buyani bantu baanji?
8 Bweenka Yesu mbwakaambila limwi, bantu baanji bacikonsha kushiba bashikwiiya bakwe bancine, ceebo cakwaamba ayi balatondeshanya lusuno lwancinencine. Kucakubonenaako, mukwesu waliina lya Ian aleebaluka shakacitika ciindi cakutaanguna ndyaakacanika kukubungana kunene uko kwakabeta mu sitedyamu yakalinga pafwiifwi akumishaabo. Ndyekwakacaala myeenshi iniini kwaamba ayi kube kubungana kunene, ba Ian bakalinga baya ku sitedyamu iyo mukweebela cisekano cimwi. Bakaamba ayi: “Bantu bakacanika kukubungana kunene bakalinga kucita shintu munshila ipusene abuumbi abantu bakalinga besa mukweebela cisekano mu sitedyamu iyi. Bakamboni Bakwe Yehova bakalinga kutondesha bulemu, bakalinga kufwete kabotu alimwi bana babo bakalinga kulilemeka.” Bakeelikaawo akwaamba ayi: “Bantu aba bakalinga kusangalete alimwi bakalinga muluumuno. Anebo ishi nshendakalinga kusuni mubuumi bwangu. Nshiibaluki shili shoonse pamakani akaambwa bushiku bulya, sombi nciibaluka Bakamboni Bakwe Yehova mbobakalinga kucita shintu.” b Ncakwiila kwaamba ayi Bakamboni Bakwe Yehova balacita boobo ceebo cakutondeshanya lusuno lwancinencine. Ceebo cakwaamba ayi tulibasuni bamakwesu abenankashi, tulabatondesha kubota moyo alimwi abulemu.
9 Mukwesu waliina lya John alakwe mbwaakalinyumfwa ndyaakatalika kucanika kumabungano. Wakaamba ayi: “Ndakanyumfwa kabotu boonse mbobakantambula kabotu . . . Bakalinga bantu bali kabotu abuumbi cakwaamba ayi ndakayeeya ayi balimaninite. Lusuno lwancinencine ndobakalinga kutondeshanya lwakampa kushoma cakutatoonsha ayi ndacana bupailishi bwancine.” c Shakubonenaako ishi alimwi ashimwi shiinji shilatondesha kwaamba ayi bantu bakwe Yehova Mbeneklistu bancine.
10. Ino ndilili bunene bunene ndyeenga twatondesha ayi tulibasuni bamakwesu abenankashi? (Amubone amakani amweela.)
10 Kweelana ambotwaambaawo kumatalikilo kwa mutwi uno, bashominyineesu boonse tabamaninite. Cimwi ciindi inga baamba na kucita shintu sheenga shatukalasha. d (Jemu. 3:2) Bunene bunene na bamwi batukalasha, inga twatondesha ayi tulibasuni cancinencine kwiinda mushintu nsheenga twaamba akucita. Aboobo amuleke tubandike nsheenga tweeya kucakubonenaako cakwe Yesu na shamushobo uyu shatucitikila.—Joni 13:15.
YESU MBWAAKATONDESHA LUSUNO KU BATUMWI BAKWE
Yesu wakatondesha lusuno ku batumwi bakwe nabi kwaamba ayi bakatondesha mibo itabete kabotu (Amubone mapalagilafu 11-13)
11. Ino njimibo nshi itabete kabotu Jemusi a Joni njobakatondesha? (Amubone acikope.)
11 Yesu taakalinga kulangila bashikwiiya bakwe kucita shintu anga mbantu bamaninite. Muciindi cakucita boobo, wakabacafwa munshila yalusuno kwaamba ayi baalule mibo itabete kabotu njebakalinga kucite kwaamba ayi basangalashe Yehova. Paciindi cimwi, batumwi bakwe bobilo, Jemusi a Joni, bakalwiita banyinawabo kuya mukusenga Yesu kwaamba ayi akabape mikuli iyandika mu Bwaami. (Mate. 20:20, 21) Jemusi a Joni nshebakacita shakatondesha kwaamba ayi bakalinga bantu balisumpula alimwi bakalinga kusuni kuba bantu bayandika kwiinda bamwi.—Tus. 16:18.
12. Sa Jemusi a Joni mbobatumwi beenkabo bakatondesha mibo itabete kabotu? Amusansulule.
12 Teshibo Jemusi a Joni bakatondesha mibo itabete kabotu paciindi ici. Amunyumfwe batumwi bamwi nshebakacita: “Ono bashikwiiya bamwi likumi ndibakanyumfwa makani aya, bakakalalila bashikwiiya bamukowa bobilo balya.” (Mate. 20:24) Cilyeelete kwaamba ayi Jemusi, Joni abatumwi bamwi bakapikishanya abuumbi. Mpashi batumwi bamwi bakaamba ayi: ‘Ino mwebo mutoolibona ayi ndimwe baani kwaamba ayi musenge mikuli iyandika mu Bwaami? Tulyeelenebo. Soonse twakasebensa cankusu pomwi a Yesu. Aswebo tutokweelela kupekwa mikuli iyandika bweenka mbuli ndimwe!’ Muli moonse mweenga cabeta, batumwi bakwe Yesu kwakaciindi, bakasuminisha bukaalo ubu kubapa kwaalilwa kutondeshanya lusuno.
13. Ino nshiinshi Yesu nshaakacita batumwi bakwe ndyebakatondesha mibo itabete kabotu? (Mateyo 20:25-28)
13 Ino nshiinshi Yesu nshaakacita? Yesu taakwe kukalala. Taakwe kwaamba ayi atosala batumwi bamwi bali kabotu beenga kabaliceesha abuumbi alimwi akunootondeshanya lusuno. Muciindi cakucita boobo, Yesu wakabandikaabo cakukalika moyo mukwiinga wakalinga kucishi ayi balisuni kucita shiluleme. (Amubelenge Mateyo 20:25-28.) Yesu wakatolelela kubatondesha lusuno nabi kwaamba ayi ciindi aciindi bakalinga kupikishanya pamakani awakalinga munene.—Maako 9:34; Luka 22:24.
14. Ino batumwi bakwe Yesu bakakomenena mubukaalo bwa buyani?
14 Ncakutatoonsha kwaamba ayi Yesu wakashiba ayi shintu shakalinga kucitika kumusena batumwi bakwe nkobakakulila, shakakuma mbobakalinga kucita shintu. (Joni 2:24, 25) Bamatanjilili babupailishi paciindi cilya, bakalinga kwiisha ayi bantu bakalinga kucite mikuli inene mbobakalinga kuyandika. (Mate. 23:6) Bamatanjilili babupailishi ba baJuda, abalo bakalinga kulibona kululama kwiinda bamwi. e (Luka 18:9-12) Yesu wakashiba ayi kubona shintu munshila iyi kwakakuma bashikwiiya bakwe mbobakalinga kulibona ambobakalinga kubona bamwi. (Tus. 19:11) Taakalinga kulangila bashikwiiya bakwe kucita shintu anga mbantu bamaninite alimwi taakalinga kukalala cakwiindilila na bacita shintu shitabete kabotu. Wakalinga kucishi kwaamba ayi bakalinga kusuni kucita shintu shili kabotu. Aboobo cakukalika moyo wakabaiisha kuba bantu baliceesha abuumbi, akutondesha lusuno kubamwi muciindi cakunoolibona ayi balayandika kwiinda bamwi.
MBWEENGA TWAKONKELA CAKUBONENAAKO CAKWE YESU
15. Ino nshiinshi nsheenga tweeya kuswa kusheesho Jemusi a Joni nshebakacita?
15 Kuli shiinji nsheenga tweeya kuswa kushintu Jemusi a Joni nshebakacita. Tabakwe kucita kabotu kusenga Yesu kwaamba ayi akabape mikuli iyandika mu Bwaami. Alimwi batumwi bamwi abalo tabakwe kucita kabotu mukwiinga bakasuminisha bukaalo ubu kupilinganya lucatano lwabo. Nacibi boobo, Yesu wakacafwa batumwi bakwe boonse bali 12 munshila yankumbu alimwi yalusuno. Ino tutokwiiyawo nshi? Na bamwi bacita shintu sheenga shatukalasha, aswebo inga twabiisha kwiinda mushintu nsheenga twaciita. Ino nciinshi ceenga catucafwa? Na mushominyineesu watukalasha inga twaliipusha ayi: ‘Ino nceebonshi nshaakacita shankalasha abuumbi? Sa nshaakacita shancafwa kubona kwaamba ayi kuli mibo imwi itabete kabotu njonjeelete kwaalula? Sa kuli lipenshi limwi linene ndyaatokwiindaamo lyapa kwaamba ayi ankalashe? Nabi kwaamba ayi kuli sheebo shibotu sheenga shampa kukalala, sa inga ndamutondesha lusuno lyalo akumulekelela?’ Na katutondesha lusuno ku bamwi, tulatondesha ayi tuli bashikwiiya bakwe Yesu bancine.
16. Ino nshiinshi shimwi nsheenga tweeya kuswa kucakubonenaako cakwe Yesu?
16 Kwiilikaawo, cakubonenaako cakwe Yesu cilatwiisha ayi tulyeelete kweelesha kunyumfwishisha bashominyineesu. (Tus. 20:5) Ncakwiila, Yesu alabona shili mumoyo wa muntu. Ano swebo inga tatucikoonshi kucita boobo. Sombi inga twabakalikila moyo bamakwesu abenankashi na bacita shintu shatukalasha. (Efe. 4:1, 2; 1 Pit. 3:8) Ncuubu kucita boobo, na twashiba shiinji pali mbabo. Amuleke tubandike pacakubonenaako comwi.
17. Ino nshiinshi shakaswaamo mutanjilili walubasu ndyaakamushiba kabotu mukwesu umwi?
17 Mutanjilili walubasu umwi usebensela ku East Africa, aleebaluka mukwesu wakalinga mulibungano limwi pamabungano ngaakalinga kufwakashila. Pakutaanguna mutanjilili walubasu uyu wakayeeya ayi mukwesu uyu tabete kabotu. Ino nciinshi mutanjilili walubasu ncaakacita? Wakaamba ayi: “Muciindi ca kuleya kubandika amukwesu uyu, ndakasalawo kumushiba kabotu.” Ndyaakalinga kucita boobo, mutanjilili walubasu wakashiba shintu shimwi mukwesu uyu nshaakeendaamo shakapa kwaamba ayi anoocita shintu munshila ipuseneeko. Mutanjilili walubasu wakatolelela akwaamba ayi: “Ndyendakesa mukushiba mukwesu uyu mbwakalinga kusebensa cankusu kwaalula buumi bwakwe kwaamba ayi anoonyumfwana abantu bamwi, ndakamusuna abuumbi. Alimwi twakaba beshicibusa bali kabotu.” Ncakwiila na tweelesha kubashiba kabotu bamakwesu abenankashi, cilaakutubeta cuubu kubatondesha lusuno.
18. Ino njimiipusho nshi njeenga twaliipusha na mushominyineesu watukalasha? (Tushimpi 26:20)
18 Cimwi ciindi mpashi inga twalinyumfwa ayi tutoyandika kuya mukubandika amushominyineesu wakatukalasha. Nacibi boobo, tulyeelete kutaanguna kuliipusha miipusho mbuli: ‘Sa ndicishi kabotu shoonse shakacitika?’ (Tus. 18:13) ‘Sa wakacitila kashanga kwaamba ayi ankalashe?’ (Shiku. 7:20) ‘Sa anebo ndakacitawo kale cilubo camushobo uyu?’ (Shiku. 7:21, 22) ‘Sa kuya mukubandika amuntu uyu kutoopa kwaamba ayi shintu shibicileeko?’ (Amubelenge Tushimpi 26:20.) Na twacaana ciindi ca kuliipusha miipusho iyi, mpashi inga twesa mukushiba ayi lusuno ndotucite pa mushominyineesu uyo inga lwatupa kusuulako kusheesho shakacitika.
19. Ino nciinshi ncomushinishite kucita?
19 Bakamboni Bakwe Yehova balatondesha ayi mbo bashikwiiya bakwe Yesu bancine kwiinda mukutondeshanya lusuno. Womwi awomwi wandiswe alatondesha ayi ncakwiila ngu shikwiiya wakwe Yesu wancine kwiinda mukutondesha lusuno lwancinencine kubamakwesu abenankashi nabi kwaamba ayi inga bacita shintu sheenga shatukalasha. Na katucita boobo, mpashi inga twacafwa bamwi kushiba bupailishi bwancine akutalika kulambila Yehova Lesa walusuno pomwi andiswe. Atube bashinishite kutolelela kutondesha ayi tuli Beneklistu bancine kwiinda mukutondeshanya lusuno.
LWIIMBO 17 “Ndisuni”
a Bantu baanji balasuna kwiiya shiinji pali Yehova a Maswi akwe, ceebo cakubona lusuno lwancinencine ndotutondeshanya. Nacibi boobo, tatumaninite. Aboobo cimwi ciindi teshi cuubu kutondeshanya lusuno. Tutobandika kutondesha lusuno ncokuyandikila abuumbi ambweenga twakonkela cakubonenaako cakwe Yesu na bamwi batukalasha.
b Amubone mutwi utokwaamba ayi “Pacecino Ciindi Ndicite Buumi Bucite Mpindu,” mu Njashi Yamulindilishi yamu Chitonga ya November 1, 2012, mape. 13-14.
c Amubone mutwi utokwaamba ayi “Shintu Shakalinga Kuboneka Anga Shitokweenda Kabotu Mubuumi Bwangu,” mu Njashi Yamulindilishi yamu Chitonga ya May 1, 2012, mape. 18-19.
d Mumutwi uyu tatutobandika pashilubo shinene muntu nsheenga wacita, bamanene nshobeelete kusebenselaawo mbuli sheesho shaambwa palilembo lya 1 Bene Kolinto 6:9, 10.
e Ndipakeenda ciindi, mufundishi umwi wakaamba ayi: “Pacishi capanshi mpashi pali bantu baluleme bali 30 bweenka mbwaakalinga Abulaamu. Na kuli bali 30 baluleme, nkokwaamba ayi nebo amwanaangu musankwa mpotuli; na kuli bali 10, nkokwaamba ayi nebo amwanaangu musankwa mpotuli; na kuli bali 5, nkokwaamba ayi nebo amwanaangu musankwa mpotuli; na kuli bobilo, nkokwaamba ayi ndime amwanaangu musankwa; na kuli womwi, nkokwaamba ayi ndime.”
