1-2. Ino nshiinshi liinji shicitika bantu ndyebatobombekwa alimwi ino tutokwiiya nshi mumutwi uyu?

 SA MWAKABONAWO kale likoto lya bantu batoya mukubombekwa? Ncakutatoonsha mwakanyumfwa ndyebakakumbula miipusho yobilo cakushinisha, kabatana kubombekwa. Mwakabona beshikamukowa alimwi abeshicibusa babo mbobakalinga kusangalete. Ndyebakaswa mumaanshi, mwakabona bantu kabakambilila alimwi alusangalalo abo bakabombekwa ndobakalinga kucite. Nsondo ansondo bantu baanji balaaba buumi bwabo kuli Yehova, akubombekwa mbuli Bakamboni bakwe.

² Ino mwebo mutooyeeya kubombekwa lili? Na mutooyeeya pamakani akubombekwa ingayi muli muntu uyandika abuumbi mucishi cino cibiibi mukwiinga ‘mutoyandoola Yehova.’ (Kulu. 14:1, 2) Mutwi uyu wakalembelwa ndimwe, inga caba ayi muli wacanike na wacinene. Nacibi boobo, aswebo soonse sotwakabombekwa kale tulisuni kuba bashinishite kutolelela kusebensela Yehova kwamuyayaya. Aboobo, amuleke tubandikekobo sheebo shotatwe pasheebo shiinji shitupa kusuna kusebensela Yehova.

3. Ino nceebonshi basebenshi bakwe Yehova balisuni cancine abululami? (Kulumbaisha 119:128, 163)

³ Yehova wakapa bantu bakwe mulawo wakwaamba ayi balyeelete ‘kusuna cancine.’ (Seka. 8:19) Yesu wakayuminisha bashikwiiya bakwe kulangoola bululami. (Mate. 5:6) Ici cilaamba ayi muntu alyeelete kuba ushinishite kucita shintu Lesa nshaamba ayi shililuleme alimwi shili kabotu. Tulishomete kwaamba ayi amwebo mulisuni cancine abululami. Mulipatite bubeshi alimwi ashintu shoonse shibiibi. (Amubelenge Kulumbaisha 119:128, 163.) Muntu ubeca alakonkela cakubonenaako cakwe Satana mweendeleshi wa cishi cino. (Joni 8:44; 12:31) Cintu comwi Satana ncaasunishishi kucita nkusebanya liina lisalalite lyakwe Yehova Lesa. Satana watolelela kwaamba makani akubeca pali Lesa wesu kuswabo ciindi  ndyekwakaba kupondoka mu Edeni. Wakeelesha kupa bantu kuyeeya ayi Yehova alilisuni, ngu Mweendeleshi utashomeki alimwi taakalinga kusuni bantu kuba ashintu shibotu. (Mata. 3:1, 4, 5) Bubeshi Satana mbwaamba pali Yehova, bwatolelela kupa kwaamba ayi bantu banooyeeya shibiibi pali Yehova. Na bantu basalawo kutasuna cancine, Satana inga wabayunga kwaamba ayi banoocita shintu shibiibi sha mushobo uli woonse.​—Loma. 1:25-31.

4. Ino Yehova wakatondesha buyani ayi ngu ‘Lesa wacancine’? (Amubone acikope.)

⁴ Yehova ngu ‘Lesa wacancine,’ alimwi abo bamusuni alabaiisha cancine. (Kulu. 31:5) Na wacita boobo, alabacafwa kwaamba ayi batacenjeekwi kububeshi bwakwe Satana. Alimwi Yehova alaiisha basebenshi bakwe kuba bantu bashomeka alimwi bacita shintu shiluleme. Ici cilabapa kulinyumfwa kuyandika akuba aluumuno. (Tus. 13:5, 6) Mpashi ubu Yehova mbwaakacita kuli ndimwe ndyemwakalinga kwiiya Baibo. Mwakeeya kwaamba ayi shintu Yehova nshaatulwiita kucita inga shacafwa muntu uli woonse. (Isa. 48:17) Aboobo mulisuni kucita shintu Lesa nshaamba ayi shililuleme. (Mate. 6:33) Mulisuni kulwiitako bamwi cancine akutondesha ayi Satana nshaakaamba pali Yehova Lesa nshakubeca. Ino inga mwacita buyani ubo?

5. Ino inga mwatondesha buyani ayi muli kulubasu lwa cancine alimwi ayi mulisuni kucita shintu shiluleme?

⁵ Inga mwasalaawo kukala buumi butondesha kwaamba ayi shintu Satana nshaamba nshakubeca alimwi mulisuni kuba ku lubasu lwa cancine. Inga mwatondesha ayi mulisuni Yehova kuba mweendeleshi wanu akwaamba ayi mulisuni kucita shintu nshaamba ayi shililuleme. Ino inga mwacita buyani ubo? Inga mwacita boobo kwiinda mukupaila kuli Yehova akwaaba buumi bwanu kuli nguwe, lyalo akutondesha kwaamba ayi mwakalyaaba kuli nguwe kwiinda mukubombekwa. Cintu comwi cinene ceelete kumupa kusalaawo kubombekwa, nkusuna cancine alimwi akusalaawo kucita shintu shiluleme.

6. Kweelana alilembo lya Kulumbaisha 45:4, ino nsheebo nshi shimwi shipa kwaamba ayi musune Yesu Klistu?

⁶ Ino nceebonshi mulimusuni Yesu Klistu? Amubone sheebo shimwi shibotu nshetucana palilembo lya Kulumbaisha 45:4, NWT. Palaamba ayi: “Alimwi koya ukakome mubulemu bwako. Tanta pa liaki uye ukeemikanine cancine, kuliceesha abululami. Alimwi lyaansa lyako lyalulyo lilaakukulengesha kucita shintu shikankamika.” Yesu alayuminisha bamwi kusuna cancine, kuba bantu baliceesha alimwi basuni kucita shiluleme. Na mulisuni cancine abululami, nkokwaamba ayi mulimusuni a Yesu Klistu. Amuyeeye Yesu mbwaakashitilisha cancine abululami  cakutaloonda. (Joni 18:37) Ano ino Yesu wakatondesha buyani ayi wakalinga kuyuminisha kuliceesha?

7. Ino kuliceesha kwakwe Yesu kulamupa kulinyumfwa buyani?

⁷ Yesu wakayuminisha kuliceesha kwiinda mushintu nshaakalinga kucita. Kucakubonenaako, wakalinga kusuni kwaamba ayi bantu kabalemeka Baishi kuteshi nguwe. (Maako 10:17, 18; Joni 5:19) Ino kuliceesha kwakwe Yesu kulamupa kulinyumfwa buyani? Ncakutatoonsha kwaamba ayi kulamupa kumusuna alimwi akukonkela cakubonenaako cakwe. Ino nceebonshi Yesu alaliceesha? Nceebo cakwaamba ayi alibasuni Baishi alimwi alakonkela cakubonenaako cabo cakuliceesha. (Kulu. 18:35; Ebu. 1:3) Ncakutatoonsha kwaamba ayi mulisuni kuba bushicibusa a Yesu, uyo ukonkela mibo yakwe Yehova cakumaninina.

8. Ino nceebonshi tulimusuni Yesu mbuli Mwaami wesu?

⁸ Tulimusuni Yesu mbuli Mwaami wesu mukwiinga ngu Mweendeleshi uli kabotu. Yehova wakeesha Mwanaakwe alimwi wakamusala kuba mwaami. (Isa. 50:4, 5) Alimwi amuyeeye Yesu mbwakalyaaba kutondesha lusuno. (Joni 13:1) Ceebo cakwaamba ayi Yesu ngu Mwaami wanu, mulyeelete kumusuna. Wakaamba ayi abo boonse bamusuni abuumbi alababona mbuli beshicibusa bakwe alimwi abalo balatondesha ayi balimusuni kwiinda mukukonkela milawo yakwe. (Joni 14:15; 15:14, 15) Ncoolwe cinene abuumbi kuba bushicibusa a Mwanaakwe Yehova!

9. Ino kubombekwa kwa bashikwiiya bakwe Klistu kulipusene buyani akwakwe Klistu?

⁹ Mulawo womwi Yesu ngwaakapa bashikwiiya bakwe ngwakwaamba ayi balyeelete kubombekwa. (Mate. 28:19, 20) Yesu alakwe wakabombekwa. Nacibi boobo, kubombekwa kwakwe kulipusene akwa bashikwiiya bakwe. (Amubone kabokosi kacite mutwi utokwaamba ayi “ Bupusano Buli Pakubombekwa Kwakwe Yesu Akwa Bashikwiiya Bakwe.”) Sombi kuli nshila shimwi kubombekwa uku mbokukoshenye. Yesu ndyaakabombekwa wakalyaaba kwaamba ayi acite kuyanda kwa Baishi. (Ebu. 10:7) Abalo bashikwiiya bakwe Klistu na babombekwa balatondesha kubantu boonse ayi bakaaba buumi bwabo kuli Yehova Lesa. Na babombekwa, cintu ciyandika abuumbi mubuumi bwabo nkucita kuyanda kwakwe Lesa kuteshi kuyanda kwabo. Aboobo balakonkela cakubonenaako cakwe Yesu.

10. Ino nceebonshi kusuna Yesu kulyeelete kumupa kusalaawo kubombekwa?

¹⁰ Mulashoma ayi Yesu ngu Mwanaakwe Yehova wakashalwabo eenka alimwi mulisangalete kwaamba ayi Lesa wakasala Yesu kuba Mwaami wesu. Mulicishi kwaamba ayi Yesu alaliceesha alimwi alakonkela cakubonenaako ca Baishi cakumaninina. Mwakeeya kwaamba ayi wakasanina bantu bakalinga kufwite nsala, kuyuminisha balefukite alimwi akushilika balwashi. (Mate. 14:14-21) Mwabona mbwaatotanjilila libungano lyakwe munshiku shino. (Mate. 23:10) Alimwi mbuli Mwaami wa Bwaami bwakwe Lesa, alaakutucitila shintu shiinji shibotu kunembo. Ino inga mwatondesha buyani ayi mulimusuni? Nkwiinda mukukonkela cakubonenaako cakwe. (Joni 14:21) Comwi nceenga mwaciita nkwaaba buumi bwanu kuli Yehova akubombekwa.

11. Ino ncintu nshi ciyandika abuumbi ceelete kumupa kusalaawo kubombekwa, alimwi ino nceebonshi?

¹¹ Ino ncintu nshi ciyandika abuumbi ceelete kumupa kusalaawo kubombekwa? Yesu wakaamba mulawo wiinditewo pamilawo yakwe Lesa ndyaakaamba ayi: ‘Suna Yehova Lesa wako amoyo wako woonse, abuumi bwako boonse, amiyeeyo yako yoonse alimwi ankusu shako shoonse.’ (Maako 12:30) Sa amwebo ubu mbomumusuni Lesa?

12. Ino nceebonshi mulimusuni Yehova? (Amubone acikope.)

¹² Kuli sheebo shiinji abuumbi sheelete kutupa kusuna Yehova. Kucakubonenaako, mwakesa mukushiba kwaamba ayi Yehova ‘nkantupu kapa buumi’ alimwi ngootupa “shipo shoonse shibotu  shitacite kampenda.” (Kulu. 36:9; Jemu. 1:17) Shintu shoonse shibotu nshemucite shilaswa kuli Lesa wesu ucite lusuno alimwi ushikwaaba.

13. Ino nceebonshi cilubula ncipo cibotu abuumbi Lesa ncaakatupa?

¹³ Cilubula ncipo cibotu abuumbi Yehova ncaakatupa. Ino nceebonshi nceenga twaambila boobo? Amuyeeye pabushicibusa buyumu buli pali Yehova a Mwanaakwe. Yesu wakaamba ayi: ‘Bata balinsuni.’ Alimwi wakaamba ayi alakwe Baishi alibasuni. (Joni 10:17; 14:31) Bushicibusa bwabo bwakayuminaako ndyebakalinga pomwi kwamyaaka iinji abuumbi. (Tus. 8:22, 23, 30) Amuyeeyebo Lesa mbocakamucisa kumoyo ndyaakasuminisha Mwanaakwe kupenshekwa akufwa. Yehova alibasuni bantu kwiilikaawo andimwe cakwaamba ayi wakaaba Mwanaakwe ngwaasuni abuumbi mbuli cilubula kwaamba mwebo abantu bamwi mukekale kwamuyayaya. (Joni 3:16; Gala. 2:20) Ici nceebo ciyandika abuumbi ceelete kutupa kusuna Lesa.

14. Ino ncintu nshi cibotu abuumbi nceenga mwasalaawo kucita mubuumi bwanu?

¹⁴ Mulimusuni abuumbi Yehova ceebo cakwaamba ayi mwakeeya shiinji pali nguwe. Ncakutatoonsha kwaamba ayi mulisuni kuba abushicibusa buyumu anguwe pacecino ciindi alimwi akwamuyayaya. Alimwi inga mwacikonsha kucita boobo. Alamuyuminisha kunoocita shintu sheenga shasangalasha nguwe. (Tus. 23:15, 16) Inga mwacita boobo kuteshi kwiindabo mushintu nshemwaamba sombi amushintu  nshemucita. Nshemucita mubuumi bwanu shilaakutondesha kwaamba ayi mulimusuni abuumbi Yehova. (1 Joni 5:3) Ici ncintu cibotu abuumbi nceenga mwasalaawo kucita mubuumi bwanu.

15. Ino inga mwatondesha buyani ayi mulimusuni Yehova?

¹⁵ Ino inga mwatondesha buyani ayi mulimusuni Yehova? Cakutaanguna, mulyeelete kupaila kuli Lesa wancine eenkabo kwaamba ayi mwaabe buumi bwanu kuli nguwe. (Kulu. 40:8) Lyalo mulatondesha kubantu boonse ayi mwakalyaaba kuli Lesa kwiinda mukubombekwa. Kweelana ambotweeya kumatalikilo kwa mutwi uyu, bushiku bwa kubombekwa mbushiku buyandika abuumbi mubuumi bwanu alimwi busangalasha. Mulatalika kubikila maano kushintu Yehova nshaasuni kuteshi kushintu nshemusuni. (Loma. 14:8; 1 Pit. 4:1, 2) Uku nkusala kuyandika abuumbi. Sombi kulamupa coolwe cakuba abuumi bubotu kwiindaawo. Munshila nshi?

16. Kweelana a Kulumbaisha 41:12, ino nshiinshi Yehova nsheshi akacitile baabo basalaawo kumusebensela kwa buumi bwabo boonse?

¹⁶ Yehova ncakubonenaako ciinditeewo cakutondesha mushimu wa bwaabi. Yehova lyoonse ananoomupa shiindite pasheesho nshemumupa. (Maako 10:29, 30) Na mwaaba buumi bwanu kuli nguwe, alaakumupa kuba alusangalalo, kumupa shoolwe shiinji akumupa nshemuyandika mubuumi nabi ndyetuli mucishi cino cibiibi. Alimwi aya ngamatalikilobo. Pesule lya kubombekwa, inga mwatolelela kusebensela Ishiwanu ngomusuni, kwamuyayaya. Mulaakutolelela kusuna Ishiwanu akukala kwamuyayaya bweenka mbuli nguwe.​—Amubelenge Kulumbaisha 41:12.

17. Ino nciinshi Yehova ncaatacite nceenga mwamupa?

¹⁷ Na mwaaba buumi bwanu kuli Lesa akubombekwa, mulaba acoolwe cakupa Ishiwanu cintu cimwi ciyandika abuumbi. Alamupa shintu shiinji shibotu akumupa kuba alusangalalo. Amwebo inga mwapa mulengi wa liculu acishi capanshi cintu cimwi ncaatacite, nkokwaamba ayi kulyaaba kumusebensela cakushomeka. (Jobo 1:8; 41:11; Tus. 27:11) Iyi ni nshila ibotu abuumbi mbweenga mwasalaawo kusebensesha buumi bwanu. Ncakutatoonsha kwaamba ayi kusuna Yehova ncoceebo ciyandika abuumbi ceelete kumupa kusalaawo kubombekwa.

18. Ino njimiipusho nshi njeenga mwaliipusha?

¹⁸ Ino inga mwaukumbula buyani mwiipusho wakwaamba ayi, Sa mulaakubombekwa? Taakuwo muntu umwi weenga wamukumbwitako mwiipusho uyu. Sombi inga cabota kuliipusha ayi, ‘Sa ndilibambite kubombekwa?’ (Milimo 8:36) Amuyeeye pasheebo shotatwe nshetwabandikaawo. Cakutaanguna, mulisuni cancine abululami. Cabili, mulimusuni Yesu Klistu. Alimwi ceebo catatu ciyandika abuumbi ncakwaamba ayi, mulimusuni Yehova. Aboobo amuliipushe ayi, ‘Sa ndisuni kubaako paciindi bantu boonse ndyeshi bakanokwaamba cancine akucita shiluleme? Sa ndisuni kwaamba ayi Mwanaakwe Lesa abe Mwaami wangu alimwi ayi ndisuni kukonkela cakubonenaako cakwe? Sa ndisuni kucita shisangalasha Yehova kwiinda mukusalaawo kumusebensela mbuli Lesa wangu?’ Na mwakumbula ayi ee kumiipusho yoonse iyi, ino nceebonshi tamutosalaawo kubombekwa?​—Milimo 16:33.

19. Ino nceebonshi tamweelete kuwayawaya kusalaawo kubombekwa? Amwaambe cikoshanyo. (Joni 4:34)

¹⁹ Na mutowayawaya kusalaawo kubombekwa, amuyeeye pacikoshanyo Yesu ncakaamba. (Amubelenge Joni 4:34.) Yesu wakakoshanisha kucita kuyanda kwa Baishi, ku shakulya. Ino nceebonshi? Shakulya shilayandika kuli ndiswe. Yesu wakalinga kucishi kwaamba ayi shintu shoonse Yehova nshaatulwiita kucita shilatucafwa. Yehova taasuniiwo kwaamba ayi tunoocita shintu shili shoonse sheenga shatuletela mapensho. Sa Yehova alisuni kwaamba ayi musalewo kubombekwa? Ee. (Milimo 2:38) Aboobo inga mwashoma cakutatoonsha kwaamba ayi kukonkela mulawo wakwaamba ayi mulyeelete kubombekwa, kulaakumucafwa. Na inga tamuwayiwayi kulya shakulya nshemusuni, ino nceebonshi mutowayawaya kusalaawo kubombekwa?

20. Ino tulaakwiiya nshi mumutwi utokonkelaawo?

²⁰ Ino nciinshi cipa bamwi kuwayawaya kusalaawo kubombekwa? Baanji mpashi inga baamba ayi, “Nshilibambiteewo.” Cancine ncakwaamba ayi kusalaawo kwaaba buumi bwanu kuli Yehova akubombekwa, ncintu ciyandika abuumbi nceenga mwasalaawo kucita mubuumi bwanu. Aboobo mulyeelete kuyeeyawo cakubikila maano akusebensa cankusu kwaamba ayi mweelele. Alimwi inga peenda ciindi kwaamba ayi mweelele kubombekwa. Sombi na mulisunishishi kusalaawo kubombekwa, ino nshiinshi nsheenga mwaciita pacecino ciindi kwaamba ayi mulibambile? Tulaakucana cikumbulo kumwiipusho uyu mumutwi utokonkelaawo.