Ino nceebonshi musankwa Bowasi ngwakeeta ayi “mwana” wakaamba ayi inga “wanyonyoola” buboni bwakwe na weeba Lute? (Lute 4:1, 6)

Muciindi camu Baibo, na musankwa wafwa kwakubula kushiyaawo mwaana, ino shintu nshaakalinga kucite shakalinga kuba sha baani? Sa liina lyakwe lyakalinga kulobabo? Tulacana shikumbulo kumiipusho iyi mumilawo yakwe Mose.

Na musankwa wakalinga kucite musena wafwa, ino musena uyo wakalinga kuba wa baani, alimwi ino nshiinshi shakalinga kucitika na musankwa waba mukandu lyalo akuulisha musena wakwe? Mukwabo na shikamukowa umwi wa pafwiifwi ngowakalinga kweelete kulubula musena uyo. Ici cakalinga kupa kwaamba ayi musena uyo utolelele kuba wa bamumukwashi.​—Lefi. 25:23-28; Shakube. 27:8-11.

Ino ishi shakalinga kucafwa buyani kwaamba ayi liina lya mulobe litaloobi? Ici cakalinga kukonsheka na mukwabo weeba mulamu wakwe uyo wakalinga kweebetwe ku musankwa wakafwa. Ubu mbocakaba akuli Lute. Musankwa wakalinga kweeba mulamu wakwe wakalinga kweebetwe ku musankwa uyo wakafwa kwaamba ayi ashalilemo mwaana uyo wakalinga kusa mukupekwa liina lya mulobe akupyana shintu shakwe. Bubaambo ubu bwakalinga kupa kwaamba ayi mukalubinje alakwe alamwe kabotu.​—Duto. 25:5-7; Mate. 22:23-28.

Amuyeeye pacakubonenaako cakwe Naomi, mwanakashi uyo wakalinga kweebetwe ku musankwa waliina lya Elimeleki. Elimeleki alimwi abana bakwe basankwa bobilo ndyebakafwa, Naomi wakacaala kaataciteewo musankwa wa kumulama. (Lute 1:1-5) Naomi a Lute ndyebakashika ku Juda, Naomi wakalwiita Lute mulokashi wakwe kuya mukubandika a Bowasi kwaamba ayi oole musena wabo. Bowasi wakalinga shikamukowa wa pafwiifwi wakwe Elimeleki. (Lute 2:1, 19, 20; 3:1-4) Nacibi boobo, Bowasi wakeshiba ayi kwakalinga shikamukowa umwi wa pafwiifwi abuumbi uyo wakalinga kweelete kucita boobo. Aboobo shikamukowa uyo ngowakalinga kweelete kuba wakutaanguna kusalawo na inga waba shikulubula.​—Lute 3:9, 12, 13.

Pakutaanguna, shikamukowa uyo wakasumina kucita boobo. (Lute 4:1-4) Wakalinga kucishi ayi wakalinga kuyandika kulipila maali, kwaamba ayi oole musena wakalinga wakwe Elimeleki. Alimwi wakalinga kucishi kwaamba ayi Naomi wacembela aboobo inga tabiiwo amwaana weenga wapyana buboni bwakwe Elimeleki. Musena uyo naakwiinga wakaba wa musankwa uyu akuba lubasu lwa buboni bwakwe. Musankwa uyu alyeelete wakayeeya ayi kucita boobo kulibo kabotu.

Sombi musankwa uyu wakasalawo kutoola musena wakalinga wakwe Elimeleki ndyakeshiba ayi wakalinga kuyandika kweeba Lute. Musankwa ulya wakaamba ayi: “Nshikoonshi kuula ceebo ano citokwaamba ayi bana bangu tabakoonshi kuubwesa nebo na ndafwa.” (Lute 4:5, 6) Ino nciinshi cakapa musankwa uyu kwaalula miyeeyo yakwe?

Na musankwa uyu nabi umwi weeba Lute lyalo akushalilamo mwaana musankwa, nkokwaamba ayi mwaana musankwa uyo ngowakalinga kusa mukupyana musena wakwe Elimeleki. Ino kucita boobo kwakalinga kusa mukunyonyoola buyani buboni bwamusankwa uyu? Baibo tayaambiwo, sombi mpashi inga twayeeya pamakani aaya atokonkelaawo.

• Cakutaanguna, musankwa uyu naakwiinga wakanyonyoola maali akwe kuula musena wakwe Elimeleki, mukwiinga musena uyo wakalinga kusa mukuba wa mwaana musankwa wakwe Lute kuteshi waakwe.

• Cabili, naakwiinga wakaba amukuli wakulama Naomi a Lute.

• Catatu, naakwiinga musankwa uyu wakaba abaana abamwi kuli Lute, naakwiinga baana abo bakaabana buboni bwakwe abaana bamwi mbwaakalinga kucite.

• Cane, naakwiinga musankwa uyu taakalinga kucitewo baana kumwi, naakwiinga mwaana musankwa ngwaakashalila muli Lute ngowakapyana musena wakwe Elimeleki alimwi amusena wa musankwa uyu. Aboobo musena wakwe naakwiinga wakapekwa ku mwaana musankwa wakapekwa liina lyakwe Elimeleki kuteshi liina lyakwe. Aboobo musankwa uyu wakakaka kucafwa Naomi kwaamba ayi atanyonyooli buboni bwakwe. Musankwa uyu wakabona kwaamba ayi cakalingabo kabotu kwaamba ayi Bowasi uyo wakalinga shikulubula wabili acite boobo. Bowasi wakacita boobo mukwiinga wakalinga kusuni “kuboosha buboni bwa mulobe mumaansa aba muŋanda yakwe.”​—Lute 4:10.

Citooboneka ayi musankwa uyu wakalinga kusunishishi kwaamba ayi liina lyakwe litaloobi akutolelela kuba abuboni bwakwe. Wakalinga kulisuni abuumbi. Ano nabi kwaamba ayi musankwa uyu wakeelesha cankusu kwaamba ayi liina lyakwe litaloobi, kushika apacecino ciindi liina lyakwe tatulishiiwo. Alimwi taakwe kubaawo acoolwe cilibetele Bowasi ncaakapekwa cakuba womwi wa bamulunyungu umo mwakesa mukushalilwa Yesu Klistu, uyo wakesa mukuba Mesiya. Shakaswaamo shakabica abuumbi. Musankwa uyu wakasowa coolwe mukwiinga wakakaka kucafwa muntu wakalinga kuyandika lucafwo ceebo cakulisuna!​—Mate. 1:5; Luka 3:23, 32.