1-2. Ino nceebonshi tamweelete kulefuka na mutoobona ayi tamulibambite kubombekwa? (Amubone cikope cili papeeji yakutaanguna.)

 NA MULISUNI kubombekwa, nkokwaamba ayi mwakasalaawo kucita cintu cili kabotu. Sa mulilibambite kubombekwa pacecino ciindi? Na mulilibambite alimwi bamanene bakabona ayi mutokweelela, amukacite boobo pa kubungana kwalubasu nabi pa kubungana kunene kutokonkelaawo. Na mukacite boobo, mulaakuba abuumi bucite mpindu ndyeshi mukanoosebensela Yehova.

² Nacibi boobo, sa kuli umwi wakamulwiitawo kale ayi kuli shimwi nshemweelete kucita kwaamba ayi muye panembo akweelela kubombekwa? Na mpashi nobeene mutoobona ayi kuli shimwi nshemweelete kucita. Na mboboobo, mutalefuki. Inga mwaya panembo akweelela kubombekwa, inga caba ayi muli wacanike nabi wacinene.

3. Ino ngu mwiipusho nshi musankwa mwine Isopya ngwakeepusha Filipi, alimwi ino ngu mwiipusho nshi ngweenga twaliipusha? (Milimo 8:36, 38)

³ Amubelenge Milimo 8:36, 38. Musankwa mwine Isopya wakeepusha Filipi ayi: “Sa kuli cimwi ceenga cankasha kubombekwa?” Musankwa uyu wakalinga kusunishishi kubombekwa. Ano sa ncakwiila wakalinga kulibambite kucita boobo?

4. Ino musankwa mwine Isopya wakatondesha buyani ayi wakalinga kusunishishi kutolelela kwiiya?

⁴ Musankwa mwine Isopya wakalinga waya ku Jelusalemu “mukulambila Lesa.” (Milimo 8:27) Musankwa uyu taakalinga mwine Juda. Aboobo, cilyeelete kwaamba ayi wakasumina bupailishi bwa baJuda. Ncakutatoonsha kwaamba ayi wakeeya pali Yehova  kuswa mu Malembo asalalite amuci Ebulu. Nacibi boobo, wakalinga kusunishishi kwiiyilaawo ashimwi. Alimwi ino nshiinshi musankwa uyu nshaakalinga kucita, Filipi ndyaakamukumanya? Wakalinga kubelenga libuku lyakupeta mushinshimi Isaya ndyaakalemba. (Milimo 8:28) Aya taakalinga makani oobu kunyumfwisha. Musankwa mwine Isopya taakalinga kusuni kweelabo pakwiiya makani oobu kunyumfwisha, sombi wakalinga kusuni kutolelela kwiiyilaawo ashimwi.

5. Ino nshiinshi musankwa mwine Isopya nshaakacita pashintu nshaakeeya?

⁵ Musankwa uyu wakalinga kulemekwa abuumbi alimwi “wakalinga shikulama buboni bwakwe” Kandasi mwaami mwanakashi wa ku Isopya. (Milimo 8:27) Aboobo alyeelete wakalinga kucite shakucita shiinji abuumbi. Nacibi boobo, wakalinga kucana ciindi cakuya mukulambila Yehova. Taakwe kweelabo pakwiiya cancine, sombi wakalinga kukonkela nshaakalinga kwiiya. Aboobo wakeenda mushinso ulaamfu kuswa ku Isopya kuya ku Jelusalemu mukulambila Yehova. Musankwa mwine Isopya wakacita nsheenga wacikonsha kwaamba ayi aye mukulambila Yehova nabi kwaamba ayi mushinso wakalinga ulaamfu alimwi wakalinga kweelete kusebensesha buboni bwakwe.

6-7. Ino nshiinshi shakacafwa musankwa mwine Isopya kutolelela kuyumya lusuno lwakwe pali Yehova?

⁶ Musankwa mwine Isopya wakeeya njiisho shimwi shiyandika kuswa kuli Filipi. Njiisho yomwi panjiisho nshaakeeya njakwaamba ayi Yesu ngo Mesiya. (Milimo 8:34, 35) Ncakutatoonsha kwaamba ayi mweendeleshi uyu wakasangalala kwiiya Yesu nshaakamucitila. Ino nshiinshi nshaakacita pesule lya kwiiya makani aya? Naakwiinga wakalinga kusuni naakwiinga taakwe kucitaawo shili shoonse pashintu nshaakeeya. Muciindi cakucita boobo, wakatolelela kuyumya lusuno lwakwe pali Yehova alimwi a Yesu. Wakasalaawo kucita cintu ciyandika abuumbi kwiinda mukubombekwa akuba shikwiiya wakwe Yesu Klistu. Filipi ndyaakabona ayi musankwa uyu wakalinga kulibambite, wakamubombeka.

⁷ Amwebo inga mwalibambila kubombekwa na mwakonkela cakubonenaako ca musankwa mwine Isopya. Inga mwaamba cakutatoonsha ayi, “Sa kuli cimwi ceenga cankasha kubombekwa?” Atubandike nsheenga mwaciita kwaamba ayi mukonkele cakubonenaako ca musankwa mwine Isopya: Wakatolelela kwiiya, kukonkela nshaakalinga kwiiya akutolelela kuyumya lusuno lwakwe pali Lesa.

8. Ino lilembo lya Joni 17:3 lilaamba ayi mulyeelete kucita nshi?

⁸ Amubelenge Joni 17:3. Sa maswi aya Yesu ngakaamba akamucafwa kusalaawo kutalika kwiiya Baibo? Ncakwiila sobaanji akatucafwa. Maswi aya alatucafwa akutolelela kwiiya pali Lesa. Ino nceebonshi? Nceebo cakwaamba ayi teshi tukacilekeewo kwiiya pali ‘Lesa wancine  eenkabo.’ (Shiku. 3:11) Tulaakutolelela kwiiya pali nguwe kwamuyayaya. Kwiiya shiinji pali Yehova, kulaakutucafwa kuba abushicibusa buyumu anguwe.​—Kulu. 73:28.

9. Ino nshiinshi nshotweelete kucita pesule lya kwiiya makani amu Baibo oobu kunyumfwisha?

⁹ Na twatalika kwiiya pali Yehova, tulataanguna kwiiya makani amu Baibo oobu kunyumfwisha. Munkalata Paulo njaakalembela bene Ebulu, wakaamba pamakani amu Baibo oobu kunyumfwisha ayi, “shiiyo shitaanshi sha makani akwe Lesa.” Taakalinga kusansulula ayi “shiiyo shitaanshi” tashakalinga kuyandika. Sombi wakalinga kusansulula ayi shili anga ni meleki ipa kwaamba ayi mwaana akule kabotu. (Ebu. 5:12; 6:1) Nacibi boobo, wakayuminisha Beneklistu boonse kwaamba ayi tabakalinga kweelete kweelabo pakwiiya shiiyo shitaanshi, sombi akwiiya makani amu Maswi akwe Lesa ateshi oobu kunyumfwisha. Sa amwebo mulisunishishi kwiiya makani amu Baibo ateshi oobu kunyumfwisha? Sa mulisunishishi kutolelela kwiiya pali Yehova akuyanda kwakwe?

10. Ino nceebonshi bamwi cilabayumina kwiiya?

¹⁰ Sobaanji cilatuyumina kwiiya. Sa ubu mbocibete kuli ndimwe? Sa ndyemwakalinga kucikolo mwakeeya bwakubelenga kabotu? Sa mwakalinga kunyumfwa kabotu kwiiya? Sa mwakalinga kusangalala ndyemwakalinga kubelenga akulinyumfwa ayi mweeya shiinji, na mpashi mwakalinga kulinyumfwa ayi nciyumu kuli ndimwe kwiiya? Na mboboobo, tamubete nweenka. Nacibi boobo, Yehova inga wamucafwa. Ngu Lesa umaninite alimwi ngu Mufundishi ucishi kabotu kwiisha.

11. Ino Yehova alatondesha buyani ayi ngu ‘Mufundishi Wiinditewo’?

¹¹ Yehova ngu “Mufundishi wanu Wiinditewo.” (Isa. 30:20, 21, NWT) Ngu Mufundishi utukalikila moyo, ututondesha nkumbu alimwi utunyumfwishisha. Alabikila maano ku shibotu nshebacita abo mbaatokwiisha. (Kulu. 130:3) Alimwi taatulangili kucita nsheenga tatucikoonshi. Alicishi kabotu mbwaakalenga boongo, cipo cibotu ncaakamupa. (Kulu. 139:14) Soonse tulasuna kwiiya shintu. Mbuli Mulengi wesu, alisuni kwaamba ayi tutolelele kwiiya alimwi katusangalala kucita boobo. Aboobo pacecino ciindi ncintu ca maano kusunishisha kwiiya cancine camu Baibo. (1 Pit. 2:2) Amusale shakucita nsheenga mwacikonsha kukumanisha, alimwi akuba amulongo ubotu wakubelenga akwiiya Baibo. (Joshu. 1:8) Kwiinda mulucafwo lwakwe Yehova, mulaakunosangalala kubelenga akwiiya shiinji pali nguwe.

12. Ino nceebonshi tulyeelete kwiiya makani aamba pabuumi bwakwe Yesu anciito yakwe yakushimikila?

¹² Lyoonse munoocana ciindi cakukutumana akuyeeya pabuumi bwakwe Yesu anciito yakwe yakushimikila. Cintu comwi ceenga catucafwa kutolelela kusebensela Yehova munshiku shino shiyumu, nkutolelela kukonkela cakubonenaako cakwe Yesu. (1 Pit. 2:21) Yesu wakaamba cakuteenda mweela ayi bashikwiiya bakwe balaakwiinda mumapensho. (Luka 14:27, 28) Nacibi boobo, wakalinga kushomete cakutatoonsha kwaamba ayi bashikwiiya bakwe bancine balaakutolelela kushomeka kuli Lesa bweenka lakwe mbwaakacita. (Joni 16:33) Amwiiye makani aamba pabuumi bwakwe Yesu cakubikila maano, akusala nsheenga mwaciita kwaamba ayi munookonkela cakubonenaako cakwe mubuumi bwanu.

13. Ino nciinshi ncomweelete kutolelela kusenga Yehova, alimwi ino nceebonshi?

¹³ Tamweelete kweelabo pakuba alushibo. Ceebo cinene ncomuyandikila kuba alushibo ncakwaamba ayi, mwiiye shiinji pali Yehova akuba amibo mbuli lusuno akushoma muli nguwe. (1 Koli. 8:1-3) Ndyemutokwiiya pali Yehova, amutolelele kumusenga kwaamba ayi amucaafwe kuba alushomo luyumu. (Luka 17:5) Alimwi alaakukumbula mipailo yanu. Lushibo lwancinencine pali Lesa lulaakumucafwa kuba alushomo luyumu ulo lweshi lukamucaafwe kuya panembo.​—Jemu. 2:26.

14. Ino nshiinshi mutumwi Pita nshaakaamba shitondesha kuyandika kwa kukonkela nshetwiiya? (Amubone acikope.)

¹⁴ Mutumwi Pita wakaamba ncociyandikila ku bashikwiiya bakwe Klistu kutolelela kukonkela nshobeeya. Wakaamba pamakani amu Baibo aamba pali Nowa. Yehova wakalwiita Nowa ayi alaakuleta Muyoba Unene, uyo wakalinga kusa mukunyonyoola bamucita shibiibi paciindi cilya. Kushibabo kwaamba ayi kulaakusa Muyoba Unene, naakwiinga takukwe kupulusha Nowa amukwashi wakwe. Pita wakalinga kwaamba paciindi Muyoba Unene kootana kusa apaciindi “Nowa ndyaakalinga kupanga bwaato.” (1 Pit. 3:20) Nowa amukwashi wakwe bakakonkela Lesa nshaakabalwiita kwiinda mukupanga bwaato. (Ebu. 11:7) Lyalo Pita wakakoshanisha Nowa nshaakacita ku kubombekwa ndyaakalemba ayi: “Kubombekwa uko kumupulusha bulya.” (1 Pit. 3:21) Aboobo inga twakoshanisha nshemutoocita pacecino ciindi kwaamba ayi mweelele kubombekwa kuncito yakupanga bwaato iyo Nowa amukwashi wakwe njobakasebensa kwamyaaka iinji. Ino nshiinshi nshomweelete kucita kwaamba ayi mulibambile kubombekwa?

15. Ino inga twatondesha buyani ayi twaana cancinencine?

¹⁵ Cintu comwi ncotweelete kutaanguna kucita, nkwaana cancinencine kuswa kushibiibi shesu. (Milimo 2:37, 38) Na twaana cancinencine tulaakuba bashinishite kwaalula buumi bwesu. Sa mwakacileka kucita shintu Yehova nshaapatite mbuli bufuule, kufweba fwaka, na kusebensesha maswi atabete kabotu? (1 Koli. 6:9, 10; 2 Koli. 7:1; Efe. 4:29) Amweeleshe kutolelela kwaalula buumi bwanu na tamuna kucileka kucita shintu ishi. Amusenge lucafwo kuswa kubaabo batomwiisha Baibo na kuswa kubamanene mulibungano. Na muli wacanike alimwi mulekala abashali banu, amubasenge kwaamba ayi bamucaafwe kucileka shilabo shibiibi sheenga shapa kwaamba ayi muteeleli kubombekwa.

16. Ino nshiinshi nshotweelete kucita kwaamba ayi tunolambila Yehova lyoonse?

¹⁶ Cimwi ciyandika nkuba amulongo ubotu wakucita shintu shakumushimu. Ici cileelikaawo kunoocanika kumabungano akwaabanamo lubasu. (Ebu. 10:24, 25) Alimwi na mweelela kunookwaabanamo lubasu muncito yakushimikila, amube bashinishite kunoocita boobo lyoonse. Na lyoonse kamwaabanamo lubasu muncito iyi ipulusha bantu mulaakunosangalala abuumbi  muncito iyi. (2 Timo. 4:5) Na muli wacanike alimwi mulekala abashali banu, amuliipushe ayi: ‘Sa bashali bangu balayandika kunonjiibalusha kwaamba ayi noocanika kumabungano akwaabanamo lubasu muncito yakushimikila? Na sa ndacita boobo kwakubula kwiibalushikwa?’ Na mulacita boobo kwakubula kwiibalushikwa, mulatondesha ayi mulicite lushomo muli Yehova Lesa, mulimusuni alimwi mulalumba pashintu nshaamucitila. Kucita boobo nkutondesha kwaamba ayi mutosebensela Yehova cakulyaaba. (2 Pit. 3:11; Ebu. 13:15) Shipo shoonse nshetupa kuli Yehova kuswa panshi lya moyo, shilamusangalasha. (Amweelanye a 2 Bene Kolinto 9:7.) Tulacita shoonse ishi ceebo cakwaamba ayi tulasangalala kusebensela Yehova kushika peela nkusu shesu.

17-18. Ino ngu mubo nshi uyandika weshi ukamucaafwe kuya panembo akweelela kubombekwa, alimwi ino nceebonshi? (Tushimpi 3:3-6)

¹⁷ Mulaakwiinda mumapensho ndyemutotolelela kuya panembo kwaamba ayi mweelele kubombekwa. Bantu bamwi mpashi inga bamuweluluka na kumupikisha ceebo ca nshemushoma. (2 Timo. 3:12) Ndyemutokweelesha kucileka kucita cilabo cimwi citabete kabotu, mpashi cimwi ciindi inga mwabooshaawo kucita cilabo ico. Na mpashi mutolinyumfwa cibiibi akwaalilwa kukalika moyo ceebo cakwaamba ayi mutokwaalilwa kucita nshemusuni kukumanisha. Ino nciinshi ceenga camucafwa kuliyumya? Mubo uyandika abuumbi weenga wamucafwa, nkusuna Yehova.

¹⁸ Kusuna Yehova ngu mubo ubotu abuumbi ngomucite. (Amubelenge Tushimpi 3:3-6.) Kusuna Lesa abuumbi kulaakumucafwa kuliyumya mumapensho. Liinji Baibo ilaamba Yehova mbwaatondesha lusuno lutamaani ku basebenshi bakwe. Ceebo cakwaamba ayi Yehova alicite lusuno lutamaani, teshi akalekeleshewo basebenshi bakwe na kucileka kubatondesha lusuno. (Kulu. 100:5) Mwakalengwa mucikoshanyo cakwe Lesa. (Mata. 1:26) Ino inga mwatondesha buyani lusuno lwa mushobo uyu?

19. Ino inga mwatondesha buyani ayi mulalumba abuumbi pashintu shoonse Yehova nshaamucitila? (Bene Galatiya 2:20)

¹⁹ Amube bantu balumba. (1 Tesa. 5:18) Bushiku abushiku amuliipushe ayi, ‘Ino Yehova wantondesha buyani lusuno?’ Lyalo amube bashinishite kulumba Yehova mumipailo yanu akwaamba shintu nshaamucitila. Amushibe kwaamba ayi Yehova alacita shintu shibotu kuli ndimwe mukwiinga alimusuni bweenka mbwaakacita ku mutumwi Paulo, uyo wakesa mukushiba cancine ici pali Yehova. (Amubelenge Bene Galatiya 2:20.) Amuliipushe ayi, ‘Sa anebo ndisuni  kumutondesha lusuno Yehova?’ Kusuna Yehova kulaakumucafwa kutolelela kukaka meelesho alimwi akuliyumya ndyeshi mukanookwiinda mumapensho. Kulaakumucafwa kutolelela kulambila Yehova lyoonse akutondesha ayi mulimusuni.

20. Ino nshiinshi nshomweelete kucita kwaamba ayi mwaabe buumi bwanu kuli Yehova, alimwi ino nceebonshi kucita boobo kulayandika?

²⁰ Mukuya kwaciindi, lusuno lwanu pali Yehova lulaakumupa kulyaaba kuli nguwe mumupailo. Na mukalyaabe kuli Yehova, inga mwalangila kuba abushicibusa buyumu anguwe kwamuyayaya. Alimwi mulashomesha Yehova ayi mulaakutolelela kumusebensela nabi mukeende mumapensho ayumu buyani. Tamuyandiki kulyaaba kuli Lesa alimwi. Ncakwiila, kusalaawo kubombekwa ncintu ciyandika abuumbi muntu nceenga wasalaawo kucita. Sombi amuyeeye paceeci: Mulaakusalaawo shakucita shiinji mubuumi bwanu, alimwi shimwi shilaakuba shibotu. Sombi taakuwo cintu cibotu abuumbi nceshi mukasaleewo kucita kwiinda kwaaba buumi bwanu kuli Yehova. (Kulu. 50:14) Satana alaakweelesha kupa kwaamba ayi mucileeke kusuna Ishiwanu kwaamba ayi mutatoleleli kushomeka kuli Lesa. Mutakasuminishi Satana kunyonyoola bushicibusa mbomucite a Lesa! (Jobo 27:5) Kumusuna abuumbi Yehova kulaakumucafwa kutolelela kumusebensela kweelana ambomwakamushomesha. Alimwi mulaakuba abushicibusa buyumu anguwe.

21. Ino nceebonshi nceenga twaambila ayi kubombekwa ngamatalikilobo?

²¹ Pesule lyakwaamba ayi mwaaba buumi bwanu kuli Yehova mumupailo, amulwiite bamanene bamulibungano linemishaanu kwaamba ayi mulisuni kubombekwa. Sombi lyoonse munookwiibaluka kwaamba ayi kubombekwa ngamatalikilobo. Pesule lya kubombekwa inga mwalangila kusebensela Yehova kwamuyayaya. Aboobo amuyumye lusuno lwanu pali Yehova. Amusale shakucita sheenga shapa kwaamba ayi lusuno lwanu pali nguwe lunooyuminaako bushiku abushiku. Kucita boobo, kulaakumupa kwaamba ayi mukasaleewo kubombekwa. Bushiku bwa kubombekwa bulaakuba bushiku busangalasha. Sombi bulaakuba ngamatalikilobo. Amutolelele kuyumya lusuno ndomucite pali Yehova a Mwanaakwe!