1. Ino nciinshi cakamukankamika ndyemwakeelesha kulwiitaako bamwi cancine camu Baibo?

SA mutokwiibaluka mbocakalinga ndyemwakashiba ayi mwacana cancine camu Baibo? Cakalinga cuubu kunyumfwishisha shoonse nshomwakalinga kwiiya mu Baibo! Mwakalinga kubona ayi uli woonse inga wakondwa anshomwakalinga kwiiya. Mwakashoma cakutatoonsha kwaamba ayi makani amu Baibo inga alengesha bantu kuba alusangalalo pacecino ciindi alimwi akulangila buumi bubotu kunembo. (Kulu. 119:105) Aboobo calusangalalo mwakatalika kulwiitaako beshicibusa alimwi abeshikamukowa cancine ncomwakeeya. Ano ino nshiinshi shakacitika? Mwakakankamana baanji ndyebakakaka nshomwakabalwiita.

2-3. Ino bantu baanji bakacita buyani Yesu ndyaakacita shaankamiko?

² Tatweelete kukankamana na bamwi bakaka kukutika kumakani abotu ngotushimikila. Nabi kwaamba ayi Yesu wakacita shaankamiko kutondesha ayi wakaswa kuli Lesa, bantu baanji paciindi cilya bakakaka kumushoma. Kucakubonenaako, Yesu wakabusha Lasalo, caankamiko abo boonse bakalinga kumupikisha ncobakalibonena ameenso. Nacibi boobo, bamatanjilili ba baJuda bakakaka kushoma kwaamba ayi Yesu ngo Mesiya. Aboobo bakalinga kusuni kucaya Yesu a Lasalo!​—Joni 11:47, 48, 53; 12:9-11.

³ Yesu wakalinga kucishi ayi bantu baanji teshi bakamushoome ayi ngu Mesiya. (Joni 5:39-44) Wakalwiita likoto lya bashikwiiya bakwe Joni Mubombeki ayi: “Ulicite coolwe muntu uyo utatonshi muli ndime.” (Mate. 11:2, 3, 6) Ino nceebonshi bantu baanji bakakaka kushoma muli Yesu?

4. Ino tutokwiiya nshi mumutwi uyu?

⁴ Mumutwi uyu alimwi autokonkelaawo, tutobandika shakapa kwaamba ayi bantu baanji bakake kushoma muli Yesu ndyaakalinga pacishi capanshi. Tutokwiiya ashilengesha bantu baanji  kukaka kukutika makani abotu ngotushimikila pacecino ciindi. Alimwi ciyandika abuumbi, tutokwiiya ancotuyandikila lushomo luyumu muli Yesu kwaamba ayi tutacileeki kumukonkela.

5. Ino nciinshi cakapa bamwi mpashi kuyeeya ayi Yesu taakalinga Mesiya wakashomeshekwa?

⁵ Bantu baanji bakakaka kushoma muli Yesu ceebo ca musena nkwaakakulila. Bakalinga kucishi kwaamba ayi Yesu ngu mufundishi ucishi kabotu kwiisha alimwi wakalinga kucita shaankamiko. Sombi bakalinga kumubonabo ayi ngu mwanaakwe shikubesa mukandu. Alimwi wakakulila ku Nasaleti, ndabala mpashi bantu njobakalinga kubona ayi taakuwo mboibete. Nabibo Natanaelo, uyo wakesa mukuba shikwiiya wakwe Yesu, pakutaanguna wakaamba ayi: “Sa mu Nasaleti amwalo inga mwaswa cintu cibotu?” (Joni 1:46) Mpashi Natanaelo taakalinga kwisuniiwo ndabala Yesu nkwaakakulila. Na mpashi wakalinga kuyeeya pa bushinshimi bucanika pa Mika 5:2, ubo bwakaambila limwi ayi Mesiya ulaakushalilwa mundabala ya Betileemu kuteshi mu Nasaleti.

6. Ino nciinshi cakalinga kweelete kucafwa bantu bamuciindi cakwe Yesu kushiba ayi Yesu ngo Mesiya?

⁶ Ino Malembo alaamba buyani? Mushinshimi Isaya wakaambila limwi ayi balwani bakwe Yesu teshi bakabikile maano ‘kulunyungu lwakwe.’ (Isa. 53:8) Makani aanji aamba sha lunyungu lwakwe Yesu akaambilwa limwi. Naakwiinga bantu bakacana ciindi cakulanga langa pamakani aya, naakwiinga bakeshiba ayi Yesu wakashalilwa mu Betileemu alimwi wakalinga wamulunyungu lwa Mwaami Defedi. (Luka 2:4-7) Aboobo Yesu wakashalilwa kumusena wakaambilwa limwi palilembo lya Mika 5:2. Ano ino nciinshi cakabapa kutoonsha? Bakalinga kutoonsha mukwiinga tabakalinga kukalika moyo kwaamba ayi bashibe makani oonse. Aboobo bakamukaka Yesu.

7. Ino nceebonshi bantu baanji munshiku shino tabasuniiwo kuba Bakamboni Bakwe Yehova?

⁷ Sa ili ndyelipenshi ndyetubona amunshiku shino? Ee. Basebenshi baanji bakwe Yehova teshi babile; aboobo bantu baanji balababona ayi ‘tabaiiteewo alimwi mbantubo.’ (Milimo 4:13) Bantu bamwi balayeeya ayi Bakamboni Bakwe Yehova tabeelete kwiisha bamwi makani amu Baibo ceebo cakwaamba ayi tabakwe kuya kushikolo shipukite nkobaiisha sha bupailishi. Bamwi balaamba ayi Bakamboni Bakwe Yehova “mbupailishi bwaku America,” sombi cancine ncakwaamba ayi Bakamboni Bakwe Yehova baanji tabekali ku America. Alimwi bamwi bakalwiitikwa ayi Bakamboni tabashomi muli Yesu. Kwamyaaka iinji, bantu baleeta Bakamboni Bakwe Yehova ayi “beshikusensa baku America,” alimwi ayi “mbantu babiibi abuumbi.” Aboobo bantu baanji tabasuniiwo kuba Bakamboni Bakwe Yehova ceebo cakunyumfwa makani aya alimwi akutashiba cancine pabantu bakwe Yehova.

8. Kweelana a Milimo 17:11, ino nshiinshi bantu nshobeelete kucita kwaamba ayi bashibe bantu bakwe Lesa munshiku shino?

⁸ Ino muntu inga wacita buyani kwaamba ayi atolelele kuba alushomo? Bantu balyeelete kulanga langa makani oonse kwaamba ayi bashibe shancine. Ishi nshaakalinga kushinishite kucita shikulemba Baibo Luka. Wakeelesha cankusu kukonkela “cakubikila maano shoonse mbuli mboshibete kuswa kumatalikilo.” Wakalinga kusuni kwaamba ayi bantu ‘bashibe lushinisho’ lwa shintu shoonse nshobakanyumfwa pali Yesu. (Luka 1:1-4) Bweenka mbuli Luka mbwaakacita, ciindi cakutaanguna bene Biliya ndyebakanyumfwa makani abotu aamba pali Yesu, bakatalika kwiinduluka mu Malembo aci Ebulu kwaamba ayi bashinishe na nshobakalinga kwiiya nshancine. (Amubelenge Milimo 17:11.) Amunshiku shino bantu balyeelete kulanga langa makani oonse. Balyeelete kulanga langa akubona na nshobaiisha bantu bakwe Lesa shileendelana a  Malembo. Balyeelete kushiba anciito shicita basebenshi bakwe Yehova munshiku shino. Kushiba nshancine, kulaakubacafwa kutakonkelabo bamwi nshebaamba.

9. Ino nciinshi cakacitika Yesu ndyaakakaka kucita citondesho cakuswa kwiculu?

⁹ Bantu bamwi tabakalinga kumushoma Yesu nabi kwaamba ayi wakalinga kwiisha kabotu. Bakalinga kusuni ayi “ababoneshe citondesho cakuswa kwiculu” ayi ngu Mesiya. (Mate. 16:1) Mpashi bakalinga kusuni ayi acite boobo ceebo ca makani ngotucana palilembo lya Danyelo 7:13, 14. Nacibi boobo, tacakalinga ciindi cakwe Yehova cakukumanisha bushinshimi ubu. Yesu nshaakalinga kwiisha shakalinga kweelete kubacafwa kushiba kwaamba ayi ngo Mesiya. Ano ndyaakakaka kubabonesha citondesho bakamukaka.​—Mate. 16:4.

10. Ino Yesu wakakumanisha buyani shakalemba mushinshimi Isaya pali Mesiya?

¹⁰ Ino Malembo alaamba buyani? Mushinshimi Isaya wakaamba pali Mesiya ayi: “Teshi akapikishe nabi koolobesha, nabi kuya bwaambilisha mumashila.” (Isa. 42:1, 2) Yesu ndyaakalinga kushimikila makani abotu taakalinga kucita shintu shakalinga kweelete kupa kwaamba ayi bantu banobikila maano abuumbi kuli nguwe. Taakwe kuyaka matempele alimwi taakalinga kufwala shakufwala shilibetele, nabi kusuna kwiitwa meena akalinga kwiitwa bamatanjilili ba beshibupailishi. Ndyaakalinga koomboloshekwa, Mwaami Elodi wakalinga kusuni ayi acite cankaamiko, sombi wakakaka. (Luka 23:8-11) Nabi kwaamba ayi Yesu wakalinga kucita shaankamiko, incito inene njaakalinga kubikilaako maano abuumbi nkushimikila makani abotu. Wakalwiita bashikwiiya bakwe ayi: “Ici ncendakeshita.”​—Maako 1:38.

11. Ino nshiinshi shitayandiki bantu nshobayeeya munshiku shino nshetutaabanimo lubasu?

¹¹ Sa ili ndyelipenshi ndyetubona amunshiku shino? Ee. Bantu baanji balanyumfwa kabotu kubona maceeci anene abuumbi ayakitwe ashintu shidulite cakwiindilila, bamatanjilili babupailishi beetwa meena atondesha anga balayandika abuumbi alimwi ashakusekelela bantu baanji nshobateshiiwo kabotu nkoshakaswita alimwi anshoshaamba. Nacibi boobo, bantu beshikuya  kumaceeci aya tabeeyi shiinji pali Lesa alimwi akuyanda kwakwe. Abo besa kumabungano esu a Bwineklistu baleeya Yehova nshaasuni ayi tunoocita. Maanda esu a Bwaami alaboneka abuuya alimwi alasebensa kabotu nabi kwaamba ayi tayakitwe mbuli maceeci. Abo batanjilila tabafwali shakufwala shilibetele na kwiitwa meena atondesha ayi balayandika. Nshetwiiya alimwi anshetushoma shilaswa mu Maswi akwe Lesa. Nacibi boobo, bantu baanji balakaka makani ngotushimikila mukwiinga tatwabanimo lubasu mushintu shiinji nshebacita mukupaila kwabo alimwi nshotwiisha shilapusana anshebasuni kunyumfwa.

12. Kweelana alilembo lya Bene Ebulu 11:1, 6, ino nshiinshi sheenga shayumya lushomo lwesu?

¹² Ino nshiinshi nsheenga twaciita kwaamba ayi tutolelele kuba alushomo? Mutumwi Paulo wakalwiita Beneklistu bakalinga kukala ku Loma ayi: “Muntu ulashoma ceebo cakunyumfwa Makani Abotu alimwi aalo Makani Abotu alanyumfwika kwiinda mukushimikila shapali Klistu.” (Loma. 10:17) Aboobo kwaamba ayi tuyumye lushomo lwesu tulyeelete kwiiya Malembo, kuteshi kwaabanamo lubasu mushakusekelela shicita beshibupailishi isho shipusene a Baibo nshoiisha, nabi shiboneke anga nshibotu. Tulyeelete kuba alushomo luyumu luyakitwe pacancine camu Baibo, mukwiinga ‘taaku muntu weenga wakondelesha Lesa na kaatacite lushomo.’ (Amubelenge Bene Ebulu 11:1, 6.) Aboobo tatweelete kulangila kubona citondesho cakuswa kwiculu kwaamba ayi tushibe ayi twacana cancine. Na katwiiya cakubikila maano njiisho shamu Baibo sheenga shayumya lushomo lwesu, inga twashoma cakutatoonsha kwaamba ayi twakacana cancine.

13. Ino nciinshi cakapa kwaamba ayi bantu baanji bamukaake Yesu?

¹³ Yesu ndyaakalinga pacishi capanshi, bashikwiiya bakwe Joni Mubombeki bakakankamana mukwiinga bashikwiiya bakwe Yesu tabakalinga kulikasha kulya. Yesu wakabasansulwiita ayi tabakalinga kweelete kulikasha kulya ndyaacili muumi. (Mate. 9:14-17) Nacibi boobo, ba Falisi alimwi abamwi bakalinga kumupikisha bakamukaka Yesu mukwiinga taakalinga kukonkela  milawo yabo. Bakakalala ndyaakashilika balwashi pabushiku bwa Sabata. (Maako 3:1-6; Joni 9:16) Bakalinga kulisumpula ayi balakonkela mulawo wa Sabata, nabi kwaamba ayi bakalinga kucita makwebo mu tempele. Alimwi bakakalala Yesu ndyaakabakalalila. (Mate. 21:12, 13, 15) Alimwi abo mbaakashimikila mu sunagogi yaku Nasaleti bakakalala abuumbi ndyaakaamba ayi mbantu balisuni alimwi batacite lushomo bweenka bwakalinga bene Isilaeli. (Luka 4:16, 25-30) Bantu baanji bakamukaka Yesu mukwiinga taakalinga kucita nshebakalinga kulangila.​—Mate. 11:16-19.

14. Ino nciinshi Yesu ncakaambila ayi milawo ya bantu iyo yakalinga kupusene a Malembo nshaamba tayakalinga kabotu?

¹⁴ Ino Malembo alaamba buyani? Yehova kwiinda mu mushinshimi Isaya wakaamba ayi: ‘Aba bantu balaba pafwiifwi anebo mukwaamba, balandemekabo pamulomo, sombi myoyo yabo ili kulaale anebo. Kupaila nkobampaila taaku mbokubete mukwiinga baleeisha milawo ya bantu anga njimilawo yakwe Lesa.’ (Isa. 29:13) Yesu wakaamba cancine, milawo ya bantu iyo yakalinga kupusene ashaamba Malembo tayakalinga kabotu. Abo boonse bakalinga kulemeka bunene milawo ya bantu kwiinda Malembo, bakakaka Yehova alimwi a Mesiya ngwaakatuma.

15. Ino nceebonshi bantu baanji munshiku shino balipatite Bakamboni Bakwe Yehova?

¹⁵ Sa ili ndyelipenshi ndyetubona amunshiku shino? Ee. Bantu baanji balakalala ceebo cakwaamba ayi Bakamboni Bakwe Yehova tabaabanimo lubasu mushakusekelela shiteendelani a Malembo mbuli kusekelela bushiku bwakushalwa alimwi a Kilisimasi. Bamwi balakalala na babona kwaamba ayi Bakamboni Bakwe Yehova bakaka kwaabanamo lubasu mushakusekelela sha cishi na kukonkela milawo ya malilo iteendelani anshaamba Maswi akwe Lesa. Abo bapatite Bakamboni Bakwe Yehova ceebo ca sheebo nshetwabandikaawo, balashoma ayi balapaila Lesa kweelana akuyanda kwakwe. Sombi Lesa inga taakondwiwo akupaila kwabo na kabakonkela milawo ya cishi muciindi cakukonkela Baibo nshoiisha.​—Maako 7:7-9.

16. Kweelana a Kulumbaisha 119:97, 113, 163-165, ino nshiinshi nshotweelete kucita alimwi ino nshiinshi nshotweelete kukaka?

¹⁶ Ino nshiinshi nsheenga twaciita kwaamba ayi tutolelele kuba alushomo? Tulyeelete kwiisuna abuumbi milawo yakwe Yehova alimwi anjiisho shakwe. (Amubelenge Kulumbaisha 119:97, 113, 163-165.) Kusuna Yehova kulaakutucafwa kukaka kukonkela milawo iliyoonse itamusangalashi. Alimwi teshi tukasuminishe cintu nabi comwi kutupa kucileka kusuna Yehova.

17. Ino bantu baanji bakalinga kulangila nshi shakapa kwaamba ayi bakake Yesu?

¹⁷ Yesu ndyaakalinga pacishi capanshi bantu bamwi bakalinga kusuni bweendeleshi bweenga bwaalula shintu. Bakalinga kulangila ayi Mesiya ulaakubaangulula kubweendeleshi bwa bene Loma ubo bwakalinga kubalyatilila. Ndyebakeelesha kubika Yesu pa Bwaami, wakakaka. (Joni 6:14, 15) Bantu bamwi kwiilikaawo abapailishi, bakalisukama ayi Yesu inga waalula bweendeleshi. Alimwi bakalinga kubona ayi ici inga capa kwaamba ayi bene Loma bakalale akunyaya bapailishi nkusu nshobakabapa. Aboobo ici cakapa kwaamba ayi baJuda baanji bamukaake Yesu.

18. Ino mbushinshimi nshi bwamu Baibo bwaamba pali Mesiya baanji mbobatakwe kubikilaako maano?

¹⁸ Ino Malembo alaamba buyani? Nabi kwaamba ayi bushinshimi buunji bwakalinga kutondesha ayi Mesiya ulaakuba Shilumamba eshi akakome balwani bakwe, bushinshimi bumwi bulatondesha ayi wakalinga kweelete kutaanguna kufwa ceebo ca shibiibi shesu. (Isa. 53:9, 12) Ano ino nceebonshi baJuda bakalinga kulangila shiteshi shancine pali Mesiya? Yesu ndyaakalinga pacishi capanshi, bantu baanji tabakalinga  kubikila maano kubushinshimi buli boonse bwatakalinga kwaamba pakumana mapensho ngobakalinga kwiindaamo paciindi cilya.​—Joni 6:26, 27.

19. Ino nshiinshi bantu nshobatulangila kucita isho shipa kwaamba ayi bakake kukutika kumakani ngotushimikila?

¹⁹ Sa ili ndyelipenshi ndyetubona amunshiku shino? Ee. Bantu baanji munshiku shino balakalala mukwiinga tatwaabanimo lubasu mushamapolitiki. Balayeeya ayi aswebo tulyeelete kuvoota. Nacibi boobo, ncotushi ncakwaamba ayi na twasala muntu kuba mweendeleshi, nkokwaamba ayi twakaka Yehova. (1 Samwe. 8:4-7) Bantu bamwi mpashi inga kabayeeya ayi tulyeelete kuyaka shikolo ashipatela alimwi akusebensa ncito shimwi kwaamba ayi tucafwe bantu bakumusena nkotukala. Balakalala paceebo cakwaamba ayi tulabikila bunene maano kuncito yakushimikila kuteshi kukumana mapensho amucishi.

20. Kweelana amaswi Yesu ngakaamba palilembo lya Mateyo 7:21-23, ino nciinshi ncotweelete kubikilaako maano abuumbi?

²⁰ Ino nshiinshi nsheenga twaciita kwaamba ayi tutolelele kuba alushomo? (Amubelenge Mateyo 7:21-23.) Tulyeelete kubikila maano kusebensa ncito Yesu njaakatulwiita kucita. (Mate. 28:19, 20) Tatweelete kupilinganishikwa ashamapolitiki alimwi akweelesha kumana mapensho amucishi. Tulibasuni bantu alimwi tulabikila amaano kumapensho ngobeendaamo, nacibi boobo, tulicishi kwaamba ayi nshila ibotu mbweenga twabacafwa, nkubaiisha pa Bwaami bwakwe Lesa akubacafwa kuba abushicibusa a Yehova.

21. Ino nshiinshi nshotweelete kuba bashinishite kucita?

²¹ Mumutwi uyu, twabandika pasheebo shone shakapa kwaamba ayi bantu baanji bakake Yesu alimwi asheenga shapa kwaamba ayi bamwi munshiku shino bakake kukutika kubashikwiiya bakwe. Ano sa ishi nshetwaambawo nshoshintu sheenkabo nshotweelete kuleya? Sobwe. Mumutwi utokonkelaawo tulaakwiiya pasheebo ashimwi shone. Aboobo atube bashinishite kutolelela kukonkela Yesu alimwi akuyumya lushomo lwesu!