1-2. Ino shikulemba umwi wakaamba nshi, alimwi ino tutokwiiya nshi mumutwi uyu?

BANTU baanji munshiku shino balaamba ayi balashoma muli Yesu, sombi balakaka kukonkela nshaakalinga kwiisha. (2 Timo. 4:3, 4) Shikulemba umwi wakaamba ayi: “Nikwalinga muntu umwi munshiku shino waamba shintu bweenka mbuli Yesu mbwaakaamba . . . , sa inga twamukakaka bweenka bantu mbobakakaka Yesu myaaka 2,000 yaiinda? . . . Cikumbulo ncakwaamba ayi: Ee inga twamukakaka.”

² Nabi kwaamba ayi bantu baanji bakanyumfwa Yesu nshaakalinga kwiisha alimwi akubona shaankamiko nshaakalinga kucita ndyaakalinga pacishi capanshi, tabakwe kumushoma. Ino nceebonshi? Mumutwi wamana, twakabandika pasheebo shone shakapa kwaamba ayi bantu batashomi Yesu nshaakalinga kwaamba akucita. Amuleke tubandike pasheebo ashimwi shone. Kwiilikaawo, tutokwiiya ashipa kwaamba ayi bantu batanooshoma bashikwiiya bakwe Yesu munshiku shino alimwi ansheenga twaciita kwaamba ayi tutolelele kusebensela Yehova.

3. Ino nshiinshi Yesu nshaakalinga kucita shakapa kwaamba ayi bamwi bamukaake?

³ Yesu ndyaakalinga pacishi capanshi, wakalinga kucanika abantu bamishobo ipusenepusene. Nabi kwaamba ayi wakalinga kulya pomwi abantu babile alimwi abapukite, wakalinga kucana ciindi cakuba pomwi abakandu abaabo bakalinga kulyatililwa. Kwiilikaawo, wakalinga kunyumfwila nkumbu abo bakalinga kubonwa ayi “mbamucita shibiibi.” Bantu bamwi balisumpula bakamukaka Yesu ceebo cakwaamba ayi taakalinga kucite kasalulushi. Bakeepusha bashikwiiya bakwe ayi: “Ino mutoolitanshi akunwa pantu pomwi abeshikusonkesha alimwi abamucita shibi?” Yesu wakabakumbula  ayi: “Teshi bantu bayumu balangoola mushiliki, sombi balwashi beenka. Nshikwe kwisa mukwiita baluleme, sombi bamucita shibi kwaamba ayi basanduke kuswa kushibiibi shabo.”​—Luka 5:29-32.

4. Kweelana ashakaamba mushinshimi Isaya, ino baJuda bakalinga kweelete kulangila nshi pali Mesiya?

⁴ Ino Malembo alaamba buyani? Mesiya kaatana kusa pacishi capanshi, mushinshimi Isaya wakasansulula ayi bantu bamucishi balaakumukaka Mesiya. Wakaamba ayi: “Bantu bakamukaka akumusebaanya . . . Cakalingabo anga wakatushisa ciwa cakwe. Wakasebaana aswebo twakamulangabo anga na nciinshibo.” (Isa. 53:3) Kweelana abushinshimi mbobwakaamba ayi “bantu” balaakukaka Mesiya, baJuda bakalingaako paciindi Yesu ndyaakalinga pacishi capanshi bakalinga kweelete kulangila ayi bantu balaakumukaka Yesu.

5. Ino bantu baanji munshiku shino balababona buyani bashikwiiya bakwe Yesu?

⁵ Sa ili ndyelipenshi ndyetubona amunshiku shino? Ee. Bamatanjilili babupailishi baanji balanyumfwa kabotu kutambula bantu mumaceeci abo mbobabona ayi balipukite, mbabile, alimwi abaabo bantu mbobabona ayi mbasongo. Bamatanjilili aba balanyumfwa kabotu kutambula bantu aba nabi kwaamba ayi balacita shintu Yehova nshaapatite. Bamatanjilili babupailishi aba balabona anga basebenshi bakwe Yehova basebensa cankusu alimwi bacite mibo ibotu taaku mbobabete ceebo cakwaamba ayi bantu baanji mucishi balababona anga tabayandiki. Bweenka Paulo mbwaakaamba, “Lesa wakasala bantu batabelengwi.” (1 Koli. 1:26-29) Nacibi boobo, Yehova alabona ayi basebenshi bakwe boonse bashomeka balayandika.

6. Ino Yesu wakaamba nshi pa Mateyo 11:25, 26, alimwi ino cakubonenaako cakwe inga twacikonkela buyani?

⁶ Ino nshiinshi nsheenga twaciita kwaamba ayi tutolelele kusebensela Yehova? (Amubelenge Mateyo 11:25, 26.) Mutanokonkela bantu bamucishi mbobabona bantu bakwe Lesa. Mulyeelete kwiibaluka kwaamba ayi Yehova alasebensesha bantu baliceesha kucita kuyanda kwakwe. (Kulu. 138:6) Alimwi amuyeeye kufula kwashintu Yehova nshakakumanisha kwiinda mukusebensesha baabo bantu baanji mbobabona ayi teshi basongo.

7. Ino nceebonshi Yesu ncakaambila ayi baFalisi mbantu baamba nshebataciti, alimwi ino bakacita buyani?

⁷ Yesu wakalalila bamatanjilili babupailishi bakalingaako ndyaakalinga pacishi capanshi, ceebo cakwaamba ayi tabakalinga kwiisha bantu kupaila Yehova kweelana akuyanda kwakwe. Kucakubonenaako wakatondesha patuba kwaamba ayi baFalisi bakalinga bantu baamba nshebataciti, mukwiinga bakalinga kubikilabo maano pamulawo wakusamba kumaansa kwiinda mbobakalinga kubikila maano kulama bashali babo. (Mate. 15:1-11) Bashikwiiya bakwe Yesu balyeelete bakakankamana amaswi ngakaamba. Aboobo bakamwiipusha ayi: “Sa mulishi kwaamba ayi baFalisi tabakwe kukondwa ndibakanyumfwa maswi anu?” Yesu wakabakumbula ayi: “Mbewu ili yoonse njebatakwe kushanga baTa bali kwiculu ilaakutumunwa. Mutalisukami ambabo, mbamatanjilili boofu. Aboobo na moofu watanjilila moofunyina, boonse bobilo balawita mucilindi.” (Mate. 15:12-14) Nabi kwaamba ayi bamatanjilili babupailishi bakakalala anshaakaamba, Yesu taakwe kucileka kwaamba cancine.

8. Ino Yesu wakatondesha buyani ayi teshi njiisho shoonse nshobaiisha beshibupailishi Lesa nshaasuminisha?

⁸ Yesu wakapa kwaamba ayi cishibikwe ayi njiisho shimwi shabupailishi shakalinga shakubeca. Taakwe kwaamba ayi Lesa alasuminisha njiisho shoonse nshobaiisha beshibupailishi. Sombi wakaamba ayi bantu baanji balaakunjila pamulyaango unene utola mukunyonyoolwa alimwi baniinibo mbeshi bakenjile pamulyaango ushaankene utola kubuumi butamaani. (Mate. 7:13, 14)  Wakaamba cakuteenda mweela ayi bantu bamwi balaakunooboneka anga batosebensela Lesa, sombi kakuli teshi ngobatoosebensela. Wakaamba ayi: “Amucenjele abalaluki babeshi. Balesa cakulibombya kuli ndimwe anga nimbelele, anu mukati mbaumpe. Mulaakubeshibila kushisepo shabo.”​—Mate. 7:15-20.

9. Ino ni njiisho nshi shakalinga kwiisha beshibupailishi Yesu nshaakatondesha patuba kwaamba ayi nshakubeca?

⁹ Ino Malembo alaamba buyani? Bushinshimi bwamu Baibo bwakaambila limwi ayi Mesiya alaakusuna ŋanda yakwe Yehova abuumbi. (Kulu. 69:9; Joni 2:14-17) Lusuno ulu ndolwakapa Yesu kutondesha patuba kwaamba ayi shakalinga kwiisha akucita beshibupailishi nshakubeca. Kucakubonenaako, baFalisi bakalinga kushoma ayi na muntu wafwa kuli cintu cimwi citolelela kuba abuumi; sombi Yesu wakaiisha ayi bafu balilete. (Joni 11:11) BaSaduki tabakalinga kushoma mububuke; sombi Yesu wakabusha Lasalo shicibusa wakwe. (Joni 11:43, 44; Milimo 23:8) BaFalisi bakalinga kwiisha ayi Lesa ngoosalila limwi shintu shoonse shitucitikila na nsheshi tukacite kunembo; sombi Yesu wakaiisha ayi bantu inga balisalila beene kusebensela Lesa nabi sobwe.​—Mate. 11:28.

10. Ino nceebonshi bantu baanji balakaka kushoma makani ngotushimikila?

¹⁰ Sa ili ndyelipenshi ndyetubona amunshiku shino? Ee. Bantu baanji balakaka kukutika kumakani ngotushimikila mukwiinga alapa kwaamba ayi cishibikwe ayi njiisho nshobaiisha beshibupailishi nshakubeca. Bamatanjilili babupailishi balaiisha bantu babo ayi Lesa alaanisha bamucita shibiibi kwiinda mukubatenta mumulilo wa helo. Balaiisha njiisho iyi kwaamba ayi bantu batolelele kubanyumfwila. Mbuli basebenshi bakwe Yehova sotupaila Lesa shilusuno, tulacafwa bantu kushiba kwaamba ayi njiisho iyi njakubeca. Alimwi bamatanjilili babupailishi balaiisha ayi muntu na wafwa kuli cintu cimwi citolelela kuba abuumi. Naakwiinga njiisho iyi njancine, nkokwaamba ayi naakwiinga taakuwo bubuke. Aboobo tulacafwa bantu kushiba kwaamba ayi njiisho iyi teshi yamu Baibo. Alimwi nabi kwaamba ayi beshibupailishi baanji balaiisha ayi Lesa wakasalila limwi shintu shoonse nshetucita, tulaiisha ayi muntu womwi awomwi alicite nkusu shakulisalila. Aboobo inga walisalila mwiine kusebensela  Lesa. Ino bamatanjilili babupailishi balacita buyani na twacafwa bantu kubona patuba kwaamba ayi nshobaiisha nshakubeca? Liinji balakalala abuumbi!

11. Kweelana amaswi Yesu ngakaamba palilembo lya Joni 8:45-47, ino Lesa alisuni bantu bakwe kucita buyani?

¹¹ Ino nshiinshi nsheenga twaciita kwaamba ayi tutolelele kusebensela Yehova? Na tulisuni cancine, tulyeelete kushoma akunyumfwila Lesa nshaamba. (Amubelenge Joni 8:45-47.) Mubupusano a Satana, tulatolelela kuba mucancine. Tatucitiiwo cintu cilicoonse citeendelani anshotushoma. (Joni 8:44) Lesa alisuni kwaamba ayi bantu bakwe bapate bubi “akusunisha kucita shintu shibotu” bweenka Yesu mbwaakacita.​—Loma. 12:9; Ebu. 1:9.

12. Ino nceebonshi baJuda baanji bakakalashikwa anshila Yesu mbwaakafwa?

¹² Ino nciinshi cimwi cakapa kwaamba ayi baJuda bakake Yesu? Paulo wakaamba ayi: “Swebo tulashimikila shakwe Klistu uyo wakapopwa pacisamu. Ku baJuda makani aya nimfumpu.” (1 Koli. 1:23) Ino nceebonshi baJuda baanji bakakalashikwa anshila Yesu mbwaakafwa? Ku baJuda kufwa kwakwe Yesu pacisamu cakupenshesha kwakabapa kumubona anga ngukapondo alimwi shimucita shibiibi kuteshi Mesiya.​—Duto. 21:22, 23.

13. Ino nciinshi baJuda bakakaka Yesu ncobatakalinga kushoma?

¹³ BaJuda bakakaka Yesu tabakalinga kushoma ayi taakalinga kucite mulandu, bakamubekesha alimwi bakamulyatililabo. Abo bakalinga kumoombolosha tabakwe kumoombolosha cabululami. Boomboloshi ba munkuta inene ya baJuda bakabungana pomwi cakufwambaana akoombolosha Yesu cakutakonkela mulawo. (Luka 22:54; Joni 18:24) Boomboloshi tabakwe koombolosha cabululami. Ndyebakanyumfwa nshobakalinga kumubekesha, “Bakeelesha kuyandoola bukamboni bwakubekesha Yesu kwaamba ayi bamucanine mulandu wakumucailaawo.” Ndyebakaalilwa kucana bukamboni, mupailishi munene wakeepusha Yesu mwiipusho kwaamba ayi aambe cikumbulo nceshi bamucanineewo mulandu. Ici ncobakacita tacakalinga kweendelana amulawo. (Mate. 26:59; Maako 14:55-64) Yesu ndyaakabushikwa, boomboloshi balya bataluleme  bakapa bashilumamba babene Loma abo bakalinga kulindilila cuumbwe maali aanji, kwaamba ayi baambe makani akubeca pacakapa kwaamba ayi mubili wakwe Yesu utacaniki mucuumbwe.​—Mate. 28:11-15.

14. Ino nshiinshi Malembo nshakaambila limwi palufu lwakwe Mesiya?

¹⁴ Ino Malembo alaamba buyani? Nabi kwaamba ayi baJuda baanji muciindi cakwe Yesu tabakalinga kulangila ayi Mesiya wakalinga kweelete kufwa, amubone shakaambilwa limwi mu Malembo ayi: “Wakaaba buumi bwakwe kushikila akulufu. Alimwi wakabelengelwa pantu pomwi abatakonkeli mulawo. Wakabwesa shibiibi sha bantu baanji alimwi akubeemikanina ayi balekelelwe.” (Isa. 53:12) Aboobo baJuda tabakalinga kweelete kukaka Yesu paceebo cakwaamba wakacaikwa anga ngumuntu shimucita shibiibi.

15. Ino njimilandu nshi Bakamboni Bakwe Yehova njobabekeshekwa ipa kwaamba ayi bamwi bakake kubashoma?

¹⁵ Sa ili ndyelipenshi ndyetubona amunshiku shino? Ee! Bweenka Yesu mbwaakabekeshekwa akoomboloshekwa cakutalulama, Bakamboni Bakwe Yehova abalo munshiku shino balabekeshekwa akoomboloshekwa cakutalulama. Amubone shakubonenaako shitokonkelaawo. Pakati kamyaaka kuswa mu 1930 kushika mu 1950, ku America kwakalinga milandu iinji ku makooti yakalinga kukumite lwaanguluko lwesu lwa kulambila Lesa. Boomboloshi bamwi tabakwe koombolosha kabotu milandu yesu. Kumusena wiitwa ayi Quebec, mucishi ca Canada, beshibupailishi bakasebensela pomwi amfulumeende kwaamba ayi bakashe ncito yesu. Beshikushimikila baanji bakaangwa ceebo cakushimikila bamwi pamakani a Bwaami bakwe Lesa. Ku Germany, mfulumeende ya Nazi yakacaya bamakwesu bacanike baanji bashomeka. Alimwi mumyaaka yacoonono, bamakwesu baanji kucishi ca Russia bakapekwa milandu akubikwa mujeele ceebo cakubandika makani amu Baibo, incito mfulumeende yaku Russia njoibona ayi “taibete kabotu abuumbi.” Alimwi yakakasha a Baibo ya New World Translation of the Holy Scriptures yakasansululwa mumushobo waci Russian ayi ndibuku licafwilisha “ncito ibiibi abuumbi” mukwiinga lilicite liina lyakwe Yehova.

16. Kweelana alilembo lya 1 Joni 4:1, ino nceebonshi tatweelete kushoma makani akubeca bantu ngobaamba pabantu bakwe Yehova?

¹⁶ Ino nshiinshi nsheenga twaciita kwaamba ayi tutolelele kusebensela Yehova? Amushibe shancine pamakani oonse. Mulikani lyakwe lyapa Kalundu, Yesu wakacenjesha bakalinga kukutika ayi bamwi ‘balaakubabekesha shikani shibiibi.’ (Mate. 5:11) Bubeshi ubu boonse bulaswa kuli Satana. Alayunga beshikupikisha kwaamba makani akubeca pabaabo basuni cancine. (Ciyu. 12:9, 10) Tulyeelete kwaakaka. Tatweelete kuleka kwaamba ayi atupe kuloonda na kuboolela mwisule.​—Amubelenge 1 Joni 4:1.

17. Ino shintu shakacitika Yesu kaatana kufwa, shakapa buyani bantu bamwi kukaka kuba bashikwiiya bakwe?

¹⁷ Yesu ndyaakalinga pafwiifwi akucaikwa, womwi pa batumwi bakwe bali 12 wakamwaaba. Lyalo mutumwi wakwe umwi wakamukakaka mankanda otatwe alimwi bamwi boonse bakacaala bakamupalangana akumushiya eenka. (Mate. 26:14-16, 47, 56, 75) Yesu taakwe kukankamana alimwi wakaambila limwi ayi ishi nsheshi shikacitike. (Joni 6:64; 13:21, 26, 38; 16:32) Ishi ndyeshakacitika, mpashi bamwi tabakalinga kusuniiwo akuba bashikwiiya bakwe. Mpashi bakayeeya ayi, ‘Na batumwi bakwe Yesu inga bacita shamushobo uyu, inga nshibiiwo shikwiiya wakwe!’

18. Ino mbushinshimi nshi bwakakumanishikwa pasheesho shakacitika Yesu kaatana kufwa?

¹⁸ Ino Malembo alaamba buyani? Kakucili myaaka iinji Yesu kaatana kusa pacishi capanshi, Yehova kwiinda mu Maswi akwe wakaambila limwi ayi Mesiya alaakuulishikwa amaali asilifa ali 30. (Seka. 11:12, 13) Shikumwaaba wakalinga kusa mukuba womwi wa beshicibusa bakwe. (Kulu. 41:9) Mushinshimi Sekaliya wakalemba  ayi: “Uma mweembeshi kwaamba ayi mbelele shipalangane.” (Seka. 13:7) Muciindi cakukalashikwa ashakacitika, abo bakalinga kusuni kuba bashikwiiya tabakalinga kweelete kukaka Yesu ceebo ca shakacitika. Kukumanishikwa kwa bushinshimi ubu kwakalinga kweelete kuyumya lushomo lwabo.

19. Ino ngamakani nshi bantu basuni kwiiya cancine ngobeshi?

¹⁹ Sa ili ndyelipenshi ndyetubona amunshiku shino? Ee. Munshiku shino, bamwi bakalinga Bakamboni bashibikitwe bakapondoka akuswa mucancine, alimwi baleelesha kuyunga bamwi. Balaya caambilisha makani akubeca pa Bakamboni Bakwe Yehova mu manyusipepa, pashilimba, pama TV alimwi apa Intaneti. Nacibi boobo, abo basuni kwiiya cancine tabakonkeli makani aya akubeca. Muciindi cakucita boobo, bantu basuni kwiiya cancine balishi kwaamba ayi Baibo yakaambila limwi ayi shintu shamushobo uyu shilaakunoocitika.​—Mate. 24:24; 2 Pit. 2:18-22.

20. Ino inga twacita buyani kwaamba ayi tutabecekwi abaabo bakaswa mucancine? (2 Timoti 4:4, 5)

²⁰ Ino nshiinshi nsheenga twaciita kwaamba ayi tutolelele kusebensela Yehova? Tulyeelete kutolelela kuyumya lushomo lwesu kwiinda mukwiiya Baibo lyoonse, kupaila lyoonse alimwi akutolelela kusebensa ncito Yehova njaakatupa. (Amubelenge 2 Timoti 4:4, 5.) Lushomo lulaakutucafwa kutalisukama nabi twanyumfwa malipooti akubeca pa Bakamboni Bakwe Yehova. (Isa. 28:16) Kusuna Yehova, Maswi akwe alimwi abamakwesu abenankashi kulaakutucafwa kutashoma shaamba baabo bakapondoka kuswa mucancine.

21. Nabi kwaamba ayi bantu baanji munshiku shino balakaka kukutika kumakani ngotushimikila, ino nciinshi nceenga twashoma cakutatoonsha?

²¹ Yesu ndyaakalinga pacishi capanshi baanji bakamukaka. Nacibi boobo, kuli bamwi baanji bakalinga kumushoma. Bamwi pabaabo bakalinga kumushoma, baleelikaawo mweendeleshi womwi wa munkuta inene ya baJuda alimwi “abapailishi baanji.” (Milimo 6:7; Mate. 27:57-60; Maako 15:43) Amunshiku shino bantu baanji basalawo kukonkela Yesu. Ino nceebonshi? Nceebo cakwaamba ayi balishi alimwi balisuni cancincine camu Baibo. Maswi akwe Lesa alaamba ayi: ‘Bantu abo basuni milawo yanu balicite luumuno lunene alimwi taakuwo ceenga cabawisha.’​—Kulu. 119:165.