1-2. Ino ngamapensho nshi Bakamboni baanji ngobeendaamo?

MUTUMWI Paulo wakayuminisha Timoti alimwi a Beneklistu boonse kukumanisha ncito yabo yakushimikila. (2 Timo. 4:5) Aboobo tulacita shoonse nsheenga twacikonsha muncito yakwe Lesa kwaamba ayi tukonkele Paulo nshakaamba. Nacibi boobo, cimwi ciindi tulacana mapensho. Bamakwesu abenankashi baanji balanyumfwa boowa kushimikila. (2 Timo. 4:2) Kucakubonenaako, amuyeeye bamakwesu abenankashi bekala mushishi incito yesu yakushimikila moyakakashikwa. Balatolelela kushimikila nabi balicishi kwaamba ayi inga baangwa akubikwa mujeele!

² Basebenshi bakwe Yehova baleenda mumapensho apusenepusene eenga abapa kulefuka. Kucakubonenaako, baanji balasebensa mawoola aanji kwaamba ayi bacikoonshe kucana shiyandika sha mukwashi. Nabi kwaamba ayi inga basuna kucita shiinji muncito yakushimikila, balaalilwa ceebo cakulema abuumbi pakumana kwansondo. Bamwi balaalilwa kucita shiinji muncito yakwe Yehova ceebo cakuciswa ciswa na kucembela alimwi bamwi tabacikoonshi kweenda kuswa paŋanda. Bamwi balalinyumfwa ayi Yehova alababona ayi tabayandiki. Nankashi waliina lya Mary, * ukala ku Middle East, wakaamba ayi: “Na ndalinyumfwa kulefuka ndeelesha cankusu kwaamba ayi ntalike kuyeeya pashintu shibotu. Alimwi ici cilampa kulinyumfwa kulema abuumbi. Ndanyumfwa cibiibi mukwiinga ici cilantolela ciindi alimwi ndamaninwa nkusu cakwaamba ayi ndaalilwa akuya muncito yakushimikila.”

3. Ino tutokwiiya nshi mumutwi uyu?

³ Nabi kwaamba ayi twiinde mubukaalo buli buyani, Yehova inga watupa nkusu nshetuyandika kwaamba ayi tutolelele kumusebensela. Katutana kubandika Yehova mbwaatucafwa, amuleke twiiye mbwaakacafwa Paulo alimwi a Timoti kukumanisha ncito yabo nabi ndyebakalinga kwiinda mumapensho.

4. Ino ngamapensho nshi Paulo ngakeendaamo?

⁴ Paulo wakeenda mumapensho aanji. Wakalinga kuyandika kumuyuminisha abuumbi paciindi balwani bwakwe ndyebakamuma, kumupwaya mabwe, alimwi andyaakabikwa mujeele. (2 Koli. 11:23-25) Paulo wakaamba cakuteenda mweela kwaamba ayi cimwi ciindi wakalinga kulinyumfwa kulefuka. (Loma. 7:18, 19, 24) Alimwi wakalinga kucite bulwashi bwakalinga anga ‘ngumuumfwa mumubili’ uyo ngwakalinga kusuni abuumbi kwaamba ayi Lesa aukuushe.​—2 Koli. 12:7, 8.

5. Ino Paulo wakacikonsha kucita nshi nabi kwaamba ayi wakalinga kwiinda mumapensho?

⁵ Yehova wakamupa nkusu Paulo kwaamba ayi acikoonshe kukumanisha ncito yakwe nabi ndyaakalinga kwiinda mumapensho. Amuyeeye Paulo nshakakumanisha. Kucakubonenaako, ndyaakalinga kwangitwe muŋanda ku Loma wakasebensa cankusu kushimikila makani abotu kubantu baanji kwiilikaawo abacinenenene bamumfulumeende. (Milimo 28:17; Filip. 4:21, 22) Alimwi wakashimikila abeshikulindilila ŋanda ya muleli waku Loma, kwiilikaawo abaabo boonse bakalinga kumufwakashila. (Milimo 28:30, 31; Filip. 1:13) Paciindi ceenka cilya, Paulo wakalemba makalata akayuminisha Beneklistu alimwi atuyuminisha apacecino ciindi. Cakubonenaako cakwe Paulo cakabayuminisha Beneklistu bakalinga mulibungano lyaku Loma, alimwi ici cakapa kwaamba ayi bacikoonshe “kwaamba maswi akwe Lesa cakutaloonda.” (Filip. 1:14) Nabi kwaamba ayi cimwi ciindi Paulo wakalinga kwaalilwa kusebensa kweelana ambwaakalinga kusuni, wakalinga kucita kweelana ansheenga wacikonsha, alimwi kucita boobo ‘kwakacafwilisha abuumbi kwaamba ayi makani anyumfwike kubantu baanji.’​—Filip. 1:12.

6. Kweelana a 2 Bene Kolinto 12:9, 10, ino nciinshi cakacafwa Paulo kukumanisha ncito yakwe?

⁶ Paulo wakalinga kucishi kwaamba ayi wakacikonsha kukumanisha shoonse nshaacita muncito yakwe Yehova ceebo cankusu shakwe Lesa, kuteshi munkusu shakwe. Wakaamba ayi nkusu shakwe Lesa ‘shilabonekela bunene na koolefukite.’ (Amubelenge 2 Bene Kolinto 12:9, 10.) Kwiinda mumushimu Wakwe usalashi, Yehova wakapa nkusu Paulo kwaamba ayi acikoonshe kukumanisha ncito yakwe nabi ndyaakalinga kupenshekwa, kubikwa mujeele, alimwi amapensho amwi ngakeendaamo.

7. Ino ngamapensho nshi Timoti ngakalinga kwiindaamo akalinga kweelete kupa kwaamba ayi cibe ciyumu kukumanisha ncito yakwe?

⁷ Timoti, wacanike wakalinga kusebensela pomwi a Paulo alakwe wakalinga kuyandika kucinka manungo munkusu shakwe Lesa kwaamba  ayi acikoonshe kukumanisha ncito yakwe. Timoti wakalinga kweenda pomwi a Paulo muncito yakwe yabumishonali njobakalinga kweenda mishinso ilaamfu. Alimwi Paulo wakatuma Timoti kuya mukufwakashila akuyuminisha mabungano. (1 Koli. 4:17) Mpashi Timoti wakalinyumfwa ayi taakalinga kushikiteewo pakusebensa ncito iyi. Mpashi nceceeco Paulo ncaakamuyuminishila ayi: “Kutabi muntu ukuubya ceebo cakuba mwanike.” (1 Timo. 4:12) Alimwi paciindi ici, Timoti alakwe wakalinga kucite muumfwa mumubili nkokwaamba ayi lipenshi lya “kuciswaciswa.” (1 Timo. 5:23) Nacibi boobo, Timoti wakalinga kucishi kwaamba ayi mushimu usalashi wakwe Yehova ulaakumupa nkusu shiyandika kwaamba ayi acikoonshe kushimikila makani abotu akucafwa bashominyina.​—2 Timo. 1:7.

8. Ino Yehova alabacafwa buyani basebenshi bakwe munshiku shino?

⁸ Munshiku shino, Yehova alapa basebenshi bakwe ‘nkusu shiindite pasheesho nshebacite’ kwaamba ayi batolelele kumusebensela cakushomeka. (2 Koli. 4:7) Amuleke tubandike pashintu shone Yehova nshaatupa kwaamba ayi shitucaafwe kutolelela kushomeka kuli nguwe: mupailo, Baibo, kucanika pomwi a Beneklistunyineesu, alimwi anciito yesu yakushimikila.

9. Ino mupailo inga watucafwa buyani?

⁹ Kupaila inga kwatupa nkusu. Kweelana alilembo lya Bene Efeso 6:18, Paulo wakatuyuminisha kunoopaila kuli Lesa “lyoonse.” Na katupaila lyoonse, Lesa alaakukumbula mipailo yesu kwiinda mukutucafwa. Mukwesu waliina lya Jonnie, ukala kucishi ca Bolivia, wakabona Yehova mbwakamucafwa paciindi ndyaakalinga kwiinda mumapensho apusenepusene. Bashali bakwe boonse bobilo alimwi amukaakwe bakaciswa abuumbi paciindi comwi. Mukwesu Jonnie wakalinga kwaalilwa kwaamba ayi acikoonshe kucita shintu shoonse nshaakalinga kuyandika kwaamba ayi abalame kabotu. Banyina bakafwa alimwi cakatola ciindi kwaamba ayi mukaakwe alimwi abaishi boole. Na wayeeya shakamucitikila paciindi cilya, mukwesu, Jonnie wakaamba ayi, “Lyoonse cakalinga kuncafwa na ndalisukama abuumbi, nkupaila kuli Yehova akumulwiita mbondakalinga kulinyumfwa.” Yehova wakapa mukwesu Jonnie nkusu nshaakalinga kuyandika kwaamba ayi acikoonshe kuliyumya. Mukwesu waliina lya Ronald, munene mulibungano ku Bolivia, wakesa mukushiba kwaamba ayi banyina mbalwashi kansa. Ndipakeendabo mweenshi womwi bakafwa. Ino nciinshi cakamucafwa kuliyumya? Wakaamba ayi: “Ndapaila kuli Yehova camoyo woonse akumulwiita mbontolinyumfwa. Ndicishi kwaamba ayi alishi kabotu mbondinyumfwa kwiinda muntu umwi uli woonse alimwi akwiinda ambondishi nemwiine.” Cimwi ciindi inga twalinyumfwa anga inga tatucikoonshi kuliyumya mumapensho ngotucite, na kushiba nsheenga twapaililaawo. Nacibi boobo, Yehova alatulwiita ayi tunopaila kuli nguwe, nabi kwaamba ayi tatucishi mbweenga twamusansulwita kabotu mbotutoyeeya ambotutoolinyumfwa.​—Loma. 8:26, 27.

10. Kweelana a Bene Ebulu 4:12, ino nceebonshi kubelenga Baibo alimwi akukutumana kuyeeyawo kulayandika abuumbi?

¹⁰ Maswi akwe Lesa inga atuyumya. Paulo wakalinga kubelenga Malembo kwaamba ayi abe ankusu akuyuminishikwa, aswebo nshotweelete kucita. (Loma. 15:4) Na katubelenga Maswi akwe Lesa akukutumana kuyeeyawo, Yehova inga wasebensesha mushimu wakwe kutucafwa kushiba mbweenga twakonkela Malembo ndyetuli mumapensho. (Amubelenge Bene Ebulu 4:12.) Mukwesu Ronald, ngotwalinga twaambawo wakaamba ayi: “Ndikondetwe kwaamba ayi ndakashibila kubelenga Baibo bushiku abushiku. Ndakutumana akuyeeyawo abuumbi pamibo yakwe Yehova alimwi ambwaatondesha lusuno kubasebenshi bakwe. Ici cilanjuminisha abuumbi.”

11. Ino Baibo yakamucafwa buyani nankashi wakalinga kucite buumba?

 ¹¹ Kukutumana kuyeeya pa Maswi akwe Lesa kulaakutucafwa kutabikila bunene maano pamapensho ngotucite. Amuyeeye Baibo mboyakacafwa mukalubinje umwi wakalinga kucite buumba. Munene umwi wakamulwiita ayi inga weeya makani acafwa na wabelenga libuku lya Jobo. Ndyaakatalikabo kubelenga, wakatalika kuweluluka Jobo pakuyeeya kutabete kabotu. Ndyaakalinga kuyeeya nshaakalinga kubelenga, mumoyo wakatalika kwaamba ayi: “Jobo! Utanooyeeyabo pamapensho ako!” Lyalo wakesa mukuyeeya kwaamba ayi alakwe wakalinga kucita bweenka mbuli Jobo. Ici cakamucafwa kwaalula mbwaakalinga kuyeeya alimwi wakayuminishikwa kutolelela kuliyumya.

12. Ino Yehova alatucafwa buyani kwiinda mu bamakwesu abenankashi?

¹² Kuba pomwi a Beneklistunyinesu inga kwatuyumya. Nshila imwi Yehova mbwaayuminisha Beneklistu nkwiinda mu bashominyinaabo. Paulo wakalemba ayi wakalinga kusunishishi “kuyuminishanya” abashominyina. (Loma. 1:11, 12) Nankashi waliina lya Mary, ngotwalinga twaambawo, alanyumfwa kabotu abuumbi kuba pomwi abashominyina. Wakaamba ayi: “Yehova wakancafwa kwiinda mu bamakwesu abenankashi batakalinga kucishiwo amapensho ngondakalinga kwiindaamo. Bakalinga kundwiita maswi ayuminisha na kuntuminako kakaadi, alimwi ishi nshoshintu nshendakalinga kuyandika. Ici cilapa kwaamba ayi cibe cuubu kubandika abenankashi bakeendako mumapenshi mbuli ngontokwiindaamo. Alimwi bamanene abalo balancafwa kulinyumfwa kwaamba ayi bamakwesu abenankashi mulibungano balinsuni.”

13. Ino inga twacita buyani kwaamba ayi tuyuminishanye ndyetuli kumabungano?

¹³ Ciindi cibotu abuumbi ndyeenga twayuminishanya nciindi ndyetuli kumabungano. Ndyemuli kumabungano inga mweelesha kuyuminisha bamwi kwiinda mukubalwiita ayi mulibasuni alimwi akubalumba pashintu nshebacita. Kucakubonenaako, pakubungana kumwi mukwesu waliina lya Peter munene mulibungano wakalwiita nankashi weebetwe kumuntu uteshi Kamboni ayi: “Tulayuminishikwa abuumbi lyoonse na twamubona. Lyoonse mulesa abana banu boonse bali 6, alimwi balaba kabalibambite kukumbulawo.” Wakalumba abuumbi akwaamba ayi: “Tamucishiwo maswi ngomwaamba mbwanjuminisha.”

14. Ino kwaabanamo lubasu muncito yakushimikila kulatucafwa buyani?

¹⁴ Kushimikila inga kwatuyumya. Kushimikila bamwi cancine camu Baibo kulatupa kulinyumfwa kabotu, inga caba ayi basumina nabi bakaka. (Tus. 11:25) Nankashi waliina lya Stacy wakabona kushimikila bamwi mbokuyuminisha. Wakalinyumfwa cibiibi abuumbi shikamukowa umwi ndyakakushikwa mulibungano, alimwi wakatolelela kuliipusha ayi, ‘Sa kuli ncondakalinga kweelete kucita kwaamba ayi mucaafwe?’ Nankashi Stacy wakatolelela kuyeeyawo abuumbi palipenshi ili. Ino nciinshi cakamucafwa kuliyumya? Kushimikila! Na waya mukushimikila wakalinga kuyeeya bunene pakucafwa bantu kumusena nkwakalinga kushimikila. Wakaamba ayi: “Paciindi cilya, Yehova wakampa shikwiiya Baibo wakaya panembo cakufwambaana. Ici cakanjuminisha abuumbi. Cintu cancafwa abuumbi mubuumi bwangu nkushimikila.”

15. Ino nshiinshi nsheenga mweeya pamakani akaamba ba Mary?

¹⁵ Mpashi bamwi balabona ayi inga tabacikoonshi kucita shiinji muncito yakushimikila ceebo ca bukaalo mbobabetemo. Na amwebo mbomulinyumfwa, amwiibaluke kwaamba ayi Yehova alasangalala na kamusebensa kweelana ansheenga mwacikonsha. Amuyeeye cakubonenaako cakwe nankashi waliina lya Mary, ngotwalinga twaambawo. Ndyaakalongela kumusena nkobaamba mushobo uteshi winemishaabo, wakalinyumfwa anga taakuwo ncaatoocita. Wakaamba ayi, “Ndyendakatalika, ndakalinga kucikonshabo kukumbulawo mu maswi aniini na kubelenga lilembo, nabi kwaabilabo katilakiti muncito yakushimikila.” Ici cakamupa  kulinyumfwa anga taakuwo ncaatoocita na walyeelanya abamwi bakalinga kucishi kabotu kwaamba mushobo. Nacibi boobo, wakaalula mbwakalinga kuyeeya. Wakesa mukuyeeyawo kwaamba ayi Yehova inga wamucafwa kucita shiinji nabi kwaamba ayi taushi kabotu mushobo. Wakaamba ayi, “Baibo nshoyaamba teshi shiyumu alimwi inga shacafwa bantu kwaalula buumi bwabo.”

16. Ino nciinshi ceenga cacafwa baabo basunishishi kushimikila sombi batacikoonshi kweenda kuswa paŋanda?

¹⁶ Yehova alabona alimwi alalumba kwaamba ayi tulisunishishi kucita shiinji muncito yakushimikila, nabi kwaamba ayi tatucikoonshi kweenda kuswa paŋanda. Aboobo inga watucafwa kwaamba ayi tucikoonshe kushimikila baabo batootulama, madokota alimwi amanasi. Na katweelanya nshetwakalinga kucikonsha kucita kale kale anshetutoocita pacecino ciindi, inga twalefuka. Ano na twayeeya Yehova mbwatootucafwa pacecino ciindi, tulaakucikonsha kuliyumya mumapensho ali woonse calusangalalo.

17. Kweelana a Shikushimikila 11:6, ino nceebonshi tulyeelete kutolelela kushimikila nabi kwaamba ayi taakuwo shitooswaamo peenkapo?

¹⁷ Tatucishiwo na nimbuto ili pa mbuto nshetushanga yeshi ikameene akukula. (Amubelenge Shikushimikila 11:6.) Kucakubonenaako, nankashi waliina lya Barbara, ucite myaaka yamuma 80, liinji alashimikila kwiinda mukusebensesha fooni alimwi akulemba makalata. Munkalata imwi njaakalemba wakabikamo Njashi Yamulindilishi ya March 1, 2014, yakalinga kucite mutwi wakwaamba ayi “Lesa Nshaakamucitila.” Cakuteshiba wakatuma nkalata iyo kubeebene bakalingaawo Bakamboni. Beebene aba bakabelenga magazini iyi mankanda aanji. Musankwa wakalinyumfwabo anga Yehova ngotokwaamba anguwe. Aboobo bakatalika kuya kumabungano alimwi mukuya kwaciindi bakaboolela mucancine alimwi, pesule lyakuboolela mwisule kwa myaaka iindilila 27. Ano amuyeeyebo ba Barbara mbobakayuminishikwa kubona shibotu shakaswaamo ceebo ca nkalata ilya njobakalinga balemba!

18. Ino nshiinshi nshotweelete kucita kwaamba ayi Lesa anootuyuminisha?

¹⁸ Yehova wakatupa shintu shiinji shitucafwa kuba ankusu. Wakatupa shoolwe mbuli mupailo, Baibo, bamakwesu abenankashi, alimwi anciito yakushimikila makani abotu. Na katusebensesha shoolwe ishi Yehova nshaakatupa nkokwaamba ayi tutotondesha ayi tulashoma ayi inga watucafwa alimwi alisuni kutucafwa. Amuleke lyoonse tunoocinka manungo muli Ishi wesu wakwiculu, uyo ukondwa “kutondesha nkusu shakwe kucafwa baabo bamushoma camoyo woonse.”​—2 Maka. 16:9.