MUTWI WAKWIIYA 22
Amutolelele Kweenda mu “Nshila Isalalite”
“Lyalo kulaakuba, . . . Nshila Isalalite.”—ISA. 35:8, NWT.
LWIIMBO 31 Munokweenda a Lesa!
NSHESHI TWIIYE a
1-2. Ino ncintu nshi ciyandika baJuda bakalinga kwikala mu Babiloni ncobakalinga kweelete kusalawo kucita? (Esila 1:2-4)
MWAAMI wakapa mulawo wakwaamba ayi baJuda abo bakalinga basha mucishi ca Babiloni mpashi kwamyaaka 70, baboolele kucishi cinemishaabo ca Isilaeli. (Amubelenge Esila 1:2-4.) Yehova ngowakapa kwaamba ayi ici cikonsheke. Ino nceebonshi nceenga twaambila boobo? Bene Babiloni bakalinga kushibikitwe ayi tabakalinga kusuminisha basha kuboolela kumishaabo. (Isa. 14:4, 17) Nacibi boobo, ndabala ya Babiloni yakakomwa alimwi mwaami mupya wakalwiita baJuda ayi inga baboolela kumishaabo. Aboobo baJuda boonse, bunene bunene mitwi yamikwashi bakalinga kweelete kusalawo kutolelela kuba mu Babiloni nabi kuboolela kumishaabo. Mpashi tacakalinga cuubu ku baJuda baanji kusalawo shakucita pamakani aya. Ino nceebonshi?
2 Mpashi baanji bakalinga bacembela abuumbi cakwaamba ayi inga tabacikonshi kweenda mushinso uyu ulaamfu. Alimwi mukwiinga baJuda baanji bakashalilwa mu Babiloni, ngomusena weenkabo ngobakalinga kushi. Balo bakalinga kubona ayi cishi ca Isilaeli ncishi mwakalinga kukala bamashali babo bakulukulu. Citoboneka ayi baJuda bamwi bakalinga babile abuumbi mu Babiloni. Aboobo mpashi bamwi cakabayumina kushiya buumi bwabo bubotu mbobakashibila na makwebo abo, akuya mukukala kumusena nkobatana kukalaawo kale.
3. Ino ncoolwe nshi Yehova ncaakalinga kusa mukupa baJuda bashomeka abo bakalinga kusa mukuboolela ku Isilaeli?
3 BaJuda bashomeka bakalinga kucishi kwaamba ayi balaakucana shoolwe shiinji na baboolela ku Jelusalemu, kwiinda kulyaaba kuli koonse nkobakalinga kuyandika kucita. Coolwe cinene ncobakesa mukucana nkulambila Yehova. Nabi kwaamba ayi mu Babiloni mwakalinga ma tempele eendilila 50 ngobakalinga kusebensesha kulambila balesa bakubeca, tamwakalingaawo tempele yakwe Yehova. Tamwakalingaawo cipaililo bene Isilaeli mpeenga babengela milambu iyo yakaambwa mu Milawo yakwe Mose nabi bubaambo bwakwaamba ayi bapailishi inga babenga milambu iyo. Kwiilikaawo, mundabala iyi mwakalinga bantu baanji abuumbi bakalinga kulambila balesa bakubeca, kwiinda baabo bakalinga kulemeka Yehova na kukonkela milawo yakwe. Aboobo baJuda baanji bakalinga kusuni Yehova, bakalinga kulangila kuboolela kucishi cinemishaabo kwaamba ayi batalike kulambila kusalalite alimwi.
4. Ino nshiinshi Yehova nshaakashomesha kucitila baJuda abo bakalinga kusa mukuboolela ku Isilaeli?
4 Lweendo luyumu lwakuswa ku Babiloni kuya ku Isilaeli, mpashi lwakalinga kutola myeenshi 4. Nacibi boobo, Yehova wakabashomesha ayi alaakukushamo cili coonse munshila ceenga capa kwaamba ayi batabooleli kumishaabo. Isaya wakalemba ayi: ‘Muluyanga amubambeemo nshila yakwe Yehova! Ee, amululikile nshila Lesa wesu muluyanga. . . . Tulundu toonse tulaakweelanishikwa ashuulu shoonse shilaakumwayoolwa cakucaalabo anga muliwesa.’ (Isa. 40:3, 4) Amuyeeye mbocakalinga kwiinda munshila inene iinda muluyanga alimwi yakeelanishikwa kabotu. Bantu abo bakalinga kusa mukwiinda munshila iyi bakalinga kusa mukunyumfwa kabotu kwiindaamo! Cakalinga cuubu kuli mbabo kusa mukwiinda munshila inene yatakalinga kupetooka, kwiinda kutanta akukunkuluka tulundu na shuulu, nabi kwiinda mushinyika. Alimwi bakalinga kusa mukufwambaana kushika.
5. Ino nshila inene yacikoshanyo yakalinga kuswa ku Babiloni kuya ku Isilaeli yakatumbwa liina nshi?
5 Munshiku shino, nshila shiinji shinene shilaba aliina. Nshila inene yacikoshanyo Isaya njakaambaawo, ayalo yakalinga kucite liina. Isaya wakalemba ayi: ‘Lyalo kulaakuba nshila. Nshila iyo ilaakutumbwa ayi, “Nshila Isalalite.” Bamucita shibiibi teshi bakeendeemo umo, sobwe.’ (Isa. 35:8) Ino cishomesho ici cakalinga kusansulula nshi ku bene Isilaeli alimwi ino cilasansulula nshi kuli ndiswe?
“NSHILA ISALALITE”—MUCIINDI CAKALE KALE AMUNSHIKU SHINO
6. Ino nceebonshi nshila iyi yakalinga kwiitwa ayi ilisalalite?
6 Nshila inene iyi yakalinga kucite liina libotu lyakwaamba ayi, “Nshila Isalalite.” Ino nceebonshi nshila iyi yakalinga kwiitwa ayi ilisalalite? Nceebo cakwaamba ayi takwakalingaawo ‘shimucita shibiibi’—nkokwaamba ayi muJuda uli woonse wakalinga kucita bufuule, kulambila shibumbwabumbwa na kucita shibiibi shimwi shinene, wakalinga kweelete kusuminishikwa kukala mucishi ca Isilaeli. BaJuda bakaboolela kumishaabo, bakalinga kweelete kuba “bantu basalalite” kuli Lesa wabo. (Isa. 62:12) Ano ici tacaambi ayi abo bakaswa mubusha mu Babiloni, tabakalinga kuyandika kwaalulako shimwi mubuumi bwabo kwaamba ayi basangalashe Yehova.
7. Ino nshiinshi baJuda bamwi nshobakalinga kuyandika kwaalulako? Amwaambe cakubonenaako.
7 Kweelana ambotweeya kumatalikilo, baJuda baanji bakashalilwa mu Babiloni. Alimwi citoboneka ayi baanji bakatalika kuyeeya akucita shintu bweenka mbuli bene Babiloni. Ndipakeenda myaaka iinji pesule lyakwaamba ayi baJuda baboolela kucishi ca Isilaeli, Esila wakesa mukushiba ayi baJuda bamwi bakeeba banakashi batakalinga kulambila Yehova. (Kulo. 34:15, 16; Esila 9:1, 2) Alimwi ndipakeenda ciindi, mweendeleshi Neyemiya wakakankamana ndyaakesa mukushiba ayi baana bamwi bakashalilwa mucishi ca Isilaeli tabakalinga kucishiiwo akwaamba mushobo wa baJuda. (Duto. 6:6, 7; Neye. 13:23, 24) Cakalinga ciyumu kubaana abo kwiiya kusuna alimwi akulambila Yehova mukwiinga tabakalinga kucishi kabotu mushobo wa ciEbulu, ceebo cakwaamba ayi Maswi akwe Lesa akalinga kulembetwe bunene mumushobo uyu. (Esila 10:3, 44) Aboobo baJuda aba bakalinga kweelete kwaalula shiinji mubuumi bwabo. Sombi cakalinga cuubu kuli mbabo kucita boobo ndyebakalinga mucishi ca Isilaeli, mukwiinga bakatalika alimwi kulambila kusalalite.—Neye. 8:8, 9.
Kuswa mumwaaka wa 1919, basankwa, banakashi abaana baanji, bakaswa mu Babiloni munene akutalika kweenda mu “Nshila Isalalite” (Amubone palagilafu 8)
8. Ino nceebonshi shintu shakacitika kale kale abuumbi inga shatucafwa amunshiku shino? (Amubone cikope cili papeeji yakutaanguna.)
8 Aya ngamakani asangalasha. Sombi mpashi bamwi inga baliipusha ayi, ‘Sa shakacitika ku baJuda kale kale, inga shatucafwa amunshiku shino?’ Ee inga shatucafwa, mukwiinga cili anga aswebo tutokweenda mu “Nshila Isalalite.” Inga caba ayi tulinanikitwe na tuli ba “mbelele shimwi,” tulayandika kutolelela kweenda mu “Nshila Isalalite.” Kucita boobo kulaakutucafwa kutolelela kulambila Yehova pacecino ciindi akunembo, paciindi Bwaami bwakwe Lesa ndyeshi bukalete shoolwe shibotu pacishi capanshi. b (Joni 10:16) Kuswa mumwaaka wa 1919, basankwa, banakashi abaana baanji, bakaswa mu Babiloni munene, nkokwaamba ayi bupailishi boonse bwakubeca, akutalika kweenda munshila iyi yacikoshanyo. Mpashi amwebo muli pabantu batokweenda munshila iyi yacikoshanyo. Nabi kwaamba ayi bantu bakatalika kweenda munshila iyi mpashi myaaka 100 yainda, incito yakubamba nshila iyi yakatalika kale kale abuumbi.
KUBAMBA NSHILA
9. Kweelana a Isaya 57:14, ino munshila nshi incito yakubamba “Nshila Isalalilte” mboyakacitwa?
9 BaJuda ndyebakalinga kuswa mu Babiloni, Yehova wakashinisha ayi wakushamo cili coonse munshila ceenga cabashinkila. (Amubelenge Isaya 57:14.) Ino nshiinshi Yehova nshaakacita kwaamba ayi abambe “Nshila Isalalite” ya munshiku shino? Myaaka iinji mwaaka wa 1919 kootana kushika, Yehova wakasebensesha bantu bakalinga kumulemeka abuumbi kwaamba ayi bacafwe bantu kuswa mu Babiloni munene. (Amweelanye a Isaya 40:3.) Bakasebensa ncito iyandika yakubamba nshila kwaamba ayi cikonsheke kubantu basuni kwiiya kuswa mubupailishi bwakubeca akutalika kulambila Yehova pomwi abantu bakwe. Ino nshiinshi shakalinga kwiilikitwe muncito iyi yakubamba nshila? Amuleke tubandike pashintu shimwi nshebakacita kwaamba ayi babambe nshila.
Myaaka iinji mwaaka wa 1919 kootana kushika, Lesa wakasebensesha bantu bakalinga kumulemeka abuumbi kwaamba ayi bacafwe bantu kuswa mu Babiloni munene (Amubone mapalagilafu 10-11)
10-11. Ino kupulinta akusansulula Baibo kwacafwa buyani kwaamba ayi bantu baanji bashibe makani amu Baibo? (Amubone acikope.)
10 Kupulinta. Kuswabo kale kale kusa mukushika mpashi mumwaaka wa 1450, bantu bakalinga kukopolola Baibo kumaansabo. Kucita boobo kwakalinga kutola ciindi cilaamfu alimwi ma Baibo akalinga aniini, alimwi akalinga kudulite abuumbi. Ano bantu ndyebakatalika kusebensesha mashini kupulinta Baibo, cakalinga cuubu kupanga ma Baibo aanji paciindi comwi akwaabila bantu.
11 Kusansulula. Baibo yakalinga kucanika bunene mumushobo waci Latin. Sombi bantu beeite beenkabo mbobakalinga kunyumfwisha mushobo uyu. Nacibi boobo, bantu baanji ndyebakatalika kupulinta mabuku, bantu bakalinga kulemeka Lesa abuumbi bakatalika kusansulula Baibo mumishobo iinji bantu njobakalinga kwaamba paciindi cilya. Aboobo bantu bakalinga kucikonsha kweelanisha nshobakalinga kwiishikwa ku bapailishi na ncakwiila shakalinga kweendelana a Baibo nshoyaamba.
Lesa wakasebensesha bantu bakalinga kumulemeka abuumbi kwaamba ayi bacafwe bantu kuswa mu Babiloni munene (Amubone mapalagilafu 10-11) c
12-13. Amwaambe cakubonenaako citotondesha bashikwiiya Baibo bashomeka mumyaaka yamuma 1800 mbobakatalika kuyubulula njiisho shakubeca sha beshibupailishi.
12 Mabuku atucafwa kwiiya Baibo. Bantu bakalinga kwiiya Baibo cakubikila maano, bakeeya shiinji kuswa mu Maswi akwe Lesa. Sombi bamatanjilili babupailishi bakalinga kukalala na bashikwiiya Baibo batalika kulwiitako bamwi nshobakalinga kwiiya. Kucakubonenaako, kuswa mumwaaka wa 1835, basankwa bamwi bakalinga kulemeka Lesa bakatalika kupulinta matilakiti ayo akalinga kuyubulula njiisho shakubeca beshibupailishi nshobakalinga kwiisha mumaceeci abo.
13 Mpashi mumwaaka wa 1835, musankwa wakalinga kulemeka Lesa waliina lya Henry Grew wakapulinta tilakiti yakalinga kwaamba pashicitika na muntu wafwa. Mukatilakiti ako wakasebensesha Malembo kutondesha ayi buumi butafwi ncipo kuswa kuli Lesa. Alimwi ayi teshi cipo muntu ncaashalwaaco, mubupusano abamu maceeci aanji mbobakalinga kwiisha. Mu 1837, musankwa waliina lya George Storrs wakacana katilakiti ako ndyaakalinga palweendo musitima. Wakakabelenga alimwi wakashoma cakutatoonsha ayi makani aya ngancine. Aboobo wakasala kulwiitako bamwi nshakeeya. Mu 1842 wakaamba makani aanji akalinga kucite mutwi wakwaamba ayi “Kwiipusha—Sa Bamucita Shibiibi Balicite Buumi Butafwi?” Makani Ba George Storrs ngobakalemba akacafwa musankwa wacanike waliina lya Charles Taze Russell.
14. Ino Mukwesu Russell abashikwiiya Baibo bamwi mbaakalingaabo bakafubilaamo buyani muncito yakubamba nshila yakumushimu yakacitwa kale kale? (Amubone acikope.)
14 Ino Mukwesu Russell alimwi abashikwiiya Baibo bamwi mbaakalingaabo bakafubilaamo buyani muncito yakubamba nshila yakumushimu yakacitwa kale kale? Ndyebakalinga kwiiya bakalinga kusebensesha mabuku acafwa kunyumfwishisha makani amu Baibo akusebensesha ma Baibo amwi, alimwi ishi shoonse shakabambwa paciindi balo kabatana kutalika ncito yabo. Alimwi bakeeya shiinji kuswa kumakani amu Baibo ngobakalangoola basankwa mbuli Henry Grew, George Storrs, alimwi abamwi. Mukwesu Russell alimwi abashikwiiya Baibo mbaakalingaabo, bakaabanamo lubasu mukubamba nshila yakumushimu kwiinda mukubamba mabuku amatilakiti aanji ayo akalinga kwaamba pamakani amu Baibo apusenepusene.
15. Ino nshintu nshi shiyandika shakacitika mu 1919?
15 Mu 1919, bantu bakwe Lesa bakaswa mu Babiloni munene. Mumwaaka weenka uyu, ‘musebenshi ushomeka alimwi ucite maano’ wakatalika kusebensa kwaamba ayi acafwe bantu balibambite kwiiya kutalika kweenda mu “Nshila Isalalite.” (Mate. 24:45-47) Incito bamwi njobakasebensa kale kale kwaamba ayi babambe nshila iyi, yakacafwa bantu bakatalika kweenda munshila iyi inene yacikoshanyo, kwiiya shiinji pali Yehova akuyanda kwakwe. (Tus. 4:18) Kwiilikaawo, bakacikonsha kwaalula buumi bwabo akutalika kukonkela njiisho shakwe Yehova. Yehova taalangili bantu bakwe kwaalula buumi bwabo na shintu nshobashoma, paciindi comwi. Muciindi cakucita boobo, alasalasha bantu bakwe paniini paniini. (Amubone kabokosi kacite mutwi utokwaamba ayi “ Yehova Alasalasha Bantu Bakwe Paniini Paniini.”) Tulaakusangalala abuumbi paciindi soonse ndyeshi tukanoosangalasha Lesa mushintu shoonse nshetucita!—Kolo. 1:10.
“NSHILA ISALALITE” ICICALUKITE
16. Kuswabo mu 1919, ino “Nshila Isalalite” yatolelela buyani kubambwa? (Isaya 48:17; 60:17)
16 Ciindi aciindi, nshila ili yoonse ilayandika kunooibamba. Kuswabo mu 1919, incito yakubamba “Nshila Isalalite” yatolelela, kwaamba ayi cibe cuubu kubantu baanji kuswa mu Babiloni munene. Musebenshi ushomeka ndyaakasalwabo, wakatalika kusebensa. Aboobo mu 1921 wakabamba libuku ilyo lyakabambilwa kucafwa baabo bakalinga kusuni kwiiya cancine camu Baibo. Libuku ilyo lyakalinga kwiitwa ayi The Harp of God, alimwi lyakasansululwa mumishobo 36, lyalo mabuku akapulintwa akalinga kushika pafwiifwi a 6 miliyoni. Libuku ili lyakacafwa bantu baanji kwiiya cancine. Pacecino ciindi, tulicite libuku lipya libotu abuumbi ndyetutosebensesha kwiisha bantu Baibo licite mutwi waamba ayi Amusangalale Abuumi Kwamuyayaya! Munshiku shino shakweelaako, Yehova watolelela kusebensesha libunga lyakwe kutupa shakulya shakumushimu kwaamba ayi atucaafwe soonse kutolelela kweenda mu “Nshila Isalalite.”—Amubelenge Isaya 48:17; 60:17.
17-18. Ino “Nshila Isalalite” ilaya kuli?
17 Inga twaamba ayi na muntu wasumina kutalika kwiiya Baibo, nkokwaamba ayi waba acoolwe cakutalika kweenda mu “Nshila Isalalite.” Bamwi baleendakobo mushinso ufwiifwi akuswaamo munshila iyi. Lyalo bamwi balishinishite kutolelela kweenda munshila iyi kushikila bakashiike nkobatooya. Ino nkuli nkobatooya?
18 Kubaabo bacite coolwe cakuya kwiculu, “Nshila Isalalite” ilaakubatola mu “paladaiso yakwe Lesa” kwiculu. (Ciyu. 2:7, NWT) Kubaabo batolangila kukala pacishi, nshila iyi inene ilaakubatola kumamanino a Buleelo Bwakwe Klistu bwa Myaaka 1,000, paciindi muntu uli woonse ndyeshi akabe umaninite. Na mutokweenda munshila iyi pacecino ciindi, mutakaswiimo kushikila mukashike kumamanino alweendo lwanu! Tulisuni ayi mweende kabotu.
LWIIMBO 24 Amuse ku Kalundu Kakwe Yehova
a Yehova wakatumba liina nshila yacikoshanyo yakalinga kuswa ku Babiloni kuya ku Isilaeli ayi “Nshila Isalalite.” Sa amunshiku shino Yehova wakababambila nshila bantu bakwe? Ee! Kuswabo mu 1919, bantu baanji bakaswa mu Babiloni munene akutalika kweenda mu “Nshila Isalalite.” Soonse tulyeelete kutolelela kweenda munshila iyi kushikila tukashiike nkotutooya.
b Amubone libuku lyamu Cisungu licite mutwi waamba ayi Isaiah’s Prophecy—Light for All Mankind II, pe. 56 a 57.
c BUSANSULUSHI BWACIKOPE: Mukwesu Russell alimwi abashikwiiya Baibo bamwi mbaakalingaabo bakasebensesha mabuku acafwa kunyumfwisha Baibo ayo akabambwa kabatana kutalika ncito yabo.
