1. Ino nciinshi cituyumina kucita sobaanji?

 SA MWAKASALAWO kale cakucita lwakumushimu sombi cakamuyumina kucikumanisha? b Na mboboobo, tamubete nweenka. Kucakubonenaako, ba Philip bakalinga kusuni kunokwaamba mipailo ibotu akunopaila abuumbi. Sombi cakalinga kubayumina kucana ciindi cakupaila. Ba Erika bakalinga kusuni kunoofwambaana kushika kukubungana kwakuya muncito yakushimikila. Nacibi boobo, liinji bakalinga kucelwa kushika. Mankanda aanji, ba Tomáš bakeelesha kubelenga Baibo yoonse. Bakaamba ayi: “Kubelenga Baibo takwakalinga kunsangalashaawo. Ndakeeleshaako mankanda otatwe, sombi lyoonse ndakalinga kushikabo mulibuku lya Bene Lefi lyalo akucileka.”

2. Ino nceebonshi tatweelete kulefuka na twakasala cakucita lwakumushimu sombi tatucina kucikumanisha?

² Na kuli ncomusuni kucita sombi tamucina kucikumanisha, mutalefuki. Nabibo kukumanisha cakucita ciniini, kulayandika ciindi akusebensa cankusu. Mukwiinga mucisuni kukumanisha ncomwakasala kucita, ncitondesho cakwaamba ayi mulabona ayi bushicibusa bwanu a Yehova bulayandika alimwi mulisuni kumusebensela kushika peela nkusu shanu. Yehova alalumba pakusebensa cankusu kwanu. Nacibi boobo, taamulangili kucita nsheenga tamucikoonshi. (Kulu. 103:14; Mika 6:8) Aboobo mulyeelete kusala cakucita nceenga mwacikonsha kukumanisha kweelana abukaalo bwanu. Na mwasala cakucita, ino nshiinshi nsheenga mwaciita kwaamba ayi mucikumanishe? Amuleke tubandike shintu shimwi sheenga shamucafwa.

3. Ino nceebonshi cilayandika kusunishisha kukumanisha ncomwakasala kucita?

³ Kusunishisha kukumanisha ncomwakasala kucita ncintu ciyandika abuumbi. Muntu usunishishi kukumanisha ncaakasala kucita aleelesha cankusu kwaamba ayi acikumanishe. Kusunishisha kukumanisha cakucita inga twakukoshanisha ku muuwo uyo ushindika bwaato kwaamba ayi bushike nkobutooya. Na muuwo watolelela kupuupa, shikweensha bwaato inga washika nkwatooya. Alimwi na muuwo kaupuupa cankusu inga washika cakufwambaana nkwatooya. Aswebo na katusunishishi kukumanisha nshotwakasala kucita, cilaakutubeta cuubu kushikumanisha. Mukwesu David ukala ku El Salvador wakaamba ayi: “Na koosunishishi kukumanisha ncowakasala kucita, uleelesha cankusu kucikumanisha. Alimwi uleelesha kutasuminisha cili coonse kukupa kwaalilwa kukumanisha ncowakasala kucita.” Aboobo ino nshiinshi nsheenga mwaciita kwaamba ayi musunishishe kukumanisha nshomwakasala kucita?

4. Ino nciinshi nceenga twapaililaawo? (Bene Filipi 2:13) (Amubone acikope.)

⁴ Amupaile kwaamba ayi Lesa amucaafwe kusunishisha kukumanisha ncomwakasala kucita. Yehova inga wasebensesha mushimu wakwe kumucafwa kusunishisha kukumanisha ncomwakasala kucita. (Amubelenge Bene Filipi 2:13, NWT) Cimwi ciindi tulasalawo cakucita mukwiinga tulicishi ayi tulyeelete kucita boobo. Alimwi kucita boobo kulibo kabotu. Sombi inga katutasunishishi kukumanisha ncotwakasala kucita. Ubu mbocakalinga kuli nankashi ukala ku Uganda waliina lya Norina. Wakalinga kusuni kuba aciiyo ca Baibo, sombi taakalinga kusunishishi kucita boobo mukwiinga wakalinga kulinyumfwa ayi tacishi kabotu kwiisha. Ino nciinshi cakamucafwa? Wakaamba ayi: “Ndakatalika kupaila kuli Yehova bushiku abushiku, kumusenga kwaamba ayi ancaafwe kusunishisha kuba aciiyo ca Baibo. Lyalo paciindi ceenka ico ndakatalika kwiiya bwakwiisha kabotu, kweelana ambondakalinga kupaila. Pesule lya myeenshi iniini, ndakatalika kusunishisha kuba aciiyo ca Baibo. Mumwaaka weenka uyo ndakatalika kwiisha bantu bobilo Baibo.”

5. Ino nshiinshi nsheenga twakutumana kuyeeyawo sheenga shatucafwa kusunishisha kukumanisha ncotwakasala kucita?

⁵ Amukutumane kuyeeya pashintu Yehova nshaakamucitila. (Kulu. 143:5) Mutumwi Paulo wakalinga kukutumana kuyeeya pankumbu Yehova nshaakamutondesha alimwi ici cakamuyuminisha kusebensa cankusu muncito yakwe Yehova. (1 Koli. 15:9, 10; 1 Timo. 1:12-14) Amwebo na liinji kamukutumana kuyeeya pashintu Yehova nshaakamucitila, mulaakusunishisha kukumanisha ncomwakasala kucita. (Kulu. 116:12) Amunyumfwe nshakaamba nankashi umwi waku Honduras, shakamucafwa kutalika bupainiya bwaciindi coonse. Wakaamba ayi: “Ndakalinga kukutumana kuyeeya Yehova mbwaansuni. Wakandeta mulibunga lyakwe. Alandama akunshitilisha. Kukutumana kuyeeya pashintu ishi kwakancafwa kusuna Yehova abuumbi alimwi ndakasebensa cankusu kwaamba ayi ntalike bupainiya.”

6. Ino nciinshi cimwi ceenga catucafwa kusunishisha kukumanisha ncotwakasala kucita?

⁶ Amubikile maano kushoolwe nsheenga mwacaana na mwakumanisha ncomwakasala kucita. Amunyumfwe nshobakaamba ba Erika abo mbotwalinga twaambawo, isho shakabacafwa kunooshika cakufwambaana kukubungana kwakuya muncito yakushimikila. Bakaamba ayi: “Ndakashiba ayi ndakalinga kwiindwa shintu shiinji na ndacelwa kushika  kukubungana kwakuya muncito yakushimikila. Sombi ndyendakatalika kufwambaana kushika, ndakalinga kucikonsha kwanshanya abamakwesu abenankashi akucana ciindi cakuba pomwi ambabo. Alimwi ndakalinga kukutika kumakani eenga ancafwa kuya panembo akunoosangalala muncito yakushimikila.” Ba Erika bakabikila maano kushoolwe nsheenga bacana na kabashika cakufwambaana alimwi bakacikonsha kukumanisha ncobakasala kucita. Ino nshoolwe nshi nsheenga mwabikilako maano ndyemusuni kukumanisha ncomwakasala kucita? Na ncomwakasala kucita nkubelenga Baibo nabi kupaila, amuyeeye mbweenga shayumya bushicibusa bwanu a Yehova. (Kulu. 145:18, 19) Na ncomwakasala kucita nkwiiya kuba amubo umwi wa Bwineklistu, amubikile maano ku mbweenga kuba amubo uyo kwamucafwa kuba abushicibusa buyumu abamwi. (Kolo. 3:14) Mpashi inga mwalemba sheebo shoonse shimupa kusuna kukumanisha ncomwakasala kucita. Ciindi aciindi munoolanga pamulongo uyo. Ba Tomáš mbotwaambawo bakaamba ayi: “Na kuli sheebo shiinji shitompa kusuna kukumanisha ncondakasala kucita, ndeelesha cankusu kucikumanisha.”

7. Ino nciinshi cakacafwa ba Julio abakaabo kukumanisha ncobakasala kucita?

⁷ Amucane ciindi cakuba pomwi abaabo beenga bamuyuminisha. (Tus. 13:20) Amunyumfwe ba Julio abakaabo nshebakaamba, shakabacafwa kuya mukusebensela kumusena ubulishite. Ba Julio bakaamba ayi: “Twakaba bushicibusa abantu bakalinga kutuyuminisha kukumanisha ncotwakasala kucita. Alimwi twakalinga kubandikaabo pa nshotwakasala kucita. Bakatulwiita makani akatucafwa mukwiinga balo bakakumanishawo kale nshotwakalinga kusuni kucita. Alimwi bakalinga kutwiipusha kwaamba ayi bashibe na tulaakucikonsha kushikumanisha. Kwiilikaawo, bakalinga kutuyuminisha na tutoyandika kuyuminishikwa.”

8. Ino nshiinshi sheenga shacitika na katusunibo kukumanisha ncotwakasala kucita paciindi ndyetusunishishi kucita boobo? (Amubone acikope.)

⁸ Cimwi ciindi, soonse inga twalinyumfwa kutasuna kukumanisha ncotwakasala kucita. Ano sa ici cilaamba ayi inga tatukumanishi ncotwakasala kucita? Sobwe. Kucakubonenaako, muuwo na kaupuupa cankusu inga wapa kwaamba ayi bwaato bushike nkobutooya. Nacibi boobo, teshi lyoonse muuwo ndyeupuupa cankusu. Alimwi cimwi ciindi inga kakulibo tontolo. Ano sa ici cilaamba ayi shikweensha bwaato alyeelete kulindila kushikila muuwo watalika kupuupa cankusu? Sobwe. Kucakubonenaako, maato amwi alaba a injini lyalo amwi alaba a intapulo. Aboobo shikweensha bwaato inga walisha injini na kusebensesha intapulo kwaamba ayi eenshe bwaato. Kusunishisha kukumanisha ncotwakasala kucita inga twakukoshanisha kumuuwo. Cimwi ciindi inga katusunishishi kukumanisha ncotwakasala kucita lyalo cimwi ciindi inga katutasuniiwo. Aboobo na katusunibo kukumanisha ncotwakasala kucita ndyetutolinyumfwa boobo, inga tatucikumanishiiwo. Sombi mbuli shikweensha bwaato mbwaacana nshila shimwi kwaamba ayi ashike nkwatooya, aswebo inga tweelesha kukumanisha ncotwakasala kucita nabi ndyetutasunishishi kucita boobo. Nabi kwaamba ayi kucita boobo inga tacibi cuubu, mulaakusangalala na mukakumanishe ncomwakasala kucita. Katutana kubandika nsheenga twaciita, amuleke tutaangune kubandika pamwiipusho ngweenga twaliipusha.

9. Sa tulyeelete kutolelela kweelesha kukumanisha ncotwakasala kucita nabi ndyetutasunishishi kucita boobo? Amusansulule.

 ⁹ Yehova alisuni ayi tunomusebensela calusangalalo alimwi cakulyaaba. (Kulu. 100:2; 2 Koli. 9:7) Aboobo sa tulyeelete kutolelela kweelesha kukumanisha ncotwakasala kucita lwakumushimu nabi ndyetutasunishishi kucita boobo? Amuyeeye pacakubonenaako ca mutumwi Paulo. Wakaamba ayi: “Nebo ndashibisha mubili wangu akuukoma.” (1 Koli. 9:25-27) Nabi kwaamba ayi cimwi ciindi Paulo taakalinga kusunishishi kucita Yehova nshaakalinga kusuni ayi acite, wakalinga kweelesha cankusu kushicita. Ncakutatoonsha kwaamba ayi Paulo nshaakalinga kucita shakasangalasha Yehova alimwi Yehova wakamupa shoolwe ceebo cakusebensa cankusu kwakwe.​—2 Timo. 4:7, 8.

10. Ino nshoolwe nshi nsheenga twacaana na tweelesha kukumanisha ncotwakasala kucita nabi ndyetutasunishishi kucita boobo?

¹⁰ Aswebo na katweelesha kukumanisha ncotwakasala kucita nabi ndyetutasunishishi kucita boobo, Yehova alasangalala. Alasangalala mukwiinga alicishi ayi tutoocita ceeco ncotwakasala kucita ceebo cakwaamba ayi tulimusuni, nabi kwaamba ayi inga katutasunishishi kucita ceeco ncotwakasala kucita. Yehova alaakutupa shoolwe ceebo cakusebensa cankusu kwesu bweenka mbwakapa Paulo shoolwe. (Kulu. 126:5) Na twabona Yehova mbwatotupa shoolwe, inga twatalika kusunishisha kukumanisha nshotwakasala kucita. Nankashi waliina lya Lucyna ukala ku Poland wakaamba ayi: “Cimwi ciindi ndanyumfwa butolo kuya muncito yakushimikila, bunene bunene na ndalema. Nacibo boobo, lusangalalo ndoncana pesule lya kwaabanamo lubasu muncito yakushimikila, ncoolwe cilibetele.” Aboobo atubandike nsheenga twaciita na katutasunishishi kukumanisha ncotwakasala kucita.

11. Ino Yehova inga watucafwa buyani kwaamba ayi tube amubo wakulikasha?

¹¹ Amupaile kuli Yehova kwaamba ayi amucaafwe kuba amubo wa kulikasha. Liinji liswi lya kulikasha lilasansulula kuleya kucita cintu cibiibi. Nacibi boobo, kulikasha ngu mubo uyandika kwaamba ayi tucite cintu cibotu, bunene bunene na ncetusuni kucita nciyumu nabi na katutasunishishi kucicita. Mutaluubi kwaamba ayi kulikasha ncisepo ca mushimu usalashi. Aboobo amusenge mushimu usalashi kuli Yehova kwaamba ayi umucaafwe kuba amubo uyu uyandika. (Luka 11:13; Gala. 5:22, 23) Ba David mbotwalinga twaambawo bakaamba mupailo mbowakabacafwa. Bakalinga kusuni kunoocita ciiyo capalwaabo lyoonse. Bakaamba ayi: “Ndakalinga kusenga Yehova kwaamba ayi ancaafwe kuba amubo wa kulikasha. Kwiinda mulucafwo lwakwe, ndakabika bubaambo bubotu bwakucita ciiyo capalwaangu, akubukonkela.”

12. Ino njiisho njotucana pa Shikushimikila 11:4 inga yatucafwa buyani kukumanisha nshotwakasala kucita lwakumushimu?

¹² Mutalindili ayi shintu shikabe kabotu. Mucishi cino inga tatulangili shintu kuba kabotu. Na katulindila ayi shintu shikabe kabotu, teshi tukakumanishe ncotwakasala kucita. (Amubelenge Shikushimikila 11:4.) Mukwesu wa liina lya Dayniel wakaamba ayi: “Teshi lyoonse shintu ndyeshiba kabotu. Aboobo tatweelete kulindila ayi kushikila shintu shikabe kabotu. Tulyeeletebo kutalika kweelesha kukumanisha nshotwakasala kucita.” Mukwesu ukala ku Uganda wa liina lya Paul, wakaamba ceebo cimwi ceelete kutupa kutalindila kukumanisha ncotwakasala kucita. Wakaamba ayi: “Na twatalika kweelesha kukumanisha ncotwakasala kucita nabi ndyecibete ciyumu kucita boobo, Yehova alaakutupa shoolwe.”​—Mala. 3:10.

13. Ino nshibotu nshi sheenga shaswaamo na twatalika kweelesha kukumanisha nshotwakasala kucita paniini paniini?

¹³ Amutalike kukumanisha ncomwakasala kucita paniini paniini. Na ncomwakasala kucita citoboneka ciyumu abuumbi, mpashi inga kamutasunishishi kucikumanisha. Na ubo mbocibete kuli ndimwe, sa inga mwatalika paniini paniini kukumanisha ncomwakasala kucita? Na mwakasalawo kwiiya kuba amubo umwi wa Bwineklistu, inga mwataanguna kunotondesha mubo uyo mu mbasu shiniini niini. Na mwakasalawo kubelenga Baibo yoonse, mpashi inga mwataanguna kunobelengabo Baibo kwaciindi ciniini. Ba Tomáš abo mbotwaambawo mu palagilafu 1, cakabayumina kumanisha kubelenga Baibo  mumwaaka womwi. Bakaamba ayi: “Ndakashiba ayi nshindakalinga kucikonsha kukonkela bubaambo mbondakabika. Aboobo ndakasalawo kweelesha alimwi. Sombi paciindi ici ndakalinga kubelengabo mavesi aniini bushiku abushiku, akukutumana kuyeeyawo. Lyalo ndakatalika kunoosangalala kubelenga Baibo.” Ba Tomáš ndyebakatalika kusangalala kubelenga Baibo, bakatalika kubelenga kwaciindi cilaamfu. Mukuya kwaciindi, bakacikonsha kubelenga Baibo yoonse. c

14. Ino nshiinshi sheenga shacitika sheenga shapa kwaamba ayi citubete ciyumu kukumanisha nshotwakasala kucita?

¹⁴ Ncancine ncakwaamba ayi nabi katusunishishi buyani kukumanisha nshotwakasala kucita, alimwi katutondesha mubo wakulikasha, kuli shimwi sheenga shacitika sheenga shatupa kwaalilwa kukumanisha nshotwakasala kucita. Kucakubonenaako, inga kwacitika “shintu shakuteengashila” sheenga shapa kwaamba ayi tutabi aciindi cakukumanisha nshotwakasala kucita. (Shiku. 9:11) Mpashi inga tweenda mulipenshi liyumu lyeenga lyatupa kulefuka abuumbi. (Tus. 24:10) Mukwiinga tatumaninite, inga twaciita shilubo sheenga shapa kwaamba ayi twaalilwe kukumanisha nshotwakasala kucita. (Loma. 7:23) Na mpashi inga twalinyumfwabo kulema. (Mate. 26:43) Ino nshiinshi sheenga shatucafwa kutaboolela mwisule na kuli shacitika sheenga shapa kwaamba ayi citubete ciyumu kukumanisha nshotwakasala kucita?

15. Ino nceebonshi tamweelete kuboolela pesule, na kuli shacitika sheenga shapa kwaamba ayi cimubete ciyumu kukumanisha ncomwakasala kucita? Amusansulule. (Kulumbaisha 145:14)

¹⁵ Amutolelele kweelesha kukumanisha ncomwakasala kucita nabi kuli shacitika sheenga shapa kwaamba ayi cibe ciyumu kucikumanisha. Baibo ilaamba ayi inga tweenda mumapensho apusenepusene. Nacibi boobo, ilaamba cakuteenda mweela ayi inga twacikonsha kukumanisha nshotwakasala kucita kwiinda mulucafwo lwakwe Yehova. (Amubelenge Kulumbaisha 145:14.) Mukwesu wa liina lya Philip ngotwaambawo wakaamba ayi: “Nshibikili maano ku shiindi ndyendakaalilwa kukumanisha nshondakasala  kucita. Sombi ndabikila maano ku shiindi ndyentalika alimwi kweelesha kukumanisha nshondakasala kucita.” Ba David mbotwaambawo bakaamba ayi: “Ndeelesha kubona shimpa kwaalilwa kukumanisha nshondakasala kucita mbuli shoolwe shakutondesha mboomusuni Yehova.” Na mwatolelela kweelesha kukumanisha ncomwakasala kucita nabi ndyecibete ciyumu kucita boobo, mulatondesha ayi mulisuni kusangalasha Yehova. Yehova alasangalala abuumbi na wabona mbomutokweelesha cankusu kukumanisha ncomwakasala kucita!

16. Ino nshiinshi nsheenga mweeya na kuli cacitika ceenga capa kwaamba ayi mwaalilwe kukumanisha ncomwakasala kucita?

¹⁶ Amwiiye kushakacitika shakapa kwaamba ayi cibe ciyumu kukumanisha ncomwakasala kucita. Amuyeeye shakalengesha ayi shintu isho shicitike lyalo akuliipusha ayi, ‘Ino nshiinshi nsheenga ndaciita kwaamba ayi shintu shamushobo uyu shitakacitiki alimwi?’ (Tus. 27:12) Cimwi ciindi na ncomwakasala kucita nciyumu kucikumanisha, mpashi inga caba ayi mwakasala kucita cintu nceenga tamucikoonshi. Na ubo mbocibete kuli ndimwe, mpashi inga mwayeeyawo alimwi paceeco ncomwakasala kucita akubona na inga mwacikonsha kucikumanisha. d Yehova teshi akamubonewo ayi mwaalilwa ceebo cakwaamba ayi tamuna kucikonsha kukumanisha ceeco ncomwakasala kucita.​—2 Koli. 8:12.

17. Ino nceebonshi tulyeelete kutolelela kuyeeya pa nshotwakakumanisha kale kucita?

¹⁷ Amutolelele kuyeeya pa nshomwakakumanisha kale kucita. Baibo ilaamba ayi “Lesa uliluleme, aboobo teshi akalube ncito njemwakacita.” (Ebu. 6:10) Aboobo amwebo tamweelete kuluba nshomwakacikonsha kucita. Munooyeya pa nshomwakacikonsha kucita mbuli—kuba abushicibusa buyumu a Yehova, kulwiitako bamwi pali nguwe na kubombekwa. Bweenka mbomwakacikonsha kuya panembo akukumanisha nshomwakasala kucita lwakumushimu kale kale, inga mwatolelela kuya panembo akukumanisha nshomwakasala kucita pacecino ciindi.​—Filip. 3:16.

18. Ino nciinshi ncotweelete kunoocita ndyetutokweelesha kukumanisha ncotwakasala kucita lwakumushimu? (Amubone acikope.)

¹⁸ Kwiinda mulucafwo lwakwe Yehova, inga mwacikonsha kukumanisha ncomwakasala kucita bweenka shikweensha bwaato mbwasangalala na washika nkwatooya. Sombi munookwiibaluka ayi beshikweensha maato baanji, balasangalala kubona shintu shimwi ndyebali palweendo. Amwebo ndyemutotolelela kweelesha kukumanisha ncomwakasala kucita lwakumushimu, munoobona Yehova mbwatoomucafwa, lyalo kucita boobo kulaakumucafwa kuba alusangalalo. (2 Koli. 4:7) Na mukabule kuboolela mwisule, mulaakutambula shoolwe shiinji kunembo.​—Gala. 6:9.