1. Ino nshiinshi Baibo nshoyaamba palusuno lwancinencine?

 LUSUNO ‘lulanyaka kuba mulilo unene abuumbi, mulilo wakwe Yehova. Maanshi aanji taakoonshi kushimya mulilo wa lusuno ayalo milonga teekoonshi kulutola kumukuuku.’ b (Lwiimbo lwa. 8:6, 7) Aya ngamaswi abotu abuumbi asansulula lusuno lwancinencine mbolubete! Alimwi ngamaswi ayuminisha kubeebene mukwiinga inga bacikonsha kunootondeshanya lusuno lwancinencine.

2. Ino nshiinshi beebene nsheenga bacita kwaamba ayi batolelele kusunana?

² Beebene balyeelete kunosebensa cankusu kwaamba ayi banootondeshanya lusuno lwancinencine kwa buumi bwabo boonse. Kucakubonenaako, mulilo ulatolelela kunyaka na kamuusoonsela akubikaako nkuni. Na mwabula kucita boobo, mulilo ulashimika. Abalo beebene inga batolelela kusunana abuumbi na batolelela kuyumya bushicibusa bwabo. Cimwi ciindi, beebene inga balinyumfwa ayi bacileka kusunana abuumbi, bunene bunene ndyebatokwiinda mumapensho mbuli kubula maali, kuciswa ciswa na ceebo ca mukuli wakulela baana. Aboobo na muli mucikwati, ino nshiinshi nsheenga mwaciita kwaamba ayi mutaleki ‘mulilo wakwe Yehova’ kushimika mucikwati canu? Mumutwi uyu, tutobandika pashintu shotatwe sheenga shamucafwa kutolelela kuyumya bushicibusa bwanu akuba alusangalalo mucikwati canu. c

3. Ino kuba abushicibusa buyumu a Yehova kulacafwa buyani beebene kutolelela kusunana abuumbi? (Shikushimikila 4:12) (Amubone acikope.)

³ Beebene balyeelete kusebensa cankusu kuyumya bushicibusa bwabo a Yehova kwaamba ayi bataleki ‘mulilo wakwe Yehova’ kushimika.  Ino kuba abushicibusa buyumu a Yehova inga kwabacafwa buyani mucikwati cabo? Na beebene kababikila maano ku bushicibusa bwabo a Ishiwabo wakwiculu, cilaakubabeta cuubu kukonkela butanjilishi bwakwe, ico ceshi cikabacaafwe kuleya akukoma mapensho eenga apa kwaamba ayi bacileeke kusunana abuumbi. (Amubelenge Shikushimikila 4:12.) Abo bacite bushicibusa buyumu a Yehova baleelesha kukonkela cakubonenaako cakwe akutondesha mibo njaacite mbuli kubota moyo, kukalika moyo alimwi akulekelela. (Efe. 4:32–5:1) Na beebene kabatondesha mibo iyi, cilaakubabeta cuubu kusunana abuumbi. Nankashi waliina lya Lena, uyo wekala mucikwati kwamyaaka iindilila 25 wakaamba ayi, “Ncuubu kusuna akulemeka muntu ucite bushicibusa buyumu a Yehova.”

4. Ino nceebonshi Yehova wakasala Josefu a Maliya kwaamba ayi bese mukuba bashali bakwe Mesiya?

⁴ Amuleke tubandike pacakubonenaako camu Baibo. Yehova ndyaakalinga kusala beebene abo bakalinga kusa mukuba bashali bakwe Mesiya, wakasala Josefu a Maliya, pabantu baanji bakalinga bamulunyungu lwakwe Defedi. Ino nceebonshi? Nceebo ncakwaamba ayi boonse bobilo bakalinga kucite bushicibusa buyumu a Yehova. Alimwi Yehova wakalinga kucishi kwaamba ayi balaakutolelela kumubika panembo mucikwati cabo. Nobeebene, ino nshiinshi nsheenga mweeya kuswa kuli Josefu a Maliya?

5. Ino nshiinshi nsheenga basankwa beebete beeya kuswa kucakubonenaako cakwe Josefu?

⁵ Josefu wakalinga kukonkela butanjilishi bwakwe Yehova camoyo woonse alimwi ici cakapa kwaamba ayi abe musankwa uli kabotu. Mankanda otatwe, wakatambula butanjilishi kuswa kuli Lesa bwakalinga kukumite mukwashi wakwe. Pashiindi shoonse shotatwe, wakakonkela butanjilishi cakufwambaana nabi kwaamba ayi tacakalinga cuubu. (Mate. 1:20, 24; 2:13-15, 19-21) Mukwiinga Josefu wakakonkela butanjilishi bwakwe Lesa, wakacikonsha kushitilisha Maliya akumulama kabotu. Cilyeelete kwaamba ayi Josefu nshaakacita shakapa kwaamba ayi Maliya amusuune akunoomulemeka abuumbi! Nobasankwa nomweebete, inga mwakonkela cakubonenaako cakwe Josefu kwiinda mukulangoola butanjilishi bwamu Baibo bwaamba pa mbweenga mwalama mukwashi wanu. d Na mwakonkela butanjilishi ubu nabi kwaamba ayi inga mwayandika kwaalulako shimwi, mulatondesha ayi mulibasuni bakaanu alimwi mulayumya cikwati canu. Nankashi ukala ku Vanuatu, uyo wekala mucikwati kwamyaaka iindilila 20 wakaamba ayi: “Na beebangu balangoola butanjilishi bwakwe Yehova akubukonkela, ndabalemeka abuumbi. Ndalinyumfwa kushitilishikwa alimwi ndashoma nshobasalawo kucita.”

6. Ino nshiinshi nsheenga banakashi beebetwe beeya kuswa kucakubonenaako cakwe Maliya?

⁶ Maliya wakalinga kucite bushicibusa buyumu a Yehova alimwi wakatolelela kuyumya lushomo lwakwe. Wakalinga kwaashi kabotu Malembo.  Alimwi wakalinga kucana ciindi cakukutumana kuyeeya pasheesho nshaakalinga kwiiya. (Luka 2:19, 51) Ncakutatoonsha kwaamba ayi kuba abushicibusa buyumu a Yehova kwakapa kwaamba ayi Maliya abe mwanakashi uli kabotu abuumbi. Munshiku shino, banakashi baanji beebetwe baleelesha kukonkela cakubonenaako cakwe Maliya. Kucakubonenaako, nankashi waliina lya Emiko wakaamba ayi: “Kaantana kweebwa ndakalinga kucite mulongo wakucita shintu shakumushimu. Sombi ndyendakeebwa, beebangu mbobakalinga kupaila lyoonse akutanjilila kulambila kwamukwashi. Aboobo ndakesa mukushiba ayi ndakatalika kunoocinkabo manungo muli mbabo kwaamba ayi bayumye lushomo lwangu. Ndakesa mukushiba ayi ndakalinga kuyandika kutolelela kuyumya bushicibusa bwangu a Yehova nemwiine. Aboobo ndacana ciindi cakuba neenka kwaamba ayi mpaile kuli Lesa, kubelenga Baibo akukutumana kuyeeya pa Maswi akwe.” (Gala. 6:5) Nobanakashi nomweebetwe, na mwatolelela kuyumya bushicibusa bwanu a Yehova, beebanu balaakunoomulumbaisha akumusuna abuumbi.​—Tus. 31:30.

7. Ino nshiinshi nsheenga beebene beeya kuswa kucakubonenaako cakwe Josefu a Maliya pamakani akunolambila Yehova pomwi?

⁷ Kwiilikaawo, Josefu a Maliya bakalinga kusebensela pomwi kwaamba ayi bayumye bushicibusa bwabo a Yehova. Bakalinga kucishi kuyandika kwa kulambila Yehova pomwi mbuli mukwashi. (Luka 2:22-24, 41; 4:16) Cilyeelete tacakalinga cuubu kucita boobo mukwashi ndyewakalinga kuya cikomenenaako. Nacibi boobo, bakacikonsha. Ici ncakubonenaako cibotu abuumbi beebene nceenga bakonkela munshiku shino! Na amwebo mulicite baana, bweenka mbocakalinga kuli Josefu a Maliya, mpashi inga kacimuyumina kunoocanika kumabungano na kucana ciindi cakuba akulambila kwamukwashi. Alimwi mpashi inga caba ciyumu abuumbi kucana ciindi cakwiiya akupaila pomwi mbuli beebene. Nacibi boobo, munookwiibaluka kwaamba ayi na kamucana ciindi cakulambila Yehova pomwi mulayumya bushicibusa bwanu anguwe alimwi mulayumya cikwati canu. Aboobo amubike kulambila Yehova panembo mucikwati canu.

8. Ino nshiinshi beebene bacite mapensho mucikwati nsheenga bacita kwaamba ayi banoofubilaamo abuumbi mukulambila kwamukwashi?

⁸ Ano ino nshiinshi nsheenga mwaciita na muli mapensho mucikwati canu? Mpashi inga camubeta ciyumu kunooba akulambila kwamukwashi. Na ubo mbocibete, amutaangune kubandika makani afwiifwi amusangalasha alimwi noonse ngoomuba baangulukite kubandikaawo. Kucita boobo inga kwayumya bushicibusa bwanu akumucafwa kusuna kunolambila Yehova pomwi.

9. Ino nceebonshi beebene balyeelete kunoocana ciindi cakuba pomwi?

⁹ Nobeebene, cimwi nceenga mwaciita kwaamba ayi mutolelele kusunana, nkucana ciindi cakuba pomwi. Kucita boobo kulaakumucafwa kushiba wooyo ngomweebenaakwe nshatoyeeya alimwi ambwatolinyumfwa. (Mata. 2:24) Amunyumfwe ba Lilia aba Ruslan beebene abo bekala mucikwati kwamyaaka iindilila 15 nshebakesa mukushiba pesule lya kweebanabo. Ba Lilia bakaamba ayi: “Twakesa mukushiba ayi teshi tunocana ciindi cinene cakuba pomwi kweelana ambotwakalinga kuyeeya. Bushiku abushiku twakalinga kuba ashakucita shiinji mbuli kuya kuncito, kusebensa ncito shapaŋanda alimwi mukuya kwaciindi twakaba amukuli wakulama baana. Twakesa mukushiba kwaamba ayi na katutacani ciindi cakuba pomwi mbuli beebene, inga twacileka kusunana.”

10. Ino beebene inga baikonkela buyani njiisho njetucana pa Bene Efeso 5:15, 16?

¹⁰ Ino nshiinshi nsheenga beebene bacita kwaamba ayi bashinisha kunoocana ciindi cakuba pomwi? Mpashi inga mwayandika kupatula ciindi cakuba pomwi. (Amubelenge Bene  Efeso 5:15, 16.) Mukwesu waliina lya Uzondu ukala ku Nigeria wakaamba ayi: “Ndyentolemba mulongo wa nshonsuni kucita, ndalembawo ciindi cakuba pomwi amukaangu alimwi akushinisha kuba pomwi anguwe na ciindi ico cashika.” (Filip. 1:10) Amunyumfwe nankashi waliina lya Anastasia, uyo ukala ku Moldova alimwi weebetwe kumutanjilila walubasu mbwasebensesha kabotu ciindi cakwe. Wakaamba ayi: “Ndeelesha kucita shintu sha palwaangu beebangu ndyebatosebensa mikuli yabo. Kucita boobo kulatucafwa kunoocana ciindi cakuba pomwi pesule lyakwaamba ayi soonse twamanisha nshetwalinga kucita.” Ano ino mbuyani na mulicite shakucita shiinji cakwaamba ayi cilamuyumina kucana ciindi cakuba pomwi?

11. Ino nshiinshi Akwila a Pulisila nshebakalinga kucitila pomwi?

¹¹ Kuli nsheenga beebene beeya kuswa kucakubonenaako cakwe Akwila a Pulisila, abo bakalinga kulemekwa ku Beneklistu baanji bakutaanguna. (Loma. 16:3, 4) Nabi kwaamba ayi Baibo tayaambi shiinji pacikwati cabo, ilatondesha ayi bakalinga kusebensa ncito yakumubili, kushimikila akucafwa bamwi pomwi. (Milimo 18:2, 3, 24-26) Alimwi lyoonse Baibo ndyeyaamba pali Akwila a Pulisila, ilabaamba boonse bobilo.

12. Ino nshiinshi nsheenga beebene bacita kwaamba ayi banooba aciindi cinene cakuba pomwi? (Amubone acikope.)

¹² Ino beebene inga bacikonkela buyani cakubonenaako cakwe Akwila a Pulisila? Amuyeeye pashintu shiinji nshomuyandika kucita mbuli beebene. Sa inga mwasebensela pomwi incito isho muciindi cakusebensa nweenka? Kucakubonenaako, Akwila a Pulisila bakalinga kusebensela pomwi muncito yakushimikila. Sa amwebo lyoonse mulacana ciindi cakusebensela pomwi muncito yakushimikila? Kwiilikaawo, Akwila a Pulisila bakalinga kusebensela pomwi incito yakumubili. Mpashi mwebo awooyo ngomweebenaakwe tamusebensi incito yomwi yakumubili, nacibi boobo, sa inga mwacana ciindi cakusebensela pomwi incito shapaŋanda? (Shiku. 4:9) Na kamusebensela pomwi incito, mulaakuba aciindi cakubandika alimwi mulaakulinyumfwa ayi mulasebensela pomwi. Ba Robert aba Linda mbeebene bekala mucikwati kwamyaaka iindilila 50. Ba Robert bakaamba ayi: “Kwaambabo lushinisho, tatucani ciindi cinene cakucita shakulikondelesha pomwi. Sombi na ntoosansha mbale lyalo bakaangu kabashipukuta, nabi na ndyentosakwita lyalo bakaangu besa mukuncafwa, ndakondwa abuumbi. Kusebensela pomwi kulatupa kuba bacatene. Alimwi twatolelela kusunana abuumbi.”

13. Ino nshiinshi beebene nshobeelete kucita kwaamba ayi babe bacatene cancinencine?

¹³ Nacibi boobo, mulyeelete kwiibaluka kwaamba ayi kubabo pomwi inga takupi kwaamba ayi mube bacatene. Nankashi umwi weebetwe ukala ku Brazil wakaamba ayi: “Munshiku shino, tulicite shakucita shiinji, aboobo ncuubu kutalika kuyeeya ayi tulacana ciindi cakuba pomwi ceebo cakuyeeya ayi tulekala muŋanda yomwi. Ndakesa mukushiba ayi tulayandika kucita shiinji  kuteshi kubabo pomwi. Ndyeelete kubikila maano ku wooyo ngonjebenaakwe.” Amunyumfwe ba Bruno aba Tays bakaabo, mbobashinisha kunoobikilana maano. Ba Bruno bakaamba ayi: “Ndyetutobandika tulabika mafooni esu palubasu kwaamba ayi tusangalale ndyetubete pomwi.”

14. Ino nshiinshi beebene nsheenga bacita na tabasangalali kuba pomwi?

¹⁴ Ano ino nshiinshi nsheenga mwaciita na mwebo awooyo ngomweebenaakwe tamusangalali kuba pomwi? Mpashi inga caba ayi shintu nshomusuni shilipusene na mpashi mulakalashanya. Ino nshiinshi nsheenga mwaciita? Amuyeeye pacakubonenaako ca mulilo ncetwalinga twabandikawo. Taushikilibo kutalika kunyaka peenkapo. Inga mwayandika kubikaako tusaala lyalo akunobikaako nkuni shinene paniini paniini. Amwebo mpashi inga mwayandika kutaanguna kunoocana ciindi ciniinibo cakuba pomwi bushiku abushiku. Ndyemuli pomwi amushinishe kucita shintu shimusangalasha noonse muciindi cakucita shintu sheenga shakalasha umwi. (Jemu. 3:18) Kucita boobo kulaakumucafwa kutalika kusunana abuumbi.

15. Ino nceebonshi kutondeshanya bulemu kulayandika kwaamba ayi beebene batolelele kusunana?

¹⁵ Kutondeshanya bulemu kulayandika abuumbi mucikwati. Kuli anga ngu muuwo wa oxygen uyo upa kwaamba ayi mulilo unyake abuumbi. Mulilo ulashimika na taakuwo muuwo wa oxygen. Abalo beebene na bacileka kutondeshanya bulemu, inga bacileka kusunana abuumbi. Ano na beebene kabatondeshanya bulemu, balatolelela kusunana abuumbi. Nacibi boobo, mulyeelete kwiibaluka kwaamba ayi, teshi kuyeeyabo ayi mulamutondesha bulemu uyo ngomweebenaakwe, sombi alyeelete kulinyumfwa ayi mulamutondesha bulemu. Ba Penny aba Aret mbeebene bekala mucikwati kwamyaaka iindilila 25. Ba Penny bakaamba ayi: “Mukwiinga tulatondeshanya bulemu, tulisunene abuumbi mucikwati cesu. Tulaba baangulukite kwaamba mbotutoyeeya mukwiinga tulicishi kwaamba ayi umwi nshatoyeeya shilayandika.” Aboobo, ino nshiinshi nsheenga mwaciita kwaamba ayi mucafwe wooyo ngomweebenaakwe kulinyumfwa ayi mulamulemeka abuumbi? Amuleke tubandike pacakubonenaako cakwe Abulaamu a Saala.

16. Ino nshiinshi nsheenga basankwa beebete beeya kuswa kucakubonenaako cakwe Abulaamu? (1 Pita 3:7) (Amubone acikope.)

¹⁶ Abulaamu wakalinga kutondesha Saala bulemu. Wakalinga kukutika kuli Saala akuyeeya mbweenga walinyumfwa pamakani amwi. Paciindi cimwi, Saala wakalisukama. Alimwi ndyaakalinga kukalalite wakalwiita Abulaamu mbwaakalinyumfwa akumupa mulandu palipenshi ndyaakalinga kwiindaamo. Sa Abulaamu wakamukumbula cabukali? Sobwe. Abulaamu wakalinga kucishi ayi Saala ngu mwanakashi unyumfwila. Wakakutika Saala nshaakaamba akweelesha kumana lipenshi. (Mata. 16:5, 6) Ino nshiinshi nsheenga tweeyawo? Nobasankwa nomweebete, mulicite mukuli wakusalila mukwashi  wanu shakucita. (1 Koli. 11:3) Nacibi boobo, cintu cibotu nceenga mwaciita kunyumfwa bakaanu mbobatoyeeya kamutana kusalawo cakucita, bunene bunene ceenga cabakuma. (1 Koli. 13:4, 5) Pashiindi shimwi, mpashi bakaanu inga balisukama alimwi inga basuna kumulwiita mbobatoolinyumfwa. Sa mulabikila maano ku mbobalinyumfwa kwiinda mukukutika cakubikila maano? (Amubelenge 1 Pita 3:7.) Ba Angela aba Dmitry mbeebene bekala mucikwati pafwiifwi amyaaka 30. Ba Angela bakaamba beebabo nshobacita shipa kwaamba ayi banoolinyumfwa ayi balabatondesha bulemu. Bakaamba ayi: “Lyoonse ba Dmitry balankutika cakubikila maano na ndakalala nabi na ndisunibo kubandika. Balankalikila moyo nabi na ndaamba cabukali.”

17. Ino nshiinshi nsheenga banakashi beebetwe beeya kuswa kucakubonenaako cakwe Saala? (1 Pita 3:5, 6)

¹⁷ Saala wakalinga kutondesha Abulaamu bulemu kwiinda mukukonkela nshaakalinga kusalawo kucita. (Mata. 12:5) Paciindi cimwi, Abulaamu wakasalawo kutambula beensu mbwatakalinga kulangila. Wakalwiita Saala kucileka nshaakalinga kucita kwaamba ayi apange shinkwa. (Mata. 18:6) Cakufwaambana, Saala wakakonkela Abulaamu nshaakamulwita. Nobanakashi nomweebetwe, inga mwakonkela cakubonenaako cakwe Saala kwiinda mukukonkela beebanu nshobasalawo kucita. Na mwacita boobo, mulayumya cikwati canu. (Amubelenge 1 Pita 3:5, 6.) Ba Dmitry abo mbotwaambawo mupalagilafu 16, bakaamba bakaabo nshobacita shipa kwaamba ayi banoolinyumfwa ayi balabatondesha bulemu. Bakaamba ayi: “Ndalumba ba Angela pa kweelesha cankusu kukonkela nshonsalawo kucita nabi kwaamba ayi teshi lyoonse ndyesheendelana anshobatoyeeya. Na nshetwasalawo kucita tashina kuba kweelana ambotwalinga kulangila, tabaampi mulandu.” Ncuubu kusuna muntu ukutondesha bulemu!

18. Ino nshiinshi shiswaamo na beebene kabasebensa cankusu kwaamba ayi batolelele kusunana abuumbi?

¹⁸ Munshiku shino, Satana alisuni kwaamba ayi Beneklistu bali mucikwati bacileke kusunana. Alicishi kwaamba ayi na beebene bacileka kusunana, mpashi inga batalika kulitalamusha kuli Yehova. Nacibi boobo, lusuno lwancinencine talumaani! Aboobo munootondeshanya lusuno lwaambwa mu Lwiimbo Lwakwe Solomoni mucikwati canu. Amube bashinishite kubika Yehova panembo mucikwati canu, kucana ciindi cakuba pomwi alimwi akunootondeshanya bulemu. Na mwacita boobo, mulaakulemeka Yehova Kantupu kalusuno lwancinencine. Alimwi bweenka mbociba na mwatolelela kusonsela akubikaako nkuni ku mulilo, lusuno lwanu lulaakutolelela kunyaka.