1. Ino Yehova alisuni ayi basebenshi bakwe banoocita nshi? (Amubone acikope.)

 INO NGANI weenga watucafwa ndyetutoyandika butanjilishi alimwi akuyuminishikwa? Tulicishi cikumbulo kumwiipusho uyu. Inga twapaila kuli Yehova Lesa. Yehova alisuni ayi tunopaila kuli nguwe. Alisuni ayi tunopaila kuli nguwe ‘cakutacileka.’ (1 Tesa. 5:17) Inga twapaila kuli nguwe kuswa panshi lya moyo akumusenga kwaamba ayi atutanjilile mushintu shoonse nshetucita mubuumi bwesu. (Tus. 3:5, 6) Yehova alatupa shipo shiinji shibotu. Aboobo inga twapaila kuli nguwe mankanda aanji kweelana ambweenga katusuni.

2. Ino tutokwiiya nshi mumutwi uyu?

² Tulalumba Yehova abuumbi ceebo cakwaamba ayi alatusuminisha kupaila kuli nguwe. Nacibi boobo, ceebo cakwaamba ayi tulicite shakucita shiinji inga catuyumina kucana ciindi cakupaila. Alimwi mpashi inga twayandika kushiba nsheenga twaciita kwaamba ayi tunokwaamba mipailo ibotu. Tulalumba abuumbi kwaamba ayi mu Malembo muli makani aanji atuyuminisha alimwi atucafwa kushiba nsheenga twaciita. Mumutwi uyu, tutobandika nsheenga tweeya kuswa kucakubonenaako cakwe Yesu, kwaamba ayi tunooshinisha kucana ciindi cakupaila. Alimwi tutobandika ansheenga twaciita kwaamba ayi tunokwaamba mipailo ibotu kwiinda mukunokwiilikaamo shintu shili 5 shiyandika.

3. Ino nshiinshi Yesu nshaakalinga kucishi pa mipailo yesu?

³ Yesu wakalinga kucishi ayi mipailo yesu ilayandika abuumbi kuli Yehova. Kakucaalite myaaka iinji Yesu kaatana kusa pacishi capanshi, wakabona Baishi mbobakalinga kukumbula mipailo ya basankwa abanakashi bashomeka. Kucakubonenaako, Yesu wakalinga a Baishi ndyebakakumbula mupailo wakuswa panshi lya  moyo wakwe Aana, Defedi, Elija alimwi amipailo ya basebenshi bamwi baanji bashomeka. (1 Samwe. 1:10, 11, 20; 1 Baam. 19:4-6; Kulu. 32:5) Nceceeco Yesu ncaakalwiitila bashikwiiya bakwe kunopaila lyoonse alimwi cakutatoonsha!​—Mate. 7:7-11.

4. Ino nshiinshi nsheenga tweeya kuswa kumipailo yakwe Yesu?

⁴ Kwiinda mumipailo njaakalinga kupaila kuli Yehova, Yesu wakatondesha bashikwiiya bakwe cakubonenaako nceenga bakakonkela. Yesu ndyaakalinga kushimikila pacishi, liinji wakalinga kupaila kuli Baishi. Yesu wakalinga kweelete kunoocana ciindi cakupaila, mukwiinga wakalinga kuba ashakucita shiinji alimwi bantu baanji bakalinga kuya kuli nguwe. (Maako 6:31, 45, 46) Wakalinga kubuka macuunsa cuunsa akuya kumusena kwatakalinga bantu kwaamba ayi apaile. (Maako 1:35) Paciindi cimwi kaatana kusalawo cakucita ciyandika, wakapaila mashiku oonse. (Luka 6:12, 13) Alimwi mashiku Yesu kaatana kucaikwa, wakapaila mankanda aanji kaatana kukumanisha lubasu luyandika lwa ncito njaakesita pacishi capanshi.​—Mate. 26:39, 42, 44.

5. Ino cakubonenaako cakwe Yesu cilaatwiisha nshi pamakani akupaila?

⁵ Cakubonenaako cakwe Yesu cilatwiisha kwaamba ayi nabi tulicite shakucita shiinji buyani, tulyeelete kunoocana ciindi cakupaila. Bweenka mbuli Yesu, tulayandika kunoocana ciindi cakupaila. Mpashi inga katubuka macuunsa cuunsa nabi kucelwaako kuya mukoona kwaamba ayi tupaile. Na twacita boobo, tulatondesha ayi tulalumba Yehova pacipo ici cilibetele ncaakatupa. Nankashi waliina lya Lynne aleebaluka mbwaakalinyumfwa ciindi cakutaanguna ndyaakeeya pacoolwe cakupaila kuli Yehova. Wakaamba ayi: “Ndyendakeeya ayi inga ndabandika a Yehova paciindi cili coonse, cakancafwa kumubona ayi ngu shicibusa unsuni alimwi ndakalinga kusuni kushiba nsheenga ndaciita kwaamba ayi nokwaamba mipailo ibotu.” Ncakutatoonsha kwaamba ayi sobaanji mbotulinyumfwa. Aboobo amuleke tubandike shintu shili 5 shiyandika nsheenga tweelikaamo mumipailo yesu.

6. Kweelana a Ciyubululo 4:10, 11, ino Yehova aleelela kutambula nshi?

⁶ Amulumbaishe Yehova. Mucili anga nciloto cikankamika mutumwi Joni ncaakabona, wakabona bamaloba bali 24 kabalambila Yehova kwiculu. Bakalinga kulumbaisha Lesa akwaamba ayi aleelela kutambula ‘bulemu ankusu.’ (Amubelenge Ciyubululo 4:10, 11.) Banjelo  bashomeka abalo balicite sheebo shiinji shakulumbaisha akulemeka Yehova. Balekala kwiculu pomwi anguwe alimwi balimwishi kabotu. Balabona mibo njaacite kwiinda mushintu nshaacita. Na babona shintu Yehova nshaacita, balamulumbaisha.​—Jobo 38:4-7.

7. Ino nshiinshi sheelete kutupa kulumbaisha Yehova?

⁷ Aswebo tulisuni kunoolumbaisha Yehova mumipailo yesu. Inga twacita boobo kwiinda mukumulwiita shintu nshetusuni pali nguwe alimwi acitupa kumulemeka. Ndyemutobelenga akwiiya Baibo, amweeleshe kubona mibo Yehova njaacite iyo njemusuni abuumbi. (Jobo 37:23; Loma. 11:33) Lyalo amumulwiite Yehova mbomulinyumfwa pamibo iyo. Alimwi inga twalumbaisha Yehova ceebo cakwaamba ayi alatucafwa akucafwa bamakwesu abenankashi nsengwe yoonse. Lyoonse alatubikilako maano akutushitilisha.​—1 Samwe. 1:27; 2:1, 2.

8. Ino nshiinshi sheelete kutupa kulumba Yehova? (1 Bene Tesalonika 5:18)

⁸ Amulumbe Yehova. Kuli sheebo shiinji sheelete kutupa kulumba Yehova mumipailo. (Amubelenge 1 Bene Tesalonika 5:18.) Inga twamulumba pashintu shoonse shibotu nshetucite mukwiinga shipo shoonse shibotu shilaswa kuli nguwe. (Jemu. 1:17) Kucakubonenaako, inga twalumba Yehova pacishi cibotu ncaakatupa apa shintu shibotu nshaakalenga. Alimwi inga twamulumba pacipo ca buumi ncetucite, mukwashi ngotucite, beshicibusa mbotucite akulangila nkotucite. Alimwi inga twalumba Yehova pakutupa coolwe cakuba abushicibusa bubotu anguwe.

9. Ino nceebonshi tulayandika kwiiya kulumba Yehova pashintu shoonse nshaatucitila?

⁹ Mpashi inga twayandika kuyeeyawo cakubikila maano pa sheebo sheelete kutupa kulumba Yehova. Tulekala mucishi muli bantu baanji bataluumbi. Liinji bantu balabikilabo maano kushintu nshebasuni, muciindi cakubikila maano ku nsheenga bacita kwaamba ayi batondeshe kulumba pashintu nshebacite. Aswebo na twatalika kucita boobo, liinji mipailo yesu inga kaibabo yakusenga shintu kuli Yehova. Kwaamba ayi tuleye kucita boobo, tulayandika kutolelela kwiiya kuba bantu balumba akulumba Yehova pashintu shoonse nshaatucitila.​—Luka 6:45.

10. Ino kulumba kwakamucafwa buyani nankashi umwi kuliyumya? (Amubone acikope.)

¹⁰ Kulumba inga kwatucafwa kuliyumya mumapensho. Amuyeeye pacakubonenaako cakwe nankashi waliina lya Kyung-sook, cakalinga mu Njashi Yamulindilishi ya January 15, 2015. Bakamucana abulwashi bwa kansa yaku mapwapwa, ubo bwakalinga kuya cikomenenaako. Wakaamba ayi: “Bulwashi ubu bwakampa kulefuka abuumbi. Ndakalinyumfwa anga ndasowekelwa shintu shoonse. Alimwi ndakalinga kuloondete abuumbi.” Ino nciinshi cakamucafwa kuliyumya? Wakaamba ayi lyoonse mashiku kaatana kuya mukoona, wakalinga kuya paciluli ca ŋanda yakwe akupaila cakupoosha kulumba Yehova pashintu 5 nshaamucitila bushiku ubo. Ici cakamuyuminisha akumupa kutondesha lusuno ndwaacite pali Yehova. Wakabona Yehova mbwaacafwa basebenshi bakwe bashomeka ndyebatokwiinda mumapensho ayumu, alimwi wakesa mukushiba ayi shoolwe nshetucite  nshiinji kwiinda mapensho ngotwiindaamo. Bweenka mbuli ba Kyung-sook, aswebo tulicite sheebo shiinji sheelete kutupa kulumba Yehova nabi kwaamba ayi tutokwiinda mulipenshi. Kulumba Yehova mumupailo inga kwatucafwa kuliyumya akutolelela kuba alusangalalo.

11. Ino nceebonshi bashikwiiya bakwe Yesu bakalinga kuyandika kutaloonda pesule lyakwaamba ayi Yesu waboolela kwiculu?

¹¹ Amusenge Yehova kwaamba ayi amucaafwe kuba bataloondi ndyemutooshimikila. Ndyekwakacaalabo paniini ayi Yesu aboolele kwiculu, wakebalusha bashikwiiya bakwe ncito njaakabapa yakupa bukamboni pali nguwe “mu Jelusalemu, mu Judeya moonse alimwi amu Samaliya kushikila amucishi coonse capanshi.” (Milimo 1:8; Luka 24:46-48) Ndipakeendabo ciindi ciniini, bamatanjilili ba baJuda bakacata mutumwi Pita amutumwi Joni akubatola mukooti ya Sanihedilini. Alimwi bakalwiita basankwa aba bashomeka ayi bacileeke kushimikila alimwi bakabakoonga. (Milimo 4:18, 21) Ino nshiinshi Pita a Joni nshebakacita?

12. Kweelana a Milimo 4:29, 31, ino nshiinshi bashikwiiya bakwe Yesu nshebakacita?

¹² Pita a Joni bakakumbula bamatanjilili babupailishi ba baJuda ayi: “Na ciluleme pameenso akwe Lesa kunyumfwila ndimwe muciindi cakunyumfwila Lesa, mwebo nobeene amulisalile. Mukwiinga swebo inga tatucilekiiwo kwaamba shintu nshetwakalinga kubona akunyumfwa sobeene.” (Milimo 4:19, 20) Pita a Joni ndyebakaangululwa, bakapaila kuli Yehova kwaamba ayi abacaafwe kutolelela kucita kuyanda kwakwe. Bakapaila ayi: “Amutupe nkusu swebo sobasebenshi banu ayi tushimikile maswi anu cakubula boowa.” Yehova wakakumbula mupailo wabo wakuswa panshi lya moyo.​—Amubelenge Milimo 4:29, 31.

13. Ino nshiinshi nsheenga tweeya kuswa kucakubonenaako caba Jin-hyuk?

¹³ Aswebo inga twakonkela cakubonenaako ca batumwi kwiinda mukutolelela kushimikila nabi kwaamba ayi mfulumeende yatukasha. Amuyeeye pacakubonenaako ca mukwesu waliina lya Jin-hyuk, uyo wakaangwa ceebo cakukaka kunjila busoja. Ndyaakalinga mujeele, bakamupa ncito yakulama bakaili bamwi bakalinga kwikala beenka mu seelo. Sombi bakamulwiita ayi taakalinga kweelete kubandika ambabo makani ali oonse atakumite kuncito njobakamupa, kwiilikaawo amakani amu Baibo. Wakapaila kuli Yehova kumusenga kwaamba ayi amucaafwe kuba utaloondi akunooshimikilako bamwi paciindi cili coonse na waba acoolwe cakucita boobo. (Milimo 5:29) Wakaamba ayi: “Yehova wakakumbula mipailo yangu kwiinda mukuncafwa kuba utaloondi akumpa busongo bwakutalika alimwi akunootanjilila shiiyo sha Baibo shiinji kwa mamineti 5 pamulyaango womwi awomwi wabaabo bakalinga kwikala beenka mu seelo. Lyalo mashiku, ndakalinga kulemba makalata ayo ngondakalinga kutolelela bakaili bushiku bwakalinga kukonkelaawo.” Aswebo inga twashoma cakutatoonsha kwaamba ayi Yehova alaakutucafwa kukumanisha ncito yesu yakushimikila. Bweenka mbuli ba Jin-hyuk, aswebo inga twapaila kwaamba ayi atucaafwe kuba bataloondi akutupa busongo.

14. Ino nciinshi ceenga catucafwa ndyetutokwiinda mumapensho? (Kulumbaisha 37:3, 5)

¹⁴ Amusenge Yehova kwaamba ayi amucaafwe kuliyumya ndyemutokwiinda mumapensho. Sobaanji tutokwiinda mumapensho mbuli kuciswa, kulisukama, kufwitwa shikamukowa na shicibusa, mapensho mumukwashi, kupenshekwa na mapensho amwi. Alimwi mapensho mbuli malwashi anene ankoondo apa kwaamba ayi cibe ciyumu kuliyumya mumapensho aya ngotutokwiindaamo. Aboobo amumulwiite Yehova mapensho anu oonse. Amumulwiite bukaalo mbomutokwiindaamo bweenka mbweenga mwalwiita shicibusa ngomusuni. Amushome kwaamba ayi Yehova alaakumucafwa.​—Amubelenge Kulumbaisha 37:3, 5.

15. Ino kupaila inga kwatucafwa buyani ‘kuliyumya ndyetutokwiinda mumapensho’? Amwaambe cakubonenaako.

 ¹⁵ Kutolelela kupaila kulaakutucafwa ‘kuliyumya ndyetutokwiinda mumapensho.’ (Loma. 12:12, NWT) Yehova alishi mapensho basebenshi bakwe ngobatokwiindaamo alimwi “ulanyumfwa kulila kwabo.” (Kulu. 145:18, 19) Ba Kristie abo bacite myaaka 29 alimwi basebensa mbuli painiya, bakesa mukushiba ayi maswi aya ngancine. Cakutengashila bakatalika kuciswa malwashi anene apusenepusene. Aboobo bakatalika kulisukama abuumbi. Mukuya kwaciindi bakesa mukunyumfwa ayi banyinawabo bakabacana abulwashi bucaya. Ba Kristie bakaamba ayi: “Ndakalinga kupaila abuumbi kuli Yehova kwaamba ayi ampe nkusu shakucikonsha kuliyumya bushiku abushiku. Ndakeelesha kubikila maano kushintu shakumushimu kwiinda mukunocanika kumabungano akucita ciiyo capalwaangu.” Bakatolelela akwaamba ayi: “Kupaila kwakancafwa kuliyumya paciindi ici ciyumu. Ndakalinga kucishi ayi Yehova lyoonse ali andime alimwi kushiba makani aya kwakanjuminisha abuumbi. Nabi kwaamba ayi pakeenda ciindi kwaamba ayi ntalike kulinyumfwako kabotu, Yehova wakalinga kukumbula mipailo yangu kwiinda mukumpa luumuno akukalikana mumoyo.” Atutolelele kunookwiibaluka ayi ‘Yehova ulicishi bwakupulusha bantu baluleme kumeelesho.’​—2 Pit. 2:9.

16. Ino nceebonshi tulayandika lucafwo lwakwe Yehova kwaamba ayi tucikonshe kukaka meelesho?

¹⁶ Amusenge Yehova kwaamba ayi amucaafwe kukaka meelesho. Mukwiinga tuli bantu batamaninite, lyoonse tulayandika kusebensa cankusu kwaamba ayi tukake meelesho. Satana atoocita shoonse nsheenga wacikonsha kwaamba ayi citubete ciyumu kukaka meelesho. Nshila yomwi mbwaeelesha kutupa kuba amiyeeyo itabete kabotu, nkwiinda mu shakulikondelesha shitabete kabotu. Shakulikondelesha isho shitabete kabotu inga shatupa kuba amiyeeyo itabete kabotu iyo yeenga yatupa kuba batasalalite kuli Yehova akutupa kucita cilubo cinene.​—Maako 7:21-23; Jemu. 1:14, 15.

17. Pesule lya kusenga lucafwo kuli Yehova, ino nshiinshi nshotweelete kucita kwaamba ayi tuleye meelesho? (Amubone acikope.)

 ¹⁷ Tulayandika lucafwo lwakwe Yehova kwaamba ayi tucikonshe kukaka meelesho. Mumupailo wa cakubonenaako Yesu ngwakaamba, wakeelikaamo amaswi akwaamba ayi: ‘Mutatwinjishi mumeelesho, sombi amutufuune kuswa ku mubiibi.’ (Mate. 6:13) Yehova alisuni kutucafwa. Sombi tulyeelete kumusenga kwaamba ayi atucaafwe. Alimwi na twapaila kuli Yehova kwaamba ayi atucaafwe, tulyeelete kucita nsheenga twacikonsha kwaamba ayi tuleye shintu sheenga shatunjisha mumeelesho. Tulyeelete kweelesha kucita nsheenga twacikonsha kuleya kubelenga akukutika kumakani atabete kabotu ayo ayuminishikwa mucishi cino citookweendeleshekwa a Satana. (Kulu. 97:10) Kubelenga akwiiya Baibo inga kwatucafwa kunooyeeya pashintu shili kabotu. Kwiilikaawo, inga twashitilisha miyeeyo yesu kwiinda mukunocanika kumabungano akwaabanamo lubasu muncito yakushimikila. Na twacita boobo, Yehova alatushomesha ayi, teshi akatulekele mumeelesho ngeenga tatucikoonshi kukoma.​—1 Koli. 10:12, 13.

18. Ino nshiinshi nshotweeya pamakani akupaila?

¹⁸ Soonse tulayandika kupaila abuumbi kuli Yehova kwaamba ayi tutolelele kushomeka kuli nguwe ndyetutokwiinda mumapensho munshiku shino shakweelaako. Bushiku abushiku munoocana ciindi cakupaila kuli Yehova kuswa panshi lya moyo. Yehova alisuni kwaamba ayi ‘tumulwiite mapensho esu oonse’ mumupailo. (Kulu. 62:8) Munoolumbaisha Yehova akumulumba pashintu shoonse nshaamucitila. Amumusenge kwaamba ayi amucaafwe kuba bataloondi ndyemutooshimikila. Alimwi amumusenge kwaamba ayi amucaafwe kuliyumya ndyemutokwiinda mumapensho ali oonse akukaka meelesho ali oonse. Mutasuminishi cintu cili coonse na muntu ali woonse kumupa kwaalilwa kunoopaila kuli Yehova lyoonse. Ano ino Yehova alakumbula buyani mipailo yesu? Tulaakucana cikumbulo kumwiipusho uyu uyandika mumutwi utokonkelaawo.