1-2. Ino baanji balalinyumfwa buyani pamakani amipailo yabo?

 SA MWAKALINYUMFWAWO kale ayi Yehova taakumbuli mipailo yanu? Na mboboobo, tamubete nweenka. Bamakwesu abenankashi baanji bakalinyumfwawo kale boobo, bunene bunene paciindi ndyebakalinga kwiinda mumapensho ayumu. Aswebo na tutokwiinda mumapensho, mpashi inga catuyumina kushiba Yehova mbwatokumbula mipailo yesu.

² Amuleke tubandike sheenga shatupa kushoma kwaamba ayi Yehova alakumbula mipailo ya basebenshi bakwe. (1 Joni 5:15) Alimwi tutocana shikumbulo kumiipusho iyi itokonkelaawo: Ino nceebonshi cimwi ciindi inga caboneka anga Yehova taatokumbula mipailo yesu? Ino Yehova alakumbula buyani mipailo yesu munshiku shino?

3. Ino nceebonshi Yehova alisuni kwaamba ayi tunoopaila kuli nguwe?

³ Malembo alatulwiita ayi Yehova alitusuni abuumbi alimwi alatubona ayi tulayandika abuumbi kuli nguwe. (Aga. 2:7; 1 Joni 4:10) Ncoceeco ncatulwiitila ayi inga twapaila kuli nguwe kumusenga lucafwo. (1 Pit. 5:6, 7) Alisuni kutucafwa kutolelela kuba abushicibusa buyumu anguwe alimwi akutucafwa kuliyumya mumapensho ngotutokwiindaamo.

4. Ino tulishi buyani ayi Yehova alakumbula mipailo ya basebenshi bakwe? (Amubone acikope.)

⁴ Liinji mu Baibo tulabelenga makani atondesha Yehova mbwaakakumbula mipailo ya basebenshi bakwe bakale kale. Sa kuli cakubonenaako camu Baibo ncomwayeeya? Sa mwayeeya pacakubonenaako ca Mwaami Defedi? Mubuumi bwakwe boonse, wakeenda mumapensho aanji ayumu. Alimwi liinji wakalinga kusenga lucafwo kuli Yehova mumupailo. Paciindi cimwi wakasenga Yehova ayi: ‘No Yehova, amunyumfwe mupailo wangu, amunyumfwe  mboontoomulilila akunyumfwila nkumbu. Amumfuune kwiinda mukushomeka kwanu abululami bwanu.’ (Kulu. 143:1) Yehova wakakumbula mipailo yakwe Defedi yakusenga kwaamba ayi amupulushe ku balwani bakwe. (1 Samwe. 19:10, 18-20; 2 Samwe. 5:17-25) Ncoceeco Defedi ncaakaambila cakutatoonsha ayi: ‘Yehova uli pafwaafwi kubaabo bamwiita.’ Aswebo inga twashoma cakutatoonsha kwaamba ayi maswi aya ngancine.​—Kulu. 145:18.

5. Sa Yehova lyoonse wakalinga kukumbula mipailo ya basebenshi bakwe kweelana ambobakalinga kulangila? Amwaambe cakubonenaako. (Amubone acikope.)

⁵ Yehova inga taakumbuli mipailo yesu kweelana ambotutolangila. Ubu mbocakalinga aku mutumwi Paulo. Wakasenga Lesa kwaamba ayi amukushe “muumfwa mumubili.” Mankanda otatwe, Paulo wakasenga Lesa ayi amane lipenshi ili liyumu. Sa Yehova wakakumbula mipailo yakwe? Ee, sombi kuteshi kweelana a Paulo mbwaakalinga kulangila. Muciindi cakumana lipenshi ili, Yehova wakamupa nkusu nshaakalinga kuyandika kwaamba ayi atolelele kumusebensela cakushomeka.​—2 Koli. 12:7-10.

6. Ino nceebonshi cimwi ciindi inga caboneka anga Yehova taatokumbula mipailo yesu?

⁶ Aswebo cimwi ciindi Yehova inga wakumbula mipailo yesu munshila njetwatalinga kulangila. Inga twashooma ayi Yehova alicishi kabotu mbweenga watucafwa. Alimwi inga wacita “shiinji shiinda pasheesho nsheenga twasenga na kuyeeya.” (Efe. 3:20, NWT) Aboobo inga wakumbula mipailo yesu paciindi na munshila njetutatolangila.

7. Ino nceebonshi cimwi ciindi inga twayandika kwaalula nshetupaililaawo? Amwaambe cakubonenaako.

⁷ Mpashi inga twayandika kwaalula nshetupaililaawo na twashiba kabotu Yehova nshaasuni ayi tucite. Amuyeeye pacakubonenaako ca Mukwesu Martin Poetzinger. Ndipakeendabo ciindi ciniini kuswa ndyaakeeba, Mukwesu Poetzinger wakaangwa akutolwa kumusumba wakupenshesha wa ba Nazi. Pakutaanguna, wakasenga Yehova kumukusha mumusumba wakupenshesha kwaamba ayi akalame mukaakwe akutolelela kushimikila. Nacibi boobo, pesule lya nsondo shobilo cakalinga kuboneka anga Yehova teshi ape kwaamba ayi aangululwe. Aboobo wakatalika kupaila ayi: “Yehova, ndasenga amuncaafwe kushiba nshomusuni kwaamba ayi ncite.” Lyalo wakatalika kuyeeya pashintu bamakwesu bamwi nshobakalinga kwiindaamo, mumusumba wakupenshesha. Baanji bakalinga kulisukama abuumbi pa bamakaabo abana babo. Lyalo Mukwesu Poetzinger wakapaila ayi: “Yehova, ndalumba pakumpa ncito iyi ipya. Amuncaafwe kuyuminisha bamakwesu.” Wakekala mumisumba ya  kupenshesha kwamyaaka 9 kaayuminisha bamakwesu bamwi kweelana ambwakapaila!

8. Ino ncintu nshi ciyandika ncotweelete kunokwiibaluka ndyetutopaila?

⁸ Tulyeelete kwiibaluka kwaamba ayi Yehova alicite luyaando ndwaasuni kukumanisha, paciindi mwiine ncaakasala. Luyaando ulu luleelikaawo kukushawo mapensho oonse ngotwiindaamo pacecino ciindi—mbuli mapensho acitika cakuteengashila, kuciswa alufu. Yehova alaakukumanisha luyaando lwakwe kwiinda mu Bwaami bwakwe. (Danye. 2:44; Ciyu. 21:3, 4) Nacibi boobo, kushikila ciindi ico cikashiike, Yehova wasuminisha Satana kutolelela kweendelesha cishi. b (Joni 12:31; Ciyu. 12:9) Na pacecino ciindi Yehova wakushawo mapensho oonse ngotutokwiindaamo, inga caboneka anga Satana atokweendelesha kabotu cishi. Ano ndyetutolindila kukumanishikwa kwa shishomesho shakwe Yehova, tacaambi ayi pacecino ciindi teshi anootucafwaawo. Aboobo amuleke tubandike pashintu shimwi Yehova nshaacita kwaamba ayi atucaafwe.

9. Ino Yehova inga watucafwa buyani ndyetutosalawo shakucita? Amwaambe cakubonenaako.

⁹ Alatupa busongo. Yehova alashomesha kutupa busongo mbotuyandika kwaamba ayi tunoosala kabotu shakucita. Tulayandika busongo kuswa kuli Yehova bunene bunene ndyetutosalawo shakucita sheenga shatukuma kwabuumi bwesu boonse, mbuli kusalawo kuba mucikwati na kutaba mucikwati. (Jemu. 1:5) Amuyeeye pacakubonenaako cakwe Nankashi uteebetwe waliina lya Maria. c Wakalinga kusangalala kusebensa bupainiya bwaciindi coonse ndyaakatalika kushibana amukwesu umwi. Wakaamba ayi: “Bushicibusa bwesu ndyebwakalinga kuya ciyuminaako, twakatalika kusunana abuumbi. Ndakalinga kucishi ayi ndakalinga kweelete kusalawo cakucita. Aboobo ndakapaililaawo abuumbi pamakani aya. Ndakalinga kuyandika butanjilishi bwakwe Yehova. Sombi ndakalinga kucishi ayi Yehova inga taansaliliiwo shakucita.” Alalinyumfwa ayi Yehova wakakumbula mipailo yakwe yakusenga busongo. Munshila nshi? Ndyaakalinga kulangoola makani mumabuku esu, wakacana makani akamucafwa kucana shikumbulo kumiipusho njaakalinga kucite. Alimwi wakakonkela kululika kubotu banyina nkobakamulwiita. Maswi banyina ngobakamulwiita akamucafwa kuyeeyawo cakubikila maano pamakani aya. Lyalo mukweelaako, wakasalaawo kabotu shakucita.

10. Kweelana a 2 Bene Kolinto 4:7, ino nshiinshi Yehova nsheshi akacite kwaamba ayi acafwe basebenshi bakwe? Amwaambe cakubonenaako. (Amubone acikope.)

¹⁰ Alatupa nkusu shakuliyumya. Bweenka Yehova mbwaakacafwa mutumwi Paulo, alaakutupa nkusu nshetuyandika kwaamba ayi tucikoonshe kuliyumya ndyetutokwiinda mumapensho. (Amubelenge 2 Bene Kolinto 4:7.) Amuyeeye Yehova mbwaakacafwa mukwesu waliina lya Benjamin kuliyumya ndyaakalinga kwiinda mumapensho  ayumu. Paciindi ndyaakalinga cikula bwangu, liinji lakwe abamumukwashi wakwe bakalinga kukala mumisumba yamu Africa ya baabo bakacica kumishaabo. Ba Benjamin bakaamba ayi: “Lyoonse ndakalinga kupaila kuli Yehova kumusenga kwaamba ayi ampe nkusu shakucita shimusangalasha. Yehova wakakumbula mipailo yangu kwiinda mukumpa kuba aluumuno lwa mumiyeeyo, kutolelela kushimikila cakutaloonda, akumpa mabuku ayo akancafwa kutolelela kuba abushicibusa buyumu anguwe.” Bakatolelela akwaamba ayi: “Kubelenga shakacitika mubuumi bwa Bakamboni bamwi akwiiya Yehova mbwakabacafwa kuliyumya, kwakancafwa kuba ushinishite kutolelela kushomeka kuli nguwe.”

11-12. Ino Yehova inga wakumbula buyani mipailo yesu kwiinda mukusebensesha bamakwesu abenankashi? (Amubone acikope.)

¹¹ Alatucafwa kwiinda mu bamakwesu abenankashi. Mashiku Yesu kaatana kwaaba buumi bwakwe, wakapaila abuumbi kuswa paanshi lya moyo. Wakasenga Yehova kwaamba ayi atafwi mbuli muntu shikucobola Lesa. Muciindi cakucita kweelana a Yesu mbwakasenga, Yehova wakatuma munjelo kwaamba ayi amuyuminishe. (Luka 22:42, 43) Aswebo Yehova inga watucafwa kwiinda mukupa kwaamba ayi mukwesu nabi nankashi atutumine fooni, na kutufwakashila kwaamba ayi atuyuminishe. Soonsebo inga twalangoola nshila sha mbweenga twaamba ‘maswi abotu’ kubashominyineesu.​—Tus. 12:25.

¹² Amuyeeye pacakubonenaako cakwe nankashi wa liina lya Miriam. Ndipakeendabo nsondo shiniini pesule lyakwaamba ayi beebaye bafwa, Nankashi Miriam wakalinga paŋanda eenka. Wakalisukama akulinyumfwa kusoweka. Wakalinga kunoolilabo alimwi wakalinga kuyandika wakubandikaakwe. Wakaamba ayi: “Nshindakalinga kuciteewo nkusu shakutumina uli woonse fooni. Aboobo ndakapaila kuli Yehova. Ndyendakalinga kunoocilila akupaila, munene umwi ngotwakalinga kunyumfwanaakwe wakantumina fooni.” Munene uyo amukaakwe, bakayuminisha ba Miriam. Bakashoma cakutatoonsha kwaamba ayi Yehova ngowakapa kwaamba ayi mukwesu uyu atume fooni.

13. Amwaambe cakubonenaako citotondesha Yehova mbwaakumbula mipailo yesu kwiinda mukusebensesha baabo batamulambili kwaamba ayi batucaafwe.

¹³ Inga wasebensesha bantu batamulambili. (Tus. 21:1) Pashiindi shimwi, Yehova alakumbula mipailo ya bantu bakwe kwiinda mukupa  kwaamba ayi bantu batamulambili babacaafwe. Kucakubonenaako, wakapa kwaamba ayi Mwaami Sakisesi asuminishe Neyemiya kuboolela ku Jelusalemu kwaamba ayi aye mukucafwilisha muncito yakuyaka cipya ndabala ya Jelusalemu. (Neye. 2:3-6) Amunshiku shino, Yehova inga wasebensesha baabo batamulambili kwaamba ayi batucaafwe ndyetutoyandika lucafwo.

14. Ino nshiinshi nshomweeya kuswa kucakubonenaako caba Soo Hing? (Amubone acikope.)

¹⁴ Nankashi Soo Hing wakalinyumfwa ayi Yehova wakamucafwa kwiinda mukusebensesha dokota. Mwanaakwe musankwa alaciswa malwashi apusenepusene akubongo. Mwanaakwe ndyaakaloka akulicisa abuumbi, lakwe a ibaye bakacileka kusebensa kwaamba ayi balame mwanaabo. Aboobo bakatalika kuba alipensho lyakubula maali. Nankashi Soo Hing wakaamba ayi wakalinyumfwa anga inga taacikoonshi kutolelela kuliyumya mulipenshi ili. Wakapaila kuli Yehova kuswa paanshi lyamoyo kumusenga kwaamba ayi amucaafwe. Dokota wakasalaawo kucafwa nankashi uyu amukwashi wakwe. Ici cakapa kwaamba ayi batambule lucafwo kuswa kumfulumeende akupekwa musena ubotu mwakukala. Pesule lyakutambula lucafwo ulo, ba Soo Hing bakaamba ayi: “Twakabona Yehova mbwakatucafwa. Ncakwiila ‘Ulakutika mipailo.’”​—Kulu. 65:2.

15. Ino nciinshi cakacafwa nankashi umwi kushiba kwaamba ayi mipailo yakwe yakakumbulwa?

¹⁵ Teshi lyoonse Yehova ndyaakumbula mipailo yesu munshila ikankamika. Sombi Yehova alakumbula mipailo yesu kweelana anshetutoyandika kwaamba ayi tutolelele kushomeka kuli nguwe. Aboobo munoobikila maano kubona Yehova mbwaakumbula mipailo yanu. Nankashi waliina lya Yoko wakalinga kulinyumfwa ayi Yehova taakumbuli mipailo yakwe. Sombi wakasalaawo kutalika kulemba nshaakalinga kupaililaawo kuli Yehova. Ndipakeenda ciindi, wakatalika kwiinduluka mukabuku mwaakalemba shintu nshaakalinga kupaililaawo kuli Yehova, alimwi wakacana kwaamba ayi mipailo yakwe iinji yakakumbulwa kwiilikaawo ayeeyo mpashi njaakalubaako. Ciindi aciindi tulayandika kukutumana kuyeeya Yehova mbwaakumbula mipailo yesu.​—Kulu. 66:19, 20.

16. Ino inga twatondesha buyani ayi tulicite lushomo pamakani akupaila? (Bene Ebulu 11:6)

¹⁶ Tulatondesha ayi tulashoma muli Yehova kwiinda mukupaila kuli nguwe alimwi akusumina nshila ili yoonse njeenga wasebensesha kwaamba ayi akumbule mipailo yesu. (Amubelenge Bene Ebulu 11:6.) Amuyeeye pacakubonenaako  caba Mike aba Chrissy bakaabo. Bakalinga kusuni kusebensela pa Bethel. Ba Mike bakaamba ayi: “Twakalemba foomu yakuya mukusebensela pa Bethel mankanda aanji alimwi twakapaililaawo abuumbi pamakani aya. Nacibi boobo, tabana kutwiita.” Ba Mike aba Chrissy bakatolelela kushoma cakutatoonsha kwaamba ayi Yehova alicishi kabotu mbweenga wabasebensesha muncito yakwe. Bakatolelela kucita nsheenga bacikonsha mbuli kusebensa bupainiya bwaciindi coonse kumusena ubulishite, akucafwilisha muncito yakuyaka misena njetusebensesha mukulambila Lesa. Pacecino ciindi balasebensa ncito yakufwakashila mabungano. Ba Mike bakaamba ayi: “Teshi lyoonse Yehova ndyaakumbula mipailo yesu kweelana ambotwalinga kulangila. Sombi wakakumbula mipailo yesu, alimwi imwi wakaikumbula munshila ibotu kwiinda ambotwakalinga kulangila.”

17-18. Kweelana a Kulumbaisha 86:6, 7, ino nciinshi nceenga twashoma cakutatoonsha?

¹⁷ Amubelenge Kulumbaisha 86:6, 7. Shikulumbaisha Defedi wakalinga kushomete cakutatoonsha kwaamba ayi Yehova wakalinga kunyumfwa, akukumbula mipailo yakwe. Amwebo inga mwashoma ayi Yehova alanyumfwa akukumbula mipailo yanu. Shakubonenaako nshetwabandika mumutwi uyu shatupa kushoma kwaamba ayi Yehova inga watupa busongo, akutupa nkusu nshotuyandika kwaamba ayi tucikonshe kuliyumya. Alimwi nga wasebensesha bamakwesu abenankashi na abo batamulambili kwaamba ayi batucaafwe ndyetutokwiinda mumapensho.

¹⁸ Nabi kwaamba ayi teshi lyoonse Yehova ndyeenga wakumbula mipailo yesu kweelana ambotutolangila, tulicishi kwaamba ayi alaakwiikumbula. Alaakutupa nshotuyandika alimwi paciindi ceelete. Aboobo amutolelele kupaila akushoma kwaamba ayi Yehova alaakunomubikilako maano pacecino ciindi alimwi ayi mucishi cipya alaakumupa shoonse ‘nshomulila mumoyo.’​—Kulu. 37: 4.