1. Ino nshiinshi nshotwakeeya pa kubungana kwapa mwaaka kwamu 2023?

 PA KUBUNGANA kwapa mwaaka kwamu 2023, a twakanyumfwa kwaaluka kusangalasha kwa mbotunyumfwishisha shimwi nshotushoma alimwi ashakoolobesha shisangalasha shaamba pancito yesu yakushimikila. Kucakubonenaako, twakeeya ayi bantu bamwi inga baba acoolwe cakuba kulubasu lwakwe Yehova nabibo pesule lya kunyonyoolwa kwa Babiloni Munene. Alimwi twakeeya ayi kutalika mu November 2023, beshikushimikila sha Bwaami teshi banoyandika kulemba shoonse nshobakacita muncito yakushimikila. Sa kwaaluka uku kutoosansulula ayi tulyeelete kucileka kusebensa cankusu muncito yakushimikila? Sobwe napaceyi!

2. Ino nceebonshi incito yesu yakushimikila ileendaawo kuba iyandika abuumbi bushiku buli boonse bweenga bweenda? (Maako 13:10)

² Bushiku buli boonse bweenga bweenda, incito yesu yakushimikila ileendaawo kuba iyandika abuumbi. Ino nceebonshi? Mukwiinga ciindi cacaalaako caceya. Amuyeeye Yesu nshakaambila limwi pancito yakushimikila munshiku shakweelaako. (Amubelenge Maako 13:10.) Mumakani Mateyo ngaakalemba, Yesu wakaamba ayi makani abotu alaakushimikilwa mucishi coonse capanshi ‘mamanino’ kaatana kusa. (Mate. 24:14) Liswi ili lilasansulula kunyonyoolwa cakumaninina kwa cishi cibiibi cakwe Satana. Yehova wakabika kale “bushiku a ciindi” ndyeshi akalete mamanino acishi cino. (Mate. 24:36; 25:13; Milimo 1:7) Bushiku buli boonse tulasena pafwiifwi aciindi ico ncaakabika. (Loma. 13:11) Tulyeelete kutolelela kushimikila kushikila mamanino akese.

3. Ino nceebonshi tulashimikilako bamwi?

³ Mwiipusho uyandika soonse ngotweelete kuyeeyawo ngwakwaamba ayi: Ino nceebonshi tulashimikilako bamwi makani abotu?  Nceebo ca lusuno. Kushimikilako bamwi kulatondesha ayi tulyaasuni makani abotu, tulisuni bantu, alimwi ciinditeewo, tulatondesha ayi tulisuni Yehova aliina lyakwe. Amuleke tubandike pashiteente ishi comwi acomwi.

TULASHIMIKILAKO BAMWI CEEBO CA KUSUNA MAKANI ABOTU

4. Ino tulacita buyani na twanyumfwa makani asangalasha?

⁴ Amuyeeyebo mbomwakalinyumfwa cintu cimwi cisangalasha ndyecakacitika mubuumi bwanu. Mpashi umwi mumukwashi wanu wakaba amwaana na mpashi mwakenjila ncito njemwakalinga kusuni abuumbi. Ncakutatoonsha kwaamba ayi mwakasangalala abuumbi alimwi peenkaapo mwakalwiitako bamumukwashi wanu abeshicibusa banu pashintu isho shibotu. Sa ubu mbomwakalinyumfwa ndyemwakanyumfwa makani abotu asangalasha abuumbi—nkokwaamba ayi makani abotu aamba pa Bwaami bwakwe Lesa?

5. Ino mwakalinyumfwa buyani ciindi cakutaanguna ndyemwakeeya cancine camu Maswi akwe Lesa? (Amubone ashikope.)

⁵ Amuyeeyebo mbomwakalinyumfwa ciindi cakutaanguna ndyemwakeeya cancine camu Maswi akwe Lesa. Mwakeeya ayi Ishiwanu wakwiculu alimusuni, alisuni kwaamba ayi mube lubasu lwa mukwashi wakwe wabaabo bamulambila, wakashomesha kumana mapensho oonse, inga mwalangila kubona beshikamukowa abeshicibusa banu bakafwa ndyeshi bakabushikwe mucishi cipya—ashimwi shiinji. (Maako 10:​29, 30; Joni 5:​28, 29; Loma. 8:​38, 39; Ciyu. 21:​3, 4) Nshomwakeeya shakamusangalasha abuumbi. (Luka 24:32) Mwakasuna nshomwakeeya, alimwi mwakalinga kusuni kulwiitako bantu boonse pashintu isho!—Amweelanye a Jelemiya 20:9.

6. Ino nshiinshi nshomweeya kushakacitikila ba Ernest aba Rose?

⁶ Amuyeeye pasheeshi shakacitika. Mukwesu waliina lya Ernest b wakalinga kucite myaaka pafwiifwi a 10 baishi ndyebakafwa. Wakaamba ayi: “Ndakalinga kuliipusha ayi: ‘Sa bata bakaya kwiculu? Na sa camana bafwitabo limwi?’  Ndakalinga kubanyumfwila munyono baana bamwi bakalinga kucite baishiwabo.” Lyoonse ba Ernest bakalinga kuya kumaanda, bafukama pacuumbwe pakabikwa baishiwabo, akutalika kupaila ayi: “Ndasenga noba Lesa, ndisuni kushiba bata nkobabete.” Ndyepakeenda myaaka pafwiifwi a 17 kuswa ciindi baishiwabo ndyebakafwa, Kamboni umwi wakabasenga na inga batalika kwiiya Baibo, lyalo bakasumina. Bakasangalala abuumbi kwiiya ayi bafu taakuwo ncobeshi, balibo anga balilete alimwi ayi Baibo ilashomesha ayi kunembo balaakubushikwa. (Shiku. 9:​5, 10; Milimo 24:15) Mukweelaako, bakacana shikumbulo kumiipusho yakalinga kubapensha kwa myaaka iinji! Ba Ernest bakalinga kusangalete abuumbi pacancine camu Baibo ncobakalinga kwiiya. Ba Rose bakaabo abalo bakatalika kwiiya Baibo alimwi bakalinga kushisuni nshobakeeya. Mu 1978 boonse bobilo bakabombekwa. Bakalinga kusebensa cankusu kushimikilako bamumukwashi wabo, beshicibusa alimwi abamwi pacancine ciyandika ncobakeeya. Aboobo ba Ernest aba Rose bakaabo bacafwa bantu beendilila 70 kushiba Yehova akubombekwa.

7. Ino nshiinshi shicitika na twasuna nshotwakeeya mu Baibo? (Luka 6:45)

⁷ Na twasuna nshotwakeeya mu Baibo, tulalinyumfwa ayi tulyeelete kulwiitako muntu uli woonse shintu isho. (Amubelenge Luka 6:45.) Tulalinyumfwa mbobakalinyumfwa bashikwiiya bakwe Yesu bamuciindi ca batumwi abo bakaamba ayi: “Swebo inga tatucilekiiwo kwaamba shintu nshetwakalinga kubona akunyumfwa sobeene.” (Milimo 4:20) Tulicisuni abuumbi cancine cakwaamba ayi tulisuni kulwiitako bamwi kweelana ambweenga twacikonsha.

TULASHIMIKILA BANTU MUKWIINGA TULIBASUNI

8. Ino nshiinshi shituyuminisha kushimikilako bamwi makani abotu? (Amubone kabokosi kacite mutwi utokwaamba ayi “ Amusune Bantu—Amubacaafwe Kuba Bashikwiiya.”) (Amubone acikope.)

⁸ Bweenka mbuli Yehova a Mwanaakwe, aswebo bantu tulibasuni. (Tus. 8:31; Joni 3:16) Tulabanyumfwila nkuumbu abuumbi abo ‘bateshi Lesa’ alimwi bataciteewo ‘kulangila.’ (Efe. 2:12) Ceebo ca mapensho ngobatokwiindaamo, bali anga bali mucilindi cilaamfu abuumbi. Sombi tulicite lutaambo ndweenga twasebensesha kubakweelaamo: nga makani abotu aamba pa Bwaami bwakwe Lesa. Lusuno ankuumbu nshotucite pabantu aba shilatuyuminisha kucita nsheenga twacikonsha kwaamba ayi tubashimikile makani abotu. Makani aya ayandika abuumbi inga abacafwa kuba akulangila, kuba abuumi buli kabotu pacecino ciindi, akulangila kuba a “buumi bwancinencine”—nkokwaamba ayi buumi butamaani mucishi cipya cakwe Lesa.—1 Timo. 6:19.

9. Ino nshiinshi nshotubacenjesha bantu pasheshi shikacitike kunembo alimwi ino nceebonshi? (Esekelo 33:​7, 8)

⁹ Alimwi lusuno ndotucite pabantu lulatuyuminisha kubacenjesha ayi mamanino acishi cino  cibiibi ali pafwiifwi. (Amubelenge Esekelo 33:​7, 8.) Tulabanyumfwila nkuumbu bantu boonse kwiilikaawo abamumukwashi abo batasebenseli Yehova. Bantu baanji balabikilabo maano ku shintu nshobacita bushiku abushiku kwakubula kushiba ayi kunembo kulaakuba ‘mapensho anene atakwe kubonekawo kale kuswabo kumatalikilo acishi kushika sunu, alimwi teshi akabooleewo.’ (Mate. 24:21) Tulisuni kubacafwa kushiba sheshi shikacitike paciindi ici ca boomboloshi. Cakutaanguna, bupailishi boonse bwakubeca bulaakunyonyoolwa lyalo cishi coonse ndyeshi cikanyonyoolwe pa nkondo ya Amagedoni. (Ciyu. 16:​14, 16; 17:​16, 17; 19:​11, 19, 20) Tutolangila ayi bantu baanji balaakukutika nshotubacenjesha akusalawo kusebensela Yehova pomwi andiswe pacecino ciindi. Ano ino cilaakuba buyani kubaabo batakutiki nshotubacenjesha, kwiilikaawo abamumukwashi wesu mbotusuni bateshi Bakamboni?

10. Ino nceebonshi cilayandika kutolelela kucenjesha bantu pasheshi shikacitike conoono?

¹⁰ Kweelana ambotwakeeya mumutwi wamana, mpashi nkuyanda kwakwe Yehova kwaamba ayi akapulushe bantu bamwi beshi bakatalike kushoma muli nguwe, na bakabone kunyonyoolwa kwa Babiloni Munene. Na ubo mbweshi cikabe, nkokwaamba ayi cino nceciindi ndyetweelete kwiindaawo kusebensa cankusu kucenjesha bantu pasheshi shikacitike. Amuyeeye paceeci: Nshotubalwiita pacecino ciindi inga bashiibaluka kunembo. (Amweelanye a Esekelo 33:33.) Mpashi balaakwiibaluka kucenjesha nkobakanyumfwa kuli ndiswe akusalawo kusebensela Yehova pomwi andiswe ciindi kacitana kumana. Bweenka shikulindilila ntolongo ku Filipi mbwakaalula buumi bwakwe pesule lyakwaamba ayi kwacitika “citentaanshi cinene,” mpashi bamwi batakutiki kucenjesha nkotubalwiita balaakwaalula buumi bwabo pesule lyakwaamba ayi Babiloni Munene wanyonyoolwa cakumaninina.—Milimo 16:​25-34.

TULASHIMIKILA BANTU MUKWIINGA TULISUNI YEHOVA A LIINA LYAKWE

11. Ino tulacita buyani kwaamba ayi tupe Yehova bulemu, kulemekwa ankusu? (Ciyubululo 4:11) (Amubone ashikope.)

¹¹ Ceebo ciyandika abuumbi cipa kwaamba ayi tunooshimikila bamwi makani abotu ndusuno ndotucite pali Yehova apaliina lyakwe. Tulabona ayi incito yakushimikila ninshila mbotulumbaisha Lesa ngotusuni. (Amubelenge Ciyubululo 4:11.) Tulasumina kuswa paanshi lya moyo abaabo boonse bali kwiculu baamba ayi: ‘Uleelela Yehova, O Lesa wesu, kutambula bulemu akulemekwa alimwi ankusu.’ Tulalumbaisha Yehova akumupa bulemu kwiinda mukulwiitako bamwi bumboni butondesha ayi ‘ngowakalenga shintu shoonse’ alimwi ayi tuli boomi mukwiinga ngowakatupa buumi. Tulapa Yehova nkusu shesu na twasebensesha ciindi cesu,  nkusu, ashintu shoonse nshotucite kwaamba ayi tushimikileko bamwi kweelana ambweenga twacikonsha. (Mate. 6:33; Luka 13:24; Kolo. 3:23) Mukufwiimpya inga twaamba ayi tulanyumfwa kabotu kwaamba pali Lesa wesu ngotusuni. Alimwi tulayuminishikwa kulwiitako bamwi paliina lyakwe ancolyaamba. Ino nceebonshi?

12. Ino tulasalasha buyani liina lyakwe Yehova ndyetutoshimikila?

¹² Lusuno ndotucite pali Yehova lulatupa kusalasha liina lyakwe. (Mate. 6:9) Ici cilaamba ayi tulisuni kulwiitako bamwi ayi shintu shoonse shibiibi Satana nshaamba pali Yehova nshakubeca. (Mata. 3:​1-5; Jobo 2:4; Joni 8:44) Ndyetutoshimikila, tulasunishisha kulwiitako baabo boonse beenga basuna kukutika pali Yehova, mibo njaacite ambwaacita shintu. Tulisuni kwaamba ayi bantu boonse bashibe ayi mubo unene ngwaacite ndusuno, aleendelesha cabululami alimwi cakutanyengelela, alimwi ayi conoonobo Bwaami bwakwe bulaakumana mapensho oonse akupa kwaamba ayi bantu banookala muluumuno alimwi kabasangalete. (Kulu. 37:​10, 11, 29; 1 Joni 4:8) Na twalwiitako bamwi pashintu ishi ndyetutoshimikila, tulasalasha liina lyakwe Yehova. Alimwi tulasangalala ceebo cakushiba ayi tutoocita nshotweelete kucita mbuli Bakamboni Bakwe Yehova. Ino nceebonshi nceenga twaambila boobo?

13. Ino nceebonshi tulalinyumfwa kulemekwa kwiitwa ayi Bakamboni Bakwe Yehova? (Isaya 43:​10-12)

¹³ Yehova wakatusala kuba “bakamboni” bakwe. (Amubelenge Isaya 43:​10-12.) Myaaka iniini yainda, nkalata imwi kuswa ku Likoto Litanjilila yakaamba ayi: “Coolwe cinene abuumbi muntu uli woonse nceenga wabaaco nkwiitwa ayi ngomwi wa Bakamboni Bakwe Yehova.” Ino nceebonshi? Amuyeeye pacikoshanyo ici. Amuyeeye ayi bamubekesha ayi mwapanga mulandu. Ano mutoyandika muntu wakumwiimikaninaako kwaamba ayi alwiite bamwi ayi mulandu uyo bakamubekeshabo alimwi ayi muli muntu uli kabotu  weenga taaciti cintu camushobo uyo. Ino inga mwasala muntu uli buyani? Ncakutatoonsha kwaamba ayi inga mwasala muntu ngomushi kabotu, ngomushoma alimwi ucite mpuwo ibotu cakwaamba ayi bamwi inga bamushoma. Yehova ndyaakatusala kuba Bakamboni bakwe wakatondesha ayi alitwishi kabotu alimwi alatushoma ayi inga twalwiitako bamwi ayi ngo Lesa wancine eenkabo. Tulalinyumfwa kulemekwa abuumbi kuba Bakamboni bakwe cakwaamba ayi tulasebensesha coolwe cili coonse nceenga twabaaco kulwiitako bamwi liina lyakwe akutondesha ayi shintu shoonse shibiibi shaambwa pali nguwe nshakubeca. Na twacita boobo, tulacita kweelana aliina lyesu ncolisansulula lyakwaamba ayi Bakamboni Bakwe Yehova!—Kulu. 83:18; Loma. 10:​13-15.

TULAAKUTOLELELA KUSHIMIKILA KUSHIKILA KUMAMANINO

14. Ino nshintu nshi shisangalasha nsheenga twalangila kucitika conoono?

¹⁴ Kuli shintu shisangalasha nsheenga twalangila kucitika conoono! Kwiinda mulucafwo lwakwe Yehova, tutolangila ayi bantu baanji balaakusalawo kuba kulubasu lwesu mapensho anene kaatana kutalika. Alimwi tulisangalete kwaamba ayi nabi paciindi ca mapensho anene shintu ndyeshi shikayume abuumbi kwiinda ambocibete, bantu baanji inga baswa kulubasu lwakwe Satana akutalika kulumbaisha Yehova pomwi andiswe!—Milimo 13:48.

15-16. Ino nciinshi nceshi tukatolelele kucita, alimwi kushika lili?

¹⁵ Pacecino ciindi, tulicite ncito njotweelete kusebensa, iyo njeshi tukabule kusebensawo lyobilo. Tulicite coolwe cakushimikila makani abotu aamba pa Bwaami bwakwe Lesa nsengwe yoonse. Sombi tulyeelete kutolelela akucenjesha bantu pasheshi shikacitike conoono. Bantu batoyandika kushiba ayi mamanino acishi cino cibiibi atoosena cakufwambaana. Lyalo na ciindi ca boomboloshi cikashiike, balaakushiba ayi makani ngotwakalinga kubashimikila akaswa kuli Yehova.—Esek. 38:23.

¹⁶ Aboobo ino nciinshi ncotweelete kuba bashinishite kucita? Ceebo cakusuna makani abotu, kusuna bantu, alimwi ciinditeewo—ceebo calusuno ndotucite pali Yehova aliina lyakwe—tulaakutolelela kushimikilako bamwi amoyo wesu woonse, akusebensa cankusu alimwi cakushinisha, kushikila Yehova akaambe ayi, “Kwamana!”