1-2. (a) Ino nceebonshi abo bakeebana conoono balyeelete kushoma muli Yehova? (Kulumbaisha 37:3, 4) (b) Ino nshiinshi nsheshi twiiye mumutwi uyu?

SA MULISUNI kuba mucikwati conoono, nabi mpashi ndyemwakeebwabo na kweeba? Na mboboobo, nkokwaamba ayi mutoolangila kusangalala kukala pomwi amuntu ngomusuni abuumbi. Nacibi boobo, mushikwati mulaba amapensho. Alimwi abo bakeebana conoono inga bayandika kusala shakucita shiyandika abuumbi. Nshomucita na mweenda mumapensho ashakucita nshomusala, inga shamucafwa kushiba na mulaakutolelela kuba alusangalalo mucikwati canu. Na kamucinka manungo muli Yehova, mulaakunoosala shakucita shili kabotu, cikwati canu cilaakuyuminaako alimwi mulaakuba alusangalalo. Na mwabula kukonkela kululika kwakwe Yehova, inga mwaba amapensho mucikwati canu alimwi inga tamubiiwo alusangalalo.—Amubelenge Kulumbaisha 37:3, 4.

² Nabi kwaamba ayi mutwi uyu utokwaamba bunene pabaabo bakeebana conoono, utokwaamba pamapensho abo boonse bali mushikwati ngobeendaamo. Utootucafwa kubona nsheenga tweeya kushakubonenaako sha basankwa abanakashi bashomeka baambwa mu Baibo. Shakubonenaako ishi shamu Baibo shilatwiisha shintu shiinji nsheenga twakonkela mubuumi bwesu kwiilikaawo amucikwati. Tutobandika ansheenga tweeya kushakubonenaako sha beebene bamwi bamunshiku shino.

3-4. Ino ngamapensho nshi ngeenga beendaamo abo bakeebana conoono?

³ Bantu bamwi inga bayuminisha bakeebana conoono kukala buumi bweenka mbuli bantu baanji mbobakala. Kucakubonenaako,  bashali alimwi abeshikamukowa inga bakakatisha baabo bakeebana conoono kutalika kuba abaana pesule lyakweebanabo. Na mpashi beshicibusa alimwi abamumukwashi inga bayuminisha baabo bakeebana conoono kuula ŋanda alimwi akuulilamo shintu shiinji shibotu.

⁴ Na beebene babula kucenjela, inga basalawo kucita shintu sheenga shabapa kuba munkongole shiinji abuumbi. Lyalo musankwa amwanakashi inga bayandika kunosebensa ciindi cilaamfu kwaamba ayi bakabooshe nkongole isho. Inga bayandika kunosebensa abuumbi cakwaamba ayi inga kabatabiwo aciindi cakucita ciiyo capalwaabo, kulambila kwamukwashi alimwi akwabanaamo lubasu muncito yakushimikila. Ceebo cakusebensa ciindi cilaamfu kwaamba ayi bacane maali aanji na kwaamba ayi incito itamaani, beebene inga batalika kulofwa kumabungano. Na bacita boobo inga tabacikonshi kucita shintu shimwi shisangalasha muncito yakwe Yehova.

5. Ino nshiinshi nshomweeya kuswa kucakubonenaako caba Klaus aba Marisa?

⁵ Shakubonenaako shiinji shilatondesha ayi kubikila maano kukuba ashintu shiinji shakumubili inga takutupiwo lusangalalo. Amuyeeye nshobakeeya ba Klaus alimwi aba Marisa kuswa kushakabacitikila. * Ndyebakeebanabo, boonse bakalinga kusebensa kwaamba ayi babe amaali aanji alimwi ashintu shiinji. Nacibi boobo, tabakalinga kucitewo lusangalalo lwancinencine. Ba Klaus bakaamba ayi: “Twakalinga kucite shintu shiinji lwakumubili kwiinda anshetwakalinga kuyandika. Sombi taakuwo nshetwakalinga kusuni kucita lwakumushimu. Alimwi buumi bwakalinga buyumu abuumbi.” Mpashi amwebo mwaboona kwaamba ayi kubikila maano kushintu shakumubili, takumupiwo kuba alusangalalo. Na mboboobo mutalefuki. Kwiiya pashakubonenaako shibotu shabamwi inga kwamucafwa kwaalula shimwi mubuumi. Cakutaanguna, amuleke tubandike nsheenga basankwa beebete beeya kuswa kucakubonenaako ca Mwaami Jeoshafati.

6. Ino Jeoshafati wakakonkela buyani kululika nkotucana pa Tushimpi 3:5, 6, likoto linene lya bashilumamba ndyelyakesa mukulwana bantu bakwe?

⁶ Nobasankwa beebete, sa cimwi ciindi mulalisukama abuumbi ceebo ca mikuli njemucite? Na mboboobo, cakubonenaako ca Mwaami Jeoshafati inga camucafwa abuumbi. Mbuli mwaami, Jeoshafati wakalinga kucite mukuli wakushitilisha bantu bakwe! Ino nshiinshi nshaakacita kwaamba ayi akumanishe mukuli uyu unene abuumbi? Jeoshafati wakacita nsheenga wacikonsha kwaamba ayi ashitilishe bantu. Wakayaka malinga amandabala anene alimwi akuba abashilumamba beendilila 1,160,000. (2 Maka. 17:12-19) Mukuya kwaciindi, wakaba mulipenshi linene. Likoto linene lya bashilumamba bene Amoni, bene Moabu alimwi abaabo bakalinga kukala kumusena watulundu wa Siya, bakamukonga pomwi amukwashi abantu bakwe. (2 Maka. 20:1, 2) Ino Jeoshafati wakacita buyani? Wakasenga Yehova kwaamba ayi amucaafwe akumupa nkusu. Jeoshafati ncaakacita cakalinga kweendelana akululika  nkotucana pa Tushimpi 3:5, 6. (Amubelenge.) Mupailo Jeoshafati ngwaakapaila ngotucana pa 2 Makani 20:5-12, ulatondesha ayi wakalinga kushoma muli Yehova abuumbi. Ino Yehova wakaukumbula buyani mupailo wakwe Jeoshafati?

7. Ino Yehova wakaukumbula buyani mupailo wakwe Jeoshafati?

⁷ Yehova wakabandika a Jeoshafati kwiinda mu mwine Lefi waliina lya Jaasiyelo. Yehova wakaamba ayi: ‘Mwebo mukeemikanebo mumisena ya nkondo akulindila. Lyalo mulaakubona Yehova mbweshi akamukomeneeko nkondo iyo.’ (2 Maka. 20:13-17) Ano ubo teshi mbobakalinga kulwana nkondo! Sombi maswi aya taakwe kuswa kumuntu; akaswa kuli Yehova. Mukwiinga Jeoshafati wakalinga kushoma muli Lesa wakwe, wakacita nshaakamulwiita. Ndyaakaya mukukumanya balwani bakwe, wakabika beshikwiimba kunembo kuteshi bashilumamba bacishi kabotu kulwana nkondo. Yehova wakacita nshaakashomesha Jeoshafati; Wakakoma bashilumamba ba balwani babo.—2 Maka. 20:18-23.

8. Ino nshiinshi nsheenga basankwa beebete beeya kuswa kucakubonenaako cakwe Jeoshafati?

⁸ Nobasankwa beebete, kuli nsheenga mweeya kuswa kucakubonenaako cakwe Jeoshafati. Mulasebensa cankusu kwaamba ayi mushitilishe akucafwa mukwashi wanu. Na mweenda mumapensho inga mwayeeya ayi inga mwaamana nobeene palwaanu. Sombi amuleye kunoocinka manungo munkusu shanu. Ndyemubete nweenka, amupaile kuli Yehova kwaamba ayi amucaafwe. Kwiilikaawo, amupaile kuswa panshi lya moyo pomwi abakaanu. Amuyandoole butanjilishi bwakwe Yehova kwiinda mukwiiya Baibo, alimwi amabuku atubambila libunga lyakwe, lyalo akukonkela nshomweeya. Bamwi inga tabasuminishi nsheenga mwasalawo kucita sheendelana anjiisho shamu Baibo, alimwi inga bamulwiita ayi tamuyeeyi kabotu. Inga baamba ayi kuba amaali ashintu shakumubili nkweenga kwashitilisha mukwashi wanu. Sombi amwiibaluke cakubonenaako cakwe Jeoshafati. Wakatondesha ayi wakalinga kushoma muli Yehova kwiinda mushintu nshaakacita. Yehova taakwe kumulekeleshawo musankwa uyu ushomeka alimwi amwebo teshi akamulekeleshewo. (Kulu. 37:28; Ebu. 13:5) Ino nshiinshi shimwi nsheenga beebene bacita kwaamba ayi babe alusangalalo mubuumi bwabo?

9. Ino ngamakani nshi ngotushi pamushinshimi Isaya amukaakwe?

⁹ Mushinshimi Isaya amukaakwe bakabikila maano kukusebensela Yehova. Isaya wakalinga mushinshimi alimwi mpashi mukaakwe alakwe wakalinga kucite ncito shabushinshimi mukwiinga wakalinga kwiitwa ayi ‘mushinshimi mwanakashi.’ (Isa. 8:1-4) Isaya amukaakwe bakabikila maano kukusebensela Yehova. Bakatondesha cakubonenaako cibotu abuumbi kubeebene bamunshiku shino!

10. Ino kwiiya bushinshimi bwamu Baibo inga kwacafwa buyani beebene kuba bashinishite kucita shiinji muncito yakwe Yehova?

¹⁰ Beebene inga bakonkela cakubonenaako cakwe Isaya amukaakwe kwiinda mukucita nsheenga bacikonsha muncito yakwe Yehova. Inga bayumya lushomo lwabo muli Yehova kwiinda mukwiiya bushinshimi bwamu Baibo pomwi, akubona mbobukumanishikwa lyoonse. * (Taitasi 1:2) Inga bayeeya nsheenga bacita kwaamba ayi baabanemo lubasu mukukumanisha bushinshimi bumwi bwamu Baibo. Kucakubonenaako, inga baabanamo lubasu mukukumanisha bushinshimi Yesu mbwaakaamba ayi makani abotu alaakushimikilwa mucishi coonse mamanino kaatana kushika. (Mate. 24:14) Na  beebene bashoma cakutatonsha kwaamba ayi bushinshimi bwamu Baibo butokumanishikwa, balaakusuna kucita shiinji muncito yakwe Yehova.

11. Ino nshiinshi Pulisila a Akwila nshebakacikonsha kucita, alimwi ino nceebonshi?

¹¹ Abo bakeebana conoono, kuli nsheenga beeya kucakubonenaako cakwe Pulisila a Akwila, baJuda beebene bakalinga kukala mundabala ya Loma. Bakanyumfwa makani abotu aamba pali Yesu akuba Beneklistu. Ncakutatoonsha kwaamba ayi bakalinga kusangalete mubuumi bwabo. Nacibi boobo, buumi bwabo bwakaaluka cakuteengashila mweendeleshi Kulodyasi ndyaakaamba ayi baJuda boonse basweemo mu Loma. Amuyeeyebo ici mbocakalinga kusa mukukuma Akwila a Pulisila. Bakalinga kweelete kushiya musena ngobakashibila, kuya kumusena umwi alimwi akutolelela kusebensa ncito yakupanga matente. Sa bukaalo ubu buyumu mbobakeendaamo bwakapa kwaamba ayi bacileke kucita shiinji muncito yakwe Yehova? Mulyeelete mulishi cikumbulo kumwiipusho uyu. Pulisila a Akwila ndyebakashika ku Kolinto, bakatalika kucafwilisha libungano lyakalinga mundabala iyi, alimwi akutolelela kusebensela pomwi a Paulo kuyuminisha bashominyinaabo. Mukuya kwaciindi, bakalongela kumandabala kwakalinga kuyandika beshikushimikila. (Milimo 18:18-21; Loma. 16:3-5) Bakalinga kucite shiinji shakucita mubuumi alimwi bakalinga kusangalete!

12. Ino nceebonshi beebene balyeelete kusala nshebasuni kucita muncito yakwe Yehova?

¹² Beebene bamunshiku shino inga bakonkela cakubonenaako cakwe Pulisila a Akwila kwiinda mukubika sha Bwaami panembo. Ciindi cibotu beebene ndyeenga babandika nshebasuni kucita mubuumi nciindi kabatana kweebana. Na beebene basala shakucita muncito yakwe Yehova, akusebensa cankusu kushikumanisha, inga babona Yehova mbwaabacafwa. (Shiku. 4:9, 12) Amuyeeye pacakubonenaako caba Russel aba Elizabeth. Ba Russel bakaamba ayi, “Katutana kweebana, twakabandika nshetwakalinga kusuni kucita muncito yakwe Yehova.” Ba Elizabeth bakaamba ayi, “Twakabandika pamakani aya kwaamba ayi na tukayandike kusala shakucita kunembo, tutakasali kucita sheenga shapa kwaamba ayi twaalilwe kukumanisha  nshetwakasala kucita muncito yakwe Yehova.” Nshebakasalawo shakabacafwa kulongela ku Micronesia kumusena kwakalinga kuyandika beshikushimikila.

13. Kweelana a Kulumbaisha 28:7, ino nshiinshi sheshi shikacitike na twashoma muli Yehova?

¹³ Bweenka mbuli ba Russel aba Elizabeth, beebene baanji balasalawo kukala buumi bwakutalila shiinji kwaamba ayi banooba aciindi cinene cakushimikila akwiisha bantu makani abotu. Na beebene basalawo kucita nsheenga bacikonsha muncito yakwe Yehova, akusebensela pomwi kweelesha kushikumanisha, mulaakuswa shibotu. Balaakubona Yehova mbwaababikilako maano, balaakunomushoma abuumbi alimwi balaakuba alusangalalo lwancinencine.—Amubelenge Kulumbaisha 28:7.

14. Ino mutumwi Pita amukaakwe bakatondesha buyani ayi bakalinga kushoma mucishomesho ncetucana pa Mateyo 6:25, 31-34?

¹⁴ Kuli nsheenga beebene beeya kucakubonenaako ca mutumwi Pita amukaakwe. Ndipakeenda myeenshi 6 kuswa ciindi cakutaanguna mutumwi Pita ndyaakashibana a Yesu, wakalinga kweelete kusalawo cakucita ciyandika abuumbi. Pita wakalinga kusebensa ncito yakucaya nswi kwaamba ayi anolama mukwashi wakwe. Aboobo Yesu ndyaakeeta Pita kwaamba ayi abe shikwiiya wakwe, Pita wakalinga kweelete kutaanguna kuyeeya pamukwashi wakwe. (Luka 5:1-11) Pita wakasalawo kunooya muncito yakushimikila pomwi a Yesu. Wakasalawo kucita cintu cibotu! Alimwi kuli ceebo cibotu ceenga catupa kushoma ayi mukaakwe Pita, wakasuminisha Pita nshaakasala kucita. Pesule lyakwaamba ayi Yesu wabushikwa, Baibo ilatondesha ayi mukaakwe Pita wakalinga kuya a Pita muncito yakushimikila. (1 Koli. 9:5) Ncakutatoonsha kwaamba ayi, mukwiinga mukaakwe Pita wakalinga Mwineklistu weebetwe ulikabotu, Pita wakaamba cakwaanguluka ndyaakaamba nshebeelete kucita basankwa abanakashi Beneklistu abo bali mushikwati. (1 Pit. 3:1-7) Ncakutatoonsha kwaamba ayi Pita amukaakwe boonse bakalinga kushoma mucishomesho cakwe Yehova cakwaamba ayi alaakunoobapa nshebayandika, na babika sha Bwaami panembo.—Amubelenge Mateyo 6:25, 31-34.

15. Ino nshiinshi nshomweeya kushakacitikila ba Tiago aba Esther?

¹⁵ Na peenda myaaka iinji kuswa ciindi ndyemwakeebana, ino nshiinshi nsheenga mwaciita kwaamba ayi mutolelele kusuna kucita shiinji muncito yakwe Yehova? Nshila yomwi mbweenga mwacita boobo nkwiinda mukwiiya shakubonenaako sha beebene bamwi. Inga mwacana shakubonenaako ishi shiyuminisha mumabuku esu. Shakubonenaako ishi shakacafwa ba Tiago aba Esther beebene bakala ku Brazil, kusuna kuya mukusebensela kumusena ubulishite. Ba Tiago bakaamba ayi: “Ndyetwakabelenga makani atondesha Yehova mbwaakacafwa basebenshi bakwe munshiku shino, aswebo twakalinga kusuni kwaamba ayi anootutanjilila akutucafwa.” Mu 2014 bakalongela ku Paraguay, akutalika kusebensela kumusena bantu nkobaamba Ciportuguese. Ba Esther bakaamba ayi: “Lilembo lyomwi soonse ndyetusuni abuumbi ndilembo lya Bene Efeso 3:20. Shiindi shiinji twabona lilembo ili mbolikumanishikwa ndyetutoosebensa ncito yakwe Yehova.” Munkalata Paulo njaakalembela Bene Efeso, wakashomesha ayi Yehova alaakutupa shiinji kwiinda anshetumusenga. Cishomesho ici cakumanishikwa mankanda aanji!

16. Ino nkuli nkweenga abo bakeebana conoono basenga lucafwo na batoyeeya pa nsheenga bacita mubuumi?

¹⁶ Abo bakeebana conoono inga beeya shiinji kuswa kushakubonenaako shabaabo bacinka manungo muli Yehova. Beebene bamwi mpashi  basebensa myaaka iinji mbuli bapainiya. Amubasenge kwaamba ayi bamucaafwe na kuli shakucita nshomusuni kwaalula. Iyi ninshila yomwi mbweenga mwatondesha ayi mulashoma muli Yehova. (Tus. 22:17, 19) Bamanene abalo inga bacafwa baabo bakeebana conoono kusala shakucita muncito yakwe Yehova akushikumanisha.

17. Ino nshiinshi shakacitika kuli ba Klaus aba Marisa, alimwi ino nshiinshi nsheenga tweeyawo kusheesho shakabacitikila?

¹⁷ Nacibi boobo, cimwi ciindi nsheenga twasala kucita muncito yakwe Yehova, inga tashibi kweelana ambotwalinga kulangila. Amuyeeye pacakubonenaako ca ba Klaus aba Marisa mbotwalinga twaambawo pakutaanguna. Pesule lyakukala mucikwati kwamyaaka yotatwe, bakalonga kuya mukucafwilisha muncito yakuyaka kumusampi waku Finland. Sombi bakabalwiita ayi inga tabasuminishikwi kukala kumusena uyu kwa myeenshi iindilila 6. Pakutaanguna bakalefuka, sombi ndipakeendabo ciindi ciniini, bakabeeta kucikolo cakwiiya mushobo wa Ciarabic, alimwi pacecino ciindi balisangalete kusebensela kucishi kumwi kumusena bantu nkobaamba mushobo wa Ciarabic. Na ba Marisa bayeeya pashakacitika balaamba ayi: “Ndakalinga kuloonda kucita cintu ncentana kucitawo kale, aboobo ndakalinga kuyandika kushoma muli Yehova cakumaninina. Sombi ndabona Yehova mbwaatucafwa munshila nshotwatakalinga kuyeeyela. Pesule lya sheeshi shakacitika, lushomo lwangu muli Yehova lwakayuminaako.” Bweenka mbuli cakubonenaako ici mbocatondesha, inga mwashoma cakutatonsha kwaamba ayi lyoonse Yehova alaakunoomupa shoolwe na mwashoma muli nguwe cakumaninina.

18. Ino nshiinshi nsheenga beebene bacita kwaamba ayi batolelele kushoma muli Yehova?

¹⁸ Cikwati ncipo kuswa kuli Yehova. (Mate. 19:5, 6) Alisuni kwaamba ayi beebene banoosangalala mucikwati cabo. (Tus. 5:18) Nomwakeebana conoono, amuyeeye pa nshemutoocita mubuumi bwanu. Sa mutoocita nsheenga mwacikonsha kwaamba ayi mutondeshe ayi mulalumba Yehova pashipo nshaakamupa? Amupaile kuli Yehova. Amuyandoole njiisho Mumaswi akwe sheenga shamucafwa mubukaalo bwanu. Lyalo amukonkele Yehova nshamulwiita kucita. Inga mwashoma cakutatonsha kwaamba ayi mulaakunoosangalala mucikwati canu na mwabikila maano kukusebensela Yehova!