1. Ino ngumwiipusho nshi ngweenga twaliipusha?

SA CIMWI ciindi mulalisukama na mwayeeya pashintu sheshi shikacitike kunembo mbuli kunyonyoolwa kwa bupailishi bwakubeca, kulwanwa kuli Gogi waku Magogi alimwi ankoondo ya Amagedoni? Sa cimwi ciindi mulaliipusha ayi, ‘Sa ndaakutolelela kushomeka na shintu ishi shiloondesha shikatalike kucitika?’ Na mulayeeyawo pamiipusho iyi, nkokwaamba ayi maswi Yesu ngakaamba ali palilembo paswa mutwi uyu atomucafwa. Yesu wakalwiita bashikwiiya bakwe ayi: “Myoyo yanu itapengi. Amushome muli Lesa.” (Joni 14:1) Lushomo luyumu lulaakutucafwa kuliyumya mumapensho aliwoonse ngeshi tukacane kunembo.

2. Ino nshiinshi nsheenga twaciita kwaamba ayi tuyumye lushomo lwesu, alimwi ino nshiinshi nsheshi tubandike mumutwi uyu?

² Na twashiba nshetucita na lushomo lwesu lweeleshekwa, tulaakushiba nshotweelete kucita kwaamba ayi tuyumye lushomo lwesu. Lyoonse na twaliyumya mubweelesho, lushomo lwesu lulayuminaako. Aboobo ici cilaakutucafwa kuliyumya mumapensho ngeshi tukeendeemo. Mumutwi uyu, tutobandika pabukaalo buli 4 bwakatondesha kwaamba ayi bashikwiiya bakwe Yesu bakalinga kuyandika kuba alushomo luyumu. Tutobandika mbweenga twaliyumya mumapensho ngotwiindaamo pacecino ciindi alimwi ambweenga kucita boobo kwatucafwa kulibambila sheshi shikacitike kunembo.

3. Ino maswi Yesu ngakaamba ali pa Mateyo 6:30, 33 alatucafwa kunyumfwisha nshi?

³ Mutwi wamukwashi uliwoonse alasuna kulangweeta mukwashi wakwe shakufwala, shakulya alimwi amwakukala muli kabotu. Ano teshi lyoonse ndyeciba cuubu kucita boobo munshiku shino shintu ndyeshibete shiyumu. Bamakwesu abenankashi bamwi incito shakamana. Alimwi nabi kwaamba ayi baleelesha cankusu  kulangoola ncito imwi, tabacikoonshi kwiicana. Bamwi bakakaka kunjila ncito Mwineklistu nsheenga taasebensi. Na shintu sha mushobo uyu shatucitikila, tulyeelete kushoma cakutatoonsha kwaamba ayi Yehova alakushinisha kwaamba ayi tulicite nshetuyandika mumukwashi wesu. Yesu wakacafwa bashikwiiya bakwe kunyumfwishisha makani aya mulikani ndyaakaamba Pakalundu. (Amubelenge Mateyo 6:30, 33.) Na katushoma cakutatoonsha kwaamba ayi Yehova teshi akatulekeleshewo, tulaakutolelela kubikila maano kukumusebensela. Na katubona Yehova mbwaatotucafwa kuba anshetuyandika lwakumubili, bushicibusa bwesu anguwe bulaakuyuminaako alimwi lushomo lwesu muli nguwe alwalo lulaakuyuminaako.

4-5. Ino nciinshi cakacafwa mukwashi umwi ndyebakalinga kulisukama mbweenga bacana nshebayandika lwakumubili?

⁴ Amubone Yehova mbwaakacafwa mukwashi umwi ku Venezuela ndyebakalinga kulisukama mbweenga bacana shiyandika lwakumubili. Paciindi cimwi, mukwashi waba Castro wakalinga kuba amaali akwene kuula shiyandika kwiinda mukunoolima pamusena mpobakalinga kukala. Lyalo bantu bamwi bakalinga kucite mfuti bakabanyaya musena uyo akubatandaawo. Ba Miguel Castro bakaamba ayi: “Pacecino ciindi tulalimabo pamusena uniini ngotwakasenga kumuntu umwi. Bushiku abushiku ndataanguna kupaila kuli Yehova kwaamba ayi atupe nshetutoyandika bushiku ubo.” Buumi mbuyumu kumukwashi uyu, ano mukwiinga balashoma cakutatoonsha kwaamba ayi Ishiwesu shilusuno alicite nkusu shakubapa nshebayandika lwakumubili, balacanika kumabungano lyoonse alimwi akwabanaamo lubasu muncito yakushimikila. Balabikila maano kukusebensela Yehova, aboobo alabapa nshebayandika lwakumubili.

⁵ Ndyebatokwiinda mumapensho aya, ba Miguel aba Yurai bakaabo, balabikila maano kubona Yehova mbwaabacafwa. Cimwi ciindi Yehova alasebensesha bamakwesu kupako ba Miguel nshebayandika lwakumubili na kubacafwa kucana ncito. Paciindi cimwi Yehova wakapa mukwashi waba Miguel nshebakalinga kuyandika, kwiinda mukusebensesha ofesi ya musampi. Yehova taakwe kubalekeleshaawo. Aboobo boonse mumukwashi baba alushomo luyumu. Pesule lyakwaamba ayi mwanaabo mwanakashi munenebantu Yoselin waamba paciindi cimwi Yehova mbwakabacafwa, wakaamba ayi: “Cilayuminisha kubona Yehova mbwakatucafwa. Ngushicibusa wangu alimwi ndishomete cakutatoonsha kwaamba ayi alaakutolelela kunooncafwa lyoonse.” Wakeelikawo akwaamba ayi: “Meelesho ngotwakeendaamo mumukwashi wesu akatucafwa kulibambila mapensho ngeshi tukeendeemo kunembo.”

6. Ino inga mwacita buyani kwaamba ayi muyumye lushomo lwanu na mutokwiinda mulipenshi lyakubula maali?

⁶ Sa mutokwiinda mulipenshi lyakubula maali? Na mboboobo, nkokwaamba ayi mutokwiinda mulipenshi liyumu abuumbi. Nacibi boobo, inga mwasebensesha ciindi ici kuyumya lushomo lwanu. Amupaile kuli Yehova akubelenga maswi Yesu ngakaamba ngotucana pa Mateyo 6:25-34 alimwi akukutumana kuyeeyawo. Amuyeeye pashakubonenaako shamu nshiku shino shitondesha kwaamba ayi Yehova alacafwa baabo babikila maano kukumusebensela. (1 Koli. 15:58) Na mukacite boobo mulaakuba alushomo luyumu lwakwaamba  ayi Yehova alaakumucafwa bweenka mbwaakacafwa bamwi bakeenda mumapensho mbuli ngomutokwiindaamo. Alishi nshemuyandika alimwi alishi ambweenga wamucafwa. Ndyemutobona Yehova mbwaatomucafwa mubuumi bwanu, lushomo lwanu lulaakuyuminaako cakwaamba ayi mulaakucikonsha kuliyumya mubukaalo buyumu kunembo.—Abaku. 3:17, 18.

7. Kweelana a Mateyo 8:23-26, ino lushomo lwa bashikwiiya bakwe Yesu lwakeeleshekwa buyani ndyekwakesa “cipuupu cinene?”

⁷ Yesu abashikwiiya bakwe ndyebakalinga mu bwaato, cakuteengashila kwakesa cipuupu. Yesu wakasebensesha shakacitika kucafwa bashikwiiya bakwe kushiba kwaamba ayi bakalinga kuyandika kuyumya lushomo lwabo. (Amubelenge Mateyo 8:23-26.) Cipuupu cakalinga cinene cakwaamba ayi maaba akatalika kunjila mu bwaato, sombi Yesu wakalinga kulete. Bashikwiiya bakwe abo bakalinga kuloondete ndyebakamubusha akumusenga kwaamba ayi abapulushe, muliswi liboombu Mwaami wabo wakabeepusha ayi: “Anu mutoloonda nshi? Kuceya lushomo ndomucite mwebo nobantu!” Bashikwiiya bakalinga kuloondete bakalinga kweelete kushiba kwaamba ayi Yehova wakalinga kucite nkusu shakushitilisha Yesu abaabo mbwaakalingaabo mu bwaato. Ino nshiinshi nshetutokwiiyaawo? Lushomo luyumu inga lwatucafwa kuliyumya na kwesa “cipuupu cinene” cilicoonse, inga caba ayi ncipuupu ciine na cacikoshanyo.

8-9. Ino lushomo lwakwe nankashi Anel lwakeeleshekwa buyani, alimwi ino nshiinshi shakamucafwa?

⁸ Amuyeeye lushomo lwakwe nankashi uteebetwe waliina lya Anel uyo ukala ku Puerto Rico mbolwakayuma, pesule lyakuliyumya bweelesho buyumu. Bweelesho mbwakeendaamo cakalinga ncipuupu ciine. Wakatalika kwiinda mulipenshi ili mu 2017 ŋanda yakwe ndyeyakanyonyoolwa kumfula yacipuupu yakalinga kwiitwa ayi Hurricane Maria. Alimwi ceebo ca mfula iyi yacipuupu, incito yakamana. Nankashi Anel wakaamba ayi: “Ndyendakalinga kwiinda mubukaalo buyumu ubu ndakalisukama. Sombi ndakeeya kucinka manungo muli Yehova kwiinda mukupaila alimwi akutasuminisha kulisukama kumpa kwaalilwa kucita nshendakalinga kweelete kucita.”

⁹ Ba Anel mbotwaambawo bakaamba ayi cimwi cakabacafwa kuliyumya mubweelesho mbobakalinga kwiindaamo, nkukonkela butanjilishi. Bakaamba ayi: “Kukonkela butanjilishi bwa libunga lyakwe Yehova kwakancafwa kukalika moyo. Yehova wakancafwa kwiinda mubamakwesu abenankashi. Bakanjuminisha alimwi akumpa shintu nshendakalinga kuyandika.” Wakeelikawo akwaamba ayi: “Yehova wakampa shintu shiinji kwiinda anshendakalinga kulangila alimwi lushomo lwangu lwakayuminaako.”

10. Ino nshiinshi nsheenga mwaciita na mutokwiinda mulipensho lili anga ncipuupu cinene?

¹⁰ Sa mutokwiinda mulipenshi linene lili anga ncipuupu mubuumi bwanu? Mpashi mutoopenga ceebo cakwaamba ayi kwakacitika mapensho akuteengashila. Na mpashi mutoociswa bulwashi bunene ubo bumupa kulefuka abuumbi. Cimwi ciindi inga mwalisukama, sombi mutasuminishi kulisukama kumupa kucileka kushoma muli Yehova. Amuyumye bushicibusa bwanu anguwe kwiinda mukunoopaila kuswa panshi lya moyo. Amuyumye lushomo lwanu kwiinda mukunookutumana  kuyeeya pashiindi Yehova ndyakamucafwaawo. (Kulu. 77:11, 12) Inga mwashoma cakutatoonsha kwaamba ayi teshi akamulekeleshewo napaceyi.

11. Ino nceebonshi tulyeelete kuba bashinishite kunyumfwila baabo batotanjilila?

¹¹ Ino nciinshi cimwi ceenga camucafwa kwaamba ayi mucikoonshe kuliyumya mumapensho? Bweenka ba Anel mbobakaamba, nkukonkela butanjilishi. Amwiiye kushoma baabo Yehova a Yesu mbobashoma. Cimwi ciindi abo bakapekwa nkusu shakutanjilila inga batupa butanjilishi mbweenga tatunyumfwishishi. Nacibi boobo, Yehova alapa shoolwe abo bakonkela butanjililishi. Makani ngotucana mu Maswi akwe alimwi ashicitikila basebenshi bakwe bashomeka, shilatondesha ayi kukonkela butanjilishi kulapulusha. (Kulo. 14:1-4; 2 Maka. 20:17) Munookutumana kuyeeya pashakubonenaako ishi. Kucita boobo kulaakumucafwa kuba bashinishite kukonkela butanjilishi buswa kulibunga lyakwe Yehova pacecino ciindi alimwi akunembo. (Ebu. 13:17) Aboobo teshi tukaloondewo mapensho anene ayo eshi akatalike coononobo.—Tus. 3:25.

12. Ino Luka 18:1-8 ilatondesha buyani ayi kuba alushomo kulendelana akuliyumya ndyetwacitilwa shintu shitaluleme?

¹² Yesu wakalinga kucishi kwaamba ayi lushomo lwa bashikwiiya bakwe lulaakweeleshekwa, na bacitilwa shintu shitaluleme. Kwaamba ayi abacaafwe kushiba mbweenga baliyumya, wakaamba cikoshanyo ncetucana mulibuku lya Luka. Yesu wakaamba pacakubonenaako cakwe mukalubinje uyo wakalinga kusenga moomboloshi utaluleme, kwaamba ayi akamoomboloshele mulandu munshila iluleme. Wakalinga kushomete ayi alaakumucafwa na watolelela kumusenga. Mukuya kwaciindi, moomboloshi wakacita kweelana amukalubinje mbwaakalinga kusenga. Ino nshiinshi nshetutokwiiyaawo? Yehova alacita shintu shiluleme. Aboobo Yesu wakaamba ayi: “Ono sa Lesa teshi akabacitile shiluleme bantu bakwe basalitwe abo bamusenga malumwi amashiku?” (Amubelenge Luka 18:1-8.) Lyalo Yesu wakeelikawo akwaamba ayi: ‘Ono sa Mwanaamuntu pakwisa ulaakucana bantu kabacite lushomo lwamushobo uyu?’ Na twacitilwa shintu shitaluleme, tulyeelete kutondesha ayi tulicite lushomo luyumu bweenka mbuli lwakwe mukalubinje, kwiinda mukukalika moyo akutolelela kuliyumya. Na twaba alushomo lwamushobo uyu, inga twashoma cakutatoonsha kwaamba ayi Yehova alaakutucafwa. Alimwi tulyeelete kushoma ayi mupailo ulicite nkusu. Cimwi ciindi mipailo yesu inga yakumbulwa munshila njetwatalinga kuyeeyela.

13. Ino kupaila kwakacafwa buyani mukwashi umwi wakacitilwa shintu shitaluleme?

¹³ Amuyeeye pacakubonenaako cakwe nankashi waliina lya Vero, uyo ukala kucishi ca Democratic Republic of the Congo. Ba Vero, bebaabo bateshi Bakamboni alimwi amwanaabo mwanakashi ucite myaaka 15, bakaswa mumushi mobakalinga kukala ciindi ndyekwakalinga nkondo mucishi. Ndyebakalinga kuya, bamasoja bakabakonga ayi batoobacaya. Ba Vero ndyebakatalika kulila, mwanaabo mwanakashi wakeelesha kubacafwa kukalika moyo kwiinda mukupaila muliswi lyapeculu akunosebensesha bunene liina  lyakwe Yehova. Ndyaakamanisha kupaila, munene wamasoja wakamwiipusha ayi, “Mwanike, ino mbaani bakakwiisha kupaila?” Wakakumbula ayi: “Mbaama bakanjiisha kusebensesha cakubonenaako ca mbotweelete kupaila ncetucana pa Mateyo 6:9-13.” Lyalo munene wamasoja wakaamba ayi: “Mwanike, koya muluumuno abashali bako, alimwi Yehova amushitilishe!”

14. Ino ngameelesho nshi eenga eelesha lushomo lwesu, alimwi ino nshiinshi sheshi shikatucaafwe kuliyumya?

¹⁴ Shakucitika mbuli sheeshi shilatwiisha mupailo mboyandika. Ano ino mbuyani na mipailo yanu taitokumbulwa cakufwambaana na kukumbulwa munshila ilibetele? Bweenka mbuli mukalubinje Yesu ngwaakambaawo mucikoshanyo, amutolelele kupaila akushoma ayi Yehova teshi akamulekelesheewo, alimwi mukuya kwaciindi alaakukumbula mupailo wanu. Amutolelele kusenga Yehova kwaamba ayi amupe mushimu wakwe usalashi. (Filip. 4:13) Amwiibaluke kwaamba ayi conoonobo Yehova alaakumupa shoolwe shiinji abuumbi cakwaamba ayi mulaakulubaako amapensho ngomutokwiindaamo pacecino ciindi. Na mwacikonsha kuliyumya kwiinda mulucafwo lwakwe Yehova, mulaakuyuma alimwi mulaakucikonsha kuliyumya mumapensho ngeshi mukeendeemo kunembo.—1 Pit. 1:6, 7.

15. Kweelana a Mateyo 17:19, 20, ino ndipenshi nshi bashikwiiya bakwe Yesu ndyebakacana?

¹⁵ Yesu wakaiisha bashikwiiya bakwe ayi lushomo lulaakubacafwa kutolelela kuliyumya ndyebatokwiinda mumapensho. (Amubelenge Mateyo 17:19, 20.) Paciindi cimwi bashikwiiya bakwe Yesu bakaalilwa kukusha shikaswa, nabi kwaamba ayi bakacikonshawo kale kucita boobo. Ino nciinshi cakalengesha kwaamba ayi baalilwe kucita boobo? Yesu wakaamba ayi bakalinga kuyandika kuba alushomo luyumu. Wakabalwiita ayi lushomo luyumu lulaakubacafwa kutolelela kuliyumya mumapensho anene ali anga ntulundu! Aswebo munshiku shino inga tweenda mumapensho eenga atupa kubona anga inga tacikonsheki kutolelela kusebensela Yehova.

16. Ino lushomo lwakabacafwa buyani ba Geydi kuliyumya, beebabo ndyebakacaikwa?

¹⁶ Amuyeeye pacakubonenaako cakwe nankashi waliina lya Geydi, uyo ukala ku Guatemala. Ba Edi beebaye bakacaikwa kubakapondo ndyebakalinga kuswa kumabungano. Ino lushomo lwaba Geydi lwakabacafwa buyani kuliyumya ndyebakalinga kucite buumba abuumbi? Bakaamba ayi: “Kupaila kulancafwa kuwaala mikuli yangu kuli Yehova. Alimwi kucita boobo kulancafwa kuba aluumuno. Ndabona Yehova mbwaandama kwiinda mubamakwesu abenankashi alimwi abamumukwashi wangu. Kutolelela kubikila maano kukusebensela Yehova, kulancafwa kutalinyumfwa buumba abuumbi alimwi akutalisukama abuumbi pasheshi shikacitike bushiku butokonkelaawo. Ishi shakancitikila shakancafwa kushiba kwaamba ayi ndaakucikonsha kuliyumya mubweelesho buli boonse mbweshi nkeendeemo kunembo kwiinda mulucafwo lwakwe Yehova, Yesu alimwi alibunga lyakwe Yehova.”

17. Ino nciinshi nceenga twaciita na tutokwiinda mulipenshi linene anga nkalundu?

¹⁷ Sa mulicite buumba ceebo cakwaamba ayi shicibusa na shikamukowa wakafwa? Amucane  ciindi cakuyumya lushomo lwanu mukubuka kwabafu, kwiinda mukubelenga makani amu Baibo aamba pa baabo bakabushikwa. Sa mulicite buumba ceebo cakwaamba ayi umwi mumukwashi wanu wakakushikwa mulibungano? Amucane ciindi cakucita ciiyo capalwaanu kwaamba ayi mushome cakutatonsha ayi kululika kwakwe Yehova nkubotu lyoonse. Teshi mulandu a lipenshi ndyemutokwiindaamo, amusebenseshe ciindi ico kwaamba ayi muyumye lushomo lwanu. Munoolwiita Yehova shoonse shili kumoyo wanu. Mutanolipatula, sombi amutolelele kuba pomwi abamakwesu abenankashi. (Tus. 18:1) Munoocita shintu sheenga shamucafwa kuliyumya, nabi kwaamba ayi mulalila na mwayeeya pa shakamucitikila. (Kulu. 126:5, 6) Amutolelele kunoocanika kumabungano lyoonse, kwaabanamo lubasu muncito yakushimikila alimwi akubelenga Baibo. Alimwi amutolelele kuyeeya pashintu shibotu abuumbi Yehova nshaakamushomesha kumucitila kunembo. Na mwabona Yehova mbwaamucafwa, lushomo lwanu lulaakuyuminaako.

18. Ino nciinshi nceenga mwaciita na mwashiiba ayi lushomo lwanu teshi luyumu abuumbi?

¹⁸ Na meelesho ngomwakeedaamo na ngomutokwiindaamo atondesha ayi lushomo lwanu teshi luyumu abuumbi, mutalefuki. Amubone ayi ici ncoolwe cakuyumya lushomo lwanu. Amusenge bweenka mbuli bashikwiiya bakwe Yesu abo bakasenga ayi: ‘Amutunungileko lushomo.’ (Luka 17:5) Alimwi amuyeeye pashakubonenaako nshetwabandika mumutwi uyu. Bweenka mbuli ba Miguel aba Yurai, amwiibaluke shiindi shoonse Yehova ndyaakamucafwawo. Bweenka mbuli mwanaabo ba Vero alimwi aba Anel, amupaile abuumbi kuli Yehova bunene bunene ndyemutokwiinda mulipenshi linene. Alimwi bweenka mbuli ba Geydi, munookwiibaluka kwaamba ayi Yehova inga wamucafwa kwiinda mubeshicibusa alimwi abamumukwashi. Na mwasuminisha Yehova kumucafwa kuliyumya mumeelesho ngomutokwiindaamo pacecino ciindi, mulaakushoma cakutatonsha kwaamba ayi alaakumucafwa kuliyumya mumapensho aliwoonse ngeshi mukeendeemo kunembo.

19. Ino nciinshi Yesu ncaakalinga kushomete cakutatoonsha, alimwi ino nciinshi nceenga twashoma cakutatonsha?

¹⁹ Yesu wakacafwa bashikwiiya bakwe kushiba kwaamba ayi bakalinga kuyandika kuyumya lushomo lwabo. Sombi taakalinga kutonshaawo ayi balaakucikonsha kuliyumya mumeelesho ngeshi bakeendeemo, kwiinda mulucafwo lwakwe Yehova. (Joni 14:1; 16:33) Wakalinga kushomete cakutatonsha kwaamba ayi kulaakuba likoto linene lya baabo beshi bakapuluke mapensho anene, ceebo cakuba alushomo luyumu. (Ciyu. 7:9, 14) Sa mulaakuba pabaabo beshi bakapuluke mapensho anene? Kwiinda mulucafwo lwakwe Yehova, amwebo inga mwaba, na mwacita shoonse nsheenga mwacikonsha pacecino ciindi kwaamba ayi mube alushomo, akuluyumya!—Ebu. 10:39.