MUTWI WAKWIIYA 48
Amutolelele Kuyeeya Kabotu Kushomeka Kwanu Ndyekweeleshekwa
“Koyeeya kabotu mushintu shoonse.”—2 TIMO. 4:5, NWT.
LWIIMBO 123 Kukonkela Bubaambo Bwakwe Lesa Cakushomeka
NSHESHI TWIIYE a
1. Ino inga twatondesha buyani ayi tutoyeeya kabotu? (2 Timoti 4:5)
NA KWACITIKA cintu cimwi catukalasha, inga caba ciyumu kutolelela kushomeka kuli Yehova alibunga lyakwe. Ino inga twacita buyani kwaamba ayi tutolelele kushomeka? Tulyeelete kutolelela kuyeeya kabotu akuba balibambite, kwiimikana cakutatenkaana mulushomo. (Amubelenge 2 Timoti 4:5.) Tulatondesha kuyeeya kabotu na twatolelela kukalika moyo, alimwi akubona shintu bweenka Yehova mbwaashibona. Kucita boobo kulaakutucafwa kuleya kucita shintu ceebo cakwaamba ayi twakalala.
2. Ino tutobandika nshi mumutwi uyu?
2 Mumutwi wamana, twakabandika mapensho otatwe ngweenga twacaana kuswa kubantu bateshi Bakamboni. Mumutwi uyu, tutobandika mapensho otatwe eenga apa kwaamba ayi cibe ciyumu kutolelela kushomeka kuli Yehova, ngweenga twacaana kuswa kubantu mbotuli abo mulibungano. Tutobandika mbweenga caba ciyumu kutolelela kushomeka (1) na twalinyumfwa ayi mukwesu nabi nankashi watucitila cintu cimwi citabete kabotu, (2) na twalulikwa, alimwi a (3) na catubeta ciyumu kukonkela kwaaluka kwashintu mulibunga. Ino inga twacita buyani kwaamba ayi tutolelele kuyeeya kabotu akushomeka kuli Yehova alimwi alibunga lyakwe na twacana mapensho aya?
NA TWALINYUMFWA AYI MWINEKLISTUNYINEESU WATUCITILA CINTU CIMWI CITABETE KABOTU
3. Ino cimwi ciindi inga twacita buyani na twalinyumfwa ayi mukwesu nabi nankashi watucitila cintu cimwi citabete kabotu?
3 Sa mwakalinyumfwawo kale ayi mukwesu na nankashi wamucitila cintu cimwi citabete kabotu, mpashi muntu umwi ucite mukuli mulibungano, mbuli munene? Cilyeelete kwaamba ayi mukwesu taakwe kucita kashanga kwaamba ayi amukalashe. (Loma. 3:23; Jemu. 3:2) Nacibi boobo, mpashi nshaakacita shakamukalasha. Mpashi mwakaalilwa akoona ceebo cakuyeeya shakacitika. Alimwi mpashi mwakatalika akuliipusha ayi, ‘Na mukwesu inga wacita ca mushobo uyu, sa ncakwiila ili ndibunga lyakwe Lesa?’ Ubu Satana mbwaasuni ayi tunoyeeya. (2 Koli. 2:11) Kuyeeya kwa mushobo uyu inga kwatupansaanya kuli Yehova alibunga lyakwe. Aboobo, ino inga twacita buyani kwaamba ayi tutolelele kuyeeya kabotu, akuleya kuyeeya Satana nkwaasuni na twalinyumfwa ayi mukwesu nabi nankashi watucitila cintu cimwi citabete kabotu?
4. Ino Josefu wakatolelela buyani kuyeeya kabotu ndyebakamucitila shintu shitabete kabotu, alimwi ino nshiinshi nsheenga tweeya kucakubonenaako cakwe? (Matalikilo 50:19-21)
4 Mutabikili mfundilishi. Josefu ndyaakalinga mwanike, bamanene bakwe basankwa bakamucitila shibiibi. Bakalinga kumupatite, alimwi bamwi bakalinga kusuni akumucaya. (Mata. 37:4, 18-22) Mukuya kwaciindi, bakamuulisha mubusha. Aboobo, Josefu wakeenda mumapensho anene akatola myaaka 13. Ici naakwiinga cakapa Josefu kuyeeya ayi Yehova taamusuniiwo. Alimwi mpashi naakwiinga wakeeya ayi Yehova wamulekelesha paciindi ndyaatoyandika lucafwo. Sombi Josefu taakwe kubikila mfundilishi. Muciindi cakucita boobo, wakatolelela kuyeeya kabotu kwiinda mukutolelela kukalika moyo. Ndyaakalinga kucite coolwe cakubabooshesha cishole bamakwabo, taakwe kucita boobo. Sombi wakabatondesha lusuno akubalekelela. (Mata. 45:4, 5) Josefu wakacikonsha kucita sheeshi mukwiinga wakalinga kuyeeya kabotu. Muciindi cakubikila maano kumapensho ngaakalinga kwiindaamo, wakatolelela kuyeeya Yehova nshaakalinga kusuni. (Amubelenge Matalikilo 50:19-21.) Ino tutokwiiyawo nshi? Na bamwi bamucitila cintu cimwi citabete kabotu, mutabikili mfundilishi Yehova na kuyeeya ayi wamulekelesha. Muciindi cakucita boobo, amukutumane kuyeeya mbwatoomucafwa kuliyumya mulipenshi. Kwiilikaawo, na bamwi bamucitila cintu citabete kabotu, amutondeshe lusuno kwiinda mukutabikila maano ku shilubo shabo.—1 Pit. 4:8.
5. Ino ba Miqueas bakacikonsha buyani kutolelela kuyeeya kabotu ndyebakalinyumfwa ayi bacitilwa shintu shitabete kabotu?
5 Amuyeeye cakubonenaako ca munshiku shino ca munene mulibungano waliina lya Miqueas b wakucishi ca South America. Aleebaluka paciindi cimwi ndyaakalinyumfwa ayi bamakwesu bakalinga kutanjilila mulibunga bakacita shintu shimwi shitabete kabotu kuli nguwe. Wakaamba ayi: “Ndakalinyumfwa cibiibi abuumbi ncentana kulinyumfwawo kale. Ndakalisukama. Ndakaalilwa koona mashiku, alimwi ndakalila mukwiinga ndakalinyumfwa ayi taakuwo ncendakalinga kukonsha kucita.” Nacibi boobo, ba Miqueas bakatolelela kuyeeya kabotu akweelesha cankusu kuleya kucita shintu kweelana ambobakalinga kulinyumfwa. Bakapaila mankanda aanji, kusenga Yehova kwaamba ayi abape mushimu usalashi alimwi ankusu shakuliyumya. Alimwi bakalangoola makani eenga abacafwa kuswa mumabuku esu. Ino tutokwiiyawo nshi? Na mwalinyumfwa ayi mukwesu nabi nankashi wamucitila cintu cimwi citabete kabotu, amutolelele kukalika moyo akweelesha kutacita shintu ceebo ca bukali. Mpashi inga tamushibi capa kwaamba ayi muntu uyo aambe na kucita shintu isho nshaakacita. Aboobo amupaile kuli Yehova, alimwi akumusenga kwaamba ayi amucaafwe kubona shintu kweelana ambwashibona. Kucita boobo inga kwamucafwa kuyeeya ayi mukwesu nabi nankashi taakwe kucita kashanga, lyalo akumulekelela. (Tus. 19:11) Mutaluubi kwaamba ayi Yehova alishi kabotu bukaalo mbomubeteemo alimwi alaakumupa nkusu kwaamba ayi mucikoonshe kuliyumya.—2 Maka. 16:9; Shiku. 5:8.
NA YEHOVA WATULULIKA
6. Ino nceebonshi cilayandika kunyumfwishisha kwaamba ayi Yehova alatululika ceebo cakwaamba ayi alitusuni? (Bene Ebulu 12:5, 6, 11)
6 Inga twalinyumfwa cibiibi abuumbi na Yehova watululika. Ano na katuyeeyabo mbotutolinyumfwa cibiibi, inga twatalika kuyeeya ayi kululika takwakalinga kabotu alimwi tatwalinga kuyandika kululikwa. Ici inga catupa kwaalilwa kunyumfwishisha cintu cimwi ciyandika abuumbi, cakwaamba ayi Yehova alatululika mukwiinga alitusuni. (Amubelenge Bene Ebulu 12:5, 6, 11.) Alimwi na twatolelela kubikila bunene maano mbotutolinyumfwa cibiibi ceebo ca kululikwa, tulapa Satana coolwe ca kutukoma. Alisuni ayi tukake kululikwa alimwi mukuya kwaciindi tucileeke kusebensela Yehova akuswa mulibungano. Ino inga mwacita buyani kwaamba ayi mutolelele kuyeeya kabotu na mwalulikwa?
Mukwiinga Pita wakalinga kuliceesha, wakasumina kululikwa aboobo Yehova wakamupa mikuli (Amubone palagilafu 7)
7. (a) Kweelana acikope, ino Yehova wakamusebensesha buyani Pita ndyaakasumina kululikwa? (b) Ino nciinshi ncomutokwiiyaako kucakubonenaako cakwe Pita?
7 Amusumine kululikwa, akusebensela mpomutoyandika. Yesu wakalulika Pita mankanda aanji pameenso abatumwi bamwi. (Maako 8:33; Luka 22:31-34) Cilyeelete ici cakamulensha nsoni abuumbi Pita! Nacibi boobo, Pita wakatolelela kushomeka kuli Yesu. Wakasumina kululikwa akusebensela pashilubo shakwe. Aboobo Yehova wakapa Pita cilaambu ceebo cakushomeka kwakwe alimwi wakamupa mikuli iyandika mulibungano. (Joni 21:15-17; Milimo 10:24-33; 1 Pit. 1:1) Ino nciinshi nceenga tweeya kucakubonenaako cakwe Pita? Kululikwa inga kwatucafwa na katutabikili maano mbweenga kwatulensha nsoni, sombi kusumina akusebensela pashilubo shesu. Kucita boobo kulaakutupa kwaamba ayi tucikonshe kucafwa bamakwesu alimwi Yehova alaakutolelela kutusebensesha.
8-9. Ino ba Bernardo bakalinyumfwa buyani pakutaanguna ndyebakalulikwa, sombi ino nciinshi cakabacafwa kwaalula mbobakalinga kuyeeya?
8 Amuyeeye shakacitikila mukwesu waliina lya Bernardo ukala kucishi ca Mozambique. Bakamukusha pa bunene. Ino wakalinyumfwa buyani pakutaanguna? Wakaamba ayi: “Ndakaba amfundilishi mukwiinga nshikwe kukondwa akululikwa nkobakandulika.” Wakalisukama ceebo cakuyeeya bamwi mulibungano mbweenga bamubona. Wakaamba ayi, “Cakatola myeenshi kwaamba ayi mbone kululika kulya munshila yeelete akutalika alimwi kushoma Yehova alibunga lyakwe.” Ino nciinshi cakacafwa ba Bernardo kwaalula mbobakalinga kubona shintu?
9 Ba Bernardo bakaalula mbobakalinga kuyeeya. Bakaamba ayi: “Ndyendakalinga kusebensa mbuli munene, ndakalinga kusebensesha Bene Ebulu 12:7 kucafwa bamwi kubona kululika kwakwe Yehova munshila yeelete. Ano ndakaliipusha ayi, ‘Ino ngani uyandika kukonkela shaamba lilembo ili?’ Mbasebenshi bakwe Yehova boonse, kwiilikaawo andime.” Lyalo ba Bernardo bakaalula shimwi kwaamba ayi batalike alimwi kushoma Yehova alibunga Lyakwe. Bakatalika kubelenga Baibo abuumbi akutola ciindi kukutumana kuyeeya nshobakalinga kubelenga. Nabi kwaamba ayi bakalinga kulisukama pamakani ambweenga bamakwesu abenankashi bababona, bakasebensaabo muncito yakushimikila akwaabanamo lubasu kumabungano. Mukuya kwaciindi ba Bernardo bakasalwa alimwi mbuli munene. Na mbuli ba Bernardo amwebo mwakalulikwa, amweeleshe kutabikila bunene maano bamwi mbobamubona, amusumine kululikwa, akusebensela mpomutana kucita kabotu. c (Tus. 8:33; 22:4) Na mwacita boobo, inga mwashoma cakutatoonsha kwaamba ayi Yehova alaakumupa cilambu ceebo cakutolelela kushomeka kuli nguwe akulibunga lyakwe.
NA CATUBETA CIYUMU KUKONKELA KWAALUKA KWASHINTU MULIBUNGA
10. Ino nkwaaluka kwa buyani mpashi kwakapa kwaamba ayi basankwa bene Isilaeli bamwi cibayumine kutolelela kushomeka?
10 Inga catuyumina kutolelela kushomeka na shintu shaaluka mulibunga. Na tatuna kucenjela, inga catupansaanya kuli Yehova. Kucakubonenaako, amuyeeye shintu mboshakaaluka kubene Isilaeli paciindi ndyebakalinga kukonkela Mulawo wakwe Mose. Yehova kaatana kubapa Mulawo, basankwa beebete bakalinga kucita shintu shakalinga kucita bapailishi. Bakalinga kuyaka shipaililo alimwi akubengelako mikwashi yabo milambu kuli Yehova. (Mata. 8:20, 21; 12:7; 26:25; 35:1, 6, 7; Jobo 1:5) Ano ndyebakapekwa Mulawo, basankwa beebete tabakalinga kusuminishikwa kucita shintu isho. Yehova wakasala bapailishi kuswa mumukwashi wakwe Aloni kwaamba ayi mbeshi banoobenga milambu. Kuswabo paciindi Mulawo uyu ndyewakapekwa, na musankwa weebete uteshi wamulunyungu lwakwe Aloni wacita shintu sheelete kucitwa amupailishi, wakalinga kucaikwa. d (Lefi. 17:3-6, 8, 9) Sa kwaaluka uku nkokwakapa kwaamba ayi Kola, Datani, Abilamu, alimwi abacinenenene bali 250 babukile Mose a Aloni? (Shakube. 16:1-3) Tatucishi kabotu. Sombi tulishi kwaamba ayi Kola abasankwa bamwi mbaakalingaabo bakaalilwa kutolelela kushomeka kuli Yehova. Ino inga mwacita buyani na camuyumina kutolelela kushomeka ceebo cakwaaluka kwashintu mulibunga?
Bene Koati ndyebakapekwa ncito ipya, bakasumina kuba beshikwiimba, beshikulama minjililo, alimwi bamwi bakaba beshikulama maanda mobakalinga kubika shintu (Amubone palagilafu 11)
11. Ino nshiinshi nsheenga tweeya kucakubonenaako ca bene Koati?
11 Amutolelele kukonkela kwaaluka kuli koonse mulibunga. Ndyebakalinga palweendo muluyanga, bene Koati bakalinga kucite mukuli ulibetele abuumbi. Lyoonse bene Isilaeli na batolonga, bene Koati mbobakalinga kunyamuna libokosi lya cipangano pabantu boonse. (Shakube. 3:29, 31; 10:33; Joshu. 3:2-4) Coolwe cilibetele abuumbi! Nacibi boobo, shintu shakaaluka bene Isilaeli ndyebakashika Mucishi Cakashomeshekwa. Libokosi lya cipangano talyakalinga kuyandika kulonshekwa lyoonse. Aboobo kusa mukushika paciindi Solomoni ndyaakalinga kweendelesha mbuli mwaami, bene Koati bamwi bakapekwa ncito ya kwiimba, bamwi bakaba beshikulama minjililo, alimwi bamwi bakaba beshikulama maanda mobakalinga kubika shintu. (1 Maka. 6:31-33; 26:1, 24) Taakuwo makani atondesha kwaamba ayi bene Koati bakatongooka nabi kusuna kupekwa mikuli yapeculu ceebo cakwaamba ayi kale kale bakalinga kucite mikuli ilibetele. Ino tutokwiiyawo nshi? Tulyeelete kutolelela kukonkela camoyo woonse kwaaluka kuli koonse kweenga kwacitika mulibunga lyakwe Yehova, kwiilikaawo akooko kweenga kwakuma ncito yanu. Amusangalale kusebensa ncito ili yoonse njeenga mwapeekwa. Mutaluubi kwaamba ayi incito njomusebensa teshi njoipa kwaamba ayi mube bayandika abuumbi kuli Yehova. Kunyumfwila kwanu nkokuyandika abuumbi kuli Yehova kwiinda ncito ili yoonse.—1 Samwe. 15:22.
12. Ino ba Zaina bakalinyumfwa buyani ndyebakaswa pa Bethel?
12 Amuyeeye cakubonenaako cakwe nankashi waliina lya Zaina ukala ku Middle East, uyo wakapekwa ncito ipya akushiya ncito njaakalinga kusuni abuumbi. Wakaswa pa Bethel pesule lyakusebensa myaaka iindilila 23. Wakaamba ayi: “Ndakakankamana abuumbi ndyebakandwiita ayi ntooswa pa Bethel. Ndakalinyumfwa anga taakuwo mbombete alimwi ndakatolelela kuliipusha ayi, ‘Ino nciinshi ncendakabisha?’” Alimwi wakeendaawo kulinyumfwa cibiibi mukwiinga, bamakwesu abenankashi bamwi mulibungano bakatalika kumulwiita ayi: “Nemwalinga kusebensa kabotu naakwiinga libunga lyakatolelela kumusebensesha pa Bethel.” Nankashi Zaina wakalinyumfwa kulefuka kwakaciindi cakwaamba ayi wakalinga kulila lyoonse mashiku. Nacibi boobo, wakaamba ayi: “Nshikwe kutalika kutoonsha lusuno lwakwe Yehova na libunga lyakwe.” Ino ba Zaina bakatolelela buyani kuyeeya kabotu?
13. Ino ba Zaina bakacikonsha buyani kucileka kulinyumfwa cibiibi?
13 Ino ba Zaina bakacikonsha buyani kucileka kulinyumfwa cibiibi? Bakabelenga makani kuswa mumabuku esu akalinga kwaamba pabukaalo mbobakalinga kwiindaamo. Makani ngobakabelenga kuswa mu Njashi Yamulindilishi ya February 1, 2001 pamutwi wakalinga kwaamba ayi “Inga Mwacikonsha Kuliyumya Ndyemwalefuka!” akabacafwa abuumbi. Njashi iyi yakasansulula shikulemba Baibo Maako mbwaakalinyumfwa cibiibi ndyaakapekwa ncito ipya. Ba Zaina bakaamba ayi: “Makani a cakubonenaako cakwe Maako ngomakani ngondakalinga kuyandika kwaamba ayi ncileeke kulinyumfwa kulefuka.” Alimwi ba Zaina bakatolelela kuba pafwiifwi abeshicibusa babo. Tabakwe kucileka kucanika na kushimikila pomwi abamakwesu abenankashi, alimwi tabakalinga kulinyumfwila nkumbu. Bakesa mukwiibaluka kwaamba ayi mushimu usalashi ngotanjilila kusala kwa libunga lyakwe Yehova, alimwi ayi bamakwesu bakalinga kutanjilila bakalinga kumubikila maano abuumbi. Alimwi bakesa mukwiibaluka kwaamba ayi cintu ciyandika abuumbi mulibunga lyakwe Yehova nkukumanisha ncito yakwe.
14. Ino nkwaaluka kwa buyani kwa mulibunga kwakayumina ba Vlado, alimwi ino nciinshi cakabacafwa?
14 Mukwesu munene mulibungano waliina lya Vlado ucite myaaka 73, ukala kucishi ca Slovenia, cakamuyumina ciindi libungano lyabo ndyelyakapankana alibungano limwi alimwi Ŋanda ya Bwaami njebakalinga kusebensesha yakacalwa. Bakaamba ayi: “Ndakaalilwa kunyumfwishisha cakapa kwaamba ayi Ŋanda ya Bwaami ibotu bobulya icalwe. Ndakalinyumfwa cibiibi mukwiinga ndyetwakaswabo mukwiibamba. Ndime kapenta, alimwi ndakalinga ndakapangako shintu shimwi shamapulanga. Alimwi kupankana uku kwakalinga kuyandika kwaalula shintu shiinji shatakalinga shuubu kuli ndiswe sobeshikushimikila bacinene.” Ino nciinshi cakacafwa ba Vlado kukonkela butanjilishi? Bakaamba ayi: “Kukonkela butanjilishi na shintu shaaluka mulibunga lyakwe Yehova lyoonse kulaleta shoolwe. Kwaaluka uku kulatucafwa kulibambila kwaaluka kwa shintu kwiinditeewo kutoosa kunembo.” Sa amwebo citoomuyumina kukonkela kwaaluka kusa ceebo cakupankana kwa mabungano na kupekwa ncito ili yoonse ipya? Amushome cakutatoonsha kwaamba ayi Yehova alishi kabotu mbomutoolinyumfwa. Na mwakonkela kwaaluka uko akutolelela kushomeka kuli Yehova alibunga ndyaatosebensesha, mulaakucana shoolwe.—Kulu. 18:25.
AMUTOLELELE KUYEEYA KABOTU MUSHINTU SHOONSE
15. Ino inga twatolelela buyani kuyeeya kabotu na twacana mapensho kuswa kubaabo mbotuli abo mulibungano?
15 Mamanino abweende bwashintu ubu ndyaatoya busena pafwiifwi, inga twalangila mapensho kuswa kubaabo mbotuli abo mulibungano. Mapensho ayo inga apa kwaamba ayi cituyumine kushomeka kuli Yehova. Aboobo tulyeelete kutolelela kuyeeya kabotu. Na mwalinyumfwa ayi mukwesu nabi nankashi wamucitila cintu cimwi citabete kabotu, mutamubikili mfundilishi. Na mwalulikwa, amweeleshe kutabikila bunene maano bamwi mbobamubona, amusumine kululikwa, akusebensela mpomutana kucita kabotu. Alimwi na kuli shimwi shaaluka mulibungano shamukuma, amusumine akukonkela butanjilishi camoyo woonse.
16. Ino inga mwacita buyani kwaamba ayi mutolelele kushoma Yehova alibunga lyakwe?
16 Inga mwatolelela kushoma Yehova alibunga lyakwe nabi ndyecamuyumina kushomeka. Ano kwaamba ayi mucikoonshe, mulyeelete kutolelela kuyeeya kabotu, nkokwaamba ayi kukalika moyo alimwi akubona shintu bweenka Yehova mbwaashibona. Amube bashinishite kwiiya pamakani abantu baambwa mu Baibo abo bakacikonsha kuliyumya ndyebakalinga mumapensho mbuli ayo ngomutokwiindaamo. Alimwi amukutumane kuyeeya pashakubonenaako shabo. Amupaile kuli Yehova kwaamba ayi amucaafwe. Alimwi mutalitalamushi kubamakwesu abenankashi. Kucita boobo kulaakupa kwaamba ayi Satana aalilwe kumupansaanya kuli Yehova na libunga Lyakwe.—Jemu. 4:7.
LWIIMBO 126 Amucenjele, Mwimikane Nta Akuyuma
a Cimwi ciindi inga catubeta ciyumu kutolelela kushomeka kuli Yehova alibunga lyakwe, bunene bunene na kuli cimwi cacitika mulibungano catukalasha. Mumutwi uyu tutobandika mapensho otatwe ngeenga twacaana alimwi ansheenga twaciita kwaamba ayi tutolelele kushomeka kuli Yehova alibunga lyakwe.
b Meena amwi akaalulwa.
c Inga mwacana makani amwi acafwa mu Njashi Yamulindilishi yamu Chitonga ya August 15, 2009 pa peeji 30 pamutwi utokwaamba ayi “Sa Mwakalinga Kucitewo Mukuli? Sa Inga Mwaba Amukuli Alimwi?”
d Kweelana a Mulawo, na musankwa weebete alisuni kucaya cifubwa ayi alye wakalinga kweelete kutola cifubwa ico ku tente yakulambililaako. Kukushilakobo na musankwa uyo alekala kulaamfu abuumbi atente yakulambililaako.—Duto. 12:21.