MUTWI WAKWIIYA 47
Mutasuminishi Cili Coonse Kumupansaanya Kuli Yehova
‘Nebo ndicinkite manungo muli ndiwe, O Yehova.’—KULU. 31:14.
LWIIMBO 122 Amuyume, Mutatenkaani!
NSHESHI TWIIYE a
1. Ino tulishi buyani kwaamba ayi Yehova alisuni ayi tusene pafwiifwi anguwe?
YEHOVA alatwiita ayi tusene pafwiifwi anguwe. (Jemu. 4:8) Alisuni kwaamba ayi abe Lesa wesu, Ishiwesu, alimwi Shicibusa wesu. Alakumbula mipailo yesu akutucafwa ndyetutokwiinda mubukaalo buyumu. Alimwi alatwiisha akutushitilisha kwiinda mulibunga lyakwe. Ano ino nshiinshi nshotweelete kucita kwaamba ayi tusene pafwiifwi a Yehova?
2. Ino inga twacita buyani kwaamba ayi tusene pafwiifwi a Yehova?
2 Inga twasena pafwiifwi a Yehova kwiinda mukupaila kuli nguwe, kubelenga Maswi akwe, alimwi akukutumana kuyeeyawo. Kucita boobo kulatucafwa kumusuna abuumbi akumulumba. Kulatupa kumunyumfwila akumulumbaisha nkwaeelela. (Ciyu. 4:11) Kumushiba kabotu Yehova kulaakutucafwa kumushoma akushoma libunga lyakwe ndyaakatupa kwaamba ayi linootucafwa.
3. Ino Satana alacita buyani kwaamba ayi atupansaanye kuli Yehova, sombi ino nciinshi ceshi cikatucaafwe kutolelela kusebensela Lesa akuba mulibunga lyakwe? (Kulumbaisha 31:13, 14)
3 Nacibi boobo, Satana alisuni kutupansaanya kuli Yehova, bunene bunene paciindi ndyetutokwiinda mumapensho. Ino alasebensesha nshila nshi? Alatupa kwaamba ayi tucileeke kushoma Yehova alibunga lyakwe paniini paniini. Sombi inga twacikonsha kulishitilisha ku toose twakwe. Kuba alushomo luyumu akuba bashinishite kucinka manungo muli Yehova kulaakutucafwa kusebensela Lesa wesu akuba mulibunga lyakwe.—Amubelenge Kulumbaisha 31:13, 14.
4. Ino nshiinshi nsheshi tubandike mumutwi uyu?
4 Mumutwi uyu, tutobandika shintu shotatwe nsheenga bantu bateshi Bakamboni bacita kwaamba ayi batulengeshe kucileka kushoma Yehova alibunga lyakwe. Ino shintu ishi inga shatupansaanya buyani kuli Yehova? Alimwi ino inga twacita buyani kwaamba ayi tuleye toose twakwe Satana?
NDYETUTOKWIINDA MUMAPENSHO
5. Ino mapensho inga atulengesha buyani kucileka kushoma Yehova alibunga lyakwe?
5 Cimwi ciindi, tuleenda mumapensho mbuli, kupikishikwa kubeshikamukowa na kukushikwa ncito. Ino mapensho mbuli aya inga atulengesha buyani kucileka kushoma libunga lyakwe Yehova akutupansaanya kuli nguwe? Kwiinda mumapensho kwaciindi cilaamfu inga kwatupa kulinyumfwa kubula cakulangila akulefuka. Ici nceciindi Satana nceenga watupa kutalika kuyeeya ayi mpashi Yehova tatusuniiwo. Satana alisuni kwaamba ayi tunoyeeya ayi Yehova alibunga Lyakwe mbobalengesha ayi tunoopenga. Cintu ca mushobo mbuli wooyu ncocakacitikila bene Isilaeli bamwi ndyebakalinga mucishi ca Ijipiti. Pakutaanguna bakalinga kushoma ayi Yehova ngowakasala Mose a Aloni kwaamba ayi abakushe mubusha. (Kulo. 4:29-31) Ano mukuya kwaciindi Falawo ndyaakatalika kubapensha abuumbi, bakatalika kupa mulandu Mose a Aloni pamapensho abo, bakatalika kwaamba ayi: ‘Mwalengesha Falawo alimwi abacinenenene bakwe ayi batupaate alimwi mwalengesha ayi bacane nshila yakutucailaawo.’ (Kulo. 5:19-21) Cakabica abuumbi kwaamba ayi bakapa mulandu basebenshi bakwe Lesa bashomeka. Ino inga mwacita buyani kwaamba ayi mutolelele kushoma Yehova alibunga lyakwe nabi mweenda mumapensho kwaciindi cilaamfu?
6. Ino nshiinshi nsheenga tweeya kucakubonenaako cakwe Abakuku pamakani ambweenga twaliyumya ndyetutokwiinda mumapensho? (Abakuku 3:17-19)
6 Amupaile kuli Yehova camoyo woonse, akulangila kuli nguwe kwaamba ayi amucaafwe. Mushinshimi Abakuku wakeenda mumapensho aanji. Paciindi cimwi, citoboneka wakatalika kutoonsha na Yehova wakalinga kumubikilako maano. Aboobo wakapaila kuli Yehova akumulwiita mbwakalinga kulinyumfwa. Wakaamba ayi: ‘O Yehova, citooba ciindi cilaamfu buyani kaansenga lucafwo, webo cakutankumbulaawo? . . . Ino nceebonshi ulalangilishabo shilubo sha mushobo uyu?’ (Abaku. 1:2, 3) Yehova wakakumbula mupailo wakuswa panshi lya moyo wa musebenshi wakwe ushomeka. (Abaku. 2:2, 3) Pesule lyakukutumana kuyeeya Yehova mbwaakapulusha bantu bakwe, Abakuku wakaba alusangalalo. Wakashoma cakutatoonsha kwaamba ayi Yehova wakalinga kumubikila maano alimwi alaakumucafwa kuliyumya mumapensho ali woonse. (Amubelenge Abakuku 3:17-19.) Ino tutokwiiyawo nshi? Na mwacana mapensho, amupaile kuli Yehova akumulwiita mbomutolinyumfwa. Lyalo amulangile lucafwo kuswa kuli nguwe. Na mwacita boobo, inga mwashoma kwaamba ayi Yehova alaakumupa nkusu nshomuyandika kwaamba ayi mucikoonshe kuliyumya. Alimwi lushomo lwanu muli nguwe lulaakuyuminaako na mwabona mbwatoomucafwa.
7. Ino beshikamukowa bakwe Shirley bakamweelesha buyani, alimwi ino nciinshi cakamucafwa kutolelela kushoma Yehova?
7 Amutolelele kucita shintu shimucafwa kuyumya bushicibusa bwanu a Yehova. Ishi nsheshakacafwa nankashi waliina lya Shirley, ukala kucishi ca Papua New Guinea, ndyaakalinga kwiinda mumapensho. b Mukwashi wakwe Shirley bakalinga bakandu, alimwi cimwi ciindi cakalinga ciyumu kucana shakulya shikwene kabotu. Shikamukowa umwi wakatalika kumweelesha kwaamba ayi atalike kutoonsha Yehova. Wakaamba ayi: “Ulaamba ayi mushimu usalashi wakwe Lesa ulakucafwa, ano ino lucafwo luli kuli? Tucili bakandu mumukwashi. Utosowabo ciindi kushimikila.” Shirley wakaamba ayi: “Ndakaliipusha ayi: ‘Sa Lesa alatubikilako maano na sobwe?’ Aboobo peenkapo ndakapaila kuli Yehova akumulwiita shoonse nshendakalinga kucite kumoyo. Ndakatolelela kushimikila, kucanika kumabungano, kubelenga Baibo, alimwi amabuku esu.” Lyalo wakatalika kubona kwaamba ayi Yehova wakalinga kulama mukwashi wakwe. Tabakwe koonawo nsala mbuli mukwashi, alimwi bakalinga kusangalete. Nankashi Shirley wakaamba ayi: “Ndakalinyumfwa ayi Yehova wakalinga kukumbula mipailo yangu.” (1 Timo. 6:6-8) Amwebo na mwatolelela kucita shintu shimucafwa kuyumya bushicibusa bwanu a Yehova, kwiinda mumapensho na kutoonsha teshi kukamupansaanye kuli Yehova.
BAMAKWESU BATOTANJILILA NDYEBATOPENSHEKWA
8. Ino nshiinshi sheenga shacitika kubamakwesu batotanjilila mulibunga lyakwe Yehova?
8 Pamanyusi alimwi apa intaneti, balwani besu balaambilisha makani akubeca pabamakwesu batotanjilila mulibunga lyakwe Yehova. (Kulu. 31:13) Bamakwesu bamwi bakacatwa akubekeshekwa ayi mbakapondo. Beneklistu bamuciindi ca batumwi abalo ishi nshebakeendaamo paciindi mutumwi Paulo ndyaakacatwa akubekeshekwa mulandu ngwaatakwe kucita. Ino bakacita buyani?
9. Ino Beneklistu bamwi bakacita buyani Paulo ndyaakaangwa?
9 Mutumwi Paulo ndyaakaangwa ku Loma, Beneklistu bamwi muciindi ca batumwi bakacileka kusebensela pomwi anguwe. (2 Timo. 1:8, 15) Ino nceebonshi? Sa bakalinga kunyumfwa nsoni ceebo cakwaamba ayi bantu bakalinga kubona Paulo mbuli kapondo? (2 Timo. 2:8, 9) Sa mpashi bakalinga kuloonda ayi abalo batopenshekwa? Muli moonse mweenga cabeta, amuyeeyebo Paulo mbwaakalinyumfwa. Wakaliyumya mumapensho aanji alimwi wakabika buumi bwakwe mumapensho ceebo ca mbabo. (Milimo 20:18-21; 2 Koli. 1:8) Tatweelete kuba anga mbantu batakwe kucafwa Paulo paciindi ndyaakalinga kuyandika lucafwo! Ino nciinshi ncotweelete kwiibaluka na bamakwesu batotanjilila batopenshekwa?
10. Ino nciinshi ncotuteelete kuluba bamakwesu batotanjilila ndyebatopenshekwa, alimwi ino nceebonshi?
10 Mutalubi citupa kupenshekwa alimwi aulengesha ayi tunoopenshekwa. Lilembo lya 2 Timoti 3:12 lilaamba ayi: ‘Uyo woonse usuni kwikala mubuumi bwabu Lesa muli Klistu Yesu alaakupenshekwa.’ Aboobo tatweelete kukankamana kwaamba ayi Satana alisuni bunene kulwana bamakwesu batotanjilila. Alisuni kwaamba ayi bamakwesu aba bacileeke kushomeka kuli Yehova alimwi alisuni kutukoonga.—1 Pit. 5:8.
Nabi kwaamba ayi Paulo wakalinga mujeele, cakutaloonda Onesifolasi wakamucafwa. Munshiku shino, bamakwesu abenankashi balacafwa bashominyinaabo bali mujeele, bweenka mbotutoobona mucitondesho (Amubone mapalagilafu 11-12)
11. Ino nciinshi nceenga tweeya kucakubonenaako cakwe Onesifolasi? (2 Timoti 1:16-18)
11 Amutolelele kucafwa bashominyinaanu akushomeka kuli mbabo. (Amubelenge 2 Timoti 1:16-18.) Mwineklistu waliina lya Onesifolasi wakalingaako muciindi ca batumwi wakacita shipuseneeko paciindi Paulo ndyaakaangwa. ‘Taakwe kunyumfwa nsoni kwaamba ayi [Paulo] wakalinga mujeele.’ Sombi, Onesifolasi wakalangoola Paulo, alimwi ndyaakamucana, wakeelesha kumucafwa kucana shintu nshaakalinga kuyandika. Onesifolasi wakacita boobo, nabi kwaamba ayi wakalinga kubika buumi bwakwe mumapensho. Ino nciinshi ncetutokwiiyawo? Tatweelete kwaalilwa kucafwa bamakwesu batopenshekwa ceebo cakuloonda bantu. Sombi tulyeelete kucita shoonse nsheenga twacikonsha kwaamba ayi tubacaafwe. (Tus. 17:17) Balayandika kubatondesha lusuno akubacafwa.
12. Ino nshiinshi nsheenga tweeya kucakubonenaako ca bamakwesu abenankashi ku Russia?
12 Amuyeeye bamakwesu abenankashi ku Russia mbobatocafwilisha bashominyinaabo bakaangwa. Na bamwi batolwa mukoomboloshekwa kukooti, bamakwesu abenankashi baanji balacanikaako kwaamba ayi babayuminishe. Ino nciinshi ncetutokwiiyawo? Tatweelete kuloonda na bamakwesu batotanjilila bakabekeshekwa, kwaangwa, nabi kupenshekwa. Tulyeelete kubapaililaako, kulama mikwashi yabo, alimwi akulangoola nshila mbweenga twabacafwa.—Milimo 12:5; 2 Koli. 1:10, 11.
BAMWI NDYEBATOOTUSEKA
13. Ino kusekwa inga kwatupa buyani kutalika kutoonsha Yehova alibunga lyakwe?
13 Beshikamukowa bateshi Bakamboni, bantu mbotusebensaabo, na abo mbotwiiyabo kucikolo inga batuseka ceebo cakwaamba ayi tulashimikila akukonkela njiisho shakwe Yehova shiluleme. (1 Pit. 4:4) Mpashi inga baamba ayi: “Webo omwiine ndikusuni, ano bupailishi bwanu bulaciindilisha kuyuminisha milawo alimwi nshomukonkela nshakale kale abuumbi.” Bamwi inga baamba shibiibi pali ndiswe ceebo ca mbotucita na muntu wakushikwa mulibungano, mpashi inga baamba ayi: “Ino inga walyaamba buyani ayi ulatondesha lusuno?” Maswi mbuli aya inga atupa kutalika kutoonsha na milawo yakwe Yehova ililuleme. Mpashi inga twatalika kuliipusha ayi: ‘Sa Yehova alanangila kucita shintu nsheenga nshicikoonshi? Sa libunga lyakwe lilaciindilisha kuyuminisha milawo?’ Na ubo mbobukaalo mbomutokwiindaamo, ino inga mwacita buyani kwaamba ayi mutolelele kuba pafwiifwi a Yehova alimwi alibunga lyakwe?
Jobo wakakaka kushoma makani akubeca akalinga kwaamba baabo bakalinga kuliita ayi mbabye sombi bakalinga kumuseka. Wakalinga kushinishite kutolelela kushomeka kuli Yehova (Amubone palagilafu 14)
14. Ino tulyeelete kucita buyani na bamwi kabatuseka ceebo cakukonkela njiisho shakwe Yehova? (Kulumbaisha 119:50-52)
14 Amube bashinishite kutolelela kukonkela njiisho shakwe Yehova shiluleme. Jobo wakalinga musankwa ushinishite kukonkela njiisho shakwe Yehova shiluleme nabi bamwi ndyebakalinga kumuseka. Musankwa womwi wakalinga kulitondesha anga ngushicibusa wakwe wakalinga kusuni kumupa kushoma ayi Lesa taabikiliko maano na Jobo alashomeka kuli nguwe nabi sobwe. (Jobo 4:17, 18; 22:3) Sombi Jobo wakakaka kushoma makani aya akubeca. Wakalinga kucishi kwaamba ayi njiisho shakwe Yehova pamakani acibotu acibiibi shililuleme, alimwi wakalinga kushinishite kushikonkela. Taakalinga kusuniiwo kucileka kushomeka ceebo cakuyungwa abamwi. (Jobo 27:5, 6) Ino tutokwiiyawo nshi? Mutataliki kutoonsha njiisho shakwe Yehova ceebo cakwaamba ayi bamwi batoomuseka. Amuyeeye pashintu shakamucitikila mubuumi bwanu. Mpashi amwebo mwakabona kwaamba ayi buumi bwanu bwakaba kabotu ceebo cakukonkela njiisho shakwe Yehova. Aboobo amube bashinishite kuba kulubasu lwa libunga liyuminisha njiisho shakwe Yehova. Lyalo nabi bantu bakatuseke buyani, teshi tukacileeke kusebensela Yehova.—Amubelenge Kulumbaisha 119:50-52.
15. Ino nceebonshi ba Brizit bakalinga kubaseka?
15 Amuyeeye shakacitikila nankashi waliina lya Brizit ukala ku India. Beshikamukowa bakalinga kumuseka ceebo ca lushomo lwakwe. Ndyaakabombekwabo mu 1997, bebaye batakalinga Bakamboni bakakushikwa ncito. Aboobo bakasalawo kulongela kubashali babo pomwi aba Brizit alimwi abana babo banakashi. Sombi ba Brizit bakalinga kusa mukwiinda mumapensho aanji. Mukwiinga beebaabo tabakalinga kusebensa, ba Brizit bakalinga kweelete kusebensa ciindi cilaamfu kwaamba ayi bacafwe mukwashi. Kwiilikaawo, libungano lyakalinga pafwiifwi, pakalinga pakweenda makilomita ali 350. Cakabicaako, benemakwaabo bakatalika kubapikisha ba Brizit ceebo ca lushomo lwabo. Shintu shakabica abuumbi cakwaamba ayi ba Brizit amukwashi wabo bakalonga alimwi. Lyalo cakuteengashila beebaabo ba Brizit bakafwa. Mukuya kwaciindi, mwanaabo mwanakashi wakalinga kucitebo myaaka 12 wakafwa kubulwashi bwa kansa. Shintu shakeendaawo kubica mukwiinga beshikamukowa babo ba Brizit bakatalika kubalwiita ayi mbobakalengesha ayi ishi shicitike. Bakalinga kwaamba ayi naakwiinga tabana kuba Bakamboni, naakwiinga mapensho oonse taakwe kubacitikila. Nacibi boobo, bakatolelela kushoma Yehova alibunga lyakwe.
16. Ino nshoolwe nshi ba Brizit nshobakacana ceebo cakutolelela kushomeka kuli Yehova akulibunga lyakwe?
16 Mukwiinga ba Brizit bakalinga kukala kulaale alibungano, mutanjilili walubasu wakabayuminisha ayi banooshimikila kumusena nkobakala akucitila mabungano muŋanda yabo. Pakutaanguna bakalinyumfwa ayi ici cakalinga ciyumu abuumbi. Nacibi boobo, bakakonkela butanjilishi mbobakapekwa. Bakalinga kushimikilako bamwi makani abotu, kucita mabungano muŋanda yabo, alimwi akucana ciindi cakucita kulambila kwa mukwashi abana babo banakashi. Ino nshiinshi shakaswaamo? Ba Brizit bakacikonsha kuba ashiiyo sha Baibo shiinji alimwi baanji mbobakalinga kwiisha bakabombekwa. Mu 2005 bakatalika kusebensa bupainiya bwaciindi coonse. Bakacana shoolwe ceebo cakutolelela kushoma Yehova akushomeka kulibunga lyakwe. Bana babo banakashi batosebensela Yehova cakushomeka. Alimwi pacecino ciindi kumusena uku kuli mabungano obilo! Ba Britiz balishomete cakutatoonsha kwaamba ayi Yehova ngowakabapa nkusu shakucikonsha kuliyumya mumapensho ngobakeendaamo alimwi andyebakalinga kupikishikwa kubeshikamukowa.
AMUTOLELELE KUSHOMEKA KULI YEHOVA AKULIBUNGA LYAKWE
17. Ino nciinshi ncotweelete kuba bashinishite kucita?
17 Satana alisuni ayi tunooshoma ayi Yehova teshi akatucafwewo ndyetuli mumapensho alimwi ayi kutolelela kuba mulibunga lyakwe inga kwapabo buumi bwesu kuyuminaako. Satana alisuni ayi tunoloonda na bamakwesu batotanjilila babekeshekwa, kupenshekwa, nabi kwaangwa. Alimwi kwiinda mukusekwa kubamwi, Satana alisuni ayi tunotoonsha njiisho shakwe Yehova alibunga Lyakwe. Nacibi boobo, tulishishi kabotu nshila shakwe shibiibi alimwi inga tatubecekwi. (2 Koli. 2:11) Amube bashinishite kukaka bubeshi bwakwe Satana akutolelela kushomeka kuli Yehova alibunga Lyakwe. Mutaluubi kwaamba ayi Yehova teshi akamulekeleshewo. (Kulu. 28:7) Aboobo, mutasuminishi cili coonse kumupansaanya kuli Yehova!—Loma. 8:35-39.
18. Ino tulaakubandika nshi mumutwi utokonkelaawo?
18 Mumutwi uyu, twabandika mapensho ngweenga twacaana kuswa kubantu bateshi bakamboni. Nacibi boobo, kushoma Yehova alibunga lyakwe inga kweeleshekwa abaabo mbotuli abo mulibungano. Ino inga twacita buyani kwaamba ayi tukome mapensho ayo? Tulaakubandika makani aya mumutwi utokonkelaawo.
LWIIMBO 118 “Amutunungileko Lushomo”
a Kwaamba ayi tucikoonshe kuliyumya cakushomeka munshiku shino shakweelaako, tulyeelete kutolelela kushoma Yehova alibunga lyakwe. Satana alasebensesha mapensho kwaamba ayi tucileeke kushoma Yehova alibunga lyakwe. Mumutwi uyu tutobandika shintu shotatwe Satana nshaasebensesha alimwi ansheenga twaciita kwaamba ayi tutolelele kushoma Yehova alibunga lyakwe.
b Meena amwi akaalulwa.