1-2. (a) Ino njimiipusho nshi njeshi tubandike? (b) Ino nciinshi citondesha ayi Yehova alisunishishi kutucafwa?

 YEHOVA inga watucafwa kuliyumya ndyetutokwiinda mumapensho akuba basangalete ndyetutomusebensela. Ino alatucafwa buyani? Ino inga twacita buyani kwaamba ayi tufubileemo abuumbi mulucafwo ndwaatupa? Tutobandika shikumbulo kumiipusho iyi mumutwi uyu. Ano katutana kubandika pamiipusho iyi, amuleke tubandike mwiipusho uyu: Sa ncakwiila Yehova alisunishishi kutucafwa?

² Liswi mutumwi Paulo ndyaakasebensesha munkalata njaakalembela bene Ebulu inga lyatucafwa kucana cikumbulo. Paulo wakalemba ayi: ‘Yehova ngomucafwi wangu; teshi nkaloondeewo. Ino muntu inga wancitanshi?’ (Ebu. 13:6) Kweelana a makani asansulula shamu Baibo, liswi lyakwaamba ayi “mucafwi,” ndyetucana muvesi iyi, lilasansulula muntu ufwambaana kuya mukucafwa umwi utoyandika lucafwo. Amuyeeye Yehova mbuli muntu ufwambaana kusa mukucafwa muntu uli mumapensho. Ncakutatoonsha busansulushi ubu bulatondesha ayi Yehova alisunishishi kutucafwa. Kwiinda mulucafwo lwakwe Yehova, inga twacikonsha kuliyumya calusangalalo ndyetutokwiinda mumapensho.

3. Ino ni nshila nshi shotatwe Yehova mbwaatucafwa kuliyumya calusangalalo ndyetutokwiinda mumapensho?

³ Ino Yehova alatucafwa buyani kuliyumya calusangalalo ndyetutokwiinda mumapensho? Kwaamba ayi tucane cikumbulo, amuleke tubandike makani ngotucana mulibuku lyakwe Isaya. Ino nceebonshi? Makani aanji abushinshimi Isaya ngakalemba alasebensa kubasebenshi bakwe Lesa munshiku shino. Kwiilikaawo, Isaya liinji alaamba pali Yehova kusebensesha maswi atashupi kunyumfwisha.  Kucakubonenaako, mu capita 30 Isaya wakasebensesha shikoshanyo shibotu kusansulula Yehova mbwaacafwa bantu bakwe. Wakalemba ayi Yehova alatucafwa kwiinda (1) mukukutika cakubikila maano alimwi akukumbula mipailo yesu, (2) mukututanjilila, alimwi (3) akutupa shoolwe pacecino ciindi akunembo. Amuleke tubandike nshila shotatwe ishi Yehova mbwaatucafwa.

4. (a) Ino Yehova wakabasansulula buyani baJuda bamuciindi cakwe Isaya, alimwi ino nciinshi ncaakalekela kucitika mukuya kwaciindi? (b) Ino Yehova wakashomesha nshi ku baJuda bakalinga kushomeka? (Isaya 30:18, 19)

⁴ Kumatalikilo a Isaya capita 30, Yehova wakaamba baJuda ayi “beshicimpamya,” ‘balundika shibiibi peculu lya shibiibi.’ Alimwi wakaamba ayi: ‘Bantu aba mbaashu, . . . batalibambite kunyumfwila milawo yakwe Yehova.’ (Isa. 30:1, 9) Mukwiinga bantu bakakaka kunyumfwila, Isaya wakaambila limwi ayi Yehova alaakubalekela kwiinda mumapensho. (Isa. 30:5, 17; Jele. 25:8-11) Alimwi ishi nsheshakacitika ndyebakatolwa mubusha ku Babiloni. Nacibi boobo, kwakalinga baJuda bamwi bashomeka pakati kabo, alimwi Isaya wakalinga kucite makani akulangila kuli mbabo. Wakabalwiita ayi bushiku bumwi Yehova alaakupa kwaamba ayi bakaboolele alimwi ku Jelusalemu. (Amubelenge Isaya 30:18, 19.) Alimwi ishi nsheshakacitika. Yehova wakabaangulula kuswa mubusha ku Babiloni. Nacibi boobo, pakeenda myaaka iinji kwaamba ayi Yehova abakushe mubusha. Maswi akwaamba ayi “Yehova atoolindila cakukalika moyo kwaamba ayi amunyumfwile nkumbu” alatondesha ayi palaakwiinda ciindi kwaamba ayi bashomeka balubulwe. Bene Isilaeli bakekala myaaka 70 ku Babiloni bamwi kabatana kusuminishikwa kuboolela ku Jelusalemu. (Isa. 10:21; Jele. 29:10) Bene Isilaeli ndyebakalinga basha ku Babiloni bakalinga kulila mukwiinga tabakalinga kusangalete, ano ndyebakaboolela kucishi cinemishaabo, bakalila ceebo cakukondwa abuumbi.

5. Ino nga maswi nshi ayuminisha ngotucana palilembo lya Isaya 30:19?

⁵ Munshiku shino inga twayuminishikwa amaswi akwaamba ayi: ‘Ulaakukunyumfwila luse bushiku mbweshi ukamulilile ayi akucaafwe.’ (Isa. 30:19) Isaya wakalemba maswi atotucafwa kushoma kwaamba ayi Yehova alaakukutika cakubikila maano na twamulilila, alimwi alaakufwambaana kukumbula mipailo yesu. Alimwi wakaamba ayi: ‘Aakunyumfwabo kusenga kwako, alaakukukumbula.’ Maswi ayuminisha aya alatwiibalusha ayi Ishiwesu alisunishishi abuumbi kucafwa baabo basenga lucafwo kuli nguwe. Kushiba cancine ici kulatucafwa kuliyumya calusangalalo.

6. Ino nga maswi nshi Isaya ngakalemba atondesha ayi Yehova alakutika kumupailo wa musebenshi wakwe womwi awomwi?

⁶ Ino nciinshi cimwi nceenga tweeya muvesi iyi pamakani amipailo yesu? Yehova alakutika cakubikila maano kumipailo yesu. Ino nceebonshi nceenga twaambila boobo? Lubasu lwakutaanguna lwa capita 30, lulatondesha ayi Yehova wakalinga kubandika kubantu bakwe mbuli likoto. Ano muvesi 19 muli liswi lyakwaamba ayi ‘webo’ mukwiinga makani atolansha kumuntu womwi awomwi. Isaya wakalemba ayi: ‘Webo teshi ukalilewo tubili sobwe’; ‘alaakukunyumfwila luse’; ‘alaakukumbula.’ Mukwiinga Yehova ngu Ishiwesu shilusuno, talwiiti bana bakwe batolinyumfwa kulefuka ayi, “Ulyeelete kuyuma bweenka mbuli bamakwanu.” Muciindi cakucita boobo, Yehova alabikila maano kumuntu womwi awomwi akukutika mipailo yesu cakubikila maano.​—Kulu. 116:1; Isa. 57:15.

7. Ino nshiinshi Isaya a Yesu nshebakaamba shitondesha kwaamba ayi kutolelela kupaila kulayandika?

⁷ Na twapaila kuli Lesa akumulwiita pacintu cimwi citootupensha, Yehova mpashi inga wataanguna kutupa nkusu nsheenga twayandika kwaamba ayi tucikoonshe kuliyumya. Alimwi na  mapensho ngotutokwiindaamo atolelela kwaciindi cilaamfu, inga twayandika kupaila kuli Yehova mankanda aanji kwaamba ayi atupe nkusu shakuliyumya. Alatwiita ayi inga twacita boobo. Uyu ngomuyeeyo ngotucana mu maswi akaamba Isaya ayi: “Mutaleki [Yehova] kookesha.” (Isa. 62:7, NWT) Ino ici cilaamba nshi? Tulyeelete kutolelela kupaila kuli Yehova cakwaamba ayi twaba anga tatutoomupa ciindi cakookesha. Maswi akalemba Isaya alatwiibalusha cikoshanyo Yesu ncaakaamba pamakani akupaila ncetucana pa Luka 11:8-10, 13. Palilembo ili Yesu wakatuyuminisha kutolelela kupaila alimwi akutolelela kusenga mushimu usalashi. Alimwi inga twasenga Yehova kututanjilila kwaamba ayi tunoosala kabotu shakucita.

8. Ino maswi ngotucana palilembo lyakwe Isaya 30:20, 21 akakumanishikwa buyani muciindi cakale kale?

⁸ Amubelenge Isaya 30:20, 21. Bashilumamba ba bene Babiloni bakashinguluka ndabala ya Jelusalemu kwa mwaaka womwi amyeenshi 6, bantu bakalinga bashibila kukala mubuumba cakwaamba ayi bwakalingabo anga ngu shinkwa amaanshi. Sombi kweelana a vesi 20 alimwi a 21, Yehova wakashomesha baJuda ayi na bakaane akwaalula mibo yabo, alaakubapulusha. Isaya wakaamba ayi Yehova ngu “Mufundishi wabo Munene” alimwi wakashomesha bantu ayi Yehova alaakubaiisha bwa kumulambila munshila njaasuni. Maswi aya akakumanishikwa baJuda ndyebakaswa mubusha. Yehova wakatondesha ayi wakalinga Mufundishi wabo Munene alimwi kwiinda mubutanjilishi bwakwe, bantu bakwe bakacikonsha kutalika alimwi kulambila kusalalite. Tulikondetwe abuumbi munshiku shino kwaamba ayi Yehova ngo Mufundishi wesu Munene.

9. Ino ni nshila nshi yakutaanguna mbotutambula butanjilishi bwakwe Yehova?

⁹ Mumavesi aya, Isaya wakaamba ayi tuli anga mbashikwiiya batokwiishikwa a Yehova munshila shobilo. Cakutaanguna Isaya wakaamba ayi: “Mulaakubona Mufundishi wanu Munene ameenso aanu.” Mucikoshanyo ici Isaya wakaamba ayi Mufundishi aliimfwi kunembo lya bashikwiiya bakwe. Tulicite coolwe kwaamba ayi tulayiishikwa a Lesa. Ino Yehova alatwiisha buyani? Alacita boobo kwiinda mulibunga lyakwe. Tulalumba abuumbi pabutanjilishi buli kabotu mbotutambula kuswa kulibunga lyakwe Yehova! Butanjilishi mbotutambula kumabungano ansondo ansondo, kukubungana kunene, kubungana kwalubasu, mabuku, mapulogilamu apa bulodikasiti, anshila shimwi shilatucafwa kuliyumya calusangalalo ndyetutokwiinda mumapensho.

10. Ino tulanyumfwa buyani ‘liswi kuswa kwisule [lyesu]’?

 ¹⁰ Isaya wakaamba nshila yabili Yehova mbwatwiisha. Wakaamba ayi: ‘Mulaakunyumfwa liswi kuswa kwisule lyanu.’ Apa Isaya wakaamba ayi Yehova ali anga ngu mufundishi ubikila maano utokonkela bashikwiiya bakwe mwisule, utoobatanjilila kwiinda mukubalwiita nshila njobeelete kukonkela. Munshiku shino, tulanyumfwa liswi lyakwe Lesa kwisule lyesu. Munshila nshi? Maswi akwe Lesa akatanjililwa amushimu ngotucana mu Baibo, akalembwa kale kale abuumbi, na muciindi cakwisule. Aboobo na twabelenga Baibo, cilibo anga tutokutika liswi lyakwe Lesa kwisule lyesu.​—Isa. 51:4.

11. Ino nshiinshi nshotweelete kucita kwaamba ayi tucikoonshe kuliyumya calusangalalo, alimwi ino nceebonshi?

¹¹ Ino inga twacita buyani kwaamba ayi tunoofubilaamo abuumbi mubutanjilishi bwakwe Yehova mbotutambula kuswa ku libunga lyakwe alimwi a Maswi akwe? Amubone shintu shobilo Isaya nshaakaamba. Cakutaanguna wakaamba ayi, “nshila iluleme njeeyi.” Cabili wakaamba ayi, “amukonkele njiyo.” (Isa. 30:21) Tatweelete kweelabo pakushiba “nshila.” Sombi tulyeelete ‘kwikonkela.’ Kwiinda mu Maswi akwe Yehova alimwi anshetwiiya kuswa kulibunga lyakwe, tulashiba Yehova nshaasuni ayi tucite. Alimwi tuleeya ambweenga twakonkela nshetwiiya. Tulyeelete kucita shoonse shobilo kwaamba ayi tucikoonshe kuliyumya calusangalalo ndyetutosebensela Yehova. Inga twashoma cakutatoonsha kwaamba ayi alaakutupa shoolwe na katwiiya akukonkela nshetwiiya.

12. Kweelana a Isaya 30:23-26, ino nshoolwe nshi Yehova nshaakapa bantu bakwe?

¹² Amubelenge Isaya 30:23-26. Ino bushinshimi ubu bwakakumanishikwa buyani ku baJuda bakaboolela kucishi ca bene Isilaeli pesule lyakuswa mubusha ku Babiloni? Yehova wakabapa shintu shiinji kwaamba ayi shibacaafwe kuba abuumi akutolelela kumusebensela. Yehova wakapa bantu bakwe shakulya shiinji. Alimwi ciyandika abuumbi, wakabapa shintu shoonse nshobakalinga kuyandika kwaamba ayi bayumye bushicibusa bwabo anguwe akutalika alimwi kumulambila munshila yeelete. Bantu bakwe Lesa paciindi cilya bakatambula shoolwe shiinji abuumbi kuswa kuli Lesa nshebatana kutambulawo kale. Maswi ngotucana muvesi 26 alatondesha ayi Yehova wakabacafwa abuumbi kunyumfwishisha Maswi akwe. (Isa. 60:2) Shoolwe Yehova nshaakapa basebenshi bakwe shakabacafwa kutolelela kumusebensela calusangalalo alimwi cakushinisha ‘ceebo cakukondwa kwakalinga mumyoyo yabo.’​—Isa. 65:14.

13. Ino bushinshimi bwaamba pa kuboosha kulambila kusalalite bwakakumanishikwa buyani munshiku shino?

 ¹³ Sa bushinshimi bwaamba pa kuboosha kulambila kusalalite aswebo bulatukuma munshiku shino? Ncakutatoonsha! Ano ino munshila? Kuswabo mu 1919 C.E., bantu baanji bakaswa mubusha bwa Babiloni Munene, na bupailishi boonse bwakubeca. Bakatanjililwa kumusena wiinditewo Cishi Cakashomeshekwa ca bene Isilaeli. Bakatanjililwa mu paladaiso yakumushimu. (Isa. 51:3; 66:8) Ino paladaiso yakumushimu iyi nciinshi?

14. Ino paladaiso yakumushimu nciinshi, alimwi ino mbaani bekalaamo? (Amubone makani ali palubasu lwa Kusansulula Maswi.)

¹⁴ Kuswabo mu 1919 C.E., bananikitwe balisangalete kukala mu paladaiso yakumushimu. b Mukuya kwaciindi, ba “mbelele shimwi” abo batolangila kukala pacishi capanshi, abalo bakenjila mu paladaiso yakumushimu akucana shoolwe shiinji kuswa kuli Yehova.​—Joni 10:16; Isa. 25:6; 65:13.

15. Ino paladaiso yakumushimu ilacanika kuli?

¹⁵ Ino paladaiso yakumushimu ilacanika kuli munshiku shino? Basebenshi bakwe Yehova balacanika kuli koonse pacishi capanshi. Aboobo paladaiso yakumushimu mobakala ilacanika nsengwe yoonse. Aboobo kuli koonse nkweenga twaba pacishi capanshi, inga twaba lubasu lwabaabo bali mu paladaiso yakumushimu kulilabo na katusebensa cankusu mukulambila kwancine.

16. Ino inga twacita buyani kwaamba ayi tutolelele kubikila maano kububotu bwa paladaiso yakumushimu?

¹⁶ Cintu comwi ncotweelete kucita kwaamba ayi tutolelele kuba mu paladaiso yakumushimu, nkutolelela kutondesha kulumba pacoolwe cakuba lubasu lwa libungano lya Bwineklistu licanika nsengwe yoonse. Ino nshiinshi nsheenga twaciita kwaamba ayi tutondeshe kulumba? Inga twatondesha kulumba kwiinda mukubikila maano kumibo ibotu ya bamakwesu abenankashi muciindi cakulanga bunene pashilubo shabo. (Joni 17:20, 21) Ino nceebonshi kucita boobo kulayandika? Amuyeeye cikoshanyo ici. Na twaya mu paki, na mu gaadeni, tulalangila kubona shisamu na shishango shipusenepusene. Ubu mbocibete amumabungano esu, muli bantu bapusenepusene  bweenka mbuli shisamu shipusenepusene. (Isa. 44:4; 61:3) Tulyeelete kutolelela kubikila maano ku mbasu womwi awomwi nshaacita kabotu muciindi ca kulangilishabo pashilubo sha bamwi. Tatweelete kusuminisha kutacita kabotu kwesu na kwa bamwi kutupa kwaalilwa kubona bubotu bwa libunga lya Bwineklistu licatene nsengwe yoonse.

17. Ino inga twacita buyani kwaamba ayi tutolelele kubikila maano kububotu bwa paladaiso yakumushimu?

¹⁷ Ino nciinshi nceenga womwi awomwi wacita kwaamba ayi mulibungano mutolelele kuba lucatano? Inga twaba bantu bayuminisha luumuno. (Mate. 5:9; Loma. 12:18) Lyoonse na twataanguna kucitawo comwi kwaamba ayi tunoonyumfwana abamwi mulibungano, nkokwaamba ayi tutobotesha paladaiso yakumushimu. Tulatolelela kwiibaluka kwaamba ayi Yehova ngowakaleta muntu uli woonse uli mu kulambila kusalalite kwamu paladaiso yakumushimu. (Joni 6:44) Amuyeeyebo Yehova mbwaakondwa na watubona katusebensa cankusu kwaamba ayi tuyuminishe luumuno alucatano pakati ka basebenshi bakwe, bayandika abuumbi kuli nguwe!​—Isa. 26:3; Aga. 2:7.

18. Ino nciinshi ncotweelete kutolelela kukutumana kuyeeyawo, alimwi ino nceebonshi?

¹⁸ Yehova alapa basebenshi bakwe shoolwe shiinji. Aboobo ino inga twacita buyani kwaamba ayi tufubileemo abuumbi mushoolwe nshaatupa? Inga twakutumana akuyeeya cakubikila maano pashintu nshetwiiya mu Maswi akwe Lesa, amumabuku esu aamba shamu Baibo. Kucita boobo kulaakutucafwa kuba amibo ya Bwineklistu iyo yeshi ikatucafwe kutondesha lusuno lwancinencine mulibungano mbuli banabankashi. (Loma. 12:10) Kuyeeya pashoolwe Yehova nshaatootupa pacecino ciindi kulaakutucafwa kuyumya bushicibusa bwesu anguwe. Alimwi kuyeeya pashoolwe nsheshi akatupe kunembo kulaakutucafwa kushoma kwaamba ayi tulaakucikonsha kutolelela kusebensela Yehova kwamuyayaya. Ishi shoonse shilaakutucafwa kutolelela kusebensela Yehova calusangalalo.

19. (a) Kweelana a Isaya 30:18, ino nciinshi nceenga twashoma cakutatoonsha? (b) Ino nciinshi ceshi cikatucaafwe kuliyumya calusangalalo?

¹⁹ Yehova “alaakunyamuka” kwaamba ayi atucaafwe paciindi ndyeshi akanyonyoole cishi cibiibi ici. (Isa. 30:18, NWT) Tulishomete cakutatonsha kwaamba ayi Yehova ngu ‘Lesa ucita shiluleme’ aboobo teshi akaleke cishi cakwe Satana kutolelela kwaciindi cilaamfu. (Isa. 25:9) Tutolindila cakukalika moyo pomwi a Yehova kwaamba ayi bushiku bwa kupulushikwa bukashiike. Aboobo pacecino ciindi, tulishinishite kutolelela kutondesha kulumba pacoolwe cakupaila, kwiiya, kukonkela nshetwiiya mu Maswi akwe Lesa, alimwi akukutumana kuyeeya pashoolwe nshetucite. Na tukacite boobo, Yehova alaakutucafwa kuliyumya calusangalalo ndyetutomusebensela.