Ndakashalwa mu 1948 mumushi uniini wakalinga kulubasu lwaku malenge lwa cishi ca Nigeria. Paciindi ici, bayama ba Moustapha, bata banike alimwi a Wahabi munene wangu musankwa, bakabombekwa mbuli Bakamboni Bakwe Yehova. Ndyendakalinga kucite myaaka 9, bata bakafwa. Cakancisa kumoyo abuumbi. Wahabi wakandwiita ayi tulaakubabona alimwi bata na bakabushikwe. Maswi aya ayuminisha akapa kwaamba ayi ntalike kwiiya Baibo. Lyalo mu 1963 ndakabombekwa. Ndyepakeendabo ciindi ciniini, banike bangu botatwe abalo bakabombekwa.

Mu 1965, ndakaya ku Lagos akutalika kukala a Wilson munene wangu. Alimwi ndakalinga kusangalala kuba pomwi abapainiya baciindi coonse bamu Libungano lya Igbobi. Ndakayuminishikwa abuumbi kubona mbobakalinga kusangalete ambobakalinga kusebensa cankusu, cakwaamba ayi mu January 1968, anebo ndakatalika bupainiya bwaciindi coonse.

Mukwesu Albert Olugbebi uyo wakalinga kusebensela pa Bethel, wakabamba kubungana kulibetele kwaamba ayi abandike andiswe sobacanike pamakani akuyandika kwa bapainiya balibetele kulubasu lwa kumatwa lwa cishi ca Nigeria. Nciibaluka maswi ayuminisha Mukwesu Olugbebi ngaakaamba ayi: “Muli bacanike, alimwi inga mwasebensesha ciindi ankusu shanu muncito yakwe Yehova. Kuli shiinji nsheenga mwaciita muncito yakwe!” Ndakalinga kusuni kukonkela cakubonenaako  cakwe Isaya akuya kuli koonse nkweenga bantuma. Aboobo ndakalemba foomu yakutalika kusebensa bupainiya bulibetele.—Isa. 6:8.

Mu May 1968, bakantuma kuya mukusebensa mbuli painiya ulibetele mu tauni ya Kano iyo yakalinga kumatwa lya cishi ca Nigeria. Ici cakalinga nciindi ndyekwakalinga nkoondo iitwa ayi Biafran, iyo yakalingaako kuswa mu 1967 kushika mu 1970. Bantu baanji bakalinga kukala kumatwa lya Nigeria bakapenga abuumbi ceebo cankondo iyi alimwi baanji bakafwa. Lyalo nkoondo iyi yakatalika akwicwe lya cishi ca Nigeria. Mukwesu umwi wakalinga kusuni ayi ntayiiko mukwiinga taakalinga kusuniiwo ayi banciise. Sombi ndakamulwiita ayi: “Twalumba pakumbikilako maano. Nacibi boobo, na Yehova nkwaasuni ayi njemukusebensela, ndishomete ayi alaakuncafwa.”

Ndakalinyumfwa cibiibi ndyendakabona shintu mboshakanyonyooka mu Kano. Tauni iyi yakanyonyooka abuumbi ceebo ca nkoondo yakalingaako. Cimwi ciindi na tutoshimikila, twakalinga kucana bantu bafwite abo bakacaikwa munkoondo. Nabi kwaamba ayi mu Kano mwakalinga mabungano aanji, bamakwesu baanji bakacicaamo mu tauni iyi. Mwakacaalabo beshikushimikila mpashi batashiki ku 15 abo bakalinga kuloondete alimwi bakalinga kulefukite. Ndyetwakashika sobapainiya balibetele bali 6, bamakwesu abenankashi aba bakasangalala abuumbi. Twakabayuminisha alimwi bakanyumfwa kabotu. Twakabacafwa kutalika alimwi kubungana akushimikila. Alimwi bakatalika kutuma malipooti abo akunooda mabuku kumusampi.

Sobapainiya balibetele twakatalika kwiiya mushobo wa ciHausa. Bantu baanji bakumusena uku bakalinga kukutika ku makani a Bwaami, ceebo cakwaamba ayi twakalinga kwaamba mushobo wabo. Nacibi boobo, bamwi bakalinga mubupailishi bwakalinga kumusena uku, tabakalinga kunyumfwa kabotu kutubona katushimikila. Aboobo twakalinga kweelete kucenjela abuumbi. Bushiku bumwi ndyetwakalinga kushimikila amukwesu umwi, musankwa umwi wakalinga kucite naifi wakatutandaanya. Sombi twakapuluka mukwiinga twakacica abuumbi cakwaamba ayi twakamushiya! Nabi kwaamba ayi cimwi ciindi buumi bwesu bwakalinga kuba mumapensho, Yehova wakatucafwa “kukala cakuliiba,” alimwi beshikushimikila bakatalika kufula. (Kulu. 4:8) Pacecino ciindi, mu tauni ya Kano muli beshikushimikila beendilila 500 abo bali mumabungano ali 11.

Mu August 1968, pesule lya kukalabo kwa myeenshi iniini mu Kano, nebo abapainiya balibetele bamwi bobilo, bakatutuma kuya mukusebensela ku Niamey, tauni inene yamucishi ca Republic of Niger. Kapatana kwiinda aciindi cilaamfu, twakesa mukushiba ayi pashishi shakalinga kumbo lya Africa, cishi ca Niger ncishi comwi pashishi mwakalinga kulungula abuumbi. Kwiilika pakwiiya kushibila kulungula, twakalinga kweelete kwiiya amushobo wa ciFrench bantu baanji ngobakalinga kwaamba. Nabi kwaamba ayi tacakalinga cuubu, twakacinka manungo muli Yehova akutalika kushimikila mutauni iyi pomwi abeshikushimikila bamwi baniini bakalinga kukalaamo. Muciindi ciniinibo, bantu baanji bakalinga kucishi kubelenga abo bakalinga kukala ku Niamey, bakapekwa libuku ndyetwakalinga kusebensesha pakwiisha bantu Baibo lya The Truth That Leads to Eternal Life. Alimwi bamwi bakalinga kusa kuli ndiswe kwaamba ayi tubape libuku!

Ndyepakeendabo ciindi ciniini, twakesa mukushiba ayi bacinenenene bamumfulumeende tabakalinga kubasuniiwo Bakamboni Bakwe Yehova. Mu July 1969, kwaciindi cakutaanguna twakaba akubungana kwalubasu mucishi ici, uko kwakacanika bantu bali 20. Twakalinga kulangila kubona beshikushimikila bobilo abo bakalinga kusa mukubombekwa. Nacibi boobo, pabushiku bwakutaanguna bwakubungana uku, bakapokola bakesa mukutukasha kubungana. Bakacata bapainiya balibetele amutanjilili walubasu akubatola ku polisi. Pesule lya kutwiipusha miipusho, bakatulwiita ayi tukabooleleeko alimwi ku polisi bushiku bwakakonkelaawo. Twakashiba ayi bakapokola inga batupensha abuumbi, aboobo twakabamba bubaambo bwakwaamba likani lyakubombekwa muŋanda ya mukwesu umwi, akubombeka beshikushimikila bobilo cabushishi mumulonga.

Ndyepakeendabo nsondo shiniini, bamumfulumeende bakatulwiita ayi nebo abapainiya bamwi bali 5, tusweemo mucishi ca Niger. Bakatupabo nshiku shobilo kwaamba ayi tusweemo mucishi ici, alimwi twakalinga kweelete kushiba bwakweenda sobeene kwaamba ayi tuboolele ku Nigeria. Twakasumina alimwi twakeendililabo kuya ku ofesi ya musampi waku Nigeria, uko nkobakatupa ncito shimwi.

Bakantuma kuya mukusebensela mu Orisunbare, mushi wamu Nigeria, uko nkondakalinga kusangalala kushimikila pomwi alikoto liniini lya beshikushimikila bakalinga kukala mumushi uyu. Sombi ndyepakeenda myeenshi 6, baku ofesi yamusampi bakandwiita ayi mboolele alimwi ku Niger. Pakutaanguna ndakakankamana akuloonda, sombi ndakalinga kusunishishi kuya mukubonana alimwi abamakwesu ku Niger!

Ndakaboolela ku Niamey. Ndipakeendabo bushiku bomwi kuswa ndyendakashika, musankwa umwi waku Nigeria ucita shamakwebo, wakashiba ayi ndi Kamboni alimwi wakatalika kunjipusha miipusho pamakani amu Baibo. Ndakatalika kumwiisha Baibo, alimwi ndyaakacileka kufweba akunwa bwalwa abuumbi, wakabombekwa. Kuswawaawo, ndakalinga kusangalala kushimikila mumisena ipusenepusene yamucishi ca Niger pomwi abamakwesu abenankashi, akubona bantu mbobakatalika kwiiya cancine paniini paniini. Ndyendakashikabo, mucishi ici mwakalinga Bakamboni bali 31; lyalo ndyendakaswaako, bakalinga 69.

Mu December 1977, ndakaboolela ku Nigeria kwaamba ayi banjiishe bwakusebensa ncito imwi. Pesule lyakwiishikwa kwa nsondo shotatwe, Mukwesu Malcolm Vigo uyo wakalinga shikubunganya Komiti Yamusampi, wakandwiita ayi mbelenge nkalata yakaswa ku musampi waku Sierra Leone. Bamakwesu bakalinga kusuni mukwesu ucite buumi buli kabotu, painiya uteebete waamba Cisungu a ciFrench kwaamba ayi asebense mbuli mutanjilili walubasu ku Guinea. Mukwesu Vigo wakandwiita ayi bakalinga kunjiisha bwakusebensa ncito iyi. Alimwi wakaamba cakuteenda mweela ayi nincito iyumu. Wakandwiita ayi: “Yeeyawo cakubikila maano kootana kusumina.” Peenkaapo ndakaamba ayi, “Ntooya, mukwiinga Yehova ngwaatontuma.”

Ndakatanta ndeke kuya ku Sierra Leone, akubonana abamakwesu bakalinga pa ofesi yamusampi. Mukwesu womwi wamu Komiti Yamusampi wakandwiita ayi, “Tatucishi shiinji pamakani ancito ya bwaami mucishi ca Guinea.” Nabi kwaamba ayi musampi uyu ngowakalinga kutanjilila ncito yakushimikila mucishi ca Guinea, tacakalinga kukonsheka kubandika abeshikushimikila ceebo ca shoongo sha beshimapolitiki shakalingaako mucishi ici. Mankanda aanji bakeelesha kutuma mukwesu kuya mukufwakashila bamakwesu bamu Guinea, sombi tacakalinga kukonsheka. Aboobo bamakwesu bakandwiita ayi nje ku Conakry, tauni inene ya mucishi ca Guinea, kwaamba ayi mbwese cipepa cakusuminishikwa kukala mucishi.

Ndyendakashika ku Conakry, ndakaya kumaofesi abaabo beemikaninaako cishi ca Nigeria, akubandika amunene waku maofesi aya. Ndakamulwiita ayi ndisunishishi kutalika kushimikila mu Guinea. Wakandwiita ayi ntekaali mucishi ici mukwiinga inga ndaangwa na kuumwa. Wakaamba ayi, “Boolela ku Nigeria uye ushimikile nkuko.” Lyalo ndakamukumbula ayi, “Ndishinishite kukala mucishi cino.” Aboobo wakalembela nkalata munene ulanga pamakani ashicitika mucishi ca Guinea, alimwi munene uyo wakansuminisha kukala mucishi ici.

Ndipakeendabo ciindi ciniini, ndakaboolela ku ofesi yamusampi waku Sierra Leone akulwiita bamakwesu munene uyu ncaakasalawo kucita. Bamakwesu bakasangalala abuumbi ndyebakanyumfwa Yehova mbwakancafwa kweenda kabotu. Mfulumeende yakansuminisha kukala mucishi ca Guinea!

Kuswa mu 1978 kushika mu 1989, ndakasebensa mbuli mutanjilili walubasu mucishi ca Guinea, mu Sierra Leone, alimwi mbuli shikucafwilisha mutanjilili walubasu mu Liberia. Pakutaanguna, liinji ndakalinga kuciswa. Alimwi cimwi ciindi ndakalinga kuciswa na ndi kumisena yakulaale atauni. Sombi bamakwesu bakalinga kucita nsheenga bacikonsha kwaamba ayi bantole kucipatela.

Paciindi cimwi, ndakalinga ndaciswa malelya abuumbi ansokaanda mumala. Ndyendakoola, ndakesa mukushiba ayi bamakwesu bakalinga kubandika nkweenga bambika na ndafwa! Nabi kwaamba ayi ndakalinga mubukaalo ubu buloondesha, nshindakalinga kuyeeyawo kucileka kusebensa ncito yakufwakashila mabungano. Ndishomete cakutatoonsha ayi Yehova eenkabo ngweenga watushilitilisha kabotu, mukwiinga lakwe inga watubusha nabi twafwa.

Mu 1988, ndakashibana aba Dorcas nankashi painiya uyo usuni Yehova abuumbi alimwi uliceesha. Twakeebana alimwi twakatalika kusebensela pomwi  muncito yakufwakashila mabungano. Ba Dorcas bakalinga kusebensa cankusu alimwi bakalinga kulyaaba muncito yakwe Yehova. Cimwi ciindi twakalinga kweenda mishinso ya makilomita ali 25 kuswa palibungano lyomwi kuya ku limwi, katunyamwite shoola shesu. Na tutoya kumabungano ali kulaale, twakalinga kusebensesha nshila ili yoonse ya bwakweenda, kwiinda munshila mwakalinga kuba matipa ashilindi.

Ba Dorcas ngumuntu utaloondi. Kucakubonenaako, cimwi ciindi twakalinga kwiinda pamilonga mwakalinga ntale. Ndyetwakalinga palweendo lumwi lwanshiku shili 5, mabiliji ashisamu akalinga pamulonga akanyonyooka. Aboobo twakalinga kweelete kusebensesha tumaato. Ba Dorcas ndyebakalinga kusuni ayi baswe mu kabwaato, bakawita mumaanshi. Soonse sobilo tatwakalinga kucishiiwo kusamba njabwe, alimwi mumulonga uyo mwakalinga ntale. Cakabota ncakwaamba ayi, basankwa bamwi bacanike bakaliwaalaamo mumaanshi akubapulusha. Soonse sobilo twakalinga kuba ashiloto shiloondesha na twayeeya pashakacitika, sombi twakatolelela kusebensa ncito yesu.

Kumatalikilo amwaaka wa 1992, twakakankamana abuumbi ndyetwakashiba ayi ba Dorcas bali pakati. Twakalinga kweelete kusalawo na inga twatolelela kusebensa mbuli bapainiya balibetele. Twakayeeya ayi, “Yehova watupa cipo!” Aboobo mwaneesu twakasalawo kumutumba liina ayi Jahgift (liina mu Cisungu lisansulula ayi “Cipo kuswa kuli Yehova”). Ndipakeenda myaaka 4 kuswa ciindi Jahgift ndyaakashalwa, Eric mwanike wakwe musankwa wakashalwa. Bana besu boonse bobilo nshipo kuswa kuli Yehova. Jahgift wakasebenselaawo pa ofesi yabasansulushi mu tauni ya Conakry, lyalo Eric atosebensa mbuli musebenshi ucafwilisha.

Nabi kwaamba ayi mukuya kwaciindi ba Dorcas bakacileka kusebensa bupainiya bulibetele, bakatolelela kusebensa bupainiya bwaciindi coonse nabi ndyebakalinga kulela bana besu. Kwiinda mulucafwo lwakwe Yehova, ndakatolelela kusebensa bupainiya bulibetele. Bana besu ndyebakakomena, ba Dorcas bakatalika alimwi kusebensa mbuli painiya ulibetele. Pacecino ciindi, soonse tutosebensa mbuli bamishonali mutauni ya Conakry.

Lyoonse ndaya nkweenga Yehova wantuma. Liinji nebo amukaangu tulabona Yehova mbwaatushitilisha ambwaatupa shoolwe. Kucinka manungo muli Yehova kuteshi mushintu shakumubili kwatucafwa kuleya mapensho aanji alimwi akulisukama. Nshotwakeendaamo shatucafwa kushiba ayi Yehova eenkabo “Lesa walupusho lwesu,” ngweenga watushitilisha. (1 Maka. 16:35) Ndishomete cakutatoonsha ayi buumi bwabaabo boonse bacinka manungo muli nguwe ‘bulaakulamwa kabotu a Yehova.’—1 Samwe. 25:29.