1-2. (a) Ino nceebonshi mutumwi Paulo ncaakaambila ayi “cinene ndusuno?” (b) Ino njimiipusho nshi njeshi tucane shikumbulo?

 MUTUMWI Paulo ndyaakalinga kwaamba pa lushomo, kulangila, alimwi alusuno, mukweelaako wakaamba ayi “cinene ndusuno.” (1 Koli. 13:13) Ino nceebonshi ncaakaambila boobo? Na shishomesho shakwe Yehova shaamba pacishi cipya shikakumanishikwe, teshi tukayandike lushomo akulangila. Sombi tulaakuyandika kutolelela kusuna Yehova abantu. Alimwi lusuno lwesu lulaakutolelela kuyuminaako kwamuyayaya.

² Mukwiinga tulaakutolelela kuyandika kuba alusuno, tutobandika miipusho yotatwe itokonkelaawo. Wakutaanguna, ino nceebonshi tulyeelete kusunana? Wabili, ino inga twacita buyani kwaamba ayi tunootondeshanya lusuno? Watatu, ino inga twacita buyani kwaamba ayi tutolelele kusunana abuumbi?

3. Ino nceebonshi tulyeelete kusunana?

³ Ino nceebonshi kusunana kulayandika? Kusunana kulacafwa bamwi kushiba ayi tuli Beneklistu bancine. Yesu wakalwiita batumwi bakwe ayi: “Na kamusunene—bantu boonse balaakwishiba ayi muli bashikwiiya bangu.” (Joni 13:35) Alimwi  kusunana kulatucafwa kutolelela kuba bacatene. Paulo wakaamba ayi lusuno “ndolucatanya shintu shoonse.” (Kolo. 3:14) Nacibi boobo, kuli acimwi ciyandika ceelete kutupa kusunana. Mutumwi Joni wakalembela bashominyina ayi: “Uyo usuni Lesa ulyeelete kusuna amubye.” (1 Joni 4:21) Na katusunene, tulatondesha ayi tulisuni Lesa.

4-5. Amwaambe cakubonenaako citondesha kusuna Lesa mbokucatene akusuna bashominyineesu.

⁴ Ino kusuna Lesa kulicatene buyani akusuna bamakwesu abenankashi? Kucakubonenaako, amuyeeye moyo wesu mboocatene ashipansha shimwi shamubili. Na dokota wapima moyo wesu mbotoocica, inga washiba na utosebensabo kabotu nabi sobwe. Ino tutokwiiya nshi kucakubonenaako ici?

⁵ Bweenka dokota mbweenga washiba moyo wesu mboobete na wapima mbotoocica, aswebo inga twashiiba na Lesa tulimusuni abuumbi kwiinda mukubona mbotusuni bamwi. Na twaboona ayi tatutotondesha bunene lusuno kubashominyineesu, nkokwaamba ayi lusuno lwesu pali Yehova lutooya buceya. Ano na lyoonse katutondesha lusuno kubashominyineesu, ncitondesho cakwaamba ayi tulimusuni abuumbi Lesa.

6. Ino nceebonshi nceenga twaambila ayi na lusuno lwesu pa bamakwesu abenankashi lutooya buceya, nkokwaamba ayi tulicite lipenshi linene? (1 Joni 4:​7-9, 11)

⁶ Na lusuno lwesu pa bamakwesu abenankashi lutooya buceya, nkokwaamba ayi tulicite lipenshi linene. Ino nceebonshi? Mukwiinga ici cilasansulula ayi bushicibusa bwesu a Yehova teshi buyumu. Mutumwi Joni wakasansulula cancine ici ndyaakaamba ayi: “Anu [muntu] inga wasuna buyani Lesa ngwaatana kubonaawo na kaapatite mubye ngwaabona?” (1 Joni 4:20) Ino nciinshi ncetutokwiiyaawo? Yehova alakondwabo na “katusunana.”—Amubelenge 1 Joni 4:​7-9, 11.

7-8. Ino ninshila nshi shimwi mbweenga twatondesha lusuno kubamwi?

⁷ Lyoonse Maswi akwe Lesa alatuyuminisha ayi tulyeelete ‘kusunana.’ (Joni 15:​12, 17; Loma. 13:8; 1 Tesa. 4:9; 1 Pit. 1:22; 1 Joni 4:11) Nacibi boobo, lusuno ngumubo wa mukati kamoyo ngweenga bantu tababoni. Aboobo ino inga twatondesha buyani ayi tulibasuni bamakwesu abenankashi? Inga twacita boobo kwiinda mushintu nshetwaamba anshetucita.

⁸ Kuli nshila shiinji mbweenga twatondesha lusuno kubamakwesu abenankashi. Nshila shimwi nsheeshi: “Kamwaamba calushinisho kumuntu womwi awomwi.” (Seka. 8:16) ‘Amwikale muluumuno ababyanu.’ (Maako 9:50) ‘Amube kunembo mukutondesha bulemu kubamwi.’ (Loma. 12:10) “Amutambulane camaansa obilo.” (Loma. 15:7) ‘Amutolelele . . . kulekelelana camoyo woonse.’ (Kolo. 3:13) ‘Amutolelele kucafwana kunyamuna shimulemena.’ (Gala. 6:2) ‘Amutolelele kuyuminishanya.’ (1 Tesa. 4:18) ‘Amutolelele . . . kuyakana.’ (1 Tesa. 5:11) ‘Kamupaililana.’—Jemu. 5:16.

9. Ino nceebonshi kuyuminisha bamwi njenshila iyandika mbweenga twatondesha ayi tulibasuni? (Amubone acikope.)

⁹ Amuleke tubandike panshila yomwi mbweenga twatondesha lusuno kubamwi. Paulo wakaamba ayi: ‘Amutolelele kuyuminishanya.’ Ino nceebonshi kuyuminisha bamwi njenshila iyandika mbweenga twatondesha ayi tulibasuni? Libuku limwi lyaamba pamakani amu Baibo lyakaamba ayi, liswi lyakwaamba ayi “kuyuminisha” Paulo ndyaakasebensesha, lilasansulula “kuba pafwiifwi amuntu kwaamba ayi tumucaafwe ndyaatokwiinda mubukaalo buyumu.” Aboobo na twayuminisha mukwesu utokwiinda mumapensho,  tulamucafwa kutolelela kusebensela Yehova cakushomeka. Alimwi lyoonse na twayuminisha mukwesu, tulatondesha ayi tulimusuni.—2 Koli. 7:​6, 7, 13.

10. Ino kutondesha nkuumbu akuyuminisha shilicatene buyani?

¹⁰ Ino kutondesha nkuumbu akuyuminisha shilicatene buyani? Muntu ucite nkuumbu alayuminisha bamwi ndyebatokwiinda mumapensho akubacafwa. Aboobo kunyumfwila bamwi inkumbu, kulatupa kubayuminisha. Amubone Paulo mbwakasansulula nkuumbu mboshipa Yehova kuyuminisha bamwi. Wakaamba ayi Yehova ngu “Ishiwesu shinkumbu uyo utucafwa.” (2 Koli. 1:3) Aboobo mukwiinga Yehova ngu “Ishiwesu shinkumbu” alimwi utucafwa munshila shoonse, alatuyuminisha “mumapensho esu oonse.” (2 Koli. 1:4) Bweenka maanshi abotu mbwacafwa baabo bafwite nyotwa kunyumfwa kabotu na baanwa, Yehova alayuminisha akucafwa baabo batokwiinda mumapensho. Ino cakubonenaako cakwe Yehova cakutondesha nkuumbu akuyuminisha bamwi inga twacikonkela buyani? Nshila yomwi nkwiinda mukuba amibo yeenga yatucafwa kutondesha nkuumbu akuyuminisha bamwi. Ino njimibo nshi?

11. Kweelana a Bene Kolose 3:12 a 1 Pita 3:​8, ino njimibo nshi imwi yeshi ikatucaafwe kusuna bamwi akubayuminisha?

¹¹ Ino nciinshi ceshi cikatucaafwe kutolelela kusunana a ‘kuyuminishanya’ bushiku abushiku? Tulyeelete kuba amibo icafwa mbuli kuyeeyelako bamwi, kuba alusuno lwa bwanabwankashi alimwi akubota moyo. (Amubelenge Bene Kolose 3:​12, NWT; 1 Pita 3:8.) Ino mibo iyi ilaakutucafwa buyani? Na katubanyumfwila nkuumbu bamakwesu akubabikilako maano, tulaakusunishisha kubayuminisha ndyebatokwiinda mumapensho. Yesu wakaamba ayi, “muntu ulaamba ciswite mumoyo wakwe. Muntu uli kabotu ulaamba shintu shibotu isho shili mumoyo wakwe.” (Mate. 12:​34, 35) Aboobo nshila iyandika abuumbi mbweenga twatondesha ayi tulisuni bamakwesu abenankashi, nkwiinda mukubayuminisha.

12. (a) Ino nceebonshi tulyeelete kucenjela kwaamba ayi tutacileeki kusuna bamakwesu? (b) Ino ngumwiipusho nshi ngweshi tubandikeewo ano?

¹² Soonse tulisuni ‘kutolelela kusunana.’ (1 Joni 4:7) Nacibi boobo, cilayandika kunookwiibaluka maswi akucenjesha Yesu ngaakaamba ayi “lusuno lwa bantu baanji lulaakuceya.” (Mate. 24:12) Yesu taakalinga kusansulula ayi bashikwiiya bakwe baanji balaakucileka kusunana. Sombi tulyeelete kucenjela kwaamba ayi tutabi anga mbantu bakucishi abo batatondeshi lusuno. Aboobo amuleke tubandike pamwiipusho uyu uyandika: Ino nshiinshi sheenga shatucafwa kushiba na tulibasuni abuumbi bamakwesu abenankashi?

13. Ino nciinshi ceenga catucafwa kushiba na tulibasuni abuumbi bamakwesu?

¹³ Nshila yomwi mbweenga twashiiba na tulibasuni abuumbi bamakwesu, nkulanga langa mbotucita shintu na katuli mubukaalo bumwi. (2 Koli. 8:8) Bukaalo bomwi mboobu mutumwi Pita mbwaakaamba ayi: “Cinene ncakwaamba ayi amusunane abuumbi ceebo lusuno lulafweka pa shibiibi shiinji.” (1 Pit. 4:​8, NWT) Aboobo nshetucita na bamakwesu bacita shilubo nabi na batukalasha, shilaakutondesha na tulibasuni abuumbi.

14. Kweelana a 1 Pita 4:​8, ino tulyeelete kubasuna buyani bamakwesu? Amwaambe cakubonenaako.

¹⁴ Amuleke tuyeeye cakubikila maano pamaswi  Pita ngaakaamba. Lubasu lwakutaanguna lwa vesi 8 lulaamba ayi tulyeelete ‘kusunana abuumbi.’ Liswi lyakwaamba ayi “abuumbi” Pita ndyaakasebensesha, lilasansulula “kufungulula cintu cimwi.” Lubasu lwabili lwa vesi iyi lulasansulula nsheenga twaciita na katubasuni abuumbi bamakwesu. Kusuna bamakwesu abuumbi inga kwatucafwa kufweka pashilubo shabo. Amuyeeye pacakubonenaako ca tebulu ishipite na yakamatuluka mumwi. Inga mwabweesa cisani akuciyalaawo kwaamba ayi bamwi bataboni matombe ayo na moyakamatuluka. Aswebo na katubasuni abuumbi bamakwesu, tulaakufweka ‘pashibiibi shabo shiinji,’ na kubalekelela.

15. Ino kusuna bamakwesu abenankashi abuumbi kulaakutucafwa kucita nshi? (Bene Kolose 3:13)

¹⁵ Tulyeelete kusuna bamwi abuumbi cakwaamba ayi inga twalekelela bashominyineesu nabi kwaamba ayi kucita boobo teshi cuubu. (Amubelenge Bene Kolose 3:13.) Na katulekelela bamwi, tulatondesha ayi tulibasuni abuumbi alimwi tulisuni kusangalasha Yehova. Ino nciinshi cimwi ceenga catucafwa  kunolekelela bamwi akutafwambaana kukalala ceebo ca shintu nshebacita?

16-17. Ino nciinshi cimwi ceenga catucafwa kunolekelela bamwi pashilubo shiniini nsheenga bacita? Amwaambe cakubonenaako. (Amubone acikope.)

¹⁶ Amubikile maano kumibo ibotu ya bamakwesu abenankashi, kuteshi kushintu nshebataciti kabotu. Amuyeeye pacakubonenaako ici. Amuyeeye kwaamba ayi mwabungana pomwi abamakwesu abenankashi. Mutosangalala ceebo ca nshemutoocita, lyalo pesule lyakubungana uko, mwakopwa cikope pomwi. Mukuyeeya kwaamba ayi mpashi cakutaanguna tacina kuswa kabotu, mwakopwa shikope ashimwi shobilo lyalo mwaba ashikope shotatwe. Sombi mwaboona ayi pacikope cimwi mukwesu umwi wabisha pameenso. Ino inga mwacita buyani acikope ico? Inga mwacikushaamo mukwiinga mulicite shikope shimwi shobilo boonse ndyebakamweta mweta, kwiilikaawo amukwesu uyo.

¹⁷ Inga twakoshanisha shikope kushintu nshetwiibaluka. Liinji tulebaluka shintu shibotu nshetwakacita ndyetwakalinga pomwi abamakwesu abenankashi. Ano amuyeeye ayi paciindi cimwi mukwesu nabi nankashi wakaamba na kucita cintu cimwi citabete kabotu. Sa tulyeelete kutolelela kuyeeya pancaakacita? Tulyeelete kweelesha kucileka kuyeeya pancaakacita, bweenka mbweenga  twakushamo cikope citana kuswa kabotu. (Tus. 19:11; Efe. 4:32) Inga twacikonsha kulubaako cilubo ciniini nceenga mukwesu nabi nankashi watucitila, na katwiibaluka shintu shibotu nshetwakacitawo pomwi anguwe. Ishi nshoshintu nshotweelete kutolelela kunokwiibaluka.

18. Ino nshiinshi nshotweeya mumutwi uyu pamakani akutondesha lusuno?

¹⁸ Ino nceebonshi tulyeelete kutolelela kusunana abuumbi? Kweelana ambotweeya, na katutondesha lusuno kubamakwesu abenankashi, nkokwaamba ayi tulisuni Yehova. Ino tulatondesha buyani ayi tulisuni bashominyineesu? Nshila yomwi nkwiinda mukubayuminisha. Kunyumfwila bamwi inkumbu, kulaakutucafwa ‘kutolelela kubayuminisha.’ Ino inga twacita buyani kwaamba ayi tutolelele kusunana abuumbi? Inga twacita boobo kwiinda mukulekelela bamakwesu nabi ndyecibete ciyumu kucita boobo.

19. Ino nceebonshi ncotuyandikila bunene kutondesha lusuno munshiku shino?

¹⁹ Ino nceebonshi ncotuyandikila bunene kutondesha lusuno munshiku shino? Pita wakaamba ayi: ‘Mamanino ashintu shoonse ali pafwiifwi. Aboobo, . . . amusunane abuumbi.’ (1 Pit. 4:​7, 8) Ino nshiinshi nsheenga twalangila mamanino acishi cino cibiibi ndyatooya cisena pafwiifwi? Kwaamba pa bashikwiiya bakwe, Yesu wakaambila limwi ayi: “Bantu ba mishobo yoonse balaakumupata ceebo ca liina lyangu.” (Mate. 24:9) Tulyeelete kutolelela kuba bacatene kwaamba ayi tucikoonshe kutolelela kushomeka kuli Yehova bantu ndyebatupata. Na katusuni bamakwesu abenankashi, Satana teshi akacikoonshe kutupansaanya, mukwiinga lusuno “ndolucatanya shintu shoonse.”—Kolo. 3:14; Filip. 2:​1, 2.