1-2. Ino nceebonshi cimwi ciindi inga twalinyumfwa ayi Yehova taatokumbula mipailo yesu?

 ‘KOSANGALALA muli Yehova, lakwe alaakukupa nshoolila mumoyo.’ (Kulu. 37:4) Ici ncishomesho cibotu abuumbi! Ano sa tulyeelete kulangila Yehova kutupa nshetumusenga peenkaapo? Ino nceebonshi tulyeelete kuliipusha mwiipusho uyu? Amuyeeye pabukaalo butokonkelaawo. Nankashi uteebetwe atopaila kwaamba ayi akacanike ku Cikolo ca Bashimikila sha Bwaami. Sombi peenda myaaka iinji tabatomwitaawo. Mukwesu wacanike atopaila kuli Yehova ayi oole kubulwashi bunene mbwaatociswa, kwaamba ayi acite shiinji mulibungano. Sombi watolelela kuciswa. Bashali Beneklistu batopaila kuli Yehova kwaamba ayi mwanaabo akatolelele kusebensela Yehova. Sombi lakwe wasalawo kucileka kusebensela Yehova.

² Mpashi amwebo mwakasengawo cintu cimwi kuli Yehova, sombi taakwe kumupa ncemwakamusenga. Aboobo mpashi inga mwatalika kuyeeya ayi Yehova taakumbuli mipailo yangu, sombi ya bamwi yalo alaikumbula. Na mpashi inga mwatalika kuyeeya ayi kuli cimwi citabete kabotu ncomwakacita. Ubu nankashi waliina lya Janice b mbwaakalinga kulinyumfwa. Lakwe abeebaye bakalinga kusunishishi kuya mukusebensela ku Bethel. Aboobo bakapaila kuli Yehova kwaamba ayi abacaafwe. Ba Janice bakaamba ayi: “Ndakalinga kushomete cakutatoonsha ayi teshi pakeende aciindi balaakutwiita kuya mukusebensela ku Bethel.” Nacibi boobo, pakeenda myaaka iinji kutabetaawo. Ba Janice bakaamba ayi: “Ndakalinyumfwa cibiibi akupilinganishikwa. Ndakalinga kuyeeya ayi mpashi kuli ncondakacita cakakalasha Yehova. Ndakapaililaawo abuumbi pamakani akuya mukusebensela ku Bethel. Ino nceebonshi taakwe kukumbula mupailo wangu?”

3. Ino tutokwiiya nshi mumutwi uyu?

 ³ Cimwi ciindi inga twatalika kutoonsha na Yehova alakutika mipailo yesu. Basankwa bamwi bashomeka bakale kale, abalo bakalinyumfwawo kale boobo. (Jobo 30:20; Kulu. 22:2; Abaku. 1:2) Ino nciinshi ceenga camucafwa kushoma cakutatoonsha ayi Yehova alaakukumbula mipailo yanu? (Kulu. 65:2) Kwaamba ayi tucane cikumbulo kumwiipusho uyu, tutotaanguna kucana shikumbulo kumiipusho iyi itokonkelaawo: (1) Ino nshiinshi Yehova nsheshi akacite? (2) Ino Yehova alatulangila kucita nshi? (3) Ino nceebonshi inga twayandika kwaalula nshetutopaililaawo?

4. Kweelana a Jelemiya 29:​12, ino Yehova wakashomesha kucita nshi?

⁴ Yehova wakatushomesha ayi ananokutika mipailo yesu. (Amubelenge Jelemiya 29:12.) Lesa wesu alibasuni basebenshi bakwe bashomeka. Aboobo inga taasulikobo ku mipailo yabo. (Kulu. 10:17; 37:28) Nacibi boobo, ici tacaambi ayi ananootupa shoonse nsheenga twamusenga. Shimwi nsheenga twamusenga mpashi inga twayandika kulindilabo cishi cipya.

5. Ino nshiinshi Yehova nshayeeyawo ndyaatokutika kumipailo yesu? Amusansulule.

⁵ Yehova alayeeya pakuyanda kwakwe ndyaatokutika kumipailo yesu. (Isa. 55:​8, 9) Cintu comwi Yehova ncaasuni ncakwaamba ayi cishi cikasulebo bantu basangalala kumunyumfwila mbuli Mweendeleshi wabo. Sombi Satana alaamba ayi bantu inga baba alusangalalo abuumbi na kabalyeendelesha. (Mata. 3:​1-5) Yehova wakasuminisha bantu kulyeendelesha kwaamba ayi cibonekele patuba ayi Satana nshaakaamba nshakubeca. Nacibi boobo, bweendeleshi bwa bantu bwapa kwaamba ayi tunookwiinda mumapensho aanji. (Shiku. 8:9) Tulicishi kwaamba ayi pacecino ciindi Yehova inga taamani mapensho ngotutokwiindaamo. Na wacita boobo, inga caboneka anga bantu bacikoonsha kulyeendelesha alimwi inga bamana mapensho ngobatokwiindaamo.

6. Ino nceebonshi tulayandika kushoma cakutatoonsha ayi lyoonse Yehova alacita shintu munshila yalusuno alimwi ili kabotu?

⁶ Inga twapailila pashintu shikoshenye, sombi Yehova inga wakumbula mipailo yesu munshila shipusene. Kucakubonenaako, Mwaami Esekiya ndyaakaciswa abuumbi, wakapaila kuli Yehova kwaamba ayi oole. Yehova wakakumbula mupailo wakwe akumoolesha. (2 Baam. 20:​1-6) Sombi mutumwi Paulo ndyaakapaila kuli Yehova kwaamba ayi amukushe “muumfwa mumubili,” mpashi bulwashi bumwi mbwaakalinga kuciswa, Yehova taakwe kumana lipenshi ili. (2 Koli. 12:​7-9) Amuyeeye ashakacitikila mutumwi Jemusi amutumwi Pita. Boonse bakalinga kusuni kucaikwa ku Mwaami Elodi. Bamulibungano bakapaililako Pita, alimwi mpashi bakapaililaako a Jemusi. Nacibi boobo, Jemusi wakacaikwa, lyalo Pita wakapulushikwa munshila ya caankamiko. (Milimo 12:​1-11) Mpashi inga twaliipusha ayi, ‘Ino nceebonshi Yehova wakapulushabo Pita, sombi Jemusi lakwe wakacaikwa?’ Baibo tayaambiwo. c Sombi inga twashoma cakutatoonsha ayi Yehova “ulisuni shintu shabululami shitacite kampenda.” (Kulu. 33:5) Alimwi tulicishi kwaamba ayi Yehova wakalinga kubasuni boonse bobilo. (Ciyu. 21:14) Cimwi ciindi Yehova inga wakumbula mipailo yesu munshila njetwatalinga kulangila. Sombi mukwiinga tulashoma ayi lyoonse Yehova alakumbula mipailo yesu munshila yalusuno alimwi ili kabotu, tatutongooki mbweenga wakumbula mipailo yesu.—Jobo 33:13.

7. Ino nciinshi ncotweelesha kuleya kucita, alimwi ino nceebonshi?

⁷ Tuleelesha kuleya kweelanya bukaalo mbotubeteemo ku bukaalo bwa bamwi. Kucakubonenaako, mpashi inga twasenga Yehova kwaamba ayi atupe cintu cimwi, sombi wabula kutupa.  Lyalo mukuya kwaciindi twesa mukushiba ayi aumwi ncaakalinga kupaililaawo, alimwi Yehova wakamupa cintu ico. Ishi nsheshakacitikila nankashi waliina lya Anna. Wakalinga kupaila kwaamba ayi ba Matthew beebaye boole kubulwashi bwa kansa. Paciindi ceenka ici, kwakalinga benankashi bamwi bobilo bacinene abalo bakalinga kuciswa kansa. Ba Anna bakalinga kupaila abuumbi kwaamba ayi ba Matthew abenankashi abo boole. Benankashi abo bakoola, sombi ba Matthew bakafwa. Pakutaanguna, ba Anna bakalinga kuliipusha na Yehova ngowakapa kwaamba ayi benankashi abo boole. Ano na Yehova ngowakabacafwa, ino nceebonshi taakwe kukumbula mipailo yabo yakusenga ayi beebabo boole? Kwalo, tatucishiwo cakapa kwaamba ayi benankashi abo boole. Sombi tulicishi kwaamba ayi Yehova alaakumana mapensho oonse ngotwiindaamo, alimwi alisunishishi kubusha beshicibusa bakwe bakafwa.—Jobo 14:15.

8. (a) Kweelana a Isaya 43:​2, ino Yehova alatucafwa buyani? (b) Ino kupaila inga kwatucafwa buyani ndyetuli mumapensho? (Amubone vidyo icite mutwi waamba ayi Mupailo Ulatucafwa Kuliyumya.)

⁸ Lyoonse Yehova ananootucafwa. Mbuli Ishiwesu shilusuno, Yehova taasuniiwo kwaamba ayi tunoopenga. (Isa. 63:9) Nacibi boobo, taatushitilishi kumapensho oonse, ayo eenga akoshanishikwa ku milonga na kumulilo. (Amubelenge Isaya 43:2.) Sombi wakatushomesha ayi alaakutucafwa ndyeshi ‘tukanokwiinda’ mumapensho. Alimwi alaakushinisha kwaamba ayi watucafwa kutolelela kuba abushicibusa buyumu anguwe. Kwiilikaawo, Yehova alatupa mushimu usalashi uyo utucafwa kuliyumya. (Luka 11:13; Filip. 4:13) Aboobo inga twashooma ayi lyoonse Yehova ananootupa nshetuyandika kwaamba ayi tucikonshe kuliyumya akutolelela kushomeka kuli nguwe. d

9. Kweelana a Jemusi 1:​6, 7, ino nceebonshi tulyeelete kushoma ayi Yehova alaakutucafwa?

⁹ Yehova alatulangila kunoocinka manungo muli nguwe. (Ebu. 11:6) Cimwi ciindi inga twalinyumfwa ayi teshi tucikoonshe kuliyumya mumapensho ngotutokwiindaamo. Mpashi inga twatalika akutoonsha na Yehova alaakutucafwa. Sombi Baibo ilatushomesha ayi inga twacikonsha “kuuluka malinga” kwiinda munkusu shakwe Lesa. (Kulu. 18:29) Aboobo muciindi cakutolelela kutoonsha, tulyeelete kupaila kuli Yehova katushomete cakutatoonsha ayi alaakukumbula mipailo yesu.—Amubelenge Jemusi 1:​6, 7.

10. Amwaambe cakubonenaako ca mbweenga twacitawo comwi pesule lya kupaila kuli Yehova kwaamba ayi atucaafwe.

¹⁰ Yehova alatulangila kucitawo comwi na twapaila kuli nguwe. Kucakubonenaako, mukwesu inga wasenga Yehova kwaamba ayi munene wancito amusuminishe kucanika kukubungana kunene. Ino Yehova inga waukumbula buyani mupailo wakwe? Inga wacafwa mukwesu kutaloonda kuya mukubandika amunene wancito. Sombi mukwesu alyeelete kuya ku munene wancito mukubandikaakwe. Alimwi mpashi inga wayandika kubandikaakwe mankanda aanji pamakani aya. Kwiilikaawo, mpashi inga wabandika aumwi ngwaasebensaakwe kwaamba ayi bakacinjanye bushiku bwakusebensa. Alimwi na kaciyandika, mpashi inga wasalawo ayi bakamupekobo maali aniini mumweenshi uyo pamaali ngaafola.

11. Ino nceebonshi tulyeelete kutolelela kupailila pashintu nshetusuni isho nshotubona ayi shilayandika?

¹¹ Yehova alatulangila kutolelela kupailila pashintu nshetusuni isho nshotubona ayi shilayandika. (1 Tesa. 5:17) Yesu wakaamba ayi mipailo yesu imwi inga taikumbulwi peenkaapo. (Luka 11:9) Aboobo mutacileeki kupaila! Amutolelele  kupaila kuswa paanshi lya moyo. (Luka 18:​1-7) Na twatolelela kupaila kuli Yehova, tulatondesha ayi ncetutopaililaawo cilayandika abuumbi kuli ndiswe. Alimwi tulatondesha ayi tulicite lushomo lwakwaamba ayi inga watucafwa.

12. (a) Ino ngumwiipusho nshi ngotweelete kuliipusha pashintu nshetusenga kuli Lesa, alimwi ino nceebonshi? (b) Ino inga twacita buyani kwaamba ayi tushinishe ayi mipailo yesu ilatondesha bulemu kuli Yehova? (Amubone kabokosi kacite mutwi utokwaamba ayi “ Sa Mipailo Yangu Ilatondesha Bulemu Kuli Yehova?”)

¹² Na Yehova taakwe kutupa ncetwamusenga, inga twaliipusha miipusho yotatwe. Wakutaanguna, ‘Sa ntopailila pacintu ceelete?’ Liinji tulayeeya ayi tulicishi kabotu nshetutoyandika. Sombi shintu nsheenga katupaililaawo, mpashi teshi nshoshintu nsheenga katuyandika. Na tutopailila palipenshi ndyetutokwiindaamo, mpashi inga kakuli nshila ili kabotu lipenshi ilyo mbweenga lyamana, kwiinda njetutopaililaawo. Alimwi shintu shimwi nshotupaililaawo inga kashiteendelani akuyanda kwakwe Yehova. (1 Joni 5:14) Kucakubonenaako, amuyeeye pacakubonenaako ca bashali mbotwalinga twaambaawo. Bakasenga Yehova kwaamba ayi acafwe mwanaabo kutolelela kumusebensela. Palibo kabotu bashali kupailila pamakani aya. Sombi Yehova taakakatishi muntu uli woonse kumusebensela. Alisuni kwaamba ayi soonse, kwiilikaawo abana besu, tusalewo kumulambila. (Duto. 10:​12, 13; 30:​19, 20) Aboobo bashali bakalinga kweelete kusenga Yehova kwaamba ayi abacaafwe kwiisha mwanaabo munshila yeenga yamushika pamoyo, kwaamba ayi asune Yehova akuba shicibusa wakwe.—Tus. 22:6; Efe. 6:4.

13. Kweelana a Bene Ebulu 4:​16, ino Yehova alaikumbula buyani mipailo yesu? Amusansulule.

¹³ Mwiipusho wabili ngotweelete kuliipusha ngwakwaamba ayi, ‘Sa ici ncociindi Yehova ndyaeelete kukumbula mupailo wangu?’ Mpashi  inga katulinyumfwa ayi mipailo yesu itoyandika kukumbulwa cakufwambaana. Nacibi boobo, Yehova alicishi ciindi ceelete ndyeenga watucafwa. (Amubelenge Bene Ebulu 4:16.) Na Yehova taana kutupa ncetwamusenga peenkaapo, inga twatalika kuyeeya ayi wakaka kutupa ncetwasenga. Sombi mpashi inga kaasuni ayi tulindileeko. Kucakubonenaako, amuyeeye pa mukwesu wacanike ngotwalinga twaambaawo wakalinga kupaila ayi oole kubulwashi mbwaakalinga kuciswa. Naakwiinga Yehova wakamoolesha munshila yacaankamiko, naakwiinga Satana wakaamba ayi mukwesu uyu watolelela kusebensela Yehova ceebo cakwaamba ayi wakamoolesha. (Jobo 1:​9-11; 2:4) Kwiilikaawo, Yehova wakabika kale ciindi ndyeshi akamane malwashi oonse. (Isa. 33:24; Ciyu. 21:​3, 4) Kushikila ciindi ico cikashiike, inga tatulangili Yehova kutoolesha munshila ya caankamiko. Aboobo mukwesu wakalinga kweelete kusenga Yehova kwaamba ayi amupe nkusu shakuliyumya kubulwashi mbwaakalinga kuciswa aluumuno lwamumiyeeyo kwaamba ayi atolelele kumusebensela cakushomeka.—Kulu. 29:11.

14. Ino nshiinshi nshomweeya kuswa kushakacitikila ba Janice?

¹⁴ Amuyeeye pali Nankashi Janice, uyo wakalinga kupaila ayi akaye mukusebensela ku Bethel. Pesule lya myaaka 5, wakashiba ayi Yehova wakakumbula mipailo yakwe, sombi wakaikumbula munshila njaatakalinga kulangila. Wakaamba ayi: “Paciindi ici Yehova wakanjiisha shintu shiinji akuncafwa kuba Mwineklistu uli kabotu. Ndakalinga kweelete kwiiya kunoocinka manungo abuumbi muli nguwe. Ndakalinga kweelete kushiba kabotu bwakucita ciiyo capalwangu. Alimwi ndakalinga kweelete kwiiya ayi inga ndaba alusangalalo kuli koonse nkweenga kaansebensela Yehova.” Mukuya kwaciindi, ba Janice abeebaabo bakapekwa ncito yakufwakashila mabungano. Na bayeeya pashakacitika, ba Janice balaamba ayi: “Yehova wakakumbula  mipailo yangu munshila njendatakalinga kulangila. Cakatola ciindi kunyumfwishisha ayi Yehova mbwaakakumbula mipailo yangu, cakalinga ncipo cibotu abuumbi. Ndalumba abuumbi kwaamba ayi ndakaba acoolwe cakubona Yehova mbwaakantondesha lusuno ankuumbu.”

15. Ino nceebonshi cimwi ciindi tatweelete kunokwaamba cakululama ndyetutopaila? (Amubone ashikope.)

¹⁵ Mwiipusho watatu ngotweelete kuliipusha ngwakwaamba ayi, ‘Sa mumipailo yangu ndaamba bunene cakululama?’ Nabi kwaamba ayi cilibo kabotu kwaamba cakululama mumipailo yesu, mpashi inga twashiba Yehova nshaasuni ayi tucite na katutaambi bunene cakululama ndyetutopaila. Amuyeeye pacakubonenaako cakwe nankashi uteebetwe wakalinga kupaila ayi akacanike ku Cikolo ca Bashimikila sha Bwaami. Wakalinga kusuni kucanika kucikolo ici kwaamba ayi akaye mukusebensela kumusena ubulishite. Aboobo ndyaakalinga kupaila ayi bakamwiite kucikolo ici, wakalinga kweelete akunopaila kuli Yehova kwaamba ayi amucaafwe kushiba shimwi nsheenga wacita muncito yakwe. (Milimo 16:​9, 10) Lyalo wakalinga kweelete kwiipushako mutanjilili walubasu na kuli libungano lya pafwiifwi kutoyandika bapainiya. Na mpashi naakwiinga wakalembela ku ofesi ya musampi akwiipusha na kuli libungano kutoyandika beshikushimikila baanji. e

16. Ino nciinshi nceenga twashoma cakutatoonsha?

¹⁶ Kweelana ambotweeya, inga twashoma cakutatoonsha ayi Yehova alaakukumbula mipailo yesu munshila ya lusuno alimwi ili kabotu. (Kulu. 4:3; Isa. 30:18) Cimwi ciindi Yehova inga taakumbuli mipailo yesu kweelana ambotwalinga kulangila. Sombi Yehova teshi anoosulaakobo kumipailo yesu mukwiinga alitusuni abuumbi. Alimwi teshi akatulekelesheewo. (Kulu. 9:10) Aboobo amutolelele kucinka “manungo muli nguwe ciindi coonse,” akunoopaila kuli nguwe kuswa paanshi lyamoyo.—Kulu. 62:8.