1. Ino nshiinshi mushinshimi Isaya nshaakalwiita bene Isilaelinyina?

 MUSHINSHIMI Isaya wakaamba ayi Yehova ngu ‘Lesa wacancine.’ Liswi lyakasansululwa ayi “cancine” lilasansulula ayi “ameni.” (Isa. 65:16) Liswi lyakwaamba ayi “ameni” lilasansulula ayi “acibe boobo” na ayi “ncakwiila.” Na Baibo yasebensesha liswi lyakwaamba ayi “ameni” kwaamba pali Yehova na Yesu, nkokwaamba ayi makani ayo ngancine. Aboobo Isaya wakalinga kulwiita bene Isilaeli ayi: Lyoonse Yehova nshaamba shilacitika. Nshila yomwi Yehova mbwaacita boobo, nkwiinda mukukumanisha shishomesho shakwe shoonse.

2. Ino nceebonshi inga twashooma ayi Yehova alaakukumanisha nshaakashomesha kutucitila kunembo, alimwi ino njimiipusho nshi njeshi tucane shikumbulo?

² Sa aswebo inga twashooma ayi Yehova alaakukumanisha nshaakashomesha kutucitila kunembo? Ndipakeenda myaaka pafwiifwi a 800 kuswa ciindi Isaya ndyaakafwa, mutumwi Paulo wakaamba ceenga catupa kushoma ayi lyoonse Yehova alakumanisha nshaashomesha. Wakaamba ayi: “Lesa inga taabeciiwo.” (Ebu. 6:18) Amuyeeye paceeci: Bweenka cisamu ca mango mbweenga tacicati ma olenji, alakwe Yehova Nkantupu ka cancine, inga taabeciiwo. Aboobo shoonse Yehova nshaamba inga twashishoma, kwiilikaawo anshaakashomesha kutucitila kunembo. Mumutwi uyu, tutocana shikumbulo kumiipusho iyi: Ino nshiinshi Yehova nshaakashomesha kutucitila kunembo? Alimwi  ino nshiinshi Yehova nshaakaamba sheenga shatupa kushoma ayi alaakukumanisha cishomesho cakwe?

3. (a) Ino ncishomesho nshi basebenshi bakwe Lesa ncobasuni abuumbi? (Ciyubululo 21:​3, 4) (b) Ino nshiinshi bamwi nshobaamba na twabalwiitako pacishomesho ici?

³ Tutobandika pacishomesho basebenshi bakwe Lesa nsengwe yoonse ncobasuni abuumbi. (Amubelenge Ciyubululo 21:​3, 4.) Yehova wakatushomesha ayi “lufu teshi lukabeeko alimwi. Teshi kukabe buumba, kulila nabi kunyumfwa kucisa.” Sobaanji tulasebensesha lilembo ili kuyuminisha bantu mbotushimikila akubatondesha buumi mbweshi bukabe mu Paladaiso. Ino nshiinshi bamwi nshobaamba na twabalwiitako pacishomesho ici? Bamwi mpashi inga baamba ayi, “Nshomwaamba nshibotu, sombi nshishomiwo ayi shilaakucitika.”

4. (a) Ino nshiinshi Yehova nshaakalinga kucishi? (b) Ino nciinshi cimwi Yehova ncaakaamba kwiilika pacishomesho?

⁴ Yehova ndyaakatanjilila mutumwi Joni kulemba cishomesho ici caamba buumi mbweshi bukabe mu Paladaiso, wakalinga kucishi ayi aswebo munshiku shino tunanolwiitako bamwi pacishomesho ici ndyetutoshimikila makani a Bwaami. Alimwi Yehova wakalinga kucishi ayi baanji cilaakubabeta ciyumu kushoma ayi shintu ishi shilaakucitika kunembo. (Isa. 42:9; 60:2; 2 Koli. 4:​3, 4) Aboobo ino inga twacita buyani kwaamba ayi tucafwe bamwi kushoma ayi shoolwe shaambwa pa Ciyubululo 21:​3, 4 shilaakukumanishikwa? Alimwi ino inga twacita buyani kwaamba ayi tuyumye lushomo lwesu muli Yehova ashishomesho shakwe? Yehova wakaamba sheebo sheenga shatupa kutatoonsha ayi alaakukumanisha cishomesho ici. Ino nshiinshi nshaakaamba?

5. Ino nga mavesi nshi atucafwa kushoma cishomesho cakwe Lesa ca Paladaiso, alimwi ino alaamba nshi?

⁵ Tulashoma ayi Yehova alaakukumanisha cishomesho ca Paladaiso, ceebo ca maswi ngaakaamba mumavesi atokonkelaawo. Wakaamba ayi: ‘Mpomunyaawo ukala pacuuna ca bwaami wakaamba ayi: ‘Amubone! Ono bulya shintu shoonse ntooshipanga cipya!’ Wakandwiita alimwi ayi: ‘Ulembe shintu ishi mukwiinga maswi aya alyeelete kushomwa alimwi ngalushinisho.’ Wakatolelela kuŋambila ayi: ‘Shakumanishikwa! Nebo ndime Matalikilo alimwi aMamanino, mutaanshi alimwi awakweelaako.’’—Ciyu. 21:​5, 6a.

6. Ino nceebonshi maswi ngotucana pa Ciyubululo 21:​5, 6 alayumya lushomo lwesu mucishomesho cakwe Lesa?

⁶ Ino nceebonshi maswi aya alayumya lushomo lwesu mucishomesho cakwe Lesa? Mumavesi aya, Yehova nshaatoocita inga twashikoshanisha ku kusaina cipepa citucafwa kushoma ayi alaakukumanisha cishomesho cakwe. Aboobo Ciyubululo 21:​3, 4 ilaamba pacishomesho cakwe Lesa. Lyalo mu vesi 5 a 6, wakaamba maswi ali anga nkusaina cipepa, ayo eenga atupa kushoma cakutatoonsha ayi alaakukumanisha cishomesho cakwe. Amuleke tubandike pamaswi Yehova ngaakaamba eenga atucafwa kushoma cakutatoonsha ayi alaakukumanisha cishomesho cakwe.

7. Ino ngani wakaamba maswi ali muvesi 5, alimwi ino nceebonshi alilibetele?

⁷ Vesi 5 ilatalika amaswi akwaamba ayi: “Ukala pacuuna ca bwaami.” (Ciyu. 21:5a) Maswi aya alilibetele mukwiinga ndyelinkanda lyakutaanguna pa mankanda otatwe Yehova mwiine ndyaakaamba, pamakani ngotucana mulibuku lya Ciyubululo. Aboobo Yehova mwiine ngowakaamba maswi aya, kuteshi kwiinda  mumunjelo na kwiinda muli Yesu pesule lyakubushikwa! Cancine ici cilatondesha ayi inga twashoma maswi atokonkelaawo ngaakaamba. Ino nceebonshi? Mukwiinga Yehova ngu “Lesa utabeci.” (Taitasi 1:2) Aboobo maswi ngotucana pa Ciyubululo 21:​5, 6 alaakukumanishikwa.

8. Ino nshiinshi shimwi Yehova nshaakaamba shitondesha ayi alaakukumanisha cishomesho cakwe? (Isaya 46:10)

⁸ Ano amuleke tubandike paliswi lyakwaamba ayi ‘Amubone!’ (Ciyu. 21:5) Liswi lyamu ciGiliki lyakasansululwa ayi ‘amubone!’ lilasebenseshekwa mankanda aanji mulibuku lya Ciyubululo. Libuku limwi lyakaamba ayi liswi ili lyakasebenseshekwa kwaamba ayi “licafwe wooyo utobelenga kwaamba ayi abikile maano kushitokonkelaawo.” Ino nshiinshi shakakonkelaawo Lesa nshaakaamba? Wakaamba ayi: “Shintu shoonse ntooshipanga cipya.” Yehova wakalinga kwaamba nsheshi akacite kunembo. Ano mukwiinga alicishi ayi alaakukumanisha cishomesho cakwe, wakaamba anga cacitika kale.—Amubelenge Isaya 46:10.

9. (a) Ino Yehova wakalinga kusansulula nshi ndyaakaamba ayi “shintu shoonse ntooshipanga cipya?” (b) Ino Yehova alaakucita nshi ku mfulumeende sha bantu alimwi abantu bacita shibiibi?

⁹ Ino Yehova wakalinga kusansulula nshi ndyaakaamba ayi: “Shintu shoonse ntooshipanga cipya?” Mucapita iyi, Yehova wakalinga kwaamba pashintu shobilo nsheshi akacite. Cakutaanguna, alaakunyonyoola cishi cino cibiibi. Cabili, alaakuleta cishi cipya. Ciyubululo 21:1 ilaamba ayi: “Liculu litaanshi alimwi acishi citaanshi shakamana.” “Liculu litaanshi” lilasansulula mfulumeende sha bantu shitanjililwa a Satana ashibanda shakwe. (Mate. 4:​8, 9; 1 Joni 5:19) Mu Baibo, liswi lyakwaamba ayi “cishi” inga lyasansulula bantu. (Kulu. 96:1) Aboobo “cishi citaanshi” mbantu bacita shibiibi. Yehova alaakunyonyoola mfulumeende sha bantu alimwi abantu bacita shibiibi. Lyalo alaakuleta “liculu lipya alimwi acishi ca panshi cipya,” nkokwaamba ayi mfulumeende ipya yeshi ikanookweendelesha bantu baluleme.

10. Ino nshiinshi Yehova nsheshi akapange cipya?

¹⁰ Ciyubululo 21:5 ilaamba pashintu Yehova nsheshi akapange cipya. Yehova taakwe kwaamba ayi: ‘Shintu shoonse ndaakushipanga cipya.’ Sombi wakaamba ayi: “Shintu shoonse ntooshipanga cipya.” Yehova alaakupa kwaamba ayi cishi cikabote akucafwa bantu kuba bamaninite. Kweelana a Isaya mbwaakaamba, cishi coonse cilaakubota bweenka muunda wa Edeni mbowakalinga. Alimwi alaakutupanga cipya kwiinda mukutushilika cakumaninina. Balema, boofu, abashinkitwe matwi balaakushilikwa alimwi bafu balaakubushikwa.—Isa. 25:8; 35:​1-7.

11. Ino nciinshi Yehova ncaakalwiita Joni kucita alimwi ino nceebonshi?

¹¹ Ino nshiinshi shimwi Lesa nshaakaamba kwaamba ayi atucaafwe kumushoma? Yehova wakalwiita Joni ayi: “Ulembe shintu ishi mukwiinga maswi aya alyeelete kushomwa alimwi ngalushinisho.” (Ciyu. 21:5) Yehova taakwe kulwiitabo Joni ‘kulemba’ maswi aya sombi wakamulwiita ancaakalinga kweelete kucitila boobo. Wakaamba ayi: “Mukwiinga maswi aya alyeelete kushomwa alimwi ngalushinisho”—nkokwaamba ayi inga twashooma ayi shoonse nshaamba nshancine alimwi shilacitika. Tulalumba kwaamba ayi Joni wakanyumfwila, Yehova ndyaakamulwiita ayi “ulembe.” Aboobo inga twabelenga pacishomesho cakwe Lesa ca Paladaiso akukutumana kuyeeya pashoolwe shibotu nsheshi tukacane.

12. Ino nceebonshi Yehova ncaakaambila ayi: ‘Shakumanishikwa!’

 ¹² Ino nshiinshi shakakonkelaawo Lesa nshaakaamba? Wakaamba ayi: ‘Shakumanishikwa!’ (Ciyu. 21:6) Ino nceebonshi Yehova ncaakaambila ayi shishomesho ishi shakumanishikwa kale? Mukwiinga taakuwo ceenga capa kwaamba ayi aalilwe kukumanisha kuyanda kwakwe. Lyalo Yehova wakaamba maswi aamwi eenga atucafwa kushoma ayi cishomesho cakwe cilaakukumanishikwa. Ino nshiinshi nshaakaamba?

13. Ino nceebonshi Yehova ncaakaambila ayi: “Nebo ndime Matalikilo alimwi aMamanino”?

¹³ Kweelana ambotwaambaawo, Yehova mwiine wakabandika a Joni mankanda otatwe mushili anga nshiloto. (Ciyu. 1:8; 21:​5, 6; 22:13) Pashiindi shoonse shotatwe, Yehova wakaamba ayi: “Nebo ndime Matalikilo (na Alufa) alimwi aMamanino (na Omega).” Libala lya Alufa ndyelyakutaanguna mumabala aciGiliki, lyalo libala lya Omega ndyolyakweelaako. Aboobo Yehova ndyaakaamba ayi “ndime Matalikilo (na Alufa) alimwi aMamanino (na Omega),” wakalinga kusansulula ayi na watalika kucita cintu cimwi, alashinisha kwaamba ayi wacikumanisha.

14. (a) Amwaambe cakubonenaako citondesha Yehova ndyaakaamba ayi ‘Alufa’ andyeshi akaambe ayi ‘Omega.’ (b) Ino maswi ngotucana pa Matalikilo 2:​1-3 alatucafwa kushoma nshi?

¹⁴ Pesule lyakulenga Adamu a Efa, Yehova wakabalwiita ncaakabalengela alimwi ancaakalengela cishi. Baibo ilaamba ayi: “Lyalo Lesa wakabapa coolwe akubaambila ayi: ‘Amushalane mufule, akususha cishi ca panshi.’” (Mata. 1:28) Paciindi ici, Yehova wakaamba luyaando ndwaakalengela cishi abantu. Aya akalinga ngamatalikilo, na ‘Alufa.’ Na luyaando lwakwe lukakumanishikwe alimwi bantu banyumfwila bamulunyungu lwakwe Adamu bakasushe cishi akucaalula kuba Paladaiso, ayo  alaakuba ngomamanino na ‘Omega.’ Pesule lyakwaamba ayi Yehova wamanisha kulenga ‘liculu acishi ca panshi alimwi ashintu shoonse shiliimo shamana kulengwa,’ wakaamba maswi akatondesha ayi luyaando lwakwe lulaakukumanishikwa. Maswi ayo tulaacana pa Matalikilo 2:​1-3. (Amubelenge.) Yehova wakaamba ayi bushiku bwa namba 7 bulisalalite. Ici cilatondesha ayi Yehova alaakukumanisha luyaando ndwaakalengela bantu acishi, kumamanino abushiku bwa namba 7.

15. Ino nciinshi mpashi cakapa Satana kuyeeya ayi wacikoonsha kupa kwaamba ayi Yehova aalilwe kukumanisha luyaando lwakwe?

¹⁵ Adamu a Efa ndyebakapondoka, bakabisha akupa kwaamba ayi bana babo bapyane bubi alufu. (Loma. 5:12) Aboobo cakaboneka anga teshi cikakonsheke kwaamba ayi bantu bamaninite banyumfwila Yehova bakasushe cishi. Sa Satana wakacikoonsha kupa kwaamba ayi Yehova aalilwe kukumanisha cishomesho cakwe? Mpashi Satana wakayeeya ayi Yehova teshi akacikoonshe kukumanisha cishomesho cakwe. Alimwi mpashi wakayeeya ayi Yehova alaakucaya Adamu a Efa akulenga bantu bamwi bamaninite kwaamba ayi akakumanishe luyaando ndwaakalengela bantu. Ano naakwiinga Lesa wakacita boobo, naakwiinga Satana wakamubekesha ayi ngumubeshi. Ino nceebonshi? Mukwiinga pa Matalikilo 1:​28, Yehova wakalwiita Adamu a Efa ayi bamulunyungu lwabo balaakususha cishi.

16. Ino nceebonshi mpashi Satana wakayeeya ayi Yehova teshi acikoonshe kukumanisha luyaando lwakwe?

¹⁶ Ino nciinshi cimwi mpashi Satana ncaakayeeya ayi Lesa nceshi acite? Mpashi Satana wakayeeya ayi Yehova inga wasuminisha Adamu a Efa kuba abaana, abo beshi bakatolelele kuba batamaninite. (Shiku. 7:20; Loma. 3:23) Alimwi nicalinga cakwaamba ayi bana bakwe Adamu a Efa balaakutolelela kuba batamaninite, naakwiinga Satana wakaamba ayi Yehova waalilwa kukumanisha luyaando lwakwe lwakwaamba ayi cishi cikasule abantu bamaninite.

17. Ino nshiinshi Yehova nshaakacita, Satana alimwi a Adamu a Efa ndyebakapondoka alimwi ino nshiinshi sheshi shikacitike kunembo? (Amubone acikope.)

¹⁷ Satana taakalinga kucikoonsha kushiba Yehova nshaakalinga kusa mukucita. Nabi kwaamba ayi Satana alimwi a Adamu a Efa bakapondoka, Yehova wakalinga kucishi kabotu mbwaakalinga kusa mukukumanisha luyaando lwakwe. (Kulu. 92:5) Yehova wakakumanisha luyaando lwakwe kwiinda mukusuminisha Adamu a Efa kuba abaana. Aboobo wakatondesha ayi ngu Lesa utabeci. Alimwi wakatondesha ayi lyoonse alakumanisha nshaashomesha. Wakashinisha kwaamba ayi luyaando lwakwe lukakumanishikwe kwiinda  mukupa “lunyungu” lwakalinga kusa mukupulusha bana bakwe Adamu a Efa banyumfwila. (Mata. 3:15; 22:18) Cilyeelete cakamukankamika abuumbi Satana Yehova ndyaakabika bubaambo bwacilubula! Ino nceebonshi? Mukwiinga Yehova wakatupa cilubula ceebo calusuno lwakwe. (Mate. 20:28; Joni 3:16) Satana taacitewo lusuno mukwiinga alilisuni. Aboobo ino nshiinshi sheshi shikacitike ceebo ca cilubula? Kumamanino a Buleelo bwa Myaaka 1,000, bana bakwe Adamu a Efa bamaninite alimwi banyumfwila Lesa, balaakukala mu paladaiso pacishi, kweelana a Yehova mbwaakalinga kusuni pakutaanguna. Paciindi ici, cilaakuba anga Yehova waamba ayi ‘Omega.’

18. Ino nsheebo nshi shotatwe Lesa nshaakaamba sheenga shatupa kushoma ayi cishi cilaakuba Paladaiso? (Amubone akabokosi kacite mutwi utokwaamba ayi “ Sheebo Shotatwe Sheenga Shatupa Kushoma Cishomesho Cakwe Yehova.”)

¹⁸ Mumutwi uyu, twabandika pasheebo sheenga shatupa kushoma ayi cishi cilaakuba Paladaiso. Ino nshiinshi nsheenga twalwiitako bamwi kwaamba ayi tubacaafwe kushoma ayi ici cilaakucitika? Cakutaanguna, Yehova mwiine ngowakatushomesha. Libuku lya Ciyubululo lilaamba ayi: “Ukala pacuuna ca bwaami wakaamba ayi: ‘Amubone! Ono bulya shintu shoonse ntooshipanga cipya!’” Alicite busongo, nkusu alimwi alusuno lwakukumanisha ncaakashomesha. Cabili, Yehova alicishi kwaamba ayi nshaakaamba shilaakucitika. Nceceeco ncaakaambila ayi: ‘Maswi aya alyeelete kushomwa alimwi ngalushinisho. . . . Shakumanishikwa!’ Catatu, na Yehova watalika kucita cintu cimwi, alashinisha kwaamba ayi wacikumanisha. Nceceeco ncaakaambila ayi: “Nebo ndime Matalikilo (na Alufa) alimwi aMamanino (na Omega).” Yehova alaakutondesha ayi Satana ngumubeshi alimwi inga taapi kwaamba ayi Yehova aalilwe kukumanisha luyaando lwakwe.

19. Ino inga mwacita buyani na muntu kaatonsha cishomesho cakwe Lesa ca Paladaiso?

¹⁹ Mutaluubi kwaamba ayi na mwalwiitako bamwi Yehova nshaakaamba kwaamba ayi atucaafwe kushoma shishomesho shakwe, mulayumya lushomo lwanu muli nguwe. Aboobo ino mulaakucita buyani na pesule lyakubelengelako umwi cishomesho ca Paladaiso ncetucana pa Ciyubululo 21:4 akaambe ayi, “Nshomwaamba nshibotu, sombi nshishomiwo ayi shilaakucitika?” Inga mwamubelengela vesi 5 a 6 lyalo akumusansulwita. Amumucaafwe kushiba Yehova mbwaashinishite kukumanisha cishomesho ici.—Isa. 65:16.