1. Ino nceebonshi tulisangalete kuba Bakamboni Bakwe Yehova?

TULISANGALETE abuumbi kuba Bakamboni Bakwe Yehova! Tuli bantu bakwe Yehova alimwi tulatondesha ayi tuli Bakamboni bakwe kwiinda mukushimikilaako bamwi alimwi akubeeisha pali nguwe. Tulasangalala na twacaafwa muntu ucite ‘moyo ulibambite kutambula buumi butamaani’ kuba shikwiiya. (Milimo 13:48) Tulalinyumfwa bweenka mbuli Yesu uyo “wakasangalala mumushimu usalashi,” bashikwiiya bakwe ndyebakamulwiita shibotu shakabacitikila ndyebakalinga kushimikila.​—Luka 10:1, 17, 21.

2. Ino inga twatondesha buyani ayi incito yakushimikila ilayandika abuumbi kulindiswe?

² Incito yakushimikila ilayandika abuumbi kulindiswe. Mutumwi Paulo wakayuminisha Timoti ayi: “Bikila maano kubuumi bwako alimwi akwiisha kwako.” Alimwi wakeelikawo akwaamba ayi: “Kwiinda mukucita boobo ulaakulipulusha omwiine alimwi abaabo bakukutika.” (1 Timo. 4:16) Aboobo incito yesu yakushimikila ilapulusha bantu. Tulabikila maano kubuumi bwesu mukwiinga tuli balelwa ba Bwaami bwakwe Lesa. Lyoonse tulisuni kunoocita shintu shipa kwaamba ayi Yehova alumbaishikwe alimwi shitondesha ayi tulashoma mumakani abotu ngotushimikila. (Filip. 1:27) Tulatondesha ayi tulabikila maano kukwiisha kwesu, kwiinda mukulibambila kabotu ndyetutooya mukushimikila alimwi akusenga Yehova kwaamba ayi atucaafwe katutana kushimikilaako bamwi.

3. Sa bantu boonse inga basumina kwiiya makani a Bwaami? Amwaambe cakubonenaako.

³ Nabi twacita shoonse nsheenga twacikonsha kwaamba ayi tushimikileeko bamwi, bantu bakumusena nkotushimikila inga kabatasuniiwo kwiiya makani abotu a Bwaami. Amuyeeye shakacitikila Mukwesu Georg Lindal uyo wakalingabo eenka mbuli Kamboni mucishi ca Iceland kuswa mu 1929 kushika mu 1947. Wakaabila mabuku aanji abuumbi; sombi taakuwo nabi womwi wakaba Kamboni. Wakalemba ayi: “Bantu bamwi bakalinga kupikisha makani amu  Baibo, sombi baanji tabakalinga kusuniiwo kukutika.” Bamishonali bakaswa kucikolo ca Gilyadi bakaya mukucafwilisha muncito yakushimikila kucishi ici. Nacibi boobo, pakeenda myaaka 9 bantu bamwi mucishi ici ndyebakalyaaba kuli Yehova alimwi akubombekwa.

4. Ino inga twalinyumfwa buyani na bantu kabatasuniiwo kwiiya makani abotu?

⁴ Tulalinyumfwa cibiibi na bantu kabatasuniiwo kwiiya Baibo. Inga twalinyumfwa mbuli mbwaakalinyumfwa Paulo uyo wakaba a “buumba bunene abuumbi alimwi akupenshekwa mumoyo” ceebo cakwaamba ayi baJuda baanji bakakaka kushoma ayi Yesu ngo Mesiya. (Loma. 9:1-3) Ino mbuyani na mwasebensa cankusu kucafwa shikwiiya alimwi akumupaililaako sombi taatooya panembo, lyalo mwasalawo kwaamba ayi mulyeelete kucileka kumwiisha? Na mpashi tamuna kucafwaawo kale muntu kushikila wabombekwa. Sa mulyeelete kulinyumfwa cibiibi akuyeeya ayi Yehova taatosangalala muncito yanu yakushimikila? Mumutwi uyu tutocana shikumbulo kumiipusho yobilo: (1) Ino nshiinshi shitondesha ayi tutosebensa kabotu muncito yakushimikila? (2) Ino nshiinshi nshotweelete kulangila ndyetutoshimikila bamwi?

5. Ino nceebonshi teshi shoonse nshetucita muncito yakwe Yehova sheenga shaba kweelana ambotutolangila?

⁵ Baibo ilaamba pamuntu ucita kuyanda kwakwe Lesa ayi: “Mushintu shoonse nshaacita, lakwe ulaswitilila.” (Kulu. 1:3) Nacibi boobo, ici tacisansululi ayi shoonse nshetucita muncito yakwe Yehova, shilaakuba kweelana a mbotutolangila. Buumi bwesu “buliswite mapensho” mukwiinga soonse tatumaninite. (Jobo 14:1) Kwiilikaawo, cimwi ciindi abo beshikutupikisha inga batukasha kushimikila. (1 Koli. 16:9; 1 Tesa. 2:18) Aboobo ino nshiinshi Yehova nshaabikilaako maano kwaamba ayi abone na tutosebensa kabotu muncito yakushimikila nabi sobwe? Amuleke tubandike panjiisho shamu Baibo sheenga shatucafwa kucana cikumbulo kumwiipusho uyu.

6. Ino nshiinshi shitondesha ayi tutosebensa kabotu muncito yakushimikila?

⁶ Yehova alabikila maano kukusebensa cankusu alimwi akuliyumya kwesu. Yehova alakondwa palindiswe na katusebensa cankusu muncito yakushimikila ceebo cakwaamba ayi tulimusuni, nabi kwaamba ayi bantu tabasuniiwo kukutika. Paulo wakalemba ayi: ‘Lesa uliluleme, aboobo teshi akalube ncito njemwakacita, alimwi alusuno ndomwakabonesha paliina lyakwe kwiinda mulucafwo ndomwakacita aloolo ndomucicita kubasalalite.’ (Ebu. 6:10) Yehova aleebaluka mbotusebensa cankusu muncito yakwe alimwi ambotumusuni, nabi kwaamba ayi tatuna kucafwaawo kale shikwiiya Baibo kubombekwa. Aboobo inga mwakonkela maswi Paulo ngaakalwiita bene Kolinto ndyakaamba ayi: “Tamutosebensela Mwaami kwakubula mpindu,” nabi kwaamba ayi pesule lyakusebensa cankusu shintu tashikwe kukumanishikwa kweelana ambomwalinga kulangila.​—1 Koli. 15:58.

7. Ino nshiinshi nsheenga tweeya kuswa kusheesho mutumwi Paulo nshaakaamba pancito yakwe yakushimikila?

⁷ Mutumwi Paulo wakalinga mishonali wakalinga kusebensa kabotu abuumbi, akucafwilisha  kutalika mabungano apya mu mandabala aanji. Sombi bantu bamwi ndyebakatalika kwaamba ayi Paulo taakalinga kwiisha kabotu, taakwe kwaamba pakufula kwabantu mbwaakacafwa kuba Beneklistu. Sombi Paulo wakalemba ayi: “Nebo ndeendaawo kusebensa cankusu.” (2 Koli. 11:23) Bweenka mbuli Paulo, munookwiibaluka kwaamba ayi Yehova alabikila maano abuumbi kukusebensa cankusu alimwi akuliyumya kwanu.

8. Ino nciinshi ncotweelete kunokwiibaluka pancito yesu yakushimikila?

⁸ Incito yesu yakushimikila ilasangalasha Yehova. Yesu wakatuma bashikwiiya bali 70 kuya mukushimikila makani a Bwaami. Lyalo pesule lyakushimikila, “bakaboola kabasangalete.” Ino nciinshi cakabapa kuba a lusangalalo? Bakaamba ayi: “Abashikaswa boonse bakalinga kunyumfwila nditwakalinga kubakusha muliina lyanu.” Nacibi boobo, Yesu wakabacafwa kwaalula mbobakalinga kuyeeya kwiinda mukubalwiita ayi: “Mutasangalali kwaamba ayi bashikaswa batomunyumfwila, sombi amusangalale mukwiinga meena anu alilembetwe kwiculu.” (Luka 10:17-20) Yesu wakalinga kucishi kwaamba ayi teshi lyoonse ndyeshi bakanoocita shintu shilibetele muncito yakushimikila. Alimwi tatucishiwo na mbantu bongaye bakaba Beneklistu pabaabo bashikwiiya bakwe Yesu mbobakashimikila pakutaanguna. Aboobo bashikwiiya bakwe Yesu tabakalinga kweelete kubabo a lusangalalo ceebo ca shintu nshobakalinga kukumanisha muncito yakushimikila, sombi ciinditeewo nkushiba ayi Yehova wakalinga kukondetwe pakusebensa cankusu kwabo.

9. Kweelana a Bene Galatiya 6:7-9, ino nshiinshi sheshi shikasweemo na twatolelela kushimikila?

⁹ Na twatolelela kushimikila, tulaakuba abuumi butamaani. Na twaciita shoonse nsheenga twacikonsha kushimikila akwiisha bantu makani abotu, nkokwaamba ayi ‘tutoshanga kweelana a mushimu.’ Ino nciinshi nceenga twaambila boobo? Mukwiinga na katusebensa ncito yakushimikila, tulatondesha ayi tulisuni kutanjililwa amushimu usalashi. Na twabula ‘kucileka’ kushimikila, Yehova watushomesha ayi alaakutupa buumi butamaani nabi kwaamba ayi tatukwe kucafwaawo muntu kubombekwa.​—Amubelenge Bene Galatiya 6:7-9.

10. Ino nciinshi cipa kwaamba ayi bantu bamwi basumine na kukaka kukutika kumakani ngotushimikila?

¹⁰ Kwiiya cancine kuliimfwi bunene pamuntu mwiine. Yesu wakasansulula cancine ici ndyaakaamba cikoshanyo ca muntu wakashanga mbuto mubulongo bupusenepusene, sombi mbuto yakashangwa mubulongo bubotu njeyakacata shisepo. (Luka 8:5-8) Yesu wakaamba ayi bulongo bupusenepusene buleemikaninako myoyo ya bantu abo basumina na kukaka kukutika “kumaswi akwe Lesa.” (Luka 8:11-15) Bweenka mbuli shikushanga, inga tatupi kwaamba ayi cancine cikomene mumyoyo ya bantu mbotushimikila. Incito yesu nkutolelela kushanga mbuto shibotu sha Bwaami. Paulo wakaamba ayi: “Muntu womwi awomwi ulaakulambulwa kweelana a milimo njaakacita,” kuteshi nshakakumanisha muncito yakwe.​—1 Koli. 3:8.

11. Ino nceebonshi Yehova wakasangalala pancito yakushimikila yakwe Nowa nabi kwaamba ayi bantu tabakwe kumukutika? (Amubone cikope cili papeeji yakutaanguna.)

¹¹ Kuswabo kale kale, basebenshi bakwe Yehova bakalinga kushimikila bantu batakalinga kusuni kukutika. Kucakubonenaako, Nowa “wakashimikila shabululami” kwamyaaka 40 na 50. (2 Pit. 2:5) Ncakutatoonsha kwaamba ayi wakalinga kulangila ayi bantu bamwi balaakumukutika. Nacibi boobo, Yehova taakwe kwaamba ayi ishi shilaakucitika. Sombi ndyaakalinga kulwiita Nowa kwaamba ayi apange bwaato wakaamba ayi: “Ukenjile mubwaato amukaako, bana bako abamakaabo.” (Mata. 6:18) Alimwi Yehova ndyaakamulwiita kukomena kwa bwaato mbwaakalinga kweelete kupanga, Nowa alyeelete wakashiba ayi teshi bantu baanji beshi bakakutike kuli nguwe mukwiinga musena naakwiinga wakaceya mubwaato. (Mata. 6:15)  Ano kweelana ambotushi, taakuwo nabi womwi wakakutika kuli nguwe. (Mata. 7:7) Sa Yehova wakabona ayi Nowa wakaalilwa kusebensa ncito yakushimikila? Sobwe napaceyi! Yehova wakasangalala pali Nowa mukwiinga wakacita shoonse Lesa nshaakamulwiita.​—Mata. 6:22.

12. Ino nciinshi cakacafwa mushinshimi Jelemiya kuba alusangalalo muncito njaakapekwa nabi kwaamba ayi bantu tabakalinga kusuniiwo kukutika alimwi bakalinga kumupikisha?

¹² Mushinshimi Jelemiya alakwe wakashimikila kwamyaaka iindilila 40 nabi kwaamba ayi bantu tabakalinga kusuniiwo kumukutika alimwi bakalinga kumupikisha. Wakalefuka abuumbi ceebo ca “kucobolwa akusekwa” kubaabo bakalinga kumupikisha cakwaamba ayi wakalinga kusuni kucileka kusebensa ncito Lesa njaakamupa. (Jele. 20:8, 9) Sombi Jelemiya taakwe kuboolela pesule! Ino nciinshi cakamucafwa kutolelela kusebensa ncito njaakapekwa alimwi akucana lusangalalo muncito iyi? Wakabikila maano kushintu shobilo shiyandika abuumbi. Cakutaanguna, makani akwe Lesa Jelemiya ngaakalinga kushimikila bantu, akabacafwa ‘kulangila buumi bubotu kunembo.’ (Jele. 29:11) Cabili, Yehova wakasala Jelemiya kuba shinkombe wakwe. (Jele. 15:16) Aswebo tulashimikila bantu makani abapa kulangila buumi bubotu kunembo alimwi tuleetwa paliina lyakwe Yehova, mbuli Bakamboni bakwe. Na twabikila maano pashintu shobilo ishi shiyandika abuumbi, inga twaba alusangalalo na bantu batukutika nabi sobwe.

13. Ino nshiinshi nsheenga tweeya kuswa kucikoshanyo Yesu ncakaamba ncotucana pa Maako 4:26-29?

¹³ Bantu balaya panembo lwakumushimu paniini paniini. Yesu wakaamba pacancine ici ndyaakaamba cikoshanyo ca muntu ushanga mbuto akoona. (Amubelenge Maako 4:26-29.) Pesule lyakwaamba ayi muntu uyo washanga mbuto, imbuto isho shakalinga kuya cikomena paniini paniini alimwi taakuwo ncaakalinga kweelete kucita kwaamba ayi shikomene cakufwambaana. Amwebo inga mwayandika kulindila kwaciindi cilaamfu kwaamba ayi shikwiiya Baibo atalike kukonkela nshatokwiiya. Bweenka mulimi mbweenga taapi kwaamba ayi shishango shikomene cakufwambaana kweelana ambweenga kaasuni, aswebo inga tatupi kwaamba ayi shikwiiya Baibo aye panembo lwakumushimu cakufwambaana, kweelana ambotusuni. Aboobo tamweelete kulefuka nabi kuboolela pesule na bantu mbomwiisha Baibo tabatooya panembo cakufwambaana kweelana ambomwalinga kulangila. Bweenka mbuli bulimi, kucafwa muntu kwaamba ayi abe shikwiiya kulayandika kukalika moyo.​—Jemu. 5:7, 8.

14. Ino ncakubonenaako nshi citondesha ayi inga peenda ciindi cilaamfu kwaamba ayi bantu batalike kukutika kulindiswe?

¹⁴ Mumisena imwi, paleenda ciindi cilaamfu kwaamba ayi bantu babombekwe. Amuyeeye pacakubonenaako caba Gladys aba Ruby Allen, benankashi bakashalwa lifumo lyomwi abo bakatumwa mbuli bapainiya baciindi coonse mu 1959, mu tauni imwi kumusena wiitwa ayi Quebec, mucishi ca Canada. * Mukwiinga bantu bakumusena uku bakalinga kuloonda bamatanjilili babupailishi alimwi abantu mbobakalinga kubambenaabo nsheenga baamba na kucita na babandika a Bakamboni, bakalinga kukaka kukutika kuli ndiswe. Ba Gladys bakaamba ayi: “Twakalinga kushimikila kuŋanda aŋanda kwa mawoola 8 pabushiku kwamyaaka yobilo, sombi taakuwo muntu wakasumina kubandika andiswe! Bantu bakalinga kucalulabo shisasa akubona ayi ndiswe lyalo akuboolela. Sombi tatukwe kuboolela pesule.” Mukuya kwaciindi bantu bakaaluka lyalo akutalika kukutika. Pacecino ciindi, mutauni iyi muli mabungano otatwe.​—Isa. 60:22.

15. Ino 1 Bene Kolinto 3:6, 7, ilatwiisha nshi pancito yakucafwa bantu kuba bashikwiiya?

¹⁵ Kwaamba ayi muntu abe shikwiiya alayandika kucafwikwa kubantu baanji. Kuli mwaambo wakwaamba ayi cilatola kusebensela pomwi kwa libungano kwaamba ayi muntu aye panembo  akubombekwa. (Amubelenge 1 Bene Kolinto 3:6, 7.) Kucakubonenaako, mukwesu inga waabila katilakiti na magazini kumuntu usuni kwiiya. Sombi mukwesu uyu waalilwa kwaamba ayi abooleleeko paciindi ceelete, aboobo walwiita mukwesu umwi kwaamba ayi akayeeko. Lyalo shikushimikila uyo wacikonsha kutalika ciiyo ca Baibo. Alakwe shikushimikila uyo weetaako bamakwesu abenankashi bapusenepusene kuciiyo cakwe. Alimwi abo mbwatooyaabo bayuminisha shikwiiya munshila shipusenepusene. Mukwesu nabi nankashi uliwoonse eshi akacanikeewo paciiyo ici, ulaakucafwa shikwiiya Baibo uyu kwiiya shiinji pali Yehova. Aboobo abo boonse bakaabanamo lubasu kucafwa umwi, inga basangalala na muntu uyo wabombekwa.​—Joni 4:35-38.

16. Ino nceebonshi inga mwatolelela kuba alusangalalo muncito yakushimikila nabi kwaamba ayi inga tamuciti shiinji ceebo cakuciswa ciswa na kubula nkusu?

¹⁶ Ino mbuyani na ceebo cakuciswa ciswa akubula nkusu tamucikoonshi kushimikila akwiisha mbuli mbomwakalinga kucita kale kale? Inga mwatolelela kuba alusangalalo pasheesho nsheenga kamucita muncito yakutebula. Amuyeeye pacakubonenaako ca Mwaami Defedi abasankwa mbwaakalingaabo ndyebakapulusha mikwashi yabo a shintu shabo kubene Amaleki. Basankwa bali 200 bakalema abuumbi cakwaamba ayi tabakwe kucikonsha kuya kunkondo, aboobo bakacaala kabalama shintu. Pesule lyakukoma ku nkondo, Defedi wakaamba ayi shintu nshebakabwesa bashaabane pakati abaabo bakacaala. (1 Samwe. 30:21-25) Ubu mbocibete akuncito yakucafwa bantu kuba bashikwiiya itocitwa nsengwe yoonse. Inga tamuciti shiinji muncito yakushimikila akwiisha kweelana ambweenga kamusuni. Sombi na mwacita shoonse nsheenga mwacikonsha, lyoonse inga kamusangalala abuumbi na mwaboona muntu womwi wacafwikwa kutalika kweenda panshila itola kubuumi.

17. Ino nciinshi ncotweelete kulumba Yehova?

¹⁷ Tulalumba Yehova ceebo cakwaamba ayi ulabona ncito njetumusebensela munshila yeelete. Alicishi kwaamba ayi inga tatukakatishi bantu kutukutika na kutalika kumusebensela. Nacibi boobo, alabona mbotumusebensela cankusu alimwi ambotumusuni, aboobo alatupa shoolwe. Alimwi alatucafwa kushiba mbweenga katuba alusangalalo mushintu shoonse nshetucita muncito yakushimikila. (Joni 14:12) Inga twashoma cakutatonsha kwaamba ayi Lesa alaakusangalala palindiswe, na tukabule kuboolela pesule!