1. Ino Yehova inga twamwiita ayi ngani kuli ndiswe?

 MUMUKWASHI wakwe Yehova wabaabo bamulambila muli Yesu, “mutaanshi kushalwa pashilengwa shoonse,” alimwi abaanjelo baanji. (Kolo. 1:15; Kulu. 103:20) Yesu ndyaakalinga pacishi capanshi, wakacafwa bantu kunyumfwishisha ayi inga beeta Yehova ayi Ishiwabo. Yesu ndyaakalinga kwaamba pa bashikwiiya bakwe, wakaamba pali Yehova ayi “baTa alimwi mbobaishiwanu.” (Joni 20:17) Alimwi na twaaba buumi bwesu kuli Yehova akubombekwa, tulaba lubasu lwamukwashi wabamakwesu abenankashi bacite lusuno.​—Maako 10:29, 30.

2. Ino nshiinshi nsheshi twiiye mumutwi uyu?

² Bamwi cilababeta ciyumu kubona Yehova mbuli Ishiwabo shilusuno. Bamwi inga tabashibi mbweenga batondesha lusuno kubamakwesu abenankashi. Mumutwi uyu tutokwiiya Yesu mbwaatucafwa kubona Yehova mbuli Ishiwesu utusuni alimwi akwaamba ayi inga twaba abushicibusa buyumu anguwe. Alimwi tutokwiiya ambweenga twatondesha lusuno kubamakwesu abenankashi kwiinda mukukonkela cakubonenaako cakwe Yehova.

3. Ino mupailo wacakubonenaako ulatucafwa buyani kuba abushicibusa buyumu a Yehova?

³ Yehova ngu Ishiwesu shilusuno. Yesu alisuni kwaamba ayi tunoobona Yehova bweenka lakwe mbwaamubona, nkokwaamba ayi mbuli mushali shinkumbu alimwi shilusuno ngweenga twabandikaakwe paciindi cili coonse, kuteshi muntu utacite nkumbu utulwiitabo shakucita. Maswi Yesu ngakaamba ndyaakalinga kwiisha bashikwiiya bakwe bwakupaila alatondesha ayi ubu mbotweelete kunobona Yehova. Wakatalika mupailo wacakubonenaako amaswi akwaamba ayi: “Nobeshiwesu.” (Mate. 6:9) Yesu naakwiinga wakatulwiita kunokwiita Yehova ayi “Shinkusu shoonse,” “Mulengi,”  na “Mwaami walyoonse alyoonse.” Maswi aya oonse akalingabo kabotu mukwiinga Baibo ilasebensesha maswi aya kwaamba pali Yehova. (Mata. 49:25; Isa. 40:28, NWT; 1 Timo. 1:17, NWT) Sombi Yesu wakatulwiita ayi tunokwiita Yehova ayi “Nobeshiwesu.”

4. Ino tulishi buyani ayi Yehova alisuni ayi tube abushicibusa buyumu anguwe?

⁴ Sa cilamubeta ciyumu kubona Yehova mbuli Ishiwesu shilusuno? Sobamwi mbotulinyumfwa. Na baishiwesu tabakalinga kututondesha nkumbu, inga caba ciyumu kuyeeya ayi kuli Ishiwesu utusuni. Cilayuminisha abuumbi kushiba kwaamba ayi Yehova alanyumfwisha mbotulinyumfwa! Alisuni kuba abushicibusa buyumu andiswe. Nceceeco Maswi akwe alatuyuminisha ayi: “Amusene pafwiifwi a Lesa alakwe alaakusena pafwiifwi amwebo.” (Jemu. 4:8) Yehova alitusuni alimwi alatulwiita ayi alaakuba mushali wesu ulikabotu abuumbi kwiinda mushali uliwoonse.

5. Kweelana a Luka 10:22, ino Yesu inga watucafwa buyani kuba abushicibusa buyumu a Yehova?

⁵ Yesu inga watucafwa kuba abushicibusa buyumu a Yehova. Yesu alimushi kabotu Yehova alimwi alakonkela mibo yakwe cakumaninina. Nceceeco ncaakaambila ayi: “Uyo wabona ndime wabona abaTa.” (Joni 14:9) Bweenka mbuli munene wesu, Yesu alatwiisha mbweenga twalemeka akunyumfwila Ishiwesu, nshotweelete kucita kwaamba ayi tunomusangalasha, akuleya kucita shimukalasha. Alimwi Yesu alatucafwa kunyumfwishisha ayi Yehova alicite nkumbu abuumbi alimwi ngushilusuno. (Amubelenge Luka 10:22.) Amuleke tubandike pashakubonenaako shimwi.

6. Ino tulishi buyani ayi Yehova wakakutika kuli Yesu? Amwaambe shakubonenaako.

⁶ Yehova alakutika kubana bakwe. Amuyeeye Yehova mbwaakakutika ku Mwanaakwe mutaanshi kushalwa. Ncakutatoonsha kwaamba ayi Yehova wakakutika mipailo iinji Mwanaakwe njakapaila ndyaakalinga pacishi capanshi. (Luka 5:16) Wakakutika Yesu ndyaakalinga kupailila pashakucita shiyandika abuumbi mbuli paciindi ndyaakalinga kusala batumwi bali 12. (Luka 6:12, 13) Alimwi Yehova wakakutika Yesu ndyaakalinga kupaila kaacite buumba abuumbi. Ndyekwakacaalabo paniini kwaamba ayi bamwaabe, wakapaila abuumbi kuli Baishi pabweelesho  mbwaakalinga kusa mukwiindaamo. Yehova taakwe kukutikabo ku mupailo wakwe Yesu, sombi wakatuma munjelo kusa mukuyuminisha Mwanaakwe ngwaasuni abuumbi.​—Luka 22:41-44.

7. Ino mulalinyumfwa buyani ceebo cakushiba kwaamba ayi Yehova alakutika kumipailo ya bantu bakwe?

⁷ Amunshiku shino Yehova alakutika kumipailo yesu. Alimwi alaikumbula paciindi ceelete alimwi munshila ibotu kwiindaawo. (Kulu. 116:1, 2) Nankashi umwi ku India wakabona Yehova mbwaakakumbula mipailo yakwe. Wakalinga kucite lipenshi lyakulisukama abuumbi alimwi wakapaililaawo abuumbi palipenshi ili kuli Yehova. Wakalemba ayi: “Pulogilamu ya JW Bulodikasiti^® ya May 2019 iyo yakalinga kwaamba pa nsheenga twaciita na twalisukama, yakancafwa abuumbi. Cakalinga ncikumbulo kumipailo yangu.”

8. Ino Yehova wakatondesha buyani lusuno kuli Yesu?

⁸ Yehova alitusuni alimwi alatubikilako maano bweenka mbwaakalinga kusuni Yesu akumubikila maano ndyaakalinga pacishi. (Joni 5:20) Wakacafwa Yesu kutolelela kuba alushomo luyumu, wakamuyuminisha ndyaakalinga walisukama alimwi wakalinga kumupa nshaakalinga kuyandika lwakumubili. Alimwi Yehova wakalwiita Mwanaakwe ayi alimusuni alimwi alikondetwe anguwe. (Mate. 3:16, 17) Yesu taakalinga kulinyumfwa kuba eenka mukwiinga wakalinga kucishi kwaamba ayi Ishi wakwiculu alaakutolelela kuba anguwe alimwi aalakunomucafwa.​—Joni 8:16.

9. Ino tulishi buyani ayi Yehova alitusuni?

⁹ Bweenka mbuli Yesu, soonse twabona Yehova mbwaatutondesha lusuno munshila shiinji. Yehova wakatusuminisha kuba beshicibusa bakwe alimwi wakatupa bamakwesu abenankashi baanji batusuni batucafwa kuba alusangalalo alimwi batuyuminisha na twalisukama. (Joni 6:44) Yehova alatupa shakulya shakumushimu nshetuyandika kwaamba ayi tutolelele kuba alushomo luyumu. Alimwi alatucafwa kuba anshetuyandika lwakumubili. (Mate. 6:31, 32) Na twayeeya mbwaatusuni, aswebo tulamusuna abuumbi.

10. Ino nshiinshi nsheenga tweeya kuli Yehova mbwaatondesha lusuno kubamakwesu abenankashi?

¹⁰ Yehova alibasuni bamakwesu abenankashi. Sombi inga catubeta ciyumu kubasuna akubatondesha lusuno. Alimwi cimwi ciindi inga caba ciyumu kucita boobo ceebo ca milawo bantu njobakonkela kumusena nkotwakakulila na ceebo ca kupusana kwa nkulilo. Alimwi soonse tulacita shilubo shikalasha bamwi. Sombi soonse inga twacita nsheenga twacikonsha kwaamba ayi tunosunana abuumbi mumukwashi wesu wakumushimu. Munshila nshi? Kwiinda mukutondesha lusuno kubamakwesu abenankashi bweenka Yehova mbwaacita. (Efe. 5:1, 2; 1 Joni 4:19) Amuleke tubandike nsheenga tweeya kucakubonenaako cakwe Yehova.

11. Ino Yesu wakakonkela buyani cakubonenaako cakwe Yehova cakutondesha nkumbu?

¹¹ Yehova alatondesha “nkumbu.” (Luka 1:78) Muntu ucite nkumbu alalinyumfwa cibiibi na wabona bantu kabapenga alimwi alacitawo comwi kwaamba ayi abacaafwe akubayuminisha. Yesu wakakonkela cakubonenaako cakwe Yehova cakutondesha lusuno kubantu kwiinda mushintu nshaakalinga kubacitila. (Joni 5:19) Paciindi cimwi Yesu ndyaakabona bantu baanji “wakabanyumfwila nkumbu mukwiinga bakalinga kulemete akupenga anga nimbelele shitacite mweembeshi.” (Mate. 9:36) Yesu taakwe kweelabo pakubanyumfwila nkumbu, sombi wakacitawo comwi kwaamba ayi abacaafwe. Wakoolesha balwashi akucafwa baabo boonse ‘bakalinga kupengete akulemenwa.’​—Mate. 11:28-30; 14:14.

12. Ino nshiinshi nsheenga twaciita kwaamba ayi tutondeshe nkumbu kubamakwesu abenankashi?

¹² Na twayeeya pamapensho bamakwesu abenankashi ngobatokwiindaamo, tulaakubatondesha nkumbu. Kucakubonenaako, mpashi nankashi  inga kaacite lipenshi linene lyakuciswa. Nabi kwaamba ayi taambi palipenshi ndyaacite, inga wakondwa abuumbi na muntu umwi wamucafwa. Sa alacikonsha kuyandweta mukwashi wakwe shiyandika lwakumubili? Sa inga twamucafwa kwiinda mukumutelekelako shakulya na kumucafwa kubotesha muŋanda? Mpashi mukwesu incito yakamana. Inga twamupako maali aniini mpashi kwakubula akumulwiita ayi aswa kulindiswe kwaamba ayi tumucaafwe kushikila akacane ncito imwi.

13-14. Ino cakubonenaako cakwe Yehova ca bwaabi inga twacikonkela buyani?

¹³ Yehova ngushikwaaba. (Mate. 5:45) Tatweelete kulindila kwaamba ayi sombi bamakwesu abenankashi batusenge lucafwo ndyeenga twabatondesha nkumbu. Bweenka mbuli Yehova, inga twabacafwa nabi kabatana kutusenga kwaamba ayi tubacaafwe. Alatuloshesha mfula kwakubula akumusenga! Alimwi imfula ilacafwa bantu boonse kuteshibo baabo balumba. Yehova alatondesha ayi alitusuni kwiinda mukutupa shintu nshetuyandika. Tulimusuni abuumbi Yehova mukwiinga alicite nkumbu alimwi ngushikwaaba!

¹⁴ Bamakwesu abenankashi balakonkela cakubonenaako cakwe Yehova, aboobo balapako bamwi shintu nshebacite. Kucakubonenaako, mu 2013 ku Philippines kwakaloka mfula yacipuupu yakalinga kwiitwa ayi Haiyan iyo yakanyonyoola shintu shiinji. Bamakwesu baanji bakanyonyookelwa maanda alimwi ashintu shiinji. Sombi bamakwesu abenankashi baanji nsengwe yoonse, bakabacafwa cakufwambaana. Baanji bakapa maali na kwaabanamo lubasu muncito yakuyaka akubamba maanda ashika ku 750 mumyeenshi iniinibo! Paciindi cabulwashi bwa COVID-19, bamakwesu abenankashi bakasebensa cankusu kucafwa bashominyinaabo. Na katufwambaana kucafwa bamakwesu abenankashi, tulatondesha ayi tulibasuni.

15-16. Ino Luka 6:36 ilaamba ayi nshiinshi nshotweelete kucita kwaamba ayi tukonkele cakubonenaako cakwe Ishiwesu wakwiculu?

¹⁵ Yehova alicite nkumbu alimwi alalekelela. (Amubelenge Luka 6:36.) Bushiku abushiku Ishiwesu wakwiculu alatulekelela. (Kulu. 103:10-14) Bashikwiiya bakwe Yesu tabakalinga kumaninitewo. Nacibi boobo, Yesu wakalinga kubatondesha nkumbu alimwi akubalekelela. Alimwi  wakalyaaba kwaaba buumi bwakwe kwaamba ayi tulekelelwe shibiibi shesu. (1 Joni 2:1, 2) Tulaba abushicibusa buyumu a Yehova a Yesu mukwiinga balatutondesha nkumbu alimwi akutulekelela.

¹⁶ Tulasunana abuumbi na katulekelelana. (Efe. 4:32) Ncakwiila inga caba ciyumu kulekelela bamwi, aboobo tulyeelete kusebensa cankusu kwaamba ayi tunolekelela bamwi. Nankashi umwi wakaamba ayi mutwi wakalinga mu Njashi Yamulindilishi wakalinga kwaamba ayi “Munolekelelana” wakamucafwa kunolekelela bamwi. * Wakalemba ayi: “Mutwi uyu wakancafwa kunyumfwishisha mbweenga kulekelela bamwi kwancafwa. Wakasansulula ayi kulekelela bamwi takusansululi ayi cilubo ncobakacita cilibo kabotu alimwi tacikwe kukupa kulinyumfwa cibiibi. Sombi na walekelela muntu inga totoleleli kulinyumfwa cibiibi alimwi ulaba aluumuno.” Na katulelekela bamakwesu abenankashi tulatondesha ayi tulibasuni alimwi tutokonkela cakubonenaako cakwe Ishiwesu wakwiculu Yehova.

17. Kweelana a Mateyo 5:16, ino inga twacita buyani kwaamba ayi tulemeke Ishiwesu wakwiculu?

¹⁷ Ncoolwe cinene abuumbi kuba lubasu lwamukwashi wabamakwesu abenankashi nsengwe yoonse. Tulisuni kwaamba ayi bantu baanji batalike kulambila Lesa pomwi andiswe. Aboobo tatweelete kucita cili coonse ceenga capa kwaamba ayi bantu bayeeye shibiibi pali Yehova na bantu bakwe. Alimwi lyoonse tuleelesha kucita shibotu kwaamba ayi bantu basune kwiiya alimwi akusebensela Yehova.​—Amubelenge Mateyo 5:16.

18. Ino nciinshi ceenga catucafwa kushimikila cakutaloonda?

¹⁸ Cimwi ciindi bamwi inga batupikisha na kutupensha ceebo cakwaamba ayi tulanyumfwila Ishiwesu wakwiculu. Ino inga twacita buyani na tulaloonda kulwiitako bamwi nshotushoma? Inga twashoma ayi Yehova alimwi a Mwanaakwe balaakutucafwa. Yesu wakalwiita bashikwiiya bakwe ayi tabakalinga kweelete kulisukama ashakwaamba nabi bwakwaamba. Ino nceebonshi? Yesu wakabalwiita ayi, “Lesa ulaakumupa nsheshi mukaambe. Ceebo teshi ndimwe mweshi mukanokwaamba,  sombi mushimu wakwe Ishiwanu ngweshi ukabe muli ndimwe.”​—Mate. 10:19, 20.

19. Amwaambe cakubonenaako ca mukwesu wakashimikila cakutaloonda.

¹⁹ Amuyeeye pacakubonenaako caba Robert. Paciindi cimwi ndyebakatalikabo kwiiya Baibo alimwi kabatacishi makani aanji amu Baibo, bakabatola ku kooti uko nkobakaya mukusansulwiita moomboloshi ncobakakakila kunjila busoja. Bakasansulwita moomboloshi ayi tabakalinga kusuniiwo kunjila busoja mukwiinga bakalinga kusuni bamakwabo Beneklistu. Bakalinga kulumba abuumbi pacoolwe ncobacite cakuba mumukwashi wakumushimu! Cakuteengashila moomboloshi wakabeepusha ayi, “Ino bamakwanu mbaani?” Ba Robert tabakalinga kulangilaawo kubeepusha mwiipusho uyu. Sombi peenkaapo bakeebaluka lilembo lya bushiku bulya. Lyakalinga lilembo lya Mateyo 12:50 lyaamba ayi: “Uyo woonse ucita buyanda baTa bali kwiculu ngunandumi yangu, ngunankashi yangu alimwi mbobama.” Nabi kwaamba ayi ba Robert ndyebakatalikabo kwiiya Baibo, mushimu wakwe Yehova wakabacafwa kukumbula mwiipusho uyu alimwi amiipusho imwi iinji njobakabeepusha cakuteengashila. Yehova alyeelete wakakondwa pali ba Robert! Alimwi Yehova alakondwa na twacinka manungo muli nguwe kwaamba ayi atucaafwe kushimikila cakutaloonda ndyetuli mubukaalo buyumu.

20. Ino nciinshi ncotweelete kuba bashinishite kucita? (Joni 17:11, 15)

²⁰ Tulalumba abuumbi kuba lubasu lwamukwashi uyu ucite lusuno. Tulicite mushali uli kabotu kwiinda mushali uli woonse alimwi abamakwesu abenankashi batusuni. Lyoonse tulyeelete kunoolumba pacoolwe ici ncetucite. Satana alimwi abaabo bali kulubasu lwakwe baleelesha kutupa kutoonsha na Yehova alitusuni alimwi akweelesha kupilinganya lucatano ndotucite. Nacibi boobo, Yesu wakatupaililako kuli Ishiwesu kwaamba ayi tutolelele kuba bacatene mumukwashi wesu. (Amubelenge Joni 17:11, 15.) Yehova watolelela kukumbula mupailo uyu. Bweenka mbuli Yesu, tutanotoonsha kwaamba ayi Ishiwesu wakwiculu alitusuni alimwi alaakunootucafwa. Atube bashinishite kutolelela kuyumya bushicibusa bwesu abamakwesu abenankashi.