1. Ino nciinshi cibotu nceenga twasalawo kucita ndyetutooya bucembela?

 NA TWACEMBELA inga twatalika kulisukama ayi tatuyandiki kuli Yehova mbuli mbotwakalinga ndyetwakalinga bacanike. Nabi kwaamba ayi nkusu shesu shitooya buceya, inga twasebensesha busongo alushibo ndotwakeeya kucafwa bacanike kucita shiinji mulibunga lyakwe Yehova. Munene umwi wakaamba ayi, “Ndyendakatalika kwaalilwa kucita shintu shimwi ceebo ca kucembela, ndakasangalala kwaamba ayi kwakalinga bamakwesu bacanike beelela kusebensa ncito njendakalinga kusebensa.”

2. Ino nshiinshi nsheshi twiiye mumutwi uyu?

² Mumutwi wamana, twakeeya bacanike mbobafubilaamo na baba abushicibusa buyumu abacinene. Mumutwi uyu tutokwiiya pamibo mbuli, kuliceesha, kulibombya, kulumba alimwi abwaabi mbweenga yacafwa bacinene kusebensela pomwi abacanike, akupa kwaamba ayi libungano lyoonse lifubileemo.

3. Kweelana a Bene Filipi 2:3, 4, ino kuliceesha cilaamba nshi alimwi ino Mwineklistu inga kwamucafwa buyani?

³ Bacinene balyeelete kunooliceesha kwaamba ayi bacikoonshe kucafwa bacanike. Muntu uliceesha alabona bamwi ayi balamwiindaawo. (Amubelenge Bene Filipi 2:3, 4.) Bacinene baliceesha balanyumfwisha kwaamba ayi shintu shimwi inga shacitwa munshila shiinji shipusenepusene sheendelana a Malembo, alimwi sheenga shasebensa kabotu. Aboobo tabalangili muntu uli woonse kucita shintu mbuli mbobakalinga kucita kale kale. (Shiku. 7:10) Sombi balanyumfwisha ayi “shintu shicitika pacishi shitooya caaluka,” aboobo inga bayandika kwiiya bwakucita shintu shimwi munshila ipya.​—1 Koli. 7:31.

4. Ino nshiinshi bamatanjilili balubasu nshobacita shikoshenye ashakalinga kucita bene Lefi?

 ⁴ Bacinene baliceesha ndyebatooya cicembela, balanyumfwisha kwaamba ayi inga tabacikonshi kucita shiinji mbuli mbobakalinga kucita kale kale. Kucakubonenaako, amuyeeye pabamatanjilili balubasu. Na bakwanisha myaaka 70, balapekwa ncito imwi. Ano ici inga caba ciyumu. Bakalinga kusangalala kucafwa bashominyinaabo. Nincito njobakalinga kusuni abuumbi alimwi balisuni kutolelela kusebensa ncito iyi. Sombi balanyumfwisha kwaamba ayi bamakwesu bacanike mbeenga basebensa kabotu incito iyi. Aboobo balacita bweenka bwakalinga kucita bene Lefi muciindi cabene Isilaeli, abo bakalinga kucileka kusebensa ncito shiyumu pa tempele na bakwanisha myaaka 50. Bene Lefi aba bacinene, bakalinga kusangalala muncito ili yoonse njeenga bapekwa. Bakalinga kusebensa peela nkusu shabo muncito njobakalinga kucite alimwi akucafwa bacanike. (Shakube. 8:25, 26) Munshiku shino, na bamatanjilili balubasu bakwanisha myaaka 70, balacileka kufwakashila mabungano aanji. Sombi balasebensa cankusu kucafwa akuyuminisha bamakwesu abenankashi mulibungano linemishaabo.

5. Ino mweeya nshi kucakubonenaako caba Dan aba Katie?

⁵ Amuyeeye pacakubonenaako caba Dan abo bakasebensa mbuli mutanjilili walubasu kwamyaaka 23. Ndyebakakwanisha myaaka 70, balo aba Katie bakaabo bakapekwa ncito yakutalika kusebensa mbuli bapainiya balibetele.  Ino batosebensa buyani muncito yabo ipya? Ba Dan bakaamba ayi balicite shiinji shakucita kwiinda kale kale! Balasebensa mikuli njebacite mulibungano, kucafwa bamakwesu kweelela kusebensa mbuli basebenshi bacafwilisha alimwi akwiisha bamwi kwaabanamo lubasu mukushimikila kulibetele mumatauni mucanika bantu baanji alimwi amu majeele. Nobacinene, inga caba ayi muli muncito yaciindi coonse na sobwe, kuli shiinji nsheenga mwaciita kwaamba ayi mucafwe bamwi. Munshila nshi? Amwiiye kusangalala mubukaalo bupya, kusala shakucita shipya alimwi akubikila maano kushintu nsheenga mwacikonsha kucita kuteshi kushintu nsheenga tamucikoonshi.

6. Ino nceebonshi ncintu cabusongo kuba muntu ulibombya? Amwaambe cikoshanyo.

⁶ Muntu ulibombya alishi ayi kuli nsheenga wacikonsha kucita ansheenga taacikonshi. (Mika 6:8) Mukwiinga alalibombya, talangili kucita nsheenga taacikonshi. Aboobo alaakutolelela kusangalala akusebensa cankusu. Muntu ulibombya inga twamukoshanisha kumuntu uli palweendo ancinga uyo wacana biliji ya shisamu. Muntu uyo alyeelete kuseluka kwaamba ayi asubuke mulonga. Nabi kwaamba ayi inga kaya ceenda paniini paniini sombi ananoosena. Amuntu ulibombya mbwaacita. Alashiba ndyaaelete kucileka kucita shintu shimwi kwaamba ayi atolelele kusebensela Yehova akucafwa bamwi.​—Filip. 4:5.

7. Ino Basilayi wakatondesha buyani ayi wakalinga muntu ulibombya?

⁷ Amuyeeye pacakubonenaako cakwe Basilayi, uyo wakalinga kucite myaaka 80 Defedi ndyaakamwiita kwaamba ayi abe womwi wa beshikumupandaako maano. Ceebo cakulibombya, Basilayi wakakaka kucita nshaakamulwiita mwaami. Basilayi wakashiba ayi inga taaciti shiinji ceebo ca kucembela. Aboobo wakaamba ayi musankwa wacanike Kimuamu, aye nguwe. (2 Samwe. 19:35-37) Bweenka mbuli Basilayi, basankwa bacinene balasangalala kupa bacanike coolwe cakusebensa ncito shimwi.

8. Ino Defedi wakatondesha buyani kulibombya ndyaakalinga kusuni kuyaka tempele?

⁸ Mwaami Defedi alakwe wakatondesha cakubonenaako cibotu abuumbi cakulibombya. Wakalinga kusunishishi abuumbi kuyaka ŋanda yakwe Yehova. Sombi Yehova ndyaakamulwiita ayi incito iyi ilaakupekwa kuli Solomoni uyo wakalinga mwanike paciindi ici, Defedi wakakonkela Yehova nshakaamba akucita nsheenga wacikonsha kubamba shakusebensesha pakuyaka tempele. (1 Maka. 17:4; 22:5) Defedi taakwe kuyeeya ayi lakwe ngweenga wasebensa kabotu ncito iyi ceebo cakwaamba ayi Solomoni wakalinga ‘mwanike alimwi utacite lushibo.’ (1 Maka. 29:1) Defedi wakalinga kucishi ayi tempele yakalinga kusa mukuyakwa ceebo cashoolwe Yehova nshaakalinga kubapa kuteshi ciimo na lushibo lwa baabo bakalinga kutanjilila. Bweenka mbuli Defedi, bacinene balatolelela kusebensa cankusu muncito yakwe Yehova nabi kwaamba ayi inga bapekwa ncito imwi. Balicishi kwaamba ayi Yehova alaakupa shoolwe bacanike abo batosebensa ncito balo njobakalinga kusebensa.

9. Ino mukwesu umwi wamu Komiti Yamusampi wakatondesha buyani ayi alalibombya?

⁹ Mukwesu waliina lya Shigeo, ncakubonenaako ca munshiku shino cakutondesha kulibombya. Mu 1976 ndyaakalinga kucite myaaka 30, wakasalwa kusebensa mbuli womwi wa Mukomiti Yamusampi. Mu 2004, wakaba shikubunganya Komiti Yamusampi. Sombi mukuya kwaciindi wakatalika kulinyumfwa ayi nkusu shitooya buceya alimwi wakalinga kutola ciindi cilaamfu kukumanisha ncito. Wakapaililaawo  pamakani aya akuyeeya shibotu sheenga shaswaamo na mukwesu wacanike waba shikubunganya Komiti Yamusampi. Nabi kwaamba ayi ba Shigeo tabatosebensa mbuli shikubunganya Komiti Yamusampi, batolelela kusebensela pomwi abamakwesu bamwi bamu Komiti Yamusampi. Kweelana ambotwabona kucakubonenaako cakwe Basilayi, Mwaami Defedi alimwi amukwesu Shigeo, muntu uliceesha alimwi ulibombya taabikili maano kulushibo bacanike ndobacite sombi pankusu shabo. Teshi akanobabona mbuli balwani bakwe, sombi mbuli basebenshinyina.​—Tus. 20:29.

10. Ino bacinene balababona buyani bacanike mulibungano?

¹⁰ Bacinene balabona ayi bacanike nshipo kuswa kuli Yehova alimwi balalumba pasheesho bacanike nshobacita. Na nkusu shabo shaceya, bacinene balalumba na kuli bacanike balyaabite kusebensa ncito alimwi akucafwa libungano.

11. Ino Lute 4:13-16 ilatondesha buyani ayi bacinene balafubilaamo na basumina lucafwo kuswa kubacanike?

¹¹ Naomi ncakubonenaako cibotu abuumbi camu Baibo ca wacinene wakasumina lucafwo kuswa ku wacanike. Pesule lyakwaamba ayi mwanaakwe Naomi musankwa womwi wafwa, Naomi wakalwiita Lute kuboolela kumukwashi wakwe. Lute wakakaka kushiya Naomi. Aboobo wakayaakwe ku Betileemu. Naomi wakasangalala kwaamba ayi Lute wakayaakwe alimwi wakasumina lucafwo lwakwe. (Lute 1:7, 8, 18) Alimwi ici cakabota abuumbi kubanakashi boonse bobilo! (Amubelenge Lute 4:13-16.) Bacinene baliceesha balakonkela cakubonenaako cakwe Naomi.

12. Ino mutumwi Paulo wakatondesha buyani kulumba?

¹² Mutumwi Paulo wakalumba palucafwo ndwaakatambula. Kucakubonenaako, wakalumba Beneklistu baku Filipi pashintu  shakumubili nshobakamutumina. (Filip. 4:16) Wakalumba palucafwo ndwaakatambula kuswa kuli Timoti. (Filip. 2:19-22) Alimwi Paulo wakalumba Lesa pabaabo bakesa mukumuyuminisha ndyaakalinga kutolwa ku Loma mbuli kaili. (Milimo 28:15) Paulo wakalinga musankwa ucite nkusu uyo wakeenda mishiinso ilaamfu kuya cishimikila alimwi akuyuminisha mabungano. Sombi wakalinga muntu uliceesha, alimwi wakasumina lucafwo kuswa kubashominyina.

13. Ino nshiinshi nsheenga bacinene bacita kwaamba ayi batondeshe kulumba pabacanike?

¹³ Nobacinene, kuli shiinji nsheenga mwaciita kwaamba ayi mutondeshe ayi mulalumba bacanike mulibungano. Na kabasuni kumucafwa mububaambo bwa kweenda, kuula shiintu na kumucafwa mushintu shimwi shiyandika, amusumine lucafwo lwabo. Amwiibaluke kwaamba ayi iyi njenshila yomwi Yehova mbwamutondesha lusuno. Alimwi kusumina lucafwo inga kwamupa kuba abushicibusa buyumu abaabo bamucafwa. Aboobo lyoonse munoocafwa beshicibusa banu bacanike kuba abushicibusa buyumu a Yehova, alimwi amubalwiite mbomukondetwe kubabona kabacita shiinji mulibungano. Alimwi amucane ciindi cakubalwiitako nshemwakeendaamo mubuumi. Na mukacite boobo ‘mulaakutondesha ayi mulalumba’ Yehova pabacanike bali mulibungano.​—Kolo. 3:15; Joni 6:44; 1 Tesa. 5:18.

14. Ino Mwaami Defedi wakatondesha buyani mushimu wabwaabi?

¹⁴ Bwaabi ngumubo umwi uyandika abuumbi bacinene ngweenga beeya kucakubonenaako ca Mwaami Defedi. Wakapa maali aanji ashintu shimwi shiyandika kucafwilisha ncito yakuyaka tempele. (1 Maka. 22:11-16; 29:3, 4) Wakacita sheeshi shoonse nabi kwaamba ayi tempele yakalinga kusa mukwiitwa ayi tempele yakwe Solomoni. Na tatucitewo nkusu shakwaabanamo lubasu muncito yakuyaka misena njetusebensesha pakulambila Lesa, inga twatolelela kucafwilisha ncito ishi kwiinda mukupa maali ngeenga twacikonsha. Alimwi inga twacafwa bacanike kwiinda mukubalwiitako nshotweeya mubuumi bwesu.

15. Ino nshintu nshi shiyandika abuumbi Paulo nshaakacitila Timoti?

¹⁵ Amuyeeye pacakubonenaako camushimu wabwaabi mutumwi Paulo ncaakatondesha. Wakalwiita Timoti kuyaakwe muncito yabumishonali alimwi wakamwiisha nshila shipusenepusene sha bwakwiisha akushimikila. (Milimo 16:1-3) Paulo wakaiisha Timoti kucishiba kabotu bwakwiisha akushimikila makani abotu. (1 Koli. 4:17) Lyalo Timoti wakasebensesha nshakeeya kwiishako bamwi bwakushimikila akwiisha.

16. Ino nceebonshi ba Shigeo bakalinga kwiishako bamwi?

¹⁶ Munshiku shino bacinene tabaloondiiwo ayi inga baba batayandiki na baiisha bacanike kutalika kusebensa ncito balo njobakalinga kusebensa mulibungano. Kucakubonenaako, kwamyaaka iinji ba Shigeo balya mbotwalinga twaambawo, bakalinga kwiisha bamakwesu bacanike bamu Komiti Yamusampi. Bakacita sheeshi shoonse kwaamba ayi bacafwilishe kutola panembo incito ya Bwaami mucishi mobasebensela. Aboobo ndyebakacileka kusebensa mbuli shikubunganya Komiti Yamusampi, kwakalinga mukwesu wakaiishikwa kabotu uyo wakapekwa mukuli uyu. Ba Shigeo basebensa Mukomiti Yamusampi kwamyaaka iindilila 45. Alimwi batolelela kusebensesha nshobakeeya kwiishako bamakwesu bacanike. Ncoolwe cinene abuumbi kubantu bakwe Lesa kuba abamakwesu mbuli ba Shigeo!

17. Kweelana a Luka 6:38, ino nshiinshi nsheenga bacinene bapako bamwi?

 ¹⁷ Nobamakwesu abenankashi bacinene, mulatondesha patuba ayi kushoma muli Yehova akushomeka kuli nguwe ncecintu cibotu mubuumi. Kwiinda mucakubonenaako canu, mulatondesha ayi kwiiya alimwi akukonkela njiisho shamu Baibo nkubotu kulindiswe. Mulishi shintu mboshakalinga kucitwa kale kale, sombi mulabona kuyandika kwa kwaaluka na shintu shaaluka. Nobacinene nomwakabombekwa conoono amwebo inga mwacafwa bamwi munshila shiinji. Inga mwabalwiitaako kushiba Yehova mbokwamucafwa kuba alusangalalo mubuumi bwanu. Bacanike balaakusangala kukutika kushintu nshomwakeendamo anshomwakeeya. Na kamutondesha mushimu wabwaabi kwiinda mukwiishako bamwi shintu nshomwakeeya, Yehova alaakumupa shoolwe shiinji abuumbi.​—Amubelenge Luka 6:38.

18. Ino bacinene abacanike inga bacafwana buyani?

¹⁸ Na mwebo nobacinene mwayumya bushicibusa abacanike, mulaakunoocafwana. (Loma. 1:12) Womwi awomwi alicite cintu ciyandika umwi ncaatacite. Bacinene balicite busongo alushibo ndobeeya mubuumi bwabo. Bacanike balicite nkusu. Na bacanike abacinene basebensela pomwi mbuli beshicibusa, balalumbaisha Ishiwesu wakwiculu shilusuno alimwi balacafwa libungano.