1. Ino muntu alalinyumfwa buyani na shikamukowa wakwe wakushikwa mulibungano?

 SA KULI shicibusa na shikamukowa wakakushikwa mulibungano? Ici inga camupa kulinyumfwa cibiibi abuumbi! Nankashi wa liina lya Hilda wakaamba ayi, “Beebangu ndyebakafwa pesule lyakukala mucikwati kwamyaaka 41, ndakayeeya ayi lyakalinga lipenshi linene abuumbi. * Sombi mwanaangu musankwa ndyakakushikwa mulibungano akushiya bakaakwe abana bakwe, lyakalinga lipenshi linene abuumbi kwiindaawo.”

2-3. Kweelana a Kulumbaisha 78:40, 41, ino Yehova alalinyumfwa buyani na basebenshi bakwe bacileka kumusebensela?

² Amuyeeyebo Yehova mbwaakanyumfwa moyo kucisa baanjelo bamwi bamumukwashi wakwe ndyebakamupondokela! (Judi 6) Alimwi amuyeeyebo mbwaakalinga kulinyumfwa bene Isilaeli abo mbaakalinga kusuni ndyebakalinga kumupondokela mankanda aanji. (Amubelenge Kulumbaisha 78:40, 41, NWT.) Amushibe kwaamba ayi Ishiwesu wakwiculu shilusuno alakwe alalinyumfwa cibiibi na shicibusa na shikamukowa wanu wacileka kusebensela nguwe. Alanyumfwishisha buumba mbomucite. Alaakumutondesha nkumbu kwiinda mukumuyuminisha akumucafwa.

³ Mumutwi uyu tutokwiiya nsheenga twaciita kwaamba ayi Yehova atucaafwe kuliyumya na shicibusa nabi shikamukowa wacileka kusebensela nguwe. Tutokwiiya ambweenga twacafwa bamwi bacite shikamukowa wakakushikwa mulibungano. Sombi amuleke tutaangune kubandika pakuyeeya kutabete kabotu nkotweelete kuleya.

4. Ino bashali baanji balalinyumfwa buyani na mwaana wacileka kusebensela Yehova?

⁴ Na mwaana wacileka kusebensela Yehova, liinji bashali balayeeya ayi kuli shiinji nshobakalinga kweelete kucita kwaamba ayi bamucaafwe  kutolelela kusebensela Yehova. Mwanaakwe musankwa ndyakakushikwa mulibungano, mukwesu Luke wakaamba ayi: “Ndakatalika kulipa mulandu. Ndakalinga kulota ashiloto shibiibi pashakacitika. Cimwi ciindi ndakalinga kulila alimwi moyo wakalinga kucisa abuumbi.” Ba Elizabeth abalo bacite mwaana musankwa wakalinga wakushikwa mulibungano, liinji bakalinga kuyeeya ayi: “Mpashi nebo nebanyina kuli shilubo shiinji nshendakacita. Ndakalinyumfwa ayi nshikwe kucita shiinji kwaamba ayi njiishe mwanaangu kusuna Yehova.”

5. Ino ngani ulengesha kwaamba ayi muntu acileeke kusebensela Yehova?

⁵ Tulyeelete kwiibaluka kwaamba ayi Yehova wakapa muntu uli woonse nkusu shakulisalila. Aboobo inga twasalaawo na tunanomunyumfwila nabi sobwe. Baana bamwi tabakalinga kucitewo bashali bakalinga cakubonenaako cibotu. Sombi bakasalawo kusebensela Yehova akutolelela kushomeka kuli nguwe. Bamwi bakalinga kucite bashali bakasebensa cankusu kubaiisha kwaamba ayi basune Yehova. Sombi mukuya kwaciindi bakacileka kumusebensela. Aboobo womwi awomwi wandiswe alyeelete kusalaawo na alaakutolelela kusebensela Yehova. (Joshu. 24:15) Aboobo nobashali nomutolinyumfwa cibiibi ceebo cakwaamba ayi mwanaanu wakacileka kusebensela Yehova, mutanoyeeya ayi ndimwe mwakalengesha!

6. Ino mwanike inga walinyumfwa buyani na bashali bacileka kusebensela Yehova?

⁶ Cimwi ciindi mushali alacileka kusebensela Yehova alimwi akushiya mukwashi wakwe. (Kulu. 27:10) Ici inga capa baana kulinyumfwa cibiibi abuumbi abo bakalinga kulemeka akweelesha kukonkela cakubonenaako ca bashali babo. Esther ucite baishi abo bakalinga bakushikwa mulibungano wakaamba ayi: “Ndakalinga kulila abuumbi mukwiinga ndakabona kwaamba ayi bata tabakwe kuswabo mucancine. Sombi bakasalawo kucilekela limwi kusebensela Yehova. Ndibasuni abuumbi bata. Aboobo ndyebakakushikwa mulibungano, ndakalinga kulisukama abuumbi pabuumi bwabo. Alimwi cimwi ciindi ndakalinga kutilimuka.”

7. Ino Yehova alalinyumfwa buyani pabacanike bacite bashali bakakushikwa mulibungano?

⁷ Nobacanike, na beshiwanu nabi banyinawanu bakakushikwa mulibungano, amushibe kwaamba ayi tutolinyumfwa cibiibi pacakamucitikila! Alimwi amushibe kwaamba ayi Yehova alishi kabotu mbomulinyumfwa. Alimusuni alimwi alikondetwe kwaamba ayi mwatolelela kumusebensela cakushomeka. Alimwi andiswe sobashominyinaanu mulibungano, tulikondetwe. Alimwi amwiibaluke kwaamba ayi teshi ndimwe mwakalengesha bashali banu kusalawo kucita nshebakacita. Bweenka mbotweeya, Yehova wakapa lwaanguluko muntu uli woonse lwakusalawo kumusebensela nabi sobwe. Alimwi muntu uli woonse wakalyaaba akubombekwa alyeelete ‘kulinyamwita mukuli wakwe.’​—Gala. 6:5.

8. Ino nshiinshi nsheenga bamumukwashi bacita ndyebatolangila kwaamba ayi uyo wakakushikwa mulibungano atalike alimwi kusebensela Yehova? (Amubone a kabokosi kacite mutwi utokwaamba ayi “ Amuboolele Kuli Yehova.”)

⁸ Na shicibusa nabi shikamukowa wanu wacileka kusebensela Yehova, mulalangila kwaamba ayi kunembo alaakutalika alimwi kumusebensela. Ino nshiinshi nsheenga mwaciita ndyemutolangila kwaamba ayi atalike alimwi kusebensela Yehova? Amucite shoonse nsheenga mwacikonsha kwaamba ayi mutolelele kuba alushomo luyumu. Na mwacita boobo mulaakutondesha cakubonenaako cibotu kubaabo mbomuli abo mumukwashi, mpashi akuwooyo wakakushikwa mulibungano. Alimwi mulaakuba ankusu shakuliyumya mulipensho lyakulinyumfwa cibiibi. Aboobo ino nshiinshi nsheenga  mwaciita kwaamba ayi mutolelele kuba alushomo luyumu?

9. Ino nshiinshi nsheenga mwaciita kwaamba ayi mutolelele kuba alushomo luyumu? ( Amubone a kabokosi kacite mutwi utokwaamba ayi “Malembo Eenga Amuyuminisha na Shicibusa Nabi Shikamukowa Wacileka Kusebensela Yehova.”)

⁹ Amutolelele kucita shintu shakumushimu. Cilayandika abuumbi kwaamba ayi mwayumya bamwi akuyumya bushicibusa bwanu a Yehova nobeene. Ino nshiinshi nsheenga mwaciita kwaamba ayi mucite boobo? Inga mwayumya lushomo lwanu kwiinda mukutolelela kubelenga Maswi akwe Lesa akukutumana kuyeeyawo alimwi akucanika kumabungano. Ba Joanna bacite beshiwabo alimwi a nankashi yabo bakacileka kusebensela Yehova, bakaamba ayi: “Ndalinyumfwa kukalikana mumoyo na ndabelenga pabantu baambwa mu Baibo mbuli Abigelo, Esita, Jobo, Josefu alimwi a Yesu. Shakubonenaako shabo shilanjuminisha akuncafwa kubona shintu munshila ili kabotu. Inyimbo shilibetele ashalo shilanjuminisha abuumbi.”

10. Ino Kulumbaisha 32:6-8 ilatucafwa buyani kuliyumya na tutolinyumfwa cibiibi abuumbi?

¹⁰ Amulwiite Yehova shoonse shimusukamika. Na mwalinyumfwa cibiibi, amutolelele kupaila kuli nguwe. Amusenge Lesa shilusuno kwaamba ayi amucaafwe kubona shintu bweenka lakwe mbwaashibona alimwi akwaamba ayi ‘amwiishe mbomweelete kweenda, akumupandaako maano.’ (Amubelenge Kulumbaisha 32:6-8.) Ncakwiila mpashi inga camubeta ciyumu kulwiita Yehova mbomutolinyumfwa. Sombi Yehova alanyumfwishisha mbomutolinyumfwa mumoyo. Alimusuni abuumbi alimwi alamuyuminisha ayi munoomulwiita shoonse shili kumoyo wanu.​—Kulo. 34:6; Kulu. 62:7, 8.

11. Kweelana a lilembo lya Bene Ebulu 12:11, ino nceebonshi tulyeelete kukonkela kululika kwa lusuno kwakwe Yehova? (Amubone a kabokosi kacite mutwi utokwaamba ayi “ Kukusha Muntu Mulibungano Kulatondesha ayi Yehova Alitusuni.”)

¹¹ Amukonkele bamanene nshobasala. Kukusha muntu mulibungano mbubaambo Yehova mbwakabikaako.  Ninshila ibotu yakucafwa muntu wakacileka kusebensela Yehova alimwi ilapa kwaamba ayi boonse bafubileemo. (Amubelenge Bene Ebulu 12:11, NWT.) Bamwi mulibungano inga baamba ayi bamanene tabakwe kucita kabotu ndyebakasalawo kwaamba ayi umwi akushikwe mulibungano. Sombi amwiibaluke kwaamba ayi liinji bantu abo tabaambiwo shibiibi pamuntu uyo wakacita cilubo. Tatucishi makani oonse. Aboobo amushome kwaamba ayi bamanene bakalinga mukomiti ya boomboloshi, bakakonkela njiisho shamu Baibo cakubikila maano alimwi ‘akoombooloshela Yehova.’​—2 Maka. 19:6.

12. Ino nshibotu nshi bamwi nshobakacana ceebo cakukonkela bubaambo bwakwe Yehova bwa kululika?

¹² Inga mwacaafwa muntu uyo wakakushikwa mulibungano kutalika alimwi kusebensela Yehova, na mwakonkela kusala kwa bamanene kwakukusha muntu uyo mulibungano. Ba Elizabeth mbotwalinga twaambawo bakaamba ayi: “Cakalinga ciyumu abuumbi kutacita cilicoonse pomwi a mwaneesu musankwa munenebantu. Ndyaakaboshekwa, wakaamba ayi bakacita kabotu kusalawo kumukusha mulibungano. Mukuya kwaciindi wakaamba ayi wakeeya shiiyo shibotu shiinji.” Ba Elizabeth bakatolelela akwaamba ayi: “Ndakeeya ayi kululika kwakwe Yehova lyoonse kuliluleme.” Ba Mark beebabo ba Elizabeth bakaamba ayi: “Ndipakeenda ciindi mwaneesu musankwa wakandwiita ayi alisuni kuboolela mulibungano mukwiinga twakacita shoonse nshetwakalinga kweelete kucita. Ndikondetwe abuumbi kwaamba ayi Yehova wakatucafwa kumunyumfwila.”

13. Ino nciinshi ceenga camucafwa kuliyumya na mutolinyumfwa cibiibi abuumbi?

¹³ Amulwiiteko beshicibusa banyumfwishisha mbomutolinyumfwa. Munoocanika abamakwesu abenankashi beenga bamucafwa kutolelela kubona shintu munshila ili kabotu. (Tus. 12:25; 17:17) Ba Joanna mbotwalinga twaambawo bakaamba ayi: “Ndakalinga kulinyumfwa kuba neenka. Sombi kubandika abeshicibusa mbonshoma kwakancafwa kuliyumya.” Ino nshiinshi nsheenga mwaciita na bamwi mulibungano batalika kwaamba shintu sheenga shapa kwaamba ayi mwiindeewo kulinyumfwa cibiibi?

14. Ino nceebonshi tulyeelete kutolelela kunyumfwilana nkumbu akulekelelana camoyo woonse?

¹⁴ Amubakalikile moyo bamakwesu abenankashi. Inga tatulangili ayi boonse balakwaamba shintu shili kabotu. (Jemu. 3:2) Soonse tatumaninite, aboobo mutakankamani na bamwi tabacishiwo shakwaamba nabi na baamba shintu sheenga shamukalasha. Amwiibaluke kululika Paulo nkwakaamba ayi: “Amutolelele kunyumfwilana nkumbu akulekelelana camoyo woonse, na umwi wabishisha mubye.” (Kolo. 3:13) Nankashi umwi ucite shikamukowa uyo wakalinga wakushikwa mulibungano wakaamba ayi: “Yehova wancafwa kulekelela bamakwesu abenankashi abo bakankalasha ndyebakalinga kweelesha kunjuminisha.” Ino nshiinshi nsheenga bamulibungano bacita kwaamba ayi bacafwilishe mukwashi bacite umwi wakakushikwa mulibungano?

15. Ino nshiinshi nsheenga twaciita kwaamba ayi tucafwe mukwashi umwi bacite wakakushikwa conoono mulibungano?

¹⁵ Amubatambule camaansa obilo ndyebesa kumabungano. Nankashi Miriam wakalinga kulisukama kuya kumabungano mwanike wakwe musankwa ndyakakushikwa mulibungano, wakaamba ayi: “Ndakalinga kuloonda nsheenga bantu baamba. Sombi kwakalinga bamakwesu abenankashi baanji abalo bakalinyumfwa cibiibi pacakacitika  alimwi tabakwe kwaamba shibiibi shili shoonse pamwanike wangu. Ndabalumba abuumbi mukwiinga bakancafwa kutalinyumfwa kuba neenka ndyendakalinga kucite buumba.” Nankashi umwi alakwe wakaamba ayi: “Mwaneesu musankwa ndyaakakushikwa mulibungano, beshicibusa besu bakesa mukutuyuminisha. Bamwi bakatulwiita ayi tabakalinga kucishiwo shakwaamba. Bamwi bakalila andime lyalo bamwi bakantumina nkalata iyuminisha. Nshebakacita shakancafwa abuumbi!”

16. Ino bamulibungano inga bacita buyani kwaamba ayi batolelele kucafwa akuyuminisha baabo bacite shikamukowa wakakushikwa mulibungano?

¹⁶ Amutolelele kucafwa mukwashi bacite shikamukowa wakakushikwa mulibungano. Balisuni kwaamba ayi mubatondeshe lusuno akubayuminisha bunene bunene pacecino ciindi. (Ebu. 10:24, 25) Cimwi ciindi mukwashi bacite shikamukowa wakakushikwa mulibungano, balabona ayi bamwi mulibungano bakacileka kubandikaabo kuba anga abalo bakakushikwa mulibungano. Tatusuniiwo kwaamba ayi banoolinyumfwa boobo! Tulyeelete kunoolumba akuyuminisha bacanike bacite bashali bakacileka kusebensela Yehova. Ba Maria bacite beebaabo bakakushikwa mulibungano akushiya mukwashi bakaamba ayi: “Beshicibusa bamwi bakesa kumisheesu akusa mukuncafwa kuteleka akwiisha bana bangu. Abalo bakalinyumfwa cibiibi abuumbi alimwi bakalila andime. Bakalinga kunjimikaninaako na bantu batalika kwaamba makani akubeca pali ndime. Bakanjuminisha abuumbi!”​—Loma. 12:13, 15.

17. Ino nshiinshi nsheenga bamanene bacita kwaamba ayi bayuminishe baabo bacite buumba?

¹⁷ Nobamanene amusebenseshe coolwe cili coonse nceenga mwacaana kuyuminisha mukwashi bacite shikamukowa wakakushikwa mulibungano. Mulicite mukuli ulibetele wakuyuminisha bashominyinaanu abo bacite shikamukowa wakacileka kusebensela Yehova. (1 Tesa. 5:14) Amucane ciindi cakubayuminisha mabungano kaatana kutalika a pesule lya kubungana. Amubafwakashile kumishaabo akupaila ambabo. Amusebenseabo muncito yakushimikila nabi kubeetako kumishaanu kukulambila kwamukwashi. Bamanene balyeelete kubikila maano kubaabo bacite buumba alimwi akubatondesha nkumbu a lusuno.​—1 Tesa. 2:7, 8.

18. Kweelana a 2 Pita 3:9, ino nciinshi Yehova ncaasuni ayi abo bakacileka kumusebensela bacite?

¹⁸ Yehova “taasuni muntu nabi womwi kunyonyoolwa sombi alisuni kwaamba ayi boonse baane  kuswa kushibiibi shabo.” (Amubelenge 2 Pita 3:9.) Nabi kwaamba ayi muntu wacita cilubo cinene, buumi bwakwe buciyandika kuli Lesa. Amuyeeyebo pamuulo wiinditewo Yehova ngwakalipila—nkokwaamba ayi buumi bwa Mwanaakwe ngwasuni—ceebo ca ndiswe. Calusuno Yehova aleelesha kucafwa baabo bakacileka kumusebensela kuboolela kuli nguwe. Alalangila ayi balaakusalawo kutalika kumusebensela alimwi bweenka mbuli cikoshanyo ca mwaana wakasoweka Yesu ncakaamba mbocitondesha. (Luka 15:11-32) Baanji bakalinga bacileka kusebensela Yehova mukuya kwaciindi bakaboolela alimwi kuli Ishiwabo wakwiculu shilusuno. Alimwi bamakwesu abenankashi bakasangalala abuumbi kubatambula. Ba Elizabeth mbotwalinga twaambawo bakasangalala abuumbi mwanaabo musankwa ndyaakabooshekwa mulibungano. Bakaamba ayi, “Ndalumba abuumbi pabaabo boonse bakatuyuminisha kutolelela kulangila.”

19. Ino nceebonshi inga twatolelela kushoma muli Yehova?

¹⁹ Inga twashoma muli Yehova lyoonse. Taatupi butanjilishi bweenga bwabika buumi bwesu mumapensho. Ngumushali shikwaaba alimwi shinkumbu usuni baabo bamusuni alimwi bamulambila. Inga mwashoma cakutatonsha kwaamba ayi Yehova teshi akamulekeleshewo ndyeshi mukanokwiinda mumapensho. (Ebu. 13:5, 6) Ba Mark mbotwalinga twaambawo bakaamba ayi: “Yehova taakwe kutulekeleshaawo. Ananootucafwa lyoonse ndyetutokwiinda mubukaalo buyumu.” Yehova alaakutolelela kumupa “nkusu shiindaawo nshetucite.” (2 Koli. 4:7) Ncakwiila inga mwatolelela kushomeka alimwi akulangila nabi kwaamba ayi shicibusa na shikamukowa wacileka kusebensela Yehova.